ᐊᖏᕈᑕᐅᔪᖅ
ᐅᑯᓄᖓ:
ᐃᓄᐃᑦ ᓄᓇᕗᑦ ᓄᓇᖁᑎᖓᓂ ᑭᒡᒐᖅᑐᖅᑕᐅᑦᓱᑎᒃ ᑐᓐᖓᕕᒃᑯᓐᓄᑦ ᓄᓇᕗᒻᒥ
ᐊᒻᒪᓗ:
ᑯᐃᓐ ᑭᒡᒐᖅᑐᖅᑎᖓᑦ ᑲᓇᑕᐅᑉ.
ᐃᒪᐃᒻᒪᑦ ᐃᓄᐃᑦ ᑭᒡᒐᑦᑐᖅᑕᐅᓪᓗᑎᒃ ᑐᓐᖓᕕᒃᑯᓐᓄᑦ ᓄᓇᕗᒻᒥ ᓇᒻᒥᓂᖃᕐᓂᕋᕐᒪᑕ ᓄᓇᖃᖅᑳᖅᓯᒪᔫᓪᓗᑎᒃ ᓄᓇᕗᑦ ᓄᓇᖁᑎᖓᓂ, ᐱᓗᐊᖅᑐᒥᒃ ᓇᓗᓇᐃᔭᖅᑕᐅᓯᒪᔪᒥᒃ ᐃᓛᒃᑯᑦ 3-ᒥ, ᑐᓐᖓᕕᖃᖅᓱᑎᒃ ᐱᖅᑯᓯᑐᖃᕐᒥᓂᒃ ᒫᓐᓇᓗ ᐊᑐᕐᓂᕆᕙᑦᑕᒥᓐᓂᒃ ᓄᓇᒥᒃ, ᐃᒪᕐᓂᒃ ᐊᒻᒪᓗ ᓯᑯᓂᒃ ᑐᓐᖓᕕᒋᑦᓱᒋᑦ ᐱᖅᑯᓯᖏᑦ ᐊᑐᖃᑦᑕᕐᓂᖏᓪᓗ;
ᐃᒪᐃᒻᒪᓪᓗ ᐱᖁᔭᕐᔪᐊᖁᑎᑦᑎᓐᓂ ᒪᓕᒐᕐᔪᐊᖅ, 1982 ᐃᓕᑕᖅᓯᒪᓂᖃᕐᒪᑦ ᓇᓗᓇᐃᖅᓯᑦᓱᓂᓗ ᑕᕝᕙᐅᔪᓂᒃ ᓄᓇᖃᖅᑳᖅᓯᒪᔪᓂᒃ ᐊᒻᒪᓗ ᐊᖏᖃᑎᒌᓐᓂᒃᑯᑦ ᐱᔪᓐᓇᐅᑎᖏᑦ ᓄᓇᖃᖃᖅᑕᖅᓯᒪᔪᑦ ᑲᓇᑕᒥ, ᐊᖏᖃᑎᒌᓐᓂᒃᑯᓪᓗ ᐱᔪᓐᓇᐅᑏᑦ ᐱᖃᓯᐅᔾᔨᑦᓱᑎᒃ ᐱᔪᓐᓇᐅᑎᑖᕆᔭᐅᓯᒪᔪᓂᒃ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᑎᒍᑦ;
ᐃᒪᐃᒻᒪᓪᓗ ᐊᖏᖃᑎᒌᑦᑐᑦ ᐊᖏᖃᑎᒌᒻᒪᑎᒃ ᐅᖃᖃᑎᒌᒍᑎᖃᕈᒪᑦᓱᑎᒃ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒥᒃ ᑕᕝᕘᓇ ᐃᓄᐃᑦ ᐱᓂᐊᖅᓱᑎᒃ ᓇᓗᓇᐃᔭᖅᓯᒪᔪᓂᒃ ᐱᔪᓐᓇᐅᑎᓂᒃ ᐱᕚᓪᓕᕈᑎᑦᓴᓂᓪᓗ ᑕᐅᖅᓰᓗᑎᒃ ᓴᒃᑯᐃᓗᑎᒃ ᐱᖃᕐᓂᕐᒥᓂᒃ, ᐱᔪᓐᓇᐅᑎᒥᓂᒃ, ᓇᒻᒥᓂᖃᕐᓂᕋᕐᓂᕐᒥᓂᒃ ᐱᔪᒪᔭᕆᔭᒥᓂᓪᓗ ᑐᓐᖓᕕᖃᕐᓱᑎᒃ ᓇᒻᒥᓂᖃᕐᓂᕐᒥᓂᒃ ᓄᓇᑖᖅᓯᒪᓂᕐᒥᒃ ᑕᐃᔭᐅᓂᕐᒥᒃ;
ᐃᒪᐃᒻᒪᓪᓗ ᐊᖏᖃᑎᒌᑦᑑᒃ ᐅᖃᖃᑎᒌᒍᑎᖃᖅᓯᒪᒻᒪᑕ ᐆᒥᖓ ᓄᓇᑖᕐᓂᑦᒧᑦ ᐊᖏᖃᑎᒌᒍᑎᒥᒃ ᑐᓐᖓᕕᖃᖅᓱᑎᒃ ᑕᑯᑦᓴᐅᑎᑦᓯᑦᓱᑎᓪᓗ ᐅᑯᓇᓐᖓᑦ ᑐᕌᒐᐅᔪᓂᒃ:
ᐱᕕᖃᖅᑎᑦᓯᒍᑕᐅᓗᓂ ᓇᓗᓇᐃᖅᓯᒪᑦᓯᐊᖅᑐᓂᒃ ᑐᑭᓯᓇᖅᑐᓂᓪᓗ ᐱᔪᓐᓇᐅᑎᓂᒃ ᓇᒻᒥᓂᖃᕐᓂᕐᒧᑦ ᐊᑐᖅᑕᐅᓂᖏᓐᓄᓪᓗ ᓄᓇᐃᑦ ᓄᓇᒥᐅᑕᐃᓪᓗ, ᐱᔪᓐᓇᐅᑎᖏᓪᓗ ᐃᓄᐃᑦ ᐃᓚᐅᑎᓐᓂᕐᒧᑦ ᖃᓄᖅᑑᕈᑕᐅᑎᓪᓗᒋᑦ ᐊᑐᖅᑕᐅᓂᖏᑦ, ᐊᐅᓚᑕᐅᓂᖏᑦ ᓴᐳᑎᔭᐅᓂᖏᓪᓗ ᓄᓇᐃᑦ, ᐃᒪᖅ ᓄᓇᒥᐅᑕᐃᓪᓗ, ᐱᖃᓯᐅᑎᑦᓱᓂ ᑕᕆᐅᖅ;
ᐱᕕᖃᖅᑎᑦᓯᒍᑕᐅᓪᓗᓂ ᐃᓄᓐᓄᑦ ᐊᖑᓇᓱᒍᓐᓇᕐᓂᕐᒧᑦ ᐱᔪᓐᓇᐅᑎᓂᒃ, ᐱᔪᓐᓇᐅᑏᓪᓗ ᐃᓚᐅᒍᓐᓇᕐᓂᕐᒧᑦ ᖃᓄᖅᑑᕈᑕᐅᑎᓪᓗᒋᑦ ᐆᒪᔪᐃᑦ ᐊᖑᓇᓱᑦᑕᐅᓂᕆᕙᑦᑕᖏᑦ;
ᐱᕕᖃᖅᑎᑦᓯᒍᑕᐅᓪᓗᓂ ᐃᓄᐃᑦ ᐊᑭᓕᖅᑕᐅᒍᓐᓇᕐᓂᖏᓐᓂᒃ ᐃᓚᐅᑎᒍᓐᓇᕐᓂᖏᓐᓂᓪᓗ ᖃᑭᒪᓇᓱᐊᕈᑎᑦᓴᓄᑦ;
ᐃᓇᑦᓯᒍᑕᐅᓪᓗᓂ ᓇᒻᒥᓂᖅ ᒪᑭᒪᒍᓐᓇᕐᓂᕐᒧᑦ ᐱᖅᑯᓯᖅᑎᒍᓪᓗ ᐃᓅᓯᒃᑯᓪᓗ ᖃᓄᐃᓐᖏᑦᓯᐊᕐᓂᖏᓐᓄᑦ ᐃᓄᐃᑦ;
ᐃᒪᐃᒻᒪᓪᓗ ᐃᓄᐃᑦ, ᓂᕈᐊᕐᓂᖃᖅᓱᑎᒃ ᓅᕙᐃᕝᕙ 3-6-ᒧᓄᑦ, 1992 ᐊᖏᕈᑕᐅᔪᒻᒪᑕ ᐊᖏᕈᑏᑦ ᐱᔪᓐᓇᕐᓂᖃᖅᑎᑦᓯᑦᓱᑎᓪᓗ ᐊᑎᓕᐅᖅᑕᐅᓂᖓᓂᒃ ᑎᓕᔭᐅᓯᒪᔪᓄᑦ ᓯᕗᓕᖅᑎᖏᓐᓄᑦ ᑐᓐᖓᕕᒃᑯᑦ ᓄᓇᕗᒻᒥ;
ᐃᒪᐃᒻᒪᓪᓗ ᐃᓄᐃᑦ ᓂᕈᐊᓚᐅᖅᑎᓪᓗᒋᑦ ᐊᖏᖃᑎᒌᑦᑑᒃ ᐱᔭᕇᔭᔪᒻᒪᑎᒃ ᐃᓛᒃᑯᑦ 40-ᒥᒃ ᐊᓯᖏᓐᓂᓪᓗ ᓇᓗᓇᐃᖅᑕᐅᓯᒪᔪᓂᒃ ᐊᖏᕈᑎᒥ ᐱᔭᕇᔭᖅᑕᐅᑦᓱᑎᓪᓗ ᑎᑎᖅᑲᖏᑦ ᑐᑭᓯᓇᑦᓯᐊᖁᓪᓗᒋᑦ, ᑐᓐᖓᕕᖃᖅᓱᑎᒃ ᐱᔪᓐᓇᕐᓂᕐᒥᓂᒃ ᐊᑖᓂ ᐊᖏᕈᑎᐅᑉ ᐊᖏᖅᑕᐅᓯᒪᓂᖓ ᒪᓕᑦᓱᒍ ᐃᓄᐃᑦ ᓂᕈᐊᕐᓂᖓᒍᑦ;
ᐃᒪᐃᒻᒪᓪᓗ ᑲᓇᑕᒥ ᓯᕗᓕᖅᑏᑦ ᐱᔪᓐᓇᕐᓂᖃᖅᑎᑦᓯᓯᒪᒻᒪᑕ ᒥᓂᔅᑕᒥᒃ ᐊᑎᓕᐅᕈᓐᓇᖁᓪᓗᒍ ᐊᖏᕈᑎᒥᒃ;
ᐃᓕᑕᕆᔭᐅᓪᓗᑎᓪᓗ ᐃᓄᐃᑦ ᐃᑲᔪᖅᓯᓂᖏᑦ ᑲᓇᑕᒥ ᐱᐅᓯᐅᓯᒪᔪᓄᑦ, ᑲᓇᑕᐅᑉ ᖃᓄᐃᑦᑑᓂᖓᓄᑦ ᐊᒻᒪᓗ ᓴᓐᖏᓂᖃᕐᓂᕐᒧᑦ ᐅᑭᐅᖅᑕᖅᑐᒥ;