ARTICLE 15

ᑕᕆᐅᖅ

ᑐᓐᖓᕕᐅᔪᑦ

15.1.1 ᐅᓇ ᐃᓛᒃᑰᖅᑐᖅ ᐃᓕᑕᖅᓯᔪᖅ ᑕᑯᑦᓴᐅᑎᑦᓯᑦᓱᓂᓗ ᐅᑯᓇᓐᖓᑦ ᑐᓐᖓᕕᐅᔪᓂᒃ:

(a) ᐃᓄᐃᑦ ᐱᖅᑯᓯᖃᕐᒪᑕ ᒫᓐᓇᓗ ᐊᑐᖅᑎᐅᑦᓱᑎᒃ ᐃᓚᖏᓐᓂᒃ ᑕᕆᐅᒦᑦᑐᓂᒃ, ᐱᓗᐊᖅᑐᒥᒃ ᐊᐅᓚᓂᕐᒦᑦᑐᓂᒃ;

(b) ᒪᓕᒐᖅᑎᒍᑦ ᐱᔪᓐᓇᐅᑎᖏᑦ ᐃᓄᐃᑦ ᑕᕆᐅᕐᒥ ᑰᑦᑐᑦ ᐊᖏᕈᑎᒥ ᑐᓐᖓᕕᖃᖅᑐᑦ ᐱᖅᑯᓯᕐᒥᒃ ᒫᓐᓇᓗ ᐊᑐᕐᓂᐅᕙᑦᑐᒥᒃ;

(c) ᑲᓇᑕᐅᑉ ᑎᒍᒥᐊᕐᓂᖓ ᐃᒪᕐᓂᒃ ᐅᑭᐅᖅᑕᖅᑐᒥ ᕿᑭᖅᑕᓂ ᐃᑲᔪᖅᓯᔭᐅᔪᖅ ᐃᓄᓐᓄᑦ ᐊᑐᖅᑕᐅᕙᑦᑐᓂ ᓄᓇᒋᔭᐅᑦᓱᓂᓗ;

(d) ᐃᓄᐃᑦ ᐊᖑᓇᓱᓐᓂᕆᕙᑦᑕᖏᓐᓂᒃ ᐆᒪᔪᕐᓂᒃ ᑐᓛᔫᑐᐃᓐᓇᕆᐊᓕᓐᓂᒃ ᑕᕆᐅᒃᑯᑦ;

(e) ᐃᓄᐃᑦ ᖃᑭᒪᓇᓱᐊᕐᓂᖏᓐᓂ ᑐᓐᖓᕕᖃᕐᓗᑭᒃ ᐃᓚᖓᓂᒃ ᑕᕆᐅᒦᑦᑐᓂᒃ ᑕᒪᒃᑮᓐᓂ ᐱᔭᕆᐊᓕᓐᓂ ᐱᔪᒥᓇᖅᑐᓂᓗ;

(f) ᓴᖅᑭᖅᑕᐅᔪᖃᕆᐊᓕᒃ ᑐᑭᒧᐊᑦᑎᑦᓯᔪᑎᓂᒃ ᐊᑐᐊᒐᕐᓂᒃ ᐊᑦᑐᐊᔪᓂᒃ ᑕᕆᐅᕐᒧᑦ; ᐊᒻᒪᓗ

(g) ᐃᓄᐃᑦ ᐃᓚᐅᑎᓐᓂᖃᕆᐊᓖᑦ ᐅᑭᐅᖅᑕᖅᑐᒥ ᑕᕆᐅᕐᒥᒃ ᐊᐅᓚᑦᓯᓂᕐᒧᑦ, ᐱᖃᓯᐅᑎᑦᓱᓂ ᖃᐅᔨᕐᓴᓂᖅ.

ᐊᑑᑎᕕᖏᑦ

15.2.1 ᒥᓐᖑᐃᕐᓯᕐᕕᒃ ᓴᐳᑎᔭᐅᓯᒪᔪᕐᓘᓐᓃᑦ ᓄᓇ ᓴᖅᑭᖅᑕᐅᑉᐸᑦ ᑕᐃᓐᓇᓗ ᒥᓐᖑᐃᕐᓯᕐᕕᒃ ᓴᐳᑎᔭᐅᓯᒪᔪᕐᓘᓐᓃᑦ ᐃᓚᖓ ᑎᑭᐅᒪᑉᐸᑦ ᑕᕆᐅᕐᒧᑦ, ᐃᓛᒃᑯᑦ 8 ᐅᕝᕙᓗ 9, ᓇᓪᓕᑐᐃᓐᓇᖓᐅᑉᐸᑦ, ᐊᑑᓯᓂᐊᖅᑐᖅ ᐊᑕᖏᕐᓗᓂ ᒥᓐᖑᐃᕐᓯᕐᕕᒻᒧᑦ ᓴᐳᑎᔭᐅᓯᒪᔪᒧᓪᓘᓐᓃᑦ.

15.2.2 ᐃᓛᒃᑰᖅᑐᑦ 5, 6, 8, 9 11, 12, 23, 24, 25, 27, 33 ᐊᒻᒪᓗ 34 ᐊᑑᑎᓂᐊᖅᑐᑦ ᑕᕆᐅᕐᒦᑦᑐᓄᑦ ᐊᑦᑐᐊᔪᓄᑦ ᐱᔪᓐᓇᕐᓂᐅᒋᐊᓕᓐᓄᑦ ᐃᓗᐊᓃᑦᑐᓄᑦ ᑕᐃᒃᑯᐊ ᐃᓛᒃᑰᖅᑐᑦ.

15.2.3 ᐃᓄᐃᑦ ᓄᓇᖁᑎᖃᔾᔮᖏᑦᑐᑦ ᑕᕆᐅᕐᒥ.

ᐆᒪᔪᐃᑦ ᐊᐅᓚᑕᐅᓂᖏᑦ ᐊᖑᓇᓱᓐᓂᕐᓗ ᓯᓚᑕᓂᒃ ᑕᕆᐅᖏᑦᑕ ᓄᓇᕗᑦ

15.3.1 ᒐᕙᒪᒃᑯᑦ ᐊᐅᓚᑦᓯᓂᐊᖅᑐᑦ ᐋᖅᑭᓱᖅᓯᒪᔪᒥᒃ ᐋᖅᑭᓱᖅᓯᒪᔪᓂᓪᓘᓐᓃᑦ ᖃᐅᔨᒪᑎᑦᓯᒍᑕᐅᓗᓂ ᑐᑭᒧᐊᑦᑎᑕᐅᓂᖏᓐᓂᒃ ᐊᐅᓚᑦᓯᓂᐅᔪᑦ ᑐᓛᔪᓂᒃ ᐳᐃᔨᓂᒃ ᑭᓪᓕᓕᓐᓂᒃ I ᐊᒻᒪᓗ II ᐊᑦᑐᐊᔪᓂᓗ.

15.3.2 ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᑎᓕᓯᓂᐊᖅᑐᑦ ᑖᒃᑯᓇᓐᖓᓪᓗᐊᖅ ᑭᒡᒐᖅᑐᐃᔪᓂᒃ ᓄᓇᕗᒻᒥ ᐋᖅᑭᓱᖅᑕᐅᓯᒪᔪᓄᑦ ᐅᖃᐅᓯᐅᔪᓄᑦ 15.3.1-ᒥ.

15.3.3 ᐋᖅᑭᓱᖅᓯᒪᔪᖅ ᐋᖅᑭᓱᖅᓯᒪᔪᓪᓘᓐᓃᑦ ᐅᖃᐅᓯᐅᔪᑦ 15.3.1-ᒥ ᓄᖑᑎᕆᓂᐊᓐᖏᑦᑐᑦ ᖃᓄᖅᑑᕈᓐᓇᕐᓂᖏᓐᓂᒃ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᕐᔪᐊᑦ ᐃᓗᐊᓂ ᑕᕆᐅᖏᑦᑕ ᓄᓇᕗᑦ.

15.3.4 ᒐᕙᒪᒃᑯᑦ ᑐᓴᕆᐊᕐᓂᐊᖅᑐᑦ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓂᒃ ᐊᑦᑐᐊᔪᓂᒃ ᐆᒪᔪᐃᑦ ᐊᐅᓚᑕᐅᓂᖏᓐᓄᑦ ᖃᓄᖅᑑᕈᑕᐅᔪᓄᑦ ᑭᓪᓕᓕᓐᓂ I ᐊᒻᒪᓗ II ᐊᑦᑐᐃᓂᖃᕋᔭᖅᑐᓄᑦ ᓂᕿᖏᓐᓂᒃ ᐊᑐᕐᓇᖅᑐᖁᑎᖏᓐᓂᓪᓗ ᐃᓄᐃᑦ ᐊᖑᓇᓱᓐᓂᕐᒧᑦ ᐱᔪᓐᓇᐅᑎᖏᑦᑕ ᐱᕕᑦᓴᖃᕐᓂᖏᑦᑕᓗ ᐃᓗᐊᓐᓂ ᑕᕆᐅᖏᑦᑕ ᓄᓇᕗᑦ. ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᕐᔪᐊᑦ ᐊᑐᐃᓐᓇᐅᑎᑦᓯᓂᐊᖅᑐᖅ ᑖᒃᑯᓇᓐᖓᓪᓗᐊᖅ ᑐᓴᕋᑦᓴᓂᒃ ᒐᕙᒪᒃᑯᓐᓄᑦ ᐃᑲᔪᕈᑕᐅᓗᑎᒃ ᐆᒪᔪᐃᑦ ᐊᐅᓚᑕᐅᓂᖏᓐᓂᒃ ᐅᖓᑖᓂ ᑕᕆᐅᖏᑦᑕ ᓄᓇᕗᑦ.

15.3.5 ᐃᓚᖓ 9 ᐃᓛᒃᑯᑦ 5-ᒥ ᐊᑑᑎᓂᐊᖅᑐᖅ ᓇᐅᑐᐃᓐᓇᕐᒧᑦ ᓄᓇᕐᔪᐊᕐᒧᑦ ᐅᕝᕙᓗ ᐃᓅᓇᓱᐊᕐᓂᕐᒧᑦ ᑎᒍᒥᐊᖃᑎᒌᓐᓂᕐᒧᑦ ᐊᖏᖃᑎᒌᒍᑦ ᐊᑦᑐᐊᔪᖅ ᐆᒪᔪᐃᑦ ᐊᐅᓚᑕᐅᓂᖏᓐᓄᑦ ᑭᓪᓕᓕᓐᓂ I ᐊᒻᒪᓗ II.

15.3.6 ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᓇᓗᓴᐃᖅᓯᒍᓐᓇᖅᑐᖅ ᐆᒪᔪᕐᓂᒃ ᖃᐅᔨᓴᖅᑕᐅᒋᐊᓕᓐᓂᒃ ᓈᒻᒪᖏᑦᑐᓂᓪᓗ, ᕿᒥᕐᕈᕙᓪᓗᑎᒃ ᖃᐅᔨᓴᕈᒪᒍᑎᓂᒃ ᑐᑦᓯᕋᐅᑎᓂᒃ, ᐊᑲᐅᓈᕋᐃᑉᐸᓪᓗ. ᐃᓱᒪᓕᐅᕆᕙᓪᓗᑎᒃ ᐊᖏᖅᑕᐅᖁᔨᓂᕐᒥᒃ ᕿᐱᓗᑦᑕᐅᖁᔨᓂᕐᒥᓘᓐᓃᑦ ᑐᑦᓯᕋᐅᑎᓂᒃ ᐃᓗᐊᓂ ᑭᓪᓕᓖᑦ I ᐊᒻᒪᓗ II ᐊᒻᒪᓗ, ᖃᓄᖅᑑᕈᑎᖃᑐᐊᕈᑎᒃ ᐊᑦᑐᐊᔪᓂᒃ ᑭᓪᓕᓕᓐᓄᑦ I ᐊᒻᒪᓗ II. ᒐᕙᒪᒃᑯᑦ ᐃᓱᒪᑦᓴᖅᓯᐅᕈᑎᖃᕐᓂᐊᖅᑐᑦ ᐃᓱᒪᓕᐅᕈᑕᐅᔪᓂᒃ.

15.3.7 ᒐᕙᒪᒃᑯᑦ ᐃᓕᑕᖅᓯᒪᔪᑦ ᐱᒻᒪᕆᐅᓂᖏᓐᓂᒃ ᑐᓐᖓᕕᐅᔪᑦ ᐊᑦᑐᐊᓂᕐᒧᑦ ᖃᑭᒪᓇᓱᐊᕐᓂᕐᒧᓪᓗ ᓱᖏᖅᑑᑎᒋᔭᐅᔪᓄᑦ ᓄᓇᓕᓐᓄᑦ ᓄᓇᕗᒻᒥ ᑕᕆᐅᒥᐅᑕᕐᓄᑦ, ᐊᔾᔨᐅᖏᑦᑐᒥᓪᓗ ᐃᓱᒪᑦᓴᖅᓯᐅᕈᑎᖃᕐᓂᐊᖅᓱᑎᒃ ᑖᒃᑯᓄᖓ ᑐᓂᐅᖅᑲᐃᓕᕈᑎᒃ ᑮᓇᐅᔭᓕᐅᕋᓱᐊᓂᕐᒧᑦ ᐃᖃᓗᒐᓱᐊᓂᕐᒧᑦ ᓚᐃᓴᓐᓯᓂᒃ ᐃᓗᐊᓂ ᑭᓪᓕᓖᑦ I ᐊᒻᒪᓗ II. ᐊᑦᑐᐊᔪᑦ ᑐᑭᓕᒃ ᖃᓂᑦᓴᑐᓪᓘᓐᓃᑦ ᑭᓪᓕᒋᔭᐅᔪᒥᒃ. ᑐᓐᖓᕕᐅᔪᑦ ᐊᑑᑎᔭᐅᓂᐊᖅᑐᑦ ᖃᐅᔨᒪᑎᑦᓯᒍᑕᐅᓗᑎᒃ ᐊᔾᔨᒌᔾᔫᒥᔪᒥᒃ ᑐᓂᐅᖅᑲᐃᓂᕐᒥᒃ ᓚᐃᓴᓐᓯᓂᒃ ᓄᓇᓕᓐᓄᑦ ᓄᓇᕗᒻᒥ ᐊᓯᖏᓐᓂᓗ ᓄᓇᓕᖃᖅᑐᓂ ᑲᓇᑕᒥ ᒪᓕᑦᓯᐊᕐᓗᓂ ᑲᓇᑕᐅᑉ ᑎᒍᒥᐊᖃᑎᒌᓐᓂᕐᒧᑦ ᑐᓂᒪᓂᖏᓐᓄᑦ.

15.3.8 ᑐᑭᓯᓇᖅᑎᑲᓐᓂᕐᓗᒍ, ᓱᓇᓕᒫᖅ ᐅᕙᓃᑦᑐᖅ ᐃᓛᒃᑰᖅᑐᒥ ᐱᖃᓯᐅᔾᔨᓂᐊᖅᑐᖅ ᐃᓄᐃᑦ ᐊᑐᐃᓐᓇᖃᕐᓂᖓᓂᒃ ᐆᒪᔪᕐᓂᒃ ᐊᖑᓇᓱᓐᓂᖅ ᐱᔾᔪᑕᐅᓗᓂ ᑭᓪᓕᓕᓐᓂ I ᐊᒻᒪᓗ II.

ᑕᕆᐅᕐᒥᒃ ᐊᐅᓚᑦᓯᓂᖅ

15.4.1 ᓄᓇᕗᒻᒥ ᐊᕙᑎᓕᕆᓂᕐᒧᑦ ᕿᒥᕐᕈᔩᑦ, ᓄᓇᕗᒻᒥ ᐃᒪᓕᕆᓂᕐᒧᑦ ᑲᑎᒪᔩᑦ, ᓄᓇᕗᒻᒥ ᐸᕐᓇᐃᔩᑦ ᐊᒻᒪᓗ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᑲᑐᔾᔨᓗᑎᒃ, ᓄᓇᕗᒻᒥ ᑕᕆᐅᕐᒧᑦ ᑲᑎᒪᔨᐅᓗᑎᒃ, ᐅᕝᕙᓗ ᐅᖃᐅᔾᔨᒋᐊᖃᑎᒌᓪᓗᑎᒃ ᐃᓱᒪᓕᐅᖃᑎᒌᓪᓗᑎᓪᓗ ᐊᓯᖏᓐᓄᑦ ᒐᕙᒪᒃᑯᓐᓂ ᑎᒥᐅᔪᓄᑦ ᐱᔾᔪᑎᖃᖅᑐᓄᑦ ᑕᕆᐅᕐᒥᒃ.

ᓴᐳᔾᔭᐅᓯᒪᓂᖅ

15.5.1 ᐅᓇ ᐃᓛᒃᑰᖅᑐᖅ ᑐᑭᓯᔭᐅᓂᐊᖅᑐᖅ ᑐᓐᖓᕕᖃᕐᓗᓂ ᑲᓇᑕᒥ ᑎᒍᒥᐊᕐᓂᕐᒥᒃ, ᑎᒍᒥᐊᕐᓂᕐᒧᑦ ᐱᔪᓐᓇᐅᑎᓂᒃ, ᐊᒻᒪᓗ ᑲᓇᑕᒥ ᓄᓇᕐᔪᐊᕐᒧᑦ ᑐᓂᒪᓂᐅᔪᓄᑦ.