ARTICLE 31
ᓄᓇᕗᒻᒥ ᑮᓇᐅᔭᓂᒃ ᐸᐸᑦᓯᔩᑦ
ᐃᓘᓐᓈᒍᑦ
31.1.1 ᓯᕗᕐᖓᓂ ᐅᓪᓗᖅ ᒪᓕᒐᓐᖑᖅᑎᑕᐅᓂᖓᑕ ᐊᖏᕈᑎᐅᑉ, ᑐᓐᖓᕕᒃᑯᑦ ᓄᓇᕗᒻᒥ ᓴᖅᑭᑎᑦᓯᓂᐊᖅᑐᑦ ᐸᐸᑦᓯᔨᓂᒃ ᓄᓇᕗᒻᒥ ᐱᓂᐊᖅᑎᓪᓗᒋᑦ ᐱᒻᒪᕆᐅᑎᓅᖓᔪᓂᒃ ᐊᐅᓪᓛᖅᑎᑕᐅᔪᓂᒃ ᑮᓇᐅᔭᓂᒃ ᐅᖃᐅᓯᐅᔪᑦ ᐃᓛᒃᑰᖅᑐᒥ 29-ᒥ ᐊᒻᒪᓗ ᖃᑦᓯᑐᐃᓐᓇᐃᑦ ᐊᑭᓕᐅᑕᐅᒋᐊᓖᑦ ᐊᑖᓂ ᐃᓛᒃᑰᖅᑐᖅ 23, ᐊᒻᒪᓗ ᓄᓇᕗᒻᒥ ᑮᓇᐅᔭᓂᒃ ᐸᐸᑦᓯᔨᑦ ᑮᓇᐅᔭᐅᓕᐅᕈᑎᖃᕈᓐᓇᖅᑐᑦ ᑖᒃᑯᓇᓐᖓᓴᐃᓐᓇᖅ ᑐᓂᐅᖅᑲᕐᓗᒋᑦ ᑮᓇᐅᔭᓕᐊᖑᔪᑦ ᑖᒃᑯᓇᓐᖓᑦ ᓄᓇᑖᖃᑕᐅᓯᒪᔪᓄᑦ ᐸᐸᑦᓯᔨᒃᑯᓐᓂᒃ ᐃᓘᓐᓈᒍᑦ ᐱᕚᓪᓗᕈᑕᐅᓂᐊᖅᑎᓪᓗᒋᑦ ᐃᓄᓐᓄᑦ.
31.1.2 ᓄᓇᕗᒻᒥ ᑮᓇᐅᔭᓂᒃ ᐸᐸᑦᓯᔩᑦ ᓄᓇᓕᖃᕐᓂᐊᖅᑐᑦ ᑲᓇᑕᒥ.
31.1.3 ᓄᓇᕗᒻᒥ ᑮᓇᐅᔭᓂᒃ ᐸᐸᑦᓯᔩᑦ ᑐᓐᖓᕕᖃᕐᓂᐊᖅᑐᑦ ᐊᐅᓚᑕᐅᓂᕐᒥᒃ ᐸᐸᑦᓯᔨᓄᑦ, ᓂᕈᐊᖅᑕᐅᓯᒪᓂᐊᖅᑐᑦ ᐊᕕᑦᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐅᕝᕙᓗ ᐊᓯᐊᒍᑦ ᐊᐅᓚᓂᒃᑯᑦ ᒪᓕᑦᓯᐊᕐᓂᖃᕐᓗᓂ ᑎᑎᕋᖅᓯᒪᔪᒥᒃ 39.1.6.
31.1.4 ᐸᐸᑕᑦᓴᐅᔪᑦ ᓴᖅᑮᔾᔪᑕᐅᔪᑦ ᓄᓇᕗᒻᒥ ᑮᓇᐅᔭᓂᒃ ᐸᐸᑦᓯᔨᓂᒃ ᐱᕕᖃᖅᑎᑦᓯᒍᑕᐅᓂᐊᖅᑐᑦ ᐋᖅᑭᒋᐊᖅᑕᐅᓂᖏᑦ ᐸᐸᑕᐅᔪᑦ ᐱᖃᓯᐅᔾᔨᒋᐊᓖᑦ ᐊᖏᖅᑕᐅᓂᕐᒥᒃ ᐃᓄᓐᓄᑦ ᑕᕝᕘᓇᑦᓯᐊᖅ ᐋᖅᑭᑦᑕᐅᓯᒪᔪᒃᑯᑦ ᓂᕈᐊᕐᓂᕐᒧᑦ ᐊᐅᓚᓂᒃᑯᑦ.
31.1.5 ᒪᓕᒐᐃᑦ ᓱᓇᑐᐃᓐᓇᕐᓂᒃ ᓄᖅᑲᑕᕐᕕᓕᐅᖅᓯᒪᔪᑦ ᐊᑦᑐᖅᑕᐅᔾᔮᖏᓪᓚᑦ ᓄᓇᕗᒻᒥ ᑮᓇᐅᔭᓂᒃ ᐸᐸᑦᓯᔨᓄᑦ.
31.1.6 ᓄᓇᕗᒻᒥ ᑮᓇᐅᔭᓂᒃ ᐸᐸᑦᓯᔩᑦ ᐊᑐᐃᓐᓇᐅᑎᑦᓯᓂᐊᖅᑐᑦ ᓴᐳᔾᔨᓂᕐᒥᒃ ᐱᕚᓪᓕᑎᑦᓯᓂᕐᒥᓗ ᓄᓇᑖᕐᓂᕐᒧᑦ ᐱᖁᑎᑖᕆᔭᐅᔪᓂᒃ ᑐᓐᖓᕕᖃᕐᓗᑎᒃ ᐊᑑᑎᔪᓂᒃ ᐊᐅᓚᑦᓯᓂᑦᓯᐊᕙᓐᓂᒃ.
31.1.7 ᑐᓐᖓᕕᒋᑦᓱᒍ ᑎᑎᕋᖅᓯᒪᔪᖅ 31.1.5, ᓄᓇᕗᒻᒥ ᑮᓇᐅᔭᓂᒃ ᐸᐸᑦᓯᔩᑦ ᐊᓯᖏᓪᓗ ᐃᓄᓐᓄᑦ ᐋᖅᑭᓱᖅᑕᐅᓯᒪᔪᑦ ᑐᓐᖓᕕᖃᕐᓂᐊᖅᑐᖅ ᒪᓕᒐᕐᓂᒃ ᐃᓘᓐᓇᐃᓐᓄᑦ ᐊᑑᑎᔪᓂᒃ ᐱᖃᓯᐅᑎᑦᓱᑎᒃ ᐊᑑᑎᔪᑦ ᑖᒃᓰᔭᕐᓂᕐᒧᑦ ᒪᓕᒐᐃᑦ.
ᐊᑐᐃᓐᓇᖃᕐᓂᖅ ᑐᓴᕋᑦᓴᓂᒃ
31.2.1 ᐅᑯᐊ ᑐᓴᕋᑦᓴᐃᑦ ᐊᑐᐃᓐᓇᑦᓯᐊᕐᓂᐊᖅᑐᑦ ᐃᓱᒪᖅᓲᑕᐅᓗᑎᒃ ᐃᓄᓕᒫᓄᑦ;
(a) ᐸᐸᑦᓯᓂᖅ ᓴᖅᑭᖅᑕᐅᓯᒪᔪᖅ ᐊᒻᒪᓗ ᐊᐅᓚᑦᓯᓂᖅ ᓄᓇᕗᒻᒥ ᑮᓇᐅᔭᓂᒃ ᐸᐸᑦᓯᔨᓂᒃ;
(b) ᑎᓕᓯᔾᔪᑕᐅᔪᑦ ᑎᑎᖅᑲᐃᑦ ᑐᓐᖓᕕᓪᓗᐊᑕᐅᔪᑦ ᓄᓇᑖᖅᑐᓄᑦ ᐊᓯᓕᒫᖏᓪᓗ ᐱᖃᑕᐅᔪᑦ ᐸᐸᑕᐅᔪᓂᒃ; ᐊᒻᒪᓗ
(c) ᐊᕐᕌᒍᑕᒫᖅᓯᐅᑏᑦ ᐅᓂᒃᑳᑦ ᓇᓗᓇᐃᔭᐃᔪᑦ ᐊᐅᓚᓂᖏᓐᓂᒃ ᑮᓇᐅᔭᖏᓐᓂᓪᓗ ᐸᐸᑦᓯᔨᒃᑯᑦ, ᓇᒻᒥᓂᖃᖅᑎᓪᓗᐊᑕᐅᔪᑦ, ᐊᒻᒪᓗ ᐊᓯᖏᓕᒫᖏᑦ ᐱᖃᖃᑕᐅᔪᑦ.
ᐊᑑᑎᔪᖅ
31.3.1 ᕐᑳᖓᒍᒃᑲᓐᓂᖅ ᐊᑑᑎᔪᑦ ᐱᔪᓐᓇᕐᓂᐅᔪᑦ ᒪᓕᒐᑐᐃᓐᓇᖅᑎᒍᑦ ᐅᕝᕙᓗ ᐱᕕᖃᖅᑎᑦᓯᒍᑕᐅᔪᑦ ᒪᓕᒐᖅᑎᒍᑦ, ᐃᓄᐃᑦ ᓇᖏᕈᓐᓇᕐᓂᓖᑦ ᐃᖅᑲᖅᑐᐃᕕᒻᒥ ᑎᒍᒥᐊᖅᑐᓪᓗᐊᑕᐅᔪᓂᒃ ᑲᔪᓯᑎᑦᓯᓗᑎᒃ ᑐᕌᒐᐅᔪᓂᒃ ᐊᓯᖏᓐᓂᓪᓗ ᐱᕕᖃᖅᑎᑦᓯᒍᑕᐅᔪᓂᒃ ᐸᐸᑕᐅᔪᑎᒍᑦ ᐊᒻᒪᓗ ᑎᓕᓯᔾᔪᑕᐅᓯᒪᔪᑦ ᑎᑎᖅᑲᖏᑦ ᑐᓐᖓᕕᓪᓗᐊᑕᐅᔪᑦ ᑎᒍᒥᐊᖅᑐᑦ ᐊᓯᖏᓪᓗ ᐱᖃᖃᑕᐅᔪᑦ ᐸᐸᑕᐅᔪᓂᒃ.