ARTICLE 25
ᓄᓇᒦᓐᖔᖅᑐᓂᒃ ᓂᖏᖅᑕᖃᒌᓐᓂᖅ
ᐃᓄᐃᑦ ᐱᔪᓐᓇᕐᓂᖓᑦ ᓂᖏᖅᑕᕐᓂᕐᒧᑦ
25.1.1 ᐃᓄᐃᑦ ᐱᔪᓐᓇᕐᓂᓖᑦ, ᐊᑐᓂᑦ ᐅᓪᓗᖅᓯᐅᑎᓂᒃ ᐊᒻᒪᓗ ᐊᕐᕌᒍᑕᒫᑦ, ᐊᑭᓕᖅᑕᐅᓂᕐᒥᒃ ᐊᔾᔨᓪᓗᐊᖏᓐᓂᒃ ᐅᑯᐊ:
(a) 50-ᐳᓱᖓ (50%) ᓯᕗᓪᓖᑦ $2-ᒥᓕᐊᓐ ($2,000,000) ᓄᓇᒥᐅᑕᕐᓂᒃ ᓂᖏᖅᑕᐅᔪᓂᒃ ᒐᕙᒪᒃᑯᓐᓄᑦ ᑕᐃᑲᓂ ᐊᕐᕌᒍᒥ; ᐊᒻᒪᓗ
(b) 5-ᐳᓴᖓ (5%) ᕐᑳᖓᒍᒃᑲᓐᓂᖅ ᓂᖏᖅᑕᐅᔪᓄᑦ ᒐᕙᒪᒃᑯᓐᓄᑦ ᑕᐃᑲᓂ ᐊᕐᕌᒍᖓᓂ.
ᐊᑭᓖᓂᖅ ᓂᖏᖅᑕᐅᔪᓂᒃ
25.2.1 ᒐᕙᒪᒃᑯᑦ ᐊᑭᓖᓂᐊᖅᑐᑦ ᓄᓇᕗᒻᒥ ᐸᐸᑦᓯᔨᓄᑦ ᐊᑭᓕᕆᐊᓕᓐᓂᒃ ᐊᑖᓂ ᑎᑎᕋᖅᓯᒪᔪᖅ 25.11.
25.2.2 ᐊᑭᓕᐅᑕᐅᔪᑦ ᒐᕙᒪᒃᑯᓐᓄᑦ ᑐᓐᖓᕕᖃᕐᓗᑎᒃ ᐆᒪᓐᖓᑦ ᐃᓛᒃᑰᖅᑐᒥᒃ ᐋᖅᑭᑦᑕᐅᓂᐊᖅᑐᑦ ᑐᓐᖓᕕᖃᕐᓗᑎᒃ ᖃᑦᓯᐅᓂᖏᓐᓂᒃ ᐊᑭᓕᐅᑕᐅᒋᐊᓖᑦ ᐱᔭᐅᔪᓪᓗ ᒐᕙᒪᒃᑯᓐᓄᑦ ᐊᑦᑐᐊᔪᑦ ᓄᓇᒥᐅᑕᕐᓄᑦ ᐱᓯᒪᔪᓄᑦ ᑭᖑᕐᖓᓂ ᐅᓪᓘᑉ ᒪᓕᒐᓐᖑᖅᑎᑕᓚᐅᖅᑎᓪᓗᒍ ᐊᖏᕈᑎ.
25.2.3 ᐊᑭᓕᐅᑕᐅᔪᑦ ᑐᓂᔭᐅᔪᑦ ᓄᓇᕗᒻᒥ ᐸᐸᑦᓯᔨᒃᑯᓐᓄᒃ ᑕᖅᑮᑦ ᐱᖓᓱᑦ ᐊᓂᒍᑐᐊᕋᐃᑉᐸᑕ ᐊᑭᓕᖅᑕᐅᓗᑎᒃ ᐱᔭᐅᑦᓴᐃᓐᓇᖅᑐᑎᑐᑦ.
25.2.4 ᒐᕙᒪᒃᑯᑦ ᐊᑐᐃᓐᓇᐅᑎᑦᓯᖃᑦᑕᕐᓂᐊᖅᑐᑦ ᓄᓇᕗᒻᒥ ᐸᐸᑦᓯᔨᓄᑦ ᐅᖃᖅᓯᒪᓗᑎᒃ ᓇᓗᓇᐃᖅᓯᓗᑎᒃ ᑐᓐᖓᕕᐅᔪᓂᒃ ᓇᓪᓕᖏᑦ ᓂᖏᖅᑕᐅᔪᑦ ᐋᖅᑭᑦᑕᐅᓯᒪᒻᒪᖔᑕ ᐊᕐᕌᓂᖓᓂ.
25.2.5 ᑐᑦᓯᕋᖅᐸᑕ ᓄᓇᕗᒻᒥ ᐸᐸᑦᓯᔩᑦ, ᒐᕙᒪᒃᑯᑦ ᑐᑦᓯᕋᕐᓂᐊᖅᑐᑦ ᑕᒻᒪᖅᓯᒪᔪᖅᓯᐅᖅᑎᖅᔪᐊᕐᒧᑦ ᓇᓗᓇᐃᖅᓯᖁᓪᓗᒍ ᑕᒻᒪᖅᓯᒪᓐᖏᓐᓂᖏᓐᓂᒃ ᑐᓴᕋᑦᓴᐅᔪᑦ ᐊᕐᕌᒍᑕᒫᖅᓯᐅᑎᓂ ᓇᓕᖅᑲᓂ.
ᐅᖃᖃᑎᖃᕐᓂᖅ
25.3.1 ᒐᕙᒪᒃᑯᑦ ᐅᖃᖃᑎᖃᕐᓂᐊᖅᑐᑦ ᓇᓗᓇᐃᖅᑕᐅᓯᒪᔪᓂᒃ ᐃᓄᓐᓂᒃ ᑎᒥᖁᑕᐅᔪᓂᒃ ᓇᐅᑐᐃᓐᓇᕐᓄᑦ ᑐᑦᓯᕌᖑᔪᓄᑦ ᐊᓯᔾᔨᖅᑕᐅᖁᔭᐅᓗᓂ ᒪᓕᒐᖅ ᓄᓇᒥᐅᑕᕐᓂᒃ ᓂᖏᖅᑕᐅᕙᑦᑐᓂᒃ ᐊᑭᓕᐅᑕᐅᔪᓂᒃ ᒐᕙᒪᓄᑦ. ᒐᕙᒪᒃᑯᑦ ᐅᖃᖃᑎᖃᖅᐸᑕ ᒐᕙᒪᒃᑯᑦ ᓯᓚᑖᓃᑦᑐᓂᒃ ᓇᐅᑐᐃᓐᓇᕐᓄᑦ ᑐᑦᓯᕌᖑᔪᓄᒃ ᐊᓯᔾᔨᕐᓂᐅᔪᓄᑦ ᑮᓇᐅᔭᐃᑦ ᐊᐅᓚᓂᖏᓐᓄᒃ ᐊᓯᔾᔩᒐᔭᖅᑐᑦ ᓄᓇᒥᐅᑕᕐᓂᒃ ᓂᖏᕈᑕᐅᕙᑦᑐᓂᒃ, ᐅᖃᖃᑎᖃᕆᐊᖃᕐᒥᔪᖅ ᓇᓗᓇᐃᖅᑕᐅᓯᒪᔪᓂᒃ ᐃᓄᓐᓄᑦ ᑎᒥᖁᑕᐅᔪᓂᒃ.
ᐊᑑᑎᕕᖃᕐᕕᖓ
25.4.1 ᐅᓇ ᐃᓛᒃᑰᖅᑐᖅ ᐊᑑᑎᔪᖅ ᓄᓇᕗᒻᒧᑦ ᐊᒻᒪᓗ ᐊᐅᓚᓂᐅᔪᒧᑦ.