ARTICLE 41

ᑲᓐᕗᐃᑐ ᓖᒃ ᓄᓇᖁᑎᖏᑦ

ᐃᓘᓐᓈᓅᖓᔪᖅ

41.1.1 ᒪᓕᒐᓐᖑᖅᑎᑕᐅᓚᐅᖅᑎᓪᓗᒍ ᐊᖏᖃᑎᒌᒍᑎ, ᒐᕙᒪᒃᑯᑦ ᑐᓂᓯᓂᐊᖅᑐᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᓄᓇᖁᑎᒥᓂᒃ ᐃᓱᒪᖅᓱᓂᕐᒥᒃ ᓇᒻᒥᓂᖃᓪᓚᕆᑦᑎᐅᓕᖅᑎᓪᓗᒋᑦ, ᐱᖃᓯᐅᑎᑦᓱᑎᒃ ᐅᔭᕋᓐᓂᐊᕐᕖᑦ ᐱᕈᒃᑲᓐᓂᕈᓇᓐᖏᑦᑐᓪᓗ ᐅᔭᕋᑦᓯᐊᕙᐃᑦ ᓇᐃᐱᑕᐅᑐᐃᓐᓇᕆᐊᓖᑦ ᐃᓗᐊᓂ, ᕐᑳᖓᓂ ᐅᕝᕙᓘᓐᓃᑦ ᐊᑎᖏᓐᓂ ᓄᓇᐃᑦ, ᓄᓇᓂ ᓇᓗᓇᐃᔭᖅᑕᐅᓯᒪᔪᓂ ᐅᐃᒍ 41-1.

41.1.2 ᓄᓇᐃᑦ ᐅᖃᐅᓯᐅᔪᑦ ᑎᑎᕋᖅᓯᒪᔪᒥ 41.1.1 ᑕᐃᔭᐅᓂᐊᓐᖏᑦᑐᑦ ᐃᓄᐃᑦ ᓄᓇᖁᑎᖏᓐᓂᒃ.

41.1.3 ᓄᓇᐃᑦ ᐅᖃᐅᓯᐅᔪᑦ ᑎᑎᕋᖅᓯᒪᔪᒥ 41.1.1, ᓯᕗᓂᑦᓯᐊᖓᓂ ᐅᓪᓗᖓᑕ ᑎᒍᔭᐅᓂᖏᓐᓂᒃ ᓄᓇᐃᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ, ᑐᓐᖓᕕᒋᑦᓱᒋᑦ ᐱᔪᓐᓇᐅᑏᑦ ᐱᕈᒃᑲᓐᓂᕈᓐᓇᖏᑦᑐᓄᑦ, ᐊᓯᖏᓐᓄᑦ ᓇᓗᓇᐃᖅᑕᐅᓯᒪᔪᑦ, ᐃᒫᒃ:

(a) ᐅᔭᕋᓐᓂᐊᕐᓂᕐᒧᑦ ᓚᐃᓴᓐᓯᐅᖏᑉᐸᑦ;

(b) ᑐᓂᔭᐅᓯᒪᑉᐸᑦ ᐊᑖᓂ ᐊᕕᑦᑐᖅᓯᒪᔪᕐᔪᐊᑦ ᓄᓇᓄᑦ ᒪᓕᒐᕐᔪᐊᖏᑦᑎᒍᑦ; ᐊᒻᒪᓗ

(c) ᔫᓂ 12, 1992-ᖑᑎᓪᓗᒍ, ᐊᑭᕋᖅᑐᕈᑕᐅᒍᓐᓇᖅᓯᒪᑉᐸᑦ ᒐᕙᒪᒃᑯᓐᓄᑦ,

ᑕᐃᓐᓇ ᐱᔪᓐᓇᐅᑎ ᑲᔪᓯᓂᐊᖅᑐᖅ ᑐᓐᖓᕕᖃᕐᓗᓂ ᐃᒪᐃᓕᖓᓂᖏᓐᓂᒃ ᒪᓕᒋᐊᓕᖏᓐᓂᓪᓗ, ᐱᖃᓯᐅᑎᑦᓱᑎᒃ ᐱᔪᓐᓇᐅᑏᑦ ᐊᑖᓂ ᐊᕕᑦᑐᖅᓯᒪᔪᕐᔪᐊᓄᑦ ᓄᓇᓄᑦ ᒪᓕᒐᕐᔪᐊᑉ ᐅᕝᕙᓗ ᑭᓇᒃᑯᑐᐃᓐᓇᕐᓄᑦ ᓄᓇᓂᒃ ᑐᓂᓯᓂᕐᒧᑦ ᒪᓕᒐᕐᔪᐊᖅ ᐊᑑᑎᔪᖅ ᑕᐃᑲᓂ ᐅᓪᓗᖓᓂ ᐅᕝᕙᓗ ᐊᑖᓂ ᓇᐅᑐᐃᓐᓇᐅᑉ ᑭᖑᑉᕕᐅᑎᔫᑉ ᒪᓕᒐᐅᑦ ᐊᑑᑎᔫᑉ ᑕᐃᒪᐃᑦᑐᓅᖓᔪᓄᑦ ᒐᕙᒪᒃᑯᑦ ᓄᓇᖁᑎᖏᓐᓂ.

41.1.4 ᓇᐅᑐᐃᓐᓇᖅ ᐱᕕᖃᖅᑎᑦᓯᒍᑕᐅᔪᖅ ᑭᖑᕝᕕᐅᑎᔪᒃᑯᑦ ᒪᓕᒐᒃᑯᑦ ᐅᖃᐅᓯᐅᔪᒃᑯᑦ ᑎᑎᕋᖅᓯᒪᔪᒥ 41.1.3 ᐊᑦᑐᐃᓂᖃᕋᔭᖅᑐᖅ ᐊᑐᕈᓐᓃᑎᑦᓯᓗᓂ ᐱᔪᓐᓇᐅᑎᖏᓐᓂᒃ ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᑭᓯᐊᓂ ᐊᑑᑎᓂᐊᖅᑐᑦ ᐊᖏᖅᑕᐅᓯᒪᑎᓪᓗᒋᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ.

41.1.5 ᑎᑎᕋᖅᓯᒪᔪᑦ 21.7.3 ᑎᑭᑦᓱᒍ 21.7.7 ᐊᑑᑎᓂᐊᖅᑐᑦ ᐱᔪᓐᓇᐅᑎᓄᑦ ᑲᔪᓯᑎᑕᐅᔪᓄᑦ ᑎᑎᕋᖅᓯᒪᔪᒥ 41.1.3-ᒥ ᓲᕐᓗ ᑕᖅᑳᓐᖓᑦ ᐱᔪᒪᔭᕆᔭᐅᑎᓪᓗᒋᑦ ᐅᖃᐅᓯᐅᔪᑦ ᑎᑎᕋᖅᓯᒪᔪᒥ 21.7.2.

41.1.6 ᑎᑎᕋᖅᓯᒪᔪᑦ 19.8.17 ᑎᑭᑦᓱᒍ 19.8.19 ᐊᑑᑎᓂᐊᖅᑐᑦ ᓄᓇᓄᑦ ᐅᖃᐅᓯᐅᔪᓄᑦ ᑎᑎᕋᖅᓯᒪᔪᒥ 41.1.1 ᓲᕐᓗ ᑕᐃᒃᑯᐊ ᓄᓇᐃᑦ ᐃᓄᓐᓄᑦ ᓄᓇᖁᑕᐅᑎᓪᓗᒋᑦ.

41.1.7 ᓇᓗᓇᐃᖅᑕᐅᓯᒪᔪᑦ ᐃᓄᓐᓄᑦ ᑎᒥᖁᑕᐅᔪᑦ ᐱᓂᐊᖅᑐᑦ ᒐᕙᒪᒃᑯᓐᓂᒃ ᓱᓇᑐᐃᓐᓇᕐᓂᒃ ᐊᑭᓕᐅᑕᐅᔪᓂᒃ ᐊᑭᓖᒍᑕᐅᒋᐊᓕᓐᓂᓘᓐᓃᑦ ᒐᕙᒪᒃᑯᓐᓄᑦ ᑎᒍᒥᐊᖅᑐᒧᑦ ᐱᔪᓐᓇᐅᑎᒥᒃ ᑲᔪᓯᔪᒥᒃ ᑎᑎᕋᖅᓯᒪᔪᒥᒃ 41.1.3-ᒥ ᐊᑐᕐᓂᒧᕐᑦ ᐅᕝᕙᓗ ᐊᑐᖅᑕᐅᓂᖏᓐᓄᑦ ᐅᔭᕋᑦᓯᐊᕙᐃᑦ ᐊᓯᖏᑦ ᓇᓗᓇᐃᖅᑕᐅᓯᒪᔪᑦ ᐊᑦᑐᐊᓂᖃᖅᑐᑦ ᐊᑯᓐᓂᐅᔪᒧᑦ ᑭᖑᕐᖓᓂ ᑎᒍᔭᐅᓚᐅᖅᑎᓪᓗᒋᑦ ᓄᓇᐃᑦ.

41.1.8 ᐃᓛᒃᑰᖅᑐᖅ 26 ᐊᑑᑎᓂᐊᖅᑐᖅ ᐊᐅᓚᓂᐅᔪᒧᑦ ᐱᖃᓯᐅᔾᔨᔪᒧᑦ ᓴᓇᓂᕐᒥᒃ ᐅᕝᕙᓗ ᐊᑐᕐᓂᕐᒥᒃ ᑭᓯᐊᓂ ᕿᓂᓐᖏᒃᑲᓗᐊᕐᓗᑎᒃ ᐅᔭᕋᑦᓯᐊᕙᓐᓂᒃ ᐊᓯᖏᓐᓂᒃ ᓇᓗᓇᐃᖅᑕᐅᓯᒪᔪᑦ ᓄᓇᓂ ᐅᖃᐅᓯᐅᔪᓂ ᑎᑎᕋᖅᓯᒪᔪᒥ 41.1.1-ᒥ, ᓲᕐᓗ ᐊᐅᓚᓂᐅᔪᖅ ᐱᒻᒪᕆᐊᓘᓗᓂ ᐊᐅᓚᓂᐅᒋᐊᖓ ᑕᐃᒫᒃ ᓇᓗᓇᐃᖅᑕᐅᓯᒪᒻᒪᑦ ᑕᐃᑲᓂ ᐃᓛᒃᑰᖅᑐᒥ, ᐋᒡᒐᐅᒐᓗᐊᖅ ᐱᕚᓪᓕᕈᑎᑦᓴᐃᑦ ᐊᑦᑐᐊᓂᐊᖅᑐᑦ ᐊᑑᑎᔪᒧᑦ ᐊᖏᓂᖓᓄᓪᓗ ᑕᐃᑦᓱᒪ ᐊᐅᓚᓂᐅᔫᑉ ᑕᐃᑲᓃᑦᑑᑉ ᓄᓇᓂ ᐊᒻᒪᓗ ᓴᓇᕕᐅᓂᖓᓂᒃ ᑕᐃᒃᑯᐊ ᓄᓇᐃᑦ ᐊᑦᑐᐊᔪᑦ ᐊᐅᓚᓂᕐᒧᑦ ᐊᓯᖏᓐᓂᒃ ᐊᑦᑐᐊᔪᓂᒃ ᓄᓇᓂᒃ.

ᓇᓗᓇᐃᔭᐃᔪᑦ ᓄᓇᓂᒃ

(ᑎᑎᕋᖅᓯᒪᔪᖅ 41.1.1)

ᐅᑯᐊ ᓄᓇᐃᑦ ᑕᑯᑦᓴᐅᑎᑕᐅᔪᑦ ᑲᓇᑕᒥ ᓄᓇᓐᖑᐊᒥ 76E ᑐᖅᑯᖅᓯᒪᔪᓂ ᐊᓪᓚᕝᕕᖓᓂ ᐊᕕᑦᑐᖅᓯᒪᔪᓂ ᐊᐅᓚᑦᓯᔨᐅᑉ, ᓄᓇᓕᕆᔩᑦ ᒥᓂᔅᑕᐅᕕᖓᓂ ᐃᓄᓕᕆᔨᑐᖃᒃᑯᑦ ᔭᓗᓇᐃᒥ, ᓄᓇᓐᖑᐊᖅ ᑕᐃᔭᐅᔪᖅ “ᐃᓄᐃᑦ ᓄᓇᖁᑎᖏᑦ ᑲᓐᕗᐃᑐ ᓖᒃᒥ-ᒥ” ᐊᑎᓕᐅᖅᑕᐅᓯᒪᑦᓱᑎᒃ ᐊᐅᒡᒍᓯ 21. 1992 ᐊᖏᖃᑎᒌᑦᑑᓐᓄᑦ:

(a) ᓄᓇ 01/76E, ᐱᖓᓐᓇᖓᓂ Fry Inlet ᑲᓐᕗᐃᑐ ᓖᒃᒥ, ᐊᖏᓂᖃᖅᓱᓂ 406 ᑭᑉᐹᕆᑦᑐᑦ ᑭᓗᒦᑕᐃᑦ (154 ᑭᑉᐹᕆᑦᑐᑦ ᒪᐃᓕᓪᓗᐊᑦ), ᒥᑦᓵᓂᓘᓐᓃᑦ;

(b) ᓄᓇ 02/76E, ᑲᓇᓐᓇᖓᓂ Fry Inlet ᑯᓐᕗᐃᑐ ᓖᒃᒥ, ᐊᖏᓂᖃᖅᓱᓂ 166 ᑭᑉᐹᕆᑦᑐᑦ ᑭᓗᒦᑕᐃᑦ (64 ᑭᑉᐹᕆᑦᑐᑦ ᒪᐃᓕᓪᓗᐊᑦ), ᒥᑦᓵᓂᓘᓐᓃᑦ.