ARTICLE 1

ᑐᑭᖏᑦ

ᑎᑎᕋᖅᓯᒪᓂᖏᑦ

1.1.1 ᑖᒃᑯᓇᓂ ᐊᖏᕈᑎᓂ, ᐊᓯᐊᒍᑦ ᐅᖃᖅᓯᒪᔪᖃᓐᖏᑐᐊᖅᐸᑦ ᐊᖏᕈᑎᒥᒃ ᐅᕝᕙᓗ ᓇᓗᓇᐃᖅᑕᐅᔪᓂ ᑎᑎᕋᖅᓯᒪᓂᖏᑦᑎᒍᑦ:

“ᐊᖏᖃᑎᒌᒍᑎ” ᑐᑭᓕᒃ ᐅᓇ ᐊᑕᖏᖅᓱᓂ ᐊᖏᖃᑎᒌᒍᑎ, ᐱᖃᓯᐅᑎᑦᓱᑎᒃ ᐱᒋᐊᓐᖓᕐᓂᖓᓃᑦᑐᑦ ᓇᓗᓇᐃᔭᐃᒍᑏᓪᓗ;

“ᐊᖏᖃᑎᒌᒍᓐᓇᐃᓪᓗᔪᓄᑦ ᑲᑎᒪᔩᑦ” (ᑲᑎᒪᔩᑦ) ᑐᑭᓕᒃ ᑎᒥᐅᔪᖅ ᓴᖅᑭᖅᑕᐅᓯᒪᔪᖅ ᐊᑖᓂ ᐃᓚᖓ 1 ᐃᓛᒃᑯᑦ 38-ᒥ;

“ᐊᖏᖃᑎᒌᒍᓐᓇᐃᓪᓕᔪᓄᑦ ᓈᓚᑦᑏᑦ” ᑐᑭᓕᒃ ᓈᓚᑦᑏᑦ ᓴᖅᑭᖅᑕᐅᔪᑦ ᐊᑖᓂ ᐃᓛᒃᑯᑦ 38-ᒥ;

“ᐃᖅᑲᖅ” ᑐᑭᓕᒃ ᓄᓇᐃᑦ ᐃᒪᐅᑉ ᐊᑖᓃᑦᑐᑦ ᐃᖅᑲᐃᑦ, ᐃᒪᕐᒦᓐᓂᖏᓐᓄᓪᓗ ᐱᕈᖅᑐᖃᓐᖏᑦᑐᑦ ᐅᕝᕙᓗ ᓇᓗᓇᐃᒃᑯᑕᖅ ᐱᕈᖅᑐᑦ ᑭᓪᓕᖏᓐᓂᒃ ᐃᒪᕐᒨᖓᔪᓂᒃ ᐅᕝᕙᓗ ᑎᑭᐅᒪᔪᓂᒃ ᐃᔾᔪᒧᑦ;

“ᑲᑎᒪᔩᑦ” ᑐᑭᓕᒃ ᐊᖏᖃᑎᒌᒍᓐᓇᐃᓪᓕᔪᓄᑦ ᑲᑎᒪᔩᑦ;

“ᓴᓇᓐᖑᐊᒐᑦᓴᖅ” ᑐᑭᓕᒃ ᐅᒃᑯᓯᑦᓴᖅ ᐆᔭᐅᔭᖅ, ᖃᓄᐃᑦᑐᑐᐃᓐᓇᐃᑦ ᓴᓇᓐᖑᐊᒐᑦᓴᐃᑦ ᓄᓇᕗᑦ ᓄᓇᖁᑎᖓᓂ ᑕᐃᒃᑯᐊ ᓴᓇᓐᖑᐊᒐᑦᓴᐃᑦ ᓴᓇᔭᑦᓴᐅᓪᓗᑎᒃ;

“ᑲᒥᓯᓇ” ᑐᑭᓕᒃ ᑲᒥᓯᓇᖓᑦ ᓄᓇᑦᓯᐊᑉ ᐅᕝᕙᓘᓐᓃᑦ ᓇᓪᓕᑐᐃᓐᓇᖓᑕ ᑭᖑᕝᕕᖅᑎᖓᑕ;

“ᐊᐅᓚᑦᓯᔩᑦ ᑭᒡᒐᖅᑐᖅᑎᖓᑦ” ᑐᑭᓕᒃ ᑲᒥᓯᓇ ᐊᐅᓚᑕᖅ ᐅᖃᐅᔾᔭᐅᒌᖅᓯᒪᑦᓱᓂ ᐊᖏᖅᑕᐅᓯᒪᑦᓱᓂᓗ ᓯᕗᓕᖅᑏᑦ ᑲᑎᒪᔨᖏᓐᓄᑦ;

“ᓴᐳᔾᔨᓯᒪᕕᒃ” ᑐᑭᓕᒃ ᓇᓗᓇᐃᔭᖅᑕᐅᓯᒪᔪᒥ 9.1.1-ᒥ;

“ᑲᑎᒪᔩᑦ” ᑐᑭᓕᒃ ᓄᓇᕗᒻᒥ ᐃᓅᓯᓕᕆᔨᕐᔪᐊᒃᑯᑦ ᑲᑎᒪᔨᖏᑦ;

“ᑯᐃᓐ” ᑐᑭᓕᒃ ᑯᐃᓐ ᑭᒡᒐᖅᑐᖅᑎᐅᓪᓗᓂ ᑲᓇᑕᒥᒃ;

“ᑲᓇᑕᐅᑉ ᒐᕙᒪᒃᑯᖏᑦᑕ ᓄᓇᖁᑎᖏᑦ” ᑐᑭᓕᒃ ᓄᓇᐃᑦ ᐱᒋᔭᐅᔪᑦ ᑯᐃᓐᒧᑦ ᐊᑦᑐᐊᔪᑦ ᒐᕙᒪᒃᑯᓐᓄᑦ ᑎᒍᒥᐊᖅᑕᐅᑦᓱᑎᒃ;

“ᐅᓪᓗᖅ ᐊᖏᖅᑕᐅᓂᖓ ᐊᖏᕈᑎᐅᑉ” ᑐᑭᓕᒃ ᐅᓪᓗᖅ ᓂᕈᐊᕈᑕᐅᓪᓗᓂ ᐱᖁᔭᖅ ᐊᑑᑎᓕᖅᑐᖅ;

“ᓇᓗᓇᐃᖅᑕᐅᓯᒪᔪᑦ ᐃᓄᐃᑦ ᑲᑐᔾᔨᖃᑎᒌᖏᑦ” ᑐᑭᓕᒃ

(a) ᑐᓐᖓᕕᒃᑯᑦ, ᐅᕝᕙᓗ

(b) ᐊᑦᑐᐊᓪᓗᒋᑦ ᐊᐅᓚᓂᐅᔪᑦ ᐊᖏᕈᑎᐅᑉ ᐊᑖᓂ, ᓇᐅᑐᐃᓐᓇᖅ ᑎᒥᐅᔪᖅ ᓇᓗᓇᐃᖅᑕᐅᔪᖅ ᐊᑖᓂ 39.1.3 ᑎᒍᒥᐊᕆᐊᖏᑦ ᑕᐃᑦᓱᒥᖓ ᐊᐅᓚᓂᐅᔪᒥᒃ;

“ᐆᒪᔪᕐᓅᖓᔪᓄᑦ ᐊᕕᑦᑐᖅᓯᒪᔪᓂ ᐊᖏᕈᑏᑦ” ᑐᑭᓕᒃ ᐆᒪᔪᓕᕆᓂᕐᒧᑦ ᐊᖏᕈᑎᖓᑦ ᒪᕐᕉᒃ ᐅᖓᑖᓂᓘᓐᓃᑦ ᒐᕙᒪᒃᑯᖏᓐᓂᒃ ᑲᓇᑕᐅᑉ, ᐊᕕᑦᑐᖅᓯᒪ ᔪᓪᓗ ᑲᓇᑕᒥ;

“ᓯᕗᓕᖅᑏᑦ ᑲᑎᒪᔨᖏᑦ” ᑐᑭᓕᒃ ᓯᕗᓕᖅᑏᑦ ᑲᑎᒪᔨᖏᑦ ᓄᓇᑦᓯᐊᕐᒥ ᓇᐅᑐᐃᓐᓇᕐᓂᓘᓐᓃᑦ ᑭᖑᕝᕕᐅᑎᔪᓂ;

“ᐱᕈᖅᑐᐃᑦ” ᐱᖃᓯᐅᔾᔨᖏᑦᑐᖅ ᓇᐹᖅᑐᓂᒃ ᑮᓇᐅᔭᓕᐅᕈᑕᐅᒍᓐᓇᖅᑐᓂᒃ ᕿᔫᓗᑎᒃ ᐅᕝᕙᓗ ᓴᓇᔭᑦᓴᐅᓗᑎᒃ, ᑭᓯᐊᓂ ᐱᖃᓯᐅᔾᔨᔪᖅ ᓴᓇᔭᑦᓴᓂᒃ ᐱᔭᐅᔪᓂᒃ ᐃᓄᓐᓄᑦ ᐊᑐᖅᑕᐅᓪᓗᑎᒃ ᓄᓇᓕᓐᓂ, ᓄᓇᒥᒃ ᑐᓐᖓᕕᖃᖅᓱᑎᒃ ᐊᐅᓚᓂᐅᔪᑦ ᐊᒡᒐᒧᓪᓗ ᓴᓇᐅᒐᐃᑦ ᓴᓇᔭᐅᓂᖏᑦ;

“ᐳᓪᓚᐃᑦ” ᑐᑭᓕᒃ ᐳᓪᓚᐃᑦ ᐱᖃᓯᐅᑎᑦᓱᑎᒃ ᓄᓇᒦᓐᖔᖅᑐᑦ ᖃᓄᐃᑦᑐᑐᐃᓐᓇᐃᑦ, ᐅᖅᓱᐊᓘᓐᖏᑦᑐᑦ, ᐊᑦᑐᐊᔪᑦ ᐳᓐᓚᓃᓐᖔᖅᓯᒪᔪᓄᑦ;

“ᒐᕙᒪᒃᑯᑦ” ᑐᑭᓕᒃ ᒐᕙᒪᒃᑯᖏᑦ ᑲᓇᑕᐅᑉ ᐅᕝᕙᓘᓐᓃᑦ ᐊᕕᑦᑐᖅᓯᒪᔪᓂ ᒐᕙᒪᐃᑦ ᑕᒪᒃᑮᓪᓘᓐᓃᑦ, ᑎᑎᕋᖅᓯᒪᓂᖏᑦ ᒪᓕᓪᓗᒋᑦ, ᑐᓐᖓᕕᒋᓗᒋᑦ ᐊᕕᑦᑐᖅᓯᒪᓂᖏᑦ ᐅᖃᐅᓯᐅᔪᕐᓗ, ᐅᕝᕙᓗ ᓇᓗᓇᐃᖅᑕᐅᓯᒪᓂᖓ ᑐᓐᖓᕕᒋᓗᒍ 1.1.6;

“ᐊᖑᓇᓱᓐᓂᖅ” ᑐᑭᓕᒃ ᐱᔭᐅᓂᖏᑦ ᐆᒪᔪᐃᑦ, ᐱᖃᓯᐅᑎᑦᓱᓂ ᐊᖑᓇᓱᓐᓂᖅ, ᒥᑭᒋᐊᕐᓂᐊᕐᓂᖅ, ᐃᖃᓗᒐᓱᐊᕐᓂᖅ, ᑐᓐᖓᕕᒋᑦᓱᒋᑦ ᓇᓗᓇᐃᔭᖅᑕᐅᓯᒪᓂᖏᑦ ᐃᖃᓗᓕᕆᓂᕐᒧᑦ ᒪᓕᒐᖅᔪᐊᖅ, ᓄᓗᐊᕐᓂᐊᕐᓂᖅ, ᒪᓐᓂᓯᐅᕐᓂᖅ, ᓄᓂᕙᓐᓂᖅ, ᓄᐊᑦᓯᓂᖅ, ᑲᑎᖅᓱᐃᓂᖅ, ᓇᐅᒃᑭᐊᕐᓂᖅ, ᑐᖁᑦᓯᓂᖅ, ᑎᒍᓯᓂᖅ, ᐅᕝᕙᓘᓐᓃᑦ ᖃᓄᑐᐃᓐᓇᑦᓯᐊᖅ ᐆᒪᔪᕐᓂᖅ;

“ᓄᓇᓕᓐᓂ ᐊᖑᓇᓱᑦᑐᓕᕆᔨᒃᑯᑦ ᑲᑐᔾᔨᖃᑎᒌᖏᑦ” ᑐᑭᓕᒃ ᑕᐃᒫᓪᓗᐊᖅ;

“ᓄᓇᓕᓐᓂ ᐊᖑᓇᓱᑦᑐᓕᕆᔨᒃᑯᑦ ᑲᑐᔾᔨᖃᑎᒌᖏᑦ” ᑐᑭᓕᒃ ᑎᒥᐅᔪᖅ ᐅᖃᐅᓯᐅᔪᖅ ᐊᑖᓂ 5.7.1 ᑎᑭᓪᓗᒍ 5.7.15;

“ᐃᓄᐃᑦ ᐊᑦᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᓐᓇᐅᑎᖏᓐᓄᓪᓗ ᐊᖏᕈᑎ” ᑐᑭᓕᒃ ᑕᐃᒫᓪᓗᐊᖅ ᐅᖃᐅᓯᐅᓯᒪᔪᑦ ᐃᓛᒃᑯᑦ 8-ᒥ 9-ᒥᒃ 26-ᒧᓄᑦ;

“ᐊᑐᓕᖅᑎᑦᓯᓂᕐᒧᑦ ᖃᐅᔨᓴᖅᑏᑦ” ᑐᑭᓕᒃ ᖃᐅᔨᓴᖅᑏᑦ ᓴᖅᑭᖅᑕᐅᔪᑦ ᐊᑖᓂ ᐃᓚᖓ 3 ᐃᓛᒃᑯᑦ 37-ᒥ; “ᐃᓄᒃ” ᑐᑭᓕᒃ

(a) ᐱᔾᔪᑕᐅᓪᓗᑎᒃ 2.7.1 ᐊᒻᒪᓗ 2.7.2 ᐊᒻᒪᓗ ᐃᓚᖓ 1 ᐃᓛᒃᑯᑦ 40-ᒥ, ᐊᒻᒪᓗ ᐅᖃᐅᓯᐅᔪᑦ ᐃᓘᓐᓈᒍᑦ ᐱᐅᓯᐅᓯᒪᔪᓅᖓᔪᑦ, ᓄᓇᖃᖅᑳᖅᓯᒪᔪᓕᒫᑦ, ᐃᓚᖓᓐᓂ ᑕᐃᔭᐅᔪᑦ ᐃᐊᓯᑭᒨᓂᒃ, ᐱᐅᓯᑐᖃᒃᑯᑦ ᓄᓇᖃᖃᑦᑕᖅᓯᒪᔪᓄᑦ, ᒫᓐᓇᓗ ᐊᑐᖅᐸᑦᓱᑎᒃ ᓄᓇᖃᖅᓱᑎᓪᓗ, ᓄᓇᓂᒃ ᐃᒪᕐᓂᓪᓗ ᓄᓇᕗᒻᒦᑦᑐᓂᒃ ᑭᓯᐊᓂ ᐱᖃᓯᔾᐅᔨᖏᑦᑐᑦ ᐃᓄᓐᓂᒃ ᓄᓇᑖᖃᑕᐅᓯᒪᔪᓄᑦ ᑎᑎᕋᖅᑕᐅᓯᒪᔪᓂᒃ ᐊᓯᖏᓐᓂ ᑲᓇᑕᒥ ᓄᓇᖃᖅᑳᖅᓯᒪᔪᓄᑦ ᓄᓇᑖᕈᑕᐅᓯᒪᔪᓂ,

(b) ᐱᔾᔪᑕᐅᓪᓗᑎᒃ ᐱᕕᖃᖅᑎᑦᓯᒍᑕᐅᔪᑦ ᐊᖏᕈᑎᒥ ᐊᓯᖏᑦ 2.7.1 ᐊᒻᒪᓗ 2.7.2, ᐃᓚᖓ 1 ᐃᓛᒃᑯᑦ 40-ᒥ, ᐊᒻᒪᓗ 5.7.36, 35.3.1 ᐊᒻᒪᓗ 35.3.2 ᐊᒻᒪᓗ ᑕᐃᒃᑯᐊ ᐅᖃᐅᓯᐅᒪᔪᑦ ᐃᓘᓐᓇᐃᓐᓅᖓᔪᑦ ᐱᐅᓯᐅᓯᒪᔪᓄᑦ,

(i) ᐃᓄᐃᑦ ᑎᑎᕋᖅᑕᐅᓯᒪᕕᖏᑦ ᓴᖅᑭᖅᑕᐅᓗᑎᒃ ᑐᓐᖓᕕᒋᓗᒍ ᐃᓛᒃᑯᑦ 35, ᑕᐃᒃᑯᐊᓕᒫᑦ ᐃᓄᐃᑦ ᑎᑎᕋᖅᑕᐅᓯᔪᓪᓗᐊᑦ ᑕᐃᑲᓂ ᐊᑖᓂ ᐃᓛᒃᑰᖅᑑᑉ;

(ii) ᓴᖅᑭᖅᑕᐅᓚᐅᖅᑎᓪᓗᒋᑦ ᐃᓄᐃᑦ ᑎᑎᕋᖅᑕᐅᓯᒪᕕᖏᑦ, ᑕᐃᒃᑯᐊ ᐃᓄᐃᑦ ᑎᑎᕋᖅᑕᐅᓕᐅᒥᔮᖅᐸᑦᑐᖅ ᐊᑖᓃ ᑐᑭᖏᑦᑕ ᐃᓛᒃᑯᑦ 35;

“ᐃᓄᐃᑦ ᐱᑐᖃᖁᑎᖏᓐᓂᒃ ᓇᐅᑦᓯᑐᖅᑏᑦ” ᑐᑭᓕᒃ ᐸᐸᑦᓯᔩᑦ ᓴᖅᑭᖅᑕᐅᔪᑦ ᐊᑖᓂ 33.4.1;

“ᐃᓄᐃᑦ ᓄᓇᖁᑎᖏᑦ” ᑐᑭᓕᒃ

(a) ᑕᐃᒃᑯᐊ ᓄᓇᐃᑦ ᑎᒍᒥᐊᖅᑕᐅᔪᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑲᑐᔾᔨᖃᑎᒌᓄᑦ ᐃᓄᓐᓄᑦ ᓄᓇᖁᑕᐅᑎᓪᓗᒋᑦ ᑐᓐᖓᕕᒋᑦᓱᒋᑦ 19.3.1, ᐊᒻᒪᓗ

(b) ᓇᐅᑐᐃᓐᓇᐃᑦ ᓄᓇᐃᑦ ᑎᒍᒥᐊᖅᑕᐅᔪᑦ, ᐱᔭᐅᔪᑦ ᑎᒍᔭᐅᒃᑲᓐᓂᕐᑐᓪᓘᓐᓃᑦ ᓇᓗᓇᐃᖅᑕᐅᓕᐅᒥᔮᖅᐸᑦᑐᓄᑦ ᐃᓄᓐᓄᑦ ᑲᑐᔾᔨᖃᑎᒌᓄᑦ ᐃᓄᓐᓄᑦ ᓄᓇᖁᑕᐅᒋᐊᖏ ᑐᓐᖓᕕᒋᑦᓱᒍ ᐊᖏᕈᑎ;

“ᐃᓄᐃᑦ ᓄᓇᖁᑎᖏᑦ ᓇᓗᓇᐃᖅᑕᐅᓯᒪᔪᑦ” ᑐᑭᓕᒃ ᓄᓇ ᐃᓄᐃᑦ ᓄᓇᖁᑎᖓᑦ ᓇᓗᓇᐃᒃᑯᓯᖅᑕᐅᑦᓱᓂ ᓄᓇᓐᖑᐊᓂ ᑕᐃᔭᐅᔪᓂᒃ ᐃᓄᐃᑦ ᓄᓇᖁᑎᖏᑦ, ᓇᒻᒥᓂᓖᑦ ᓄᓇᓐᖑᐊᓂᒃ, ᓄᓇᓐᖑᐊᓂ ᓈᓴᐅᑎᓕᓐᓂ 1-237;

“ᐃᓄᒃ” ᑐᑭᓕᒃ ᐃᓅᖃᑕᐅᔪᖅ ᐃᓄᓐᓂᒃ ᑕᐃᔭᐅᔪᓂ;

“ᓄᓇᐃᑦ” ᐃᒪᕐᓂᒃ ᐱᖃᓯᐅᔾᔨᖏᑦᑐᑦ ᑭᓯᐊᓂ ᐱᖃᓯᐅᔾᔪᖅ ᓄᓇᓂᒃ ᐃᒪᐅᑉ ᐃᖅᑲᖓᓃᑦᑐᓂᒃ, ᓄᓇᒥ ᐃᑭᕐᒥᓘᓐᓃᑦ;

“ᒪᓕᒐᐃᑦ ᐃᓘᓐᓇᐃᓐᓄᑦ ᑐᕌᖓᔪᑦ” ᑐᑭᓕᒃ ᐃᓘᓐᓇᖏᑦ ᒐᕙᒪᑐᖃᒃᑯᑦ, ᐊᕕᑦᑐᖅᓯᒪᔪᑦ, ᓄᓇᓕᓐᓂ ᒐᕙᒪᐅᔪᑦ ᒪᓕᒐᐃᑦ ᐃᓘᓐᓇᐃᓐᓄᑦ ᐊᑦᑐᐊᔪᑦ ᑐᓐᖓᕕᒋᑦᓱᒋᑦ ᒪᓕᒐᖅᑎᒍᑦ ᑐᑭᓕᐅᖅᑕᐅᓯᒪᔪᑦ;

“ᒪᓕᒐᐃᑦ” ᑐᑭᓕᒃ ᒪᓕᒋᐊᓖᑦ;

“ᒪᓕᒐᓕᐅᕐᕕᒃ” ᑐᑭᓕᒃ ᑲᑎᒪᔨᖏᑦ ᐊᕕᑦᑐᖅᓯᒪᔪᓂ ᓴᖅᑭᖅᑕᐅᓯᒪᓂᖏᑦ ᒪᓕᑦᓱᒋᑦ ᓄᓇᑦᓯᐊᕐᒥ ᒪᓕᒐᕐᔪᐊᑉ, ᐅᕝᕙᓗ ᑭᖑᕝᕕᖅᑎᖏᑦ ᑲᑎᒪᔩᑦ ᐅᕝᕙᓗ ᑲᑎᒪᔩᑦ ᑎᒍᒥᐊᖅᑐᑦ ᐃᓘᓐᓇᖓᓂᒃ ᐃᓚᖓᓂᓪᓘᓐᓃᑦ ᓄᓇᕗᒻᒥ;

“ᑕᕆᐅᖅ” ᑐᑭᓕᒃ ᐃᓚᖓ ᑲᓇᑕᐅᑉ ᐃᒪᖁᑎᖏᑦᑕ ᐊᕕᑦᑐᖅᓯᒪᔪᓂᓘᓐᓃᑦ ᐃᒪᖁᑎᖏᑦᑕ, ᓯᑯᖃᓐᖏᒃᑲᓗᐊᖅᐸᑦ ᓯᑯᖃᖅᐸᓪᓘᓐᓃᑦ, ᓄᓇᕗᑦ ᓄᓇᖁᑎᖓᑕ ᐃᓗᐊᓃᑦᑐᖅ, ᑭᓯᐊᓂ ᐱᖃᓯᐅᔾᔨᖏᑦᑐᖅ ᓄᓇᒦᑦᑐᓂᒃ ᐃᒪᕐᓂᒃ. ᑐᑭᓯᓇᖅᑎᒋᐊᒃᑲᓐᓂᕐᓗᒍ, ᐅᖃᐅᓯᐅᔪᑦ ᐃᒪᕐᓄᑦ ᐃᓗᓕᕐᒦᑦᑐᓄᑦ ᐅᕝᕙᓗ ᐊᕕᑦᑐᖅᓯᒪᔪᑦ ᑕᕆᐅᖓ ᐱᖃᓯᐅᔾᔨᔪᖅ ᑕᕆᐅᑉ ᐃᖅᑳᓂᒃ ᐃᖅᑲᖓᑕᓗ ᐃᑭᐊᖓᓃᑦᑐᓂᒃ ᐊᑖᓃᑦᑐᑦ ᐃᓗᓕᕐᒦᑦᑐᑦ ᐃᒪᐃᑦ ᐅᕝᕙᓗ ᑕᕆᐅᕐᒥ;

“ᑕᕆᐅᕐᒥᐅᑕᐃᑦ” ᑐᑭᓕᒃ ᐃᖃᓗᐃᑦ, ᐃᖃᓗᐃᑦ ᓱᓇᒃᑯᑖᖏᑦ, ᐃᒪᕐᒥᐅᑕᐃᑦ ᐊᒻᒨᒪᔪᐃᑦ, ᐅᕕᓗᐃᑦ ᑕᒪᒃᑯᐊᒐᓚᐃᑦ, ᐳᔾᔫᑏᑦ, ᐳᐃᔩᑦ ᓱᒃᑯᑦᓯᓕᒫᖏᓪᓗ ᐊᒻᒨᒪᔪᐃᑦ, ᒪᓐᓃᓪᓗ, ᖃᐸᐃᓪᓗ, ᓱᕙᐃᓪᓗ, ᐃᕐᓂᐊᖑᕋᑖᑦ ᐃᓐᓇᖅᑎᑐᑦ ᑕᐅᑦᑐᖃᓐᖏᑦᑐᑦ ᐃᖃᓗᐃᑦ, ᓯᑎᔪᓂᒃ ᖃᓖᑦ, ᐳᔾᔫᑏᑦ ᐳᐃᔩᓪᓗ;

“ᐅᔭᕋᑦᓯᐊᕙᐃᑦ” ᑐᑭᓕᒃ ᐊᑭᑐᔪᑦᓴᔭᐃᑦ ᓴᕕᕋᔭᑦᓴᐃᓪᓗ ᐊᓯᖏᓪᓗ ᐆᒪᓐᖏᑦᑐᑦ, ᓄᓇᒥᓪᓗ ᐃᒻᒥᓂᒃ ᓴᖅᑭᓲᑦ ᓯᑎᔪᑦ, ᐃᒪᐃᑦ, ᐅᓪᒪᐃᓪᓘᓐᓃᑦ, ᐱᖃᓯᐅᑎᒐᓂ ᐃᒪᖅ, ᑭᓯᐊᓂ ᐱᖃᓯᐅᑎᑦᓱᑎᒃ ᐊᐅᒫᓗᐃᑦ ᐅᖅᓱᐊᓗᐃᓪᓗ;

“ᒥᓂᔅᑕ” ᑐᑭᓕᒃ ᒥᓂᔅᑕᖓᑦ ᒐᕙᒪᒃᑯᖏᑦᑕ ᑲᓇᑕᐅᑉ ᐅᕝᕙᓗ ᑲᑎᒪᔨᐅᖃᑕᐅᔪᖅ ᓯᕗᓕᖅᑎᓄᑦ ᑎᓕᔭᐅᓯᒪᓪᓗᓂ ᒥᓂᔅᑕᒧᑦ, ᑎᑎᕋᖅᓯᒪᔪᑦ ᑕᐃᒪᐃᑦᓴᕆᐊᖃᕐᓂᖏᑦ ᒪᓕᓪᓗᒋᑦ, ᑎᒍᒥᐊᖅᑐᒥᒃ ᐅᖃᐅᓯᐅᔪᓂᒃ;

Sorry, this entry is only available in American English and Inuinnaqtun.

“ᑲᓇᑕᒥ ᒥᓐᖑᐃᕐᓯᕐᕕᒃ” ᑐᑭᓕᒃ

(a) ᓄᓇ ᓇᓗᓇᐃᖅᑕᐅᓯᒪᔪᖅ ᑲᓇᑕᒥ ᒥᓐᖑᐃᕐᓯᕐᕕᐅᒋᐊᖓ ᓄᓇᒥ ᐃᒫᓂᓘᓐᓃᑦ ᐊᑖᓂ ᑲᓇᑕᒥ ᒥᓐᖑᐃᕐᓯᕐᕕᓐᓄᑦ ᒪᓕᒐᖅᔪᐊᖅ, ᐅᕝᕙᓗ

(b) ᑲᓇᑕᒥ ᒥᓐᖑᐃᕐᓯᕐᕕᑦᓴᐅᒋᐊᖓ ᖁᒥᐅᑕᐅᓯᒪᔪᖅ, ᐊᒃᑐᐊᔪᓄᑦ ᐱᕕᖃᖅᑎᑦᓯᓂᖏᓐᓄᑦ ᐃᓚᖓ 4 ᐃᓛᒃᑯᑦ 8-ᒥ ᐊᓯᖏᓐᓂᓪᓗ ᐱᕕᖃᖅᑎᑦᓯᒍᑕᐅᔪᓂ ᐃᓄᓐᓄᑦ ᐱᕕᑦᓴᖃᖅᑎᑕᐅᑦᓱᑎᒃ ᐊᑦᓱᖐᒍᓐᓇᖅᓱᑎᒃ ᐱᕚᓪᓕᕈᑎᑦᓴᓂᒃ ᓴᖅᑭᖅᑕᐅᔪᒥᒃ, ᐸᕐᓇᑕᐅᓂᖓᓂᒃ ᐊᐅᓚᑕᐅᓂᖓᓂᓪᓗ ᑲᓇᑕᒥ ᒥᓐᖑᐃᕐᓯᕐᕕᐅᑉ ᓄᓇᕗᑦ ᓄᓇᖁᑎᖓᓂ;

“ᑲᓇᑕᒥ ᒥᓐᖑᐃᕐᓯᕐᕕᑦᓴᐅᒋᐊᖓ ᖁᒥᐅᑕᐅᓯᒪᔪᖅ” ᑐᑭᓕᒃ ᓄᓇ ᓴᓂᕐᕙᖅᑕᐅᓯᒪᔪᖅ ᖁᒥᐅᑕᐅᓯᒪᓪᓗᓂ ᑲᓇᑕᒥ ᒥᓐᖑᐃᕐᓯᕐᕕᐅᓂᐊᖅᑐᓪᓗ ᐊᑖᓂ ᑲᓇᑕᒥ ᒥᓐᖑᐃᕐᓯᕐᕖᑦ ᒪᓕᒐᖅᔪᐊᖓᑦᑕ;

“ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ” ᑕᐃᒫᑦᓴᐃᓐᓇᓪᓗᐊᖅ ᑐᑭᓕᒃ;

“ᓄᓇᑖᕈᒻᒥ ᐊᑐᓕᖅᑎᑦᓯᕙᓪᓕᐊᓂᕐᒧᑦ ᐃᓕᓐᓂᐊᕈᑎᑦᓴᓄᑦ ᑲᑎᒪᔨᕋᓛᑦ” ᑕᐃᒫᑦᓴᐃᓐᓇᖅ ᑐᑭᓕᒃ;

“ᓄᓇᕗᒻᒥ ᐸᕐᓇᐃᔩᑦ” ᑕᐃᒫᑦᓴᐃᓐᓇᓪᓗᐊᖅ ᑐᑭᓕᒃ;

“ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ” ᑕᐃᒫᑦᓴᐃᓐᓇᓪᓗᐊᖅ ᑐᑭᓕᒃ;

“ᓄᓇᕗᒻᒥ ᐊᖏᕈᑏᑦ ᐊᑐᓕᖅᑎᑕᐅᕙᓪᓕᐊᓂᖏᓐᓄᑦ ᐱᓕᒻᒪᒃᓴᐃᓂᕐᒧᑦ ᑲᑎᒪᔨᕋᓛᖏᑦ (NITC) ᑐᑭᓕᒃ ᑲᑎᒪᔨᕋᓛᑦ ᓴᖅᑭᖅᑕᐅᓯᒪᔪᑦ ᐊᕕᑦᑐᖅᓯᒪᓂᖓ 5 ᐃᓛᒃᑯᑦ 37 ᐊᖏᕈᑎᓂ;

“ᓄᓇᕗᒻᒥ ᐸᕐᓇᐃᔩᑦ ᑲᒥᓴᖏᑦ” (NPC) ᓇᓗᓇᐃᖅᑕᐅᓯᒪᔪᖅ ᑎᒥᐅᔪᖅ ᐊᕕᑦᑐᖅᓯᒪᓂᖓᓂ 11.4.1;

“ᓄᓇᕗᑦ ᓇᓗᓇᐃᖅᑕᐅᓯᒪᓂᖓ” ᑐᑭᓕᒃ ᓄᓇ ᓇᓗᓇᐃᖅᑕᐅᓯᒪᔪᖅ 3.1.1-ᒥ;

“ᓄᓇᕗᒻᒥ ᐃᓅᓯᓕᕆᓂᕐᒧᑦ ᑲᑐᔾᔨᖃᑎᒌᑦ” ᑐᑭᓕᒃ ᑲᑎᒪᔩᑦ ᓴᖅᑭᖅᑕᐅᔪᑦ ᐊᑕᓃ 32.3.1;

“ᓄᓇᕗᒻᒥ ᑮᓇᐅᔭᓂᒃ ᐸᐸᑦᓯᔩᑦ” ᑐᑭᓕᒃ ᐸᐸᑦᓯᔩᑦ ᑕᐃᔭᐅᔪᑦ 31.1.1-ᒥ;

“ᓄᓇᕗᒻᒥ ᐃᒪᓕᕆᔨᒃᑯᑦ” ᑐᑭᓕᒃ ᑎᒥᐅᔪᖅ ᐅᖃᐅᓯᐅᔪᖅ 13.2.1-ᒥ;

“ᓄᓇᕗᒻᒥ ᐆᒪᔪᓕᕆᔨᒃᑯᑦ ᑲᑎᒪᔨᖏᑦ” ᑎᒥᐅᔪᖅ ᐅᖃᐅᓯᐅᔪᖅ 5.2.1-ᒥ;

“ᓄᓇᕗᒻᒥ ᐃᒪᓕᕆᔨᒃᑯᑦ” ᑕᐃᒫᑦᓴᐃᓐᓇᓪᓗᐊᖅ ᑐᑭᓕᒃ;

“ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ” ᑕᐃᒫᑦᓴᐃᓐᓇᓪᓗᐊᖅ ᑐᑭᓕᒃ;

“ᐅᖅᓱᖅᑎᕈᑦ” ᑐᑭᓕᒃ ᐅᖅᓱᖅᑎᕈᑦ ᖃᓄᑐᐃᓐᓇᖅ ᐅᖁᒪᐃᓐᓂᖃᕋᓗᐊᖅᐸᑦ, ᓄᐃᑎᑕᐅᓲᖅ ᒥᓪᓗᐊᖅᑕᐅᑦᓱᓂ ᐃᒪᐅᑎᓪᓗᒍ ᐊᓯᖏᓪᓗ ᐅᖅᓱᐊᓗᑦᓴᐃᑦ ᒪᕐᕉᓐᓂᒃ ᐃᓚᓯᒪᔪᑦ ᐋᒡᒐᐅᒐᓗᐊᖅ ᐊᐅᒫᓗᐃᑦ ᐅᖅᓱᐊᓗᓪᓗ, ᐊᒻᒪᓗ ᑖᒃᑯᑑᓐᖏᒃᑲᓗᐊᖅᓱᑎᒃ ᑭᓪᓕᒋᔭᖏᑦ, ᐅᖅᓱᐊᓗᑦᓴᐃᑦ ᒪᕐᕉᓐᓂᒃ ᐃᓚᓯᒪᔪᑦ ᐱᔭᐅᒍᓐᓇᖅᑐᑦ ᐅᑎᖅᑎᑕᐅᒍᓐᓇᖅᑐᓪᓘᓐᓃᑦ ᓯᐅᕋᕐᓂᒃ, ᑖᓚᑦᓴᓂᒃ, ᐅᖅᓱᖅᑎᕈᑎᓕᓐᓂᒃ ᓯᐅᖅᑲᓂᒃ, ᒪᕐᕋᕐᒥᒃ, ᐅᕝᕙᓗ ᖃᓄᐃᑦᑐᑐᐃᓐᓇᕐᓂᒃ ᐅᖅᓱᖅᓴᖅᑖᕐᕕᐅᒍᓐᓇᖅᑐᑦ ᕐᑳᖓᓂ ᐃᑭᐊᖓᓂᓘᓐᓃᑦ, ᐃᖅᑳᓂ ᐃᑭᐊᖓᓂᓘᓐᓃᑦ;

“ᐊᐅᓚᑦᓯᔨ” ᑐᑭᓕᒃ ᓇᐅᑐᐃᓐᓇᖅ ᐃᓄᒃ ᐱᔪᓐᓇᕐᓂᖃᖅᑎᑕᐅᔪᖅ ᑭᒡᒐᖅᑐᐃᑦᓱᓂ ᐃᓄᒻᒥᒃ ᐱᔪᓐᓇᐅᑎᓕᔭᖅᑐᒥᒃ ᖃᐅᔨᓴᕐᓂᕐᒧᑦ, ᐱᕙᓪᓕᐊᑎᑦᓯᓂᕐᒧᑦ, ᓴᖅᑮᓂᕐᒧᑦ ᐊᐅᓪᓚᑎᑦᓯᓂᕐᒧᓪᓘᓐᓃᑦ ᐅᔭᕋᑦᓯᐊᕙᓐᓂᒃ, ᐊᓯᖏᓐᓂᒃ ᓇᓗᓇᐃᖅᑕᐅᓯᒪᔪᑦ, ᐃᓗᐊᓂ ᕐᑳᖓᓂ, ᐃᑭᐊᖓᓂᓘᓐᓃᑦ ᐃᓄᐃᑦ ᓄᓇᖁᑎᖏᑦᑕ;

“ᐅᓕᓐᓂᐅᒐᔪᑦᑐᖅ” ᐅᕝᕙᓗ “ᓯᔾᔭ” ᐃᒪᕐᒧᑦ ᑐᑭᓕᒃ ᑭᓪᓕᖓ ᓯᓈᖓᑕ ᐃᖅᑲᐅᑉ;

“ᑎᒥᐅᔪᖅ” ᑐᑭᓕᒃ ᓇᓪᓕᑐᐃᓐᓇᖏᓐᓂᒃ ᐅᑯᐊ

(a) ᓄᓇᕗᒻᒥ ᑮᓇᐅᔭᓂᒃ ᐸᐸᑦᓯᔩᑦ,

(b) ᐊᕕᑦᑐᑦᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᑦ,

(c) ᐊᖑᓇᓱᑦᑏᑦ ᒥᑭᒋᐊᕐᓂᐊᖅᑏᓪᓗ ᑎᒥᖓᑦ,

(d) ᐊᕕᑦᑐᖅᓯᒪᔪᓂ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᑦ,

(e) ᓄᓇᕗᒻᒥ ᐃᓅᓯᓕᕆᓂᕐᒧᑦ ᑲᑎᒪᔩᑦ,

(f) ᐃᓄᐃᑦ ᐱᑐᖃᖁᑎᖏᓐᓂᒃ ᓇᐅᑦᓯᑐᖅᑏᑦ,

(g) ᓇᐅᑐᐃᓐᓇᖅ ᑎᒥᐅᔪᖅ ᓇᓗᓇᐃᖅᑕᐅᓯᒪᔪᖅ ᐊᑖᓂ 39.1.3-ᒥ;

“ᐃᖏᕐᕋᓃᑦ ᐊᐅᓚᓃᓪᓗ” ᑐᑭᓕᒃ ᓇᓗᓇᐃᖅᑕᐅᓯᒪᔪᓂᒃ ᐅᑯᓇᓂ

(a) ᐅᐊᓐᓇᒥ ᓄᓇᓐᖑᐊᖅᑎᒍᑦ ᓴᓂᒧᑦ 73˚ 40’ Cape Liverpool, ᓴᓐᓂᕈᒻᒥ,

(b) ᓂᒋᕐᒥ, ᓄᓇᓐᖑᐊᑎᒍᑦ ᓴᓂᒧᑦ 66˚ 37’ N, ᐃᑦᑕᕋᔭᓕᒻᒥ ᕿᑭᖅᑖᓗᒻᒥ,

(c) ᐱᖓᓐᓇᒥ, ᑕᕆᐅᖅᐸᓯᒻᒥ ᓯᓈᖓᓂ ᐊᕕᑦᑐᖅᓯᒪᔪᓂ ᑕᕆᐅᑉ ᑭᓪᓕᖓᑕ ᑲᓇᓐᓇᖓᑕ ᓯᓈᖓᓂ ᕿᑭᖅᑖᓘᑉ, ᐊᒻᒪᓗ

(d) ᑲᓇᓐᓇᕐᒥ, ᐅᖓᑖᓅᕐᕕᓕᒫᖓᒍᑦ ᐊᐅᓚᓂᐅᔫᑉ (1963-1989) ᑕᑯᑦᓴᐅᑎᑕᐅᓂᖏᑦ ᒪᓕᓪᓗᒋᑦ ᑕᐃᔭᐅᔪᑦ ᑭᓪᓕᖏᑦ ᐊᐅᓚᓃᑦ – ᑲᓇᓐᓇᖓᓂ ᕿᑭᖅᑖᓘᑉ ᓯᓈᖓᑕ, ᓇᓗᓇᐃᖅᑕᐅᓯᒪᔪᖅ ᐊᖏᖅᓯᒪᔫᓐᓄᑦ ᐊᑎᓕᐅᕐᕕᒻᒧᑦ, ᓇᓕᖅᑲᖏᓪᓗ ᓇᓗᓇᐃᔭᖅᓯᒪᑦᓱᑎᒃ ᐅᐃᒍ 16-1-ᒥ ᐃᓘᓐᓇᐃᓐᓄᑦ ᑐᓴᐅᒪᔾᔪᑕᐅᓂᖅ ᐱᔾᔪᑕᐅᑦᓱᓂ;

“ᓄᓇᓕᕋᓛᑦ” ᑐᑭᓕᒃ ᓇᓗᓇᐃᔭᖅᓯᒪᔪᓂᒃ 7.1.1-ᒥ;

“ᑲᓇᑕᒥ ᒪᓕᒐᓕᐅᕐᕕᖓ” ᑐᑭᓕᒃ ᑲᓇᑕᒥ ᒐᕙᒪᒃᑯᑦ ᒪᓕᒐᓕᐅᖅᑏᑦ ᑲᑎᒪᕕᖓᑦ;

“ᒥᓐᖑᐃᕐᓯᕐᕕᒃ” ᑐᑭᓕᒃ ᑲᓇᑕᒥ ᒥᓐᖑᐃᕐᓯᕐᕕᒃ ᐊᕕᑦᑐᖅᓯᒪᔪᓂᓘᓐᓃᑦ;

“ᐊᖏᖃᑎᒌᑦᑐᑦ” ᑐᑭᓕᒃ ᐃᓄᐃᑦ ᓄᓇᕗᒻᒦᑦᑐᑦ ᐊᒻᒪᓗ ᑯᐃᓐ ᑭᒡᒐᖅᑐᐃᓪᓗᓂ ᑲᓇᑕᒥᒃ;

“ᐅᖅᓱᐊᓗᐃᑦ” ᑐᑭᓕᒃ ᐅᖅᓱᖅᑎᕈᑎ ᒑᓰᓪᓗ;

“ᑐᓐᖓᕕᐅᔪᑦ ᓴᐳᔾᔨᓂᕐᒧᑦ” ᑐᑭᓕᒃ ᑐᓐᖓᕕᐅᔪᓂᒃ ᓇᓗᓇᐃᔭᖅᑕᐅᓯᒪᔪᓂᒃ 5.1.5-ᒥ;

“ᓱᓕᕆᐊᑦᓴᒧᑦ ᑐᑦᓯᕋᐅᑎ” ᑐᑭᓕᒃ ᑎᒥᒃᑯᑦ ᐃᖅᑲᓇᐃᔮᖑᒋᐊᓕᒃ ᑐᑦᓯᕋᖅᑐᒧᑦ ᑐᑦᓯᕌᖑᔪᖅ ᓴᓇᔪᒪᓪᓗᓂ, ᐊᐅᓚᑦᓯᔪᒪᓪᓗᓂ, ᐋᖅᑭᒋᐊᕆᒍᒪᓪᓗᓂ, ᐃᑐᑦᑎᕆᒍᒪᓪᓗᓂ, ᕿᒪᐃᓐᓇᐃᒍᒪᓪᓗᓂ ᐅᕝᕙᓗ ᑲᔪᓯᑎᒍᒪᔭᓂ, ᐅᕝᕙᓗ ᑎᒥᒃᑯᑦ ᐊᐅᓚᓂᐅᔪᖅ ᑐᑦᓯᕋᖅᑐᒧᑦ ᑐᑦᓯᕌᖑᔪᖅ ᑲᔪᓯᑎᑕᐅᒍᒪᓪᓗᓂ ᐃᓗᐊᓂ ᓄᓇᕗᑦ, ᐋᒡᒐᐅᒐᓗᐊᒻ ᐱᕕᖃᖅᑎᑕᐅᓂᒃᑯᑦ 12.11.1-ᒥ;

“ᐊᖏᖅᑕᐅᓂᒃᑯᑦ ᒪᓕᒐᕈᕐᓂᖓ” ᑐᑭᓕᒃ ᒪᓕᒐᖅ ᐅᖃᐅᓯᐅᔪᖅ 36.1.3(b)-ᒥ;

“ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᑦ” ᑐᑭᓕᒃ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᖐᖏᑦ, ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᖏᑦ, ᕿᑭᖅᑖᓗᒻᒥ ᐃᓄᐃᑦ ᑲᑐᔾᔨᖃᑎᒌᖏᑦ ᑭᖑᕝᕕᖅᑎᖏᓪᓘᓐᓃᑦ;

“ᐊᕕᑦᑐᖅᓯᒪᔪᓂ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᑦ” ᑐᑭᓕᒃ ᑎᒥᐅᔪᑦ ᐅᖃᐅᓯᐅᔪᖅ 5.7.1-ᒥ ᐊᒻᒪᓗ 5.7.5 ᑎᑭᓪᓗᒍ 5.7.14;

“ᑎᑎᕋᖅᑕᐅᕕᒃ” ᑐᑭᓕᒃ ᑎᑎᕋᖅᑕᐅᓯᒪᓂᖏᑦ ᓄᓇᐃᑦ ᑎᒍᒥᐊᖅᑕᐅᔪᑦ ᓄᓇᕗᑦ ᓄᓇᖁᑎᖓᓂ;

“ᒪᓕᒐᐃᑦ” ᑐᑭᓕᒃ ᑎᓕᓯᔾᔪᑏᑦ, ᒪᓕᒐᐃᑦ, ᑎᓕᓯᔾᔪᑕᐅᔪᑦ ᑲᑎᒪᔨᓄᑦ, ᑎᓕᓯᔾᔪᑕᐅᔪᑦ ᓇᓗᓇᐃᔭᐃᔪᑦ ᒪᓕᒐᕐᓂᒃ, ᒪᓕᒋᐊᓕᒻᒥᒃ, ᒪᓕᒐᕐᒥᒃ ᐃᖅᑲᖅᑐᐃᕕᒻᒥ, ᐊᑐᕆᐊᖃᓕᖅᑎᑕᐅᓯᒪᔪᑦ ᐊᑭᒋᔭᐅᔪᓪᓘᓐᓃᑦ ᐊᑭᓕᕆᐊᓕᓐᓄᑦ, ᑎᑎᖅᑲᑦ ᓇᓗᓇᐃᖅᑕᐅᓯᒪᔪᑦ, ᐱᔪᓐᓇᐅᑏᑦ, ᑎᓕᓯᔾᔪᑕᐅᔪᒧᑦ ᓇᓗᓇᐃᔭᐅᑏᑦ, ᓇᓗᓇᐃᖅᓯᓃᑦ, ᒪᓕᒐᕋᓛᑦ, ᐱᖁᔨᔾᔪᑏᑦ ᐅᕝᕙᓗ ᐊᓯᖏᑦ ᑐᓂᔭᐅᔪᑦ, ᓴᓇᔭᐅᔪᑦ ᓴᖅᑭᖅᑕᐅᔪᓪᓘᓐᓃᑦ

(a) ᐊᐅᓚᔾᔭᑦᑕᐅᓂᖓᓄᑦ ᐱᔪᓐᓇᐅᑎᐅᑎᑕᐅᔫᑉ ᐅᖃᐅᓯᐅᔫᑉ ᒪᓕᒐᖅᑎᒍᑦ ᐅᕝᕙᓗ ᐱᔪᓐᓇᕐᓂᖓᑎᒍᑦ ᒪᓕᒐᐅᑉ, ᐅᕝᕙᓗ

(b) ᐱᔪᓐᓇᕐᓂᖓᓄᑦ ᐱᔪᓐᓇᕐᓂᖓᒍᓪᓘᓐᓃᑦ ᒥᓂᔅᑕᐅᖃᑎᒌᑦ ᑲᑎᒪᔨᖏᑦᑕ ᐅᕝᕙᓗ ᐊᐅᓚᑦᓯᔩᑦ ᑭᒡᒐᖅᑐᖅᑎᖓᓐᓄᑦ;

“ᓄᓇᒥᐅᑕᐃᑦ ᐱᕈᒃᑲᓐᓂᕈᓐᓇᖏᑦᑐᑦ” ᑐᑭᓕᒃ, ᐱᔾᔪᑕᐅᓪᓗᑎᒃ ᐃᓛᒃᑯᑦ 25-ᒥᒃ 27-ᒧᑦ, ᐊᐅᒫᓗᐃᑦ, ᐅᖅᓱᐊᓗᒃ, ᐅᔭᕋᑦᓯᐊᕙᐃᑦ ᓴᕕᕋᔭᑦᓴᐃᓪᓗ ᐊᓯᖏᓪᓗ ᑕᕝᕙᕈᓕᐅᒥᔮᖅᐸᑦᑐᑦ ᐅᔭᕋᓐᓂᐊᖅᑕᐅᒍᓐᓇᖅᑐᑦ, ᑭᓯᐊᓂ ᐱᖃᓯᐅᑎᓐᖏᑦᑐᑦ ᓇᓗᓇᐃᖅᑕᐅᓯᒪᔪᑦ;

“ᓂᖏᖅᑕᕐᓂᖅ” ᑐᑭᓕᒃ ᓴᖅᑭᐸᓪᓕᐊᔪᓂᒃ ᐊᖅᑯᑎᖃᖅᓱᑎᒃ ᑮᓇᐅᔭᐅᑉᐸᑕ ᐃᑲᔫᑕᐅᑉᐸᑕᓘᓐᓃᑦ ᐅᕝᕙᓗ ᐊᑭᓕᐅᑕᐅᓂᐊᖅᐸᑕ ᒐᕙᒪᒃᑯᓐᓄᑦ ᓇᒻᒥᓂᖃᖅᑑᑎᓪᓗᒋᑦ ᐊᑦᑐᐊᔪᓄᑦ ᓄᓇᒥᐅᑕᕐᓄᑦ ᓴᖅᑭᖅᑕᐅᔪᓄᑦ ᐃᓄᒻᒧᑦ ᑯᐃᓐ ᓄᓇᖁᑎᖏᓐᓂᒃ ᕐᑳᖓᓂ ᐃᑭᐊᖓᓂᓘᓐᓃᑦ ᓄᓇᕗᑦ ᓄᓇᖁᑎᖓᑕ, ᑭᓯᐊᓂ ᐅᑯᓇᓐᖓᑦ ᐱᖃᓯᐅᔾᔨᖏᑦᑐᑦ

(a) ᐊᑭᓕᐅᑕᐅᔪᑦ ᐱᔨᑦᓯᕋᐅᑎᒧᑦ, ᓴᖅᑭᖅᑕᐅᓂᖏᑦ ᐱᔾᔪᑎᖃᕐᓗᑎᒃ ᑮᓇᐅᔭᐃᑦ, ᐱᔪᓐᓇᕐᓂᖃᖅᑎᑕᐅᓂᖅ ᐱᔪᒪᔭᕆᔭᖃᕐᓂᕐᓘᓐᓃᑦ ᐊᐃᑦᑐᐃᓂᕐᓘᓐᓃᑦ ᐊᖏᕐᓂᕐᒥᒃ ᐱᔪᓐᓇᕐᓂᐅᔪᒥᓪᓘᓐᓃᑦ,

(b) ᓇᐅᑐᐃᓐᓇᖅ ᐊᑭᓕᐅᑕᐅᒋᐊᓕᒃ ᑭᓇᒧᑦ ᐱᒋᔭᐅᒐᓗᐊᖅᐸᑕ ᓄᓇᒥᐅᑕᐃᑦ, ᐅᕝᕙᓗ

(c) ᐊᑭᓕᐅᑕᐅᔪᑦ ᐱᒋᐊᓐᖓᑕᐅᓗᑎᒃ;

“ᐊᕕᑦᑐᖅᓯᒪᔪᓂ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᑦ” ᑕᐃᒫᑦᓴᐃᓐᓇᓪᓗᐊᖅ ᑐᑭᓕᒃ;

“ᓇᓗᓇᐃᖅᑕᐅᓯᒪᔪᑦ ᓄᓇᒦᓐᖔᖅᑐᑦ” ᑐᑭᓕᒃ ᓴᓇᔭᑦᓴᐃᑦ ᐅᔭᖅᑲᑦ, ᓯᐅᕋᐃᑦ ᑐᐊᐸᐃᓪᓗ, ᒪᕐᕋᐅᔭᐃᑦ ᓯᑎᓪᓕᓯᒪᔪᑦ, ᖃᑯᖅᑐᓐᖑᐊᑦ, ᖁᐊᖅᑎᑕᒐᑦᓴᔭ, ᑖᓚᑦᓴᔭ, ᖃᖅᑲᓄᑦ ᕐᑳᕐᓂᑯᓄᑦ ᐊᕐᔭᐃᑦ, ᓄᓇ, ᐃᔾᔪ, ᒥᓗᑦᓯᒋᐊᑭᑦᑐᑦ ᐃᔾᔪᐃᑦ, ᖁᖅᓱᒐᓚᑦᑐᑦ ᐊᐅᐹᖓᔪᑦ ᐅᔭᕋᐃᑦ, ᐱᕈᖅᑐᒥᓃᑦ ᐊᒻᒪᓗ ᓴᓇᓐᖑᐊᒐᑦᓴᐃᑦ;

ᐱᖁᔭᖅ” ᑐᑭᓕᒃ ᒪᓕᒐᕐᔪᐊᖅ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐅᕝᕙᓘᓐᓃᑦ ᒪᓕᒐᓕᐅᕐᕕᒻᒧᑦ, ᑭᓯᐊᓂ ᐱᖃᓯᐅᔾᔨᖏᑦᑐᖅ ᒪᓕᒐᕐᓂᒃ ᑎᓕᐅᕈᑎᓂᒃ;

“ᕐᑳᖓᓄᑦ ᐱᔪᓐᓇᐅᑎᓄᑦ ᐋᖅᑭᒋᐊᒃᑲᐃᔩᑦ” ᑎᒥᐅᔪᖅ ᐅᖃᐅᓯᐅᔪᖅ 21.8.1-ᒥ;

“ᐊᕕᑦᑐᖅᓯᒪᔪᓂ ᒐᕙᒪᐃᑦ” ᑐᑭᓕᒃ ᒐᕙᒪᒃᑯᖏᑦ ᓄᓇᑦᓯᐊᑉ, ᐅᕝᕙᓘᓐᓃᑦ ᓇᐅᑐᐃᓐᓇᖅ ᒐᕙᒪ ᑭᖑᕝᕕᐅᑎᔪᖅ ᒐᕙᒪᐃᓪᓘᓐᓃᑦ, ᑎᒍᒥᐊᖅᑐᑦ ᐃᓘᓐᓇᖏᓐᓂᒃ ᐃᓚᖓᓂᓪᓘᓐᓃᑦ ᓄᓇᕗᑦ ᓄᓇᖁᑎᖓᑦᑕ;

“ᐊᕕᑦᑐᖅᓯᒪᔪᓂ ᒥᓐᖑᐃᕐᓯᕐᕖᑦ” ᑐᑭᓕᒃ ᓄᓇ ᓇᓗᓇᐃᖅᑕᐅᓯᒪᔪᖅ ᐊᕕᑦᑐᖅᓯᒪᔪᓂ ᒥᓐᖑᐃᕐᓯᕐᕕᐅᑎᓪᓗᒍ ᐊᑖᓂ ᒥᓐᖑᐃᕐᓯᕐᕕᓐᓄᑦ ᒪᓕᒐᕐᔪᐊᑉ;

“ᓯᓚᑖᓃᓐᖔᖅᑐᑦ” ᑐᑭᓕᒃ ᓇᐅᑐᐃᓐᓇᖅ ᐃᓄᒃ, ᐃᓄᓪᓚᕆᒃ ᐃᓄᓪᓚᕆᐅᓐᖏᑦᑐᕐᓘᓐᓃᑦ, ᑭᓯᐊᓂ ᐱᖃᓯᐅᔾᔨᖏᑦᑐᖅ ᒐᕙᒪᓂᒃ, ᐃᓄᓐᓂᒃ, ᐅᕝᕙᓗ ᓇᓗᓇᐃᖅᑕᐅᓯᒪᔪᒥᒃ ᐃᓄᓐᓄᑦ ᑎᒥᖁᑎᒋᔭᐅᔪᒥᒃ;

“ᐋᖅᑭᒋᐊᒃᑲᐃᔩᑦ” ᑐᑭᓕᒃ ᕐᑳᖓᓄᑦ ᐱᔪᓐᓇᐅᑎᓄᑦ ᐋᖅᑭᒋᐊᒃᑲᐃᔩᑦ;

“ᐸᐸᑦᓯᔩᑦ” ᑐᑭᓕᒃ ᐃᓄᐃᑦ ᐱᑐᖃᕐᓂᒃ ᐸᐸᑦᓯᔩᑦ;

“ᑐᓐᖓᕕᒃ” ᑐᑭᓕᒃ ᑎᒥᐅᔪᖅ ᐱᕈᖅᑎᑦᓯᓯᒪᓇᓂ ᑎᒥᕈᖅᑎᑕᐅᓯᒪᔪᖅ ᐊᑖᓂ ᑲᓇᑕᒥ ᑎᒥᓐᖑᖅᑐᓄᑦ ᒪᓕᒐᕐᔪᐊᑉ ᑎᑎᖅᑲᑎᒍᑦ ᓇᓗᓇᐃᖅᑕᐅᓯᒪᔪᒃᑯᑦ ᑎᑎᕋᖅᑕᒥᓃᑦ ᐄᑉᐳᕉᓪ 3, 1990 ᐊᒻᒪᓗ ᐃᑲᔪᖅᓯᔪᑦ ᑎᑎᖅᑲᐃᑦ ᓇᓗᓇᐃᖅᑕᐅᒪᔪᑦ ᑎᑎᕋᖅᑕᒥᓃᑦ ᑏᓴᕝᕙ 16, 1992 ᑕᐃᔭᐅᓪᓗᓂ ᑐᓐᖓᕕᒃ, ᑭᖑᕝᕕᖅᑎᖓᓘᓐᓃᑦ;

“ᐃᒪᖅ” ᑐᑭᓕᒃ ᓇᐅᑐᐃᓐᓇᖅ ᐃᒪᐃᑦ ᓇᒥᑐᐃᓐᓇᖅ ᑰᒻᒥ, ᑰᒐᓛᕐᒥ, ᑕᓯᕐᒥ ᐊᓯᖏᓐᓂᓘᓐᓃᑦ ᐃᒪᕐᓂ ᐃᓗᐃᓕᕐᒥ ᕐᑳᖓᓂ ᐃᑭᐊᖓᓂᓘᓐᓃᑦ ᓄᓇᐅᑉ ᓄᓇᕗᑦ ᓄᓇᖁᑎᖓᓂ, ᐱᖃᓯᐅᑎᑦᓱᑎᒃ ᓯᑯᐃᑦ ᐊᒻᒪᓗ ᐃᓗᐃᓚᕐᒦᑦᑐᓕᒫᑦ ᑭᓯᐊᓂ ᐱᖃᓯᐅᔾᔨᖏᑦᑐᑦ ᐃᒪᕐᒥᒃ ᓯᑯᒥᓪᓘᓐᓃᑦ ᑕᕆᐅᕐᒦᑦᑐᓂᒃ;

“ᐆᒪᔪᐃᑦ” ᑐᑭᓕᒃ ᐃᓘᓐᓇᑎᒃ ᐱᓱᑦᑏᑦ, ᐳᐃᔩᑦ, ᑎᒻᒥᐊᑦ, ᐱᕈᖅᑐᐃᑦ, ᓱᓇᒃᑯᑎᓕᒫᖏᓪᓗ ᑖᒃᑯᐊ;

“ᑭᓪᓕᓕᒃ I” ᑐᑭᓕᒃ ᑕᐃᒃᑯᐊ ᐃᒪᐃᑦ ᐅᐊᓐᓇᖓᓃᑦᑐᑦ 61˚ ᓴᓂᒧᑦ ᓄᓇᓐᖑᐊᑎᒍᑦ ᑐᓐᖓᕕᒋᑦᓱᒋᑦ ᑲᓇᑕᐅᑉ ᑎᒍᒥᐊᖅᑕᖏᑦ ᑕᕆᐅᑉ ᒥᑦᓵᓅᖓᔪᑦ ᐊᕕᑦᑐᖅᓯᒪᔪᓂ ᑕᕆᐅᑉ ᑭᓪᓕᖓᓄᑦ ᐆᑦᑐᖅᑕᐅᓯᒪᓂᖓᓂᒃ ᑎᑎᖅᑐᖅᓯᒪᔪᓂᒃ ᒪᓕᑦᓱᖏᑦ ᐊᕕᑦᑐᖅᓯᒪᔪᓂ ᑕᕆᐅᑉ ᓇᓗᓇᐃᔭᖅᑕᐅᓯᒪᓂᖏᑦ (ᐃᓂᖓ 7) ᑎᓕᓯᔾᔪᑕᐅᔪᑦ SOR/85-872 ᐃᓚᒋᔭᐅᓐᖏᑦᑐᑦ ᓄᓇᕗᑦ ᓄᓇᖁᑎᖓᓄᑦ ᐅᕝᕙᓗ ᐊᓯᖏᓐᓄᑦ ᓄᓇᑖᖑᓯᒪᔪᓄᑦ;

“ᑭᓪᓕᓕᒃ II” ᑐᑭᓕᒃ ᐃᒪᖏᑦ James Bay, ᑕᓯᐅᔭᕐᔪᐊᑉ ᐊᒻᒪᓗ ᑕᓯᐅᔭᕐᔪᐊᑉ ᐃᑭᖓ ᐃᓚᒋᔭᐅᓐᖏᑦᑐᑦ ᓄᓇᕗᑦ ᓄᓇᖁᑎᖓᓂ ᐅᕝᕙᓗ ᐊᓯᖏᑦ ᓄᓇᑖᕈᑕᐅᓯᒪᔪᑦ.

1.1.2 ᐅᖃᐅᓯᖃᕐᓂᖅ ᒪᓕᒐᕐᒥᒃ ᐅᖃᐅᓯᓕᒃ ᒪᓕᒐᕐᒥᒃ ᐋᖅᑭᒋᐊᖅᑕᐅᓕᒥᔮᖅᐸᓐᓂᐊᖅᑐᒥᒃ

(a) ᓇᓗᓇᐃᖅᑕᐅᓯᒪᔪᖃᓐᖏᑐᐊᖅᐸᑦ ᐅᓪᓗᕐᒥ; ᐊᒻᒪᓗ

(b) ᑐᑭᓯᓇᕆᐊᒃᑲᓐᓂᕈᑎᒋᓗᒍ, ᐅᖃᐅᓯᖃᕐᓂᖅ ᑐᓐᖓᕕᕐᔪᐊᑦ ᒪᓕᒐᕐᔪᐊᓄᑦ, 1982 ᐱᖃᓯᐅᔾᔨᔪᖅ 1983-ᒥ ᐋᖅᑭᒋᐊᕈᑕᐅᔪᓂᒃ ᐊᓯᖏᓐᓂᓪᓗ ᑭᖑᓂᖓᒍᑦ ᐋᖅᑭᒋᐊᕈᑕᐅᔪᓂᒃ.

1.1.3 ᐅᖃᐅᓯᐅᔪᑦ ᐊᖏᕈᑎᒥ ᐊᕕᑦᑐᖅᓯᒪᔪᓂ ᑕᕆᐅᑉ ᑭᓪᓕᖓᓄᑦ ᐅᕝᕙᓗ ᐊᕕᑦᑐᖅᓯᒪᔪᓂ ᑕᕆᐅᕐᒧᑦ ᓄᓇᓐᖑᐊᓄᑦ ᓇᓗᓇᐃᒃᑯᑕᐃᑦ (ᐃᓂᖓ 7) SOR/85-872 ᐸᓯᔭᑦᓴᕈᕈᑎᒋᒍᓐᓇᕐᓇᒋᑦ ᓇᓪᓕᑐᐃᓐᓇᖏᓐᓄᑦ ᐋᔩᖃᑎᒌᓐᓂᐅᔪᑦ ᐅᕝᕙᓗ ᖃᓄᐃᓕᖓᓂᐅᔪᓄᑦ ᐊᑐᓕᖅᑕᐅᑐᐃᓐᓇᕆᐊᓕᓐᓄᓘᓐᓃᑦ ᑲᓇᑕᒥ ᐊᑦᑐᐊᔪᓄᑦ ᑭᓪᓕᒋᔭᐅᔪᓄᑦ ᑕᕆᐅᕐᒥ ᑎᒍᒥᐊᖅᑕᐅᔪᓄᑦ.

1.1.4 ᓇᓗᓇᐃᒃᑯᓯᖅᑐᖅᓯᒪᔪᑦ ᐅᖃᐅᓯᐅᔪᑦ ᐅᕙᓂ ᐊᖏᕈᑎᒥ ᓇᓗᓇᐃᖅᑕᐅᓯᒪᔪᓄᑦ ᐃᓄᐃᑦ ᓄᓇᖁᑎᖏᓐᓄᑦ ᓇᓗᓇᐃᒃᑯᑕᐅᓂᐊᖅᑐᑦ ᓄᓇᓄᑦ ᓄᓇᓐᖑᐊᓃᑦᑐᓄᑦ ᑕᐃᔭᐅᔪᓄᑦ ᐃᓄᐃᑦ ᓄᓇᖁᑎᖏᑦ. ᓇᒻᒥᓂᖃᕐᓂᕐᒧᑦ ᓄᓇᓐᖑᐊᑦ, ᓄᓇᓐᖑᐊᓂ ᓈᓴᐅᑎᓕᓐᓂ 1-237-ᒧᑦ ᐅᖃᐅᓯᐅᔪᑦ ᑎᑎᕋᖅᓯᒪᔪᓂ 19.3.1.

1.1.5 ᓄᓇᓅᖓᔪᑦ ᐸᐃᑉᐹᖁᑕᐅᔪᑦ ᐅᖃᐅᓯᐅᔪᑦ ᐊᖏᕈᑎᒥ ᐊᑦᑐᐊᔪᑦ ᓄᓇᓄᑦ ᐸᐃᑉᐹᖁᑕᐅᔪᑦ ᐸᐸᑕᐅᔪᑦ ᓄᓇᓕᕆᔨᓄᑦ, ᒥᓂᔅᑕᐅᕕᖓᓐᓂ ᐃᓄᓕᕆᔨᑐᖃᒃᑯᑦ, ᔭᓗᓇᐃ, ᓄᓇᑦᓯᐊᕐᒥ.

1.1.6 ᓄᖑᑎᕆᓐᖏᓪᓗᓂ ᐅᕝᕙᓗ ᐊᓯᔾᔨᖏᓪᓗᒋᑦ ᑎᒍᒥᐊᖅᑕᖏᑦ ᑯᐃᓐ ᑭᒡᒐᖅᑐᐃᓪᓗᓂ ᑲᓇᑕᒥᒃ ᐊᑖᓂ ᐆᒪ ᐊᖏᕈᑎᐅᑉ, ᐊᖏᕈᑎᐅᑉ ᐃᓗᐊᓂ, ᑐᑭᓯᓇᓐᖏᑉᐸᑕ ᑎᑎᖅᑲᖏᑦ ᒐᕙᒪᒃᑯᑦ ᐊᐅᓚᓂᕆᒋᐊᓕᖏᓐᓄᑦ ᐅᕝᕙᓗ ᑎᑎᖅᑲᖏᑦ ᐅᖃᖅᓯᒪᑉᐸᑕ ᑕᒪᕐᒥᒃ ᒐᕙᒫᒃ ᐊᐅᓚᓂᖃᕆᐊᖃᕆᐊᖏᒃ, ᐊᑐᕈᓐᓃᑎᑦᓯᖏᓪᓗᑎᒃ ᐅᕝᕙᓗ ᐃᓚᓐᖓᐃᖏᓪᓗᑎᒃ ᑲᒪᒋᒋᐊᓕᒻᒥᓂᒃ ᐊᑖᓂ ᐊᖏᕈᑎᐅᑉ ᐅᐞᕙᓗ ᐊᓯᔾᔩᖏᓪᓗᑎᒃ ᑎᒍᒥᐊᖅᑕᒥᓐᓂᒃ, ᑖᒃᑯᐊ ᒪᕐᕉᒃ ᒐᕙᒫᒃ ᑎᓕᓯᒍᓐᓇᖅᑑᒃ ᐊᑕᐅᓯᕐᒥᒃ ᑲᒪᓂᐊᖅᑎᓪᓗᒍ ᐊᐅᓚᓂᐅᔪᒥᒃ ᑭᒡᒐᖅᑐᐃᓗᓂ ᐊᐃᑉᐸᖏᓐᓂᒃ ᑕᒪᒃᑮᓐᓂᓪᓘᓐᓃᑦ. ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᖃᐅᔨᒃᑲᖅᑕᐅᓂᐊᖅᑐᑦ ᓇᓗᓇᐃᖅᑕᐅᔪᖃᖅᐸᑦ.

1.1.7 ᑎᑎᕋᖅᓯᒪᔪᖅ 1.1.6 ᐊᑦᑐᐃᓂᖃᔾᔮᖏᑦᑐᖅ ᖃᓄᐃᓕᖓᓂᖓᓂᒃ ᑐᑭᖓᓂᓪᓘᓐᓃᑦ ᐊᑐᓕᖅᑎᑦᓯᓂᕐᒧᑦ ᐸᕐᓇᐅᑎᐅᑉ ᐅᖃᐅᓯᐅᔫᑉ ᐃᓛᒃᑯᑦ 37-ᒥ.