ARTICLE 36
ᒪᓕᒐᓐᖑᖅᑎᑕᐅᓂᖅ
ᐃᓘᓐᓇᐃᓐᓅᖓᔪᖅ
36.1.1 ᐊᖏᕈᑎ ᑎᑎᖅᑕᐅᓯᒪᓕᑐᐊᖅᐸᑦ ᑐᓐᖓᕕᒃᑯᓐᓄᑦ ᓄᓇᕗᒻᒥ ᐊᒻᒪᓗ ᒐᕙᒪᒃᑯᓐᓂ ᐊᐃᕙᔨᓄᑦ, ᑐᓂᓯᓂᐊᖅᑐᑦ ᐊᖏᖅᑕᐅᑎᑦᓯᒋᐊᕐᓗᑎᒃ ᐃᓘᓐᓇᐃᓐᓄᑦ ᑕᐃᒪᐃᓕᖓᑎᑕᐅᒻᒪᑦ ᑕᕝᕙᓂ ᐃᓛᒃᑰᖅᑐᒥ.
36.1.2 ᐃᓄᐃᑦ ᐃᓱᒪᒋᔭᐅᓂᐊᖅᑐᑦ ᐊᖏᖅᓯᒪᒋᐊᖏᑦ ᐊᖏᕈᑎᒥᒃ ᐃᒪᐃᓕᖅᐸᑦ:
(a) ᐊᒥᓲᓂᖅᓴᐃᑦ ᓂᕈᐊᕈᓐᓇᖅᑐᑦ ᐃᓄᐃᑦ ᓄᕈᐊᕐᓗᑎᒃ ᕿᑎᕐᒥᐅᓂ, ᑭᕙᓪᓕᕐᒥ ᕿᑭᖅᑖᓗᒻᒥᓗ ᓄᓇᕗᒻᒥ ᐃᓄᐃᑦ ᐊᖏᕐᓂᕋᕐᓗᑎᒃ ᓂᕈᐊᕐᓗᑎᒃ ᓈᒻᒪᓴᕐᓗᑎᒃ ᐊᖏᕈᑎᒥᒃ ᐱᔪᓐᓇᕐᓂᖃᖅᑎᑦᓯᓪᓗᑎᓪᓗ ᑎᓕᔭᐅᔪᓂᒃ ᐊᐅᓚᑦᓯᔨᖏᓐᓂᒃ ᑐᓐᖓᕕᒃᑯᑦ ᓄᓇᕗᒃᑯᑦ ᐊᑎᓕᐅᕐᓂᐊᕐᓗᑎᒃ ᐊᖏᕈᑎᒥᒃ; ᐊᒻᒪᓗ
(b) ᑎᓕᔭᐅᔪᑦ ᐊᐅᓚᑦᓯᔨᖏᑦ ᑐᓐᖓᕕᒃ ᓄᓇᕗᑦᑯᑦ ᐊᑎᓕᐅᕐᓗᑎᒃ ᐊᖏᕈᑎᒥᒃ.
36.1.3 ᐊᖓᔪᖅᑳᖅᔪᐊᖅ ᑯᐃᓐ ᑲᓇᑕᒥ ᐃᓱᒪᒋᔭᐅᓂᐊᖅᑐᖅ ᐊᖏᖅᓯᒪᖏᐊᖓ ᐊᖏᕈᑎᒥᒃ ᐃᒪᐃᑉᐸᑦ:
(a) ᐊᖏᕈᑎ ᐊᑎᓕᐅᖅᑕᐅᑉᐸᑦ ᒥᓂᔅᑕᖓᓐᓄᑦ ᑯᐃᓐᒧᑦ ᐱᔪᓐᓇᕐᓂᖃᖅᑎᑕᐅᔪᓄᑦ ᒐᕙᒪᒃᑯᑦ ᓯᕗᓕᖅᑎᖏᓐᓄᑦ; ᐊᒻᒪᓗ
(b) ᒪᓕᒐᖅ ᐊᖏᕐᓂᕐᒧᑦ ᐊᖏᕈᑎᒥᒃ ᐊᐅᓚᔾᔭᒋᐊᖅᑕᐅᑉᐸᑦ ᐱᖁᔭᓕᐅᖅᑎᖅᔪᐊᖏᓐᓄᑦ ᑲᓇᑕᐅᑉ ᐊᑑᑎᓕᕐᓗᓂᓗ.
ᐃᓄᐃᑦ ᒪᓕᒐᓐᖑᑎᑦᓯᓂᕐᒧᑦ ᓂᕈᐊᕐᓂᖓᑦ
36.2.1 ᑎᑎᖅᑕᐅᓚᐅᖅᑎᓪᓗᒍ ᐊᖏᕈᑎ, ᐊᖏᕐᓂᕐᒧᑦ ᑲᑎᒪᔨᕋᓛᑦ ᓴᖅᑭᖅᑕᐅᓂᐊᖅᑐᑦ ᑎᒍᒥᐊᕐᓂᐊᕐᓗᑎᒃ ᐊᐅᓚᑦᓯᓂᕐᒥᒃ ᐃᓄᐃᑦ ᒪᓕᒐᓐᖑᑎᑦᓯᓂᕐᒧᑦ ᓂᕈᐊᕐᓂᖓᓐᓂᒃ.
36.2.2 ᐊᖏᕐᓂᒧᑦ ᑲᑎᒪᔨᕋᓛᑦ ᐱᖓᓲᓂᐊᖅᑐᑦ ᑕᐃᔭᐅᔪᑦ ᑐᓐᖓᕕᒃᑯᓐᓄᑦ ᓄᓇᕗᒻᒥ, ᐊᑕᐅᓯᖅ ᑕᐃᔭᐅᔪᖅ ᒥᓂᔅᑕᖓᓐᓄᑦ ᐃᓄᓕᕆᔨᑐᖃᒃᑯᑦ ᐊᒻᒪᓗ ᐊᑕᐅᓯᖅ ᑕᐃᔭᐅᔪᖅ ᐊᕕᑦᑐᖅᓯᒪᔪᓂ ᒥᓂᔅᑕᐅᖃᑕᐅᔪᒧᑦ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖏᓐᓄᑦ ᐱᕙᓪᓕᐊᑎᑦᓯᔨᓄᑦ.
36.2.3 ᐊᖏᕐᓂᕐᒧᑦ ᑲᑎᒪᔨᕋᓛᑦ ᐸᕐᓇᐃᓂᐊᖅᑐᖅ ᑮᓇᐅᔭᖅᑑᑎᑦᓴᓂᒃ ᐊᐅᓚᓂᕐᒥᓄᑦ ᐊᒻᒪᓗ ᐃᓄᐃᑦ ᐊᖏᕐᓂᕐᒧᑦ ᓂᕈᐊᕐᓂᖓᓐᓂᒃ, ᑐᓐᖓᕕᐅᓗᓂ ᕿᒥᕐᕈᓂᖓ ᐊᖏᕐᓂᖓᓗ ᒥᓂᔅᑕᖓᑦᑕ ᐃᓄᓕᕆᔨᑐᖃᒃᑯᑦ. ᐊᖏᖅᑕᐅᓯᒪᔪᑦ ᑮᓇᐅᔭᖅᑑᑎᑦᓴᐃᑦ ᐊᑭᓕᖅᑐᖅᑕᐅᓂᐊᖅᑐᑦ ᒐᕙᒪᒃᑯᖏᓐᓄᑦ ᑲᓇᑕᐅᑉ.
36.2.4 ᓂᕈᐊᕈᓐᓇᖅᑐᑦ ᐊᑎᖏᑦ ᐱᖃᓯᐅᔾᔨᓂᐊᖅᑐᑦ ᐊᑎᖏᓐᓂᒃ ᓂᕈᐊᕈᓐᓇᖅᑐᓕᒫᑦ ᐃᓄᐃᑦ. ᓂᕈᐊᕈᓐᓇᖅᑐᑦ ᐃᓄᐃᑦ ᓇᓗᓇᐃᖅᑕᐅᓂᐊᖅᑐᑦ “ᐃᓄᐃᑦ” ᐊᑖᓂ ᐃᓚᖓ (a) ᑐᑭᖓ ᐃᓄᐃᑦ ᐃᓛᒃᑯᑦ 1-ᒥ ᐊᒻᒪᓗ ᐅᑯᐊᖑᓗᑎᒃ:
(a) 16-ᓂᒃ ᐊᕐᕌᒍᖃᕐᓗᓂ ᐅᖓᑖᓂᓘᓐᓃᑦ ᑭᖑᓪᓕᖅᐹᒥ ᐅᓪᓗᖓᓂ ᐃᓄᐃᑦ ᒪᓕᒐᓐᖑᖅᑎᑦᓯᓂᕐᒧᑦ ᓂᕈᐊᕐᓂᖃᖅᑎᓪᓗᒋᑦ;
(b) ᐆᒪᓗᓂ;
(c) ᑲᓇᑕᒥᐅᑕᐅᓗᑎᒃ; ᐊᒻᒪᓗ
(d) ᑎᑎᕋᖅᑕᐅᓯᒪᖃᑕᐅᓐᖏᓪᓗᑎᒃ ᐊᓯᖏᓐᓂ ᑲᓇᑕᒥ ᓄᓇᖃᖅᑳᖅᓯᒪᔪᑦ ᓄᓇᑖᕐᓂᕐᒧᑦ ᐊᖏᕈᑎᒧᑦ.
36.2.5 ᓂᕈᐊᕈᓐᓇᖅᑐᑦ ᐊᑎᖏᑦ ᑲᑎᖅᓱᖅᑕᐅᓯᒪᓂᐊᖅᑐᑦ ᐊᕕᑦᑐᖅᓯᒪᔪᓂᒃ ᓂᕈᐊᕈᓐᓇᖅᑐᓂᒃ ᕿᑎᕐᒥᐅᓂᒃ, ᑭᕙᓪᓕᕐᒥ ᐊᒻᒪᓗ ᕿᑭᖅᑖᓗᒻᒥ. ᐊᕕᑦᑐᖅᓯᒪᔪᓂ ᓂᕈᐊᕈᓐᓇᖅᑐᓂᒃ ᑲᑎᑎᕆᓂᐊᖅᑐᑦ ᓄᓇᓕᓐᓂ ᓂᕈᐊᕈᓐᓇᖅᑐᓂᒃ ᐊᑐᓂᑦ ᓄᓇᓕᓐᓄᑦ ᑕᐃᑲᓂ ᐊᕕᑦᑐᖅᓯᒪᓂᐅᔪᒥ.
36.2.6 ᐅᓪᓗᐃᑦ 60 ᐅᖓᑖᓂᐅᓐᖏᑦᑐᖅ ᓴᖅᑭᖅᑕᐅᓚᐅᖅᑎᓪᓗᒋᑦ ᒪᓕᒐᓐᖑᖅᑎᑕᐅᓂᖓᓄᑦ ᑲᑎᒪᔨᕋᓛᑦ, ᓯᕗᓪᓕᖅᐹᑦ ᓂᕈᐊᕈᓐᓇᖅᑐᑦ ᐊᑎᖏᑦ ᐊᑐᐃᓐᓇᕈᖅᑎᑕᐅᓂᐊᖅᑐᑦ ᑭᓇᒃᑯᑐᐃᓐᓇᕐᓄᑦ ᑕᑯᔭᑦᓴᐅᑎᓪᓗᒋᑦ ᓂᕕᓐᖓᕐᓗᒋᑦ ᓄᓇᓕᓐᓂ ᓂᕈᐊᕈᓐᓇᖅᑐᑦ ᐊᑐᓂᑦ ᓄᓇᓕᓐᓂ ᓄᓇᕗᒻᒥ ᐊᒻᒪᓗ ᐊᓯᖏᑦᑎᒍᑦ ᒪᓕᒐᓐᖑᖅᑎᑕᐅᓂᖓᓄᑦ ᑲᑎᒪᔨᕋᓛᑦ ᓈᒻᒪᒋᔭᖓᑦᑎᒍᑦ. ᓂᕈᐊᓐᓇᖅᑐᓄᑦ ᑎᑎᕋᖅᓯᒪᒋᐊᓐᖓᖅᑐᑦ ᑐᓐᖓᕕᖃᕐᓂᐊᖅᑐᑦ ᑎᑎᕋᖅᑕᐅᒋᐊᓐᖓᖅᓯᒪᔪᓂᒃ ᐊᑐᐃᓐᓇᐅᑎᑕᐅᔪᓂᒃ ᑐᓐᖓᕕᒃᑯᓐᓄᑦ ᓄᓇᕗᒻᒥ, ᐱᖃᓯᐅᑎᑎᓐᓇᒋᑦ ᑕᐃᒃᑯᐊ ᐊᕐᕌᒍᓖᑦ 16 ᐊᑖᓂ ᐅᓪᓗᖓᓂ ᑭᖑᓪᓕᖅᐹᖓᓂ ᐃᓄᐃᑦ ᒪᓕᒐᓐᖑᖅᑎᑦᓯᓂᕐᒧᑦ ᓂᕈᐊᕐᓂᖃᑎᓪᓗᒋᑦ.
36.2.7 ᑐᑦᓯᕋᐅᑏᑦ ᑕᐃᒃᑯᓇᓐᖓᑦ ᐃᓄᓐᓂᒃ ᑐᑦᓯᕋᖅᓯᒪᔪᓂᒃ ᑎᑎᕋᖅᑕᐅᖃᑕᐅᓂᕐᒧᑦ ᑐᓐᖓᕕᒋᑦᓱᒍ ᐃᓛᒃᑰᖅᑐᖅ 35 ᐊᖏᖅᑕᐅᓯᒪᒐᑎᓪᓗ ᑭᓯᐊᓂ ᑐᑦᓯᕋᐅᑎᖏᑦ ᕿᐱᓕᑦᑕᐅᓯᒪᒐᑎᒃ ᐊᔪᐃᓐᓇᕆᐊᒃᑲᓐᓂᕐᓂᕐᒧᑦ ᑲᑎᒪᔨᕋᓛᓄᑦ ᐊᑖᓂ ᐃᓚᖓ 5 ᐃᓛᒃᑯᑦ 35-ᒥ ᕿᒥᕐᕈᔭᐅᓂᐊᖅᑐᑦ ᓂᕈᐊᕈᓐᓇᖅᑐᓕᕆᓂᕐᒧᑦ ᑲᑎᒪᔨᕋᓛᓄᑦ ᐅᖃᐅᓯᐅᔪᓄᑦ ᑎᑎᕋᖅᓯᒪᔪᒥ 36.2.9 ᓇᓗᓇᐃᖅᓯᓂᐊᕐᓗᑎᒃ ᐊᑎᖏᑦ ᐃᓕᔭᐅᒋᐊᖃᕐᒪᖔᑕ ᓂᕈᐊᕈᓐᓇᖅᑐᑦ ᑎᑎᕋᖅᓯᒪᕕᖏᓐᓄᑦ.
36.2.8 ᓯᑦᑕᕝᕙ 21, 1992-ᒥ ᒥᑦᓯᑎᓐᓂᓘᓐᓃᑦ:
(a) ᐃᓄᒃ ᐱᕕᖃᖅᑎᑕᐅᓂᖏᑦᑐᖅ ᐱᕕᖃᖅᑎᑦᓯᓂᐅᔪᓂ ᑎᑎᕋᖅᓯᒪᔪᒥ 36.2.7 ᓂᕈᐊᕈᓐᓇᖅᑐᑦ ᑎᑎᕋᖅᑕᐅᓯᒪᒋᐊᓐᖓᕐᓂᖏᓐᓃᖏᑦᑐᖅ, ᐅᕝᕙᓗ ᑖᒃᑯᓇᓂᓪᓗᐊᖅ ᓂᕈᐊᕈᓐᓇᖅᑐᑦ ᑎᑎᕋᖅᑕᐅᓯᒪᓂᖏᓐᓃᖏᑦᑐᑦ, ᑐᑦᓯᕋᕈᓐᓇᖅᑐᑦ ᐃᓕᔭᐅᒍᒪᓗᑎᒃ ᑖᒃᑯᓄᖓᓪᓗᐊᖅ ᓂᕈᐊᕈᓐᓇᖅᑐᓄᑦ; ᐊᒻᒪᓗ
(b) ᐃᓄᒃ ᓂᕈᐊᕈᓐᓇᖅᑐᓄᑦ ᐊᑎᖃᖃᑕᐅᒍᓐᓇᖅᑐᖅ ᑐᑦᓯᕋᐅᓯᐅᕈᓐᓇᖅᑐᖅ ᐃᓅᑉ ᐊᑎᖓᓂᒃ ᐃᓚᒍᑦᓯᐅᔾᔭᐅᖁᔨᓗᑎᒃ ᐲᖅᑕᐅᖁᔨᓗᓂᓘᓐᓃᑦ ᓂᕈᐊᕈᓐᓇᖅᑐᑦ ᑎᑎᕋᖅᑕᐅᓯᒪᕕᖏᓐᓂᒃ.
36.2.9 ᑐᑦᓯᕋᐅᑏᑦ ᐅᖃᐅᓯᐅᔪᑦ ᑎᑎᕋᖅᓯᒪᔪᓂ 36.2.7-ᒥ ᐊᒻᒪᓗ 36.2.8-ᒥ ᕿᒥᕐᕈᔭᐅᓂᐊᖅᑐᑦ ᓂᕈᐊᕈᓐᓇᖅᑐᑦ ᑎᑎᕋᖅᑕᐅᓯᒪᓂᖏᓐᓄᑦ ᑲᑎᒪᔨᕋᓛᓄᑦ ᐱᓯᒪᓗᑎᒃ ᐱᖓᓱᓂᒃ ᑲᑎᒪᔨᓂᒃ ᑎᓕᔭᐅᓯᒪᔪᓂᒃ ᑐᓐᖓᕕᒃᑯᓐᓄᑦ ᓄᓇᕗᒻᒥ ᑐᓴᖅᓯᒪᓐᖏᑦᑐᑦ ᐊᔪᐃᓐᓇᕆᐊᒃᑲᓐᓂᕈᑕᐅᔪᓂᒃ ᐊᑦᑐᐊᔪᓂᒃ ᑎᑎᕋᖅᑕᐅᒋᐊᓐᖓᖅᓯᒪᔪᓄᑦ ᓂᕈᐊᕈᓐᓇᖅᑐᑦ ᑎᑎᕋᖅᑕᐅᓯᒪᕕᖏᓐᓄᑦ ᐊᒻᒪᓗ ᐊᑕᐅᓯᖅ ᓂᕈᐊᖅᑎᐅᖏᑦᑐᖅ ᑎᓕᔭᐅᓯᒪᓗᓂ ᒥᓂᔅᑕᖓᓐᓄᑦ ᐃᓄᓕᕆᔨᑐᖃᒃᑯᑦ.
36.2.10 ᐋᖅᑭᑦᑕᐅᔪᖅ ᓂᕈᐊᕈᓐᓇᖅᑐᑦ ᑎᑎᕋᖅᑕᐅᓯᒪᓂᖏᓐᓄᑦ ᑲᑎᒪᔨᕋᓛᓄᑦ ᐊᑦᑐᐊᔪᑦ ᑐᑦᓯᕋᐅᑎᒧᑦ ᑕᐃᒪᐃᓕᖓᓕᕐᓗᑎᐅᓂᐊᖅᑐᑦ ᓂᕈᐊᕈᓐᓇᖅᑐᓪᓗ ᑎᑎᕋᖅᑕᐅᓯᒪᓂᕐᒧᑦ ᑲᑎᒪᔨᕋᓚᖏᑦ ᖃᐅᔨᒃᑲᐃᓂᐊᖅᑐᑦ ᑐᑦᓯᕋᖅᑐᒥᒃ, ᑭᓇᑐᐃᓐᓇᕐᒥᒃ ᐃᓄᒻᒥᒃ ᓂᕈᐊᕈᓐᓇᕐᓂᖓ ᐅᓇᒻᒥᒋᔭᐅᓯᒪᔪᒥᒃ ᐊᒻᒪᓗ ᒪᓕᒐᓐᖑᖅᑎᑕᐅᓂᖓᓄᑦ ᑲᑎᒪᔨᕋᓛᑦ, ᐋᖅᑭᑦᑕᐅᔪᒥᒃ.
36.2.11 ᐅᓪᓗᐃᑦ 7 ᐃᓗᐊᓐᓂ ᑭᖑᕐᖓᓂ ᓂᕈᐊᕈᓐᓇᖅᑐᑦ ᑎᑎᕋᖅᑕᐅᓯᒪᓂᖏᓐᓄᑦ ᑲᑎᒪᔨᕋᓛᑦ ᐋᖅᑭᓯᒪᓕᖅᐸᑕ ᑐᑦᓯᕋᐅᑎᓕᒫᓄᑦ, ᒪᓕᒐᓐᖑᖅᑎᑦᓯᓂᕐᒧᑦ ᑲᑎᒪᔨᕋᓛᑦ ᓯᕗᒧᑦᑎᑦᓯᓂᐊᖅᑐᑦ ᒐᕙᒪᒃᑯᓐᓄᑦ ᐊᒻᒪᓗ ᑐᓐᖓᕕᒃ ᓄᓇᕗᒃᑯᓐᓄᑦ ᓂᕈᐊᕈᓐᓇᖅᑐᓂᒃ ᑎᑎᕋᖅᓯᒪᔪᓂᒃ ᓯᕗᓪᓕᖅᐸᐅᓂᐊᖅᓱᑎᒃ ᓂᕈᐊᕈᓐᓇᖅᑐᓂ ᑎᑎᕋᖅᑕᐅᓯᒪᔪᓂ ᐊᖅᑭᒋᐊᖅᑕᐅᓗᑎᒃ ᑕᐃᒫᒃ ᐋᖅᑭᑦᑕᐅᔪᓄᑦ. ᐊᖏᖅᑕᐅᓚᐅᖅᑎᓪᓗᒋᑦ ᓂᕈᐊᕈᓐᓇᖅᑐᑦ ᑎᑎᕋᖅᑕᐅᓯᒪᓂᖏᑦ ᒥᓂᔅᑕᖓᓐᓄᑦ ᐃᓄᓕᕆᔨᑐᖃᒃᑯᑦ ᐊᒻᒪᓗ ᑐᓐᖓᕕᒃᑯᑦ ᓄᓇᕗᒻᒥ, ᒪᓕᒐᖅᖑᖅᑎᑕᐅᓂᕐᒧᑦ ᑲᑎᒪᔨᕋᓛᑦ ᓴᖅᑮᓂᐊᖅᑐᑦ ᑎᑎᕋᖅᓯᒪᔪᓂᒃ ᑖᒃᑯᐊᓪᓚᕆᐅᓕᖅᑎᓪᓗᒋᑦ ᓂᕈᐊᕈᓐᓇᖅᑐᑦ ᑎᑎᕋᖅᑕᐅᓯᒪᓂᖏᑦ.
36.2.12 ᒪᓕᒐᓐᖑᖅᑎᑕᐅᓂᕐᒧᑦ ᑲᑎᒪᔨᕋᓛᑦ ᐊᐅᓚᔾᔭᒋᐊᕈᑕᐅᒋᐊᓕᓐᓂᒃ ᐊᐅᓚᔾᔭᒋᐊᕈᑎᖃᕐᓂᐊᖅᑐᑦ ᖃᐅᔨᓴᑦᓯᐊᕐᓗᑎᒃ ᓂᕈᐊᕈᓐᓇᖅᑐᑦ ᐃᓄᐃᑦ ᐱᕕᑦᓴᖃᑦᓯᐊᕋᓗᐊᕐᒪᖔᑕ ᕿᒥᕐᕈᓂᕐᒥᒃ ᑎᑎᕋᖅᓯᒪᔪᓂᒃ ᐃᓗᓕᖏᓐᓂᓪᓗ ᐊᖏᕈᑎᐅᑉ. ᐱᓗᐊᖅᑐᒥᒃ ᐅᔾᔨᕆᔭᐅᓗᐊᓐᖑᐊᕆᐊᓕᒃ ᑭᓐᖒᒪᒋᔭᐅᔪᑦ ᓄᓇᓕᓐᓄᑦ ᓄᓇᓕᓐᓂ ᑲᑎᒪᓂᐅᔪᓄᑦ ᐊᒻᒪᓗ ᓴᓇᔭᐅᓂᖏᓐᓄᑦ ᐃᓄᑦᑎᑑᖅᑐᑦ.
36.2.13 ᐃᓄᐃᑦ ᒪᓕᒐᓐᖑᑎᑦᓯᓂᕐᒧᑦ ᓂᕈᐊᕐᓂᖓᑦ ᐊᑑᑎᓂᐊᖅᑐᖅ ᐅᖓᑖᓂᐅᓐᖏᑦᑐᖅ ᐅᓪᓗᐃᑦ 7 ᓴᖅᑭᖅᑕᐅᓚᐅᖅᑎᓪᓗᒋᑦ ᑖᒃᑯᐊᓪᓚᕆᐅᓕᖅᑐᑦ ᓂᕈᐊᕈᓐᓇᖅᑐᑦ ᑎᑎᕋᖅᑕᐅᓯᒪᓂᖏᑦ ᐅᓪᓗᕐᒥ ᐅᓪᓗᓂᓘᓐᓃᑦ ᐊᖏᖃᑎᒌᒍᑕᐅᓯᒪᔪᓂᒃ ᒪᓕᒐᓐᖑᖅᑎᑕᐅᓂᕐᒧᑦ ᑲᑎᒪᔨᕋᓛᓄᑦ.
36.2.14 ᐃᓄᐃᑦ ᒪᓕᒐᓐᖑᖅᑎᑦᓯᓂᕐᒧᑦ ᓂᕈᐊᕐᓂᖓᑦ ᐊᑑᑎᓂᐊᖅᑐᖅ ᑕᐃᑲᓂᑦᓴᐃᓐᓇᖅ ᐅᓪᓗᕐᒥ ᐅᓪᓗᓂᓘᓐᓃᑦ ᓂᕈᐊᕈᓐᓇᖅᑐᓕᒫᓄᑦ ᐋᒡᒐᐅᒐᓗᐊᖅ ᓯᕗᕙᖅᑐᓂᒃ ᓂᕈᐊᕐᓂᐅᔪᓂ ᐅᕝᕙᓗ ᐋᖅᑮᓯᒪᔪᖃᕆᐊᖃᖅᐸᑦ ᐅᓪᓗᕐᒥ ᑭᖑᕝᕕᐅᑎᔪᑦᓴᒥᒃ.
36.2.15 ᓂᕈᐊᕐᓂᖅ ᑕᑯᑦᓴᐅᖏᑦᑐᒃᑰᕐᓂᐊᖅᑐᖅ.
36.2.16 ᓂᕈᐊᕐᕖᑦ ᐃᓄᑦᑎᑑᕐᓂᐊᖅᑐᑦ, ᐊᒻᒪᓗ ᑲᓇᑕᐅᑉ ᐃᓕᑕᕆᓯᒪᔭᖏᓐᓂ ᐅᖃᐅᓯᕐᓂ.
36.2.17 ᒪᓕᒐᓐᖑᖅᑎᑦᓯᓂᕐᒧᑦ ᑲᑎᒪᔨᕋᓛᑦ ᑎᒍᒥᐊᕐᓂᐊᖅᑐᑦ ᐊᐅᓚᑦᓯᓂᕐᒥᒃ ᓂᕈᐊᕐᓂᕐᒥᒃ ᐊᒻᒪᓗ ᓈᓴᖅᑕᐅᓂᖏᓐᓂᒃ ᓂᕈᐊᕈᑏᑦ ᓴᖅᑭᖅᑕᐅᓂᖏᓐᓂᓪᓗ ᖃᓄᐃᓕᖓᓂᖏᑦᑕ ᓂᕈᐊᓂᐅᔫᑉ. ᑲᑎᒪᔨᕋᓛᑦ ᐸᐸᑦᓯᓂᐊᖅᑐᑦ ᓂᕈᐊᕈᑎᓕᒫᓂᒃ ᑎᑎᕋᕐᓗᒋᓪᓗ ᐊᐅᓚᓂᓕᒫᖑᔪᑦ ᐋᖅᑭᑦᑕᐅᔪᓪᓗ ᐊᑦᑐᐊᔪᑦ ᒪᓕᒐᓐᖑᖅᑎᑦᓯᓂᕐᒧᑦ ᓂᕈᐊᕐᓂᕐᒧᑦ, ᐊᑐᐃᓐᓇᐅᑎᑦᓯᓂᐊᖅᓱᑎᓪᓗ ᑎᑎᕋᖅᓯᒪᔪᓂᒃ ᒐᕙᒪᒃᑯᓐᓄᑦ ᑐᓐᖓᕕᒃᑯᓄᓪᓗ ᑐᑦᓯᕋᖅᑐᖃᑐᐊᖅᐸᑦ ᐊᒻᒪᓗ ᑕᖅᑮᑦ 6 ᐃᓗᐊᓐᓂ ᐊᐅᓪᓛᑎᑦᓯᓂᐊᖅᑐᑦ ᐃᓘᓐᓇᖏᓐᓂᒃ ᑎᑎᖃᖅᑕᐅᓯᒪᒧᓂᒃ ᑲᓇᑕᒥ ᐃᑦᓴᕐᓂᑕᒃᑯᕕᒻᒧᑦ. ᑎᑎᕋᖅᑕᐅᓯᒪᔪᑦ ᓴᒃᑯᑕᐅᓂᖏᑦᑐᑦ, ᐃᓚᐃᓐᓇᖏᑦ ᐊᑕᖏᕐᓗᑎᓪᓘᓐᓃᑦ, ᑎᑎᕋᖅᓯᒪᔪᑎᒍᑦ ᖃᐅᔨᒃᑲᐃᓚᐅᓐᖏᓪᓗᑎᒃ ᑐᓐᖓᕕᒃᑯᓐᓂᒃ ᒐᕙᒪᒃᑯᓂᓪᓗ, ᑐᓐᖓᕕᒃᑯᑦ ᒐᕙᒪᒃᑯᓪᓗ ᐊᑐᐃᓐᓇᖃᕈᓐᓇᕐᓂᐊᖅᑐᑦ ᐊᔾᔨᖏᓐᓂᓪᓗ ᐊᒥᓱᓕᐅᕈᓐᓇᖅᓱᑎᒃ ᓇᐅᑐᐃᓐᓇᐃᑦ ᐃᓘᓐᓇᖏᓪᓘᓐᓃᑦ ᑎᑎᕋᖅᑕᐅᓯᒪᔪᑦ.
ᒐᕙᒪᒃᑯᓐᓂ ᐊᖏᕈᑕᐅᕙᓪᓕᐊᓂᖓᓄᑦ ᐊᐅᓚᑦᓯᒍᑎ
36.3.1 ᑭᖑᕐᖓᓂ ᐊᑎᓕᐅᖅᑕᐅᓚᐅᖅᑎᓪᓗᒍ ᐊᖏᕈᑎᐅᔪᖅ ᐊᖏᖃᑎᒌᑦᑐᓄᑦ, ᐊᒻᒪᓗ ᐅᖃᖃᑕᐅᓚᐅᖅᑎᓪᓗᒋᑦ ᑐᓐᖓᕕᒃᑯᑦ ᓄᓇᕗᒻᒥ ᑐᓐᖓᕕᒋᑦᓱᒍ ᑎᑎᕋᖅᓯᒪᔪᖅ 2.6.1, ᒐᕙᒪᒃᑯᖏᑦ ᑲᓇᑕᐅᑉ ᐊᑐᐃᓐᓇᐅᑎᑦᓯᓂᐊᖅᑐᑦ ᐊᖏᖃᑎᒌᒍᑎᒥᒃ ᐱᖁᔭᓕᐅᖅᑎᕐᔪᐊᓄᑦ, ᑐᑦᓯᕋᕐᓗᑎᓪᓗ ᐊᐅᓚᔾᔭᒋᐊᖅᑕᐅᖁᔨᓗᑎᒃ ᒪᓕᒐᓐᖑᑎᑦᓯᓂᕐᒧᑦ ᒪᓕᒐᕐᒥᒃ. ᑐᑦᓯᕌᖑᔪᖅ ᒪᓕᒐᖅ ᐃᒪᐃᓐᓂᐊᖅᑐᖅ:
(a) ᐃᓗᓕᖃᕐᓗᓂ ᐅᖃᐅᓯᕐᒥᒃ ᑐᑭᓯᓇᑦᓯᐊᖅᑐᒥᒃ ᐊᖏᖃᑎᒌᒍᑎ ᒪᓕᒐᓐᖑᖅᑎᑕᐅᒋᐊᖓ;
(b) ᓇᓗᓇᐃᕐᓗᒍ ᐊᖏᖃᑎᒌᒍᑎ ᐊᑐᓕᖅᑎᑕᐅᒋᐊᖓ ᐊᑦᓱᖏᖅᓱᓂᓗ ᑕᖅᑳᓐᖔᖅᑐᓄᑦ ᐊᖏᖃᑕᐅᔪᓄᑦ;
(c) ᓇᓗᓇᐃᕐᓗᒍ ᐱᔪᓐᓇᐅᑎᖏᑦ ᐱᕚᓪᓕᕈᑎᑦᓴᖏᓪᓗ ᐃᓄᐃᑦ ᐊᑖᓂ ᐊᖏᖃᑎᒌᒍᑎᐅᑉ ᑲᑐᓯᐅᑎᓂᐊᓐᖏᒋᐊᖏᑦ ᒪᓕᒐᓐᖑᖅᑎᑕᐅᓂᕐᒧᑦ ᒪᓕᒐᕐᒧᑦ ᐅᕝᕙᓗ ᓇᐅᑐᐃᓐᓇᕐᒧᑦ ᐊᓯᐊᓄᑦ ᒪᓕᒐᕐᒧᑦ;
(d) ᐅᖃᖅᓯᒪᓗᓂ ᐊᑲᐅᓈᓐᖏᑦᑐᖃᓕᖅᐸᑦ ᐊᐳᖅᓯᒪᓂᖅᑕᖃᖅᐸᓪᓘᓐᓃᑦ ᐊᑯᕐᖓᓐᓂ ᒪᓕᒐᓐᖑᖅᑎᑕᐅᓂᕐᒧᑦ ᒪᓕᒐᐅᑉ ᐊᒻᒪᓗ ᐊᖏᖃᑎᒌᒍᑎᐅᑉ, ᐊᖏᖃᑎᒌᒍᑎ ᓴᓐᖏᓂᖅᓴᐅᕗᖅ;
(e) ᐱᔪᓐᓇᕐᓂᖃᕐᓂᖅ ᐊᑭᓖᓂᕐᒥᒃ ᑲᑎᖅᓱᖅᓯᒪᔪᓂᒃ ᐃᑖᔪᓂᒃ ᑮᓇᐅᔭᓂᒃ ᖃᑦᓯᑐᐃᓐᓇᐅᓗᑎᒃ ᐱᔭᕆᐊᓖᑦ ᒪᓕᓪᓗᒋᑦ ᑎᑭᐅᒪᔾᔪᑎᒋᓗᒋᑦ ᑮᓇᐅᔭᑎᒍᑦ ᑐᓂᒪᓂᐅᒋᐊᓕᓐᓂᒃ ᑯᐃᓐᒧᑦ ᐊᑖᓂ ᐃᓛᒃᑯᑦ 25 ᐊᒻᒪᓗ 29;
(f) ᒪᓕᓪᓗᑎᒃ ᑎᑎᕋᖅᓯᒪᔪᓂᒃ 53 ᐊᒻᒪᓗ 54 ᒪᓕᒐᕐᔪᐊᕐᓃᑦᑐᖅ, 1867;
(g) ᐱᖃᓯᐅᑎᓗᑎᒃ ᒪᕐᕉᓐᓂᒃ ᐅᖃᖅᓯᐅᔫᓐᓂᒃ ᐱᒋᐊᓐᖓᕐᓂᖓᓂ ᐃᒪᐃᓕᔫᓐᓂᒃ
(i) ᑯᐃᓐ ᑭᒡᒐᖅᑐᖅᑕᐅᓗᓂ ᑲᓇᑕᒧᑦ ᐊᒻᒪᓗ ᐃᓄᐃᑦ ᓄᓇᕗᒻᒥ, ᑎᓕᔭᐅᓯᒪᔪᖅᑎᒍᑦ ᑭᒡᒐᖅᑐᐃᔨᖏᑦᑎᒍᑦ ᐃᑎᖅᓯᒪᒻᒪᑕ ᐊᖏᖃᑎᒌᒍᑎᒧᑦ, ᐊᒻᒪᓗ
(ii) ᐃᓛᒃᑯᑦ 36 ᐊᖏᖃᑎᒌᒍᑎ ᐃᓱᒪᑦᓴᖅᓯᐊᕈᑎᖃᑦᓯᐊᖅᓯᒪᒻᒪᑦ ᒪᓕᒐᓐᖑᖅᑎᑦᓯᓂᕐᒥᒃ ᑯᐃᓐᒧᑦ ᑲᓇᑕᐅᑉ ᒐᕙᒪᒃᑯᖏᑦᑕ ᒪᓕᒐᖅᔪᐊᖓᑦᑎᒍᑦ;
(h) ᒪᓕᒐᓕᐅᕐᓗᑎᒃ ᐊᑦᓱᖐᔪᒥᒃ ᒐᕙᒪᒃᑯᓐᓂᒃ; ᐊᒻᒪᓗ
(i) ᓇᓗᓇᐃᕐᓗᒍ ᒪᓕᒐᖅ ᐊᑐᓕᕐᓂᐊᕆᐊᖓ ᑏᓴᕝᕙ 31, 1993 ᐅᕝᕙᓗ ᐅᓪᓗᕐᒥ ᒥᑦᓯᑎᓐᓂ ᐋᖅᑭᑦᑕᐅᑐᐃᓐᓇᕆᐊᓕᒻᒥ ᒪᓕᒐᖅᑎᒍᑦ.
ᐊᑯᓐᓂᕆᔭᐅᔪᑦ ᐊᐅᓚᓂᐅᔪᓄᑦ
36.4.1 ᐃᓄᐃᑦ ᒪᓕᒐᓐᖑᑎᑦᓯᓂᕐᒧᑦ ᓂᕈᐊᕐᓂᖓᑦ ᐱᔭᕇᖅᑕᐅᓂᐊᖅᑐᑦ ᐅᖓᑖᓂᐅᓐᖏᑦᑐᖅ ᑏᓴᕝᕙ 31, 1992.
36.4.2 ᒪᓕᒐᓐᖑᖅᑎᑦᓯᓂᖓ ᑯᐃ ᑭᒡᒐᖅᑐᕐᓗᓂ ᑲᓇᑕᒥ ᐱᔭᕇᖅᑕᐅᓂᐊᖅᑐᖅ ᐅᖓᑖᓂᐅᓐᖏᑦᑐᖅ ᑏᓴᕝᕙ 31, 1993.
36.4.3 ᐱᕕᑦᓴᖃᕐᓂᐅᔪᑦ ᓴᖅᑭᖅᑕᐅᓯᒪᔪᑦ ᐅᕘᓇ ᐃᓛᒃᑰᖅᑐᒃᑯᑦ ᐊᓯᔾᔨᖅᑕᐅᒍᓐᓇᖅᑐᑦ ᐊᖏᖃᑎᒌᓐᓂᖓᒍᑦ ᑐᓐᖓᕕᒃ ᓄᓇᕗᑦ ᐊᒻᒪᓗ ᒥᓂᔅᑕᖓᑦᑕ ᐃᓄᓕᕆᔨᑐᖃᒃᑯᑦ.