ARTICLE 32

ᓄᓇᕗᒻᒥ ᐃᓅᓯᓕᕆᔨᕐᔪᐊᑦ ᑲᑎᒪᔨᖏᑦ

ᐃᓘᓐᓈᒍᑦ ᑐᓐᖓᕕᐅᔪᑦ

32.1.1 ᑭᓪᓕᖃᖅᑎᑦᓯᒍᑎᒋᓐᖏᒃᑲᓗᐊᕐᓗᒋᑦ ᓇᐅᑐᐃᓐᓇᕐᓂᒃ ᐱᔪᓐᓇᐅᑎᖏᓐᓂᒃ ᐃᓄᐃᑦ ᐅᕝᕙᓗ ᐊᓯᖏᑦᑕ ᑐᓂᒪᓂᕆᔭᖏᑦᑕ ᒐᕙᒪᒃᑯᑦ, ᓯᓚᑖᒍᑦ ᐊᖏᕈᑎᐅᑉ, ᐃᓄᐃᑦ ᐱᔪᓐᓇᕐᓂᓖᑦ ᑕᐃᒪᐃᓕᖓᒻᒪᑦ ᐅᕙᓂ ᐃᓛᒃᑰᖅᑐᒥ ᐃᓚᐅᑎᓐᓂᕐᒥᒃ ᐱᕙᓪᓕᐊᑎᑕᐅᓂᖏᓐᓄᑦ ᐃᓅᓯᓕᕆᓂᕐᒨᖓᔪᑦ ᐱᖅᑯᓯᕐᒧᓪᓗ ᐊᑐᐊᒐᐃᑦ, ᐊᒻᒪᓗ ᐋᖅᑭᓱᖅᑕᐅᑎᓪᓗᒋᑦ ᐃᓅᓯᓕᕆᓂᕐᒨᖓᔪᑦ ᐱᖅᑯᓯᓕᕆᓂᕐᒧᓪᓗ ᐊᐅᓚᓂᐅᔪᑦ ᐱᔨᑦᓯᕋᐅᑏᓪ, ᐱᖃᓯᐅᑎᑦᓱᒃ ᖃᓄᖅ ᑲᔪᓯᑎᑕᐅᓂᕆᒐᔭᖅᑕᖏᑦ, ᐃᓗᐊᓂ ᓄᓇᕗᒻᒥ ᓄᓇᑖᖑᔫᑉ.

ᒐᕙᒪᒃᑯᑦ ᑐᓂᒪᓂᖏᑦ

32.2.1 ᒐᕙᒪᒃᑯᑦ ᑐᓂᒪᓂᖏᑦ ᐊᑖᓂ ᑎᑎᕋᖅᓯᒪᔪᖅ 32.1.1 ᑲᔪᓯᑎᑕᐅᓂᐊᖅᑐᑦ ᒐᕙᒪᒃᑯᓐᓄᑦ:

(a) ᐱᕕᖃᖅᑎᑦᓯᓂᖅ ᐃᓄᓐᓂᒃ ᐃᓚᐅᑎᓐᓂᕐᒥᒃ ᐱᕙᓪᓕᐊᑎᑕᐅᓂᖏᓐᓄᑦ ᐃᓅᓯᕐᒨᖓᔪᑦ ᐱᖅᑯᓯᕐᒧᓪᓗ ᐊᑐᐊᒐᐃᑦ, ᐊᒻᒪᓗ ᐋᖅᑭᓱᖅᑕᐅᓂᖏᓐᓄᑦ ᐃᓅᓯᕐᒨᖓᔪᑦ ᐱᖅᑯᓯᕐᒧᓪᓗ ᐊᐅᓚᓂᐅᔪᑦ ᐱᔨᑦᓯᕋᐅᑏᓪᓗ, ᐱᖃᓯᐅᑎᑦᓱᓂ ᑲᔪᓯᑎᑕᐅᓂᑦᓴᖓ, ᓄᓇᕗᒻᒥ ᓄᓇᑖᖑᔪᒥ; ᐊᒻᒪᓗ

(b) ᑕᑯᑦᓴᐅᑎᑦᓯᒐᓱᐊᕐᓂᖅ ᐃᓄᐃᑦ ᑐᕌᒐᖏᓐᓂᒃ ᑎᑭᑦᓱᒪᔭᖏᓐᓂᓪᓗ ᐃᓂᖓᓅᖅᑕᐅᔪᓂᒃ ᓲᕐᓗ ᐃᓅᓯᓕᕆᓂᕐᒧᑦ ᐱᖅᑯᓯᓕᕆᓂᕐᒧᓪᓗ ᐊᑐᐊᒐᐃᑦ. ᐊᐅᓚᓂᐅᔪᑦ ᐱᔨᑦᓯᕋᐅᑏᓪᓗ ᓄᓇᕗᒻᒥ ᓄᓇᑖᖑᔪᒥ.

ᓴᖅᑭᖅᑕᐅᓂᖓ ᓄᓇᕗᒻᒥ ᐃᓅᓯᓕᕆᔨᕐᔪᐊᒃᑯᑦ ᑲᑎᒪᔨᖏᑦᑕ (ᑲᑎᒪᔩᑦ)

32.3.1 ᓄᓇᕗᒻᒥ ᐃᓅᓯᓕᕆᔨᕐᔪᐊᒃᑯᑦ ᑲᑎᒪᔨᖏᑦ (ᑲᑎᒪᔩᑦ) ᓴᖅᑭᖅᑕᐅᓂᐊᖅᑐᑦ ᖃᐅᔨᒪᔭᐅᑎᑦᓯᓂᐊᖅᑎᓪᓗᒋᑦ ᑐᓐᖓᕕᐅᔪᓂᒃ ᑐᕌᒐᕐᓂᓪᓗ ᑎᑎᕋᖅᓯᒪᔪᓂ 32.1.1 ᐊᒻᒪᓗ 32.2.1, ᐊᓯᖏᓐᓂᒃ ᑎᒥᑕᖃᑐᐃᓐᓇᕆᐊᖃᕋᓗᐊᖅᑎᓪᓗᒍ ᓴᖅᑭᖅᑕᐅᔪᓂᒃ ᐊᖏᕈᑎᒃᑯᑦ ᓯᓚᑖᒍᓪᓘᓐᓃᑦ ᖃᐅᔨᒪᔭᐅᑎᑦᓯᔪᓂᑦᑕᐅᖅ ᑖᒃᑯᓇᓐᖓᑦ ᑐᓐᖓᕕᐅᔪᓂᒃ ᑎᑭᑕᐅᒍᒪᔪᓂᓪᓗ.

32.3.2 ᑲᑎᒪᔩᑦ ᑎᒥᓐᖑᖅᑎᑕᐅᓂᐊᖅᑐᑦ ᐊᐅᓚᓂᖃᕐᓗᑎᒃ ᑮᓇᐅᔭᓕᐅᕋᓱᐊᖅᑎᐅᖏᓪᓗᑎᒃ ᓇᓗᓇᐃᖅᑕᐅᓯᒪᓗᑎᒃ ᐃᓄᓐᓄᑦ ᑎᒥᖁᑕᐅᓗᑎᒃ ᑖᒃᓰᔭᕆᐊᖃᕐᓂᖏᓪᓗ ᑐᓐᖓᕕᖃᕐᓂᐊᖅᑐᑦ ᒪᓕᒐᖏᓐᓂᒃ ᐃᓘᓐᓇᐃᓐᓄᑦ ᐊᑑᑎᔪᑦ.

32.3.3 ᑲᑎᒪᔩᑦ ᐃᑲᔪᕐᓂᐊᖅᑐᑦ ᐃᓄᓐᓂᒃ ᓇᓗᓇᐃᔭᐃᑎᓪᓗᒋᑦ ᖃᐅᔨᒪᔭᐅᑎᑦᓯᑎᓪᓗᒋᓪᓗ ᐃᓅᓯᕐᒧᑦ ᐱᖅᑯᓯᕐᒧᓪᓗ ᐱᕙᓪᓕᐊᓂᕐᒧᑦ ᑐᕌᒐᕐᓂᒃ ᑎᑭᑕᐅᒍᒪᔪᓂᓪᓗ ᐃᓇᑦᓯᓗᑎᓪᓗ ᒐᕙᒪᒃᑯᑦ ᐋᖅᑭᑦᓱᐃᖁᓪᓗᒋᑦ ᐊᑐᓕᖅᑎᑦᓯᓗᑎᓪᓗ ᐃᓅᕐᓯᕐᒧᑦ ᐱᖅᑯᓯᕐᒧᓪᓗ ᐱᕙᓪᓕᐊᓂᕐᒧᑦ ᐊᑐᐊᒐᕐᓂᒃ ᐊᐅᓚᓂᐅᔪᓂᓪᓗ ᓈᒻᒪᓈᖅᓯᒪᔪᓂᒃ ᐃᓄᓐᓄᑦ. ᑕᐃᒪᐃᓐᓂᖓᓄᑦ, ᑲᑎᒫᔨᑦ ᐃᒪᐃᑦᓱᓐᓇᖅᑐᑦ:

(a) ᖃᐅᔨᓴᕐᓂᖃᕐᓗᑎᒃ ᐃᓅᓯᕐᒨᖓᔪᓂᒃ ᐱᖅᑯᓯᕐᓄᓪᓗ ᐃᓱᒫᓗᑕᐅᔪᓂᒃ;

(b) ᓴᖅᑮᓗᑎᒃ ᑐᓂᐅᖅᑲᐃᓗᑎᓪᓗ ᑐᓴᕋᑦᓴᓂᒃ ᐃᓅᓯᕐᒨᖓᔪᓂᒃ ᐱᖅᑯᓯᕐᒧᓪᓗ ᐃᓄᓐᓄᑦ, ᒐᕙᒪᓄᑦ ᐊᒻᒪᓗ ᑭᓇᒃᑯᑐᐃᓐᓇᕐᓄᑦ;

(c) ᐅᖃᖃᑎᖃᕐᓗᑎᒃ ᐃᖅᑲᓇᐃᔭᖃᑎᖃᕐᓗᑎᓪᓗ ᓄᓇᓕᓐᓂᒃ, ᐊᕕᑦᑐᖅᓯᒪᔪᓂᒃ, ᐊᕕᑦᑐᖅᓯᒪᔪᕐᔪᐊᓂᒃ, ᒐᕙᒪᑐᖃᒃᑯᓐᓂᒃ ᐊᓯᖏᓐᓂᓪᓗ ᑎᒥᐅᔪᓂᒃ ᑲᒪᖃᑕᐅᔪᓂᒃ ᐃᓅᓯᕐᒨᖓᔪᓂᒃ ᐱᖅᑯᓯᕐᒧᓪᓗ ᐃᓱᒫᓘᑕᐅᔪᓂᒃ;

(d) ᖃᐅᔨᒪᑎᑦᓯᓗᑎᒃ ᐃᓄᓐᓂᒃ ᒐᕙᒪᓂᓪᓗ ᐃᓅᓯᕐᒨᖓᔪᓂᒃ ᐱᖅᑯᓯᕐᓄᓪᓗ ᐊᑐᐊᒐᕐᓂᒃ, ᐊᐅᓚᓂᐅᔪᓂᒃ, ᐱᔨᑦᓯᕋᐅᑎᓂᓪᓗ ᐊᑦᑐᐊᔪᓂᒃ ᓄᓇᕗᒻᒥ ᓄᓇᑖᖑᓯᒪᔪᒧᑦ; ᐊᒻᒪᓗ

(e) ᑎᒍᒥᐊᓗᕐᑎᒃ ᐊᓯᖏᓐᓂᒃ ᐊᐅᓚᓂᐅᔪᓂᒃ ᐊᑦᑐᐊᔪᓂᒃ ᐃᓅᓯᕐᒧᑦ ᐱᖅᑯᓯᕐᒧᓪᓗ ᐃᓱᒫᓘᑕᐅᔪᓄᑦ ᓄᓇᕗᒻᒥ ᓄᓇᑖᖑᓯᒪᔪᒥ.

32.3.4 ᑲᑎᒪᔩᑦ ᐸᕐᓇᐃᓂᐊᖅᑐᑦ ᑐᓂᓯᓗᑎᓪᓗ ᐊᕐᕌᒍᑕᒫᖅᓯᐅᑎᓂᒃ ᐅᓂᒃᑳᓂᒃ ᖃᓄᐃᓕᖓᓂᖏᓐᓄᑦ ᐃᓄᐃᑦ ᐱᖅᑯᓯᖓᑦᑕ ᐊᒻᒪᓗ ᐃᓅᓯᐅᔫᑉ ᓄᓇᕗᒻᒥ ᓯᕗᓕᖅᑎᖓᓐᓄᑦ ᐊᕕᑦᑐᖅᓯᒪᔪᕐᔪᐊᓂ ᒐᕙᒪᐃᑦ ᑲᑎᒻᒪᐅᑎᑦᓴᓅᕐᓂᐊᖅᑕᖓᓂ ᒪᓕᒐᓕᐅᕐᕕᒻᒥ, ᐊᒻᒪᓗ ᒥᓂᔅᑕᖓᓐᓄᑦ ᐃᓄᓕᕆᔨᑐᖃᒃᑯᑦ ᑲᑎᒻᒪᐅᑎᑦᓴᓅᕐᓂᐊᖅᑕᖏᓐᓂ ᑲᓇᑕᒥ ᑲᑎᒪᕕᔾᔪᐊᕐᒥ.