ARTICLE 14

ᓄᓇᓖᑦ ᓄᓇᖁᑎᖏᑦ

ᑐᑭᖏᑦ

14.1.1 ᐅᕙᓂ ᐃᓛᒃᑰᖅᑐᒥ:

“ᓄᓇᓖᑦ ᓄᓇᖁᑎᖏᑦ” ᑐᑭᓕᒃ ᓄᓇᐃᑦ ᐃᓗᐊᓃᑦᑐᑦ ᓄᓇᓖᑦ ᑭᓪᓕᖏᑦᑕ, ᑭᓯᐊᓂ ᐅᑯᐊ ᐃᓚᐅᓇᑎᒃ:

(a) ᐃᓄᐃᑦ ᓄᓇᖁᑎᖏᑦ;

(b) ᒐᕙᒪᑐᖃᒃᑯᑦ ᓄᓇᖁᑎᖏᑦ ᐃᒪᐃᑦᑐᑦ

(i) ᐃᖅᑲᖏᑦ ᐃᒪᐃᑦ,

(ii) ᐊᑦᑐᐊᓗᓂ ᐃᓚᖓ 5-ᒧᑦ, 100-ᓂᒃ ᐃᑎᒐᓪᓗᐊᒥᓂᒃ ᐆᑦᑑᑎᓂᒃ ᐅᖓᓯᓐᓂᖃᕐᓗᓂ ᑭᓪᓕᖓᓂᒃ ᓯᓈᖓᑕ ᑕᕆᐅᑉ, ᐃᖏᕐᕋᕕᑦᓴᐃᑦ ᑰᑦ, ᐃᖏᕐᕋᕕᑦᓴᐃᓪᓗ ᑕᓰᑦ ᐆᑦᑐᖅᑕᐅᓯᒪᓗᑎᒃ ᐅᓕᓐᓂᕆᓂᖅᐹᖓᓂᒃ,

(iii) ᓇᓗᓇᐃᖅᑕᐅᓯᒪᔪᑦ ᓇᓗᓇᐃᖅᑕᐅᓯᒪᔪᑦ ᒐᕙᒪᒃᑯᑦ ᒐᕙᒪᑐᖃᒃᑯᓪᓗ ᓄᓇᖁᑎᖏᑦ ᓄᓇᓕᓐᓂ, ᑎᑎᕋᖅᑕᐅᖅᓯᒪᔪᑦ ᑎᑎᕋᖅᑕᐅᓯᒪᕕᒻᒥ, ᓄᓇᐃᑦ ᒫᓐᓇ ᐊᑐᖅᑕᐅᒋᐊᓖᑦ ᐊᑐᖅᑕᐅᒋᐊᖃᓛᖅᑐᓪᓗ ᓯᕗᓂᑦᑎᓐᓂ, ᒐᕙᒪᒃᑯᑦ ᐃᓪᓗᖁᑎᖏᓐᓄᑦ ᐊᐅᓚᓂᖏᓐᓄᓘᓐᓃᑦ, ᐅᕝᕙᓗ

(iv) ᑎᒍᔭᐅᔪᑦ ᒐᕙᒪᑐᖃᒃᑯᓐᓄᑦ ᑭᖑᕐᖓᒍᑦ ᐊᖏᕈᑕᐅᓯᒪᓕᖅᑎᓪᓗᒍ ᐊᖏᕈᑎ;

(c) ᓄᓇᐃᑦ ᓇᒻᒥᓂᖅᑖᕆᔭᐅᔪᑦ ᐃᓱᒪᖅᓲᑕᐅᒍᓐᓇᖅᑐᑦ ᓄᓇᓖᑦ ᓄᓇᖁᑎᒋᓐᖏᑕᖏᑦ; ᐊᒻᒪᓗ

(d) ᐅᔭᕋᓐᓂᐊᕐᕖᒃ ᐅᔭᕋᑦᓯᐊᕙᐃᓪᓗ, ᑐᐊᐸᐃᑦ ᐊᓯᖏᑦ, ᑐᐊᐸᑦᑕᕐᕖᑦ ᓴᓇᔭᑦᓴᐃᓪᓗ.

ᓄᓇᓖᑦ ᖃᓄᐃᓕᖓᓂᖏᑦ

14.2.1 ᐃᓚᒍᑕᖅ 14-1 ᓇᓗᓇᐃᖅᓯᔪᖅ ᓄᓇᓕᓐᓂᒃ, ᓯᕗᕐᖓᓂ ᓂᕈᐊᕈᑕᐅᓂᖓᑕ ᐊᖏᕈᑎᐅᑉ ᑐᓂᔭᐅᓯᒪᔪᑦ ᓄᓇᓕᐅᒋᐊᖏᑦ ᓇᓗᓇᐃᒃᑯᑕᕐᒥᒃ ᐊᑖᓂ ᐊᑑᑎᔪᑦ ᐊᕕᑦᑐᖅᓯᒪᔪᓂ ᒐᕙᒪᐃᑦ ᐱᖁᔭᖓᑦᑕ.

ᑐᓂᐅᖅᑲᖅᑕᐅᓂᖏᑦ ᓄᓇᐃᑦ ᓄᓇᓕᓐᓄᑦ

14.3.1 ᐊᑲᐅᓈᓕᑐᐊᖅᐸᑦ, ᐊᕐᕌᒍᐃᓪᓗ ᐱᖓᓱᑦ ᐅᖓᑖᓅᓐᖏᑦᑐᖅ ᐊᖏᕈᑕᐅᓚᐅᖅᑎᓪᓗᒍ ᐊᖏᕈᑎ, ᑲᒥᓯᓇ ᑐᓂᓯᓂᐊᖅᐳᖅ ᓄᓇᓂᒃ ᓄᓇᓕᓐᓄᑦ ᓄᓇᖁᑎᒋᔭᐅᓂᐊᖅᑎᓪᓗᒋᑦ ᓄᓇᓕᒋᔭᐅᔪᓂ, ᓄᓇᓕᓐᓂ ᐱᖃᓯᐅᑎᓂᐊᖅᑐᑦ, ᑖᒃᑯᑑᓐᖏᒃᑲᓗᐊᖅᑎᓪᓗᒋᑦ ᐊᐅᓚᔾᔪᑏᑦ ᓄᓇᓕᓐᓂ ᐱᖃᓯᐅᑎᑦᓱᑎᒃ ᐃᒥᖅᑕᕐᕖᑦ ᐃᓪᓗᐃᓪᓗ, ᓄᓇᓕᓐᓂ ᐊᑦᑕᕐᕖᑦ, ᑭᓈᓗᖃᕐᕖᑦ ᑭᓈᓗᓕᕆᕖᓪᓗ, ᑐᐊᐸᑦᑕᐸᓪᓗᑎᒃ ᓴᓇᔭᑦᓴᖃᖅᐸᓪᓗᑎᒃ, ᐊᒻᒪᓗ ᐃᓗᕕᖃᖅᕖᑦ. ᕿᓐᖑᒻᒥᒐᖅᑕᐅᒋᐊᓖᑦ ᕿᓐᖑᒻᒥᒐᖅᑕᐅᖃᑦᑕᕐᓂᐊᖅᑐᑦ ᓄᓇᓕᓐᓂ ᓄᓇᕗᑦ ᒐᕙᒪᒃᑯᖏᓐᓄᑦ ᑎᒍᒥᐊᕐᓂᐊᖅᓱᑎᓪᓗ ᐊᑭᖏᓐᓂᒃ.

14.3.2 ᑭᖑᕐᖓᒍᑦ ᑐᓂᔭᐅᓚᐅᖅᑎᓪᓗᒋᑦ ᓄᓇᓖᑦ ᓄᓇᓕᓐᓄᑦ ᐊᑖᓂ 14.3.1, ᐊᒻᒪᓗ ᑐᑦᓯᕋᖅᑐᖃᓚᐅᖅᑎᓪᓗᒍ ᓄᓇᓕᓐᓂᒃ ᑎᒥᐅᔪᓂᒃ, ᓄᓇᐃᑦ ᑐᓂᔭᐅᔪᑦ ᓇᐃᑐᐃᓐᓇᕐᓄᑦ ᐃᓘᓐᓇᖏᓐᓄᓘᓐᓃᑦ ᒪᓕᒐᖅᑎᒍᑦ ᕿᓐᖑᒻᒥᒐᖅᑕᐅᓯᒪᔪᓄᑦ ᓄᓇᓕᓐᓂ ᓄᓇᖁᑎᒋᔭᐅᔪᑦ ᑐᓂᔭᐅᓂᐊᖅᑐᑦ ᓄᓇᓕᓐᓂ ᑎᒥᐅᔪᓄᑦ.

14.3.3 ᓇᐅᑐᐃᓐᓇᐃᑦ ᑐᓂᔭᐅᔪᑦ ᐊᑖᓂ 14.3.1 ᐅᕝᕙᓗ 14.3.2 ᑐᓐᖓᕕᖃᕐᓂᐊᖅᑐᑦ ᑕᖅᑳᓐᖓᑦ ᐱᔪᒪᔭᐅᓂᖃᖅᐸᑕ ᑐᓂᔭᐅᑎᓪᓗᒋᑦ.

ᐊᐅᓚᑕᐅᓂᖏᑦ ᓄᓇᓕᓐᓂ ᓄᓇᖁᑎᒋᔭᐃᑦ

14.4.1 ᐅᓪᓗᖓᓂ ᓂᕈᐊᕈᑕᐅᑎᓪᓗᒍ ᐊᖏᕈᑎ, ᓄᓇᓕᓐᓂ ᓄᓇᐃᑦ, ᓄᓇᐃᑦ ᑐᓂᔭᐅᔪᑦ ᓄᓇᓕᓐᓂ ᑎᒥᐅᔪᓄᑦ, ᐊᐅᓚᑕᐅᓂᐊᖅᑐᑦ ᑲᒥᓯᓇᓄᑦ ᐊᑐᖅᑕᐅᓂᐊᖅᑎᓪᓗᒋᑦ ᐱᕙᓪᓕᕈᑕᐅᓂᐊᖅᑎᓪᓗᒋᓪᓗ ᓄᓇᓕᓐᓄᑦ.

14.4.2 ᑲᒥᓯᓇ ᓴᖅᑮᒋᐊᖃᓐᖏᑦᑐᖅ ᓴᒃᑯᐃᒋᐊᖃᕋᓂᓗ ᐱᔪᒪᓂᐅᔪᓂᒃ ᓄᓇᓂᓪᓘᓐᓃᑦ ᓄᓇᓖᑦ ᓄᓇᖁᑎᖏᓐᓂ ᑎᑎᖅᑲᑎᒍᑦ ᐊᖏᖅᑕᐅᖅᑳᖅᓯᒪᒐᓂ ᓄᓇᓕᓐᓂ ᑎᒥᐅᔪᓄᑦ, ᒪᓕᒐᓕᓐᓂᒃ ᐊᓯᐊᒍᓪᓘᓐᓃᑦ.

14.4.3 ᑕᐃᒪᐃᓕᖓᒐᓗᐊᖅᑎᓪᓗᒋᑦ 14.4.1 ᐊᒻᒪᓗ 14.4.2, ᑭᖑᓂᖓᒍᑦ ᓂᕈᐊᕈᑕᐅᓂᖓᑕ ᐊᖏᕈᑎᐅᑉ, ᓯᕗᕐᖓᓂᓗ ᑐᓂᔭᐅᓂᖏᑦᑐ ᓄᓇᓕᓐᓂ ᑎᒥᐅᔪᓄᑦ, ᑲᒥᓯᓇ ᐊᐅᓪᓛᑎᑦᓯᒍᓐᓇᖅᑐᖅ ᐊᐅᓚᑦᓯᔨᓂᒃ ᐊᐅᑕᐅᓕᖏᓐᓂᓪᓗ ᓄᓇᓕᓐᓂ ᑎᒥᐅᔪᑦ ᓇᐅᑐᐃᓐᓇᕐᒧᑦ ᒥᓂᔅᑕᒧᑦ, ᑭᒡᒐᖅᑐᐃᔨᒧᑦ ᐱᔨᑦᓯᕋᖅᑎᖓᓐᓄᓘᓐᓃᑦ ᒐᕙᒪᑐᖃᒃᑯᑦ ᑭᓯᐊᓂ ᐃᒪᐃᓕᖓᔪᖅ,

(a) ᐊᖏᖅᑕᐅᒋᐊᓕᒃ ᓄᓇᓕᓐᓂ ᑎᒥᐅᔪᖅ, ᒪᓕᒐᖃᕐᓗᓂ ᐊᓯᐊᒍᓪᓘᓐᓃᑦ; ᐅᕝᕙᓗ

(b) ᐊᑭᓕᖅᑕᐅᓂᖏᑦ ᐊᑭᖏᑦᑕ ᓄᓇᓕᓐᓂ ᑎᒥᐅᔪᑦ, ᑕᐃᒫᑦᓴᐃᓐᓇᖅ ᑐᓐᖓᕕᖃᕐᓗᑎᒃ ᓲᕐᓗ ᐊᐅᓪᓛᖅᑎᑕᐅᔪᖅ ᑎᒍᔭᖅᑎᑐᑦ, ᐊᐅᓪᓛᖅᑎᑕᐅᑉᐸᑕᓗ ᓄᓇᐃᑦ ᑎᒍᒥᐊᖅᑕᐅᒍᓐᓃᕐᓂᐊᖅᑐᑦ ᓄᓇᓕᓐᓂ ᓄᓇᖁᑎᒋᔭᐅᓂᕐᒧᑦ.

ᐊᐅᓚᑕᐅᓂᖓ 100-ᓂᒃ ᐃᑎᒐᓂᒃ ᑕᑭᓂᓕᐅᑉ ᒥᑦᑕᕐᕕᐅᑉ

14.5.1 ᐅᓪᓗᖓᓂ ᓂᕈᐊᕈᑕᐅᓂᖓᑕ ᐊᖏᕈᑎᐅᑉ, 100-ᓂᒃ ᐃᑎᒐᓂᒃ ᑕᑭᓂᓕᒃ ᒥᑦᑕᕐᕕᒃ ᐅᖃᐅᓯᐅᔪᖅ ᐅᕙᓂ 14.1.1(b)-ᒥ (ii) ᐊᐅᓚᑕᐅᓂᐊᖅᑐᖅ ᑲᒥᓯᓇᒧᑦ ᐊᑐᖅᑕᐅᓂᖓᓄᑦ ᐱᕙᓪᓕᕐᓂᖓᓄᓪᓗ ᓄᓇᓖᑦ.

14.5.2 ᑲᒥᓯᓇ ᐃᒪᐃᑦᓴᕆᐊᖃᓐᖏᑦᑐᖅ:

(a) ᐊᐃᑦᑑᑎᖃᒻᒪᕆᓐᓂᐊᖏᓚᖅ ᐃᓘᓐᓇᖓᓂᒃ ᐃᓚᖓᓂᓪᓘᓐᓃᑦ 100-ᓂᒃ ᐃᑎᒐᓐᓂᒃ ᑕᑭᓂᓕᐅᑉ ᒥᑦᑕᕐᕕᐅᑉ ᐅᖃᓯᐅᔫᑉ 14.1.1(b) (ii), ᐅᕝᕙᓗ

(b) ᐱᔪᒪᓂᖃᕆᐊᖃᓐᖏᑦᑐᖅ ᐃᓘᓐᓇᖓᓂᒃ ᐃᓚᖓᓂᓪᓘᓐᓃᑦ 100-ᓂᒃ ᐃᑎᒐᓐᓂᒃ ᑕᑭᓂᓕᐅᑉ ᒥᑦᑕᕐᕕᐅᑉ ᐅᖃᐅᓯᐅᔫᑉ 14.1.1(b)(ii) ᑎᑎᖅᑲᑎᒍᑦ ᐊᖏᖅᑕᐅᓚᐅᕋᓂ ᓄᓇᓖᑦ ᑎᒥᖓᓐᓄᑦ, ᒪᓕᒐᓕᓐᓂᒃ ᐊᓯᐊᒍᓪᓘᓐᓃᑦ.

14.5.3 ᑕᐃᒪᐃᓕᖓᒐᓗᐊᖅᑎᓪᓗᒋᑦ 14.5.1 ᐊᒻᒪᓗ 14.5.2, ᑭᖑᕐᖓᓂ ᐅᓪᓗᖓᑕ ᓂᕈᐊᕈᑕᐅᓚᐅᖅᑎᓪᓗᒍ ᐊᖏᕈᑎ, ᑲᒥᓯᓇ ᐊᐅᓪᓛᑎᑦᓯᒍᓐᓇᖅᑐᖅ ᐊᐅᓚᑦᓯᓂᕐᒥᒃ ᓇᐅᒃᑯᑐᐃᓐᓇᖅ ᐃᓚᖓᓄᑦ 100-ᓂᒃ ᑕᑭᓂᓕᒃ ᒥᑦᑕᕐᕕᐅᑉ ᐅᖃᐅᓯᐅᔫᑉ 14.1.1(b)(ii)-ᒥ ᓇᐅᑐᐃᓐᓇᕐᒧᑦ ᒥᓂᒡᑕᒧᑦ, ᑭᒡᒐᖅᑐᐃᔨᒧᑦ ᐱᔨᑦᓯᕋᖅᑎᖓᓄᓪᓘᓐᓃᑦ ᒐᕙᒪᑐᖃᒃᑯᑦ ᑭᓯᐊᓂ ᐅᑯᓄᖓ ᐊᑦᑐᐊᔪᖅ,

(a) ᐊᖏᖅᑕᐅᑉᐸᑦ ᓄᓇᓕᓐᓂ ᑎᒥᐅᔪᖅ, ᒪᓕᒐᖃᕐᓗᓂ ᐊᓯᐊᒍᓪᓘᓐᓃᑦ, ᐅᕝᕙᓗ

(b) ᐊᑭᓕᖅᑕᐅᓂᖏᑦ ᐊᑭᓕᕆᐊᓕᖏᑦ ᓄᓇᓕᓐᓂ ᑎᒥᐅᔫᑉ, ᑕᐃᒫᑦᓴᐃᓐᓇᖅ ᑐᓐᖓᕕᖃᕐᓗᓂ ᐊᐅᓪᓛᑎᑦᓯᓂᖅ ᓲᕐᓗ ᐊᐅᓪᓛᖅᑎᑕᐅᔪᖅ ᑎᒍᔭᖅᑎᑐᑦ,

ᐊᒻᒪᓗ ᐊᐅᓪᓛᖅᑎᑕᐅᔪᖃᖅᐸᑦ ᓄᓇᐃᑦ ᐊᐅᓚᑕᐅᒍᓐᓃᕐᓂᐊᖅᑐᑦ ᐊᑐᖅᑕᐅᓂᖓᓄᑦ ᐱᕙᓪᓕᕐᓂᖓᓄᓪᓗ ᓄᓇᓖᑦ.

ᓄᓇᓖᑦ ᑭᓪᓕᖏᑦ

14.6.1 ᓇᐅᑐᐃᓐᓇᖅ ᐅᕙᓃᑦᑐᖅ ᐃᓛᒃᑰᖅᑐᒥ ᑐᑭᔭᐅᓂᐊᖅᑐᖅ ᓴᐳᔾᔨᒍᑕᐅᓗᓂ ᐊᔾᔨᒌᓐᖏᓐᓂᖏᓐᓂᒃ ᓄᓇᓖᑦ ᑭᓪᓕᖏᑦᑕ ᐅᕝᕙᓘᓐᓃᑦ ᓴᖅᑭᖅᑕᐅᔪᖃᖅᐸᑦ ᓄᓇᓕᓐᓂᒃ ᑭᖑᕐᖓᓂ ᐅᓪᓗᖓᑕ ᓂᕈᐊᕈᑕᐅᓚᐅᖅᑎᓪᓗᒍ ᐊᖏᕈᑎ. ᐊᔾᔨᐅᖏᑦᑐᖃᖅᐸᑦ ᓄᓇᓕᓐᓂ ᑭᓪᓕᒋᔭᐅᔪᒥᒃ ᓴᖅᑭᖅᑕᐅᓂᖓᓂᓪᓘᓐᓃᑦ ᓄᑖᓂᑦ ᓄᓇᐃᓖᑦ ᐃᒪᐃᑦᓴᕆᐊᖃᓐᖏᑦᑐᑦ:

(a) ᐊᑦᑐᐃᓂᖃᕐᓂᐊᖏᓪᓚᑦ ᓇᒻᒥᓂᕆᔭᐅᔪᓂᒃ ᓄᓇᓂᒃ;

(b) ᐱᖃᓯᐅᑎᑦᓱᑎᒃ ᐃᓄᐃᑦ ᓄᓇᖁᑎᖏᑦ ᑎᑎᕋᖅᓯᒪᔪᑎᒍᑦ ᐊᖏᖅᑐᖃᓚᐅᖅᑎᓐᓇᒍ, ᒪᓕᒐᓕᓐᓂᒃ ᐊᓯᐊᒍᓪᓘᓐᓃᑦ, ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ; ᐅᕝᕙᓗ

(c) ᐋᖅᑭᒋᐊᕆᐊᖃᖅᐸᖅ ᐊᖏᕈᑎ.

14.6.2 ᐊᓯᔾᔨᕐᓂᐅᔪᑦ ᑕᕝᕙᐅᒌᖅᑐᓄᑦ ᓄᓇᓖᑦ ᑭᓪᓕᖏᓐᓄᑦ ᓴᖅᑭᖅᑕᐅᔪᖃᖅᐸᓪᓘᓐᓃᑦ ᑭᓪᓕᒋᔭᐅᔪᒥᒃ ᓄᑖᓄᑦ ᓄᓇᓕᓐᓄᑦ ᐋᖅᑭᑦᑕᐅᓯᒪᓂᐊᕐᓗᑎᒃ ᐊᑐᐃᓐᓇᐅᑎᑦᓯᕝᐅᓗᑎᒃ ᓄᓇᓖᑦ ᓄᓇᓂᒃ ᓈᒻᒪᑦᑐᓂᒃ ᑐᓐᖓᕕᖃᕐᓗᑎᒃ ᒫᓐᓇ ᓯᕗᓂᑦᑎᓐᓂᓗ. ᐃᓂᒋᔭᐅᒋᐊᓕᓐᓂᒃ:

(a) ᓂᕆᐅᒋᔭᐅᔪᖅ ᐊᖏᓪᓕᒋᐊᕐᓂᐅᒋᐊᓕᒃ ᓄᓇᓕᓐᓄᑦ;

(b) ᓄᓇᓕᓐᓂ ᐃᒪᖃᕐᓂᖅ;

(c) ᑭᓈᓗᓐᓂᒃ ᐊᑦᑕᕐᕕᒃ;

(d) ᓄᓇᒥᒃ ᐊᑐᐃᓐᓇᖃᕐᓂᖅ ᑐᐊᐸᓂᒃ, ᐅᔭᕋᓐᓂᐊᕐᕕᒻᒥᒃ ᐊᒻᒪᓗ ᓴᓇᔭᑦᓴᓂᒃ ᓄᓇᓕᓐᓄᑦ;

(e) ᑕᕝᕙᐅᒌᖅᑐᑦ ᑐᑦᓯᕌᖑᓯᒪᔪᓪᓘᓐᓃᑦ ᓄᓇᓕᓐᓂ ᐃᖏᕐᕋᔾᔪᑏᑦ ᑐᓴᐅᒪᖃᑦᑕᐅᑎᔾᔪᑏᓪᓗ;

(f) ᓄᓇᓕᓐᓂ ᒥᑦᑕᕐᕖᑦ ᑐᓚᑦᑕᕐᕕᖃᕐᕖᓪᓗ;

(g) ᓄᓇᓕᓐᓂ ᐃᓪᓗᖃᕐᕕᑦᓴᐅᔪᑦ ᐊᕙᓗᓕᖅᑕᐅᓯᒪᓗᑎᒃ ᐊᐅᓚᑦᓯᒍᑕᐅᓗᓂ ᐱᕙᓪᓕᐊᔪᓂᒃ ᐸᕐᓇᑕᐅᓯᒪᓐᖏᑦᑐᓂᓪᓗ ᐱᕙᓪᓕᐊᓂᖃᖅᑎᑦᓯᑦᑕᐃᓕᒍᑎᒋᓗᒍ;

(h) ᓄᓇᐃᑦ ᓄᓇᓕᓐᓄᑦ ᐊᑐᖅᑕᐅᖏᓐᓇᖅᐸᑦᑐᑦ ᐊᕐᕌᒍᓘᓐᓃᑦ ᓇᒦᓐᓂᖓ ᐊᑐᕐᓗᒍ ᖁᕕᐊᒋᔭᐅᔪᓄᑦ ᐊᓯᖏᓐᓄᓘᓐᓃᑦ ᐱᔾᔪᑕᐅᔪᓄᑦ ᐱᖁᑎᓄᓪᓗ ᐱᕙᓪᓕᐊᒍᑕᐅᓗᓂ; ᐊᒻᒪᓗ

(i) ᓄᓇᐃᑦ ᐊᔾᔨᐅᖏᑦᑐᑦ ᓄᓇᓕᓐᓂ ᓴᖅᑭᓕᐅᒥᔮᑐᐃᓐᓇᕆᐊᓖᑦ ᐃᒥᒃᑯᑦ ᐱᔭᐅᔭᕆᐊᖃᑐᐃᓐᓇᕆᐊᖃᖅᓱᑎᓪᓗ ᓄᓇᓕᓐᓄᑦ ᐊᐅᓚᑕᖏᑦᑎᒍᑦ ᓄᓇᓕᓐᓂ ᐊᑑᑎᒋᐊᖃᑐᐃᓐᓇᕆᐊᓖᑦ.

ᑎᒍᓯᒍᓐᓇᐅᑎᖃᕐᓂᖅ ᐊᒥᐊᒃᑯᒋᓯᒪᔭᖏᓐᓂᒃ ᒐᕙᒪᒃᑯᑦ ᓄᓇᓂᒃ

14.7.1 ᐅᓪᓗᖓᑕ ᑭᖑᕐᖓᒍᑦ ᓂᕈᐊᕈᑕᐅᓚᐅᖅᑎᓪᓗᒍ ᐊᖏᕈᑎ, ᒐᕙᒪᒃᑯᑦ ᓇᓗᓇᐃᖅᓯᑉᐸᑕ ᓄᓇᒥᒃ ᐃᓗᐊᓂ ᓄᓇᓖᑦ ᑭᓪᓕᖏᑦᑕ ᑎᒍᒥᐊᖅᑕᐅᔪᑦ ᐅᓪᓗᖓᓂ ᓂᕈᐊᕈᑕᐅᑎᓪᓗᒍ ᐊᖏᕈᑎ, ᐊᑐᖅᑕᐅᒋᐊᑐᒍᓐᓃᖅᐸᑕ ᒐᕙᒪᒃᑯᓐᓄᑦ, ᐊᒻᒪᓗ ᓄᓇ ᓇᓗᓇᐃᖅᑕᐅᑉᐸᑦ ᐊᒥᐊᒃᑰᒋᐊᖓ, ᒐᕙᒪᑦᑯᑦ ᑐᓴᖅᑕᐅᑎᑦᓯᓂᐊᖅᑐᑦ ᓄᓇᓕᓐᓂ ᑎᒥᐅᔪᓄᑦ ᑕᐅᖅᓰᒍᑎᑦᓴᐅᒋᐊᖓ ᐃᓱᒪᑦᓴᖅᓯᐅᕈᑕᐅᖁᓗᒍ.

ᑭᓪᓕᒋᔭᐅᔪᑦ ᓴᐳᒻᒥᔭᐅᓂᖏᓐᓄᑦ ᓄᓇᓕᓐᓂ ᓄᓇᐃᑦ

14.8.1 ᐊᑯᕐᖓᓐᓂ ᓯᕗᓪᓕᖅᐹᖅ ᐊᐃᑉᐸᖓᑕᓗ ᓇᓪᓕᐅᓪᓂᖅᓯᐅᕐᓂᖓᑕ ᐅᓪᓗᖓᑕ ᓂᕈᐊᕈᑕᐅᓂᖓᑕ ᐊᖏᕈᑎᐅᑉ, ᐊᕕᑦᑐᖅᓯᒪᔪᓂ ᒐᕙᒪᐃᑦ ᑲᑎᒪᓂᖃᖅᑎᑦᓯᓂᐊᖅᑐᖅ ᐃᓗᐊᓐᓂ ᐊᑐᓂᑦ ᓄᓇᓖᑦ ᓇᓗᓇᐃᖅᓯᓗᑎᒃ ᐊᒥᓲᓂᖅᓴᐃᑦ ᓄᓇᓕᓐᓂ ᓂᕈᐊᖅᑏᑦ ᐃᑲᔪᖅᑐᕐᒪᖔᑕ ᐊᐳᖅᓯᒪᕕᖃᖅᑎᑦᓯᓂᕐᒥᒃ ᓄᓇᓖᑦ ᓄᓇᖁᑎᖏᓐᓄᑦ.

14.8.2 ᐊᒥᓲᓂᖅᓴᐃᑦ ᓄᓇᓕᓐᓂ ᓂᕈᐊᖅᑏᑦ ᓂᕈᐊᖅᐸᑕ ᓂᕈᐊᖅᑎᑕᐅᓗᑎᒃ ᑭᓪᓕᖃᖁᔨᓗᑎ ᓄᓇᓕᓐᓂ ᓄᓇᓂᒃ, ᓄᓇᓕᓐᓂ ᑎᒥᐅᔪᓄᑦ ᓂᐅᕕᐊᑦᓴᖃᕐᓂᐊᖏᑦᑐᑦ, ᑐᓂᓯᓂᐊᕋᑎᒃ, ᓴᖅᑮᓂᐊᕋᑎᓪᓗ ᐱᔪᒪᔭᕿᔭᐅᔪᓂᒃ ᐱᔪᓐᓇᐅᑎᓂᓪᓘᓐᓃᑦ ᓄᓇᓄᑦ ᐃᒪᐃᑦᑐᓄᑦ:

(a) ᐅᖓᑖᓅᖓᒋᐊᖃᓐᖏᑦᑐᑦ 99 ᐊᕐᕌᒍᐃᑦ, ᐱᖃᓯᐅᑎᑦᓱᑎᒃ ᓄᑖᕈᕆᐊᕈᑏᑦᓗ ᐅᕝᕙᓗ

(b) ᐅᖓᑖᓅᖓᒋᐊᖃᓐᖏᑦᑐᑦ 99 ᐊᕐᕌᒍᐃᑦ ᓯᕗᓂᑦᑎᓐᓂ.

14.8.3 ᓯᕗᕐᖓᓂ ᓂᕈᐊᕐᓂᖃᖅᑎᑦᓯᓂᐅᑉ ᐅᖃᐅᓯᐅᔫᑉ 14.8.1-ᒥ, ᑭᓪᓕᒋᔭᐅᔪᑦ ᐅᖃᐅᓯᐅᔪᑦ 14.8.2-ᒥ ᐊᑑᑎᓂᐊᖅᑐᑦ ᓄᓇᓖᑦ ᓄᓇᖁᑎᖏᓐᓄᑦ.

14.8.4 ᖃᖓᑐᐃᓐᓇᑦᓯᐊᖅ ᐊᕐᕌᒍᐃᑦ ᐊᕙᑎᑦ ᐊᓂᒍᖅᐸᑕ, ᓄᓇᓕᓐᓂ ᓂᕈᐊᖅᑏᑦ ᓂᕈᐊᕈᓐᓇᖅᑐᑦ ᓂᕈᐊᕐᓂᖃᕐᓂᒃᑯᑦ ᐲᖅᓯᒍᒪᒍᑎᒃ ᑭᓪᓕᒋᔭᐅᔪᓂᒃ.

14.8.5 ᓄᓇᓕᓐᓂ ᐸᕐᓇᐅᑏᑦ ᐊᑑᑎᓐᖏᑉᐸᑕ ᐊᑦᑐᐊᔪᓄᑦ ᐃᓘᓐᓇᖓᓄᑦ ᐃᓚᖓᓄᓪᓘᓐᓃᑦ ᓄᓇᓕᓐᓂ ᓄᓇᒋᔭᐅᔪᑦ ᓄᓇᓕᓐᓂ, ᓄᓇᓕᓐᓂ ᑎᒥᐅᔪᑦ ᓴᖅᑮᓂᐊᓐᖏᑦᑐᑦ ᒪᓕᒐᖅᑎᒍᑦ ᑕᐃᒫᒐᓚᓪᓘᓐᓃᑦ ᐱᔪᒪᔭᖃᕐᓂᕐᒥᒃ ᓄᓇᒥᒃ ᐅᕝᕙᓘᓐᓃᑦ ᐊᓯᐊᒍᑦ ᐱᕕᖃᖅᑎᑦᓯᓗᑎᒃ ᑲᔪᓯᑎᑦᓯᓂᕐᒧᑦ ᓄᓇᓂ, ᑎᑎᖅᑲᑎᒍᑦ ᐊᖏᓚᐅᖅᑎᓐᓇᒍ ᑲᒥᓯᓇ.

ᐊᐅᓪᓛᑎᑦᓯᑲᐃᓐᓇᕐᓂᖅ ᐊᐅᓚᑦᓯᔨᓂᒃ

14.9.1 ᓄᓇᓕᓐᓂ ᑎᒥᐅᔪᖅ ᖃᖓᑐᐃᓐᓇᖅ ᑕᐅᖅᓰᒍᓐᓇᖅᑐᖅ ᐊᑑᑎᓯᒪ;ᓂᒃ ᐃᑎᕐᓗᑎᓪᓘᓐᓃᑦ ᐊᖏᖃᑎᒌᓐᓂᕐᒧᑦ ᑲᒥᓯᓇᒧᑦ ᐊᐅᓚᑦᓯᓂᕐᒧᑦ ᑎᒍᒥᐊᖅᑕᐅᔪᑦ ᐃᓘᓐᓇᖓᓄᑦ ᐃᓚᖓᓄᓪᓘᓐᓃᑦ ᓄᓇᓕᓐᓂ ᓄᓇᒋᔭᐅᔪᓄᑦ ᓴᒃᑯᐃᔭᐅᑲᐃᓐᓇᕈᓐᓇᖅᑐᖅ ᑲᒥᓯᓇᒧᑦ.

ᕿᒪᐃᓐᓇᖅᑕᐅᓯᒪᔪᑦ ᓄᓇᓖᑦ

14.10.1 ᓄᓇᓕᓐᓂ ᑎᒥᐅᔪᑦ ᑕᕝᕙᐅᒍᓐᓃᖅᐸᑕ, ᓄᓇᓕᓐᓂ ᓄᓇᐃᑦ ᕿᒪᐃᓐᓇᖅᑕᐅᓗᑎᒃ ᓄᓇᓕᓐᓂᓗ ᓄᓇᐃᑦ ᐱᔭᐅᒋᐊᑐᒍᓐᓃᖅᓱᑎᒃ ᒐᕙᒪᒃᑯᑦ ᐱᔾᔪᑕᐅᓗᑎᒃ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐱᔪᓐᓇᕐᓂᓖᑦ ᓯᕗᓪᓕᖅᐹᒥ ᕿᐱᓗᓐᓂᕐᒥᒃ:

(a) ᓂᐅᕕᕐᓂᕐᒧᑦ ᓄᓇᓕᓐᓂᒃ; ᐅᕝᕙᓗ

(b) ᓂᕈᐊᖅᐸᑕ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ, ᑕᐅᖅᓰᒍᒪᓂᕐᒧᑦ ᓄᓇᓂᒃ ᐃᓄᐃᑦ ᓄᓇᖁᑎᖏᓐᓄᑦ ᑕᐃᒫᑦᓴᐃᓐᓇᖅ ᐊᑭᓪᓗᐊᓕᓐᓄᑦ; ᒐᕙᒪᒃᑯᑦ ᓇᓗᓇᐃᖅᑕᐅᓯᒪᔪᓪᓗ ᐃᓄᓐᓄᑦ ᑎᒥᖁᑕᐅᔪᑦ ᓄᓇᓄᑦ ᑕᐅᖅᓰᒍᑕᐅᓂᐊᖅᑐᓄᑦ ᐊᖏᖃᑎᒌᒍᓐᓇᐃᓪᓕᑉᐸᑕ, ᐊᐅᓚᓂᐅᔪᖅ ᖃᓄᖅᑑᕈᑕᐅᓂᐊᖅᑐᖅ ᑐᓐᖓᕕᐅᓗᓂ ᐃᓛᒃᑯᑦ 38.

ᓴᒃᑯᑕᐅᓂᖏᑦ ᓄᓇᓖᑦ ᓄᓇᖁᑎᖏᑦᑕ

14.11.1 ᓴᒃᑯᑕᐅᓂᖏᑦ ᓄᓇᓖᑦ ᓄᓇᖁᑎᖏᑦᑕ ᐊᑑᑎᓂᐊᖅᑐᑦ ᑐᓐᖓᕕᖃᕐᓗᑎᒃ ᒪᓕᒐᕐᓂᒃ ᐃᓘᓐᓇᐃᓐᓅᖓᔪᓂᒃ.

ᓄᑖᑦ ᓄᓇᓖᑦ

14.12.1 ᐅᓇ ᐃᓛᒃᑰᖅᑐᖅ, ᐋᒡᒐᐅᒐᓗᐊᖅ 14.2.1, ᐊᑑᑎᓂᐊᖅᑐᑦ ᓄᓇᓕᓐᓄᑦ ᓴᖅᑭᖅᑕᐅᔪᓄᑦ ᑭᖑᕐᖓᓂ ᐅᓪᓘᑉ ᓂᕈᐊᕈᑕᐅᓂᖓᑕ ᐊᖏᕈᑎᐅᑉ, ᑕᒪᓐᓇᓗ ᐱᔾᔪᑕᐅᓗᓂ, “ᐅᓪᓗᖅ ᓂᕈᐅᕈᑕᐅᔪᖅ ᐊᖏᕈᑎ” ᑕᑯᓐᓇᖅᑕᐅᓂᐊᖅᑐᖅ “ᐅᓪᓗᖅ ᓴᖅᑭᖅᑕᐅᓂᖓᑦ ᓄᓇᓖᑦ”.

ᑕᕝᕙᐅᒌᖅᑐᑦ ᓄᓇᓖᑦ

(Section 14.2.1)

ᐃᒃᐱᐊᕐᔪᒃ

ᕿᑭᖅᑕᖅᔪᐊᖅ

ᑭᓐᖓᐃᑦ

ᑲᖏᖅᑐᒑᐱᒃ

ᓴᓂᕋᔭᒃ

ᐊᐅᔪᐃᑦᑐᖅ

ᐃᒡᓗᓕᒃ

ᐃᖃᓗᐃᑦ

ᑭᒻᒥᕈᑦ

ᐸᓐᓂᖅᑑᖅ

ᒥᑦᑎᒪᑕᓕᒃ

ᖃᐅᓱᐃᑦᑐᖅ

ᓴᓂᑭᓗᐊᖅ

ᐊᕐᕕᐊᑦ

ᖃᒪᓂᑦᑐᐊᖅ

ᐃᒡᓗᓕᒑᕐᔪᒃ

ᓴᓪᓕᖅ

ᑲᖏᖅᖠᓂᖅ

ᓇᐅᔮᑦ

ᑎᑭᕋᕐᔪᐊᖅ

ᐃᖃᓗᑦᑑᑦᑎᐊᖅ

ᖁᕐᓗᖅᑐᖅ

ᐅᖅᓱᖅᑑᖅ

ᑰᒑᕐᔪᒃ

ᑕᓗᕐᔪᐊᑦ