ARTICLE 18
ᑐᓐᖓᕕᐅᔪᓂᒃ ᖃᐅᔨᒪᔾᔪᑕᐅᓂᐊᖅᑐᑦ ᓇᓗᓇᐃᖅᑕᐅᓂᖏᓐᓄᑦ ᐃᓄᐃᑦ ᓄᓇᖁᑎᖏᑦᑕ
ᐃᓘᓐᓇᐃᓐᓅᖓᔪᑦ
18.1.1 ᑐᓐᖓᕕᓪᓗᐊᑕᐅᔪᖅ ᖃᐅᔨᒪᔾᔪᑕᐅᓗᓂ ᓇᓗᓇᐃᖅᓯᓂᕐᒧᑦ ᐊᐅᓚᓂᖏᖓᓄᑦ ᐃᓄᐃᑦ ᓄᓇᖁᑎᖏᑦᑕ ᐊᑐᐃᓐᓇᐅᑎᑦᓯᓂᖅ ᐃᓄᓐᓄᑦ ᐱᕕᓕᒫᑦᑐᑦ ᓇᓗᓇᐃᖅᓯᓂᕐᒥᒃ ᓄᓇᓂᒃ ᕿᓂᕐᓗᑎᒃ ᐱᔾᔪᑕᐅᔪᓂᒃ ᐃᓄᐃᑦ ᓄᓇᖁᑎᖏᓐᓄᑦ. ᑐᓐᖓᕕᓪᓗᓂ ᐅᓇ ᑐᓐᖓᕕᓪᓗᐊᑕᐅᔪᖅ, ᓇᓗᓇᐃᖅᓯᓂᕐᒧᑦ ᐊᐅᓚᓂᖅ ᐃᓄᐃᑦ ᓄᓇᖁᑎᖏᓐᓂᒃ ᑕᑯᑦᓴᐅᑎᑦᓯᓂᐊᖅᑐᖅ ᐅᑯᓇᓐᖓᑦ:
(a) ᓇᓗᓇᐃᖅᓯᓂᖅ ᐊᑑᑎᒍᓐᓇᖅᑐᖅ ᓄᓇᓂ ᐊᑦᑐᐊᔪᓂ ᑕᖅᑳᓐᖓᑦ ᐱᔪᒪᔭᐅᔪᓂᒃ; ᓇᐅᑐᐃᓐᓇᐃᑦ ᐱᔪᓐᓇᐅᑏᑦ ᐱᔪᒪᓂᐅᔪᓪᓘᓐᓃᑦ ᑕᖅᑳᓐᖓᑦ ᑲᒪᒋᔭᐅᓂᐊᖅᑐᑦ ᐊᔾᔨᒌᒋᑎᑕᐅᓗᑎᒃ; ᓇᓗᓇᐃᖅᓯᓂᖅ ᐊᑑᑎᒍᓐᓇᖅᑐᖅ ᑲᒪᒋᔭᕆᐊᓖᑦ ᑐᓐᖓᕕᒋᓗᒋᑦ;
(b) ᐃᓘᓐᓈᒍᑦ, ᓇᓗᓇᐃᖅᓯᓂᖅ ᐱᖃᓯᐅᔾᔨᒋᐊᖃᓐᖏᑦᑐᖅ ᓄᓇᓂᒃ ᑐᓐᖓᕕᖃᖅᑐᓂᒃ ᑕᖅᑳᓐᖓᑦ ᐱᔪᒪᔭᕆᔭᐅᔪᓂᒃ ᓇᒻᒥᓂᖅᑖᖑᓂᐊᕐᓗᑎᒃ;
(c) ᑐᓐᖓᕕᒋᓗᒋᑦ ᐱᕕᖃᖅᑎᑦᓯᒍᑕᐅᔪᑦ ᑲᒪᓂᕐᒧᑦ ᓄᓇᓕᓐᓂ ᓇᒻᒥᓂᖃᕐᓂᒥᒃ ᓄᓇᒥᒃ, ᓄᓇᐃᑦ ᓇᓗᓇᐃᖅᑕᐅᒍᓐᓇᖅᑐᑦ ᓄᓇᓕᓐᓂ ᓴᓐᓂᐊᓐᓂᓘᓐᓃᑦ, ᓇᓗᓇᐃᖅᓯᓂᖅ ᓄᓇᓂᒃ ᓄᖅᑲᖓᑎᑦᓯᓐᖏᑐᐊᖅᐸᑦ ᓄᓇᓕᓐᓂᒃ ᑲᔪᓯᑎᑦᓯᓂᖏᓐᓂᒃ ᐊᐅᓚᓂᕆᒐᔪᑉᐸᑦᑕᖏᓐᓂᒃ ᓄᖅᑲᖓᑎᑦᓯᖏᓪᓗᑎᓪᓗ ᐱᕈᖅᐸᓪᓕᐊᓂᕐᒥᒃ;
(d) ᓄᓇᐃᑦ ᓇᓗᓇᐃᖅᑕᐅᒍᓐᓇᖅᑐᑦ ᓄᓇᓕᒫᓂ ᒫᓐᓇ ᐱᔭᐅᓯᒪᔪᓂ, ᓯᕗᓂᑦᑎᓂᓘᓐᓃᑦ ᐱᔭᕆᐊᖃᕆᐊᖏᑦ ᓂᕆᐅᓇᖅᑐᓂᒃ ᐆᒪᔪᐃᑦ ᕿᑐᕐᖏᐅᕐᕕᖏᓐᓂᒃ, ᓴᐳᑎᔭᐅᓯᒪᔪᓂᒃ, ᒥᓐᖑᐃᕐᓯᕐᕕᓐᓂᒃ, ᐃᑦᓴᕐᓂᑕᖃᕐᕕᓐᓂᒃ ᐅᕝᕙᓗ ᑕᐃᒫᒐᓚᐃᑦ ᓄᓇᐃᑦ ᑐᓂᒪᓂᖃᖅᑐᑦ ᓴᐳᑎᔭᐅᓯᒪᓂᖏᓐᓂᒃ ᐆᒪᔪᐃᑦ ᐆᒪᔪᖃᕐᕖᓪᓘᓐᓃᑦ ᐅᕝᕙᓗ ᖁᕕᐊᒋᓗᒍ ᐱᖅᑯᓰᓪᓘᓐᓃᑦ ᐱᔾᔪᑕᐅᓗᑎᒃ, ᐃᒪᐃᑐᐊᖅᐸᑕ
(i) ᓄᓇᐃᑦ ᑐᓐᖓᕕᖃᕐᓂᐊᖅᑐᑦ ᐱᕕᖃᖅᑎᑦᓯᒍᑕᔪᓂᒃ ᐆᒪᔪᕐᓅᖓᔪᓂᒃ, ᓄᓇᒥᒃ ᐊᐅᓚᑦᓯᓂᕐᒧᑦ, ᒪᓕᒐᕐᓄᓪᓗ ᐃᓘᓐᓇᐃᓐᓄᑦ ᐊᑦᑐᐊᔪᓄᑦ, ᐊᒻᒪᓗ
(ii) ᓇᓗᓇᐃᖅᑕᐅᓯᒪᔪᑦ ᓄᓇᐃᑦ ᒥᓐᖑᐃᕐᓯᕐᕕᖃᑐᐃᓐᓇᕆᐊᓖᑦ, ᐊᒻᒪᓗ ᐃᓗᐊᓂ ᓄᓇᐃᑦ ᐃᑦᓴᕐᓂᑕᖅᑕᓖᑦ, ᐱᐅᓯᑐᖃᖃᕐᕕᒥᓃᑦ ᐅᕝᕙᓗ ᐱᖅᑯᓯᖅᑎᒍᑦ ᐊᓚᒡᒐᐃᑦᑐᑦ, ᓇᓗᓇᐃᖅᑕᐅᒋᐊᖃᓐᖏᑦᑐᑦ; ᓂᕆᐅᒋᔭᐅᔪᖅ ᑭᓪᓕᖏᑦ ᒥᓐᖑᐃᕐᓯᕐᕖᑦ ᓴᖅᑭᕋᔭᕆᐊᖏᑦ ᓇᓗᓇᐃᕐᓯᕐᓂᕐᒧᑦ ᐊᐅᓚᓂᒃᑯᑦ;
(e) ᓇᓗᓇᐃᖅᓯᓂᖅ ᓄᓇᓂᒃ ᐊᑐᖅᑕᐅᖃᑎᒌᑦᑐᓂᒃ ᓄᓇᒋᔭᐅᔪᓂᓪᓗ ᐊᓯᖏᓐᓄᑦ ᓄᓇᖃᖅᑳᖅᓯᒪᔪᓄᑦ ᐱᔭᕇᔭᖅᑕᐅᒍᓐᓇᓐᖏᑦᑐᑦ ᑭᓯᐊᓂ ᐃᓱᒫᓘᑕᐅᔪᑦ ᐊᑦᑐᐊᔪᑦ ᐊᑐᖃᑎᒌᓐᓂᕐᒧᑦ ᖃᓄᖅᑑᕈᑕᐅᑉᐸᑕ;
(f) ᐊᑑᑎᕙᓪᓕᐊᓂᖅ ᑐᓐᖓᕕᒋᓗᒍ, ᓇᓗᓇᐃᖅᓯᓂᖅ ᐅᖓᑖᓅᕆᐊᓐᖏᑦᑐᑦ ᓇᓗᓇᐃᖅᑕᐃᒪᔪᑦ ᓄᓇᐃᑦ ᐱᔭᕆᐊᓖᑦ ᒫᓐᓇ, ᐅᕝᕙᓗ ᓂᕆᐅᓇᖅᑐᑦ ᓯᕗᓂᑦᑎᓐᓂ, ᒐᕙᒪᑐᖃᒃᑯᑦ ᐊᕕᑦᑐᖅᓯᒪᔪᓂᓗ ᒐᕙᒪᐃᑦ ᐃᓪᓗᖁᑎᖏᓐᓄᑦ ᐊᐅᓚᓂᖏᓐᓄᓘᓐᓃᑦ;
(g) ᐊᑑᑎᕙᓪᓕᐊᓂᖅ ᑐᓐᖓᕕᒋᓗᒍ, ᓇᓗᓇᐃᖅᓯᓂᖅ ᐅᖓᑖᓅᕆᐊᖃᓐᖏᑦᑐᖅ ᓄᓇᓄᑦ ᑭᓐᖒᒪᒋᔭᐅᔪᓄᑦ ᑭᓇᒃᑯᑐᐃᓐᓇᐃᑦ ᐱᔾᔪᑕᐅᓗᑎᒃ ᐊᐅᓚᔾᔪᑏᓪᓘᓐᓃ,ᑦ ᑭᓐᖒᒪᒋᔭᐅᔪᑦ ᑕᑯᑦᓴᕈᓲᑦ ᓇᓗᓇᐃᖅᓯᓂᕐᒧᑦ ᐊᐅᓚᓂᖅᑕᖃᖅᑎᓪᓗᒍ.
(h) ᐊᑑᑎᕙᓪᓕᐊᓂᖅ ᑐᓐᖓᕕᒋᓗᒍ, ᓇᓗᓇᐃᖅᓯᓂᖅ ᐅᖓᑖᓅᕆᐊᓐᖏᑦᑐᖅ 100 ᐃᑎᒐᓪᓗᐊᑦ ᓇᓗᓇᐃᖅᑕᐅᓯᒪᔪᓂᒃ ᓯᓈᓂᒃ; ᐊᒻᒪᓗ
(i) ᐃᓘᓐᓈᒍᑦ, ᓄᓇᐃᑦ ᓇᓗᓴᐃᖅᑕᐅᓂᐊᖅᑐᑦ ᐊᑑᑎᑦᑕᐃᓕᓗᑎᒃ ᓯᖁᑦᑎᓂᕐᒥᒃ.
18.1.2 ᓄᓇᒥᒃ ᓇᓗᓇᐃᖅᓯᓂᖅ ᐊᐅᓚᓂᖃᖅᑎᓪᓗᒍ, ᐃᓄᐃᑦ ᐱᔪᓐᓇᕐᓂᓖᑦ ᓇᓗᓇᐃᖅᓯᓂᕐᒥᒃ ᓄᓇᓂᒃ ᖃᐅᔨᒪᔭᐅᔪᓂᒃ ᓴᓇᓐᖑᐊᒐᑦᓴᖅᑕᖃᕆᐊᖏᑦ ᐃᓄᐃᑦ ᓄᓇᖁᑎᖏᑦ.
18.1.3 ᐊᖏᖃᑎᒌᒃ ᐊᖏᖃᑎᒌᑦᑑᒃ ᐱᕕᖃᖅᑎᑦᓯᒍᑕᐅᔪᓂᒃ ᐅᕙᓂ ᐃᓛᒃᑰᖅᑐᒥ ᒪᓕᑦᓯᒪᔪᑦ ᐊᑦᑐᐊᔪᓄᑦ ᐃᓄᐃᑦ ᓄᓇᖁᑎᖏᓐᓄᑦ ᑎᒍᔭᐅᔪᓄᑦ ᐅᓪᓗᖓᓂ ᓂᕈᐊᕈᑕᐅᑎᓪᓗᒍ ᐊᖏᕈᑎ.
18.1.4 ᒐᕙᒪᒃᑯᑦ ᐃᓄᐃᓪᓘᓐᓃᑦ ᐱᖃᕐᓂᕈᓐᓇᖏᑦᑐᖅ ᐅᕝᕙᓗ ᐊᐅᓚᓂᖃᖅᑎᑦᓯᓗᑎᒃ ᑐᓐᖓᕕᖃᕐᓗᑎᒃ ᒪᓕᓐᖏᓂᕐᒥᒃ ᐆᒥᖓ ᐃᓛᒃᑰᖅᑐᒥ ᐊᑦᑐᐊᔪᓄᑦ ᐃᓄᐃᑦ ᓄᓇᖁᑎᖏᓐᓄᑦ ᑎᒍᔭᐅᔪᓄᑦ ᐅᓪᓗᖓᓂ ᓂᕈᐊᕈᑕᐅᑎᓪᓗᒍ ᐊᖏᕈᑎ.