ANGIKATIGEKTUT
OKOA
Inuit Nunavutmi Nunataakviani aivaktigivagait Tungavitkot Nunavutmi
ONALO:
Queen Kivgait Kanatami.
TALVANI okoa Inuit aivakatigivagait Tungavitkot Nunavutmi akhokniakmata Inuit pitkohiitnik Nunavutmi Inuit Nunataakviani, ovani naonaitiakhimayomi titigami Nakata 3, pitkohitokamingnik nunamingni ovalo taya atokpagamingnik nunatokagivagamingnik atokpaktot, emmaknik, hikkonik nunami totingayonik taimanigaalok atokpakmata Inuinait pitkohimikot atokpagamitigot;
OVALO TALVANI tamna Pikoyakyoani Maligani, 1982 elittogihimalikmagit kaoyimalikhogit inuinait kablonagonggitot pitkohiit atokpagaitlo nalonaikhimalikmata kablonanggogittot inuit Kanatamiot, ovalo pitkohitik pihimakmagit elaoyotlo pitkohit piinagialgit okoatigot nunanik pinahoaktoni anggigotini;
OVALO TALVANI tapkoa aivakpaktot anggigahoakniaktok aivaktamingnik nunataagahoagotmi ova aivaktaoyoni Inuit nunakhait naonaikniakmata pitkohikhait nunamingni niamgiyagotikhatiklo ema himmaotiginiakmagit piomayatik, pitkohit, piotitik ovalo piomayatik ema nunamingni angiktamingni atolakiniakmata anggitotitigot;
OVALO TALVANI aivaktok haffominga nunataagahoagotikot Anggikhimalikmanik hapkoatigot naonaihimayot atogakhait:
ema eliogaihimaniaktot naonaitiaktonik pitkohikhanik nanminikniklo nunanik nalvaakhanik, ovalo Inuit pitkohitik elikkot ehomatamitigot nunat atogakhat kanok atogomayoakpata, monagilogitlo tammaktaililogo nuna, emmat, nalvaakhat, nalvaatlo taggiomi;
ema eliogaihimaniaktot Inuit anggonialokaginagiakaktot pitkohimitigot ehomalioloaktitaovaklotik nunamingni angoyakhatigot;
ema eliogaihimaniaktot Inuit manikmik toniyaoniaktot ovalo kanoklo nunamingni maniliogotikhaitnik nunataaktot;
ovalo pitkovakniaktot elikot maniliokloakpaligomik ekayoktaohimaitonit kavamanit pitkohitiklo atolikloaklogit Inuutigiamingni;
TALVAGOOK, Inuit votikmata November 3-mit 6-mot 1992-mi namagiplogo angiktaat Nunataagotaoyokot Angikatigegot ovalo atilioktaotkoplogo pitkoyaat okonga tikkoaktaohimayonot katimayinot TFN-konnot;
TAVALO Inungnit angiktaolgaaktillogo Angikatigegot votiotigiplogo, Aivakatiget eniktikmiyaat eliogakhogo Nakataa 40 elangalo angikatigegotip ehoaghakpaalikhogo elaokpakhogolo oingaiktaotiagiagani tamaanit, talva naamagiplogo angiktaat Nunataagotaoyokot Angikatigegot votiotigiplogo;
TALVALO Atanikpait Katimayeta angiktaat hafomoona atanioyok atiliokoplogo Angikatigegotaoyomik;
OVALO ELITTOGIYOT Inuinaingok Kanatap naovaliajutanot ekayokloaktiovakmata, naonaikhivlotiklo ovalo pihimapkailikhotik nunanik Okioktaktomi Kanatamot;