ARTICLE 37

ᐊᑐᓕᖅᑎᑦᓯᓂᖅ

ᖃᐅᔨᒪᓕᑕᐅᓪᓗᑎᒃ ᑐᓐᖓᕕᐅᔪᑦ

37.1.1 ᐅᑯᐊ ᑐᓐᖓᕕᐅᔪᑦ ᖃᐅᔨᒪᓕᑕᐅᓂᐊᖅᑐᑦ ᐊᑐᓕᖅᑎᑕᐅᓂᖓᓄᑦ ᐊᖏᕈᑎᐅᑉ ᑕᑯᓐᓇᖅᑕᐅᓂᐊᖅᓱᑎᓪᓗ ᐊᑐᓕᖅᑎᑦᓯᓂᕐᒧᑦ ᐸᕐᓇᐅᑎᒥ:

(a) ᑲᔪᓰᓐᓇᖅᑐᒥᒃ ᐊᐅᓚᓂᖅᑕᖃᕐᓂᐊᖅᑐᖅ ᐃᓄᓐᓄᑦ ᒐᕙᒪᓄᓪᓗ ᐸᕐᓇᐅᑎᖃᕐᓗᑎᒃ ᓇᐅᑦᓯᖅᑐᕐᓗᑎᓪᓗ ᐊᑐᓕᖅᑎᑕᐅᓂᖓᓂᒃ ᐊᖏᖃᑎᒌᒍᑎᐅᑉ ᑕᑯᑦᓴᐅᑎᑦᓯᓂᐊᖅᓱᓂᓗ ᐆᒪᓂᖓᓂᒃ ᑐᕌᒐᖓᓂᓗ ᐊᖏᖃᑎᒌᒍᑎᐅᑉ ᐊᒻᒪᓗ ᐊᔾᔨᒌᓐᖏᑦᑐᑦ ᐃᒪᐃᓕᖓᓂᖏᑦ ᒪᓕᒋᐊᓖᓪᓗ;

(b) ᐊᑐᓕᖅᑎᑦᓯᓂᖅ ᑕᑯᑦᓴᐅᑎᑦᓯᓂᐊᖅᑐᖅ ᑐᕌᒐᖓᓂᒃ ᐊᖏᖃᑎᒌᒍᑎᐅᑉ ᐃᓇᑦᓯᓂᖃᕐᓗᓂ ᓇᒻᒥᓂᖅ ᒪᑭᒪᒍᓐᓇᕐᓂᕐᒧᑦ ᐊᒻᒪᓗ ᐱᖅᑯᓯᒃᑯᑦ ᐃᓅᓯᒃᑯᓪᓗ ᖃᓄᐃᓐᖏᑦᓯᐊᕐᓂᖏᓐᓂᒃ ᐃᓄᐃᑦ;

(c) ᑭᖑᕙᐅᖅᑲᖏᓪᓗᓂ ᐊᑑᑎᖃᕐᓗᓂᓗ ᐊᑐᓕᖅᑎᑕᐅᓂᖓ ᐊᖏᖃᑎᒌᒍᑎᐅᑉ ᐃᓚᐅᑎᓐᓂᖃᕐᓗᑎᒃ ᐃᓄᐃᑦ, ᐱᖃᓯᐅᑎᑦᓱᑎᒃ ᐱᕕᑦᖃᕐᓂᐅᔪᑦ ᐃᓕᓐᓂᐊᕐᓂᕐᒧᑦ, ᐱᒻᒪᕆᐅᕗᖅ ᐃᓄᓐᓄᑦ ᐱᕚᓪᓕᕈᑎᖃᕐᓂᖅ ᐊᖏᖃᑎᒌᒍᑎᒥᒃ;

(d) ᖃᐅᔨᒪᔭᐅᑎᑦᓯᓗᑎᒃ ᑭᖑᕙᐅᖅᑲᖏᑦᑐᓂᒃ ᐊᑑᑎᓕᒻᒥᓗ ᐊᑐᓕᖅᑎᑕᐅᓂᖓ ᐊᖏᖃᑎᒌᒍᑎᐅᑉ, ᐃᓄᐃᑦ ᒐᕙᒪᒃᑯᓪᓗ ᐃᒪᐃᓐᓂᐊᖅᑐᑦ

(i) ᓇᓗᓇᐃᖅᓯᓗᑎᒃ, ᐊᕐᕌᒍᒧᑦ ᐊᑕᐅᓯᐅᓐᖏᑦᑐᒧᑦ ᐸᕐᓇᓐᓂᐅᔪᓂᒃ, ᐊᑐᓕᖅᑎᑦᓯᓂᕐᒧᑦ ᐊᐅᓚᓂᐅᔪᓂᒃ ᐊᒻᒪᓗ ᖁᑦᓯᓂᖓᓐᓂᒃ ᒐᕙᒪᒃᑯᑦ ᐊᑐᓕᖅᑎᑦᓯᓂᕐᒧᑦ ᑮᓇᐅᔭᖃᖅᑎᑦᓯᓂᖓᑕ ᐊᑐᐃᓐᓇᐅᑎᑕᐅᓂᐊᖅᓱᑎᒃ ᐸᕐᓇᓐᓂᖅᑕᖃᖅᑎᓪᓗᒍ, ᐊᒻᒪᓗ

(ii) ᐊᓯᐊᒎᕆᐊᕐᕕᖃᖅᑎᑦᓯᓗᑎᒃ ᐊᑐᓕᖅᑎᑦᓯᓂᕐᒧᑦ ᕿᒥᕐᕈᔨᑎᒍᑦ ᐋᖅᑭᑦᓱᐃᑲᓐᓂᖁᓪᓗᒋᑦ ᐊᐅᓚᓂᐅᔪᓂᒃ, ᑐᓐᖓᕕᖃᕐᓗᑎᓪᓗ ᒐᕙᒪᒃᑯᑦ ᑮᓇᐅᔭᖅᑑᑎᑦᓴᓄᑦ ᐊᐅᓚᓂᖏᓐᓂᒃ, ᐃᓕᐅᖅᑲᐃᑲᓐᓂᕐᓗᑎᒃ ᑮᓇᐅᔭᓂᒃ ᐸᕐᓇᓐᓂᐅᑉ ᐃᓗᐊᓂ; ᐊᒻᒪᓗ

(e) ᑕᑯᑦᓴᐅᑎᑦᓯᓗᓂ ᖁᑦᓯᓂᖓᓐᓂᒃ ᐃᒻᒥᓂᕿᓂᐅᑉ ᐊᒻᒪᓗ ᐊᖓᔪᖅᑲᐅᑏᑦ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓂ ᐊᓯᖏᓐᓂᓗ ᑎᒥᐅᔪᓂ ᑭᓇᒃᑯᑐᐃᓐᓇᐃᑦ ᒐᕙᒪᖏᓐᓂᒃ ᓇᓗᓇᐃᖅᑕᐅᔪᓂ ᐃᓛᒃᑯᑦ 10-ᒥ, ᑮᓇᐅᔭᐃᑦ ᐋᖅᑭᓱᖅᑕᐅᓂᖏᑦ ᐊᑐᓕᖅᑎᑕᐅᓂᖓᓄᑦ ᐊᖏᖃᑎᒌᒍᑎᐅᑉ ᐃᒪᐃᓐᓂᐊᖅᑐᑦ

(i) ᐊᑐᐃᓐᓇᐅᑎᑦᓯᓗᑎᒃ ᑕᐃᒃᑯᓄᖓ ᑎᒥᐅᔪᓄᑦ ᐋᖅᑭᒋᐊᕐᕕᖃᖅᑐᓄᑦ ᑐᓂᐅᖅᑲᐃᓂᕐᒧᑦ, ᑐᓂᐅᖅᑲᐃᑲᓐᓂᕐᓂᕐᒧᑦ ᐊᐅᓚᑦᓯᓂᕐᒧᓪᓗ ᑮᓇᐅᔭᓂᒃ ᐃᓗᐊᓂ ᑮᓇᐅᔭᖅᑑᑎᑦᓴᖏᑦᑕ, ᒥᑭᓂᖅᓴᐅᖏᓪᓗᑎᒃ ᑐᓂᔭᐅᓯᒪᔪᑦ ᐊᔾᔨᒐᓚᖏᓐᓄᑦ ᑎᒥᐅᔪᑦ ᒐᕙᒪᒃᑯᓐᓂ,

(ii) ᐊᑐᐃᓐᓇᐅᑎᑦᓯᓗᑎᒃ ᑕᐃᒃᑯᓄᖓ ᑎᒥᐅᔪᓄᑦ ᓈᒻᒪᑦᑐᓂᒃ ᑮᓇᐅᔭᖃᕐᓗᑎᒃ ᐃᖅᑲᓇᐃᔭᖅᑎᖃᕐᓗᑎᓪᓗ ᐸᕐᓇᐅᑎᖃᕐᓗᑎᒃ ᑲᔪᓯᑎᑦᓯᓗᑎᓪᓗ ᐃᖅᑲᓇᐃᔮᕆᒋᐊᓕᒥᓂᒃ ᑎᒍᒥᐊᖅᑕᒥᓂᓪᓗ ᑐᓂᔭᐅᒪᔪᓂᒃ ᐊᖏᖃᑎᒌᒍᑎᑎᒍᑦ ᐊᐅᓚᓂᖃᑦᓯᐊᕐᓗᑎᒃ ᑖᒃᑯᐊᓪᓗᐊᖅ ᑭᓇᒃᑯᑐᐃᓐᓇᐃᑦ ᐃᓚᐅᑎᓐᓂᖃᕐᓗᑎᒃ,

(iii) ᐱᔭᕆᐊᖃᖅᑎᑕᐅᓗᑎᒃ ᑕᐃᒃᑯᐊ ᑎᒥᐅᔪᑦ ᒪᓕᓪᓗᑎᒃ ᐊᑐᖅᑕᐅᒐᔪᑦᑐᓂᒃ ᐊᐅᓚᑦᓯᓂᕐᒧᑦ ᑮᓇᐅᔭᓕᕆᓂᕐᒧᓪᓗ ᐊᒻᒪᓗ

(iv) ᖃᐅᔨᓴᑦᓯᐊᕐᓂᖅ ᑭᐅᔪᓐᓇᕐᓂᖏᓐᓂᒃ ᑕᐃᒃᑯᐊ ᑎᒥᐅᔪᑦ ᐊᑭᓕᕆᐊᓕᓐᓄᑦ ᐊᑐᖅᑕᖏᓐᓂᒃ ᑲᔪᓯᑎᑦᓯᑎᓪᓗᒋᑦ ᑲᒪᒋᔭᕆᐊᓕᒻᒥᓂᑦ ᐊᑖᓂ ᐊᖏᖃᑎᒌᒍᑎᐅᑉ.

ᐊᑐᓕᖅᑎᑦᓯᓂᕐᒧᑦ ᐸᕐᓇᐅᑏᑦ

37.2.1 ᐊᑐᓕᖅᑎᑦᓯᓂᕐᒧᑦ ᐸᕐᓇᐅᑎᑕᖃᕐᓂᐊᖅᑐᖅ ᓴᖅᑭᖅᑕᐅᔪᒥᒃ ᐊᖏᖅᑕᐅᓗᓂᓗ ᑐᓐᖓᕕᒃᑯᓐᓄᑦ ᓄᓇᕗᒻᒥ, ᒐᕙᒪᒃᑯᖏᓐᓄᑦ ᑲᓇᑕᐅᑉ ᐊᒻᒪᓗ ᐊᕕᑦᑐᖅᓯᒪᔪᖅᔪᐊᓂ ᒐᕙᒪᐃᑦ ᓯᕗᕐᖓᓂ ᐅᓪᓗᖅ ᒪᓕᒐᓐᖑᖅᑎᑕᐅᓂᖓᑕ ᐊᖏᖃᑎᒌᒍᑎᐅᑉ.

37.2.2 ᐊᑐᓕᖅᑎᑦᓯᓂᕐᒧᑦ ᐸᕐᓇᐅᑎ ᓇᓗᓇᐃᖅᓯᓂᐊᖅᑐᖅ:

(a) ᑲᔪᓯᔪᓄᑦ ᐊᒻᒪᓗ ᑭᓪᓕᖃᖅᑐᓄᑦ ᑐᓂᒪᓂᐅᔪᓄᑦ, ᓇᓗᓇᐃᖅᑕᐅᓯᒪᔪᓄᑦ ᐊᐅᓚᓂᐅᔪᓄᑦ ᐊᒻᒪᓗ ᐊᐅᓚᓂᐅᔭᕆᐊᓕᓐᓄᑦ ᐊᑐᓕᖅᑎᑦᓯᓂᕐᒧᑦ ᐊᖏᖃᑎᒌᒍᑎᒥᒃ;

(b) ᓇᓪᓕᖏᑦ ᑐᓂᒪᓂᐅᔪᑦ, ᓇᓗᓇᐃᔭᖅᓯᒪᔪᑦ ᐊᐅᓚᓂᐅᔪᑦ, ᐊᐅᓚᓂᖏᓪᓗ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ, ᒐᕙᒪᒃᑯᖏᑦ ᑲᓇᑕᐅᑉ ᐊᒻᒪᓗ ᐊᕕᑦᑐᖅᓯᒪᔪᕐᔪᐊᓂ ᒐᕙᒪᐃᑦ, ᐃᒻᒥᒃᑯᑦ ᑲᑐᔾᔨᓗᑎᓪᓘᓐᓃᑦ, ᑎᒍᒥᐊᖅᑐᑦ ᑲᔪᓯᑎᑦᓯᓂᕐᒧᑦ;

(c) ᐊᑲᐅᓈᖅᐸᑦ, ᐱᕕᑦᓴᖃᕐᓂᐅᔪᑦ ᐱᔭᕇᕐᓂᕐᒧᑦ ᑐᓂᒪᓂᐅᔪᓂᒃ, ᓇᓗᓇᐃᖅᑕᐅᓯᒪᔪᓂᒃ ᐊᐅᓚᓂᐅᔪᓂᒃ, ᐊᐅᓚᓂᐅᔪᓂᓗ;

(d) ᑮᓇᐅᔭᐃᑦ ᖁᑦᓯᓕᕇᓐᓂᖏᑦ ᐊᑐᓕᖅᑎᑦᓯᓂᕐᒧᑦ ᐊᖏᖃᑎᒌᒍᑎᒥᒃ ᐊᕐᕌᒍᓄᑦ ᖁᓕᓄᑦ ᑭᖑᓂᖓᓂ ᒪᓕᒐᓐᖑᖅᑎᑕᐅᓂᖓᑕ ᐊᖏᖃᑎᒌᒍᑎᐅᑉ;

(e) ᑕᐃᒫᒃ ᐊᖏᖃᑎᒌᒍᑕᐅᓕᐅᒥᔮᕐᐸᑦ ᐊᖏᖃᑎᒌᑦᓯᒪᔪᓄᑦ ᐸᕐᓇᐅᑎᒧᑦ, ᑐᓂᒪᓂᐅᔪᑦ ᐊᒻᒪᓗ ᑮᓇᐅᔭᖃᖅᑎᑦᓯᓂᕐᒧᑦ ᖁᑦᓯᓂᐅᔪᑦ ᐊᑐᓕᖅᑎᑦᓯᓂᕐᒧᑦ ᐊᖏᖃᑎᒌᒍᑎᒥᒃ ᑭᖑᓕᖏᓐᓄᑦ ᐊᑕᐅᓯᐅᓐᖏᑦᑐᒧᑦ ᐊᕐᕌᒍᓄᑦ;

(f) ᐱᔪᓐᓇᕐᓂᖓᑦ ᐊᑐᓕᖅᑎᑦᓯᓂᕐᒧᑦ ᕿᒥᕐᕈᔩᑦ ᐋᖅᑭᒋᐊᕆᓂᕐᒧᑦ ᐊᐅᓚᓂᑦᓴᖏᓐᓂᒃ ᐊᑐᓕᖅᑎᑦᓯᓂᕐᒧᑦ ᐊᐅᓚᓂᐅᔪᑦ ᐊᒻᒪᓗ ᐃᓕᐅᖅᑲᖅᑕᐅᓂᖏᑦ ᐃᑲᔫᑎᑦᓴᐃᑦ ᐸᕐᓇᐅᑎᓄᑦ ᐋᖅᑭᒋᐊᕆᐊᑐᑎᓐᓇᒍ ᐸᕐᓇᐅᑎ; ᐊᒻᒪᓗ

(g) ᑐᓴᐅᒪᖃᑦᑕᐅᑎᓂᕐᒧᑦ ᐃᓕᓐᓂᐊᑎᑦᓯᓂᕐᒧᓪᓗ ᐸᕐᓇᐅᑎ ᑐᓴᖅᑎᑦᓯᒍᑕᐅᓗᓂ ᐃᓄᓐᓂᒃ ᐱᔪᒪᓂᖃᖅᑐᓂᓪᓗ ᑕᖅᑳᓐᖓᑦ ᑎᒥᐅᔪᓂᒃ ᐃᓗᓕᖏᓐᓂᒃ ᐊᑐᓕᖅᑎᑕᐅᓂᖓᓂᓪᓗ ᐊᖏᖃᑎᒌᒍᑎᐅᑉ.

37.2.3 ᐱᕕᖃᖅᑎᑦᓯᒍᑕᐅᔪᓕᒫᑦ ᐊᑐᓕᖅᑎᑦᓯᓂᕐᒧᑦ ᐸᕐᓇᐅᑎᒥ ᑲᑎᑎᑕᐅᓂᐊᖅᑐᑦ ᑳᑦᑐᓛᕈᖅᑎᑕᐅᓗᑎᒃ ᐋᒡᒐᐅᒐᓗᐊᖅ ᐊᓯᐊᒍᑦ ᐊᖏᖃᑎᒌᒍᑕᐅᑉᐸᑦ ᑎᒥᐅᔪᓄᑦ ᐸᕐᓇᐅᑎᒧᑦ.

37.2.4 ᐋᖅᑭᒋᐊᕈᑕᐅᔪᑦ ᐊᑐᓕᖅᑎᑦᓯᓂᕐᒧᑦ ᐸᕐᓇᐅᑎᒧᑦ ᐱᔭᕆᐊᖃᕐᓂᐊᖅᑐᑦ ᑎᑎᕋᖅᓯᒪᔪᑎᒍᑦ ᐊᖏᕐᓂᖏᓐᓂᒃ ᑎᒥᐅᔪᑦ ᐸᕐᓇᐅᑎᒧᑦ.

37.2.5 ᐊᑐᓕᖅᑎᑦᓯᓂᕐᒧᑦ ᐸᕐᓇᐅᑎ ᐃᓚᒋᐊᖅᑕᐅᒍᓐᓇᖅᑐᖅ ᑭᓯᐊᓂ ᐃᓚᒍᑦᓯᐅᑎᓐᖏᓪᓗᓂ ᐊᖏᖃᑎᒌᒍᑎᒧᑦ, ᐊᒻᒪᓗ ᐸᕐᓇᐅᑎ ᑐᕌᒐᖃᓐᖏᒻᒪᑦ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᐅᓂᕐᒥᒃ ᐃᓗᐊᓂ ᑐᑭᖓᑕ ᑎᑎᕋᖅᓯᒪᔪᖅ 35 ᒪᓕᒐᕐᔪᐊᓂ, 1982.

37.2.6 ᐱᕕᖃᖅᑎᑦᓯᒍᑕᐅᔪᑦ ᐅᕙᓂ ᐃᓛᒃᑰᖅᑐᒥ ᐅᕝᕙᓗ ᐊᑐᓕᖅᑎᑦᓯᓂᕐᒧᑦ ᐸᕐᓇᐅᑎᒥ ᓇᓗᓇᐃᔭᐃᔪᑦ ᐱᔭᕆᐊᓕᓐᓂᒃ ᑎᒍᒥᐊᖅᑕᐅᔪᓂᓪᓗ ᓇᐅᑐᐃᓐᓇᕐᒧᑦ ᒥᓂᔅᑕᒧᑦ, ᐊᖓᔪᖅᑳᒧᑦ ᑭᒡᒐᖅᑐᐃᔨᒧᓪᓘᓐᓃᑦ ᒐᕙᒪᒃᑯᓐᓂ ᑭᒡᒐᖅᑐᐃᓗᓂ ᒐᕙᒪᒃᑯᖏᓐᓂᒃ ᑲᓇᑕᐅᑉ ᐅᕝᕙᓗ ᐊᕕᑦᑐᖅᓯᒪᔪᕐᔪᐊᓂ ᒐᕙᒪᐃᑦ ᑐᑭᓕᐅᖅᑕᐅᓂᐊᖏᑦᑐᖅ ᑯᐃᓐ ᑲᒪᒋᔭᕆᐊᓕᖏᓐᓂᒃ ᐊᑖᓂ ᐊᖏᖃᑎᒌᒍᑎᐅᑉ ᐊᓯᔾᔨᖅᑕᐅᓗᓂ, ᑐᕋᐃᓐᓇᖅᑐᒥᒃ ᑐᕋᐃᓐᓇᖏᑦᑐᒥᓪᓘᓐᓃᑦ, ᑎᒍᒥᐊᖅᑕᐅᔪᑦ ᒐᕙᒪᒃᑯᓐᓄᑦ ᑲᓇᑕᒥ ᐊᕕᑦᑐᖅᓯᒪᔪᕐᔪᐊᓂᓗ ᒐᕙᒪᓂ.

ᐊᑐᓕᖅᑎᑦᓯᕐᓂᕐᒥᒃ ᕿᒥᕐᕈᔩᑦ

37.3.1 ᐅᓪᓗᐃᑦ 60 ᐃᓗᐊᓂ ᐅᓗᖓᓂᒃ ᒪᓕᒐᓐᖑᖅᑎᑕᐅᓚᐅᖅᑎᓪᓗᒍ ᐊᖏᖃᑎᒌᒍᑎ, ᐊᑐᓕᖅᑎᑦᓯᓂᕐᒧᑦ ᕿᒥᕐᕈᔩᑦ ᓴᖅᑭᖅᑕᐅᓂᐊᖅᑐᑦ.

37.3.2 ᐊᑐᓕᖅᑎᑦᓯᓂᕐᒧᑦ ᕿᒥᕐᕈᔩᑦ ᓯᑕᒪᐅᓂᐊᖅᑐᑦ: ᐊᑕᐅᓯᖅ ᐊᖓᔪᖅᑳᒻᒪᕆᒃ ᑭᒡᒐᖅᑐᖅᑐᖅ ᒐᕙᒪᒃᑯᖏᓐᓂᒃ ᑲᓇᑕᐅᑉ, ᐊᑕᐅᓯᖅ ᐊᖓᔪᖅᑳᒻᒪᕆᒃ ᐊᕕᑦᑐᖅᓯᒪᔪᐊᓂ ᒐᕙᒪᓂᒃ ᑭᒡᒐᖅᑐᖅᑐᖅ ᐊᒻᒪᓗ ᒪᕐᕉᒃ ᑭᒡᒐᖅᑐᖅᑑᒃ ᓇᓗᓇᐃᖅᑕᐅᓯᒪᔪᓂᒃ ᐃᓄᓐᓄᑦ ᑎᒥᖁᑕᐅᔪᓂᒃ.

37.3.3 ᐊᑐᓕᖅᑎᑦᓯᓂᕐᒧᑦ ᕿᒥᕐᕈᔩᑦ ᐃᒪᐃᓐᓂᐊᖅᑐᑦ:

(a) ᖃᐅᔨᓴᕐᓗᑎᒃ ᑐᑭᒧᐊᑦᑎᑦᓯᓗᑎᓪᓗ ᐊᑐᓕᖅᑎᑕᐅᓂᖓᓂᒃ ᐊᖏᖃᑎᒌᒍᑎᐅᑉ;

(b) ᓇᐅᑦᓯᑐᕐᓗᒍ ᐊᑐᓕᖅᑎᑕᐅᓂᖓ ᐊᑐᓕᖅᑎᑦᓯᓂᕐᒧᑦ ᐸᕐᓇᐅᑎᐅᑉ, ᓇᓗᓇᐃᖅᓯᓗᑎᒃ ᑲᔪᓯᔪᓂᒃ ᐊᒻᒪᓗ ᑭᓪᓕᓕᓐᓂᒃ ᑐᓂᒪᓂᐅᔪᓂᒃ, ᓇᓗᓇᐃᖅᑕᐅᓯᒪᔪᓂᒃ ᐊᐅᓚᓂᐅᔪᓂᒃ, ᐊᒻᒪᓗ ᐊᐅᓚᓂᐅᔪᑦ ᑲᔪᓯᓯᒪᒐᓗᐊᕐᒪᖔᑕ ᑲᔪᓯᒐᓗᐊᕐᒪᖔᑕᓗ ᒪᓕᓪᓗᑎᒃ ᐸᕐᓇᐅᑎᒥᒃ ᐃᓗᓕᖏᓐᓂᓪᓗ ᐊᖏᖃᑎᒌᒍᑎᐅᑉ ᑕᒪᓐᓇᓗ ᐱᔾᔪᑎᒋᓪᓗᒍ, ᐊᔾᔨᖏᓐᓂᒃ ᐊᑑᑎᑦᑕᐃᓕᓗᑎᒃ ᐃᒻᒥᒃᑯᑦ ᖃᐅᔨᓴᕐᓂᐅᔪᑦ, ᐸᕐᓇᐃᕆᐊᓖᑦ ᐃᒥᒃᑯᑦ ᕿᒥᕐᕈᓂᐅᔪᓂᒃ ᐊᕐᕌᒍᐃᑦ ᑕᓪᓕᒪᑦ ᐊᓂᒍᕋᐃᑉᐸᑕ ᐋᒡᒐᐅᒐᓗᐊᖅ ᐊᖏᖃᑎᒌᒍᑕᐅᑉᐸᑦ ᕿᒥᕐᕈᔨᓄᑦ;

(c) ᓇᐅᑦᓯᑐᕐᓗᒍ ᐱᕙᓪᓕᐊᓂᖓ ᐊᑐᓕᖅᑎᑦᓯᓂᕐᒧᑦ ᐃᓕᓐᓂᐊᕐᓂᒧᑦ ᐸᕐᓇᐅᑎ;

(d) ᐊᖏᕐᓗᒍ ᕿᐱᓗᓪᓗᒍᓘᓐᓃᑦ, ᑐᑭᒧᐊᑦᑎᑕᐅᓗᑎᒃ ᓈᒻᒪᓈᖅᓯᒪᔪᓂᒃ, ᐊᑐᓕᖅᑎᑦᓯᓂᕐᒧᑦ ᐃᓕᓐᓂᐊᕐᓂᒧᑦ ᐸᕐᓇᐅᑎ ᓇᐅᑦᓯᖅᑕᐅᓂᖓᓗ ᐊᐅᓚᓂᐅᔫᑉ ᓈᒻᒪᒋᔭᐅᓕᖅᐸᑦ;

(e) ᖃᓄᖅᑑᕈᑎᖃᕋᓱᐊᕐᓗᑎᒃ ᐊᖏᖃᑎᒌᓐᖏᓐᓂᖅᑕᖃᖅᐸᑦ ᓇᓗᓇᐃᖅᑕᐅᓯᒪᔪᓂ ᐃᓄᓐᓄᑦ ᑎᒥᖁᑕᐅᔪᓂ ᒐᕙᒪᒃᑯᓂᓗ ᐱᔾᔪᑎᖃᕐᓗᑎᒃ ᐊᑐᓕᖅᑎᑕᐅᓂᖓᒃ ᐊᖏᖃᑎᒌᒍᑎᐅᑉ, ᑭᓪᓕᖃᖅᑎᑦᓯᑦᑕᐃᓕᓗᑎᒃ ᐱᕕᑦᓴᖃᕐᓂᐅᔪᓂᒃ ᐋᖅᑭᒋᐊᒃᑲᐃᔨᓄᑦ ᐊᑖᓂ ᐃᓛᒃᑯᑦ 38 ᐅᕝᕙᓗ ᒪᓕᒐᖅᑎᒍᑦ ᐊᐅᓚᓂᐅᔪᓂᒃ ᐊᓯᐊᒍᑦ ᐊᑐᐃᓐᓇᐅᔪᓂᒃ;

(f) ᑕᐃᒪᐃᑦᓴᕆᐊᖃᖅᑑᔮᓕᖅᐸᑦ, ᐋᖅᑭᒋᐊᕐᓗᒋᑦ ᐊᐅᓚᓂᑦᓴᖏᑦ ᐊᑐᓕᖅᑎᑦᓯᓂᕐᒧᑦ ᐊᐅᓚᓂᐅᔪᑦ ᐊᒻᒪᓗ ᐃᓕᐅᖅᑲᖅᑕᐅᓂᖏᑦ ᐃᑲᔫᑕᐅᔪᑦ ᐊᑐᓕᖅᑎᑦᓯᓂᕐᒧᑦ ᐸᕐᓇᐅᑎᒧᑦ, ᐊᖏᖅᑕᐅᓗᑎᒃ ᐊᖏᖃᑎᒌᑦᑐᓄᑦ ᐸᕐᓇᐅᑎ ᐋᖅᑭᒋᐊᕐᓂᖅᑕᖃᕆᐊᖃᖅᐸᑦ ᐋᖅᑭᒋᐊᕈᑕᐅᔪᒧᑦ ᐸᕐᓇᐅᑎᒧᑦ;

(g) ᐃᓱᒪᓕᐅᕆᕙᓪᓗᑎᒃ ᐊᖏᖃᑎᒌᑦᑐᓄᑦ ᐊᑐᓕᖅᑎᑦᓯᓂᕐᒧᑦ ᐸᕐᓇᐅᑎᒧᑦ ᐊᑦᑐᐊᔪᑦ ᓇᓗᓇᐃᖅᑕᐅᓂᖏᓐᓄᑦ ᑮᓇᐅᔭᐃᑦ ᖁᑦᓯᓕᕇᓐᖏᑦᑕ ᐊᑐᓕᖅᑎᑕᐅᓂᖓᓄᑦ ᐊᖏᖃᑎᒌᒍᑎᐅᑉ ᐊᕐᕌᒍᒧᑦ ᐊᑕᐅᓯᐅᓐᖏᑦᑐᒧᑦ ᐅᖓᑖᓂ ᐊᕐᕌᒍᐃᑦ ᖁᓕᑦ ᓯᕗᓪᓖᑦ; ᐊᒻᒪᓗ

(h) ᐸᕐᓇᐃᕐᓂᖅ ᑐᓂᓯᓂᕐᓗ ᐊᕐᕌᒍᑕᒫᖅᓯᐅᑎᓂᒃ ᑭᓇᒃᑯᑐᐃᓐᓇᕐᓅᖓᔪᓂᒃ ᐅᓂᒃᑲᓂᒃ ᐊᑐᓕᖅᑎᑦᓯᓂᐅᑉ ᒥᑦᓵᓄᑦ ᐊᖏᖃᑎᒌᒍᑎᒥᒃ ᐱᖃᓯᐅᑎᑦᓱᑎᒃ ᐃᓱᒫᓘᑕᐅᔪᑦ ᖃᓄᐃᑦᑐᑐᐃᓐᓇᐃᑦ ᕿᒥᕐᕈᔨᓄᑦ,

(i) ᓯᕗᓕᖅᑎᖓᓐᓄᑦ ᐊᕕᑦᑐᖅᓯᒪᔪᕐᔪᐊᓂ ᒐᕙᒪᐃᑦ ᑲᑎᒻᒪᐅᑎᑦᓴᓅᖅᑕᐅᓂᖓᓄᑦ ᒪᓕᒐᓕᐅᕐᕕᒻᒥ,

(ii) ᒥᓂᔅᑕᖓᓐᓄᑦ ᐃᓄᓕᕆᔨᑐᖃᒃᑯᑦ ᑲᓇᑕᒥ ᒐᕙᒪᒃᑯᑦ ᑲᑎᒻᒪᐅᑎᑦᓴᖏᓐᓅᕐᓂᐊᖅᑎᓪᓗᒋᑦ, ᐊᒻᒪᓗ

(iii) ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ.

37.3.4 ᐊᑭᖏᑦ ᐊᑐᓕᖅᑎᑦᓯᓂᕐᒧᑦ ᕿᒥᕐᕈᔩᑦ ᑮᓇᐅᔭᖃᖅᑎᑕᐅᓂᐊᖅᑐᑦ ᒐᕙᒪᒃᑯᖏᓐᓄᑦ ᑲᓇᑕᐅᑉ ᐋᒡᒐᐅᒐᓗᐊᖅ ᐊᑐᓂᑦ ᒐᕙᒪᐃᑦ ᐊᒻᒪᓗ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᑎᒍᒥᐊᕐᓂᐊᖅᑐᑦ ᐊᑭᖏᓐᓂᒃ ᐊᑭᓕᖅᑐᕆᐊᓕᖏᓐᓂᓪᓗ ᑲᑎᒪᔨᖏᑦᑕ.

37.3.5 ᐋᖅᑭᑦᑕᐅᔪᓕᒫᑦ ᐊᑐᓕᖅᑎᑦᓯᓂᕐᒧᑦ ᕿᒥᕐᕈᔨᓄᑦ ᐊᑕᐅᓯᐅᖃᑎᒌᓐᓂᒃᑯᑦ ᐊᖏᕈᑕᐅᓂᐊᖅᑐᖅ ᕿᒥᕐᕈᔨᓕᒫᖏᓐᓄᑦ.

ᐃᓄᐃᑦ ᐊᑐᓕᖅᑎᑦᓯᕐᓂᒧᑦ ᑮᓇᐅᔭᖏᑦ

37.4.1 ᐃᓄᐃᑦ ᐊᑐᓕᖅᑎᑦᓯᓂᕐᒧᑦ ᑮᓇᐅᔭᐃᑦ ᓴᖅᑭᖅᑕᐅᓂᐊᖅᑐᖅ ᒪᓕᒐᓐᖑᖅᑎᑕᐅᓚᐅᖅᑎᓪᓗᒍ ᐊᖏᕈᑎ, ᐊᒻᒪᓗ ᐊᐅᓚᑕᐅᓂᐊᖅᓱᓂ ᓄᓇᕗᒻᒥ ᐸᐸᑦᓯᔨᓄᑦ ᑮᓇᐅᔭᓕᐅᕋᓱᐊᖅᑎᐅᒐᑎᒃ ᐸᐸᑦᓯᔩᑦ.

37.4.2 ᐃᓄᐃᑦ ᐊᑐᓕᖅᑎᑦᓯᓂᕐᒧᑦ ᑮᓇᐅᔭᖏᑦ ᐃᒪᐃᓐᓂᐊᖅᑐᑦ:

(a) ᐃᑲᔪᕐᓗᑎᒃ ᑐᓐᖓᕕᒃᑯᓐᓂᒃ ᓴᖅᑮᑎᓪᓗᒋᑦ ᑎᒥᐅᔪᓂᒃ ᑲᔪᓯᔾᔪᑕᐅᒋᐊᓕᓐᓂᒃ ᐃᓄᓐᓄᑦ ᑎᒍᒥᐊᖅᑕᖏᓐᓄᑦ ᐊᑐᓕᖅᑎᑕᐅᓂᖓᓄᑦ ᐊᖏᖃᑎᒌᒍᑎᐅᑉ; ᐊᒻᒪᓗ

(b) ᐃᑲᔪᕐᓗᑎᒃ ᐃᓄᓐᓂᒃ ᐊᑑᑎᑎᓪᓗᒋᑦ ᐱᕕᑦᓴᖃᕐᓂᐅᔪᓂᒃ, ᐱᖃᓯᐅᑎᑦᓱᑎᒃ ᖃᑭᒪᓇᓱᐊᕐᓂᕐᒧᑦ ᐱᓇᓱᐊᕐᓂᐅᔪᑦ, ᓴᖅᑭᖅᑐᑦ ᐊᖏᖃᑎᒌᒍᑎᒥᒃ.

37.4.3 ᒪᓕᒐᓐᖑᖅᑎᑕᐅᓚᐅᖅᑎᓪᓗᒍ ᐊᖏᖃᑎᒌᒍᑎ, ᒐᕙᒪᒃᑯᑦ ᑲᓇᑕᒥ ᐊᑐᐃᓐᓇᐅᑎᑦᓯᓂᐊᖅᑐᑦ $4,000,000-ᓂᒃ ᐊᑐᓕᖅᑎᑦᓯᓂᕐᒧᑦ ᑮᓇᐅᔭᓂᒃ ᓄᓇᕗᒻᒥ ᐸᐸᑦᓯᔨᓄᑦ, ᐱᒻᒪᕆᐅᑎᓪᓗᒋᑦ ᐃᓄᐃᑦ ᐊᑐᓕᖅᑎᑦᓯᓂᕐᒧᑦ ᑮᓇᐅᔭᖏᓐᓄᑦ. ᐃᓄᐃᑦ ᑎᒍᒥᐊᕐᓂᐊᖅᑐᖅ ᓇᐅᑐᐃᓐᓇᕐᓂᒃ ᐊᑐᓕᖅᑎᑦᓯᓂᕐᒧᑦ ᐊᑭᒋᔭᐅᔪᓂᒃ ᐊᑭᓕᖅᑐᖅᑕᐅᒋᐊᓕᓐᓂᒃ ᐃᓄᓐᓄᑦ ᐅᖓᑖᓅᖅᑐᓄᑦ ᑮᓇᐅᔭᐃᑦ. ᑭᓯᐊᓂᓕ, ᓇᐅᑐᐃᓐᓇᖅ ᐅᕙᓂ ᐱᕕᖃᖅᑎᑦᓯᓂᐅᔪᓂ ᓄᖅᑲᖓᒍᑕᐅᔾᔮᖏᑦᑐᖅ ᑮᓇᐅᔭᓄᑦ ᐊᐃᑦᑑᑕᐅᒍᒪᔪᓄᑦ, ᑐᓂᔭᐅᒍᒪᔪᓄᑦ, ᑮᓇᐅᔭᓄᓪᓘᓐᓃᑦ ᐊᓯᖏᓐᓃᓐᖔᖅᑐᓄᑦ.

ᓄᓇᕗᒻᒥ ᐱᓕᒻᒪᑦᓴᖅᑐᓕᕆᔩᑦ ᑲᑎᒪᔨᕋᓛᖏᑦ

37.5.1 ᐱᓕᒻᒪᑦᓴᖅᑐᓕᕆᔩᑦ ᑲᑎᒪᔨᕋᓛᖏᑦ ᓴᖅᑭᖅᑕᐅᓂᐊᖅᑐᑦ ᑕᖅᑮᑦ ᐱᖓᓱᑦ ᐃᓗᐊᓂ ᒪᓕᒐᓐᖑᖅᑎᑕᐅᓚᐅᖅᑎᓪᓗᒍ ᐊᖏᖃᑎᒌᒍᑎ, ᑲᑎᒪᔨᖃᕐᓂᐊᖅᓱᓂ 7-ᓂᒃ ᑎᓕᔭᐅᓗᑎᒃ ᐃᒫᒃ:

(a) ᑐᓐᖓᕕᒃᑯᓐᓂᒃ ᐊᒻᒪᓗ ᓯᑕᒪᓂᒃ ᐊᓯᖏᓐᓂᒃ ᓇᓗᓇᐃᖅᑕᐅᓯᒪᔪᓂᒃ ᐃᓄᓐᓄᑦ ᑎᒥᖁᑕᐅᔪᓂᒃ ᐊᑐᓂᑦ ᑎᓕᓯᓗᑎᒃ ᐊᑕᐅᓯᕐᒥᒃ; ᐊᒻᒪᓗ

(b) ᒐᕙᒪᒃᑯᑦ ᑎᓕᓯᓂᐊᖅᑐᑦ ᒪᕐᕉᓐᓂᒃ, ᐊᑕᐅᓯᖅ ᐊᖓᔪᖅᑲᐅᑎᓃᓐᖔᕐᓗᓂ ᐱᔪᓐᓇᕐᓂᖃᕐᓗᓂ ᑭᒡᒐᖅᑐᐃᓂᕐᒥᒃ ᒐᕙᒪᒃᑯᓐᓂᒃ ᑲᓇᑕᐅᑉ ᐊᑦᑐᐊᔪᓄᑦ ᐃᓕᓐᓂᐊᕐᓂᕐᒧᑦ ᐊᒻᒪᓗ ᐃᓕᓐᓂᐊᖅᑐᓕᕆᓂᕐᒨᖓᔪᓄᑦ ᐊᒻᒪᓗ ᐊᑕᐅᓯᖅ ᐊᖓᔪᖅᑲᐅᑎᓃᓐᖔᕐᓗᓂ ᐱᔪᓐᓇᕐᓂᖃᕐᓗᓂ ᑭᒡᒐᖅᑐᐃᓂᕐᒥᒃ ᐊᕕᑦᑐᖅᓯᒪᔪᕐᔪᐊᓂ ᒐᕙᒪᓂ ᐊᑦᑐᐊᔪᓄᑦ ᐃᓕᓐᓂᐊᕐᓂᕐᒧᑦ ᐃᓕᓐᓂᐊᖅᑐᓕᕆᓂᕐᒧᓪᓗ.

37.5.2 ᓄᓇᕗᒻᒥ ᐱᓕᒻᒪᑦᓴᖅᑐᓕᕆᔩᑦ ᑲᑎᒪᔨᕋᓛᖏᑦ ᐃᒪᐃᓐᓂᐊᖅᑐᑦ:

(a) ᐸᐸᑦᓯᔨᐅᓗᑎᒃ ᐱᓕᒻᒪᑦᓴᐅᑎᓄᑦ ᐸᐸᑕᐅᔪᓄᑦ ᓴᖅᑭᖅᑕᐅᔪᓄᑦ ᐊᑖᓂ ᐃᓚᖓ 8 ᐊᐅᓚᑕᐅᓗᑎᓪᓗ ᑮᓇᐅᔭᓕᐅᕋᓱᐊᕈᑕᐅᒐᑎᒃ ᐸᐸᑕᐅᔪᑦ;

(b) ᓴᖅᑮᓗᑎᒃ ᖃᐅᔨᒪᓕᑕᕐᓂᒃ ᑮᓇᐅᔭᖅᑑᑎᓄᑦ ᐱᓕᒻᒪᑦᓴᖅᑐᓕᕆᔩᑦ ᐸᐸᑕᖏᓐᓂᒃ;

(c) ᑐᑭᒧᐊᑦᑎᓪᓗᒋᑦ ᐃᓄᐃᑦ ᐊᑐᓕᖅᑎᑦᓯᓂᕐᒧᑦ ᖃᐅᔨᓴᕐᓂᖏᑦ ᓇᓗᓇᐃᔭᖅᑕᐅᓯᒪᔪᑦ ᐃᓚᖓ 6-ᒥ;

(d) ᓴᖅᑮᓗᑎᒃ ᑐᓐᖓᕕᐅᔪᓂᒃ ᖃᐅᔨᒪᓕᑕᐅᓂᐊᖅᑐᓂᒃ ᐱᕙᓪᓕᐊᓂᖏᓐᓄᑦ ᐊᑐᓕᖅᑎᑦᓯᓂᕐᒧᑦ ᐸᕐᓇᐅᑏᑦ;

(e) ᓴᖅᑮᓗᑎᒃ ᐱᓕᒻᒪᑦᓴᕐᓂᕐᒧᑦ ᐸᕐᓇᐅᑎᓂᒃ;

(f) ᖃᐅᔨᓴᕐᓗᑎᒃ ᑲᔪᓯᓂᖓᓂᒃ ᐊᑐᓕᖅᑎᑦᓯᓂᕐᒧᑦ ᐸᕐᓇᐅᑎᐅᑉ.

(g) ᓴᖅᑮᓂᖅ ᐅᖃᖃᑎᒌᓐᓂᑦᓴᐅᔪᓂᒃ ᒐᕙᒪᒃᑯᓐᓄᑦ ᐃᓄᓐᓄᓪᓗ ᖃᐅᔨᓴᑦᓯᐊᕐᓗᑎᒃ ᑲᔪᓯᓂᖃᑦᓯᐊᖅᑐᓂᒃ ᐃᓚᒍᓯᐅᑎᒐᓗᐊᕐᒪᖔᑕ ᐃᓕᓐᓂᐊᕈᑕᐅᔪᑦ ᑮᓇᐅᔭᐃᑦ ᐊᑐᓕᖅᑎᑦᓯᓂᕐᒧᑦ ᐃᓕᓐᓂᐊᕐᓂᒧᑦ ᐸᐸᑦᓯᔨᓄᑦ ᑕᕝᕙᐅᔪᓄᑦ ᒐᕙᒪᒃᑯᓐᓂ ᐃᓕᓐᓂᐊᕋᑦᓴᐅᔪᓄᑦ;

(h) ᐸᕐᓇᐃᕐᓂᖅ ᐃᒻᒥᒃᑯᑦ ᕿᒥᕐᕈᔭᐅᓂᖓᓐᓂᒃ ᐊᐅᓚᓂᖏᑦᑕ ᓄᓇᕗᒻᒥ ᐱᓕᒻᒪᑦᓴᐃᔩᑦ ᐊᒻᒪᓗ ᐊᑐᓕᖅᑎᑕᐅᓂᖏᑦ ᐊᑐᓕᖅᑎᑦᓯᓂᕐᒧᑦ ᐃᓕᓐᓂᐊᕐᓂᕐᒧᑦ ᐸᕐᓇᐅᑏᑦ ᐊᑑᑎᒍᒫᕐᓂᐊᖅᑐᖅ ᐅᖓᑖᓂᐅᓐᖏᑦᑐᖅ ᑕᓪᓕᒪᖓᓐᓂ ᓇᓪᓕᐅᓂᖅᓯᐅᕐᓂᖓᑦᑕ ᐅᓪᓗᖓᑕ ᒪᓕᒐᓐᖑᖅᑎᑕᐅᓚᐅᖅᑎᓪᓗᒍ ᐊᖏᖃᑎᒌᒍᑎ ᐊᒻᒪᓗ ᐊᕐᕌᒍᐃᑦ ᑕᓪᓕᒪᑦ ᐊᓂᒍᕋᐃᑉᐸᑕ ᑭᖑᕐᖓᒍᑦ ᐆᒪᓂᖃᕐᓂᖓᓂ ᐸᕐᓇᐅᑎ; ᐊᒻᒪᓗ

(i) ᐸᕐᓇᐃᕐᓂᖅ ᐊᕐᕌᒍᑕᒫᖅᓯᐅᑎᓂᒃ ᐅᓂᒃᑳᓂᒃ ᐊᐅᓚᓂᖏᓐᓄᑦ, ᐱᖃᓯᐅᑎᑦᓱᑎᒃ ᐊᑭᓕᖅᑐᕆᐊᓖᑦ ᐊᑐᓕᖅᑎᑦᓯᓂᕐᒧᑦ ᐃᓕᓐᓂᐊᕐᓂᕐᒧᑦ ᐸᐸᑦᓯᔨᓄᑦ, ᐊᑐᓕᖅᑎᑦᓯᓂᕐᒧᑦ ᕿᒥᕐᕈᔨᓄᑦ.

ᐃᓄᐃᑦ ᐊᑐᓕᖅᑎᑦᓯᓂᕐᒧᑦ ᐃᓕᓐᓂᐊᕐᓂᕐᒧᑦ ᖃᐅᔨᕐᓴᓂᖓᑦ

37.6.1 ᑕᖅᑮᑦ ᐱᖓᓱᑦ ᐃᓗᐊᓐᓂ ᐅᓪᓗᖓᓂ ᒪᓕᒐᓐᖑᖅᑎᑕᐅᓚᐅᖅᑎᓪᓗᒍ ᐊᖏᖃᑎᒌᒍᑎ, ᐃᓄᓐᓄᑦ ᐊᑐᓕᖅᑎᑦᓯᓂᕐᒧᑦ ᐃᓕᓐᓂᐊᕐᓂᕐᒧᑦ ᖃᐅᔨᕐᓴᕐᓂᖃᕐᓂᐊᖅᑐᖅ ᓄᓇᕗᒻᒥ.

37.6.2 ᐃᓄᐃᑦ ᐊᑐᓕᖅᑎᑦᓯᓂᕐᒧᑦ ᐃᓕᓐᓂᐊᕐᓂᒧᑦ ᖃᐅᔨᓴᕐᓂᖓᑦ ᑲᔪᓯᑎᑕᐅᓂᐊᖅᑐᖅ ᐊᑖᓂ ᑐᑭᒧᐊᑦᑎᑦᓯᓂᖏᑦᑕ ᓄᓇᕗᒻᒥ ᐱᓕᒻᒪᑦᓴᐃᔩᑦ.

37.6.3 ᐃᓄᐃᑦ ᐊᑐᓕᖅᑎᑦᓯᓂᕐᒧᑦ ᐃᓕᓐᓂᐊᕐᓂᕐᒧᑦ ᖃᐅᔨᓴᕐᓂᖓᑦ ᐱᔭᕇᖅᑕᐅᓂᐊᖅᑐᖅ ᑕᖅᑮᑦ 6 ᐃᓗᐊᓐᓂ ᐱᒋᐊᓚᐅᖅᑎᓪᓗᒋᑦ.

37.6.4 ᐃᓄᐃᑦ ᐊᑐᓕᖅᑎᑦᓯᕐᓂᒧᑦ ᐃᓕᓐᓂᐊᕐᓂᖓᑦ ᐃᒪᐃᓐᓂᐊᖅᑐᖅ:

(a) ᓇᓗᓇᐃᕐᓗᒋᑦ ᐃᖅᑲᓇᐃᔮᖑᒋᐊᖃᕋᔭᖅᑐᑦ ᐊᑐᓕᖅᑎᓪᓗᒍ ᐊᖏᖃᑎᒌᒍᑎ, ᐱᖃᓯᐅᑎᑦᓱᑎᒃ,

(i) ᐃᖅᑲᓇᐃᔮᑦ ᐃᓗᐊᓐᓂ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦᑕ ᐊᒻᒪᓗ ᑎᒥᖁᑕᐅᔪᑦ ᑭᓇᒃᑯᑐᐃᓐᓇᕐᓄᑦ ᒐᕙᒪᓄᑦ ᓇᓗᓇᐃᖅᑕᐅᔪᑦ ᐃᓛᒃᑯᑦ 10-ᒥ, ᐊᒻᒪᓗ

(ii) ᐃᖅᑲᓇᐃᔮᑦ ᐃᓗᐊᓐᓂ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐱᔭᕆᐊᓖᑦ ᐃᓄᓐᓄᑦ ᑲᔪᓯᑎᑦᓯᓂᐊᕐᓗᑎᒃ ᑎᒍᒥᐊᖅᑕᒥᓐᓂᒃ ᐊᑐᓕᖅᑎᑦᓯᓂᕐᒧᑦ ᐊᖏᖃᑎᒌᒍᑎᒥᒃ, ᐱᖃᓯᐅᑎᑦᓱᑎᒃ ᑕᐃᒃᑯᐊ ᐃᑲᔪᖅᑐᑦ ᐃᓄᓐᓂᒃ ᐊᑑᑎᑎᓪᓗᒋᑦ ᖃᑭᒪᓇᓱᐊᕐᓂᕐᒧᑦ ᐱᕕᑦᓴᖃᕐᓂᐅᔪᓂᒃ ᐱᓯᒪᔪᓂᒃ ᐊᖏᖃᑎᒌᒍᑎᒥᒃ;

(b) ᓇᓗᓇᐃᖅᓯᓗᑎᒃ ᐱᔪᓐᓇᕐᓂᐅᒋᐊᓕᓐᓂᒃ ᐃᖅᑲᓇᐃᔮᖑᒋᐊᓕᓐᓄᑦ ᓇᓗᓇᐃᖅᑕᐅᔪᓄᑦ ᑎᑎᕋᖅᓯᒪᔪᓂ (a); ᐊᒻᒪᓗ

(c) ᓇᓗᓇᐃᔭᕐᓗᒋᑦ ᐊᑐᓕᖅᑎᑦᓯᓂᕐᒧᑦ ᐃᓕᓐᓂᐊᕐᓂᐅᒋᐊᓖᑦ ᐃᓄᓐᓄᑦ ᐊᑦᑐᐊᔪᓄᑦ ᐃᖅᑲᓇᐃᔮᓄᑦ ᓇᓗᓇᐃᖅᑕᐅᔪᑦ ᑎᑎᕋᖅᓯᒪᔪᒥ (a), ᑮᑕᑲᐃᓐᓈᖅᑐᒧᑦ ᐊᑯᓃᖅᑐᒧᓪᓗ, ᐊᑐᓗᕐᑎᒃ ᐊᑐᐃᓐᓇᐅᔪᓂᒃ ᐃᖅᑲᓇᐃᔭᕈᓐᓇᖅᑐᓄᑦ ᑲᑎᖅᓱᖅᑕᐅᓯᒪᔪᓂᒃ.

37.6.5 ᐊᐅᓚᑕᐅᓂᖓ ᐃᓄᐃᑦ ᐊᑐᓕᖅᑎᑦᓯᓂᕐᒧᑦ ᐃᓕᓐᓂᐊᕐᓂᕐᒧᑦ ᖃᐅᔨᓴᕐᓂᕐᒥᒃ ᑐᑭᒧᐊᑦᑎᑕᐅᒍᓐᓇᖅᑐᑦ ᖃᐅᔨᓴᖅᑕᐅᓂᖃᕐᓗᑎᒃ ᐃᓄᐃᑦ ᐃᖅᑲᓇᐃᔭᕈᓐᓇᖅᑐᑦ ᑐᓐᖓᕕᒋᓗᒍ ᑎᑎᕋᖅᓯᒪᔪᖅ 23.3.1 ᐅᕝᕙᓗ ᐊᓯᖏᑦ ᖃᐅᔨᓴᑕᖅᑕᐅᓯᒪᔪᑦ ᐃᓄᐃᑦ ᐃᓕᓐᓂᐊᕐᓂᕆᒋᐊᓕᖏᓐᓅᖓᔪᑦ.

ᐊᑐᓕᖅᑎᑦᓯᕙᓪᓕᐊᓂᕐᒧᑦ ᐱᓕᒻᒪᒃᓴᐅᑎᓄᑦ ᐸᕐᓇᐅᑎᑦ

37.7.1 ᐊᑐᓕᖅᑎᑦᓯᓂᕐᒧᑦ ᐃᓕᓐᓂᐊᕐᓂᕐᒧᑦ ᐸᕐᓇᐅᑎ ᓴᖅᑭᖅᑕᐅᓂᐊᖅᑐᖅ ᓄᓇᕗᒻᒥ ᐱᓕᒻᒪᑦᓴᐃᔨᒃᑯᓐᓄᑦ ᑲᒪᒋᔭᖃᕐᓗᑎᒃ ᐊᑐᓕᖅᑎᑦᓯᓂᕐᒧᑦ ᐃᓕᓐᓂᐊᕐᓂᐅᒋᐊᓕᓐᓂᒃ ᓇᓗᓇᐃᖅᑕᐅᔪᓂᒃ ᐊᑖᓂ ᐃᓄᐃᑦ ᐊᑐᓕᖅᑎᑦᓯᓂᕐᒧᑦ ᐃᓕᓐᓂᐊᕐᓂᕐᒧᑦ ᖃᐅᔨᓴᕐᓂᐅᑉ.

37.7.2 ᐊᑐᓕᖅᑎᑦᓯᓂᕐᒧᑦ ᐃᓕᓐᓂᐊᕐᓂᕐᒧᑦ ᐸᕐᓇᐅᑎ ᓇᓗᓇᐃᖅᓯᓂᐊᖅᑐᖅ:

(a) ᑕᕝᕙᐅᔪᑦ ᒐᕙᒪᒃᑯᓐᓂ ᐃᓕᓐᓂᐊᕋᑦᓴᐅᔪᑦ, ᐃᓗᐊᓐᓂ ᑕᕝᕙᐅᔪᑦ ᑮᓇᐅᔭᖅᑑᑎᑦᓴᖏᑦᑕ, ᑎᑭᐅᑎᓯᒪᔪᑦ ᐃᓄᐃᑦ ᐊᑐᓕᖅᑎᑦᓯᕐᓂᒧᑦ ᐃᓕᓐᓂᐊᕐᓂᕆᒋᐊᓕᖏᓐᓄᑦ ᓇᓗᓇᐃᖅᑕᐅᔪᓄᑦ ᐊᑖᓂ ᑎᑎᕋᖅᓯᒪᔪᖅ 37.7.1; ᐊᒻᒪᓗ

(b) ᐃᓕᓐᓂᐊᕐᓂᕐᒧᑦ ᐊᐅᓚᔾᔭᒋᐊᕈᑕᐅᔪᑦ ᑮᓇᐅᔭᖃᖅᑎᑕᐅᓂᐊᖅᑐᑦ ᐊᑐᓕᖅᑎᑦᓯᓂᕐᒧᑦ ᐃᓕᓐᓂᐊᕐᓂᕐᒧᑦ ᐸᐸᑦᓯᔩᑦ ᐃᓄᐃᑦ ᐃᓕᓐᓂᐊᕐᓂᕆᒋᐊᓕᖏᑦ ᓇᓗᓇᐃᖅᑕᐅᔪᑦ ᐊᑖᓂ ᑎᑎᕋᖅᓯᒪᔪᖅ 37.7.1 ᑎᑭᐅᑎᔭᐅᒍᓐᓇᖏᑉᐸᑕ ᐊᑖᓂ ᑎᑎᕋᖅᓯᒪᔪᖅ (a).

37.7.3 ᐊᑐᓕᖅᑎᑕᐅᓂᖏᑦ ᐊᑐᓕᖅᑎᑦᓯᓂᕐᒧᑦ ᐃᓕᓐᓂᐊᕐᓂᕐᒧᑦ ᐸᕐᓇᐅᑏᑦ ᑐᑭᒧᐊᑦᑎᑕᐅᒍᓐᓇᖅᑐᑦ ᐃᓗᓕᖅᑐᓂᖅᓴᐅᓗᑎᒃ ᐃᓄᐃᑦ ᐃᓕᓐᓂᐊᕋᑦᓴᖏᓐᓄᑦ ᐊᐅᓚᔾᔭᒋᐊᕈᑎᓂᒃ.

37.7.4 ᓄᓇᕗᒻᒥ ᐱᓕᒻᒪᑦᓴᐃᔨᑦ ᓯᕗᒧᑦᑎᑦᓯᓂᐊᖅᑐᖅ ᓇᓕᖅᑲᖏᓐᓂᒃ ᐊᑐᓕᖅᑎᑦᓯᓂᕐᒧᑦ ᐃᓕᓐᓂᐊᕐᓂᕐᒧᑦ ᐸᕐᓇᐅᑎᓂᒃ ᐊᑐᓕᖅᑎᑦᓯᓂᕐᒧᑦ ᕿᒥᕐᕈᔨᓄᑦ ᕿᒥᕐᕈᓂᐊᖅᑎᓪᓗᒋᑦ ᓈᒻᒪᓴᕐᓗᑎᓪᓗ.

ᐊᑐᓕᖅᑎᑦᓯᓂᕐᒧᑦ ᐃᓕᓐᓂᐊᕐᓂᕐᒧᑦ ᐸᐸᑦᓯᔩᑦ

37.8.1 ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᓴᖅᑮᓂᐊᖅᑐᑦ ᐊᑐᓕᖅᑎᑦᓯᓂᕐᒧᑦ ᐃᓕᓐᓂᐊᕐᓂᕐᒧᑦ ᐸᐸᑦᓯᔨᓂᒃ.

37.8.2 ᑐᕌᒐᕆᔭᖓᑦ ᐊᑐᓕᖅᑎᑦᓯᓂᕐᒧᑦ ᐃᓕᓐᓂᐊᕐᓂᒧᑦ ᐸᐸᑦᓯᔩᑦ ᑮᓇᐅᔭᖃᖅᑎᑦᓯᒍᑕᐅᓂᐊᖅᑐᑦ ᐊᐅᓚᓂᖏᓐᓄᑦ ᓄᓇᕗᒻᒥ ᐱᓕᒻᒪᑦᓴᐃᔩᑦ ᐱᖃᓯᐅᑎᑦᓱᑎᒃ:

(a) ᐃᓄᐃᑦ ᐊᑐᓕᖅᑎᑦᓯᓂᕐᒧᑦ ᐃᓕᓐᓂᐊᕐᓂᕐᒧᑦ ᖃᐅᔨᓴᕐᓂᖅ;

(b) ᐱᕙᓪᓕᐊᓂᖓ ᐊᑐᓕᖅᑎᑦᓯᓂᕐᒧᑦ ᐃᓕᓐᓂᐊᕐᓂᕐᒧᕐᑦ ᐸᕐᓇᐅᑎᐅᑉ;

(c) ᐃᓕᓐᓂᐊᕐᓂᖅ ᑐᓐᖓᕕᖃᕐᓗᑎᒃ ᐊᑐᓕᖅᑎᑦᓯᓂᕐᒧᑦ ᐃᓕᓐᓂᐊᕐᓂᕐᒧᑦ ᐸᕐᓇᐅᑎᒥᒃ; ᐊᒻᒪᓗ

(d) ᐊᐅᓚᓂᖏᑦ ᓄᓇᕗᒻᒥ ᐱᓕᒻᒪᑦᓴᐃᔩᑦ, ᐱᖃᓯᐅᑎᑦᓱᑎᒃ ᐊᑭᒋᔭᐅᔪᑦ ᐊᑦᑐᐊᔪᑦ ᐊᐅᓚᑕᐅᓂᖓᓄᑦ ᐸᐸᑦᓯᔩᑦ, ᐋᒡᒐᐅᒐᓗᐊᖅ ᐊᑐᓂᑦ ᒐᕙᒪᐃᑦ ᐊᒻᒪᓗ ᓇᓗᓇᐃᖅᑕᐅᓯᒪᔪᒧᑦ ᐃᓄᓐᓄᑦ ᑎᒥᖁᑕᐅᔪᑦ ᑎᒍᒥᐊᕐᑐᑦ ᐊᑭᖏᓐᓂᒃ ᐊᑭᓕᖅᑐᕆᐊᓕᖏᓐᓂᓪᓗ ᓇᒻᒥᓂᖅ ᑲᑎᒪᔨᖁᑎᒥ,

37.8.3 ᓴᖅᑭᖅᑕᐅᑉᐸᑦ ᐊᑐᓕᖅᑎᑦᓯᓂᕐᒧᑦ ᐃᓕᓐᓂᐊᕐᓂᕐᒧᑦ ᐸᐸᑦᓯᔩᑦ ᐅᕝᕙᓗ ᒪᓕᒐᓐᖑᖅᑎᑕᐅᓂᖓ ᐊᖏᖃᑎᒌᒍᑎᐅᑉ, ᓇᓪᓕᑐᐃᓐᓇᖓ ᑭᖑᓪᓕᐅᑉᐸᑦ, ᒐᕙᒪᒃᑯᑦ ᑲᓇᑕᒥ ᑐᓂᓯᓂᐊᖅᑐᖅ $13,000,000-ᕝᓂᒃ ᐊᑐᓕᖅᑎᑦᓯᓂᕐᒧᑦ ᑮᓇᐅᔭᓄᑦ ᐊᑐᓕᖅᑎᑦᓯᓂᕐᒧᑦ ᐃᓕᓐᓂᐊᕐᓂᕐᒧᑦ ᐸᐸᑦᓯᔨᓄᑦ. ᓇᐅᑐᐃᓐᓇᖅ ᐱᕕᖃᖅᑎᑦᓯᒍᑕᐅᔪᖅ ᐅᕘᓇ ᓄᖅᑲᖓᒍᑕᐅᔾᔮᖏᑦᑐᖅ ᐸᐸᑦᓯᔨᓄᑦ ᐊᐃᑦᑐᖅᑕᐅᓂᕐᒥᒃ, ᑮᓇᐅᔭᖃᖅᑎᑕᐅᓂᕐᒥᓘᓐᓃᑦ ᐊᓯᖏᓐᓂᒃ.

ᐃᓘᓐᓇᐃᓅᖓᔪᖅ

37.9.1 ᐋᒡᒐᐅᒐᓗᐊᖅ ᐱᕕᖃᖅᑎᑕᐅᓂᒐᒍᑦ ᐊᖏᖃᑎᒌᒍᑎᒃᑯᑦ, ᒐᕙᒪᒃᑯᑦ ᑐᓂᒪᓂᖃᕐᓂᐊᖏᑦᑐᑦ ᑐᓐᖓᕕᒋᑦᓱᒍ ᐊᖏᖃᑎᒌᒍᑎ ᑮᓇᐅᔭᖃᖅᑎᑦᓯᓂᕐᒧᑦ ᐃᓕᓐᓂᐊᕐᓂᖏᓐᓄᑦ ᐃᓄᐃᑦ.

37.9.2 ᐃᓚᖓ 5 ᑎᑭᓪᓗᒍ 8 ᐊᑑᑎᓐᖏᑦᑐᑦ ᐊᑦᑐᐊᔪᓄᑦ ᐃᓕᓐᓂᐊᕐᓂᕐᒧᑦ ᐱᔾᔪᑕᐅᓪᓗᓂ ᐃᓛᒃᑯᑦ 23, ᑭᓯᐊᓂ ᐊᑐᓕᖅᑎᑦᓯᕐᓂᕐᒧᑦ ᐃᓕᓐᓂᐊᕐᓂᖅ ᑐᑭᒧᐊᑦᑎᑕᐅᒍᓐᓇᖅᑐᖅ ᓇᐅᑐᐃᓐᓇᕐᒧᑦ ᐃᓕᓐᓂᐊᕐᓂᐅᔪᒧᑦ ᐊᑖᓂ ᐃᖅᑲᓇᐃᔮᑉ ᓯᕗᕐᖓᓂ ᐃᓕᓐᓂᐊᕐᓂᕐᒧᑦ ᐸᕐᓇᐅᑏᑦ ᓴᖅᑭᖅᑕᐅᔪᑦ ᐊᑖᓂ ᐃᓛᒃᑯᑦ 23.

37.9.3 ᓇᐅᑐᐃᓐᓇᖅ ᐅᕙᓃᑦᑐᖅ ᐃᓛᒃᑰᖅᑐᒥ ᓄᖅᑲᐅᒥᖓᒍᑕᐅᔾᔮᖏᑦᑐᖅ ᑐᓂᒪᓂᖏᓐᓄᑦ ᒐᕙᒪᒃᑯᑦ ᐊᑖᓂ ᐃᓛᒃᑯᑦ 23 ᐅᕝᕙᓗ ᐊᑦᑐᐃᓂᖃᔾᔮᖏᑦᑐᖅ ᐃᓄᐃᑦ ᐃᓚᐅᑎᒍᓐᓇᕐᓂᖏᓐᓂᒃ ᐱᕙᓪᓕᕈᑎᖃᕈᓐᓇᕐᓂᖏᓐᓂᓪᓗ ᒐᕙᒪᒃᑯᓐᓂ ᐃᓕᓐᓂᐊᕋᑦᓴᐅᓕᐅᒥᔮᖅᐸᓐᓂᐊᖅᑐᑦ.