ᓄᓇᕗᑦ ᑐᙵᕕᒃᑯᑦ ᑎᒥᖓᑦ (NTI) ᓇᓗᙱᑦᑎᐊᕋᓱᒃᐸᒃᐳᑦ ᑕᒪᒃᑯᐊ ᐊᖏᕈᑕᐅᓯᒪᔪᑦ ᓄᓇᕗᒻᒥ ᐊᖏᕈᑏᑦ ᑲᔪᓯᑎᑕᐅᒐᓗᐊᕐᒪᖔᑕ.
ᓄᓇᕗᑦ ᐊᖏᕈᑎᖓᑎᒍᑦ, ᐃᓄᐃᑦ ᑕᐅᖅᓰᓚᐅᖅᓯᒪᔪᑦ ᓄᓇᖃᖅᑳᖅᓯᒪᓂᑰᓂᖏᓐᓄᑦ ᓄᓇᖁᑎᖃᕈᑎᖓᓂᒃ ᐊᑎᖃᕐᓗᑎᑦ ᐱᖅᑯᓯᑐᖃᖅᑎᒍᑦ ᓄᓇᖏᑦ ᓄᓇᕗᑦ ᓄᓇᑖᕆᔭᐅᓯᒪᕝᕕᖏᖕᓄᑦ ᐱᔪᓐᓇᐅᑎᑖᕐᓗᑎᑦ ᐃᑲᔫᓯᐊᖅᑖᖃᑦᑕᕐᓗᑎᓪᓗ ᐋᖅᑭᑦᑕᐅᓯᒪᔪᑦ ᐊᖏᕈᑎᒥ. ᑕᒪᒃᑯᐊ ᐱᔪᓐᓇᐅᑏᑦ ᑐᑦᑕᕐᕕᒋᒻᒪᕆᑉᐸᖏᑦ ᓄᓇᕗᑦ ᑐᙵᕕᒃ ᑎᒥᖓᑕ ᐃᖅᑲᓇᐃᔮᕆᓲᖏᓐᓂᒃ.
ᓄᓇᕗᑦ ᑐᙵᕕᒃ ᑎᒥᖓ ᐅᐸᓗᖓᐃᔭᐃᓲᖑᕗᑦ ᐊᒻᒪᓗ ᐊᐅᓚᑦᑎᓲᑦ ᐃᓄᐃᑦ ᑲᒪᒋᔭᕆᐊᓕᖏᓐᓂᒃ ᐋᖅᑭᑦᑕᐅᓯᒪᓪᓗᑎᑦ ᓄᓇᕗᑦ ᐊᖏᕈᑎᖓᓂ ᐊᒻᒪᓗ ᐃᖅᑲᓇᐃᔮᖃᓲᑦ ᖃᐅᔨᒪᑦᑎᐊᖅᑎᑦᑎᓪᓗᑎᑦ ᒐᕙᒪᑐᖃᒃᑯᑦ ᐊᒻᒪᓗ ᓄᓇᕗᑦ ᒐᕙᒪᖏᑦ ᐱᖁᔭᖅᑎᒍᑦ ᑲᒪᒋᔭᕆᐊᓕᒻᒥᓂᒃ ᐃᓄᓐᓄᑦ ᑲᒪᒋᔭᖃᑦᑎᐊᕋᓗᐊᕐᒪᖔᕐᒥᒃ.
ᓄᓇ, ᐃᒪᖅ ᐊᒻᒪᓗ ᓂᕐᔪᑏᑦ ᑐᑦᑕᕐᕕᓪᓗᐊᑕᐅᒻᒪᑕ ᐃᓄᐃᑦ ᐃᓅᓯᖏᓐᓄᑦ, ᐃᓕᖅᑯᓯᖓᓄᑦ, ᐊᒻᒪᓗ ᖃᓄᐃᑦᑕᐃᓕᒪᓂᖏᓐᓄᑦ. ᓄᓇᕗᑦ ᑐᙵᕕᒃ ᑎᒥᖓ ᐃᖅᑲᓇᐃᔮᖃᓲᑦ ᓴᐳᒻᒥᐅᓯᖅᑕᐅᓯᒪᖁᓪᓗᒋᑦ ᐃᓄᐃᑦ ᐱᔪᓐᓇᐅᑎᖏᑦ ᐊᒻᒪᓗ ᐱᔪᒪᔭᖏᑦ ᑕᒪᒃᑯᓂᖓ ᐃᑲᔪᖅᑐᐃᓯᓐᓈᖅᑐᑎᑦ ᐃᓄᐃᑦ ᓯᕗᓪᓕᐅᑎᖁᔭᕐᒥᓂᒃ ᓄᓇᕗᓕᒫᕐᒥ.
ᐃᖅᑲᓇᐃᔮᕆᓲᕗᑦ ᐅᑯᐊᖑᕗᑦ ᐃᒡᓗᓕᕆᓂᖅ, ᐋᓐᓂᐊᖅᑕᐃᓕᒪᓂᖅ, ᐃᓕᓐᓂᐊᕐᓂᓕᕆᓂᖅ, ᐱᕙᓪᓕᐊᔪᓕᕆᓂᖅ, ᐅᖃᐅᓯᓕᕆᓂᖅ ᐊᒻᒪᓗ ᐃᓕᖅᑯᓯᓕᕆᓂᖅ, ᖃᐅᔨᓴᕐᓂᖅ, ᓄᓇ ᐊᒻᒪᓗ ᐃᒪᖅ, ᐊᒻᒪᓗ ᐊᕙᑎ. ᐃᖅᑲᓇᐃᔭᖃᑎᖃᓲᖑᕗᒍᑦ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᓂ, ᓄᓇᓕᓐᓂ ᐊᒻᒪᓗ ᒐᕙᒪᓂ ᓴᙵᑦᑎᑕᐅᖁᓪᓗᒋᑦ ᐃᓄᐃᑦ ᓄᓇᓕᖏᑦ ᐊᒻᒪᓗ ᖃᐅᔨᒪᑦᑎᐊᖅᑎᑦᑎᓪᓗᑕ ᐃᓄᐃᑦ ᐃᑲᔫᓯᐊᖅᑖᕐᓂᐊᕐᒪᑕ ᐱᔪᓐᓇᐅᑎᖏᓐᓂᒃ ᐊᒻᒪᓗ ᐱᕕᖃᖅᑎᑕᐅᒻᒪᕆᓐᓂᐊᖅᑐᑎᑦ ᒪᓕᑦᑐᒍ ᓄᓇᕗᑦ ᐊᖏᕈᑎᖓ.
ᐃᖅᑲᓇᐃᔮᕗᑦ ᓴᐳᒻᒥᐊᓯᖅᓯᓂᓕᒃ ᐃᓄᐃᑦ ᐱᔪᓐᓇᐅᑎᖏᓐᓂᒃ, ᓴᙵᑦᑎᑕᐅᓗᑎᑦ ᓄᓇᓕᕗᑦ ᐊᒻᒪᓗ ᓴᙱᔪᒥᒃ ᓯᕗᓂᒃᓴᓕᐅᕐᓗᑕ ᐃᓄᖕᓄᑦ ᓄᓇᕗᒻᒥ.