ARTICLE 23
ᐃᓄᐃᑦ ᐃᖅᑲᓇᐃᔭᖅᑐᑦ ᐃᓗᐊᓐᓂ ᒐᕙᒪᐃᑦ
ᑐᑭᖏᑦ
23.1.1 ᐅᕙᓂ ᐃᓛᒃᑰᖅᑐᒥ:
“ᒐᕙᒪᒃᑯᓐᓂ ᐃᖅᑲᓇᐃᔭᕐᓂᖅ” ᐱᖃᓯᐅᔾᔨᔪᖅ:
(a) ᐃᖅᑲᓇᐃᔮᑦ ᒐᕙᒪᑐᖃᒃᑯᓐᓂ ᑭᓇᒃᑯᑐᐃᓐᓇᕐᓂᒃ ᐱᔨᑦᓯᕋᖅᓱᑎᒃ ᑮᓇᐅᔭᓕᕆᔩᑦ ᑲᑎᒪᔨᖏᑦ ᐃᖅᑲᓇᐃᔭᖅᑎᑦᓯᑦᓱᑎᒃ,
(b) ᐃᖅᑲᓇᐃᔮᑦ ᐊᕕᑦᑐᖅᓯᒪᔪᓂ ᑭᓇᒃᑯᑐᐃᓐᓇᕐᓂᒃ ᐱᔨᑦᓯᕋᖅᓱᑎᒃ ᑲᒥᓯᓇ ᐃᖅᑲᓇᐃᔭᖅᑎᑦᓯᑎᓪᓗᒍ, ᐱᖃᓯᐅᑎᑦᓱᑎᒃ ᐃᖅᑲᓇᐃᔮᑦ ᓄᓇᑦᓯᐊᕐᒥ ᐃᓪᓗᓕᕆᔨᕐᔪᐊᒃᑯᓐᓂ, ᐊᒻᒪᓗ ᐃᖅᑲᓇᐃᔮᑦ ᓄᓇᓕᓐᓂ ᐊᐅᓚᑦᓯᔨᓄᑦ ᐃᖅᑲᓇᐃᔭᖅᑎᒋᔭᐅᔪᖅ;
“ᒐᕙᒪᒃᑯᓐᓂ ᑎᒥᐅᔪᖅ” ᑐᑭᓕᒃ ᒥᓂᔅᑕᐅᕕᐅᔪᖅ ᐊᔾᔨᒐᓚᖓᓘᓐᓃᑦ ᑎᒥᐅᔪᖅ ᐃᓗᐊᓐᓂ ᒐᕙᒪᐃᑦ ᓄᓇᕗᒻᒥ ᓄᓇᑖᖑᔪᒥ;
“ᐃᖅᑲᓇᐃᔭᖅᓯᓐᓈᑦ ᐃᓕᓐᓂᐊᕐᓂᖅ” ᑐᑭᓕᒃ ᐃᓕᓐᓂᐊᖅᑎᑕᐅᔪᑦ ᐃᓄᐃᑦ ᐃᖅᑲᓇᐃᔭᖅᑐᑦ ᒐᕙᒪᒃᑯᓐᓂ’
“ᐃᓄᐃᑦ ᐃᖅᑲᓇᐃᔮᖏᓐᓄᑦ ᐸᕐᓇᐅᑏᑦ” ᑐᑭᓕᒃ ᐸᕐᓇᐅᑏᑦ ᐋᖅᑭᓱᖅᑕᐅᓯᒪᔪᑦ ᑎᑭᓐᓇᓱᐊᖅᓱᑎᒃ ᑐᕌᒐᖓᔪᓄᑦ ᐱᕕᖃᖅᑎᑦᓯᒍᑕᐅᔪᓄᑦ ᒪᓕᑦᓱᑎᒃ ᐊᐅᓚᓂᐅᓂᐅᔪᓂᒃ ᐋᖅᑭᓱᖅᑕᐅᓯᒪᔪᓂᒃ ᐃᓚᖓ 4-ᒥ;
“ᐃᖅᑲᓇᐃᔭᓐᖏᓂᕐᒥᓂ ᐃᓕᓐᓂᐊᕐᓂᖅ” ᑐᑭᓕᒃ ᐃᓕᓐᓂᐊᖅᑎᑕᐅᔪᑦ ᐃᓄᐃᑦ ᐃᖅᑲᓇᐃᔭᓐᖏᑦᑐᑦ ᒐᕙᒪᒃᑯᓐᓂ ᓂᕆᐅᑦᓱᑎᒃ ᐃᖅᑲᓇᐃᔭᕋᔭᕆᐊᒥᒃ ᒐᕙᒪᒃᑯᓐᓂ;
“ᑭᒡᒐᖅᑐᐃᔪᑦ ᖁᑦᓯᓐᓂᖏᑦ” ᑐᑭᓕᒃ ᖁᑦᓯᓐᓂᖏᑦ ᐃᓄᐃᑦ ᐃᖅᑲᓇᐃᔭᖅᑐᑦ ᒐᕙᒪᒃᑯᑦ ᐃᓗᐊᓂ ᑕᑯᑦᓴᐅᑎᑦᓯᑦᓱᑎᒃ ᖃᑦᓯᐅᓂᖏᓐᓂᒃ ᐃᓄᐃᑦ ᑲᑎᑦᓱᑎᒃ ᓄᓇᕗᒻᒥ; ᑖᓐᓇ ᑐᑭᖓ ᐊᑑᑎᒐᔭᖅᑐᖅ ᐃᓗᐊᓂ ᐃᖅᑲᓇᐃᔮᖑᔪᓕᒫᑦ ᐃᒻᒥᒃᑯᐊᖅᑎᑦᓯᒪᔪᑦ ᐃᓕᓐᓂᐊᕐᓂᐅᓯ.ᒪᔪᓪᓗ;
“ᐊᖅᑭᓱᖅᓯᒪᔪᒃᑯᑦ ᐃᓚᐃᓐᓈᕐᓂᖅ” ᐊᑐᐊᒐᐃᑦ ᐊᐅᓚᓂᐅᔪᓪᓘᓐᓃᑦ, ᑐᕌᒐᖃᖅᓯᒪᓐᖏᑦᑐᑦ ᐊᔾᔨᐅᓐᖏᑎᑦᓯᓂᕐᒥᒃ, ᑭᓯᐊᓂ ᐊᑦᑐᐃᓂᕐᓗᓐᓂᖃᖅᓯᒪᔪᑦ ᐃᓚᒋᔭᐅᔪᓂᒃ ᓇᓗᓇᐃᖅᑕᐅᓯᒪᔪᓂᒃ ᑲᑎᒪᐅᖅᑐᓂᒃ, ᐊᒻᒪᓗ ᐱᔾᔪᑎᑦᓴᖅᑕᖃᕋᓂ;
“ᑭᒡᒐᖅᑐᐃᔨᖃᑦᓯᐊᖏᓐᓂᖅ” ᑐᑭᓕᒃ ᖁᑦᓯᓐᓂᖓᑦ ᐃᓄᐃᑦ ᐃᖅᑲᓇᐃᔭᖅᑐᑦ ᒐᕙᒪᒃᑯᑦ ᐃᓗᐊᓐᓂ ᓄᓇᕗᒻᒥ ᓄᓇᑖᖑᓯᒪᔪᒥ ᐊᑦᓯᓂᖅᓴᐅᑦᓱᑎᒃ ᐃᓄᐃᑦ ᖃᑦᓯᐅᓂᖏᑦ ᑲᑎᑦᓱᑎᒃ ᓄᓇᕗᒻᒥ ᓄᓇᑖᖑᔪᒥ.
ᑐᕋᒐᐃᑦ
23.2.1 ᑐᕌᒐᕆᔭᐅᔪᑦ ᐆᒧᖓ ᐃᓛᒃᑰᖅᑐᒧᑦ ᐊᖏᓪᓕᒋᐊᕆᓂᖅ ᐃᓄᐃᑦ ᐃᓚᐅᑎᓐᓂᖏᓐᓂᒃ ᒐᕙᒪᒃᑯᓐᓂ ᐃᖅᑲᓇᐃᔭᕐᓂᕐᒧᑦ ᓄᓇᕗᒻᒥ ᑭᒡᒐᖅᑐᐃᓂᕐᒧᑦ ᖁᑦᓯᓂᕐᒨᖓᔪᖅ. ᐃᓕᑕᕆᔭᐅᔪᑦ ᑎᑭᐅᑎᓂᖅ ᑕᕝᕗᖓ ᑐᕌᒐᕐᒧᑦ ᐊᐅᓚᔾᔭᒋᐊᕈᑕᐅᒋᐊᖃᕐᓂᐊᖅᑐᖅ ᐃᓄᓐᓄᑦ ᒐᕙᒪᒃᑯᓄᓪᓗ.
23.2.2 ᐱᓇᓱᐊᕐᓗᒍ ᑖᓐᓇ ᑐᕌᒐᖅ, ᒐᕙᒪᒃᑯᑦ ᐊᒻᒪᓗ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᑲᑐᔾᔨᖃᑎᒌᓐᓂᐊᖅᑐᑦ ᐱᕙᓪᓕᐊᓂᐅᔪᒥ ᐊᒻᒪᓗ ᐊᑐᓕᖅᑎᑕᐅᓂᖏᓐᓂᒃ ᐃᖅᑲᓇᐃᔮᑦ ᐃᓕᓐᓂᐊᕐᓂᐅᔪᓪᓗ ᓇᓗᓇᐃᔭᖅᑕᐅᓯᒪᔪᑦ ᐊᖏᕈᑎᒥ.
ᐃᓄᐃᑦ ᐃᖅᑲᓇᐃᔭᕐᓂᖏᓐᓂᒃ ᕿᒥᕐᕈᓂᖅ
23.3.1 ᑕᖅᑮᑦ 6 ᐃᓗᐊᓐᓂ ᐅᓪᓗᖓᓐᓂᒃ ᓂᕈᐊᕈᑕᐅᓚᐅᖅᑎᓪᓗᒍ ᐊᖏᕈᑎ ᐊᒻᒪᓗ ᑐᓐᖓᕕᐅᓗᓂ ᐱᕙᓪᓕᐊᓂᖏᓐᓄᑦ ᐊᐅᓚᔾᔭᒋᐊᕈᑕᐅᔪᑦ ᓂᕆᐅᒋᔭᐅᔪᑦ ᐅᕙᓂ ᐃᓛᒃᑰᖅᑐᒥ, ᒐᕙᒪᒃᑯᑦ ᐃᒪᐃᓐᓂᐊᖅᑐᑦ, ᐃᓚᒋᔭᐅᑎᓪᓗᒋᑦ ᓄᓇᕗᒻᒥ ᐃᓕᓐᓂᐊᖅᑐᓕᕆᔨᒃᑯᑦ, ᐊᐅᓚᑦᓯᓂᐊᖅᑐᑦ ᓇᓗᓇᐃᔭᖅᓯᒪᔪᓂᒃ ᖃᐅᔨᓴᕐᓂᐅᔪᒥᒃ ᐃᖅᑲᓇᐃᔭᖅᑐᓂᒃ ᓄᓇᕗᒻᒥ ᓇᓗᓇᐃᕈᑕᐅᓗᓂ ᐊᑐᐃᓐᓇᐅᔪᓂᒃ, ᐱᔪᒪᓂᖃᖅᑐᓂᒃ, ᖁᑦᓯᓐᓂᖓᓂᓪᓗ ᐸᕐᓇᓯᒪᓂᖏᑦᑕ ᐃᓄᐃᑦ ᒐᕙᒪᒃᑯᓐᓂ ᐃᖅᑲᓇᐃᔮᖃᕐᓂᕐᒧᑦ. ᑲᑎᖅᓱᖅᑕᐅᔪᑦ ᐸᐸᑕᐅᓂᐊᖅᑐᑦ ᓄᑖᕈᕆᐊᖅᑕᐅᓕᐅᒥᔮᖅᐸᓪᓗᑎᒃ.
23.3.2 ᐱᔾᔪᑕᐅᔪᖅ ᖃᐅᔨᓴᕐᓂᕐᒧᑦ ᑎᑎᕋᖅᓯᒪᔪᒥᒃ 23.3.1-ᒥ ᖃᐅᔨᓴᕐᓂᖅ ᑕᕝᕙᐅᔪᓂᒃ ᐱᔪᓐᓇᕐᓂᐅᔪᓂᒃ ᐊᒻᒪᓗ ᐃᓕᓐᓂᐊᖅᓯᒪᓂᖏᓐᓂᒃ ᐃᓄᐃᑦ ᐃᖅᑲᓇᐃᔭᖅᑐᑦ ᐃᑲᔪᕈᑕᐅᓗᓂᓗ ᐋᖅᑭᓱᖅᑕᐅᑎᓪᓗᒋᑦ ᐃᓄᐃᑦ ᐃᖅᑲᓇᐃᔮᓄᑦ ᐸᕐᓇᐅᑎᖏᑦ ᐊᒻᒪᓗ ᐃᖅᑲᓇᐃᔭᓐᖏᓂᕐᒥᓂ ᐃᓕᓐᓂᐊᕐᓂᐅᔪᑦ.
23.3.3 ᑐᑭᓯᔭᐅᔪᖅ ᕿᒥᕐᕈᓂᖅ ᑎᑎᕋᖅᓯᒪᔪᒥᒃ 23.2.1 ᑲᑐᓯᐅᑎᔭᐅᓂᐊᖅᑐᖅ ᐱᕈᖅᐸᓪᓕᐊᑎᑦᓯᒍᑕᐅᓗᓂ ᑕᕝᕙᐅᔪᓂᒃ ᑲᑎᖅᓱᖅᓯᒪᔪᓂᒃ ᐱᕕᖃᑐᐊᕋᐃᑉᐸᑦ.
ᐃᓄᐃᑦ ᐃᖅᑲᓇᐃᔭᕐᓂᖏᓐᓄᑦ ᐸᕐᓇᐅᑏᑦ
23.4.1 ᐃᓗᐊᓂ ᐊᕐᕌᒍᐃᑦ ᐱᖓᓱᑦ ᐅᓪᓗᖓᓂᒃ ᓂᕈᐊᕈᑕᐅᓚᐅᖅᑎᓪᓗᒍ ᐊᖏᕈᑎ, ᐊᑐᓂᑦ ᒐᕙᒪᒃᑯᓐᓂ ᑎᒥᐅᔪᑦ ᐸᕐᓇᐃᓂᐊᖅᑐᑦ ᐃᓄᐃᑦ ᐃᖅᑲᓇᐃᔭᕐᓂᕐᒧᑦ ᐸᕐᓇᐅᑎᖏᓐᓂᒃ ᐊᒥᓱᓐᖑᕆᐊᕆᓂᕐᒧᑦ ᑲᔪᓯᑎᑦᓯᓂᕐᒧᓪᓗ ᐃᖅᑲᓇᐃᔭᕐᓂᖏᓐᓂᒃ ᐃᓄᐃᑦ ᑭᒡᒐᖅᑐᐃᓂᕐᒥᒃ ᑯᑦᓯᓐᓂᖃᕐᓗᑎᒃ.
23.4.2 ᐃᓄᓐᓄᑦ ᐃᖅᑲᓇᐃᔭᕐᓂᕐᒧᑦ ᐸᕐᓇᐅᑏᑦ ᐱᖃᓯᐅᔾᔨᒋᐊᓖᑦ ᐅᑯᓄᖓ:
(a) ᕿᒥᕐᕈᓂᖅ ᓇᓗᓇᐃᖅᓯᒍᑕᐅᓪᓗᓂ ᖁᑦᓯᓂᖓᓐᓂᒃ ᑭᒡᒐᖅᑐᐃᓂᖏᑦᑕ ᐃᓄᐃᑦ ᒐᕙᒪᒃᑯᑦ ᑎᒥᖁᑎᖓᓐᓂ ᓇᓗᓇᐃᖅᓯᓗᑎᓪᓗ ᑭᒡᒐᖅᑐᐃᓂᖃᓐᖏᓗᐊᖅᑐᓂᒃ ᐃᖅᑲᓇᐃᔮᑦ ᑲᑎᒪᐅᕐᓂᖏᑦᑎᒍᑦ ᐊᒻᒪᓗ ᖁᑦᓯᓐᓂᖏᑦᑎᒍᑦ ᐊᒻᒪᓗ ᐃᖅᑲᓇᐃᔭᐃᓐᓇᖅᓱᑎᒃ ᐃᖅᑲᓇᐃᔮᓖᑦ ᐊᒻᒪᓗ ᐃᖅᑲᓇᐃᔭᑲᐃᓐᓇᑐᐃᓐᓇᐸᑦᑐᑦ;
(b) ᐊᕕᑦᑐᖅᓯᒪᓗᓂ ᐊᐅᓚᓂᐅᔪᖅ, ᐊᑯᓃᓐᖏᑦᑐᒨᖓᔪᓂᒃ ᑎᑭᑕᑦᓴᓂᒃ ᐊᑯᓐᓈᕿᓂᓪᓗ ᑐᕌᒐᖃᕐᓗᑐᒃ, ᓈᓴᐅᓯᖅᓱᖅᓯᒪᓗᑎᒃ ᑎᑎᖅᑐᖅᓯᒪᓗᑎᓪᓗ ᐃᖅᑲᓇᐃᔮᖑᓐᓇᖅᑐᑦ ᐱᔪᓐᓇᕐᓂᓕᓐᓄᑦ ᐃᓄᓐᓄᑦ ᖁᑦᓯᓕᕇᓐᓂᓕᒫᖏᓐᓂ ᐊᒻᒪᓗ ᐃᖅᑲᓇᐃᔮᑎᒍᑦ ᐊᕕᑦᑐᖅᓯᒪᔪᓂ ᑭᒡᒐᖅᑐᐃᓂᖅᑕᖃᓐᖏᓗᐊᕆᐊᖓ ᓇᓗᓇᐃᖅᑕᐅᓯᒪᔪᒥ; ᑐᕌᒐᐅᔪᑦ ᐃᓱᒪᒋᖃᓯᐅᑎᒋᐊᓖᑦ ᖃᑦᓯᐅᓂᖏᑦ ᐃᓄᐃᑦ ᐱᔪᓐᓇᕐᓂᖃᖅᑐᑦ ᐅᕝᕙᓗ ᐱᔪᓐᓇᖅᓯᒍᓐᓇᑐᐃᓐᓇᕆᐊᓖᑦ, ᓂᕆᐅᒋᔭᐅᔪᑦ ᐊᐅᓚᓂᐅᒋᐊᓖᑦ, ᐊᒻᒪᓗ ᓂᕆᐅᖏᔭᐅᔪᑦ ᓄᖑᑉᐸᓪᓕᐊᓂᐅᒐᔭᖅᑐᑦ;
(c) ᕿᒥᕐᕈᓂᖅ ᐃᖅᑲᓇᐃᔭᖅᑐᓕᕆᓂᕐᒨᖓᔪᓂᒃ, ᐊᑐᐊᒐᕐᓂᒃ, ᐊᐅᓚᓂᐅᕙᑦᑐᓂᒃ ᐊᐅᓚᓂᐅᔪᓂᓪᓗ ᑎᒥᐅᔪᒥ ᓇᓗᓇᐃᔭᐃᓗᑎᒃ ᓇᓪᓕᖏᑦ ᓄᖅᑲᐅᒥᒍᑕᐅᓯᒪᒻᒪᖔᑕ ᐃᖅᑲᓇᐃᔭᖅᑎᐅᒍᓐᓇᖅᑐᓄᑦ, ᖁᕝᕙᕆᐊᕐᓂᕐᒧᑦ, ᐅᕝᕙᓗ ᐊᓯᖏᓐᓄᑦ ᐃᖅᑲᓇᐃᔮᖑᒍᓐᓇᖅᑐᓄᑦ ᐃᓄᓐᓄᑦ;
(d) ᐊᐅᓚᓂᐅᔪᑦ ᑐᓐᖓᕕᖃᖅᑐᑦ ᐋᖅᑭᑦᑕᐅᓯᒪᔪᒥᒃ ᐊᒥᓱᓐᖑᐹᓪᓕᖁᓪᓗᒋᑦ ᐃᖅᑲᓇᐃᔮᖅᑖᖅᑐᑦ ᖁᕝᕙᕆᐊᖅᑕᐅᔪᓪᓗ ᐃᓄᐃᑦ, ᓲᕐᓗ
(i) ᐊᐅᓚᓂᐅᔪᖅ ᐋᖅᑭᑦᑕᐅᓯᒪᔪᑦ ᐲᖅᓯᒍᑕᐅᓪᓗᑎᒃ ᐊᔾᔨᐅᖏᑎᑦᓯᓂᕐᒥᒃ ᐱᖃᓯᐅᑎᑦᓱᑎᒃ ᑖᒃᑯᑑᓐᖏᒃᑲᓗᐊᖅᓱᑎᒃ
– ᐲᖅᑕᐅᓂᖏᑦ ᐊᑑᑎᖃᓐᖏᑦᑐᑦ ᐃᓕᓐᓂᐊᕐᓂᐅᔭᕆᐊᖃᖅᓯᒪᓗᐊᖅᑎᑕᐅᔪᑦ,
– ᐲᖅᑕᐅᓂᖏᑦ ᐃᖅᑲᓇᐃᔮᖃᓕᓂᐅᒋᐊᓖᑦ ᑐᓐᖓᕕᖃᓐᖏᑦᑐᑦ ᐊᑑᑎᔪᓄᑦ ᐃᓱᒪᑦᓴᖅᓯᐅᕈᑕᐅᔪᓄᑦ ᑲᔪᓯᑦᓯᐊᕈᓐᓇᕐᓂᕐᒧᑦ ᐱᔪᓐᓇᕐᓂᕐᒧᓪᓗ,
– ᐊᑕᕐᓂᖅ ᐊᔾᔨᒌᓐᖏᑦᑐᓂᒃ ᖃᐅᔨᓴᕐᓂᐅᔪᓂᒃ ᐊᑑᑎᑦᑕᐃᓗᒍᑕᐅᔪᓂᒃ ᐱᖅᑯᓯᕐᒧᑦ ᐊᐳᖅᓯᒪᓂᕐᒧᑦ,
(ii) ᐃᓗᓕᖅᑐᔪᓂᒃ ᐃᖅᑲᓇᐃᔭᖅᑎᑦᓯᓴᖅᓯᐅᕈᑏᑦ, ᐱᖃᓯᐅᑎᑦᓱᓂ ᑐᓂᐅᖅᑲᖅᑕᐅᓂᖏᑦ ᓂᕕᓐᖓᖅᑎᕆᐊᓖᑦ ᓄᓇᕗᒻᒥ, ᓂᕕᓐᖓᖅᑎᖅᓯᒪᔪᑦ ᐃᓄᑦᑎᑑᕐᓗᑎᒃ ᐊᒻᒪᓗ ᐊᑐᕐᓗᑎᒃ ᑲᓇᑕᒥ ᐅᖃᐅᓯᕐᓂᒃ ᐃᓕᑕᕆᔭᐅᓯᒪᔪᓂᒃ ᐊᑐᕆᐊᓕᓐᓂᒃ,
(iii) ᐃᓚᒍᑦᓯᐅᔾᔨᓂᖅ ᖃᐅᔨᓴᕐᓂᕐᒧᑦ ᐃᓗᓕᕆᔭᐅᒋᐊᓕᓐᓂᒃ ᐃᖅᑲᓇᐃᔮᓂᓪᓗ ᓇᓗᓇᐃᔭᐃᔪᓂᒃ ᐱᔪᓐᓇᕐᓂᐅᒋᐊᓕᓐᓄᑦ ᑐᑭᓯᔭᐅᓯᒪᓗᑎᒃ ᐃᓅᓯᖏᑦ ᐱᖅᑯᓯᖏᓪᓗ ᓄᓇᕗᒻᒥᐅᑦ, ᐱᖃᓯᐅᑎᑦᓱᑎᒃ ᐅᑯᐊ, ᑖᒃᑯᑑᓐᖏᒃᑲᓗᐊᖅᑎᓪᓗᒋᑦ
-ᖃᐅᔨᒪᓂᖅ ᐃᓄᐃᑦ ᐱᖅᑯᓯᖓᓐᓂᒃ, ᐃᓅᓯᖓᓐᓂᒃ, ᖃᑭᒪᓇᓱᐊᕐᓂᕐᒥᓪᓗ,
-ᓄᓇᓕᓐᓂᒃ ᐅᔾᔨᕈᓱᓐᓂᖅ,
-ᐃᓄᑦᑎᑐᑦ ᐅᖃᕈᓐᓇᑦᓯᐊᕐᓂᖅ,
-ᖃᐅᔨᒪᓂᖅ ᐊᕙᑎᐅᑉ ᐃᓗᓕᖏᓐᓂᒃ ᓄᓇᕗᒻᒥ,
– ᐅᑭᐅᖅᑕᖅᑐᒥᒃ ᖃᐅᔨᒪᓂᖅ,
(iv) ᐃᓄᐃᑦ ᐃᓚᐅᑎᓐᓂᖃᕐᓗᑎᒃ ᓂᕈᐊᖅᑎᓄᑦ ᑲᑎᒪᔨᓄᓪᓘᓐᓃᑦ ᐅᕝᕙᓗ, ᐃᓚᐅᑎᓐᓂᖅᑕᖃᕈᓐᓇᖏᑉᐸᑦ, ᐅᖃᐅᔾᔨᒋᐊᕈᓐᓇᕐᓗᑎᒃ ᕿᒥᕐᕈᔨᓂᒃ ᑲᑎᒪᔨᓂᓪᓗ,
(v) ᐊᑐᐃᓐᓇᖃᖅᑎᑦᓯᓂᖅ ᐃᓅᓯᓕᕆᔾᔪᑎᓂᒃ ᐅᔾᔨᕆᓗᐊᓐᖑᐊᕐᓗᒍ ᖃᓄᖅᑑᕈᑎᖃᕐᓂᖅ ᐊᑲᐃᓪᓕᐅᕈᑕᐅᔪᓂᒃ ᐊᑦᑐᐊᔪᓂᒃ ᐊᑐᐃᓐᓇᖃᕈᓐᓇᕐᓂᕐᒧᑦ ᐱᔨᑦᓯᕋᐅᑎᓂᒃ,
(vi) ᐊᑐᐃᓐᓇᐅᑎᑦᓯᓂᖅ ᐃᖅᑲᓇᐃᔮᑉ ᐃᓗᐊᓂ ᐃᓕᓐᓂᐊᕋᑦᓴᓂᒃ ᖁᕝᕙᕆᐊᕈᑎᓂᓪᓗ ᐃᓕᓐᓂᐊᕋᑦᓴᓂᒃ ᓈᒻᒪᓈᖅᓯᒪᔪᓂᒃ ᐃᖅᑲᓇᐃᔮᒧᑦ ᑐᕌᒐᕐᓄᑦ,
(vii) ᖃᐅᔨᒪᔭᐅᑎᑦᓯᓂᖅ ᐃᖅᑲᓇᐃᔭᖅᓯᓐᓈᑦ ᐃᓕᓐᓂᐊᕋᕐᓂᕐᒥᒃ, ᐃᖅᑲᓇᐃᔭᖅᑎᒥᒃ ᐃᓕᓐᓂᐊᕐᓂᖅ ᐊᒻᒪᓗ ᐊᓯᖏᑦ ᐃᖅᑲᓇᐃᔮᒥ ᐃᓕᓐᓂᐊᕋᑦᓴᐃᑦ,
(viii) ᐊᔾᔨᐅᖏᑦᑐᓂᒃ ᐃᓕᓐᓂᐊᕋᑦᓴᖃᕐᓂᖅ,
(ix) ᐊᑐᕐᓂᖅ ᐊᐅᓚᓂᐅᔪᓂᒃ ᑲᔪᓯᓂᖃᑦᓯᐊᖅᓯᒪᔪᓂᒃ ᑎᑭᐅᑎᓂᕐᒧᑦ ᑕᐃᒪᐃᑦᑐᒐᓚᓐᓄᑦ ᑐᕌᒐᕐᓄᑦ ᐊᓯᖏᓐᓂ ᐊᐅᓚᔾᔭᒋᐊᕈᑕᐅᓯᒪᔪᓂ ᒐᕙᒪᒃᑯᓐᓄᑦ, ᐊᒻᒪᓗ
(x) ᐱᖅᑯᓯᖃᖃᑎᒌᓐᖏᓂᕐᒧᑦ ᐃᓕᓐᓂᐊᕐᓂᖅ;
(e) ᓇᓗᓇᐃᖅᓯᓂᖅ ᐊᐅᓚᑦᓯᔨᒻᒪᕆᒻᒥᒃ ᖃᐅᔨᓴᕐᓂᐊᖅᑎᓪᓗᒍ ᐸᕐᓇᐅᑎᓂᒃ; ᐊᒻᒪᓗ
(f) ᖃᐅᔨᓴᕐᓂᕐᒧᑦ ᐅᓂᒃᑳᓕᐅᕐᓂᕐᒧᓪᓗ ᐊᐅᓚᓂᐅᔪᖅ ᐊᑐᓕᖅᑎᑕᐅᓂᖓᓄᑦ ᐸᕐᓇᐅᑎᐅᑉ.
23.4.3 ᐃᖅᑲᓇᐃᔭᕐᓂᕐᒧᑦ ᐸᕐᓇᐅᑏᑦ ᓂᕕᓐᖓᖅᓯᒪᖃᑦᑕᕐᓂᐊᖅᑐᑦ ᑕᑯᑦᓴᒦᓪᓗᑎᒃ ᐃᖅᑲᓇᐃᔭᖅᑎᓄᑦ ᕿᒥᕐᕈᔭᐅᒍᓐᓇᕐᓗᑎᒃ.
23.4.4 ᑕᐃᒪᐃᓕᖓᒐᓗᐊᖅᑎᓪᓗᒋᑦ ᐃᓘᓐᓈᒍᑦ ᑐᕌᒐᐃᑦ ᐅᕙᓂ ᐃᓛᒃᑰᖅᑐᒥ, ᑐᑭᓯᔭᐅᔪᖅ ᐃᓚᖏᑦ ᑎᒥᐅᔪᑦ ᐃᖅᑲᓇᐃᔭᖅᑎᖃᕈᓐᓇᖅᑐᑦ ᐃᓄᐃᓴᑦᑐᓂᒃ ᓄᓇᕗᒻᒥ ᐃᓚᖏᑦ ᐊᑑᑎᔭᐅᓂᖏᑦ ᑕᑉᐱᒃᑯᐊ ᖁᓛᓃᑦᑐᑦ ᐊᐅᓚᓂᐅᔪᑦ ᐊᑐᕐᓂᖃᓐᖏᑐᐃᓐᓇᕆᐊᓖᑦ.
ᐃᖅᑲᓇᐃᔭᕐᓂᐅᑉ ᓯᕗᕐᖓᓂ ᐃᓕᓐᓂᐊᕐᓃᑦ
23.5.1 ᐸᕐᓇᐅᑏᑦ ᓇᓗᓇᐃᔭᖅᑕᐅᓯᒪᔪᑦ ᐃᓚᖓᓂ 4-ᒥ ᐱᔭᕆᐊᖃᕐᓂᐊᖅᑐᑦ ᐊᔾᔨᐅᖏᑦᑐᓂᒃ ᐊᐅᓚᔾᔭᒋᐊᕈᑎᓂᒃ ᐊᑐᐃᓐᓇᐅᑎᑦᓯᒍᑕᐅᓗᑎᒃ ᐃᓄᓐᓄᑦ ᐱᔪᓐᓇᕐᓂᐅᔪᓂᒃ ᐱᔾᔪᑕᐅᒐᔭᖅᑐᓂᒃ ᒐᕙᒪᒃᑯᓐᓂ ᐃᖅᑲᓇᐃᔮᓂᒃ. ᒐᕙᒪᒃᑯᑦ ᐊᒻᒪᓗ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᓴᖅᑮᓂᐊᖅᑐᑦ ᐊᑐᓕᖅᑎᑦᓯᓗᑎᓪᓗ ᐃᖅᑲᓇᐃᔭᕐᓂᐅᑉ ᓯᕗᕐᖓᓂ ᐃᓕᓐᓂᐊᕈᑎᓂᒃ.
23.5.2 ᐱᕕᓕᒫᒃᑯᑦ, ᐸᕐᓇᐅᑏᑦ ᐅᖃᐅᓯᐅᔪᑦ ᑎᑎᕋᖅᓯᒪᔪᒥ 23.5.1 ᐋᖅᑭᑦᑕᐅᓯᒪᓂᐊᖅᑐᑦ ᑎᑭᐅᑎᒍᓐᓇᓈᖅᑕᐅᓗᑎᒃ ᐊᔾᔨᐅᖏᑦᑐᓄᑦ ᑭᓐᖒᒪᒋᔭᐅᔪᓄᑦ ᐃᓄᓐᓄᑦ ᖃᓄᐃᑦᑐᑐᐃᓐᓇᖅᑎᒍᑦ, ᐱᖃᓯᐅᑎᑦᓱᑎᒃ:
(a) ᐃᓕᓐᓂᐊᑎᑦᓯᓂᖅ ᐃᓄᑦᑎᑑᕐᓗᓂ;
(b) ᐃᓕᓐᓂᐊᕐᓂᖅ ᓄᓇᕗᑦ ᐃᓗᐊᓃᓪᓗᓂ;
(c) ᓇᓗᓇᐃᔭᖅᑕᐅᓗᑎᒃ ᐃᓕᓐᓂᐊᕕᑦᓴᐃᑦ ᓄᓇᓖᑦ, ᑐᑭᔭᐅᔪᖅ ᐃᓚᖓᓂ ᐃᓕᓐᓂᐊᕐᓂᐅᔪᑦ ᐃᓚᖏᑦ ᓄᓇᓕᓐᓂ ᐅᐸᒋᐊᑭᑦᑐᓃᒋᐊᖃᕋᔭᕆᐊᖏᑦ ᓄᓇᕗᒻᒥ ᐅᕝᕙᓗ ᐊᓯᖏᓐᓂ ᓄᓇᕗᑦ ᓯᓚᑖᓂ; ᐊᒻᒪᓗ
(d) ᐃᓱᒋᔭᐅᖃᓯᐅᑎᓗᓂ ᐃᓄᐃᑦ ᐱᖅᑯᓯᖓᑦ ᐃᓅᓯᖓᓪᓗ.
ᐃᑲᔪᖅᓯᓂᖅ
23.6.1 ᐃᓕᑕᕆᓗᒍ ᐃᓚᐅᑎᓂᖓᑦ ᐃᓄᐃᑦ ᐃᖅᑲᓇᐃᔮᓄᑦ ᐃᓕᓐᓂᐊᕋᑦᓴᓄᓪᓗ ᐱᔭᕆᐊᖃᕐᓂᐊᖅᑐᑦ ᑎᑭᐅᑎᓂᐊᖅᐸᑦ ᑐᕌᒐᕆᔭᐅᔪᖅ ᓇᓗᓇᐃᖅᑕᐅᓯᒪᔪᖅ ᐃᓚᖓ 2-ᒥ, ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ, ᐱᕕᓕᒫᒃᑯᑦ, ᐊᐅᓚᑦᓯᓂᐊᖅᑐᑦ, ᐃᑲᔪᖅᑕᐅᓗᑎᒃ ᒐᕙᒪᒃᑯᓐᓄᑦ, ᑲᒪᔨᓪᓗᐊᑕᐅᓗᑎᒃ ᓴᖅᑭᖅᑕᐅᓂᖓᓂᒃ ᑲᔪᓯᑎᑕᐅᓂᖏᓐᓂᓪᓗ ᐃᑲᔪᖅᓯᓂᕐᒧᑦ ᐊᐅᓚᓂᐅᔪᑦ ᐱᕚᓪᓕᕈᑕᐅᓗᑎᒃ ᑲᔪᓯᑦᓯᐊᕈᓐᓇᕐᓂᖓᓄᑦ ᐊᐅᓚᓂᐅᔪᑦ ᑐᓐᖓᕕᒋᑦᓱᒍ ᐅᓇ ᐃᓛᒃᑰᖅᑐᒻ.
ᕿᒥᕐᕈᓂᖅ, ᖃᐅᔨᕐᓴᓂᖅ ᒪᓕᑦᓯᐊᕐᓂᓪᓗ
23.7.1 ᑕᓪᓕᒪᖓᓐᓂ ᓇᓪᓕᐅᓂᖅᓯᐅᕐᓂᖃᖅᑎᓪᓗᒍ ᐊᖏᕈᑕᐅᓂᖓᑕ ᐊᖏᕈᑎᐅᑉ, ᐊᒻᒪᓗ ᐊᕐᕌᒍᐃᑦ ᑕᓪᓕᒪᑦ ᐊᓂᒍᕋᐃᑉᐸᑕ ᑭᖑᕐᖓᓂ, ᐅᕝᕙᓗ ᐊᓯᖏᓐᓂ ᐅᓪᓗᓂ ᐊᖏᖃᑎᒌᒍᑕᐅᓯᒪᔪᓂ ᐊᑐᓕᖅᑎᑦᓯᓂᕐᒧᑦ ᕿᒥᕐᕈᔨᓄᑦ, ᕿᒥᕐᕈᔩᑦ ᐋᖅᑭᑦᓱᐃᓂᐊᖅᑐᑦ ᐃᒥᒃᑯᑦ ᕿᒥᕐᕈᔭᐅᓂᖏᓐᓂᒃ ᐃᓄᐃᑦ ᐃᖅᑲᓇᐃᔭᕐᓂᕐᒧᑦ ᐸᕐᓇᐅᑏᑦ ᐊᒻᒪᓗ ᐊᓯᖏᑦ ᐊᐅᓚᔾᔭᒋᐊᕈᑕᐅᓯᒪᔪᑦ ᐊᑖᓂ ᐆᒪ ᐃᓛᒃᑰᖅᑑᑉ. ᐊᑐᓕᖅᑎᑦᓯᓂᕐᒥᒃ ᕿᒥᕐᕈᔩᑦ ᓇᓗᓇᐃᖅᓯᓂᐊᖅᑐᑦ ᐃᓱᒪᓕᐅᕈᑎᖃᕐᓗᑎᓪᓗ ᐊᐅᓚᔾᔭᒋᐊᕈᑎᓂᒃ ᐋᖅᑭᒋᐊᕈᑕᐅᓂᐊᖅᑎᓪᓗᒋᑦ ᓈᒻᒪᓈᖅᓯᒪᓐᖏᑦᑐᓄᑦ ᐊᑐᓕᖅᑎᑕᐅᓂᖓᓄᑦ ᐆᒪ ᐃᓛᒃᑰᖅᑑᑉ. ᐊᑦᑐᐊᔪᓄᑦ ᐃᖅᑲᓇᐃᔭᕐᓂᐅᑉ ᓯᕗᕐᖓᓂ ᐃᓕᓐᓂᐊᕐᓂᕐᒧᑦ ᐸᕐᓇᐅᑎᓄᑦ ᐊᑖᓂ ᐃᓚᖓ 5, ᕿᒥᕐᕈᔩᑦ ᐅᖃᖃᑎᖃᕐᓂᐊᖅᑐᑦ ᓄᓇᕗᒻᒥ ᐃᓕᓐᓂᐊᖅᑐᓕᕆᔨᓂᒃ ᓯᕗᕐᖓᓂ ᓇᓗᓇᐃᔭᐃᓂᐅᑉ ᐅᕝᕙᓗ ᐃᓱᒪᓕᐅᕆᓂᐅᑉ ᐋᖅᑭᒋᐊᕈᑎᑦᓴᓄᑦ ᓈᒻᒪᓐᖏᔾᔪᑕᐅᔪᓄᑦ ᐊᑐᓕᖅᑎᑕᐅᓂᖓᓄᑦ ᐃᓚᖓ 5.
23.7.2 ᖃᐅᔨᔭᐅᔪᑦ ᐃᒥᒃᑯᑦ ᕿᒥᕐᕈᓂᕐᒥᒃ ᐃᓱᒪᓕᐅᕈᑕᐅᔪᓪᓗ ᐊᑐᓕᖅᑎᑦᓯᓂᕐᒥᒃ ᕿᒥᕐᕈᔨᓄᑦ ᑲᑎᑎᑕᐅᓂᐊᖅᑐᑦ ᑖᒃᑯᓄᖓᓪᓗᐊᖅ ᐊᕐᕌᒍᑕᒫᖅᓯᐅᑎᓄᑦ ᐅᓂᒃᑳᓄᑦ ᐸᕐᓇᐃᕐᑕᐅᔪᓄᑦ ᐊᑐᓕᖅᑎᑦᓯᓂᕐᒧᑦ ᕿᒥᕐᕈᔨᓄᑦ ᑐᓐᖓᕕᒋᑦᓱᒍ ᑎᑎᕋᖅᓯᒪᔪᖅ 37.3.3 (h).
ᑲᓇᑕᒥ ᐅᓇᑕᖅᑐᑦᓴᐃᑦ ᐸᓖᓯᒃᑯᓪᓗ
23.8.1 ᐊᓐᓄᕌᖅᓯᒪᔪᑦ ᑲᓇᑕᒥ ᐅᓇᑕᖅᑐᑦᓴᐃᑦ ᐸᓖᓯᒃᑯᓪᓗ ᐃᓚᒍᑦᓯᐅᔾᔭᐅᓯᒪᓐᖏᒃᑲᓗᐊᖅᑎᓪᓗᒋᑦ ᐃᓘᓐᓇᐃᓐᓂ ᐊᑑᑎᔭᐅᒍᓐᓇᖅᑐᓂ ᐅᕙᓂ ᐃᓛᒃᑰᖅᑐᒥ, ᑐᑭᓯᔭᐅᔪᖅ ᐃᓚᖏᑦ ᑖᒃᑯᐊ ᐃᒻᒥᒃᑯᐊᖅᑎᖅᓯᒪᔪᑦ ᒐᕙᒪᒃᑯᓐᓂ ᐃᖅᑲᓇᐃᔮᓂ, ᒫᓐᓇ ᐊᑐᐊᒐᐅᔪᑦ ᐊᒥᓱᓐᖑᐹᓪᓕᑎᑦᓯᓂᕐᒧᑦ ᐃᖅᑲᓇᐃᔭᖅᑎᓂᒃ, ᐃᓕᓐᓂᐊᕋᑦᓴᓂᒃ ᐊᒻᒪᓗ ᐸᐸᑦᓯᓂᕐᒥᒃ ᐃᓄᓐᓂᒃ ᑲᔪᓯᓂᐊᖅᑐᑦ, ᑭᓯᐊᓂ ᑕᑯᑦᓴᐅᑎᑦᓯᔾᔪᑕᐅᓐᖏᑐᐃᓐᓇᕆᐊᓕᒃ ᖁᑦᓯᓕᕇᑦᑐᓂᒃ ᐃᖅᑲᓇᐃᔮᓂᒃ ᐃᓄᖏᓐᓂ ᓄᓇᕗᑦ.
ᓴᓐᖏᓂᖃᕐᕕᖃᕐᓂᖅ
23.9.1 ᑕᐃᒪᐃᓕᖓᒐᓗᐊᖅᑎᓪᓗᒋᑦ ᐊᓯᖏᑦ ᐱᕕᖃᖅᑎᑦᓯᒍᑕᐅᔪᑦ ᐅᕙᓂ ᐃᓛᒃᑰᖅᑐᒥ, ᐃᓄᐃᑦ ᑲᔪᓯᓂᐊᖅᑐᑦ ᐱᔪᓐᓇᕐᓗᑎᒃ ᐱᕚᓪᓕᕈᑎᑦᓴᒥᒃ, ᑕᐃᒫᑦᓴᐃᓐᓇᖅ ᑭᓇᑐᐃᓐᓇᖅᑎᑐᑦ ᐱᔪᒥᓇᕐᓗᑎᒃ, ᓇᓪᓕᑐᐃᓐᓇᖏᓐᓂᒃ ᐊᔾᔨᐅᖏᑦᑐᒥᒃ ᐃᖅᑲᓇᐃᔮᓄᑦ ᐊᐅᓚᓂᐅᔪᓄᑦ, ᐃᖅᑲᓇᐃᔮᒃᑯᑦ ᐊᔾᔨᒌᑎᑦᓯᓂᐅᔪᓄᑦ, ᐊᔾᔨᒌᑦᑐᒥᒃ ᐱᕕᑦᓴᖃᕐᓂᐅᔪᓄᑦ ᐅᕝᕙᓗ ᐊᔾᔨᒐᓚᖏᓐᓂᒃ ᐊᐅᓚᓂᐅᔪᓂᒃ ᑕᕝᕙᐅᑐᐃᓐᓇᕆᐊᓕᓐᓂᒃ, ᑕᐃᒪᐃᓕᐅᒥᔮᖅᐸᓪᓗᑎᒃ, ᐊᒥᓱᓐᖑᐸᓪᓕᐊᑎᑦᓯᓂᕐᒨᖓᔪᓄᑦ ᐅᕝᕙᓗ ᖃᐅᔨᒪᔭᐅᑎᑦᓯᓂᕐᒧᑦ ᐃᖅᑲᓇᐃᔭᕐᓂᖏᓐᓂᒃ ᓄᓇᖃᖅᑳᖅᓯᒪᔪᑦ ᐅᕝᕙᓗ ᐊᓯᖏᑦᑕ ᓇᓗᓇᐃᖅᑕᐅᓯᒪᔪᑦ ᐃᒻᒥᒃᑯᐊᖅᑎᖅᓯᒪᔪᑦ ᐃᓗᐊᓐᓂ ᒐᕙᒪᒃᑯᑦ.