ARTICLE 38

ᐊᖏᖃᑎᒌᒍᓐᓇᐃᓪᓕᔪᓄᑦ ᐋᖅᑭᑦᓱᐃᔩᑦ

ᓴᖅᑭᖅᑕᐅᓂᖏᑦ ᐊᖏᖃᑎᒌᒍᓐᓇᐃᓪᓕᔪᓄᑦ ᐋᖅᑭᑦᓱᐃᔩᑦ

38.1.1 ᐊᖏᖃᑎᒌᒍᓐᓇᐃᓪᓕᔪᓄᑦ ᐋᖅᑭᑦᓱᐃᔩᑦ (ᐋᖅᑭᑦᓱᐃᔩᑦ) ᓴᖅᑭᖅᑕᐅᓂᐊᖅᑐᖅ.

38.1.2 ᑲᑎᒪᔩᑦ ᑲᑎᒪᔨᖃᕐᓂᐊᖅᑐᖅ 9-ᓂᒃ. ᐃᑦᓯᕙᐅᑕᖓᑦ ᐊᒻᒪᓗ ᑐᖏᓕᖓ ᓂᕈᐊᑦᑕᐅᓂᐊᖅᑐᖅ ᑖᒃᑯᓄᖓ ᑲᑎᒪᔨᓄᑦ.

38.1.3 ᒐᕙᒪᒃᑯᖏᑦ ᑲᓇᑕᐅᑉ, ᐊᕕᑦᑐᖅᓯᒪᔪᕐᔪᐊᓂ ᒐᕙᒪᐃᑦ ᐊᒻᒪᓗ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐅᖃᖃᑕᐅᓂᐊᖅᑐᖅ ᐊᖏᖃᑎᒌᒐᓱᐊᕐᓗᑎᒃ ᐃᓄᓐᓄᑦ ᑎᓕᔭᐅᒋᐊᓐᖓᕐᓂᐊᖅᑐᓄᑦ ᑲᑐᔾᔨᓗᑎᒃ ᑲᑎᒪᔨᐅᓂᕐᒧᑦ.

38.1.4 ᐊᖏᖃᑎᒌᒍᑕᐅᓐᖏᑉᐸᑦ ᑕᖅᑮᑦ 6 ᐃᓗᐊᓂ ᐅᓪᓗᖓᓂᒃ ᒪᓕᒐᓐᖑᖅᑎᑕᐅᓚᐅᖅᑎᓪᓗᒍ ᐊᖏᖃᑎᒌᒍᑎ ᓇᐅᑐᐃᓐᓇᕐᓄᑦ ᐃᓘᓐᓇᖏᓐᓄᓘᓐᓃᑦ 8 ᑎᓕᔭᐅᔪᑦ ᐊᑖᓂ ᑎᑎᕋᖅᓯᒪᔪᖅ 38.1.3, ᐊᒥᐊᒃᑯᖏᑦ ᑎᓕᔭᐅᒋᐊᓖᑦ, ᑐᑦᓯᕋᖅᑐᖃᓚᐅᖅᑎᓪᓗᒍ ᒐᕙᒪᒃᑯᖏᓐᓄᑦ ᑲᓇᑕᐅᑉ, ᐊᕕᑦᑐᖅᓯᒪᔪᕐᔪᐊᓂ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ, ᑲᒪᒋᔭᐅᓂᐊᖅᑐᑦ ᐃᖅᑲᖅᑐᐃᔨᒧᑦ ᐃᖅᑲᖅᑐᐃᔨᕐᔪᐊᒃᑯᓄᓪᓘᓐᓃᑦ ᑎᒍᒥᐊᖅᑐᓄᑦ ᓄᓇᕗᒻᒥ.

38.1.5 ᑎᓕᐅᔭᒃᑲᓂᖃᑦᑕᕐᓂᐊᖅᑐᖅ ᓄᑖᓂᓪᓘᓐᓃᑦ ᑎᓕᔭᐅᔪᖃᕐᓗᓂ ᑲᑎᒪᔨᓄᑦ ᑐᓐᖓᕕᖃᕐᓗᑎᒃ ᑎᑎᕋᖅᓯᒪᔪᓂᒃ 38.1.3 ᐊᒻᒪᓗ 38.1.4, ᐋᒡᒐᐅᒐᓗᐊᖅ ᐃᖅᑲᖅᑐᐃᔨ ᑐᑦᓯᕋᕐᕕᐅᒍᓐᓇᖅᑐᖅ ᑎᓕᓯᖁᔭᐅᓗᓂ ᐊᖏᖃᑎᒌᓐᓂᖅᑕᖃᓐᖏᑉᐸᑦ ᑕᖅᑮᑦ 6 ᐃᓗᐊᓐᓂ ᐃᓐᓄᒋᐊᓕᑦᑕᖃᖅᑎᓪᓗᒍ.

38.1.6 ᐊᑯᓂᐅᓂᖓ ᑎᓕᔭᐅᓂᖓᑕ ᑲᑎᒪᔨᐅᑉ ᑲᑎᒪᔨᐅᓂᕐᒧᑦ ᐊᕐᕌᒍᓄᑦ ᑕᓪᓕᒪᓅᖓᓂᐊᖅᑐᖅ ᑲᑎᒪᔨᐅᖃᑕᐅᔪᕐᓗ ᑎᓕᔭᐅᒃᑲᓐᓂᕈᓐᓇᖅᓱᓂ.

38.1.7 ᓇᐅᑐᐃᓐᓇᐃᑦ ᐃᖅᑲᓇᐃᔭᖅᑐᖅ ᑲᑎᒪᔨᓄᑦ ᐊᑐᐃᓐᓇᐅᑎᑦᓯᕕᐅᓂᐊᖅᑐᖅ ᒐᕙᒪᒃᑯᓐᓄᑦ ᐊᒻᒪᓗ ᓇᐅᑐᐃᓐᓇᖅ ᐊᓪᓚᕝᕕᒋᔭᐅᔪᑦ ᑲᑎᒪᔨᓄᑦ ᓄᓇᕗᒻᒦᓐᓂᐊᖅᑐᖅ. ᑲᑎᒪᔩᑦ ᐸᕐᓇᐃᓂᐊᖅᑐᑦ ᐊᕐᕌᒍᑕᒫᖅᓯᐅᑎᓂᒃ ᑮᓇᐅᔭᖅᑑᑎᑦᓴᓂᒃ, ᑐᓐᖓᕕᒋᓗᒍ ᕿᒥᕐᕈᓂᖓᑦ ᓈᒻᒪᓴᕐᓂᖓᓪᓗ ᒐᕙᒪᒃᑯᑦ. ᐊᖏᖅᑕᐅᔪᑦ ᐊᑭᓕᖅᑐᕆᐊᓕᖏᑦ ᑲᑎᒪᔩᑦ ᑎᒍᒥᐊᖅᑕᐅᓂᐊᖅᑐᑦ ᒐᕙᒪᒃᑯᓐᓄᑦ.

ᑎᒍᒥᐊᕐᓂᖓᑦ ᐊᖏᖃᑎᒌᒍᓐᓇᐃᓕᓯᒪᔪᓄᑦ ᐋᖅᑭᑦᓱᐃᔩᑦ

38.2.1 ᐊᖏᖃᑎᒌᒍᓐᓇᐃᓕᔪᖃᖅᑎᓪᓗᒍ ᐋᖅᑭᑦᓱᐃᔩᑦ ᑎᒍᒥᐊᕐᓂᐊᖅᑐᖅ ᐋᖅᑭᑦᓱᐃᓂᕐᒥᒃ ᐊᑦᑐᐊᔪᓄᑦ:

(a) ᓇᐅᑐᐃᓐᓇᖅ ᐊᐅᓚᓂᐅᔪᖅ ᐊᑦᑐᐊᔪᖅ ᑐᑭᓕᐅᖅᑕᐅᓂᖓᓄᑦ, ᐊᑑᑎᓂᖓᓄᑦ ᐊᑐᓕᖅᑎᑕᐅᓂᖓᓄᓪᓘᓐᓃᑦ ᐊᖏᖃᑎᒌᒍᑎᒥ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᒐᕙᒪᒃᑯᓪᓗ ᐊᖏᖃᑎᒌᑉᐸᑕ ᐊᑦᓱᖏᕐᓂᕐᒧᑦ ᐋᖅᑭᑦᑕᐅᔪᒧᑦ; ᐊᒻᒪᓗ

(b) ᐊᐅᓚᓂᐅᔪᑦ ᓇᓗᓇᐃᖅᑕᐅᔪᑦ ᐊᓯᖏᓐᓂ ᐃᓛᒃᑰᖅᑐᓂ ᖃᓄᖅᑑᕈᑕᐅᔪᑦ ᐋᖅᑭᑦᓱᐃᔨᒃᑲᐃᔨᓄᑦ ᐊᑖᓂ ᐆᒪ ᐃᓛᒃᑰᖅᑑᑉ.

38.2.2 ᐊᖏᖃᑎᒌᒍᓐᓇᐃᓕᔪᖃᖅᑎᓪᓗᒍ ᐋᖅᑭᓱᐃᔩᑦ ᓄᖅᑲᖓᑎᑕᐅᔪᑦ ᐋᖅᑮᓃᕐᒥᒃ ᐊᓯᔾᔩᔪᒥᒃ, ᐋᖅᑭᒋᐊᕆᓂᕐᒥᒃ, ᐲᖅᓯᓂᕐᒥᒃ, ᐅᕝᕙᓗ ᐊᓯᔾᔩᓂᕐᒥᒃ ᓇᐅᑐᐃᓐᓇᕐᒧᑦ ᐃᓛᒃᑰᖅᑐᒧᑦ ᐊᖏᖃᑎᒌᒍᑎᒥ ᖃᓄᑐᐃᓐᓇᑦᓯᐊᖅ.

ᒪᓕᒐᐃᑦ ᐊᐅᓚᓃᓪᓗ

38.3.1 ᑲᑎᒪᔩᑦ ᓴᖅᑮᒍᓐᓇᖅᑐᑦ ᒪᓕᒐᕐᓂᒃ ᐊᐅᓚᓂᐅᔪᓂᓪᓗ ᐊᐅᓚᑕᐅᓂᖏᓐᓄᑦ ᐅᖃᐅᓯᐅᔪᑦ ᐊᑖᓂ ᐆᒪ ᐃᓛᒃᑰᖅᑑᑉ.

38.3.2 ᑐᕌᒐᕆᔭᐅᔪᑦ ᐊᐅᓚᓂᐅᔪᖅ ᐋᖅᑭᓱᐃᔨᓗᑦ ᐋᖅᑮᒍᑕᐅᓂᐊᖅᑐᖅ ᓈᒻᒪᓐᖏᓕᐅᕈᑕᐅᔪᓂᒃ ᑐᓂᔭᐅᔪᓂᒃ ᐊᐅᓚᓂᑐᐃᓐᓇᒃᑯᑦ.

38.3.3 ᐅᖃᐅᓯᐅᔪᖅ ᑐᓴᖅᑕᐅᓂᐊᖅᑐᖅ ᓇᓗᓇᐃᖅᑕᐅᓗᓂᓗ ᐋᖅᑭᑦᓱᐃᔨᓄᑦ ᕿᒥᕐᕈᔨᓄᑦ ᓂᕈᐊᖅᑕᐅᔪᓄᑦ ᐊᑯᕐᖓᓐᓂᒃ ᑲᑎᒪᔩᑦ, ᐃᒪᐃᑦᑑᓗᑎᒃ:

(a) ᐊᑕᐅᓯᖅ ᐋᖅᑭᑦᓱᐃᔨ, ᐊᖏᖃᑎᒌᒍᑕᐅᑉᐸᑦ ᑎᒥᐅᔫᓐᓄᑦ ᐋᖅᑭᑦᓱᐃᔨᖃᕆᐊᓖᓐᓄᑦ; ᐅᕝᕙᓗ

(b) ᐱᖓᓱᖅ ᐋᖅᑭᑦᓱᐃᔩᑦ, ᐊᑕᐅᓯᖅ ᓂᕈᐊᖅᑕᐅᓗᓂ ᐊᑐᓂᑦ ᑎᒥᐅᔪᓄᑦ ᐋᖅᑭᑦᓱᐃᔨᖃᕆᐊᓕᓐᓄᑦ, ᐃᑦᓯᕙᐅᑕᕐᓗ ᑎᓕᔭᐅᓗᓂ ᑐᓐᖓᕕᒋᓗᒋᑦ ᑎᑎᕋᖅᓯᒪᔪᑦ 38.3.6.

38.3.4 ᐋᖅᑭᑦᓱᐃᔩᑦ ᐊᐅᓚᔾᔭᑦᑕᐅᓂᐊᖅᑐᑦ ᐅᖃᐅᓯᐅᔪᒧᑦ ᐋᖅᑭᑦᓱᐃᖁᔨᓗᑎᒃ ᑲᑎᒪᔨᑦ ᓇᓪᓕᑐᐃᓐᓇᖏᓐᓄᑦ ᐊᖏᖃᑎᒌᒍᓐᓇᐃᓪᓕᔪᓄᑦ. ᐅᖃᐅᓯᐅᔪᖅ ᑕᐃᓯᓂᐊᖅᑐᖅ ᐊᐃᑉᐸᐃᕐᒥᓂᒃ ᐊᖏᖃᑎᒋᓐᖏᑕᒥᓂᒃ, ᓇᓗᓇᐃᖅᓯᓗᓂ ᐊᖏᖃᑎᒌᓐᖏᒍᑕᐅᔪᒥᒃ, ᓇᐃᓪᓕᑎᖅᓯᒪᓗᑎᒃ ᐃᓗᓕᖏᑦ, ᓇᓗᓇᐃᔭᕐᓗᒍ ᐃᓱᒫᓘᑕᐅᔪᖅ ᐋᖅᑭᑦᑕᐅᒋᐊᓕᒃ, ᑕᐃᔭᐅᓗᓂ ᐋᖅᑭᑦᓱᐃᔨ ᑲᑎᒪᔨᓂᒃ ᓇᓗᓇᐃᔭᕐᓗᑎᓪᓗ ᖃᓄᐃᖁᔨᒻᒪᖔᕐᒥᒃ.

38.3.5 ᐅᓪᓗᐃᑦ 30 ᐃᓗᐊᓐᓂ ᖃᐅᔨᒃᑲᖅᑕᐅᓚᐅᕐᓗᑎᒃ ᑲᑎᒪᔨᓄᑦ ᐋᖅᑭᑦᓱᐃᔨᓕᐊᖅᑐᖃᕆᐊᖃᕆᐊᖓ, ᐊᐃᑉᐸᐃᖏᑦ ᐊᖏᖃᑎᒋᓐᖏᑕᖏᑦ ᑭᐅᓂᐊᖅᑐᑦ ᐅᖃᐅᓯᐅᔪᒧᑦ, ᐊᖏᖃᑎᖃᕐᓗᑎᒃ ᐋᖅᑭᑦᓱᐃᔨᒧᑦ ᑕᐃᔭᐅᔪᒧᑦ ᐱᔾᔪᑕᐅᔪᒥ ᐅᕝᕙᓗ ᑕᐃᔭᐅᓂᖓᓂᒃ ᐋᖅᑭᑦᓱᐃᔨᐅᑉ ᑲᑎᒪᔨᓂᒃ ᓇᓗᓇᐃᔭᖅᑕᐅᔫᓪᓗ ᖃᓄᐃᑕᐅᖁᔭᐅᔫᑉ.

38.3.6 ᐃᑦᓯᕙᐅᑕᖓᑦ ᐊᖏᖃᑎᒌᒍᑕᐅᓯᒪᓂᐊᖅᑐᖅ ᒪᕐᕉᓐᓄᑦ ᐋᖅᑭᑦᓱᐃᔩᓐᓄᑦ ᑕᐃᔭᐅᔫᓐᓄᑦ ᐊᑖᓂ ᑎᑎᕋᖅᓯᒪᔪᑦ 38.3.4 ᐊᒻᒪᓗ 38.3.5, ᐋᒡᒐᐅᒐᓗᐊᖅ, ᐊᖏᖃᑎᒌᓐᓂᖅ ᑲᔪᓯᓐᖏᑉᐸᑦ, ᐃᑦᓯᕙᐅᑕᖅ ᑎᓕᔭᐅᓂᐊᖅᑐᖅ ᐃᖅᑲᖅᑐᐃᔨᒧᑦ ᑐᓐᖓᕕᒋᓗᒍ ᐊᕕᑦᑐᖅᓯᒪᔪᕐᔪᐊᓂ ᐋᖅᑭᑦᓱᐃᔨᓄᑦ ᒪᓕᒐᕐᔪᐊᖅ, ᑕᐃᒪᐃᑉᐸᑦ ᐃᖅᑲᖅᑐᐃᔨ ᑎᓕᓯᒍᓐᓇᖅᑐᖅ ᓇᐅᑐᐃᓐᓇᕐᒥᒃ ᐃᓄᒻᒥᒃ ᐃᑦᓯᕙᐅᑕᐅᓂᕐᒧᑦ ᐃᖅᑲᖅᑐᐃᔨᐅᑉ ᓈᒻᒪᑦᑐᕆᔭᖓᓂᒃ, ᐃᓄᒃ ᑲᑎᒪᔨᐅᖃᑕᐅᑉᐸᑦ ᑲᑎᒪᔨᐅᖃᑕᐅᓐᖏᒃᑲᓗᐊᖅᐸᓪᓘᓐᓃᑦ ᑲᑎᒪᔨᓄᑦ.

38.3.7 ᐊᖏᖃᑎᒌᒍᓐᓇᐃᓕᔪᖃᖅᑎᓪᓗᒍ ᐋᖅᑭᓱᐃᓂᕐᒧᑦ ᕿᒥᕐᕈᔩᑦ, ᐱᕕᖃᖅᑎᑦᓯᒍᓐᓇᖅᑐᑦ ᓇᐅᑐᐃᓐᓇᕐᒥᒃ ᐃᓄᒻᒥᒃ ᐃᓚᐅᑎᑦᓯᓗᑎᒃ ᐋᖅᑭᑦᓱᐃᔪᓂ ᐅᖃᐅᔾᔨᒋᐊᖅᑎᐅᓗᓂ, ᐋᖅᑭᑦᓱᐃᔩᑦ ᕿᒥᕐᕈᔨᖏᑦᑕ ᑕᑯᓐᓇᖅᑕᖏᑦᑎᒍᑦ ᑕᐃᓐᓇ ᐃᓄᒃ ᐊᑦᑐᖅᑕᐅᑐᐃᓐᓇᕆᐊᖃᖅᐸᑦ ᐋᖅᑭᑦᑕᐅᔪᓄᑦ, ᐊᒻᒪᓗ ᐃᒪᐃᓕᖓᓂᕆᔭᖏᓐᓂᒃ ᐋᖅᑭᑦᓱᐃᔩᑦ ᕿᒥᕐᕈᔨᖏᑦᑕ ᑎᓕᓯᔾᔪᑎᒋᑐᐃᓐᓇᕆᐊᓕᖏᓐᓂᒃ.

38.3.8 ᐋᖅᑭᑦᓱᐃᑦᔩᑦ ᕿᒥᕐᕈᔨᖏᑦ ᑎᒍᒥᐊᕐᓂᐊᖅᑐᑦ ᓇᓗᓇᐃᔭᐃᓂᕐᒥᒃ ᐊᐱᖅᑯᑎᓕᒫᓂᒃ ᐅᖃᐅᓯᐅᔪᒧᑦ, ᐊᒻᒪᓗ ᑐᓂᓯᓗᑎᒃ, ᐱᖃᓯᐅᑎᑦᓱᓂ ᐊᑯᓐᓂᖅᓯᐅᑎᒥᒃ ᖃᓲᒻᒥᒍᑎᑦᓴᒥᒃ, ᐊᑭᓖᓂᕐᒥᒃ ᐱᔭᐅᔪᒪᔪᒥᒃ, ᐊᑭᒋᔭᐅᔪᓂᓪᓗ; ᑭᓯᐊᓂ ᐊᑭᒋᔭᐅᔪᑦ ᑐᓂᔭᐅᓂᐊᓐᖏᑦᑐᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᓇᐅᑐᐃᓐᓇᕐᒧᑦ ᐋᖅᑭᑦᓱᖅᑕᐅᔪᒧᑦ ᐃᓗᐊᓂ ᑎᑎᕋᖅᓯᒪᔪᖅ 38.2.1 ᐋᖅᑭᑦᓱᐃᔩᑦ ᕿᒥᕐᕈᔨᖏᑦ ᑕᐃᒪᐃᓕᖓᑎᑦᓯᑉᐸᑕ ᐋᖅᑭᑦᑕᖓᓐᓂᒃ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ.

38.3.9 ᐋᖅᑭᑦᓱᐃᔩᑦ ᕿᒥᕐᕈᔨᖏᑦ ᐋᖅᑮᒋᐊᖃᓐᖏᑦᑐᑦ ᖃᓄᖅᑑᕈᑎᓂᒃ ᐊᑭᒋᔭᐅᔪᓄᑦ, ᐊᑐᓂᑦ ᑎᒥᐅᔫᑉ ᐋᖅᑭᑦᓱᐃᔨᓕᐊᖅᓯᒪᔫᒃ ᓇᒻᒥᓂᖅ ᐊᑭᓕᕆᐊᓕᒻᒥᓂᒃ ᐊᑭᓖᓂᐊᖅᑐᑦ ᐊᒻᒪᓗ ᐃᑲᔫᑎᒋᒋᐊᓕᒻᒥᓂᒃ ᐊᓯᖏᓐᓄᑦ ᐊᑭᓕᖅᑐᕆᐊᓕᓐᓄᑦ ᐋᖅᑭᑦᓱᐃᔨᓄᑦ, ᐱᖃᓯᐅᑎᑦᓱᓂ ᐊᑭᓕᖅᑕᐅᓂᖏᑦ ᐊᑭᓕᖅᑐᕆᐊᓕᖏᓪᓗ ᐊᖅᑭᓱᐃᔩᑦ ᕿᒥᕐᕈᔨᖏᑦᑕ.

38.3.10 ᑕᐃᒪᐃᓕᖓᒐᓗᐊᖅᑎᓪᓗᒍ ᑎᑎᕋᖅᓯᒪᔪᖅ 38.3.9, ᑎᒥᐅᔫᑉ ᐋᖅᑭᓱᑦᐃᔨᓅᖅᑐᑦ ᐊᑭᒋᔭᐅᔪᓂᒃ ᐊᑭᓖᓂᐊᓐᖏᑦᑐᑦ ᐋᖅᑭᑦᓱᐃᔩᑦ ᕿᒥᕐᕈᔨᖏᓐᓄᑦ ᐊᐅᓚᓂᖅᑕᖃᖅᑎᓪᓗᒍ ᐊᑭᓕᖅᑐᖅᑕᐅᒐᔪᑦᑎᓪᓗᒋᑦ ᒐᕙᒪᒃᑯᓐᓄᑦ.

38.3.11 ᐊᒥᓲᓂᖅᓴᐃᑦ ᐋᖅᑮᖏᑉᐸᑕ, ᐋᖅᑭᑦᑕᖓ ᐃᑦᓯᕙᐅᑕᐅᑉ ᐊᑑᑎᓂᐊᖅᑐᖅ.

38.3.12 ᐋᖅᑭᑦᑕᐅᔪᖅ ᐋᖅᑭᑦᓱᐃᔨᑦ ᕿᒥᕐᕈᔨᖏᓐᓄᑦ ᑖᓐᓇᐅᓂᐊᓕᖅᑐᖅ ᐊᑦᓱᖏᖅᓱᓂ ᐊᔪᐃᓐᓈᕆᒃᑲᓐᓂᕈᑦᓴᐅᒐᓂ, ᑭᓯᐊᓂ ᐋᖅᑭᑦᑕᐅᔪᖅ ᕿᒥᕐᕈᔭᐅᒍᓐᓇᖅᑑᒐᓗᐊᖅ ᐃᖅᑲᖅᑐᐃᔨᕐᔪᐊᒃᑯᓐᓄᑦ ᓄᓇᕗᒻᒥ ᕿᒥᕐᕈᑦᓯᐊᕐᓂᖏᑉᐸᑕ ᑐᓐᖓᕕᐅᔪᓂᒃ ᐱᐅᓯᐅᒐᔭᖅᑐᒧᑦ ᐅᕝᕙᓗ ᐅᖓᑖᓅᓗᐊᖅᑐᖃᖅᐸᑦ ᕿᐱᓗᑦᑐᖃᖅᐸᓪᓘᓐᓃᑦ ᑲᒪᒋᒋᐊᓕᒻᒥᓂᒃ ᑎᒍᒥᐊᖅᑕᒥᓂᒃ.

38.3.13 ᐊᕕᑦᑐᖅᓯᒪᔪᕐᔪᐊᓂ ᐊᖏᖃᑎᒌᒍᓐᓇᐃᓪᓕᔪᖃᖅᑎᓪᓗᒍ ᐋᖅᑭᑦᓱᐃᔩᑦ ᒪᓕᒐᕐᔪᐊᖓᑦ, ᐊᑑᑎᓂᐊᖅᑐᖅ ᓇᐅᑐᐃᓐᓇᕐᒧᑦ ᐊᖏᖃᑎᒌᒍᓐᓇᐃᓪᓕᔪᖃᖅᑎᓪᓗᒍ ᐋᖅᑭᓱᖅᑕᐅᔪᓄᑦ ᓈᒻᒪᓈᖅᓯᒪᓐᖏᑉᐸᑦ ᐅᑯᓄᖓ ᐱᕕᖃᖅᑎᑦᓯᒍᑕᐅᔪᓄᑦ.

38.3.14 ᑲᑎᒪᔩᑦ ᐸᐸᑦᓯᓂᐊᖅᑐᑦ ᑭᓇᒃᑯᑐᐃᓐᓇᕐᓄᑦ ᑕᑯᔭᑦᓴᓂᒃ ᐋᖅᑭᑦᓱᐃᔨᓄ ᐋᖅᑭᑦᑕᓂᒃ ᐊᖏᖃᑎᒌᒍᓐᓇᐃᓕᔪᖃᖅᑎᓗᒍ ᐋᖅᑭᑦᓱᐃᔩᑦ ᕿᒥᕐᕈᔨᖏᓐᓄᑦ.

38.3.15 ᑎᒥᐅᔪᖅ ᐊᖏᖃᑎᒌᒍᓐᓇᐃᓪᓕᔪᖃᖅᑎᓪᓗᒍ ᐋᖅᑭᑦᓱᐃᔪᓅᖅᑐᖅ ᒪᓕᓐᖏᑉᐸᑦ ᐃᒪᐃᓕᖓᓂᐅᔪᓂᒃ ᐋᖅᑭᑦᑕᖏᓐᓂᓘᓐᓃᑦ ᐋᖅᑭᑦᓱᐃᔩᑦ ᕿᒥᕐᕈᔨᖏᓐᓄᑦ, ᓇᐅᑐᐃᓐᓇᖅ ᑎᒥᐅᔪᖅ ᐋᖅᑭᑦᓱᐃᔨᒨᖓᔪᖅ ᑎᑎᕋᕈᓐᓇᖅᑐᖅ ᐊᓪᓚᕝᕕᖓᓐᓄᑦ ᑎᑎᕋᖅᑕᐅᓯᒪᕕᖏᑦᑕ ᐃᖅᑲᖅᑐᐃᔨᕐᔪᐊᒃᑯᑦ ᑎᒍᒥᐊᖅᑐᖅ ᓄᓇᕗᒻᒥ, ᓇᓕᖅᑲᖏᓐᓂᒃ ᐋᖅᑭᑦᑕᐅᔫᑉ, ᐅᖃᐅᓯᖃᕐᓗᓂ ᐱᔾᔪᑕᐅᔪᒥᒃ ᓵᖓᓃᑦᑐᒥᒃ, ᓇᓗᓇᐃᖅᑕᐅᓯᒪᔪᒥ ᑎᑎᕋᕐᕕᒻᒥ, ᐋᖅᑭᑦᑕᐅᔪᖅ ᐃᑎᖅᑕᐅᓂᐊᖅᑐᖅ ᑕᐃᒫᑦᓴᐃᓐᓇᖅ ᑎᓕᔭᐅᓂᖅᑕᖃᓲᖑᒻᒪᑦ ᐃᖅᑲᖅᑐᐃᕕᒻᒥ ᑕᐃᒫᑎᒋᓗ ᑲᔪᓯᑎᑕᐅᒍᓐᓇᖅᓱᓂ.

38.3.16 ᐊᖏᖃᑎᒌᒐᓱᐊᖃᑕᐅᔪᑦ ᐋᖅᑭᑦᓱᐃᔨᑎᒍᑦ ᑐᑦᓯᕋᕈᓐᓇᖅᑐᑦ ᐃᖅᑲᖅᑐᐃᔨᓂᒃ, ᓯᕗᕐᖓᓐᓂ ᐅᕝᕙᓗ ᐊᖏᖃᑎᒌᒍᓐᓇᐃᓪᓕᔪᖃᖅᑎᓪᓗᒍ ᐋᖅᑭᑦᓱᐃᔩᑦ ᐊᐅᓚᓂᖃᖅᑎᓪᓗᒋᑦ, ᐊᑯᓐᓂᖅᓯᐅᑎᒥᒃ ᓴᐳᔾᔨᒍᑕᐅᒍᓐᓇᖅᑐᒥᒃ ᐃᖅᑲᖅᑐᐃᔩᓪᓗ ᑕᐃᒪᐃᑎᑦᓯᒍᓐᓇᖅᓱᑎᒃ.

38.3.17 ᐋᒡᒐᐅᒐᓗᐊᖅ ᓇᓗᓇᐃᖅᑕᐅᓯᒪᑉᐸᑦ ᐋᖅᑭᑦᑕᐅᔪᖅ ᐋᖅᑭᑦᓱᐃᔩᑦ ᕿᒥᕐᕈᔨᖏᓐᓄᑦ, ᐊᑑᑎᓕᕐᕕᒃ ᐅᓪᓗᖅ ᐋᖅᑭᑦᑕᐅᔪᒧᑦ ᐋᖅᑭᑦᓱᐃᔩᑦ ᕿᒥᕐᕈᔨᖏᓐᓄᑦ ᐅᓪᓗᕆᔭᐅᕗᖅ ᐋᖅᑭᑦᑕᐅᔪᖅ ᓴᒃᑯᑕᐅᓂᖓ.

38.3.18 ᐋᒡᒐᐅᒐᓗᐊᖅ ᐊᖏᖃᑎᒌᓐᓂᖏᓂᐅᔪᑦ ᐋᖅᑭᓱᖅᑕᐅᔪᑦ ᐅᑯᐊ ᐱᕕᖃᖅᑎᑦᓯᒍᑕᐅᔪᑦ ᐃᓗᐊᓂ, ᐱᕕᖃᖅᑎᑦᓯᒍᑕᐅᔪᑦ ᖃᓄᓕᒫᖅ ᐊᑦᑐᐃᓂᖃᓐᖏᑦᑐᑦ ᐃᖅᑲᖅᑐᐃᕕᓐᓂᒃ ᑎᒍᒥᐊᖅᑐᓂᒃ.

ᐊᑯᓐᓂᖓᓃᓐᓂᖏᓐᓂ

38.4.1 ᑲᑎᒪᔩᑦ ᓴᖅᑭᖅᑕᐅᓐᖏᓐᓂᖏᓐᓂ, ᐊᕕᑦᑐᖅᓯᒪᔪᕐᔪᐊᓂ ᐊᖏᖃᑎᒌᒍᓐᓇᐃᓪᓕᔪᖃᖅᑎᓪᓗᒍ ᐋᖅᑭᑦᓱᐃᔩᑦ ᒪᓕᒐᕐᔪᐊᖓᑦ, ᐊᑑᑎᔪᑦ ᐋᖅᑭᑦᓱᐃᔩᓅᖓᔪᓄᑦ ᐅᖃᐅᓯᔪᓄᑦ ᑎᑎᕋᖅᓯᒪᔪᒥ 38.2.1.