ARTICLE 34
ᐃᓅᓂᕐᒨᖓᔪᑦ ᓱᓇᒃᑯᑏᑦ ᐃᑦᓴᕐᓂᑕᐃᓪᓗ
ᑐᑭᖏᑦ ᑐᑭᓯᓇᖅᑎᑦᓯᒋᐊᕈᑏᓪᓗ
34.1.1 ᐅᕙᓂ ᐃᓛᒃᑯᖅᑐᒥ:
“ᐃᓅᓂᕐᒨᖓᔪᖅ ᓱᓇᒃᑯᑎ” ᑐᑭᓕᒃ ᓱᓇᒃᑯᑎ ᓴᓇᔭᐅᓯᒪᔪᖅ, ᐋᖅᑭᒋᐊᖅᑕᐅᓯᒪᔪᖅ ᐊᑐᖅᑕᐅᓯᒪᔪᕐᓘᓐᓃᑦ ᐃᓄᒻᒧᑦ ᐊᒻᒪᓗ ᓄᐊᑕᐅᓯᒪᑦᓱᓂ ᑎᑎᕋᖅᑕᐅᓯᒪᑦᓱᓂᓗ ᑐᑭᖓᓐᓄᑦ ᐊᒻᒪᓗ ᓇᓗᓇᐃᔭᐃᓂᕐᒧᑦ ᖃᐅᔨᓴᖅᑕᐅᓂᖏᓐᓄᑦ ᐃᓄᐃᑦ ᐱᖅᑯᓯᖏᑦᑕ;
“ᐃᑦᓴᕐᓂᑕᐃᑦ ᓱᓇᒃᑯᑏᑦ” ᑐᑭᓕᒃ ᑎᑎᕋᖅᑕᐅᓯᒪᓐᖏᑦᑐᑦ ᐅᕝᕙᓗ ᐊᔾᔨᐅᖏᑦᑐᖅ ᓱᓇᒃᑯᑎ ᐅᓂᒃᑳᑦᓴᐅᑦᓱᓂ ᑕᑯᔾᔪᑕᐅᒍᓐᓇᕐᓗᓂ ᐊᑑᑎᓯᒪᔪᓂᒃ.
34.1.2 ᓇᐅᑐᐃᓐᓇᖅ ᐅᕙᓃᑦᑐᖅ ᐃᓛᒃᑰᖅᑐᒥ ᑐᑭᓕᐅᖅᑕᐅᓂᐊᖅᑐᖅ ᐊᐳᖅᓯᒪᑎᓪᓗᒍ ᐃᓛᒃᑯᑦ 33-ᒧᑦ.
34.1.3 ᐅᓇ ᐃᓛᒃᑰᖅᑐᖅ ᐊᑑᑎᓂᐊᖅᑐᖅ ᑕᕆᐅᕐᒦᑦᑐᓄᑦ.
ᐃᓘᓐᓇᐃᓐᓅᖓᔪᖅ
34.2.1 ᐃᓅᓂᕐᒨᖓᔪᑦ ᐊᐅᓚᓂᐅᔪᑦ ᓄᓇᕗᒻᒥ ᐊᐅᓚᑕᐅᔪᑦ ᒐᕙᒪᒃᑯᓐᓄᑦ ᒪᓕᓐᓂᐊᖅᑐᑦ, ᐊᑦᓯᓂᖅᐹᖓᓂ, ᐃᖅᑲᓇᐃᖅᔭᑎᑦᓯᓂᕐᒧᑦ ᐃᓕᓐᓂᐊᑎᑦᓯᓂᕐᒧᓪᓗ ᐱᕕᖃᖅᑎᑦᓯᒍᑕᐅᔪᓄᑦ ᓇᓗᓇᐃᔭᖅᑕᐅᓯᒪᔪᑦ ᐃᓛᒃᑯᑦ 23-ᒥ.
ᐃᓅᓂᕐᒨᖓᔪᑦ ᓱᓇᒃᑯᑏᑦ
34.3.1 ᑲᓇᑕᒥ ᑕᑯᔭᒐᖃᕐᕕᔾᔪᐊᖅ ᐊᒻᒪᓗ ᓇᐅᑐᐃᓐᓇᐃᑦ ᐊᕕᑦᑐᖅᓯᒪᔪᕐᔪᐊᕐᓂ ᒐᕙᒪᐅᔪᑦ ᐃᓅᓂᕐᒨᖓᔪᑦ ᑎᒥᖁᑎᖏᑦ ᖃᖓᓕᒫᑦᓯᐊᖅ ᐊᑐᖅᑐᐊᖅᑕᐅᑎᑦᓯᒍᓐᓇᕆᐊᓖᑦ ᑭᓪᓕᖏᓐᓄᑦ ᖃᑦᓯᐅᒍᓐᓇᕐᓂᖏᑦᑕ ᐃᓅᓂᕐᒨᖓᔪᑦ ᓱᓇᒃᑯᑏᑦ ᑎᒥᐅᔪᓄᑦ ᓄᓇᕗᒻᒥ ᓲᕐᓗ ᐸᐸᑦᓯᔨᒃᑯᓐᓄᑦ.
34.3.2 ᐸᐸᑦᓯᔩᑦ ᑐᑦᓯᕋᖅᐸᑕ ᐊᑐᖅᑐᐊᕈᒪᓗᑎᒃ ᓇᐅᑐᐃᓐᓇᕐᓂᒃ ᐃᓅᓂᕐᒨᖓᔪᓂᒃ ᓱᓇᒃᑯᑎᓂᒃ ᐱᓯᒪᔪᓂᒃ ᐅᕝᕙᓗ ᐊᑦᑐᐊᔪᓂᒃ ᓄᓇᕗᒻᒧᑦ, ᐊᒻᒪᓗ ᐸᐸᑕᐅᓗᑎᒃ ᒐᕙᒪᑐᖃᒃᑯᓐᓄᑦ ᐊᕕᑦᑐᖅᓯᒪᔪᕐᔪᐊᓂᓘᓐᓃᑦ ᒐᕙᒪᓄᑦ ᐃᓅᓂᕐᒨᖓᔪᓕᕆᔨᓄᑦ ᑎᒥᐅᔪᓄᑦ, ᐱᖃᓯᐅᑎᑦᓱᑎᒃ ᑲᓇᑕᒥ ᑕᑯᔭᒐᖃᕐᕕᔾᔪᐊᖅ, ᑲᓇᑕᒥ ᐃᑦᓴᕐᓂᑕᓕᕆᔩᑦ, ᐊᒻᒪᓗ ᑲᓇᑕᒥ ᒥᓐᖑᐃᕐᓯᕐᕕᓕᕆᔨᒃᑯᑦ ᐅᕝᕙᓗ ᐊᕕᑦᑐᖅᓯᒪᔪᕐᔪᐊᓂ ᒐᕙᒪᓄᑦ ᑎᒥᐅᔪᑦ, ᑕᐃᒫᒃ ᑐᑦᓯᕋᖅᑐᖃᖅᐸᑦ ᕿᐱᓗᑦᑕᐅᒋᐊᖃᓐᖏᑦᑐᑦ ᐋᒡᒐᐅᒐᓗᐊᖅ ᐃᒪᐃᑉᐸᑦ:
(a) ᐸᐸᑦᓯᔩᑦ ᐸᐸᑦᓯᒍᓐᓇᖏᑉᐸᑕ ᓱᓇᒃᑯᑎᒥᒃ ᓱᕋᑦᑎᑦᑕᐃᓕᑎᓪᓗᒍ, ᐱᖃᓯᐅᑎᑦᓱᓂ ᓂᓪᓚᓱᓐᓂᓕᒻᒦᓐᓂᖓᓂᒃ ᐊᐅᓚᑦᓯᒍᓐᓇᕐᓂᖅ ᐊᑦᓱᖏᖅᓯᒪᔪᒦᑦᓯᐊᕐᓂᕐᓗ;
(b) ᐸᐸᑦᓯᔩᑦ ᐊᑐᐃᓐᓇᐅᑎᑦᓯᒍᓐᓇᖏᑉᐸᑕ ᓱᓇᒃᑯᑎᒥᒃ ᐊᑕᐅᓯᒃᑰᖃᑎᖃᖅᑎᓪᓗᒍ ᑐᑭᓯᒪᓇᓱᐊᕐᓂᒨᖓᔪᓂᒃ ᐅᕝᕙᓗ ᑭᓇᒃᑯᑐᐃᓐᓇᕐᓄᑦ ᐱᔪᒪᔭᕆᔭᐅᓗᑎᒃ;
(c) ᑎᒥᐅᔪᖅ ᐊᑐᖅᑐᐊᖅᑕᐅᑎᑦᓯᒍᓐᓇᖏᑉᐸᑦ ᓱᓇᒃᑯᑎᒥᒃ ᐱᔾᔪᑕᐅᓪᓗᓂ ᐃᒪᐃᓕᖓᓂᐅᔪᑦ ᒪᓕᒋᐊᓖᓪᓘᓐᓃᑦ ᐱᔭᐅᒋᐊᓐᖓᓕᖅᑎᓪᓗᒍ ᒐᕙᒪᐅᓐᖏᑦᑐᓂᒃ;
(d) ᑲᓇᑕᒥ ᑕᑯᔭᒐᖃᕐᕕᔾᔪᐊᖅ, ᑲᓇᑕᒥ ᐃᑦᓴᕐᓂᑕᓕᕆᔩᑦ, ᑲᓇᑕᒥ ᒥᓐᖑᐃᕐᓯᕐᕕᓕᕆᔩᑦ ᐅᕝᕙᓗ ᐊᕕᑦᑐᖅᓯᒪᔪᕐᔪᐊᓂ ᒐᕙᒪᓄᑦ ᑎᒥᐅᔪᑦ ᐱᔭᕆᐊᖃᖅᐸᑕ ᓱᓇᒃᑯᑎᒥᒃ;
(i) ᓇᒻᒥᓂᖅ ᑕᑯᑦᓴᐅᑎᑦᓯᒍᓐᓇᕐᓂᖅ ᖃᐅᔨᓴᕐᓂᕐᓘᓐᓃᑦ, ᐅᕝᕙᓗ,
(ii) ᐱᔾᔪᑕᐅᓗᓂ ᐊᔾᔨᐅᖏᑦᑑᓂᖓ ᓱᓇᒃᑯᑎᐅᑉ;
(e) ᖃᓄᐃᑦᑑᓂᖓ ᓱᓇᒃᑯᑎᐅᑉ ᐱᔾᔪᑕᐅᓪᓗᓂ ᓅᑕᑦᓴᐅᖏᑉᐸᑦ; ᐅᕝᕙᓗ
(f) ᓱᓇᒃᑯᑎ ᐊᑐᖅᑐᐊᖅᑕᐅᑎᑕᐅᓯᒪᔪᒥᓂᐅᑉᐸᑦ, ᐸᐸᑦᓯᓗᑎᓪᓗ, ᓯᓚᑖᓃᑦᑐᑦ ᒐᕙᒪᑐᖃᒃᑯᑦ ᐅᕝᕙᓗ ᐊᕕᑦᑐᖅᓯᒪᔪᕐᔪᐊᓂ ᒐᕙᒪᓄᑦ ᑎᒥᐅᔪᑦ.
34.3.3 ᑎᒥᐅᔪᖅ ᐅᖃᐅᓯᐅᔪᖅ ᑎᑎᕋᖅᓯᒪᔪᒥ 34.3.2 ᒪᓕᑉᐸᑦ ᑐᑦᓯᕌᖑᔪᒥᒃ ᐸᐸᑦᓯᔨᓄᑦ, ᑎᒥᐅᔪᖅ ᐊᑕᑎᑦᓯᒍᓐᓇᖅᑐᖅ ᐃᒪᐃᓕᖓᓂᐅᔪᓂᒃ ᒪᓕᒋᐊᓕᓐᓂᓪᓗ ᑐᓐᖓᕕᖃᕐᓗᑎᒃ ᖃᐅᔨᒪᔪᒻᒪᕆᑦᑎᒍᑦ ᑎᒥᐅᔪᒃᑯᓪᓗ ᐊᐅᓚᓂᐅᓲᓄᑦ, ᐱᖃᓯᐅᑎᑦᓱᑎᒃ ᐃᒪᐃᓕᖓᓂᐅᔪᑦ ᒪᓕᒋᐊᓕᓪᓗ ᖃᓄᑎᒌᕐᓂᖓᓄᑦ ᐃᓱᓕᓐᓂᖓᓄᓪᓘᓐᓃᑦ ᐊᑐᖅᑐᐊᕐᓂᐅᑉ.
34.3.4 ᐸᐸᑦᓯᔩᑦ ᑐᑦᓯᕋᖅᐸᑕ ᐊᑐᑦᑐᐊᖅᑕᒥᒃ ᓱᓇᒃᑯᑎᒥᒃ ᐅᖃᐅᓯᐅᔪᒥᒃ ᑎᑎᕋᖅᓯᒪᔪᒥ 34.3.2, ᑭᓯᐊᓂ ᓱᓇᒃᑯᑎ ᐊᑐᖅᑐᐊᖅᑕᐅᑉᐸᑦ ᑎᒥᐅᔪᒧᑦ ᐊᓯᐊᓄᑦ ᒐᕙᒪᑐᖃᒃᑯᓐᓂ ᐊᕕᑦᑐᖅᓯᒪᔪᕐᔪᐊᓂᓘᓐᓃᑦ ᑎᒥᐅᔪᑦ, ᐸᐸᑦᓯᔩᑦ ᓯᕗᓪᓕᐅᔾᔭᐅᓂᐊᖅᑐᑦ ᑭᓇᒃᑯᓕᒫᓄᑦ ᐱᓗᑎᒃ ᐊᑐᖅᑐᐊᕐᓂᕐᒥᒃ ᐅᖃᐅᓯᐅᔪᒥᒃ ᓱᓇᒃᑯᑎᒥᒃ, ᑐᓐᖓᕕᒋᓗᒋᑦ ᒪᓕᒋᐊᓖᑦ ᐃᒪᐃᓕᖓᓂᐅᒋᐊᓖᓪᓘᓐᓃᑦ ᓇᓗᓇᐃᔭᖅᑕᐅᓯᒪᔪᑦ ᑎᑎᕋᖅᓯᒪᔪᒥ 34.3.2 ᐊᒻᒪᓗ 34.3.3.
ᐃᑦᓴᕐᓂᑕᐃᑦ ᓱᓇᒃᑯᑏᑦ
34.4.1 ᐸᐸᑦᓯᔩᑦ ᑐᑦᓯᕋᖅᐸᑕ ᐊᑐᖅᑐᐊᕈᒪᓗᑎᒃ ᐃᑦᓴᕐᓂᑕᓪᓚᕆᓐᓂᒃ ᐊᑦᑐᐊᔪᓂᒃ ᓄᓇᕗᒻᒧᑦ ᑕᑯᑦᓴᐅᑎᒍᒪᓪᓗᒋᑦ, ᐅᕝᕙᓗ ᓇᓕᖅᑲᖏᑦ ᐃᑦᓴᕐᓂᑕᐃᑦ ᖃᐅᔨᓴᖅᑕᐅᒍᒪᓪᓗᑎᒃ, ᑲᓇᑕᒥ ᐃᑦᓴᕐᓂᑕᓕᕆᔨᒃᑯᓐᓂᒃ, ᑲᓇᑕᒥ ᑕᑯᔭᒐᖃᕐᕕᔾᔪᐊᕐᒥ ᐅᕝᕙᓗ ᓇᐅᑐᐃᓐᓇᕐᓂ ᐊᓯᖏᓐᓂ ᐊᕕᑦᑐᖅᓯᒪᔪᕐᔪᐊᓂ ᑎᒥᐅᔪᓂ ᐃᑦᓴᕐᓂᑕᓕᕆᔨᓂ, ᑐᑦᓯᕌᖑᔪᑦ ᑕᑯᓐᓇᖅᑕᐅᓂᐊᑦᑐᑦ ᐊᑐᖅᑐᐊᖅᑎᒍᒥᓇᕆᐊᖏᑦ ᐊᓯᖏᓐᓂᒃ ᑐᑦᓯᕋᐅᑎᑕᕋᓗᐊᖅᑎᓪᓗᒍ ᑎᒥᐅᔪᓂᒃ.