ARTICLE 42

ᒫᓂᑑᕙ ᐊᒻᒪᓗ ᑕᕆᐅᖅ ᐃᒪᖅ ᑲᓇᓐᓇᖓᓂ ᒫᓂᑑᕙᐅᑉ

ᐃᓄᐃᑦ ᐊᖑᓇᓱᒍᓐᓇᕐᓂᕐᒧᑦ ᐱᔪᓐᓇᐅᑎᖏᑦ: ᒫᓂᑑᕙ

42.1.1 ᑕᐃᒪᐃᓕᖓᒐᓗᐊᖅᑎᓪᓗᒋᑦ ᐃᓗᓕᖏᑦ ᐊᖏᖃᑎᒌᒍᑎᐅᑉ, ᑎᑎᕋᖅᓯᒪᔪᖅ 2.7.1 ᐊᑑᑎᔾᔮᖏᑦᑐᑦ ᐃᓗᐊᓂ ᐊᒻᒪᓗ ᓄᓇᓄᑦ ᐃᒪᖏᓐᓄᓪᓗ ᒫᓂᑑᕙᐅᑉ.

42.1.2 ᐃᓄᐃᑦ ᕿᓂᕈᓐᓇᔾᔮᖏᑦᑐᑦ ᐊᑦᓱᖐᖑᓐᓇᔾᔮᒐᑎᓪᓗ ᒐᕙᒪᒃᑯᓐᓂᒃ ᑲᓇᑕᐅᑉ ᓇᐅᑐᐃᓐᓇᕐᓂᒃ ᐃᓱᒪᑦᓴᖅᓯᐅᕈᑎᑦᓴᐅᔪᓂᒃ ᐊᓯᖏᓐᓂᒃ ᑐᑭᖏᑦᑕ ᐃᓄᐃᑦ ᐊᖑᓇᓱᒍᓐᓇᕐᓂᕐᒧᑦ ᐱᔪᓐᓇᐅᑎᖏᑦᑕ ᒫᓂᑑᕙᒥ ᑕᐅᖅᓰᓗᑎᒃ ᓇᐅᑐᐃᓐᓇᕐᓂᒃ ᐃᓄᓐᐃᑦ ᓄᓇᖃᖅᑳᕐᓂᕐᒧᑦ ᑐᑦᓯᕌᖏᓐᓂᒃ, ᐱᔪᓐᓇᐅᑎᖏᓐᓂᒃ, ᑎᒍᒥᐊᖅᑕᖏᓐᓂᒃ ᐱᔪᒪᔭᕆᔭᖏᓐᓂᓪᓗ ᐃᓗᐊᓂ ᐊᒻᒪᓗ ᓄᓇᓂ ᐃᒪᖏᓐᓂᓗ ᒫᓃᑐᕙᐅᑉ.

42.1.3 ᑎᑎᕋᖅᓯᒪᔪᖅ 42.1.2 ᐊᐳᖅᓯᒪᒍᑕᐅᔾᔮᖏᑦᑐᖅ ᐊᐅᓚᓂᐅᔪᒧᑦ ᐃᓄᐃᑦ ᐊᑑᑎᑐᐃᓐᓇᕆᐊᓕᖏᓐᓄᑦ ᐊᑦᑐᐊᔪᓄᑦ ᓇᐅᑐᐃᓐᓇᕐᒧᑦ ᓯᖁᒥᑦᓯᓂᐅᔪᒧᑦ ᓇᐅᑐᐃᓐᓇᕐᒥᒃ ᓄᓇᖃᖅᑳᖅᓯᒪᓂᕐᒨᖓᔪᓄᑦ, ᐱᔪᓐᓇᐅᑎᓄᑦ, ᑎᒍᒥᐊᕐᓂᐅᔪᓄᑦ ᐱᔪᒪᔭᕆᐊᔭᖃᕐᓂᕐᒧᓪᓗ ᓄᓇᓂᒃ ᐃᒪᕐᓂᓪᓗ ᒫᓂᑑᕙᒥ.

ᐃᓄᐃᑦ ᐊᖑᓇᓱᒍᓐᓇᕐᓂᕐᒧᑦ ᐱᔪᓐᓇᐅᑎᖏᑦ: ᑕᕆᐅᕐᒥ ᑲᓇᓐᓇᖓᓂ ᒫᓂᑑᕙᐅᑉ

42.2.1 ᐅᕙᓂ ᐃᓚᖓᓂ, “ᑕᕆᐅᖅ ᑲᓇᓐᓇᖓᓂ ᒫᓂᑑᕙᐅᑉ” ᑐᑭᓕᒃ ᓄᓇ ᑕᓯᐅᔭᕐᔪᐊᕐᒥ ᐊᑦᑐᐊᔪᖅ ᓯᔾᔭᖓᓄᑦ ᒫᓂᑑᕙᐅᑉ, 60-ᖓᓃᑦᑐᖅ ᓄᓇᓐᖑᐊᑎᒍᑦ ᓴᓂᒧᑦ ᐊᒻᒪᓗ ᑐᕋᐃᓐᓇᖅᓱᓂ ᓂᒋᖅᐸᓯᒻᒧᑦ, ᐱᒋᐊᖅᓱᓂ 60-ᖓᓂ ᓄᓇᓐᖑᐊᖅᑎᒍᑦ ᓴᓂᒧᑦ 15 -ᒪᐃᓕᓂᒃ ᐅᖓᓯᓐᓂᓕᒃ ᓯᔾᔭᖓᓂᒃ ᒫᓂᑑᕙᐅᑉ, ᑲᓇᓐᓇᖓᓂ ᓄᕗᐊᓄᑦ ᓯᓈᖓᓂ ᐹᖓᑕ ᑰᔾᔪᐊᕌᓘᑉ ᑰᖓᑕ.

42.2.2 ᑕᕆᐅᕐᒥ ᑲᓇᓐᓇᖓᓂ ᒫᓂᑑᕙᐅᑉ, ᐃᓄᐃᑦ ᑎᓕᓯᓯᒪᔪᑦ ᑭᕙᓪᓕᕐᒥ ᐊᕕᑦᑐᖅᓯᒪᔪᓂ ᐆᒪᔪᓕᕆᓂᕐᒧᑦ ᑲᑎᒪᔨᓂᒃ ᐱᔪᓐᓇᕐᓂᖃᖅᓱᑎᒃ ᐊᖑᓇᓱᒍᓐᓇᕐᓂᕐᒥᒃ ᐆᒪᔪᕐᓂᒃ ᑎᑭᐅᑎᓗᒍ, ᐃᓱᒪᒋᓗᒋᑦ ᐃᓄᐃᑦ ᐊᖑᓇᓱᐊᒍᓐᓇᕐᓂᕐᒥᒃ ᑕᐃᒃᑯᓇᓐᖓᑦ ᐆᒪᔪᕐᓂᒃ ᓯᓚᑖᓂ ᑕᕆᐅᖓᑕ ᑲᓇᓐᓇᖓᑕ ᒫᓂᑑᕙᐅᑉ, ᐱᔭᕆᐊᓕᖏᑦ ᐃᒻᒥᓅᖓᓗᑎᒃ, ᐃᓚᒥᓄᑦ ᓄᓇᓕᓐᓄᓘᓐᓃᑦ ᑐᕌᖓᑎᓪᓗᒋᑦ, ᑐᓐᖓᕕᖃᕐᓗᑎᒃ ᐊᐳᖅᑕᕐᕕᐅᔪᓂᒃ ᑭᓪᓕᒋᔭᐅᑎᑕᐅᔪᓂᓪᓘᓐᓃᑦ ᐊᐅᓚᑦᓯᔨᐅᔪᓄᑦ ᑎᒥᐅᔪᓄᑦ ᐃᒪᐃᑦᓴᕆᐊᓕᓐᓄᑦ:

(a) ᐊᑑᑎᑉᐸᑦ ᓄᖑᕈᑎᓗᐊᑦᑕᐃᓕᓂᖅ ᐱᔾᔪᑕᐅᓪᓗᓂ;

(b) ᐱᔾᔪᑕᐅᓗᓂ ᑭᓇᒃᑯᑐᐃᓐᓇᕐᓂᒃ ᐋᓐᓂᐊᑦᑕᐃᓕᒪᑎᑦᓯᓂᖅ ᐊᑦᑕᓇᑦᑕᐃᓕᒪᑎᑦᓯᓂᕐᓘᓐᓃᑦ, ᐅᕝᕙᓗ ᐊᖑᓇᓱᓐᓂᕐᒧᑦ ᐊᐅᓚᓂᐅᕙᑦᑐᓂᒃ;

(c) ᐊᑐᓕᖅᑎᓪᓗᒋᑦ ᑕᐃᒃᑯᐊ ᐃᒪᐃᓕᖓᓂᐅᔪᑦ ᓄᓇᕐᔪᐊᕐᒥ ᐊᖏᖃᑎᒌᒍᑎᒥ, ᑕᐃᒫᒃ ᐱᔪᓐᓇᖅᑎᑕᐅᒻᒪᑕ ᑎᑎᕋᖅᓯᒪᔪᒥ 5.9.1, ᑕᕝᕙᐅᒌᖅᑐᒥᓃᑦ ᐅᓪᓗᖓᓂ ᒪᓕᒐᓐᖑᖅᑎᑕᐅᑎᓪᓗᒍ ᐊᖏᖃᑎᒌᒍᑎ;

(d) ᐱᕕᖃᖅᑎᑦᓯᓗᑎᒃ ᐊᖑᓇᓱᓐᓂᖏᓐᓂᒃ ᐊᓯᖏᑦᑕ ᓄᓇᖃᖅᑳᖅᓯᒪᔪᑦ ᑐᓐᖓᕕᒋᑦᓱᒍ ᓄᓇᖃᖅᑳᖅᓯᒪᔪᓄᑦ ᐅᕝᕙᓗ ᐊᓪᓚᓄᑦ ᐱᔪᓐᓇᐅᑏᑦ ᐊᒻᒪᓗ ᐱᔾᔪᑎᖃᑦᓯᐊᕐᓗᑎᒃ ᐊᖑᓇᓱᓐᓂᕐᒧᑦ ᐊᐅᓚᓂᕆᓂᔭᖏᑦ ᐊᓯᖏᑦᑕ ᐊᖑᓇᓱᑦᑏᑦ, ᐃᓄᐃᑦ ᐱᔪᓐᓇᐅᑎᖏᑦ ᐊᖑᓇᓱᓐᓂᕐᒧᑦ ᐃᒪᐃᑦᑐᐊᖅᐸᑕ;

(i) ᐊᐳᖅᑕᕐᕕᖃᕐᓂᖅᓴᐅᑎᑕᐅᒋᐊᖃᓐᖏᑦᑐᑦ ᐅᕝᕙᓗ ᒪᓕᒐᖃᖅᑎᑕᐅᓂᖅᓴᐅᓗᑎᒃ ᑕᐃᒪᐃᓕᖓᒻᒪᑦ 277 ᐊᓯᖏᓐᓄᑦ ᓄᓇᖃᖅᑳᖅᓯᒪᔪᓄᑦ ᐊᖑᓇᓱᑉᐸᑦᑐᓄᑦ ᑖᒃᑯᓇᓐᖓᓴᐃᓐᓇᖅ ᐆᒪᔪᕐᓂᒃ; ᐊᒻᒪᓗ

(ii) ᓯᕗᓪᓕᐅᑎᔭᐅᓂᐊᖅᑐᑦ ᐊᖑᓇᓱᓐᓂᕐᒥᒃ ᑕᐃᒃᑯᓇᓐᖓᑦ ᐆᒪᔪᕐᓂᒃ ᓄᓇᖃᖅᑳᓯᒪᓐᖏᑦᑐᓄᑦ;

(e) ᓈᒻᒪᑦᑐᓂᒃ ᐱᕕᑦᓴᖃᖅᑎᑦᓯᑦᓯᐊᕐᓗᑎᒃ ᑭᓪᓕᖃᕐᓂᐅᔪᓂᒃ ᐅᓚᕕᓐᓂᕐᒧᑦ ᓄᖑᑎᕆᓂᕐᒧᓪᓘᓐᓃᑦ ᐆᒪᔪᕐᓂᒃ ᐱᒻᒪᕆᐅᔪᓂᒃ ᐳᓚᕋᑦᑐᓕᕆᕐᓂᒧᑦ; ᐅᕝᕙᓗ

(f) ᐊᑦᑐᐊᔪᓄᑦ ᒥᓐᖑᐃᕐᓯᕐᕕᓐᓄᑦ ᐅᕝᕙᓗ ᓴᐳᑎᔭᐅᓯᒪᔪᓄᑦ ᓄᓇᓄᑦ, ᐊᑐᓕᖅᑎᓪᓗᒋᑦ ᐃᒪᐃᓕᖓᓂᖏᑦ ᐊᖏᖃᑎᒌᒍᑎᖓᑦᑕ ᑭᕙᓪᓕᕐᒥ ᐊᕕᑦᑐᖅᓯᒪᔪᓂ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐊᒻᒪᓗ ᐊᐅᓚᑦᓯᔩᑦ ᑎᒥᐅᔪᑦ ᑎᒍᒥᐊᖅᑐᑦ ᑕᐃᑦᓱᒪᓐᖓᑦ ᒥᓐᖑᐃᕐᓯᕐᕕᒻᒥᒃ ᓴᐳᑎᔭᐅᓯᒪᔪᒥᓪᓘᓐᓃᑦ.

42.2.3 ᑐᑭᓯᓇᖅᑎᒋᐊᒃᑲᓐᓂᕐᓗᒍ, ᓇᐅᑐᐃᓐᓇᖅ ᐊᐳᖅᓯᒪᓂᐅᔪᖅ ᑭᓪᓕᒋᔭᐅᔪᕐᓘᓐᓃᑦ ᐅᖃᐅᓯᐅᔪᑦ ᑎᑎᕋᖅᓯᒪᔪᒥ 42.2.2-ᒥ ᐊᑐᖅᑎᑕᐅᒍᓐᓇᖅᑐᑦ ᐱᔾᔪᑕᐅᓪᓗᓂ ᐊᑐᖃᑎᒌᑦᑐᓄᑦ ᐊᖏᖃᑎᒌᒍᑎ.

42.2.4 ᐊᐳᖅᓯᒪᑎᑦᓯᖏᓐᓂᕐᒥᓂ ᑭᓪᓕᖃᖅᑎᑦᓯᖏᓐᓂᕐᒥᓂᓘᓐᓃᑦ ᐊᑖᓂ ᑎᑎᕋᖅᓯᒪᔪᖅ 42.2.2, ᐊᐅᓚᑦᓯᓂᕐᒧᑦ ᑎᒥᐅᔪᑦ ᐅᖃᖃᑎᖃᕐᓂᐊᖅᑐᑦ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓂᒃ ᐊᒻᒪᓗ ᑭᕙᓪᓕᕐᒥᐊᕕᑦᑐᖅᓯᒪᔪᓂ ᐆᒪᔪᓕᕆᓂᕐᒧᑦ ᑲᑎᒪᔨᓂᒃ.

42.2.5 ᐊᕕᑦᑐᖅᓯᒪᔪᓂ ᑭᕙᓪᓕᕐᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᑲᑐᔾᔨᖃᑎᖃᕐᓂᐊᖅᑐᑦ ᐊᐅᓚᑦᓯᔨᓂᒃ ᑎᒥᐅᔪᓂᒃ ᖃᐅᔨᓴᕐᓗᑎᒃ ᐊᖑᓇᓱᓐᓂᐅᔪᓂᒃ ᑐᓐᖓᕕᒋᑦᓱᒍ ᑎᑎᕋᖅᓯᒪᔪᖅ 42.2.2.

42.2.6 ᑭᕙᓪᓕᕐᒥ ᐊᕕᑦᑐᖅᓯᒪᔪᓂ ᐆᒪᔪᓕᕆᓂᕐᒧᑦ ᑲᑎᒪᔩᑦ, ᓇᓗᓇᐃᖅᓯᓕᕈᑎᒃ ᑐᓐᖓᕕᒋᑦᓱᒍ ᑎᑎᕋᖅᓯᒪᔪᖅ 42.2.2, ᐃᓱᒪᒋᔭᖃᖃᓯᐅᑎᓂᐊᖅᑐᑦ ᐃᓄᐃᑦ ᐱᖅᑯᓯᑐᖃᖅᑎᒍᑦ ᒫᓐᓇᓗ ᓱᓕ ᐊᖑᓇᓱᖃᑦᑕᕆᐊᖏᑦ ᑕᕆᐅᕐᒥ ᑲᓇᓐᓇᖓᓂ ᒫᓂᑑᕙᐅᑉ.

42.2.7 ᖃᓄᖅᑑᕈᑎᖃᓕᕈᑎᒃ ᐱᔾᔪᑕᐅᓗᑎᒃ ᑎᑎᕋᖅᓯᒪᔪᑦ 42.2.2 ᒥᓐᖑᐃᕐᓯᕐᕕᓐᓂ ᐊᒻᒪᓗ ᓴᐳᑎᔭᐅᓯᒪᔪᓂ ᓄᓇᓂ, ᐊᐅᓚᑦᓯᓂᕐᒧᑦ ᑎᒥᐅᔪᑦ ᐃᓱᒪᒋᔭᖃᖃᓯᐅᑎᓂᐊᖅᑐᑦ ᐊᔾᔨᐅᖏᑦᑐᓂᒃ ᐱᔾᔪᑕᐅᔪᓂᒃ ᐊᑐᐊᒐᕐᓂᓪᓗ ᐊᑦᑐᐊᔪᓂᒃ ᑕᐃᒃᑯᓄᖓ ᓄᓇᓄᑦ.

42.2.8 ᐱᔪᓐᓇᕐᓂᖅ ᐊᖑᓇᓱᓐᓂᕐᒧᑦ ᐅᖃᐅᓯᐅᔪᖅ ᑎᑎᕋᖅᓯᒪᔪᒥ 42.2.2 ᐊᑑᑎᔭᐅᒋᐊᖃᓐᖏᑦᑐᖅ ᐃᒪᐃᒍᑕᐅᓗᓂ:

(a) ᐊᕝᕕᐊᕈᑕᐅᓗᑎᒃ ᐱᔪᓐᓇᐅᑎᓄᑦ ᐅᒥᐊᖅᑐᕈᓐᓇᕐᓂᕐᒧᑦ; ᐅᕝᕙᓗ

(b) ᐅᓚᕕᓪᓗᑎᒃ ᓇᐅᑐᐃᓐᓇᕐᒥᒃ ᐊᐅᓚᓂᐅᔪᒥᒃ ᐱᔪᓐᓇᕐᓂᖃᖅᑎᑕᐅᔪᒥᒃ ᒐᕙᒪᒃᑯᓐᓄᑦ ᑎᑭᐅᑎᑦᓱᒍ ᐊᖑᓇᓱᓐᓂᖅ ᐊᐅᓚᓂᖅ ᐊᑲᐅᓈᕈᑎᒍᓐᓃᑎᓪᓗᒍ, ᑭᓯᐊᓂ ᐊᐳᖅᓯᒪᑎᑦᓯᓂᐅᔪᖅ ᐊᖑᓇᓱᒍᓐᓇᕐᓂᕐᒧᑦ ᐊᑑᑎᓂᐊᖅᑐᖅ ᐱᔭᕆᐊᖃᖅᐸᑦ ᑭᓯᐊᓂ ᐱᔪᓐᓇᐅᑎᒥᒃ ᐊᐅᓚᓂᖅ ᐊᐅᓚᓐᓂᐊᕐᓗᒍ.

42.2.9 ᑭᕙᓪᓕᕐᒥ ᐊᕕᑦᑐᖅᓯᒪᔪᓂ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐊᑐᐃᓐᓇᐅᑎᑦᓯᓂᐊᖅᑐᑦ ᐃᓄᓐᓄᑦ ᓇᓗᓇᐃᖅᓯᓂᕐᒥᒃ ᑕᑯᑦᓴᐅᑎᑦᓯᓗᑎᒃ ᓇᓗᓇᐃᖅᑕᐅᔪᓂᒃ, ᐃᓄᐃᑦ ᐊᑑᑎᒍᓐᓇᖅᑐᑦ ᐱᔪᓐᓇᐅᑎᒥᓂᒃ ᐊᖑᓇᓱᓐᓂᕐᒧᑦ ᐊᑖᓂ ᑎᑎᕋᖅᓯᒪᔪᖅ 42.2.2 ᑕᑯᑦᓴᐅᑎᑦᓯᒍᑕᐅᔪᖅ ᓚᐃᓴᓐᓯᑕᖃᖅᑎᓐᓇᒍ ᐱᔪᓐᓇᐅᑎᒥᓪᓘᓐᓃᑦ ᐊᒻᒪᓗ ᐊᑭᓕᕆᐊᓕᑦᑕᖃᓐᖏᓪᓗᓂ ᑖᒃᓰᔭᐅᑎᓂᒃ ᐊᑭᓕᕆᐊᓕᓐᓂᓘᓐᓃᑦ.

42.2.10 ᑕᐃᒪᐃᓕᖓᒐᓗᐊᖅᑎᓪᓗᒍ ᑎᑎᕋᖅᓯᒪᔪᖅ 42.2.9, ᐃᓄᐃᑦ ᑎᓕᔭᐅᔪᑦ ᐊᑖᓂ ᑎᑎᕋᖅᓯᒪᔪᖅ 42.2.2 ᐱᔭᕆᐊᖃᑐᐃᓐᓇᕆᐊᓖᑦ ᐊᑐᕐᓗᑎᒃ ᓂᕕᖓᑖᕐᓂᒃ ᐊᖑᓇᓱᐊᓕᕈᑎᒃ ᐃᓚᖏᓐᓂᒃ ᐆᒪᔪᐃᑦ.

42.2.11 ᐃᓄᐃᑦ ᓱᓇᑐᐃᓐᓇᕐᓂᒃ ᐊᑐᕈᓐᓇᖅᑐᑦ, ᐊᐅᓚᓂᐅᔪᓂᒃ ᐅᕝᕙᓗ ᑐᑭᓯᐅᒪᔭᕆᐊᓕᓐᓂᒃ ᐊᖑᓇᓱᓐᓂᐊᕐᓗᑎᒃ ᑕᕆᐅᖓᓂ ᑲᓇᓐᓇᖓᓂ ᒫᓂᑑᕙᐅᑉ ᑐᓐᖓᕕᖃᕐᓗᑎᒃ ᑎᑎᕋᖅᓯᒪᔪᒥᒃ 42.2.2 ᐊᐳᖅᓯᒪᓐᖏᑐᐊᖅᐸᑦ ᒪᓕᒐᕐᓄᑦ ᐃᓘᓐᓇᐃᓐᓄᑦ ᐊᑑᑎᔪᓄᑦ ᓴᖅᑭᖅᑕᐅᔪᓄᑦ:

(a) ᐊᑑᑎᔪᖃᖅᐸᑦ ᓄᖑᑎᕆᓗᐊᑦᑕᐃᓕᓂᖅ ᐱᔾᔪᑕᐅᓗᓐᓂ;

(b) ᐱᕕᖃᕐᓂᖅ ᑐᖁᑦᓯᓂᖅ ᓱᒃᑯᔨᐊᕆᓇᒋᑦ ᑐᖁᑦᓯᓂᖅ ᐆᒪᔪᕐᓂᒃ, ᑭᓇᒃᑯᑐᐃᓐᓇᐃᑦ ᐊᑦᑕᓇᑦᑕᐃᓕᒪᓂᖏᑦ ᐅᕝᕙᓗ ᖁᑭᐅᑎᓂᒃ ᐊᐅᓚᑦᓯᓂᖅ; ᐅᕝᕙᓗ

(c) ᐊᑑᑎᑦᑕᐃᓕᒍᑕᐅᓗᓂ ᐋᓐᓂᖅᑎᕆᒍᑕᐅᒍᓐᓇᖅᑐᓂᒃ ᐊᓯᔾᔨᑦᑎᕆᓂᕐᒧᑦ ᐊᕙᑎᒥᒃ.

42.2.12 ᑕᐃᒪᐃᓕᖓᒐᓗᐊᖅᑎᓪᓗᒋᑦ ᐃᓘᓐᓇᑎᒃ ᐊᖏᖃᑎᒌᒍᑎᒦᑦᑐᑦ, ᐃᓄᒃ ᑖᒃᑯᓄᖓᓪᓗᐊᖅ ᑎᒥᐅᔪᓄᑦ ᒐᕙᒪᒃᑯᓐᓄᓪᓘᓐᓃᑦ ᑐᓂᓯᒋᐊᖃᑐᐃᓐᓇᕆᐊᓕᒃ ᑐᓴᕋᑦᓴᓂᒃ ᐊᖑᓇᓱᓐᓂᕐᒧᑦ ᐊᐅᓚᓂᐅᔪᓂᒃ ᐅᕝᕙᓗ ᐊᖑᓇᓱᓐᓂᕐᒧᑦ ᐊᑦᑐᐊᔪᓂᒃ ᐊᐅᓚᓂᐅᔪᓂᒃ ᑕᕆᐅᖓᓂ ᑲᓇᓐᓇᖓᓂ ᒫᓂᑑᕙᐅᑉ ᒪᓕᒐᐃᑦ ᐃᓘᓐᓇᐃᓐᓄᑦ ᐊᑑᑎᔪᑦ ᐱᔭᕆᐊᖃᖅᑎᑦᓯᑉᐸᑕ ᐊᖑᓇᓱᑦᑎᓂᒃ ᐊᓯᖏᓐᓂᒃ ᐃᓄᐃᑦ ᑕᑯᑦᓴᐅᑎᑦᓯᓂᕐᒥᒃ ᕿᒥᕐᕈᔭᐅᖃᓯᐅᑎᒍᓐᓇᖅᑐᓂᒃ.

42.2.13 ᓇᐅᑐᐃᓐᓇᐃᑦ ᖃᓄᐃᑕᐅᒍᑕᐅᔪᑦ ᐃᓄᓐᓄᑦ ᐊᑦᑐᐊᔪᓄᑦ ᐊᖑᓇᓱᓐᓂᕐᒧᑦ ᑕᕆᐅᖓᓂ ᑲᓇᓐᓇᖓᓂ ᒫᓂᑑᕙᐅᑉ ᐊᐅᓚᓂᖃᕐᓗᓂ ᒪᓕᓪᓗᓂ ᐊᖏᖃᑎᒌᒍᑎᒥᒃ ᐃᒪᐃᓐᓂᐊᖅᐳᖅ, ᑐᓐᖓᕕᓪᓗᐊᑕᐅᓗᓂ, ᓇᒻᒪᑦᑐᓕᕕᐅᓂᐊᖅᐳᖅ ᐊᔾᔨᐅᑎᑕᐅᓗᓂ, ᐱᔭᐅᓂᖅᓴᐅᒋᐊᖃᕋᓂᓗ ᐅᖓᑖᓅᑦ ᐊᑑᑎᔭᐅᒍᓐᓇᖅᑐᑦ ᐊᖑᓇᓱᑦᑎᓄᑦ ᐊᓯᖏᓐᓄᑦ ᐃᓄᐃᑦ ᐊᔾᔨᒐᓚᖏᓐᓂ ᐊᐅᓚᓂᖃᖅᑐᑦ.

42.2.14 ᓇᐅᑐᐃᓐᓇᖅ ᐃᓚᖓᓃᑦᑐᖅ ᐆᒪ ᒥᑭᓪᓕᑎᕆᒍᑕᐅᔾᔮᖏᓪᓚᖅ ᐱᔪᓐᓇᐅᑎᐅᑎᑕᐅᔪᓂᒃ ᑎᑎᕋᖅᓯᒪᔪᒥ 15.3.7.