ARTICLE 22
ᐱᖁᑎᓪᓚᕆᓐᓄᑦ ᑖᒃᓰᔭᕐᓂᖅ
ᑐᑭᖏᑦ
22.1.1 ᐅᕙᓂ ᐃᓛᒃᑰᖅᑐᒥ:
“ᐱᖁᑎᓪᓚᕆᓐᓄᑦ ᑖᒃᓰᔭᕐᓂᖅ” ᑐᑭᓕᒃ ᓇᐅᑐᐃᓐᓇᖅ ᑖᒃᓰᔭᐅᑎ, ᐊᑭᓕᖅᑐᕆᐊᓕᒃ, ᐊᑭᓕᕋᑦᓴᖅ ᐅᕝᕙᓘᓐᓃᑦ ᓇᐅᑐᐃᓐᓇᖅ ᖃᐅᔨᓴᕈᑕᐅᔪᖅ ᓄᓇᓅᖓᔪᖅ ᐅᖃᐅᓯᐅᔪᓄᑦ ᓄᓇᓕᓐᓂ ᒐᕙᒪᒃᑯᑦ ᐱᔨᑦᓯᕋᐅᑎᖏᓐᓂ ᐅᕝᕙᓗ ᐱᕚᓪᓕᕈᑕᐅᔪᓄᑦ ᐱᖃᓯᐅᑎᑦᓱᑎᒃ ᐃᓕᓐᓂᐊᕐᕖᑦ ᐃᒪᕐᓗ;
“ᓇᒻᒥᓂᖅ ᐱᖁᑎ” ᑐᑭᓕᒃ ᐱᖁᑏᑦ ᐱᓪᓚᕇᑦ ᓇᒻᒥᓂᓪᓚᕆᐅᔪᓪᓗ ᐱᖃᓯᐅᑎᑦᓱᑎᒃ ᓇᒻᒥᓂᓪᓚᕇᑦ ᐱᖁᑎᒋᔭᐅᔪᑦ ᐊᐅᓚᑕᐅᔪᑦ ᐱᖁᑏᓪᓗ ᐸᐸᑕᐅᔪᑦ.
ᐃᓘᓐᓇᐃᓐᓅᖓᔪᖅ
22.2.1 ᑐᓐᖓᕕᒋᑦᓱᒍ ᐅᓇ ᐃᓛᒃᑰᖅᑐᖅ ᐊᒻᒪᓗ ᐊᖏᖁᑎ, ᒐᕙᒪᑐᖃᒃᑯᑦ, ᐊᕕᑦᑐᖅᓯᒪᔪᑦ ᐅᕝᕙᓗ ᓄᓇᓕᓐᓂ ᐊᐅᓚᑦᓯᔪᑦ ᐊᑭᓕᑦᓴᐅᑎᑕᖏᑦ, ᐊᑭᓕᕆᐊᓖᑦ ᐅᕝᕙᓘᓐᓃᑦ ᑖᒃᓰᔭᐅᑏᑦ ᖃᓄᐃᑦᑐᑐᐃᓐᓇᑦᓯᐊᑦ ᕿᒥᕐᕈᔭᐅᓂᐊᖅᑐᑦ ᐊᑭᓕᕆᐊᖃᕐᓗᑎᓪᓗ ᐊᑭᓪᓗᐊᖏᑦ ᓇᓗᓇᐃᖅᑕᐅᔪᑦ ᐃᓄᐃᑦ ᓄᓇᖁᑎᖏᑦᑕ ᐊᒻᒪᓗ, ᑭᓪᓕᖃᕈᑎᒋᓐᖏᒃᑲᓗᐊᖅᓱᒍ ᐃᓘᓐᓇᐃᓐᓅᖓᔪᑦ ᐅᑯᐊ, ᓇᐅᑐᐃᓐᓇᖅ ᐱᒻᒪᕆᐅᑏᑦ, ᐊᑦᓱᐃᑦᑑᒍᑕᐅᔪᑦ, ᐱᖁᑏᑦ, ᐃᓕᓐᓂᐊᕐᕕᓐᓄᑦ ᐃᒪᕐᓄᑦ ᐅᕝᕙᓗ ᐱᓇᓱᐊᕐᕕᓐᓄᑦ ᑖᒃᓯᐅᔪᑦ ᐋᖅᑭᑦᑕᐅᓂᐊᖅᑐᑦ ᐊᑭᓕᕋᑦᓴᐅᓗᑎᓪᓘᓐᓃᑦ ᐊᑭᓪᓗᐊᖓᓂᒃ ᐅᕝᕙᓗ ᖃᐅᔨᓴᖅᑕᐅᓯᒪᔪᒥᒃ ᐊᑭᓪᓕᐊᖏᓐᓂᒃ ᐃᓄᐃᑦ ᓄᓇᖁᑎᖏᑦᑕ.
22.2.2 ᑐᓐᖓᕕᒋᑦᓱᒋᑦ ᑎᑎᕋᖅᓯᒪᔪᑦ 22.2.5, ᐃᓄᐃᑦ ᓄᓇᖁᑎᖏᑦ ᐃᓗᐊᓃᑦᑐᑦ ᕼᐋᒻᒪᓚᒃᑯᑦ ᓄᓇᖁᑎᖏᑦᑕ ᐃᒪᐃᑦᑐᑦ
(a) ᐱᕚᓪᓕᕆᐊᕈᑎᖃᖅᓯᒪᔪᑦ, ᐅᕝᕙᓗ
(b) ᐱᕚᓪᓕᕆᐊᖅᓯᒪᓐᖏᑦᑐᑦ, ᐃᓂᖃᖅᓱᑎᒃ ᐸᕐᓇᑕᐅᓯᒪᔪᒥᒃ ᐊᖏᖅᑕᐅᓯᒪᔪᒥᓪᓗ ᓄᓇᒥ ᓴᓇᕕᑦᓴᐅᑦᓱᑎᓪᓗ,
ᑖᒃᓰᔭᕆᐊᖃᕐᓂᐊᖅᑐᑦ ᐱᖁᑎᓪᓚᕆᓐᓄᑦ ᑖᒃᓰᔭᕈᑕᐅᔪᓂᒃ ᐊᑖᓂ ᒪᓕᒐᐃᑦ ᐃᓘᓐᓇᐃᓐᓅᖓᔪᑦ ᐊᑑᑎᕕᖏᓐᓄᑦ.
22.2.3 ᑐᓐᖓᕕᒋᑦᓱᒍ ᑎᑎᕋᖅᓯᒪᔪᖅ 22.2.5, ᐃᓄᐃᑦ ᓄᓇᖁᑎᖏᑦ ᓯᓚᑖᓃᑦᑐᑦ ᕼᐋᒻᒪᓚᐅᔪᑦ ᓄᓇᓕᖏᑦᑕ ᐱᕚᓪᓕᕆᐊᖅᑕᐅᑦᓯᒪᑦᓱᑎᒃ ᐱᖁᑎᓪᓚᕆᓐᓅᖓᔪᓂᒃ ᑖᒃᓰᔭᕈᑕᐅᓂᐊᖅᑐᑦ ᐊᑖᓂ ᒪᓕᒐᐃᑦ ᐃᓘᓐᓇᐃᓐᓄᑦ ᐊᑦᑐᐊᔪᑦ. ᑕᐃᒪᐃᓕᖓᒐᓗᐊᖅᑎᓪᓗᒍ, ᐱᕚᓪᓕᕈᑎᑦᓴᒥᒃ ᓴᓇᔭᐅᓯᒪᔪᖃᖅᐸᑦ, ᐱᕚᓪᓕᕈᑎᑦᓴᖓᓗ ᓱᕋᑦᓯᒪᓐᖏᑉᐸᑦ, ᖃᐅᔨᓴᖅᑐᖅ ᐋᖅᑮᒍᓐᓇᖅᑐᖅ ᓄᓇᒥᒃ ᓯᑕᒪᐃᕋᓪᓗᐊᖅᑑᑉ ᐅᖓᑖᓅᓐᖏᑦᑐᖅ ᓄᓇᐅᑉ ᐊᑕᖏᖅᓱᓂ ᐱᕚᓪᓕᕆᐊᖅᑕᐅᓯᒪᓂᖓᑕ.
22.2.4 ᐱᔾᔪᑕᐅᓪᓗᑎᒃ ᑎᑎᕋᖅᓯᒪᔪᖅ 22.2.2 ᐊᒻᒪᓗ 22.2.3, ᐱᕚᓪᓕᕈᑕᐅᓯᒪᔪᓄᑦ ᐱᖃᓯᐅᑎᓐᖏᑦᑐᑦ:
(a) ᐱᕚᓪᓕᕈᑕᐅᓯᒪᔪᑦ ᐱᓯᒪᔪᑦ ᒐᕙᒪᒃᑯᑦ ᑭᓇᒃᑯᑐᐃᓐᓇᐃᓪᓘᓐᓃᑦ ᐊᐅᓚᓂᖓᓐᓂᒃ;
(b) ᓄᓇᓕᕋᓛᑦ
(c) ᓇᐅᑐᐃᓐᓇᖅ ᑮᓇᐅᔭᓕᐅᕋᓱᐊᕐᕕᐅᓐᖏᑦᑐᖅ ᓇᐸᔪᖅ ᐊᑦᑐᐊᔪᖅ ᐆᒪᔪᐃᑦ ᐊᖑᓇᓱᑦᑕᐅᓂᖏᓐᓄᑦ, ᐱᖃᓯᐅᑎᑦᓱᑎᒃ ᐃᓪᓗᕋᓛᑦ, ᓄᓇᓖᑦ, ᑐᐲᑦ ᖃᓇᖏᑦ, ᒥᑭᒋᐊᑦ, ᕿᓐᓃᑦ, ᓴᐳᑏᑦ; ᐅᕝᕙᓗ
(d) ᓇᐅᑐᐃᓐᓇᖅ ᑮᓇᐅᔭᓕᐅᕋᓱᐊᕐᕕᐅᓐᖏᑦᑐᖅ ᓇᐸᔪᖅ ᐊᑦᑐᐊᔪᖅ ᓇᐅᑐᐃᓐᓇᕐᒧᑦ ᐊᓯᐊᓄᑦ ᐱᖅᑯᓯᖅᑎᒍᑦ ᐊᐅᓚᓂᕐᒧᑦ.
22.2.5 ᐃᓄᐃᑦ ᓄᓇᖁᖏᑦ ᐊᑭᓖᑎᑦᓯᒍᑕᐅᒋᐊᖃᓐᖏᑦᑐᑦ, ᓱᓕᓂᕋᕈᑕᐅᒋᐊᖃᕋᑎᓪᓗ, ᐊᑐᖅᑐᐊᖅᑕᐅᒋᐊᖃᓐᖏᑦᑐᑦ, ᐊᑕᒋᐊᖃᓐᖏᑦᑐᑦ, ᐊᑭᓕᕋᑦᓴᓕᐅᕈᑕᐅᒋᐊᖃᓐᖏᑦᑐᑦ, ᑎᒍᔭᐅᒋᐊᖃᓐᖏᑦᑐᑦ, ᐊᑦᓱᕈᖅᑎᑕᐅᓗᑎᒃ ᖃᓄᑐᐃᓐᓇᕐᓗ ᑲᔪᓯᑎᑕᐅᓗᓂ ᑖᒃᓰᔭᖅᑎᑦᓯᓂᖅ ᐱᔾᔪᑕᐅᓪᓗᑎᒃ ᑖᒃᓯᓄᑦ ᐊᑭᓕᑦᓴᕆᔭᐅᔪᑦ. ᑖᒃᓯᓕᕆᔨᒃᑯᑦ ᐃᒪᐃᑦᓱᓐᓇᖅᑐᑦ, ᑭᓯᐊᓂ, ᑲᔪᓯᑎᑦᓯᓗᑎᒃ ᐃᓘᓐᓇᑦᓯᐊᖏᓐᓄᑦ ᓇᒻᒥᓂᖅ ᐱᖁᑎᒋᔭᐅᔪᓄᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ, ᐅᕝᕙᓗ ᓄᓇᕗᒻᒥ ᐸᐸᑦᓯᔨᒃᑯᓐᓄᑦ ᑎᒍᓯᓂᒃᑯᑦ ᓂᐅᕕᐊᑦᓴᖃᕐᓂᒃᑯᓪᓗ ᐅᕝᕙᓗ ᐊᑕᑎᑦᓯᓂᒃᑯᑦ, ᐱᔾᔪᑕᐅᓪᓗᑎᒃ ᓄᐊᑕᐅᓂᖏᑦ ᑖᒃᓯᓕᕆᔨᒃᑯᓐᓄᑦ ᐊᑭᓕᑦᓴᐃᑦ.
22.2.6 ᓇᐅᓕᒫᑦᓯᐊᑦ ᐅᕙᓂ ᐃᓛᒃᑰᖅᑐᒥ, ᐅᕝᕙᓘᓐᓃᑦ ᒪᓕᒐᕐᓂ ᐃᓘᓐᓇᐃᓐᓅᖓᔪᓂ, ᐊᑐᖅᑕᐅᖔᕐᓂᐊᖅᑐᖅ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐅᕝᕙᓘᓐᓃᑦ ᓄᓇᓕᓐᓂ ᐊᐅᓚᑦᓯᔨᔪᑦ ᐃᑎᕈᓐᓇᕐᓂᕐᒥᒃ ᐊᑭᓕᓐᓄᑦ ᐱᔨᑦᓯᕋᐅᑎᓄᑦ ᐊᖏᕈᑎᒧᑦ ᐊᐅᓚᑦᓯᒍᑕᐅᓂᐊᕐᑎᓪᓗᒍ ᓱᓇᒃᑯᑎᖃᖅᑎᑦᓯᓂᕐᒥᒃ ᓄᓇᓕᓐᓂ ᒐᕙᒪᒃᑯᑦ ᐱᔨᑦᓯᕋᐅᑎᖏᓐᓂᒃ ᐃᓄᐃᑦ ᓄᓇᖁᑎᖏᓐᓄᑦ.
22.2.7 ᒐᕙᒪᑐᖃᒃᑯᑦ, ᐊᕕᑦᑐᖅᓯᒪᔪᓂ ᒐᕙᒪᐃᑦ ᐅᕝᕙᓗ ᓄᓇᓕᓐᓂ ᐊᐅᓚᑦᓯᔨᔪᑦ ᐊᑭᓖᑎᑦᓯᒋᐊᖃᓐᖏᑦᑐᑦ, ᐊᑭᓕᕋᑦᓴᓕᐅᕆᒋᐊᖃᓐᖏᑦᑐᑦ ᑖᒃᓰᔭᖅᑎᑦᓯᒋᐊᖃᕋᑎᓪᓗ ᐊᑭᓕᕆᐊᓕᓐᓂᒃ ᐊᑦᑐᐊᔪᓂᒃ ᑎᒍᒥᐊᕐᓂᕐᒧᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᓄᓇᓄᑦ ᐊᑦᑐᐊᔪᓄᑦ ᑎᑎᕋᖅᓯᒪᔪᒧᑦ 19.3.1.