ARTICLE 39

ᐃᓄᐃᑦ ᑎᒥᖁᑎᖏᑦ

ᐃᓘᓐᓇᐃᓐᓅᖓᔪᖅ

39.1.1 ᐅᓇ ᐃᓛᒃᑰᖅᑐᖅ ᐊᑑᑎᔪᖅ ᑐᓐᖓᕕᒃᑯᓐᓄᑦ ᐊᒻᒪᓗ ᐃᓘᓐᓇᖏᓐᓄᑦ ᑎᒥᐅᔪᓄᑦ ᓴᓐᖏᓂᕐᒨᖓᔪᓄᑦ, ᐊᐅᓚᓂᐅᔪᓄᑦ ᐱᔪᓐᓇᕐᓂᖃᕐᓂᐅᔪᓄᓪᓘᓐᓃᑦ ᑐᓂᔭᐅᔪᓄᑦ ᐊᖏᖃᑎᒌᒍᑎᑎᒍᑦ ᐊᑖᓂ ᑎᑎᕋᖅᓯᒪᔪᖅ 39.1.3.

39.1.2 ᐃᓄᐃᑦ ᐊᐅᓚᑦᓯᓂᐊᖅᑐᑦ ᑐᓐᖓᕕᒻᒥᒃ ᖃᐅᔨᓴᑦᓯᐊᕐᓗᑎᓪᓗ ᐊᐅᓚᓂᖃᕋᓗᐊᕐᒪᖔᖅ ᑐᓐᖓᕕᖃᕐᓗᓂ ᐆᒥᖓ ᐃᓛᒃᑰᖅᑐᒥᒃ.

39.1.3 ᑐᓐᖓᕕᒃᑯᑦ ᐃᒪᐃᑦᓱᓐᓇᖅᑐᑦ, ᐃᒪᐃᓕᖓᓂᖅᑎᒍᑦ ᒪᓕᒐᖅᑎᒍᓪᓗ ᓈᒻᒪᒋᔭᕐᒥᑎᒍᑦ, ᑎᓕᓯᓗᑎᒃ ᑎᒥᐅᔪᒥᒃ ᑎᒍᒥᐊᕐᓗᓂ ᓇᐅᑐᐃᓐᓇᕐᒥᒃ ᓴᓐᖏᓂᐅᔪᒥᒃ, ᐊᐅᓚᓂᕐᒥᒃ ᐅᕝᕙᓗ ᐱᔪᓐᓇᕐᓂᖓᓐᓂᒃ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐊᑖᓂ ᐊᖏᖃᑎᒌᒍᑎᑎᐅᑉ, ᑎᒥᐅᔪᖅ ᐱᔪᓐᓇᕋᔭᖅᐸᑦ ᑎᒍᒥᐊᕐᓂᕐᒥᒃ ᓴᓐᖏᓂᕐᒥᒃ, ᐊᐅᓚᓂᕐᒥᒃ, ᐱᔪᓐᓇᕐᓂᕐᒥᓪᓘᓐᓃᑦ.

39.1.4 ᑐᓐᖓᕕᒃᑯᑦ ᓄᖅᑲᑎᑦᓯᒍᓐᓇᖅᑐᑦ ᑎᓕᓯᓯᒪᓂᕐᒥᓂᒃ ᐊᑖᓂ ᑎᑎᕋᖅᓯᒪᔪᖅ 39.1.3 ᖃᖓᑐᐃᓐᓇᑦᓯᐊᖅ.

39.1.5 ᑐᓐᖓᕕᒃᑯᑦ ᓴᖅᑮᓂᐊᖅᑐᑦ ᑭᓇᒃᑯᑐᐃᓐᓇᕐᓄᑦ ᑎᑎᕋᖅᓯᒪᔪᓂᒃ ᐃᓘᓐᓇᖏᓐᓂᒃ ᑎᒥᐅᔪᑦ ᑎᓕᔭᐅᔪᑦ ᑖᑦᓱᒪ ᐊᑖᓂ ᑎᑎᕋᖅᓯᒪᔪᖅ 39.1.3 ᐊᒻᒪᓗ ᑲᑐᔾᔨᓪᓗᑎᒃ ᑐᓕᔭᐅᖃᑎᒌᑦᑐᑦ ᑎᒥᐅᔪᑦ ᑎᒍᒥᐊᖅᑐᑦ ᓴᓐᖏᓂᖏᓐᓂᒃ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᑐᓐᖓᕕᒋᑦᓱᒍ ᑎᑎᕋᖅᓯᒪᔪᖅ 40.2.12, ᑎᑎᕋᖅᓯᒪᔪᑦ ᓇᓗᓇᐃᖅᓯᓂᐊᖅᑐᑦ ᓴᓐᖏᓂᐅᔪᓂᒃ, ᐊᐅᓚᓂᐅᔪᓂᒃ ᐱᔪᓐᓇᕐᓂᐅᔪᓂᓪᓘᓐᓃᑦ ᐊᑖᓂ ᐊᖏᖃᑎᒌᒍᑎᐅᑉ ᓇᓕᐊᒃ ᑎᓕᔭᐅᓯᒪᒻᒪᖓᖅ, ᑎᑎᕋᖅᑕᐅᓯᒪᔪᓪᓗ ᐅᓪᓗᒥᒧᑦ ᐊᖑᒻᒪᑎᓪᓗᑎᒃ.

39.1.6 ᑐᓐᖓᕕᒃᑯᑦ ᐊᑐᓂᓪᓗ ᑎᒥᐅᔪᑦ ᐋᖅᑭᑦᑕᐅᓯᒪᓂᐊᖅᑐᑦ ᐊᐅᓚᓂᖃᕐᓗᑎᓪᓗ ᑭᐅᔪᓐᓇᕐᓂᕐᒥᒃ ᑖᒃᑯᓄᖓ, ᐊᒻᒪᓗ ᐃᓱᒪᖅᓱᓇᖅᑐᒃᑯᑦ ᐊᐅᓚᑕᐅᓗᑎᒃ ᐃᓄᓐᓄᑦ.

39.1.7 ᑐᓐᖓᕕᒃᑯᑦ ᐊᒻᒪᓗ ᐃᓘᓐᓇᑎᒃ ᑎᒥᐅᔪᑦ ᑐᓐᖓᕕᖃᕐᓂᐊᑦᑐᑦ ᒪᓕᒐᕐᓂᒃ ᐃᓘᓐᓇᐃᓐᓄᑦ ᐊᑑᑎᔪᓂᒃ ᐋᒡᒐᐅᒐᓗᐊᖅ ᓇᓗᓇᐃᖅᑕᐅᓯᒪᑐᐊᖅᐸᑦ ᐊᖏᖃᑎᒌᒍᑎᑎᒍᑦ.

39.1.8 ᕐᑳᖓᒍᒃᑲᓐᓂᖅ ᓇᐅᑐᐃᓐᓇᐅᑉ ᓴᓐᖏᓂᐅᑉ, ᐊᐅᓚᓂᐅᑉ ᐱᔪᓐᓇᕐᓂᐅᓪᓘᓐᓃᑦ ᑎᒥᐅᔪᒧᑦ ᑎᓕᔭᐅᔪᒧᑦ ᐊᑖᓂ ᑎᑎᕋᖅᓯᒪᔪᖅ 39.1.3, ᑎᒥᐅᔪᖅ ᐊᑑᑎᒍᓐᓇᖅᑐᖅ ᐊᓯᖏᓐᓂᒃ ᓴᓐᖏᓂᐅᔪᓂᒃ, ᐊᐅᓚᓂᐅᔪᓂᒃ ᐱᔪᓐᓇᕐᓂᐅᔪᓂᓪᓘᓐᓃᑦ ᐊᐃᑐᖅᑕᐅᒍᑎᒋᓯᒪᔭᒥᓂᒃ ᐊᓯᐊᒍᑦ.

39.1.9 ᒐᕙᒪᒃᑯᑦ ᐊᑭᓖᔪᑦᓴᒫᖑᓐᖏᑦᑐᑦ ᐃᓄᓐᓄᑦ ᓱᕋᑦᑕᐅᔪᓄᑦ ᐊᓐᓇᐃᔭᐅᔪᓄᓪᓘᓐᓃᑦ ᐃᓄᓐᓄᑦ ᐱᔾᔪᑕᐅᓪᓗᓂ ᓇᐅᑐᐃᓐᓇᖅ ᐊᐅᓚᓂᐅᔪᓂ ᐃᓚᑰᑎᑦᓯᓂᕐᓘᓐᓃᑦ ᐅᕝᕙᓗ ᑐᓐᖓᕕᒃᑯᓐᓄᑦ ᑎᒥᐅᔪᒧᓪᓘᓐᓃᑦ ᑲᔪᓯᑎᑦᓯᓂᖏᑦᑐᒧᑦ ᓴᓐᖏᓂᕐᒥᒃ, ᐊᐅᓚᓂᕐᒥᒃ ᐱᔪᓐᓇᕐᓂᐅᔪᒥᓪᓘᓐᓃᑦ ᐱᔭᐅᓯᒪᔪᒥᒃ ᐊᑖᓂ ᐊᖏᖃᑎᒌᒍᑎᐅᑉ.

39.1.10 ᐊᐳᖅᓯᒪᔾᔪᑕᐅᖏᓪᓗᓂ ᐱᔪᓐᓇᕐᓂᖏᓐᓄᑦ ᐃᓄᐃᑦ ᐊᑦᑐᐊᔪᓄᑦ ᑐᓐᖓᕕᒃᑯᓐᓄᑦ ᐅᕝᕙᓗ ᑎᒥᐅᔪᒧᑦ, ᐊᑐᓂᑦ ᓴᓐᖏᓂᐅᔪᖅ, ᐊᐅᓚᓂᖅ ᐱᔪᓐᓇᕐᓂᐅᔪᕐᓘᓐᓃᑦ ᐊᑑᑎᔭᐅᔪᖅ ᑐᓐᖓᕕᒃᑯᓐᓄᑦ ᐅᕝᕙᓗ ᑎᒥᐅᔪᓄᑦ ᐊᖏᖃᑎᒌᒍᑎᐅᑉ ᐊᑖᓂ ᑕᑯᓐᓇᖅᑕᐅᓂᐊᖅᑐᖅ ᐊᑑᑎᔪᒥᓂᐅᒋᐊᖓ ᑭᒡᒐᖅᑐᕐᓗᑎᒃ ᐊᒻᒪᓗ ᐱᕚᓪᓕᕈᑕᐅᓂᐊᖅᑎᓪᓗᒍ ᐃᓄᓐᓄᑦ.

39.1.11 ᐃᓄᐃᑦ ᐊᑭᓖᑎᑕᐅᓇᓱᐊᕆᐊᖃᓐᖏᓚᑦ ᑐᓐᖓᕕᓕᐊᖑᓯᒪᓂᖓᓄᑦ ᑐᓐᖓᕕᒃ ᐅᕝᕙᓘᓐᓃᑦ ᑲᑐᔾᔨᖃᑎᒌᑦ ᓴᓐᖏᓂᖃᕐᕕᖃᖅᑐᑦ, ᐊᐅᓚᑦᓯᒍᑎᓂ ᓈᓚᒐᐅᓂᕐᒥᓪᓗ ᐊᑐᖅᑕᐅᔪᒥᒃ ᐊᖏᖃᑎᒌᒍᑎᒃᑯᑐᐊᖅ ᐱᔾᔪᑕᐅᓪᓗᓂ ᓴᓐᖏᓂᖃᕐᓂᕐᒧᑦ ᐊᐅᓚᑦᓯᒍᑕᐅᔪᖅ ᐅᕝᕙᓘᓐᓃᑦ ᐊᐅᓚᑦᓯᒍᑕᐅᒋᐊᓕᒃᑯᑦ ᑭᒡᒐᖅᑐᐃᓗᓂ ᐊᒻᒪᓗ ᐃᑲᔫᑎᒃᓴᓂᒃ ᐃᓄᖕᓄᑦ.