ARTICLE 4
ᓄᓇᕗᒻᒥ ᒐᕙᒪᓕᕆᓂᕐᒧᑦ ᐱᕙᓪᓕᐊᑎᑦᓯᓂᖅ
ᐃᓘᓐᓇᐃᓐᓅᖓᔪᖅ
4.1.1 ᒐᕙᒪᒃᑯᖏᕐ ᑲᓇᑕᐅᑉ ᐃᓱᒪᓕᐅᕆᓂᐊᕐᒪᑕ ᑲᓇᑕᐅᑉ ᒪᓕᒐᓕᐅᖅᑎᖏᓐᓄᑦ, ᒐᕙᒪᒃᑯᑦ ᐱᓂᐊᕐᓂᕆᓂᐊᖅᑕᖓᓂᒃ, ᒪᓕᒐᕐᒥᒃ ᓴᖅᑮᒍᒪᓗᑎᒃ, ᓇᓗᓇᐃᖅᑕᐅᓯᒪᓗᓂ ᐱᕕᑦᓴᖃᕐᓂᐅᔪᖅ, ᓄᑖᕐᒥᒃ ᓄᓇᕗᒻᒥᒃ, ᓇᒻᒥᓂᖅ ᒪᓕᒐᓕᐅᖅᑎᖃᕐᓗᓂ ᑭᓇᒃᑯᑐᐃᓐᓇᕐᓅᖓᔪᒥᓪᓗ ᒐᕙᒪᖃᕐᓗᑎᒃ, ᐃᒥᒃᑰᖅᑐᒥᒃ ᒐᕙᒪᒃᑯᓐᓂᒃ ᐊᒥᐊᒃᑯᖓᓂᒃ ᓄᓇᑦᓯᐊᑉ.
4.1.2 ᑕᐃᒪᐃᒻᒪᑦ, ᑲᓇᑕᐅᑉ ᐊᕕᑦᑐᖅᓯᒪᔪᓂᓗ ᒐᕙᒪᐃᑦ ᐊᒻᒪᓗ ᑐᓐᖓᕕᒃᑯᑦ ᓄᓇᕗᒻᒥ ᐋᔩᖃᑎᒌᓐᓂᐊᖅᑐᑦ ᒐᕙᒪᖃᕐᓂᕐᒧᑦ ᒪᓕᒐᕐᒥᒃ ᑲᒪᒍᑕᐅᓂᐊᖅᑐᒥᒃ ᓴᖅᑭᖅᑕᐅᓂᖓᓄᑦ ᓄᓇᕗᑦ. ᒐᕙᒪᖃᕐᓂᕐᒧᑦ ᒪᓕᒐᖅ ᓴᖅᑮᒍᑕᐅᓂᐊᕐᑐᖅ ᓇᓗᓇᐃᖅᑕᐅᓯᒪᔪᒥᒃ ᐅᓪᓗᕐᒥᒃ ᐃᓱᒪᓕᐅᕆᓂᕐᒧᑦ ᒐᕙᒪᒃᑯᑦ ᒪᓕᒐᓕᐅᖅᑎᖏᓐᓄᑦ ᐱᔭᕆᐊᓕᒻᒥᒃ ᓴᖅᑮᒍᑕᐅᓂᐊᕐᓗᓂ ᓄᓇᕗᒻᒥᒃ ᓄᓇᕘᓪᓗ ᒐᕙᒪᖓᓂᒃ, ᐊᐅᓪᓛᑎᑦᓯᓂᕐᒧᓪᓗ ᐊᐅᓚᓂᖅᑕᖃᕐᓗᓂ. ᑐᕌᒐᕆᔭᐅᔪᖅ ᐊᖏᖃᑎᒌᑦᑐᓐᓄᑦ ᑕᐃᓐᓇ ᐅᓪᓗᖅ ᐊᑕᐅᓯᒃᑰᖃᑎᖃᕐᓂᐊᕆᐊᖓ ᐃᓱᒪᓕᐅᕈᑕᐅᓂᖓᓂᒃ ᓂᕈᐊᕈᑕᐅᓂᕐᒧᑦ ᒪᓕᒐᕐᒥᒃ ᑲᓇᑕᐅᑉ ᒪᓕᒐᓕᐅᕐᕕᖓᓄᑦ ᐋᒡᒐᐅᒐᓗᐊᖅ ᑐᓐᖓᕕᒃᑯᑦ ᓄᓇᕗᒻᒥ ᐊᖏᖃᑎᖃᖅᐸᑕ ᐊᓯᐊᒍᑦ. ᒐᕙᒪᖃᕐᓂᕐᒧᑦ ᒪᓕᒐᖅ ᐱᕕᖃᖅᑎᑦᓯᓂᐊᕐᒥᔪᖅ ᓴᓐᖏᓂᐅᔪᓂᒃ ᓄᓇᕗᑦ ᒐᕙᒪᒃᑯᖏᓐᓂᒃ, ᓇᓗᓇᐃᔭᖅᓯᒪᔪᓂᒃ ᑐᓐᖓᕕᐅᔪᓂᒃ ᐊᑦᑐᐊᔪᓂᒃ ᑮᓇᐅᔭᖃᖅᑎᑕᐅᓂᖓᓄᑦ ᓄᓇᕗᑦ ᒐᕙᒪᖓᑕ, ᑭᓪᓕᖃᕐᓂᐅᔪᓂᓪᓗ ᐱᕕᑦᓴᖃᕐᓂᕐᒧᑦ ᑕᕝᕙᕈᖅᐸᓪᓕᐊᓂᖓᓄᑦ ᐊᐅᓚᓂᖓᓄᓪᓗ ᓄᓇᕗᒻᒥ ᒐᕙᒪᐃᑦ. ᒐᕙᒪᖃᕐᓂᕐᒧᑦ ᒪᓕᒐ ᐱᔭᕇᔭᖅᑕᐅᓛᖅᑐ ᐃᓄᐃᑦ ᐊᖏᕐᓂᕐᒧᑦ ᓂᕈᐊᕐᓂᖃᓚᐅᓐᖏᓐᓂᖏᓐᓂ. ᑐᕌᒐᕆᔭᐅᔪᖅ ᐊᖏᖃᑎᒌᓐᓄᑦ ᐱᔭᕇᕋᔭᕆᐊᑦᓴᖅ ᒐᕙᒪᓕᕆᓂᕐᒧᑦ ᒪᓕᒐᕐᒥᒃ ᐅᖓᑖᓂᐅᓐᖏᑦᑐᖅ ᐄᑉᐳᕉᓪ 1, 1992.
4.1.3 ᓇᓪᓕᐊᑐᐃᓐᓇᖅ ᒐᕙᒪᖃᕐᓂᕐᒧᑦ ᒪᓕᒐᖅ ᐅᕝᕙᓘᓐᓃᑦ ᒪᓕᒐᖅ ᐊᐅᓚᔾᔭᒋᐊᖅᑕᐅᔪᖅ ᑐᓐᖓᕕᖃᖅᓱᓂ ᒐᕙᒪᖃᕐᓂᒧᑦ ᒪᓕᒐᕐᒥᒃ ᐊᑕᐅᓯᒃᑰᖃᑎᖃᕆᐊᓕᒃ ᐅᕝᕙᓗ ᐃᓚᒋᔭᐅᓗᓂ ᐆᒧᖓ ᐊᖏᕈᑎᒧᑦ ᐅᕝᕙᓗ ᓇᐅᑐᐃᓐᓇᕐᒧᑦ ᒪᓕᒐᕐᒧᑦ ᐊᖏᖅᑕᐅᓂᖓᓄᑦ ᐆᒪ ᐊᖏᕈᑎᐅᑉ. ᓇᓪᓕᑐᐃᓐᓇᖏᑦ ᒐᕙᒪᖃᕐᓂᕐᒧᑦ ᒪᓕᒐᖅ ᐅᕝᕙᓗ ᓱᓇᑐᐃᓐᓇᖅ ᒪᓕᒐᕐᒦᑦᑐᖅ ᐊᐅᓚᔾ.ᒋᐊᖅᑕᐅᔪᖅ ᑐᓐᖓᕕᒋᑦᓱᒍ ᒐᕙᒪᖃᕐᓂᕐᒧᑦ ᒪᓕᒐᖅ ᑐᕌᒐᓕᒃ ᓄᓇᑖᕐᓂᕐᒧᑦ ᐊᖏᕈᑎᒥᒃ ᐅᕝᕙᓗ ᐊᖏᖃᑎᒌᓐᓂᒃᑯᑦ ᐱᔪᓐᓇᐅᑏᑦ ᐃᓗᐊᓂ ᑐᑭᖏᑦᑕ 35 ᑐᓐᖓᕕᔾᔪᐊᖅ ᒪᓕᒐᕐᓄᑦ, 1982.