ARTICLE 17
ᐱᔾᔪᑕᐅᔪᑦ ᐃᓄᐃᑦ ᓄᓇᖁᑎᖏᓐᓄᑦ
ᐃᓘᓐᓇᐃᓐᓅᖓᔪᑦ
17.1.1 ᐱᔾᔪᑎᓪᓗᐊᑕᐅᔪᖅ ᐃᓄᐃᑦ ᓄᓇᖁᑎᖏᓐᓄᑦ ᐊᑐᐃᓐᓂᐅᓇᑎᑦᓯᓂᖅ ᐃᓄᓐᓂᒃ ᐱᔪᓐᓇᐅᑎᖏᓐᓂᒃ ᓄᓇᒧᑦ ᖃᐅᔨᒪᑎᑦᓯᒍᑕᐅᓗᑎᓪᓗ ᖃᑭᒪᓇᓱᐊᕈᓐᓇᕐᓂᖏᓐᓂᒃ ᐃᓄᐃᑦ , ᐊᐅᓚᓂᖃᕐᓗᑎᒃ ᑐᓐᖓᕕᓕᒻᒥᒃ ᐃᓄᐃᑦ ᐃᓅᓯᒃᑯᑦ ᐱᖅᑯᓯᒃᑯᓪᓗ ᑭᓐᖒᒪᒋᔭᖏᓐᓂᒃ ᓂᕆᐅᒋᔭᖏᓐᓂᓪᓗ.
17.1.2 ᐃᓄᐃᑦ ᓄᓇᖁᑎᖏᑦ ᓂᕆᐅᒋᔭᐅᔪᑦ ᐃᓚᒍᑦᓯᐅᔾᔨᓂᐊᕆᐊᖏᑦ ᓄᓇᓂᒃ ᐅᑯᓇᓐᖓᑦ ᐃᓗᓕᓕᓐᓂᒃ, ᓯᕗᓪᓕᐅᑎᒋᐊᓕᑦᑎᑐᑦ ᑎᑎᕋᖅᐸᓪᓕᐊᓯᒪᓐᖏᑦᑐᑦ:
(a) ᓄᓇᐃᑦ ᐊᑑᑎᖃᖅᑐᑦ ᐆᒪᔪᓕᕆᓂᕐᒧᑦ ᐱᔾᔪᑎᖃᖅᓱᑎᒃ, ᐱᖃᓯᐅᑎᑦᓱᑎᒃ
(i) ᐊᖑᓇᓱᕝᕕᓪᓗᐊᑕᐃᑦ ᐊᓯᖏᓪᓗ ᐊᖑᓇᓱᕝᕖᑦ,
(ii) ᓄᓇᐃᑦ ᕿᑐᕐᖏᐅᕐᕕᐅᔪᑦ ᐅᕝᕙᓗ ᐊᑑᑎᖃᖅᑐᑦ ᓄᖑᕈᑎᓗᐊᑦᑕᐃᓕᒪᓂᖅ ᐱᔾᔪᑕᐅᓗᓂ,
(iii) ᓄᓇᐃᑦ ᐱᕈᖅᓰᕕᐅᒍᓐᓇᖅᑐᑦ ᐆᒪᔪᕐᓂᒃ,
(iv) ᓄᓇᐃᑦ ᒫᓐᓇ ᓄᓇᒋᔭᐅᔪᑦ ᓄᓇᓕᕋᓛᖑᑐᐃᓐᓇᕆᐊᓖᓪᓘᓐᓃᑦ,
(v) ᓄᓇᐃᑦ ᐊᑑᑎᓖᑦ ᖁᕕᐊᒋᓪᓗᒍ ᐊᖑᓇᓱᑦᑎᓄᑦ ᐅᕝᕙᓗ ᐊᓯᖏᓐᓄᑦ ᐳᓚᕋᑦᑎᓄᑦ ᑐᕌᖓᔪᓄᑦ; ᐊᒻᒪᓗ
(b) ᓄᓇᐃᑦ ᐊᑑᑎᓕᓪᓗᐊᑕᐃᑦ ᐊᑦᑐᐊᔪᓄᑦ ᐱᕙᓪᓕᐊᑎᑕᐅᓂᖏᓐᓄᑦ ᓄᓇᒥᐅᑕᐅᓐᖏᑦᑐᑦ, ᐱᖃᓯᐅᑎᑦᓱᑎᒃ;
(i) ᓄᓇᐃᑦ ᖃᐅᔨᒪᔭᐅᔪᑦ ᐅᔭᕋᑦᓯᐊᕙᖃᕆᐊᖏᑦ ᐅᔭᕋᑦᓯᐊᕙᖃᑐᐃᓐᓇᕆᐊᖃᕆᐊᖏᓪᓘᓐᓃᑦ,
(ii) ᓄᓇᐃᑦ ᐊᑑᑎᖃᖅᑎᑕᐅᔪᑦ ᐊᔾᔨᒌᓐᖏᑦᑐᓄᑦ ᐊᐅᓚᓂᐅᔪᓄᑦ ᐃᓪᓗᓄᓪᓗ ᐊᑦᑐᐊᔪᓄᑦ ᐱᕙᔾᓕᐊᓂᖏᓐᓄᑦ ᐱᕈᒃᑲᓐᓂᕈᓐᓇᖏᑦᑐᑦ;
(c) ᓄᓇᐃᑦ ᑮᓇᐅᔭᓕᐅᕈᑕᐅᒍᓐᓇᖅᑐᑦ; ᐊᒻᒪᓗ
(d) ᓄᓇᐃᑦ ᐃᑦᓴᕐᓂᑕᖅᑕᓖᑦ, ᐱᐅᓯᐅᓯᒪᔪᓄᑦ ᐱᖅᑯᓯᕐᒧᓪᓗ ᐱᒻᒪᕇᑦ.
17.1.3 ᐃᓄᐃᑦ ᓄᓇᖁᑎᖏᑦ, ᐱᕕᓕᒫᒃᑯᑦ, ᐊᑐᐃᓐᓇᐅᑎᑦᓯᓂᐊᖅᑐᑦ ᐊᔾᔨᒌᓐᖏᑦᑐᓂᒃ ᐃᓗᓕᖏᓐᓂᒃ ᓇᓗᓇᐃᔭᖅᑕᐅᔪᓂᒃ ᑕᑉᐱᒃᑯᓇᓂ ᐊᑦᓱᖐᒍᑕᐅᓗᑎᒃ ᓇᓕᒧᒌᑦᓯᐊᖅᑐᓂᒃ ᖃᑭᒪᓇᓱᐊᕐᓂᕐᒧᑦ ᐱᕙᓪᓕᐊᓂᐅᔪᓂᒃ. ᑭᓯᐊᓂᓕ, ᑕᑯᓐᓇᖅᑕᐅᓂᖏᑦ ᐃᓗᓕᖏᑦᑕ ᐊᑦᑐᐊᔪᑦ ᓇᐅᑐᐃᓐᓴᕐᒧᑦ ᓄᓇᓕᓐᓄᑦ ᐊᕕᑦᑐᖅᓯᒪᓂᕐᒧᓪᓘᓐᓃᑦ ᐊᑑᑎᓂᐊᖅᑐᑦ ᑖᒃᑯᓇᓐᖓᓪᓗᐊᖅ ᐊᑑᑎᒍᓐᓇᖅᑐᓂᓪᓗ ᖃᑭᒪᓇᓱᐊᕐᓂᒃᑯᑦ ᐱᕕᑦᓴᐅᔪᓂᒃ ᐊᑐᐃᓐᓇᕐᓂᒃ ᐊᒻᒪᓗ ᓄᓇᓖᑦ ᐊᕕᑦᑐᖅᓯᒪᓂᐅᔪᓪᓘᓐᓃᑦ ᐱᔪᒪᔭᖏᓐᓂᒃ.
17.1.4 ᐊᖏᖃᑎᒌᑦᑐᑦ ᐊᖏᖅᑐᑦ ᐱᕕᖃᖅᑎᑕᐅᔪᓂᒃ ᐅᕙᓂ ᐃᓛᒃᑰᖅᑐᒥ ᒪᓕᑦᑐᑦ ᐊᑦᑐᐊᔪᓄᑦ ᐃᓄᐃᑦ ᓄᓇᖁᑎᖏᓐᓄᑦ ᑎᒍᔭᐅᔪᓄᑦ ᐅᓪᓗᖓᓂ ᓂᕈᐊᕈᑕᐅᑎᓪᓗᒍ ᐊᖏᕈᑎ.
17.1.5 ᓇᓪᓕᑐᐃᓐᓇᖏᑦ ᒐᕙᒪᒃᑯᑦ ᐃᓄᐃᓪᓘᓐᓃᑦ ᐱᖃᕐᓂᕈᓐᓇᖏᑦᑐᑦ ᐊᐅᓚᔾᔭᒋᐊᕈᑕᐅᒃᑲᐃᓗᑎᔾᓘᓐᓃᑦ ᑐᓐᖓᕕᖃᕐᓗᑎᒃ ᓈᓚᓐᖏᓂᕐᒥᒃ ᐆᒥᖓ ᐃᓛᒃᑯᖅᑐᒥᒃ ᐊᑦᑐᐊᔪᓄᑦ ᐃᓄᐃᑦ ᓄᓇᖁᑎᖏᓐᓄᑦ ᑎᒍᔭᐅᔪᓄᑦ ᐅᓪᓗᖓᓂ ᓂᕈᐊᕈᑕᐅᑎᓪᓗᒍ ᐊᖏᕈᑎ.