ARTICLE 24

ᒐᕙᒪᒃᑯᓐᓂᒃ ᑳᑦᑐᓛᑦ

ᑐᑭᖏᑦ

24.1.1 ᐅᕙᓂ ᐃᓛᒃᑰᖅᑐᒥ

“ᒐᕙᒪ” ᑐᑭᓕᒃ ᒐᕙᒪᒃᑯᖏᑦ ᑲᓇᑕᐅᑉ ᐅᕝᕙᓘᓐᓃᑦ ᐊᕕᑦᑐᖅᓯᒪᔪᓂ ᒐᕙᒪᐃᑦ;

“ᒐᕙᒪᒃᑯᓐᓂ ᑳᑦᑐᓛ” ᑐᑭᓕᒃ ᑳᑦᑐᓛ, ᐊᓯᐊ ᑳᑦᑐᓛ ᒐᕙᒪᒃᑯᓐᓂ ᐃᖅᑲᓇᐃᔮᑉ ᑕᐃᒫᒃ ᑐᑭᓕᐅᖅᑕᐅᓯᒪᒻᒪᑦ ᐃᓛᒃᑯᑦ 23-ᒥ, ᐅᑯᓄᖓ ᒐᕙᒪᒃᑯᓐᓄᑦ ᐊᐃᑉᐸᐃᖏᓐᓄᓪᓗ ᐊᓯᖏᓐᓄᑦ ᒐᕙᒪᐃᑦ ᐅᕝᕙᓗ ᓇᐅᑐᐃᓐᓇᖅ ᒐᕙᒪ ᐱᓇᓱᐊᕐᓂᕐᒧᑦ ᓱᓇᒃᑯᑎᓂᒃ ᐱᔨᑦᓯᕋᐅᑎᓂᓪᓘᓐᓃᑦ, ᐱᖃᓯᐅᑎᑦᓱᑎᒃ

(a) ᑲᑦᑐᓛ ᓱᓇᒃᑯᑎᖃᖅᑎᑕᐅᓂᕐᒧᑦ,

(b) ᓴᓇᓂᕐᒧᑦ ᑳᑦᑐᓛᑦ

(c) ᑳᑦᑐᓛᑦ ᐱᔨᑦᓯᕋᕐᓂᕐᒨᖓᔪᑦ, ᐊᒻᒪᓗ

(d) ᐊᑐᖅᑐᐊᕈᑏᑦ;

“ᒐᕙᒪᒃᑯᑦ ᑲᓇᑕᒥ” ᑐᑭᓕᒃ ᐃᓘᓐᓇᑎᒃ ᒐᕙᒪᑐᖃᒃᑯᓐᓂ ᒥᓂᔅᑕᐅᕕᐅᔪᑦ ᐊᒻᒪᓗ ᒥᓂᔅᑕᐅᕕᐅᔪᓂ ᑎᒥᐅᔪᑦ ᑯᐊᐳᕇᓴᐃᑦ ᑎᑎᕋᖅᓯᒪᔪᑦ ᐃᓚᒍᖅ I ᐊᒻᒪᓗ II, ᐊᒻᒪᓗ ᑐᓐᖓᕕᐅᔪᑦ ᒐᕙᒪᒃᑯᓐᓂ ᑯᐊᐳᕇᓴᐃᑦ ᑎᑎᕋᖅᓯᒪᔪᑦ ᐃᓚᒍᖅ III-ᒥ, ᐃᓚᖓ 1 ᑮᓇᐅᔭᐃᑦ ᐊᐅᓚᑕᐅᓂᖏᓐᓄᑦ ᒪᓕᒐᕐᔪᐊᕐᒥ RSC 1985, ᓵ2b F-11;

“ᐃᓄᐃᑦ ᑎᒥᖁᑎᖓᑦ” ᑐᑭᓕᒃ ᑎᒥᐅᔪᖅ ᒪᓕᑦᑐᖅ ᒪᓕᒐᖅᑎᒍᑦ ᒪᓕᒋᐊᓕᓐᓂᒃ ᑲᔪᓯᑎᑦᓯᓗᑎᒃ ᐱᓇᓱᐊᕐᓂᕐᒥᓂᒃ ᓄᓇᕗᒻᒥ, ᐃᒪᐃᑦᑐᑦᓱᓂᓗ

(a) ᑭᓪᓕᖃᖅᓱᓂ ᑲᒻᐸᓂᐅᔪᖅ 51%-ᖓ ᑲᒻᐸᓂᐅᔫᑉ ᓂᕈᐊᕈᓐᓇᖅᑐᖁᑎᖏᑦᑕ ᓇᒻᒥᓂᕆᔭᐅᓗᓂ ᐃᓄᒻᒧᑦ,

(b) ᑯᐊᐸᐃᑦ ᐊᐅᓚᑕᐅᔪᑦ ᐃᓄᓐᓄᑦ, ᐅᕝᕙᓗ

(c) ᐃᓄᒃ ᓇᒻᒥᓂᓪᓗᐊᑕᐅᔪᖅ ᑲᑐᔾᔨᖃᑎᖃᑎᓱᓂᓘᓐᓃᑦ; “ᐃᓇᑦᓯᓂᖅ” ᑐᑭᓕᒃ ᑭᓇᒃᑯᑐᐃᓐᓇᕐᓂᒃ ᐃᓇᑦᓯᓂᖅ ᐊᑭᑦᑐᕋᐅᑎᒍᑎᓄᑦ; ᑭᒡᒐᖅᑐᐃᔪᑦ ᐃᖅᑲᓇᐃᔭᖅᑎᓂᒃ ᑐᑭᓕᒃ ᖁᑦᓯᓐᓂᒃ ᐃᖅᑲᓇᐃᔮᑦ ᓄᓇᕗᒻᒥ ᐊᑦᑐᐊᔪᑦ ᖃᑦᓯᐅᓂᖏᓐᓄᑦ ᐃᓄᐃᑦ ᑲᑎᑦᓱᑎᒃ ᐃᓄᖃᕐᓂᖏᑦ ᓄᕼᕗᒻᒥ;

“solicit” ᑐᑭᓕᒃ ᑐᑦᓯᕋᕐᓂᒃ ᐊᑭᑦᑐᕋᐅᑎᓂᒃ ᑭᓪᓕᖃᕐᒥᑦᓱᑎᒃ ᖃᑦᓯᐅᓂᖏᑦ ᐱᓇᓱᐊᕐᕕᐅᔪᑦ ᑐᓐᖓᕕᒋᑦᓱᒋᑦ ᐱᔪᓐᓇᕐᓂᐅᓯᒪᔪᑦ;

“ᐊᕕᑦᑐᖅᑦᓯᒪᔪᓂ ᒐᕙᒪᐃᑦ” ᑐᑭᓕᒃ ᐃᓘᓐᓇᑎᒃ ᐊᕕᑦᑐᖅᓯᒪᔪᓂ ᒐᕙᒪᓂ ᒥᓂᔅᑕᐅᕕᐅᔪᑦ ᐊᒻᒪᓗ ᐃᓘᓐᓇᑎᒃ ᑭᓇᒃᑯᑐᐃᓐᓇᕐᓅᖓᔪᑦ ᑎᒥᐅᔪᑦ ᓇᓗᓇᐃᔭᖅᑕᐅᓯᒪᔪᑦ ᑮᓇᐅᔭᓕᕆᓂᕐᒧᑦ ᒪᓕᒐᕐᔪᐊᕐᒧᑦ, S.N.W.T 1987 (1), c.16, ᐃᓚᖓ IX ᐊᒻᒪᓗ ᐃᓚᒍᑕᐃᑦ A, B ᐊᒻᒪᓗ C, ᑭᓯᐊᓂ ᐱᖃᓯᐅᑎᒐᑎᒃ ᓄᓇᑦᓯᐊᕐᒥ ᐆᒻᒪᖅᑯᓯᕆᔨᒃᑯᑦ.

ᑎᑭᑕᐅᒍᒪᔪᖅ

24.2.1 ᒐᕙᒪᒃᑯᖏᑦ ᑲᓇᑕᐅᑉ ᐊᕕᑦᑐᖅᓯᒪᔪᕐᔪᐊᓂᓗ ᒐᕙᒪᐃᑦ ᐊᑐᐃᓐᓇᐅᑎᑦᓯᓂᐊᖅᑐᑦ ᓈᒻᒪᓈᖅᓯᒪᔪᓂᒃ ᐃᑲᔪᖅᓯᓂᕐᒥᒃ ᐃᑲᔪᕐᓂᕐᒥᓪᓗ ᐃᓄᐃᑦ ᑎᒥᖁᑎᖏᓐᓂᒃ ᑐᓐᖓᕕᖃᕐᓗᑎᒃ ᐆᒪᓐᖓᑦ ᐃᓛᒃᑰᖅᑐᒥᒃ ᐱᕕᖃᖅᑎᑦᓯᒍᑕᐅᓗᑎᒃ ᐱᔭᕇᕐᓂᕐᒥᒃ ᒐᕙᒪᒃᑯᓐᓄᑦ ᑳᑦᑐᓛᓂᒃ.

ᑎᒐᓯᕙᓪᓕᐊᓂᕐᒧᑦ ᐊᑐᐊᒐᐃᑦ

24.3.1 ᑐᓐᖓᕕᒋᑦᓱᒍ ᐅᓇ ᐃᓛᒃᑰᖅᑐᖅ, ᒐᕙᒪᒃᑯᖏᑦ ᑲᓇᑕᐅᑉ ᓴᖅᑮᓂᐊᖅᑐᑦ, ᐊᑐᓕᖅᑎᑦᓯᓗᑎᒃ, ᑲᔪᓯᑎᑦᓯᓗᑎᓪᓘᓐᓃᑦ ᑎᒍᓯᕙᓪᓕᐊᓂᕐᒧᑦ ᐊᑐᐊᒐᕐᓂᒃ ᐊᑦᑐᐊᔪᓂᒃ ᐃᓄᐃᑦ ᑎᒥᖁᑎᖏᓐᓄᑦ ᒐᕙᒪᒃᑯᓐᓂ ᑲᓇᑕᒥ ᑳᑦᑐᓛᓕᒫᓄᑦ ᐱᔭᕆᐊᓖᑦ ᐃᑲᔪᖅᓯᒍᑕᐅᓗᑎᒃ ᐊᐅᓚᓂᕆᔭᖏᓐᓂᒃ ᓄᓇᕗᒻᒥ.

24.3.2 ᒐᕙᒪᒃᑯᑦ ᑲᓇᑕᒥ ᓴᖅᑮᓂᐊᖅᑐᑦ ᑲᔪᓯᑎᑦᓯᓗᑎᓪᓘᓐᓃᑦ ᑎᒍᓯᕙᓪᓕᐊᓂᕐᒧᑦ ᐊᑐᐊᒐᕐᓂᒃ ᐅᖃᖃᑎᖃᕐᓗᑎᒃ ᓇᓗᓇᐃᖅᑕᐅᓯᒪᔪᒥᒃ ᐃᓄᓐᓄᑦ ᑎᒥᖁᑕᐅᒧᒥᒃ, ᐊᑐᓕᖅᑎᑦᓯᓗᑎᓪᓗ ᐊᑐᐊᒐᕐᓂᒃ ᒪᓕᒐᖅᑎᒍᑦ ᐅᕝᕙᓗ ᐊᓪᓚᕕᒻᒥᒃ ᐊᐅᓚᓂᐅᔪᖅᑎᒍᑦ.

24.3.3 ᐊᐅᓚᓂᐅᔪᑦ ᐅᖃᐅᓯᐅᔪᑦ ᑎᑎᕋᖅᓯᒪᔪᒥ 24.3.2-ᒥ ᐊᑦᓱᖏᕈᑕᐅᓂᐊᖅᑐᑦ ᒐᕙᒪᒃᑯᓐᓄᑦ ᑲᓇᑕᒥ, ᐊᒻᒪᓗ ᐊᑐᓕᖅᑎᑕᐅᓂᐊᖅᓱᑎᒃ:

(a) ᐃᓘᓐᓇᖏᓐᓂ, ᐊᕐᕌᒍ ᐊᑕᐅᓯᖅ ᐅᖓᑖᓂᐅᓐᖏᑦᑐᖅ ᒪᓕᒐᓐᖑᖅᑎᑕᐅᓚᐅᖅᑎᓪᓗᒍ ᐊᖏᕈᑎ; ᐊᒻᒪᓗ

(b) ᐊᑦᑐᐊᔪᓄᑦ ᕿᓐᖑᒻᒥᒐᕐᓂᕐᒨᖓᔪᓄᑦ ᑳᑦᑐᓛᓄᑦ, ᓯᕗᕐᖓᓂ ᑐᓂᔭᐅᓂᖏᑦᑕ ᕿᓐᖑᒻᒥᒐᕐᓂᕐᒧᑦ ᑳᑦᑐᓛᑦ ᐱᓯᒪᔪᑦ ᐃᓛᒃᑰᖅᑐᒥᒃ 19-ᒥᒃ.

24.3.4 ᑐᓐᖓᕕᒋᑦᓱᒍ ᑎᑎᕋᖅᓯᒪᔪᖅ 24.9.2, ᐊᕕᑦᑐᖅᓯᒪᔪᕐᔪᐊᓂ ᒐᕙᒪᐃᑦ ᓂᕈᐊᕐᓂᖅᓴᐅᒋᐊᓖᑦ ᑎᒍᓯᕙᓪᓕᐊᓂᕐᒧᑦ ᐊᑐᐊᒐᕐᓂᒃ, ᐊᐅᓚᓂᐅᔪᓂᒃ ᑐᓐᖓᕕᖃᖅᑐᓂᒃ ᐆᒥᖓ ᐃᓛᒃᑰᖅᑐᒥᒃ ᐃᓘᓐᓇᖏᓐᓄᑦ ᐊᕕᑦᑐᖅᓯᒪᔪᕐᔪᐊᓄᑦ ᑳᑦᑐᓛᓄᑦ ᐱᔭᕆᐊᓕᓐᓄᑦ ᐃᑲᔪᖅᓯᔭᐅᒍᑎᓂᒃ ᐊᕕᑦᑐᖅᓯᒪᔪᕐᔪᐊᑦ ᒐᕙᒪᖏᑦᑕ ᐊᐅᓚᓂᖏᓐᓂ ᓄᓇᕗᒻᒥ. ᐊᕕᑦᑐᖅᓯᒪᔪᕐᔪᐊᓂ ᒐᕙᒪᐃᑦ ᐅᖃᖃᑎᖃᕐᓂᐊᖅᑐᑦ ᓇᓗᓇᐃᖅᑕᐅᓯᒪᔪᓂᒃ ᐃᓄᓐᓄᑦ ᑎᒥᖁᑕᐅᔪᓂᒃ ᓴᖅᑮᕙᓪᓕᐊᓕᕈᑎᒃ ᐋᖅᑭᒋᐊᒃᑲᓐᓂᕈᑎᑦᓴᐅᔪᓂᒃ ᐊᑐᐊᒐᕆᒪᓗᐊᓐᖑᐊᖅᑕᒥᓐᓄᑦ, ᐊᐅᓚᓂᐅᔪᓄᓪᓗ ᐱᕕᖃᖅᑎᑦᓯᒍᑕᐅᔪᑦ ᐅᕘᓇ ᐃᓛᒃᑰᖅᑐᒃᑯᑦ ᑲᔪᓯᒍᓐᓇᖁᓪᓗᒋᑦ.

24.3.5 ᑎᒍᓯᕙᓪᓕᐊᓂᕐᒧᑦ ᐊᑐᐊᒐᐃᑦ ᐊᑐᓕᖅᑎᑦᓯᓂᕐᒧᓪᓗ ᐊᐅᓚᓂᐅᔪᑦ ᑲᔪᓯᑎᑕᐅᓂᐊᖅᑐᑦ ᐊᑲᐅᓈᕆᐊᕐᓗᑎᒃ ᐱᕙᓪᓕᐊᓂᖓᓄᑦ ᓄᓇᕗᒻᒥ ᖃᑭᒪᓇᓱᐊᕐᓂᐅᑉ ᐃᖅᑲᓇᐃᔭᖅᑎᖃᕐᓂᐅᓪᓗ. ᐱᓗᐊᖅᑐᒥᒃ, ᐊᑐᐊᒐᐃᑦ ᐃᓱᒋᔭᖃᖃᓯᐅᑎᓂᐊᖅᑐᑦ ᐊᑐᐃᓐᓇᖃᕐᐸᓪᓕᐊᓂᕐᒥᒃ, ᐱᕕᑦᓴᖃᕐᓂᐅᑉ ᐃᓗᐊᓂ, ᐃᓄᐃᑦ ᑎᒥᖁᑎᖏᑦ ᐆᑦᑐᖃᑦᑕᓕᕐᓗᑎᒃ ᐊᒻᒪᓗ ᐱᔭᕇᑦᓯᐊᐸᓪᓗᑎᒃ ᒐᕙᒪᓄᑦ ᑳᑦᑐᓛᖑᔪᓂᒃ.

24.3.6 ᑎᒍᓯᕙᓪᓕᐊᓂᕐᒧᑦ ᐊᑐᐊᒐᐃᑦ ᐊᑐᓕᖅᑎᑦᓯᓂᐅᔪᓪᓗ ᑕᑯᑦᓴᐅᑎᑦᓯᓂᐊᖅᑐᑦ, ᐱᕕᓕᒫᒃᑯᑦ, ᐅᑯᓇᓐᖓᑦ ᑎᑭᑕᐅᒍᒪᔪᓂᒃ:

(a) ᐃᓚᐅᑎᕚᓪᓕᕐᓂᖏᑦ ᐃᓄᓐᓄᑦ ᑎᒥᖁᑕᐅᔪᑦ ᐱᓇᓱᐊᕐᓂᕐᒧᑦ ᐱᕕᑦᓴᖃᕐᓂᐅᔪᓄᑦ ᓄᓇᕗᒻᒥ ᖃᑭᒪᓇᓱᐊᕐᓂᒃᑯᑦ;

(b) ᐱᕚᓪᓕᖅᓯᒪᔪᑦ ᐃᓄᐃᑦ ᑎᒥᖁᑎᖏᑦ ᐱᒐᓱᐊᖅᐸᑦᑐᑦ ᒐᕙᒪᒃᑯᓐᓂ ᑳᑦᑐᓛᓂᒃ; ᐊᒻᒪᓗ

(c) ᐃᖅᑲᔮᖃᕐᓂᖏᑦ ᐃᓄᐃᑦ ᑕᑯᑦᓴᐅᑎᑦᓯᓕᖅᐸᑕ ᓄᓇᕗᒻᒥ ᐃᖅᑲᓇᐃᔭᖅᑎᓂ.

24.3.7 ᐃᑲᔪᖅᓯᒍᑕᐅᓗᓂ ᑎᑭᑕᐅᒍᒪᔪᓂᒃ ᓇᓗᓇᐃᔭᖅᑕᐅᓯᒪᔪᓂᒃ ᑎᑎᕋᖅᓯᒪᔪᒥ 24.3.6-ᒥ, ᒐᕙᒪᒃᑯᖏᑦ ᑲᓇᑕᐅᑉ ᐊᒻᒪᓗ ᐊᕕᑦᑐᖅᓯᒪᔪᖅᔪᐊᓂ ᒐᕙᒪᐃᑦ ᓴᖅᑮᓂᐊᖅᑐᑦ ᑲᔪᓯᑎᑦᓯᓗᑎᓪᓗ ᐊᑐᐊᒐᕐᓂᒃ ᐊᐅᓚᓂᐅᔪᓂᓪᓗ ᐅᖃᖃᑎᖃᖅᐸᓪᓗᑎᒃ ᓇᓗᓇᐃᖅᑕᐅᓯᒪᔪᓂᒃ ᐃᓄᓐᓄᑦ ᑎᒥᖁᑕᐅᔪᓂᒃ ᐋᖅᑭᑦᑕᐅᓯᒪᔪᓂᒃ ᑎᑭᐅᑎᔭᐅᒍᓐᓇᖁᓪᓗᒋᑦ ᐅᑯᐊ ᑎᑭᑕᐅᒍᒪᔪᑦ:

(a) ᐊᑐᐃᓐᓇᖃᕐᓂᖅᓴᐅᓕᕐᓗᑎᒃ ᐃᓄᐃᑦ ᐃᖅᑲᓇᐃᔭᖅᓯᓐᓈᑦ ᐃᓕᓐᓂᐊᕐᓂᕐᒥᒃ, ᐃᖅᑲᓇᐃᔭᖅᑎᒥᒃ ᐃᓕᓐᓂᐊᕐᓂᕐᒥᒃ, ᐱᔭᕆᐅᖅᓴᓂᕐᒥᒃ, ᐃᓕᓐᓂᐊᕐᓂᕐᒥᒃ ᖁᕝᕙᖅᓴᐃᓂᕐᒥᒃ, ᐊᓯᖏᓐᓂᓪᓗ ᐃᖅᑲᓇᐃᔮᓄᑦ ᐊᑦᑐᐊᔪᓄᑦ ᐊᐅᓚᓂᐅᔪᓄᑦ; ᐊᒻᒪᓗ

(b) ᐱᕕᑦᓴᖃᕐᓂᖅᓴᐅᓕᕐᓗᑎᒃ ᐃᓄᐃᑦ ᐃᓕᓐᓂᐊᕈᓐᓇᕐᓂᕐᒥᒃ ᐊᑑᑎᓂᕐᒥᓪᓗ ᑲᔪᓯᑦᓯᐊᕐᓗᑎᒃ ᓴᖅᑮᓗᑎᒃ, ᐊᐅᓚᑦᓯᓗᑎᓪᓗ ᐅᑭᐅᖅᑕᖅᑐᒥ ᐱᓇᓱᐊᕐᕕᐅᔪᓂᒃ.

ᐃᓇᑦᓯᓂᖅ ᐊᑭᑦᑐᕋᐅᑎᓂᕐᒧᑦ

24.4.1 ᑲᑐᔾᔨᖃᑎᒋᓗᒋᑦ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ, ᒐᕙᒪᒃᑯᖏᑦ ᑲᓇᑕᐅᑉ ᐊᒻᒪᓗ ᐊᕕᑦᑐᖅᓯᒪᔪᕐᔪᐊᓂ ᒐᕙᒪᐃᑦ ᐃᑲᔪᕐᓂᐊᖅᑐᑦ ᐃᓄᐃᑦ ᑎᒥᖁᑎᖏᓐᓂᒃ ᐃᓕᓐᓂᖅᑖᖁᓪᓗᒋᑦ ᐊᑭᑦᑐᕋᐅᑎᓂᖏᓐᓄᑦ ᑳᑦᑐᓛᑦᑕᐅᓂᕐᒧᓪᓗ ᐊᐅᓚᓂᐅᔪᓄᑦ, ᐃᓇᑕᐅᓗᑎᓪᓗ ᐃᓄᐃᑦ ᑎᒥᖁᑎᖏᑦ ᐊᑭᑦᑐᕋᐅᑎᓗᑎᒃ ᒐᕙᒪᒃᑯᓐᓂ ᑳᑦᑐᓛᓄᑦ ᓄᓇᕗᒻᒥ.

24.4.2 ᐃᓇᑦᓯᓂᕐᒥᒃ ᐊᑭᑦᑐᕋᐅᑎᓄᑦ ᒐᕙᒪᓂ ᑳᑦᑐᓛᓄᑦ ᓄᓇᕗᒻᒥ, ᒐᕙᒪᒃᑯᖏᑦ ᑲᓇᑕᐅᑉ ᐊᒻᒪᓗ ᐊᕕᑦᑐᖅᓯᒪᔪᕐᔪᐊᓂ ᒐᕙᒪᐃᑦ ᐊᑐᐃᓐᓇᐅᑎᑦᓯᓂᐊᖅᑐᑦ ᐱᕕᑦᓴᖃᑦᓯᐊᕐᓂᐅᔪᓂᒃ ᐃᓄᓐᓄᑦ ᑎᒥᖁᑕᐅᔪᓄᑦ ᐊᑭᑦᑐᕋᐅᑎᓂᖃᑦᓯᐊᖁᓐᓗᒋᑦ ᓈᒻᒪᓈᖅᓯᒪᔪᓂᒃ, ᐊᒻᒪᓗ, ᑕᐃᒪᐃᓪᓗᑎᒃ, ᑎᒍᓯᓂᐊᖅᑐᑦ, ᐊᑲᐅᓈᕋᐃᑉᐸᑦ ᑐᓐᖓᕕᒋᓗᒍᓗ ᑎᒍᓯᕙᓪᓕᐊᓂᕐᒧᑦ ᐊᐅᓚᑦᓯᓂᖅ, ᐅᑯᐊ ᐊᐅᓚᓂᐅᔪᑦ:

(a) ᐋᖅᑭᓪᓗᒍ ᐅᓪᓗᖅ, ᓇᒻᒥ, ᐃᒪᐃᓕᖓᓂᖏᑦ ᒪᓕᒐᐃᓪᓗ ᐊᑭᑦᑐᕋᐅᑎᓂᕐᒧᑦ ᐃᓄᓐᓄᑦ ᑎᒥᖁᑕᐅᔪᑦ ᐊᑭᑦᑐᕋᐅᑎᓯᖏᓐᓚᖁᓪᓗᒋᑦ;

(b) ᐃᓇᑦᓯᓂᖅ ᐊᑭᑦᑐᕋᐅᑎᖁᔨᓂᕐᒧᑦ ᐃᒻᒥᒃᑯᐊᖅᑎᕐᓗᒋᑦ ᐱᕕᑦᓴᖃᖁᓪᓗᒋᑦ ᒥᑭᔫᑕᐅᓂᖅᓴᐃᑦ ᑎᒥᐅᔪᑦ ᐊᑭᑦᑐᕋᐅᑎᓂᕐᒧᑦ;

(c) ᐱᕕᖃᖅᑎᓪᓗᒋᑦ ᐊᑭᑦᑐᕋᐅᑎᒍᑏᑦ ᓱᓇᒃᑯᑎᓄᑦ ᓇᓗᓇᐃᖅᓯᒪᔪᒧᑦ ᐊᖏᓂᖓᓄᑦ ᐊᖏᓈᖅᑐᓄᑦ ᑳᑦᑐᓛᑦᑕᐅᔪᓄᑦ ᐱᕕᖃᖁᓪᓗᒋᑦ ᒥᑭᔫᑕᐅᓂᖅᓴᐃᑦ ᑎᒥᐅᔪᑦ ᐊᑭᑦᑐᕋᐅᑎᓂᕐᒧᑦ;

(d) ᐋᖅᑭᑦᑕᐅᓗᑎᒃ ᓴᓇᓂᕐᒧᑦ ᑳᑦᑐᓛᖑᔪᑦ ᐊᒥᓱᓐᖑᐹᓪᓕᖁᓪᓗᒋᑦ ᐱᕕᑦᓴᖃᕐᓂᖏᑦ ᒥᑭᔫᑕᐅᓂᖅᓴᐃᑦ ᑎᒥᐅᔪᑦ ᐊᑭᑦᑐᕋᐅᑎᓂᕐᒧᑦ; ᐊᒻᒪᓗ

(e) ᐊᑑᑎᑦᑕᐃᓕᓗᒋᑦ ᐱᓗᐊᖅᑎᑦᓯᔪᑦ ᐃᖅᑲᓇᐃᔭᕈᓐᓇᕐᓂᕐᒨᖓᔪᓂᒃ ᐱᔪᓐᓇᕐᓂᐅᒋᐊᓕᓐᓂᒃ ᐊᑑᑎᓂᖃᓐᖏᑉᐸᑕ ᑳᑦᑐᓛᑉ ᑲᔪᓯᑎᑕᐅᓂᖓᓄᑦ.

24.4.3 ᒐᕙᒪᒃᑯᖏᑦ ᑲᓇᑕᐅᑉ ᐅᕝᕙᓗ ᐊᕕᑦᑐᖅᓯᒪᔪᕐᔪᐊᓂ ᒐᕙᒪᐃᑦ ᐃᓇᑦᓯᓂᐊᖅᐸᑕ ᐊᑭᑦᑐᕋᐅᑎᒍᑎᓂᒃ ᒐᕙᒪᒃᑯᓐᓂ ᑳᑦᑐᓛᓄᑦ ᐊᑑᑎᓂᐊᖅᑐᓄᑦ ᓄᓇᕗᒻᒥ, ᐊᑲᐅᓈᖅᑐᓕᒫᒃᑯᑦ ᐊᐅᓚᓂᖃᕆᐊᓖᑦ ᑐᓴᖅᑎᑦᓯᓗᑎᒃ ᐃᓄᓐᓄᑦ ᑎᒥᖁᑕᐅᔪᓂᒃ ᐊᑭᑦᑐᕋᐅᑎᓂᖅᑕᖃᕆᐊᖓ, ᐱᕕᖃᖅᑎᑦᓯᓗᑎᓪᓗ ᐃᓄᓐᓄᑦ ᑎᒥᖁᑕᐅᔪᓄᑦ ᓈᒻᒪᓈᖅᓯᒪᔪᓂᒃ ᐱᕕᑦᓴᖃᖅᑎᑦᓯᓂᐅᔪᓂᒃ ᑐᓂᓯᒍᓐᓇᖁᓪᓗᒋᑦ ᐊᑭᑦᑐᕋᐅᑎᒍᑎᓂᒃ.

ᐊᑭᑦᑐᕋᐅᑎᓂᒃ ᑲᔪᖏᖅᓴᐅᑎᖃᕐᓂᖅ

24.5.1 ᒐᕙᒪᒃᑯᖏᑦ ᑲᓇᑕᐅᑉ ᐅᕝᕙᓘᓐᓃᑦ ᐊᕕᑦᑐᖅᓯᒪᔪᕐᔪᐊᓂ ᒐᕙᒪᐃᑦ ᑲᔪᖏᓴᐅᑎᖃᖅᐸᑕ ᐊᑭᑦᑐᕋᐅᑎᒍᑎᓂᒃ ᒐᕙᒪᓄᑦ ᑳᑦᑐᓛᓄᑦ ᐊᑑᑎᓂᐊᖅᑐᓄᑦ ᓄᓇᕗᒻᒥ, ᖃᐅᔨᓴᑦᓯᐊᕆᐊᓖᑦ ᐱᔪᓐᓇᕐᓂᖃᖅᑐᑦ ᐃᓄᓐᓄᑦ ᑎᒥᖁᑕᐅᔪᑦ ᐃᓚᒍᑦᓯᐅᔾᔭᐅᓯᒪᒐᓗᐊᒪᕐᖔᑕ ᑎᑎᕋᖅᓯᒪᔪᓄᑦ ᑎᒥᐅᔪᓄᑦ ᑲᔪᖏᓵᕆᕕᐅᔪᓄᑦ ᐊᑭᑦᑐᕋᐅᑎᓂᕐᒧᑦ.

24.5.2 ᐃᓄᓐᓄᑦ ᑎᒥᖁᑕᐅᔪᖅ ᓯᕗᕐᖓᓂ ᑐᓂᔭᐅᓚᐅᖅᓯᒪᑉᐸᑦ ᒐᕙᒪᒃᑯᓐᓂ ᑳᑐᓛᒥᒃ, ᑲᔪᓯᑦᓯᐊᖅᓯᒪᑦᓱᑎᓪᓗ ᑳᑦᑐᓛᒥᒃ, ᑕᐃᓐᓇ ᐃᓄᓐᓄᑦ ᑎᒥᖁᑕᐅᔪᖅ ᐃᓚᒍᑦᓯᐅᔾᔭᐅᓂᐊᖅᑐᖅ ᑲᔪᖏᖅᓵᕆᕕᐅᔪᓄᑦ ᐊᑭᑦᑐᕋᐅᑎᖁᔭᐅᓪᓗᑎᒃ ᑳᑦᑐᓛᓄᑦ ᐊᔾᔨᒐᓚᖏᓐᓄᑦ.

24.5.3 ᐱᑕᖃᓐᖏᑉᐸᑦ ᐊᑭᑦᑐᕋᐅᑎᔪᑦᓯᐊᓂᒃ ᒐᕙᒪᒃᑯᓐᓄᑦ ᑳᑦᑐᓛᓄᑦ, ᐱᔪᓐᓇᕐᓂᓖᑦ ᐃᓄᓐᓄᑦ ᑎᒥᖁᑕᐅᔪᑦ ᐃᓱᒪᒋᔭᐅᑦᓯᐊᖃᓯᐅᑎᓂᐊᖅᑐᑦ.

ᐊᑭᑦᑐᕋᐅᑎᓂᕐᒧᑦ ᐃᓗᓕᕆᔭᐅᔪᑦ

24.6.1 ᐊᔪᕐᓇᓐᖏᑐᐊᕋᐃᑉᐸᑦ, ᑐᓐᖓᕕᒋᑦᓱᒋᓪᓗ ᑲᔪᓯᓂᖃᑦᓯᐊᖅᑐᑦ ᑎᒍᓯᕙᓪᓕᐊᓂᕐᒧᑦ ᐊᐅᓚᑦᓯᓂᐅᔪᑦ, ᐊᒻᒪᓗ ᑐᓐᖓᕕᒋᑦᓱᒋᑦ ᑲᓴᑕᒥ ᓄᓇᕐᔪᐊᕐᒨᖓᔪᑦ ᑐᓂᒪᓂᖏᑦ, ᐃᓘᓐᓇᑎᒃ ᐅᑯᐊ ᐃᓗᓕᕆᔭᐅᒋᐊᓖᑦ, ᐅᕝᕙᓗ ᐊᒥᓲᒍᓐᓇᕐᓂᓕᒫᖏᒍᑦ ᐊᑦᑐᐊᔪᓄᑦ ᓇᐅᑐᐃᓐᓇᕐᓄᑦ ᑳᑦᑐᓛᒧᑦ, ᐃᓚᒍᑦᓯᐅᔾᔭᐅᓯᒪᓂᐊᖅᑐᑦ ᐊᑭᑦᑐᕋᐅᑎᓂᕐᒧᑦ ᐃᓗᓕᖏᓐᓄᑦ ᓴᖅᑭᖅᑕᐅᔪᓄᑦ ᒐᕙᒪᒃᑯᖏᓐᓄᑦ ᑲᓇᑕᐅᑉ ᑐᓂᔭᐅᓂᖏᓐᓄᑦ ᒐᕙᒪᒃᑯᑦ ᑳᑦᑐᓛᖏᓐᓂᒃ ᓄᓇᕗᒻᒥ.

(a) ᑕᕝᕙᐅᓂᖏᑦ ᐊᓪᓚᕕᒻᒪᕇᑦ, ᐊᐅᓚᑦᓯᔩᑦ ᐊᓪᓚᕝᕖᑦ ᐅᕝᕙᓗ ᐊᓯᖏᑦ ᐃᐅᓪᓗᐃᑦ ᓄᓇᕗᒻᒥ;

(b) ᐃᖅᑲᓇᐃᔭᖅᑎᑦᓯᓂᖏᑦ ᐃᓄᓐᓂᒃ, ᐊᑑᑎᓂᖏᓐᓂᒃ ᐃᓄᐃᑦ ᖃᐅᔨᐅᒪᔪᒻᒪᕇᑦ ᐱᔨᑦᓯᕋᐅᑎᖏᓐᓂᒃ, ᐅᕝᕙᓗ ᐊᑐᕐᓂᖅ ᓂᐅᕕᐊᑦᓴᓕᓐᓂᒃ ᐃᓄᓐᓂᒃ ᐅᕝᕙᓗ ᐃᓄᓐᓄᑦ ᑎᒥᖁᑕᐅᔪᓂᒃ ᑲᔪᓯᓂᖏᓐᓄᑦ ᑳᑦᑐᓛᖏᑦᑕ; ᐅᕝᕙᓗ

(c) ᑲᔪᓯᑎᑦᓯᓂᖅ ᑐᓂᒪᓂᐅᔪᓂᒃ, ᐊᑖᓂ ᑳᑦᑐᓛᑉ, ᐊᑦᑐᐊᔪᓄᑦ ᐃᖅᑲᓇᐃᔭᖅᓯᓐᓈᑦ ᐃᓕᓐᓂᐊᕐᓂᐅᔪᓄᑦ ᐅᕝᕙᓗ ᐱᔭᕆᐅᖅᐸᓪᓕᐊᓂᖏᓐᓄᑦ ᐃᓄᐃᑦ.

24.6.2 ᐊᑑᑎᒍᓐᓇᑐᐊᕋᐃᑉᐸᑦ, ᐊᒻᒪᓗ ᑐᓐᖓᕕᖃᕐᓗᑎᒃ ᐊᐅᓚᑦᓯᓂᑦᓯᐊᒥᒃ, ᑐᓐᖓᕕᖃᕐᓗᑎᓪᓗ ᑲᓇᑕᒥ ᓄᓇᕐᔪᐊᕐᒧᑦ ᑐᓂᒪᓂᖏᓐᓂᒃ, ᐃᓘᓐᓇᖏᓐᓂᒃ ᐅᑯᓇᓐᖓᑦ ᐃᓗᓕᕆᔭᐅᔪᓂᒃ, ᐅᕝᕙᓗ ᐊᑦᑐᐊᔪᓕᒫᓂᒃ ᓇᐅᑐᐃᓐᓇᕐᒧᑦ ᑳᑦᑐᓛᒧᑦ, ᐃᓚᐅᑦᓯᐅᑎᓯᒪᓂᐊᖅᑐᑦ ᐊᑭᑦᑐᕋᐅᑎᒍᑎᓄᑦ ᐃᓗᓕᕆᔭᐅᔪᓄᑦ ᓴᖅᑭᖅᑕᐅᔪᓄᑦ ᐊᕕᑦᑐᖅᓯᒪᔪᕐᔪᐊᓂ ᒐᕙᒪᓄᑦ ᑐᓂᓯᓕᕈᑎᒃ ᒐᕙᒪᒃᑯᓐᓄᑦ ᑳᑦᑐᓛᓂᒃ ᓄᓇᕗᒻᒥ:

(a) ᓇᒦᓐᓂᖏᑦ ᐊᓪᓚᕕᒻᒪᕇᑦ, ᐊᓪᓚᕝᕖᑦ ᐅᕝᕙᓗ ᐊᓯᖏᑦ ᐃᓪᓗᐃᑦ ᓄᓇᒥ ᑕᐃᑲᓂ ᑳᑦᑐᓛᒥᒃ ᑲᔪᓯᑎᑦᓯᕕᐅᓂᐊᖅᑐᒥ;

(b) ᐃᖅᑲᓇᐃᔭᖅᑎᖃᕐᓂᖅ ᐃᓄᓐᓂᒃ, ᐊᑑᑎᑎᑦᓯᓂᖅ ᐃᓄᐃᑦ ᖃᐅᔨᒪᔪᒻᒪᕇᑦ ᐱᔨᑦᓯᕋᐅᑎᖏᓐᓂᒃ, ᐅᕝᕙᓗ ᐊᑐᕐᓂᖅ ᓂᐅᕝᖅᑎᑦᓯᔨᓂᒃ ᐃᓄᓐᓂᒃ ᐅᕝᕙᓗ ᐃᓄᓐᓄᑦ ᑎᒥᖁᑕᐅᔪᓂᒃ ᑲᔪᓯᑎᑦᓯᓗᑎᒃ ᑳᑦᑐᓛᒥᒃ; ᐅᕝᕙᓗ

(c) ᑲᔪᓯᑎᑦᓯᓂᖅ ᑐᓂᒪᓂᐅᔪᓂᒃ, ᐊᑖᓂ ᑳᑦᑐᓛᑉ, ᐊᑦᑐᐊᔪᓄᑦ ᐃᖅᑲᓇᐃᔭᖅᓯᓐᓈᑦ ᐃᓕᓐᓂᐊᕐᓂᐅᔪᓄᑦ ᐅᕝᕙᓗ ᐱᔭᕆᐅᖅᐸᓪᓕᐊᓂᖏᓐᓄᑦ ᐃᓄᐃᑦ.

ᑎᑎᕋᖅᑕᐅᓯᒪᓂᖏᑦ ᐃᓄᐃᑦ ᑎᒥᖁᑎᖏᑦᑕ

24.7.1 ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐸᕐᓇᐃᓂᐊᖅᑐᑦ ᐸᐸᑦᓯᓗᑎᓪᓗ ᐃᓗᓕᖅᑐᔪᓂᒃ ᑎᑎᕋᖅᓯᒪᔪᓂᒃ ᐃᓄᐃᑦ ᑎᒥᖁᑎᖏᓐᓂᒃ, ᐱᖃᓯᐅᑎᓗᑎᒃ ᑐᓴᕋᑦᓴᐃᑦ ᓇᓪᓕᖏᓐᓂᒃ ᐊᑐᐃᓐᓇᖃᖅᑎᑦᓯᒍᓐᓇᕐᒪᖔᑕ ᐊᑦᑐᐊᔪᓄᑦ ᒐᕙᒪᓄᑦ ᑳᑦᑐᓛᓄᑦ. ᑎᑎᕋᖅᓯᒪᔪᑦ ᑕᑯᓐᓇᖅᑕᐅᓂᐊᖅᑐᑦ ᒐᕙᒪᒃᑯᖏᓐᓄᑦ ᑲᓇᑕᐅᑉ ᐊᒻᒪᓗ ᐊᕕᑦᑐᖅᓯᒪᔪᕐᔪᐊᓂ ᒐᕙᒪᐃᑦ ᑎᑭᐅᔾᔪᑕᐅᒋᐊᓕᓐᓅᖓᒋᖓᐃᑦ ᐊᑖᓂ ᐆᒪ ᐃᓛᒃᑰᖅᑐᑦ.

ᖃᐅᔨᓴᕐᓂᖅ ᐱᕙᓪᓕᐊᔪᓂᓪᓗ ᓇᐅᑦᓯᑐᕐᓂᖅ

24.8.1 ᒐᕙᒪᒃᑯᖏᑦ ᑲᓇᑕᐅᑉ ᐊᒻᒪᓗ ᐊᕕᑦᑐᖅᓯᒪᔪᕐᔪᐊᓂ ᒐᕙᒪᐃᑦ, ᑲᑐᔾᔨᖃᑎᖃᖅᓱᑎᒃ ᓇᓗᓇᐃᖅᑕᐅᓯᒪᔪᓂᒃ ᐃᓄᓐᓄᑦ ᑎᒥᖁᑕᐅᔪᓂᒃ, ᐊᑑᑎᒋᐊᓕᓐᓂᒃ ᐊᑑᑎᓂᐊᖅᑐᑦ ᓇᐅᑦᓯᑐᕐᓗᑎᒃ ᐊᒻᒪᓗ ᖃᐅᔨᓴᓕᐅᒥᔮᖅᐸᓪᓗᑎᒃ ᐊᑐᓕᖅᑎᑕᐅᓂᖓᓂᒃ ᐆᒪ ᐃᓛᒃᑰᖅᑑᑉ.

ᐊᑐᓕᖅᑎᑦᓯᓂᖅ

24.9.1 ᑐᕌᒐᐅᔪᑦ ᐅᕙᓂ ᐃᓛᒃᑰᖅᑐᒥ ᑕᑯᓐᓇᖅᑕᐅᓂᐊᖅᑐᑦ ᑎᑭᐅᑎᔭᐅᓯᒪᒋᐊᖏᑦ ᐃᓕᐅᖅᑲᖅᑕᐅᓂᖏᑦᑎᒍᑦ ᐅᕝᕙᓗ ᐃᓕᐅᖅᑲᖅᑕᐅᒃᑲᓐᓂᕐᓂᖏᑦᑎᒍᑦ ᒐᕙᒪᒃᑯᓐᓂ ᐊᑭᓕᖅᑐᕆᐊᓖᑦ ᕐᑳᖓᒍᒃᑯᓐᓂᖅ ᑮᓇᐅᔭᖅᑑᑎᑦᓴᖃᒃᑲᓐᓂᑕᐃᓕᓗᓂ ᒐᕙᒪᒃᑯᖏᓐᓄᑦ ᑲᓇᑕᐅᑉ ᐅᕝᕙᓗ ᐊᕕᑦᑐᖅᓯᒪᔪᕐᔪᐊᓂ ᒐᕙᒪᐃᑦ.

24.9.2 ᐊᕕᑦᑐᖅᓯᒪᔪᕐᔪᐊᓂ ᒐᕙᒪᐃᑦ ᑲᔪᓯᑎᑦᓯᓂᐊᖅᑐᑦ ᐃᒪᐃᓕᖓᓂᖏᓐᓂᒃ ᐆᒪ ᐃᓛᒃᑰᖅᑑᑉ ᐊᑑᑎᑎᑦᓯᓂᒃᑯᑦ ᐊᕕᑦᑐᖅᓯᒪᔪᕐᔪᐊᓂ ᒐᕙᒪᐃᑦ ᑳᑦᑐᓛᓄᑦ ᐊᑐᐊᒐᖏᓐᓂᒃ, ᐊᐅᓚᓂᖏᓐᓂᒃ ᑐᕌᒐᖃᖅᑐᓂᒃ ᐱᕚᓪᓕᑎᑦᓯᓂᕐᒥᒃ ᐊᑐᕐᓂᕐᒥᒃ ᓄᓇᓕᓐᓂ, ᐊᕕᑦᑐᖅᓯᒪᔪᓂ ᐊᒻᒪᓗ ᐅᑭᐅᖅᑕᖅᑐᒥ ᐃᖅᑲᓇᐃᔭᕐᓂᕐᒧᑦ ᐱᓇᓱᐊᕐᕕᖃᕐᓂᒃᑯᓪᓗ ᐱᕕᑦᓴᖃᕐᓂᐅᔪᓂᒃ.

24.9.3 ᒐᕙᒪᒃᑯᖏᑦ ᑲᓇᑕᐅᑉ, ᐊᕕᑦᑐᖅᓯᒪᔪᕐᔪᐊᓂ ᒐᕙᒪᐃᑦ, ᐊᒻᒪᓗ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᕿᒥᕐᕈᓂᖃᕐᓂᐊᖅᑐᑦ ᐊᑑᑎᓂᖓᓂᒃ ᐆᒪ ᐃᓛᒃᑰᖅᑑᑉ ᐊᕐᕌᒍᐃᑦ 20 ᐃᓗᐊᓂ ᐊᑐᓕᖅᑎᑕᐅᓚᐅᖅᑎᓪᓗᒍ. ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐊᒻᒪᓗ ᒐᕙᒪᒃᑯᖏᑦ ᑲᓇᑕᐅᑉ ᐅᕝᕙᓗ ᐊᕕᑦᑐᖅᓯᒪᔪᕐᔪᐊᓂ ᒐᕙᒪᐃᑦ, ᐊᖏᖃᑎᒌᑉᐸᑕ ᕿᒥᕐᕈᔭᐅᓚᐅᖅᑎᓪᓗᒋᑦ ᑐᕌᒐᖏᑦ ᐃᓛᒃᑰᖅᑑᑉ ᑎᑭᐅᑎᔭᐅᓯᒪᒻᒪᖔᑕ, ᑐᓂᒪᓂᐅᔪᑦ ᐊᑖᓂ ᐆᒪ ᐃᒃᓛᒃᑰᖅᑑᑉ ᒐᕙᒪᒃᑯᖏᑦ ᑲᓇᑕᐅᑉ ᐅᕝᕙᓗ ᐊᕕᑦᑐᖅᓯᒪᔪᕐᔪᐊᓂ ᒐᕙᓚᐅᔪᑦ, ᓄᖅᑲᕐᓂᐊᖅᑐᑦ ᐊᕐᕌᒎᑉ ᐊᑕᐅᓯᐅᑉ ᐃᓗᐊᓂ ᕿᒥᕐᕈᓂᖅ ᐊᓂᒍᓚᐅᖅᑎᓪᓗᒍ. ᑐᓂᒪᓂᕆᔭᖏᑦ ᒐᕙᓚᒃᑯᖏᑦ ᑲᓇᑕᐅᑉ ᐅᕝᕙᓗ ᐊᕕᑦᑐᖅᓯᒪᔪᕐᔪᐊᓂ ᒐᕙᒪᐃᑦ ᐊᑖᓂ ᐃᓛᒃᑰᖅᑑᑉ ᓱᓕ ᐊᑑᑎᑉᐸᑕ ᕿᒥᕐᕈᒋᐊᓐᖓᕐᓂᖅᑕᖃᓚᐅᖅᑎᓪᓗᒍ, ᑎᒥᐅᔪᑦ ᕿᒥᕐᕈᓂᐊᖅᑐᑦ ᐱᔭᕆᐊᓕᓐᓂᒃ ᑲᔪᓯᑎᑦᓯᓂᕐᒧᑦ ᐱᕕᖃᖅᑎᑦᓯᓂᐅᔪᓂᒃ ᐊᕐᕌᒍᐃᑦ ᑕᓪᓕᒪᑦ ᐊᓂᒍᕋᐃᑉᐸᑕ ᐅᕝᕙᓗ ᐊᑯᓐᓂᐅᔪᓂ ᐊᖏᖃᑎᒌᒍᑎᒋᔭᖏᓐᓂ.