ARTICLE 30
ᐃᓘᓐᓈᒍᑦ ᑖᒃᓰᔭᐅᑏᑦ
ᐃᓘᓐᓇᐃᓐᓅᖓᔪᑦ ᒪᓕᒐᐃᑦ
30.1.1 ᐱᑕᖃᔾᔮᖏᑦᑐᖅ ᒐᕙᒪᑐᖃᒃᑯᓐᓂᒃ, ᐊᕕᑦᑐᖅᓯᒪᔪᕐᔪᐊᓂᒃ ᓄᓇᓕᓐᓂᓘᓐᓃᑦ ᒐᕙᒪᓂᒃ ᑖᒃᓰᔭᕐᓂᕐᒥᒃ ᐅᕝᕙᓗ ᐊᔾᔨᒐᓚᖏᓐᓂᒃ ᐊᑭᓖᑎᑦᓯᓂᐅᔪᓂᒃ ᐊᑦᑐᐊᔪᓂᒃ ᐊᑭᓕᑦᑕᐅᓂᖏᓐᓄᑦ ᓇᓕᖅᑲᓕᐅᖅᑕᐅᓂᖏᓐᓄᓘᓐᓃᑦ ᓄᓇᕗᒻᒥ ᐸᐸᑦᓯᔩᑦ, ᐅᕝᕙᓗ ᓄᓇᑖᖃᑕᐅᔪᑦ ᐊᑖᓂ ᑎᑎᕋᖅᓯᒪᔪᖅ 29.1.4, ᐅᑯᓇᓐᖓᑦ ᖃᑦᓯᐅᓂᖏᓐᓂᒃ ᐊᑭᓕᑦᑕᐅᔪᓂᒃ ᒐᕙᒪᒃᑯᖏᓐᓄᑦ ᑲᓇᑕᐅᑉ ᑐᓐᖓᕕᒋᑦᓱᒍ ᐊᖏᕈᑎ:
(a) ᓇᐅᑐᐃᓐᓇᕐᓂᒃ ᐱᒻᒪᕆᓐᓂᒃ ᐊᐅᓪᓛᑎᑦᓯᓂᐅᔪᖅ ᐃᓛᒃᑯᑦ 29-ᒥ; ᐊᒻᒪᓗ
(b) ᓇᐅᑐᐃᓐᓇᐃᑦ ᐊᑐᖅᑐᐊᖅᑕᐅᔪᑦ ᐊᑭᓕᕈᒫᕐᓂᐊᖅᓱᑎᒃ ᐱᒻᒪᕆᐅᑎᓄᑦ ᐊᐅᓪᓛᖅᑎᑕᐅᔪᓄᑦ ᐊᑭᓕᐅᑎᓄᑦ ᓇᓗᓇᐃᔭᖅᑕᐅᔪᓄᑦ ᐃᓛᒃᑯᑦ 29-ᒥ.
30.1.2 ᑐᓐᖓᕕᒋᑦᓱᒍ ᑎᑎᕋᖅᓯᒪᔪᖅ 30.1.1, ᑖᒃᓰᔭᕐᓂᕐᒧᑦ ᒪᓕᒐᐃᑦ ᐃᓘᓐᓇᐃᓐᓄᑦ ᐊᑑᑎᔪᓄᑦ ᐊᑑᑎᓂᐊᖅᑐᑦ ᓄᓇᕗᒻᒥ ᐸᐸᑦᓯᔨᓄᑦ, ᐊᓯᖏᑦ ᐱᔪᑦ ᐃᓚᖓᓂᒃ ᐱᒻᒪᕆᐅᑎᓄᑦ ᐊᐅᓪᓛᖅᑎᑕᐅᔪᑦ, ᐊᒻᒪᓗ ᐱᖃᑕᐅᔪᒧᑦ ᓇᓪᓕᑐᐃᓐᓇᖏᓐᓂᒃ ᐱᒻᒪᕆᐅᑎᓅᖓᔪᓂᒃ ᐅᕝᕙᓗ ᐃᑖᔪᓂᒃ ᓄᓇᕗᒻᒥ ᐸᐸᑦᓯᔨᒃᑯᓐᓂᒃ.
30.1.3 ᐃᓄᐃᑦ ᓄᓇᖁᑎᖏᑦ ᑕᑯᓐᓇᖅᑕᐅᓂᐊᑦᑐᑦ ᖁᒥᐅᑕᐅᒪᓐᖏᒋᐊᖏᑦ ᐱᔾᔪᑕᐅᓪᓗᓂ ᑎᑎᕋᖅᓯᒪᔪᖅ 87 ᐊᓪᓚᐃᑦ ᒪᓕᒐᕐᔪᐊᖏᑦ, R.S.C 1985, c.1-5.
ᑮᓇᐅᔭᓕᐊᖑᔪᑦ ᐃᓄᐃᑦ ᓄᓇᖁᑎᖏᓐᓂᒃ ᐊᒻᒪᓗ
30.2.1 ᑮᓇᐅᔭᓕᐊᓕᒫᑦ, ᐊᑐᖅᐊᕈᑏᑦ, ᓂᖏᖅᑕᐅᔪᑦ ᐊᓯᓕᒫᖏᓪᓗ ᐃᑖᔪᑦ ᐅᕝᕙᓗ ᐱᔭᐅᓯᒪᒧᑦ ᐃᓄᐃᑦ ᓄᓇᖁᑎᖏᓐᓂᒃ ᑖᒃᓰᔭᕈᑕᐅᓂᐊᖅᑐᑦ ᐊᑖᓂ ᒪᓕᒐᐃᑦ ᐃᓘᓐᓇᐃᓐᓄᑦ ᐊᑑᑎᔪᑦ ᐋᒡᒐᐅᒐᓗᐊᖅ ᐊᓯᐊᒍᑦ ᐱᕕᖃᑦᑎᑕᐅᑉᐸᑕ ᐊᖏᕈᑎᑎᒍᑦ.
30.2.2 ᐊᑭᖏᑦ ᑎᒍᓯᓂᖓᑕ ᐃᓅᑉ ᐅᕝᕙᓗ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᓱᓇᑯᐃᓐᓇᕐᒧᑦ ᐱᓪᓚᕆᖁᑎᒧᑦ ᐱᔭᐅᔪᒧᑦ ᐊᑖᓂ ᐊᖏᕈᑎᐅᑉ, ᐊᓯᖏᑦ ᐊᑮᕈᑉᐸᓪᓕᐊᔪᑦ ᐱᖁᑎᒋᔭᐅᔪᑦ, ᐃᒪᐃᓐᓂᐊᖅᑐᑦ, ᐱᔾᔪᑕᐅᓪᓗᓂ ᑖᒃᓰᔭᕐᓂᕐᒧᑦ ᒪᓕᒐᕐᔪᐊᖅ, ᑕᑯᓐᓴᖅᑕᐅᓂᐊᖅᑐᑦ ᐊᔾᔨᖃᕆᐊᖏᑦ ᐊᑭᓪᓗᐊᕆᔭᐅᔪᒥᒃ ᑕᕝᕙᓂ ᐅᓪᓗᖓᓂ ᒥᑦᓯᑎᓐᓂ:
(a) ᑎᒍᓯᓂᖅ ᐱᖁᑎᒋᔭᐅᔪᒥᒃ ᑎᑎᕋᖅᑕᐅᑉᐸᑦ ᐊᑎᖓᓂ ᐃᓅᑉ ᐅᕝᕙᓗ ᓇᓗᓇᐃᖅᑕᐅᓯᒪᔪᖅ ᐃᓄᓐᓄᑦ ᑎᒥᖁᑕᐅᔪᖅ; ᐅᕝᕙᓗ
(b) ᐱᔪᓐᓇᕐᓂᐅᔪᖅ ᐱᔪᒪᔭᕆᖃᖅᑐᖃᖅᐸᓪᓘᓐᓃᑦ ᐱᔭᐅᓗᓂ ᐃᓄᒻᒧᑦ ᐅᕝᕙᓗ ᓇᓗᓇᐃᖅᑕᐅᓯᒪᔪᒧᑦ ᐃᓄᓐᓄᑦ ᑎᒥᖁᑕᐅᔪᒧᑦ.
30.2.3 ᐱᓪᓚᕆᒻᒥᒃ ᐱᖁᑎᒥᒃ ᐱᔭᐅᔪᖃᖅᐸᑦ ᐊᑖᓂ ᐊᖏᕈᑎᐅᑉ, ᐊᓯᐊᓂᒃ ᐊᑮᕈᑉᐸᓪᓕᐊᔪᑦ ᐱᖁᑏᑦ, ᓴᒃᑯᑕᐅᑉᐸᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ (“ᐊᐅᓪᓛᑎᑦᓯᔪᖅ”
(a) ᐃᓄᒻᒧᑦ (“ᐊᐅᓪᓛᑎᑦᓯᔪᖅ”), ᐊᒻᒪᓗ ᐱᓪᓚᕇᑦ ᐱᖁᑎᒋᔭᐅᔪᑦ ᓴᒃᑯᑕᐅᓯᒪᒌᓐᖏᑉᐸᑕ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᐊᓯᐊᓄᑦ ᐃᓄᒻᒧᑦ, ᐅᕝᕙᓗ
(b) ᐊᕐᕌᒍᑦ ᖁᓕᑦ ᐃᓗᐊᓂ ᑐᓂᔭᐅᔪᖃᓚᐅᖅᑎᓪᓗᒍ ᑕᐃᒪᐃᑦᑐᓂᒃ ᐱᖁᑕᐅᔪᓂᒃ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓂ, ᑕᐃᒃᑯᓄᖓ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᐊᓯᖏᓐᓄᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ (“ᐊᐅᓪᓛᑎᑦᓯᔪᑦ”).
ᐱᓪᓚᕆᒃ ᐱᖁᑎᒋᔭᐅᔪᖅ ᐃᒪᐃᓐᓂᐊᖅᑐᖅ, ᐱᔾᔪᑕᐅᓪᓗᓂ ᑖᒃᓰᔭᕐᓂᕐᒧᑦ ᒪᓕᒐᕐᔪᐊᖅ, ᑕᑯᓐᓇᖅᑕᐅᓂᐊᖅᑐᖅ ᓴᒃᑯᑕᐅᓯᒪᒋᐊᖓ ᐊᐅᓪᓛᑎᑦᓯᔪᒧᑦ ᑲᔪᓯᓂᐊᕐᓗᓂ ᓴᒃᑯᑕᐅᓂᕐᒧᑦ ᐊᔾᔨᓪᓗᐊᖓᓄᑦ ᐊᖏᓂᖅᓴᒧᓪᓘᓐᓃᑦ ᖃᑦᓯᐅᓂᖓᓄᑦ ᐊᐅᓚᓂᐅᒐᔭᖅᑐᓄᑦ ᓴᒃᑯᐃᓂᕐᒧᑦ ᐊᒻᒪᓗ ᐋᖅᑭᒋᐊᖅᓯᒪᔪᖅ ᐊᑭᖓᖑᑕ ᑐᓐᖓᕕᖓ ᐊᔾᔨᒋᒋᐊᖃᖅᓱᓂᐅᑉ ᖃᑦᓯᐅᓂᖓᑕ ᐊᑭᒋᒐᔭᓐᖑᐊᖅᑕᖓᑕ ᓴᒃᑯᑕᐅᓕᕈᓂ.
30.2.4 ᒪᓕᒐᐃᑦ ᑎᑎᕋᖅᓯᒪᔪᒥ 30.22 ᐊᒻᒪᓗ 30.2.3 ᐊᑑᑎᓂᐊᖅᑐᑦ ᐊᑮᕈᑉᐸᓪᓕᐊᔪᓄᑦ ᐱᖁᑎᒋᔭᐅᔪᓄᑦ ᐋᖅᑭᒋᐊᕐᓂᖃᕐᓗᓂ ᑕᐃᒪᐃᑦᓴᕆᐊᖃᖅᐸᑦ.