ARTICLE 9

ᓴᐳᔾᔭᐅᓯᒪᔪᑦ ᓄᓇᐃᑦ

ᑐᑭᖏᑦ

9.1.1 ᐅᕙᓂ ᐃᓛᒃᑰᖅᑐᒥ:

“ᓴᐳᔾᔭᐅᓯᒪᔪᑦ ᓄᓇᐃᑦ” ᑐᑭᓕᒃ ᓇᐅᑐᐃᓐᓇᖅ ᓴᐳᔾᔭᐅᓯᒪᔪᖅ ᓄᓇᐃᑦ ᑕᕝᕙᐅᔪᑦ ᐅᓪᓗᖓ ᐊᖏᕈᑕᐅᑎᓪᓗᒍ ᐊᖏᕈᑎ ᑎᑎᕋᖅᑕᐅᓯᒪᔪᑦ ᐅᐃᒍ 9-1-ᒥ, ᐊᒻᒪᓗ ᓇᓪᓕᑐᐃᓐᓇᖏᑦ ᐅᑯᐊ ᓄᓇᐃᑦ ᓴᖅᑭᖅᑕᐅᑉᐸᑕ ᒪᓕᒐᖅᑎᒍᑦ;

(a) ᑲᓇᑕᒥ ᐆᒪᔪᖃᕐᕕᐅᔪᑦ;

(b) ᑐᓛᔪᓄᑦ ᑎᒻᒥᐊᖃᕐᕕᐅᔪᑦ ᑎᒻᒥᐊᕐᕕᐅᑦᑕᐃᓕᔪᑦ;

(c) ᓄᓇᕐᔪᐊᕐᒥ ᐆᒪᔪᖁᑎᖏᑦᑕ ᐆᒫᔾᔪᑎᖏᓐᓂᒃ ᖃᐅᔨᓴᕐᕖᑦ;

(d) ᐃᓅᑉ ᐃᓅᔾᔪᑎᒋᔪᓐᓇᖅᑕᖏᑦ ᐊᕙᑎᑦᑎᓃᑦᑐᑦ;

(e) ᓄᓇᕐᔪᐊᕐᒥ ᐃᑦᓴᕐᓂᑕᕐᓄᑦ ᐱᖅᑯᓯᑐᖃᕐᓄᓪᓗ ᐃᓂᒋᔭᐅᔪᑦ;

(f) ᐆᒪᔪᖅᑕᐃᓕᕖᑦ;

(g) ᐊᑦᑕᓇᖅᓯᓯᒪᔪᓂᒃ ᐆᒪᔪᖃᕐᕖᑦ;

(h) ᑲᓇᑕᒥ ᐱᑐᖃᖃᕐᕖᑦ;

(i) ᑲᓇᑕᒥ ᐱᑐᖃᖃᕐᕖᑦ ᒥᓐᖑᐃᕐᓯᕐᕖᑦ;

(j) ᒪᓴᐃᑦ ᐃᒪᕐᒥᐅᓂᒃ ᑎᒻᒥᐊᖃᕐᕖᑦ;

(k) ᑲᓇᑕᒥ ᓄᓇᐃᑦ ᐊᔾᔨᐅᖏᑦᑑᑏᑦ;

(l) ᑲᓇᑕᒥ ᑰᑐᖃᐃᑦ;

(m) ᐱᑐᖃᖃᕐᕖᑦ ᓄᓇᐃᑦ; ᐊᒻᒪᓗ

(n) ᐊᓯᖏᑦ ᓄᓇᐃᑦ ᐊᓚᒡᒐᐃᓗᐊᓐᖑᐊᖅᑐᑦ ᐊᑑᑎᖃᕐᓂᖏᓐᓄᑦ ᐊᕙᑎᓕᒫᑦᑎᓐᓃᑦᑐᓄᑦ, ᐱᖅᑯᓯᑦᑎᓐᓄᑦ, ᐅᕙᑦᓯᐊᕈᕐᓂᑕᕐᓄᑦ, ᖃᐅᔨᓴᕐᓂᕐᒧᑦ ᐊᔾᔨᒐᓚᖏᓐᓄᓪᓗ ᐱᔾᔪᑕᐅᔪᓄᑦ.

ᐃᓘᓐᓇᐃᓐᓅᖓᔪᑦ

9.2.1 ᕐᑳᖓᒍᒃᑲᓐᓂᖅ ᒥᓐᖑᐃᕐᓯᕐᕖᑦ, ᐊᓯᖏᑦ ᓄᓇᐃᑦ ᐊᓚᒡᒐᐃᓗᐊᓐᖑᐊᖅᑐᑦ ᐊᑑᑎᖃᕐᓂᖏᓐᓄᑦ ᐊᕙᑎᓕᒫᑦᑎᓐᓃᑦᑐᓄᑦ, ᐱᖅᑯᓯᑦᑎᓐᓄᑦ, ᐅᕙᑦᓯᐊᕈᕐᓂᑕᕐᓄᑦ, ᖃᐅᔨᓴᕐᓂᕐᒧᑦ ᐊᔾᔨᒐᓚᖏᓐᓄᓪᓗ ᐱᔾᔪᑕᐅᔪᓄᑦ, ᐊᔾᔨᐅᖏᑦᑐᒥᒃ ᓴᐳᑎᒋᐊᓕᓐᓄᑦ. ᐃᓄᐃᑦ ᖁᕕᐊᒋᔭᖃᕐᓂᐊᖅᑐᑦ ᐊᔾᔨᐅᖏᑦᑐᓂᒃ ᐱᔪᓐᓇᐅᑎᒥᓂᒃ ᐱᕚᓪᓕᕈᑎᑦᓴᒥᓂᓪᓗ ᐊᑦᑐᐊᔪᓂᒃ ᑖᒃᑯᓄᖓ ᓄᓇᓄᑦ.

ᓴᐳᔾᔨᓂᖅ ᐊᐅᓚᑦᓯᓂᕐᓗ

9.3.1 ᒐᕙᒪᒃᑯᑦ, ᐃᓱᒪᓯᐅᕆᓚᐅᕐᓗᑎᒃ ᐃᓄᓐᓂᒃ, ᐊᐅᓚᓂᖃᕐᓂᐊᖅᑐᑦ ᖃᐅᔨᓴᕐᓂᖃᕐᓗᑎᒃ ᓇᓗᓇᐃᖅᓯᒍᑎᑦᓴᒥᒃ ᑭᓐᖒᒪᒋᔭᐅᓂᖓᓂᒃ ᓄᑖᑉ ᒪᓕᒐᐅᑉ ᐋᖅᑭᒋᐊᕈᑕᐅᔪᓪᓘᓐᓃᑦ ᑕᕝᕙᐅᒌᖅᑐᒧᑦ ᒪᓕᒐᕐᒧᑦ ᑎᓕᓯᓂᕐᒧᑦ ᐊᒻᒪᓗ ᐊᐅᓚᑦᓯᓂᕐᒧᑦ ᓴᐳᑎᔭᐅᓯᒪᔪᓂᒃ ᓄᓇᓂᒃ ᐱᓱᕝᕕᐅᔪᓂᒃ ᑕᕆᐅᕐᒥᓗ ᓄᓇᕗᒻᒥ. ᑕᒪᓐᓇ ᖃᐅᔨᓴᕐᓂᐅᔪᖅ ᐱᔭᕇᖅᑕᐅᓂᐊᖅᑐᖅ ᐅᓂᒃᑳᓕᐊᖑᓗᓂᓗ ᒐᕙᒪᒃᑯᓐᓄᑦ ᐊᕐᕌᒎᒃ ᒪᕐᕉᒃ ᐃᓗᐊᓐᓂ ᐅᓪᓗᖓᓂᒃ ᐊᒋᕈᑕᐅᓂᖓᑕ ᐊᖏᕈᑎᐅᑉ.

9.3.2 ᓴᖅᑭᖅᑕᐅᓂᖏᑦ, ᐲᖅᑕᐅᓂᖏᑦ ᐊᓯᔾᔨᖅᑕᐅᓂᖏᓪᓘᓐᓃᑦ ᑭᓪᓕᒋᔭᐅᔪᑦ ᓴᐳᑎᔭᐅᓯᒪᔪᓄᑦ ᓄᓇᓄᑦ ᐊᑦᑐᐊᔪᓄᑦ ᐊᐅᓇᑕᐅᓂᖏᓐᓄᑦ ᓴᐳᑎᔭᐅᓂᖏᓐᓄᓪᓗ ᐆᒪᔪᐃᑦ ᐆᒪᔪᖃᕐᕖᓪᓗ ᑐᓐᖓᕕᖃᕐᓂᐊᖅᑐᑦ ᐊᖏᖅᑕᐅᓂᖏᓐᓂᒃ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ ᑐᓐᖓᕕᒋᑦᓱᒍ 5.2.34(a). ᓴᐳᑎᔭᐅᓯᒪᔪᑦ ᓄᓇᐃᑦ ᐊᐅᓚᑕᐅᓂᐊᑦᑐᑦ ᑕᒪᒃᑮᓐᓄᑦ ᒐᕙᒪᒃᑯᓐᓄᑦ ᓇᓗᓇᐃᖅᑕᐅᓯᒪᔪᓄᓪᓗ ᐃᓄᓐᓄᑦ ᑎᒥᖁᑕᐅᔪᓄᑦ ᑕᐃᒪᐃᓕᖓᒻᒪᑕ 9.3.7-ᒥ.

9.3.3 ᑭᓪᓕᖃᖅᑎᖏᒃᑲᓗᐊᖅᓱᒍ ᐊᑑᑎᒋᐊᓕᒃ 2.12.1-ᒥ, ᐊᑐᓂᑦ ᓄᓇᐃᑦ ᐃᓄᐃᑦ ᓄᓇᖁᑎᖏᑦ ᓇᓗᓇᐃᖅᑕᐅᓯᒪᔪᑦ ᐅᐃᒍ 9-2-ᒥ ᐃᓗᐊᓃᑦᑐᑦ ᑭᓪᓕᖏᑦᑕ ᓴᐳᑎᔭᐅᓯᒪᔪᑦ ᓄᓇᐃᑦ ᑕᕝᕙᐅᒌᖅᑐᑦ ᐅᓪᓗᖓᓂ ᐊᒋᕈᑕᐅᑎᓪᓗᒍ ᐊᖏᕈᑎ ᐃᒪᐃᓐᓂᐊᖅᑐᑦ, ᐲᖅᑕᐅᓐᖏᑐᐊᖅᐸᑕ ᑭᓪᓕᖏᑦᑕ ᐊᓯᔾᔨᖅᑕᐅᓂᖏᑦᑎᒍᑦ ᓴᐳᑎᔭᐅᓯᒪᔪᑦ ᓄᓇᐃᑦ, ᐃᓚᒋᔭᐅᖏᓐᓇᕐᓂᐊᖅᑐᑦ ᐊᒻᒪᓗ ᑐᓐᖓᕕᖃᕐᓗᑎᒃ ᑐᓛᔪᓄᑦ ᑎᒻᒥᐊᓄᑦ ᒪᓕᒐᕐᔪᐊᕐᒥ ᐅᕝᕙᓗ ᐊᕕᑦᑐᖅᓯᒪᔪᓂ ᐆᒪᔪᕐᓄᑦ ᒪᓕᒐᕐᔪᐊᖅ ᐊᑑᑎᔫᑉ ᑕᐃᒪᐃᑦᑐᓂ ᓄᓇᓂ.

9.3.4 ᑭᓪᓕᖃᖅᑎᖏᒃᑲᓗᐊᖅᓱᒍ ᐊᑑᑎᒋᐊᓕᒃ 2.12.1 ᐊᒻᒪᓗ ᐃᑉᐱᒋᓪᓗᒍ ᒐᕙᒪᒃᑯᑦ ᓴᖅᑮᑐᐃᓐᓇᕆᐊᖃᕐᓂᖓᑦ ᓴᐳᑎᔭᐅᓯᒪᔪᓂᒃ ᓄᓇᓂᒃ ᐃᓘᓐᓇᐃᓐᓂ ᓄᓇᓂ ᓇᓗᓇᐃᖅᑕᐅᓯᒪᔪᓂ ᐅᐃᒍ 9-3-ᒥ, ᐱᖃᓯᐅᔾᔨᔪᑦ ᐃᓄᐃᑦ ᓄᓇᖁᑎᖏᓐᓂᒃ ᓇᓗᓇᐃᖅᑕᐅᓯᒪᔪᓂᒃ ᐅᐃᒍ 9-3-ᒥ, ᐃᓄᐃᑦ ᒐᕙᒪᒃᑯᓪᓗ ᐊᖏᖃᑎᒌᑉᐳᑦ ᓴᐳᑎᔭᐅᓯᒪᔪᑦ ᓄᓇᐃᑦ ᓴᖅᑭᖅᑕᐅᒐᔭᕐᓂᖅᐸᑕ, ᑖᒃᑯᐊ ᐃᓄᐃᑦ ᓄᓇᖁᑎᖏᑦ ᓇᓗᓇᐃᖅᑕᐅᓯᒪᔪᑦ ᐅᐃᒍ 9-3-ᒥ ᑐᓐᖓᕕᖃᕐᓂᐊᑦᑐᑦ ᑐᓛᔪᓄᑦ ᑎᒻᒥᐊᓄᑦ ᒪᓕᒐᕐᔪᐊᖅᒥᒃ ᐅᕝᕙᓗ ᑲᓇᑕᒥ ᐆᒪᔪᕐᓄᑦ ᒪᓕᒐᐃᑦᓂ ᐊᑑᑎᔪᑦ ᑖᒃᑯᓄᖓ ᓄᓇᓄᑦ.

9.3.5 ᐃᓛᒃᑰᖅᑐᖅ 11 ᐊᒻᒪᓗ 12 ᐊᑑᑎᓂᐊᖅᑐᑦ ᓴᐳᑎᔭᐅᓯᒪᔪᓄᑦ ᓄᓇᓄᑦ. ᐃᓛᒃᑰᖅᑐᖅ 11, ᑭᓯᐊᓂᓕ ᐊᑑᑎᔾᔮᖏᑦᑐᖅ ᑭᓪᓕᖏᑦᑕᓘᓐᓃᑦ ᐃᓗᐊᓐᓄᑦ ᑲᓇᑕᒥ ᐅᕙᑦᓯᐊᕈᕐᓂᑕᐃᑦ ᒥᓐᖑᐃᕐᓯᕐᕖᑦ, ᓴᖅᑭᖅᑕᐅᓯᒪᓕᖅᐸᑦ, ᐅᕝᕙᓗ ᑲᓇᑕᒥ ᐅᕙᑦᓯᐊᕈᕐᓂᑕᓄᑦ ᓄᓇᓄᑦ ᐊᐅᓚᑕᐅᓕᖅᐸᑕ ᑲᓇᑕᒥ ᒥᓐᖑᐃᕐᓯᕐᕕᓕᕆᔨᓄᑦ.

9.3.6 ᐃᓛᒃᑰᖅᑐᑦ 13 ᐊᒻᒪᓗ 20 ᐊᑑᑎᔪᑦ ᓴᐳᑎᔭᐅᓯᒪᔪᓄᑦ ᓄᓇᓄᑦ.

9.3.7 8.4.11 ᐊᒻᒪᓗ 8.4.12 ᐊᑑᑎᓂᐊᖅᑐᑦ ᓴᐳᑎᔭᐅᓯᒪᔪᓄᑦ ᓄᓇᓄᑦ ᐋ’ᒐᐅᒐᓗᐊᖅ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᖏᑦ ᐱᔭᕇᖅᑕᐅᓐᖏᑉᐸᑕ ᐊᐅᓚᓂᐅᑉ ᐃᓗᐊᓂ ᓴᖅᑭᖅᑕᐅᔪᖃᖅᑎᓪᓗᒍ ᓴᐳᑎᔭᐅᓯᒪᔪᒥᒃ ᓄᓇᒥᒃ, ᑲᑎᒪᔨᕋᓛᑦ ᐅᖃᐅᓯᐅᔪᑦ ᑖᒃᑯᓇᓂ ᑎᑎᕋᖅᓯᒪᔪᓂ ᓴᖅᑭᖅᑕᐅᓂᐊᖅᑐᑦ ᑐᑦᓯᕌᖑᓕᖅᐸᑕ ᒐᕙᒪᒃᑯᓐᓄᑦ ᓇᓗᓇᐃᖅᑕᐅᓯᒪᔪᓄᓪᓘᓐᓃᑦ ᐃᓄᓐᓄᑦ ᑎᒥᖁᑕᐅᔪᓄᑦ.

9.3.8 ᑐᓐᖓᕕᒋᑦᓱᒍ 9.5.2, 8.4.13 ᐊᒻᒪᓗ 8.4.14 ᐊᑑᑎᓂᐊᖅᑐᑦ ᓴᐳᑎᔭᐅᓯᒪᔪᓄᑦ ᓄᓇᓄᑦ.

ᐃᓄᐃᑦ ᐊᑦᑐᖅᑕᐅᕐᓂᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᖏᑦ ᐊᓯᖏᓐᓅᖓᔪᓪᓗ

9.4.1 8.4.2 ᐊᒻᒪᓗ 8.4.10 ᐊᑑᑎᓂᐊᖅᑑᒃ ᓴᐳᑎᔭᐅᓯᒪᔪᓄᑦ ᓄᓇᓄᑦ ᐊᒻᒪᓗ ᒐᕙᒪᒃᑯᓐᓂ ᑎᒥᐅᔪᓄᑦ ᑎᒍᒥᐊᖅᑐᓄᑦ ᐊᑦᑐᐊᔪᓂᒃ ᓴᐳᑎᔭᐅᓯᒪᔪᓄᑦ ᓄᓇᓄᑦ.

ᑕᐃᒪᐃᓕᖓᒐᓗᐊᖅᑎᓪᓗᒋᒃ 8.4.2 ᑎᑭᓪᓗᒍ 8.4.4, ᑕᐃᒪᐃᓕᖓᒐᓗᐊᖅᑎᓪᓗᒋᒃ 8.4.2 ᑎᑭᓪᓗᒍ 8.4.4, ᑐᐊᕕᕐᓇᖅᑐᖃᖅᑎᓪᓗᒍ ᓲᕐᓗ ᓴᖅᑭᖅᑕᐅᓂᖓᓂᒃ ᐊᑦᑕᓇᖅᑐᒦᑦᑐᓂᒃ ᐆᒪᔪᖃᕐᕕᐅᑉ, ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᖏᑦ ᐱᔭᕇᖅᑕᐅᒍᓐᓇᖅᑐᑦ ᐊᑑᑎᓕᖅᑎᓪᓗᒍ, ᓯᕗᕐᖓᓂᐅᓐᖏᑦᑐᖅ, ᓴᖅᑭᖅᑕᐅᓂᖓᑕ ᓴᐳᑎᔭᐅᓯᒪᔫᑉ ᓄᓇᐅᑉ.

9.4.2 ᑕᐃᒪᐃᓕᖓᒐᓗᐊᖅᑎᓪᓗᒍ 8.4.2 ᑎᑭᓪᓗᒍ 8.4.4, ᐱᔭᕇᕆᐊᖃᕐᓂᖅ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᖓᑦ ᐊᑦᑐᐊᔪᓄᑦ ᓴᐳᑎᔭᐅᓯᒪᔪᓄᑦ ᓄᓇᓄᑦ ᐃᒪᐃᓐᓂᐊᖅᑐᖅ:

(a) ᐊᑑᑎᔾᔮᖏᑦᑐᖅ ᓴᐳᑎᔭᐅᓯᒪᔪᓄᑦ ᓄᓇᓄᑦ ᑖᓐᓇ ᓴᐳᑎᔭᐅᓯᒪᔪᖅ ᐊᑦᑐᐃᓂᕐᓗᓐᓂᖃᔾᔮᖏᑐᐊᖅᐸᑦ ᐃᓄᓐᓂᒃ ᐅᕝᕙᓗ ᐱᕚᓪᓕᕈᑕᐅᒍᓐᓇᖅᑐᓂᒃ ᐃᓄᓐᓄᑦ;

(b) ᐊᑦᑐᐊᔪᓄᑦ ᓴᐳᑎᔭᐅᓯᒪᔪᓄᑦ ᓄᓇᓄᑦ ᓴᖅᑭᖅᑕᐅᓯᒪᔪᓄᑦ ᓯᕗᕐᖓᓂ ᐊᒻᒪᓗ ᑕᕝᕙᐅᖏᓐᓇᖅᓱᑎᒃ ᐊᖏᕈᑕᐅᑎᓪᓗᒍ ᐊᖏᕈᑎ, ᑐᓂᒪᓂᐅᓂᐊᖅᑐᖅ ᐱᔭᕇᕆᐊᖃᕐᓂᕐᒧᑦ ᐃᓄᐃᑦ ᐊᑦᑐᖅᑕᐅᓂᕐᒧᑦ ᐱᕚᓪᓕᕈᑎᑦᓴᓄᓪᓗ ᐊᖏᕈᑎᖓᓐᓂᒃ ᓯᕗᕐᖓᓂ ᑕᓪᓕᒪᖓᓐᓂ ᓇᓪᓕᐅᓂᖅᓯᐅᕐᓂᖓᑦᑕ ᐊᖏᖅᑕᐅᓂᖓᑦᑕ ᐊᖏᕈᑎᐅᑉ; ᐊᒻᒪᓗ

(c) ᐊᑑᑎᓂᐊᖅᑐᖅ ᓇᐅᑐᐃᓐᓇᕐᒧᑦ ᑐᕌᒐᕆᔭᐅᑉᐸᑦ ᓴᐳᑎᔭᐅᓯᒪᔪᖅ ᓄᓇ ᓴᖅᑭᖅᑕᐅᓯᒪᔪᖅ ᓴᑭᖅᑕᐅᓕᖅᑭᒐᔭᕆᐊᖓ ᐊᓯᐊᓂᒃ ᐱᔾᔪᑎᖃᕐᓗᑎᒃ ᓴᖅᑭᖅᑕᐅᑲᓐᓂᕐᓂᐅᔪᖅ ᐊᑦᑐᐃᓂᕐᓗᓐᓂᖃᕋᔭᖅᐸᑦ ᐃᓄᓐᓂᒃ ᐅᕝᕙᓗ ᐱᕚᓪᓕᕈᑕᐅᒍᓐᓇᖅᐸᑦ ᐃᓄᓐᓄᑦ.

9.4.3 8.4.16 ᐊᒻᒪᓗ 8.4.18 ᐊᑑᑎᓂᐊᖅᑐᑦ ᓴᐳᑎᔭᐅᓯᒪᔪᓄᑦ ᓄᓇᓄᑦ ᒐᕙᒪᒃᑯᓐᓂᓗ ᑎᒥᐅᔪᓄᑦ ᑎᒍᒥᐊᖅᑐᓄᑦ ᐊᑦᑐᐊᔪᓂᒃ ᓴᐳᑎᔭᐅᓯᒪᔪᓄᑦ ᓄᓇᓄᑦ.

ᐱᑕᖅᑕᐃᓕᕝᕕᒻᒥ ᐆᒪᔪᖅᑕᐃᓕᕕᒃ

9.5.1 ᐊᐃᑉᐸᖓᓂ ᓇᓪᓕᐅᓂᖅᓯᐅᕐᓂᖓᑦᑕ ᐅᓪᓘᑉ ᐊᖏᕈᑎᐅᑉ ᐊᖏᕈᑕᐅᓂᖓᑕ, ᐃᓄᐃᑦ ᓄᓇᖁᑎᖏᑦ BL-44/66C ᐃᓚᒋᐅᒍᓐᓃᕐᓂᐊᖅᑐᖅ ᐱᑕᖅᑕᐃᓕᕝᕕᒻᒥ ᐆᒪᔪᖅᑕᐃᓕᕕᐅᓂᕐᒧᑦ, ᐋᒡᒐᐅᖓᓗᐊᖅ, ᓯᕗᕐᖓᓂ ᑕᐃᑦᓱᒪ ᐅᓪᓘᑉ ᓇᓪᓕᐅᓂᖅᓯᐅᕐᓇᐅᑉ, ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᓇᓗᓇᐃᖅᓯᑉᐸᑕ ᑲᔪᓯᑎᑕᐅᓂᖓ ᐆᒪᔪᖅᑕᐃᓕᕕᐅᓗᓂ ᐊᑑᑎᖃᓪᓚᕆᒋᐊᖓ ᓴᐳᔾᔨᓯᒪᓂᕐᒧᑦ ᐃᓘᓐᓈᒍᑦ.

9.5.2 ᐊᕕᑦᑐᖅᓯᒪᔪᓂ ᒐᕙᒪᐃᑦ ᐃᒪᐃᓐᓂᐊᖅᑐᑦ, ᐊᕐᕌᒍᐃᑦ ᑕᓪᓕᒪᑦ ᐃᓗᐊᓐᓂ ᑭᖑᕐᖓᓂ ᐅᓪᓗᖓᑕ ᐊᒋᕈᑕᐅᓂᖓᑕ ᐊᖏᕈᑎᐅᑉ, ᑐᑭᒧᐊᑦᑎᑦᓯᓗᑎᒃ ᐸᕐᓇᑕᐅᓂᖏᓐᓂᒃ ᐊᐅᓚᑦᓯᓂᕐᒧᑦ ᐸᕐᓇᐅᑏᑦ ᑲᑐᔾᔨᓗᑎᒃ ᓴᐳᔾᔨᓂᕐᒧᑦ ᐊᐅᓚᑦᓯᖃᑎᒌᓐᓂᕐᒧᓪᓗ ᐱᑕᖅᑕᐃᓕᕝᕕᒻᒥ ᐆᒪᔪᖅᑕᐃᓕᕕᐅᔪᒥᒃ. ᑖᓐᓇ ᑭᓪᓕᖃᕈᑕᐅᓂᐊᖅᑐᖅ ᐊᑑᑎᓂᖓᓄᑦ ᐊᐅᓚᓂᖓᑕ ᓇᓗᓇᐃᖅᑕᐅᓯᒪᔫᑉ 8.4.11-ᒥᒃ 8.4.12-ᒧᑦ ᑕᐃᑯᖓᖓᔪᖅ ᐆᒪᔪᖅᑕᐃᓕᕕᒻᒧᑦ ᓄᓇᕗᒻᒥ, ᑐᑭᒧᐊᑦᑎᑕᐅᓗᓂᓗ ᐊᐅᓚᓂᖓ ᐊᑑᑎᔪᓄᑦ ᑕᐃᑯᖓᖓᔪᓄᑦ ᐆᒪᔪᕐᕕᐅᑦᑕᐃᓕᔪᒧᑦ ᓯᓚᑖᓃᑦᑐᒧᑦ ᓄᓇᕗᑦ. ᐱᑕᖅᑕᐃᓕᕝᕕᒻᒥ ᐆᒪᔪᑦᑕᐃᓕᓂᕐᒧᑦ ᐊᐅᓚᑦᓯᓂᕐᒧᑦ ᐸᕐᓇᐅᑏᑦ ᑐᓐᖓᕕᖃᕐᓂᐊᑦᑐᑦ ᐃᓱᒪᓕᐅᕈᑕᐅᔪᓂᒃ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᐊᑦᑐᖅᑕᐅᓯᒪᔪᓄᓪᓗ ᓄᓇᓕᓐᓄᑦ. ᐸᕐᓇᐅᑎ ᑐᓐᖓᕕᖃᕐᓂᐊᖅᑐᖅ ᐊᖏᖅᑕᐅᓂᖓᓂᒃ ᒐᕙᒪᑐᖃᒃᑯᓐᓄᑦ ᐊᕕᑦᑐᖅᓯᒪᔪᓂᓗ ᒐᕙᒪᓄᑦ. ᐊᓯᔾᔨᖅᑕᐅᔾᔮᖏᑦᑐᑦ ᖃᓄᐃᓕᖓᓂᖏᑦ ᐱᑕᖅᑕᐃᓕᕝᕕᒻᒥ ᐆᒪᔪᖅᑕᐃᓕᕕᐅᑉ ᑭᓪᓕᖏᑦᑕᓘᓐᓃᑦ, ᑭᓯᐊᓂ ᐆᒪᔪᖅᑕᐃᓕᕕᒻᒧᑦ ᐊᐅᓚᑦᓯᓂᕐᒧᑦ ᐸᕐᓇᐅᑎ ᐊᖏᖅᑕᐅᑉᐸᑦ ᒐᕙᒪᑐᖃᒃᑯᓐᓄᑦ ᐊᕕᑦᑐᖅᓯᒪᔪᓂᓗ ᒐᕙᒪᓄᑦ. ᐊᖏᖅᑕᐅᓚᐅᖅᑎᓪᓗᒍ ᐆᒪᔪᖅᑕᐃᓕᕕᒻᒧᑦ ᐊᐅᓚᑦᓯᓂᕐᒧᑦ ᐸᕐᓇᐅᑎ, ᑐᑦᓯᕋᐅᑏᑦ ᐊᓯᔾᔩᓂᕐᒧᑦ ᑭᓪᓕᖏᓐᓂᒃ ᐱᑕᖅᑕᐃᓕᕝᕕᒻᒥ ᐆᒪᔪᖅᑕᐃᓕᕕᐅᑉ, ᓄᖅᑲᖅᑎᓪᓗᒍ ᐆᒪᔪᖅᑕᐃᓕᕕᒃ, ᐅᕝᕙᓗ ᖃᓄᐃᓕᖓᓂᖓ ᐊᓯᔾᔨᕐᓗᒍ ᑐᓐᖓᕕᖃᕐᓂᐊᖅᑐᖅ ᑲᑐᔾᔨᓗᑎᒃ ᑭᓇᒃᑯᑐᐃᓐᓇᕐᓄᑦ ᕿᒥᕐᕈᔭᐅᓂᕆᔭᖓᓂᒃ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔨᓄᑦ ᐊᒻᒪᓗ ᑎᒥᐅᔪᓄᑦ ᑎᒍᒥᐊᖅᑐᓄᑦ ᐊᐅᓚᑦᓯᓂᕐᒥᒃ ᓴᐳᔾᔨᓂᕐᒥᓪᓗ ᐆᒪᔪᕐᓂᒃ ᐆᒪᔪᖃᕐᕕᐅᔪᓂᓪᓗ ᐃᓚᖓᓂ ᐆᒪᔪᖅᑕᐃᓕᕕᐅᑉ ᓯᓚᑖᓃᑦᑑᑉ ᓄᓇᕗᑦ. 9.3.2 ᐊᑑᑎᔪᖅ ᓇᐅᑐᐃᓐᓇᕐᓄᑦ ᐋᖅᑭᑦᑕᖏᓐᓄᑦ ᓄᓇᕗᒻᒥ ᐆᒪᔪᓕᕆᓂᕐᒧᑦ ᑲᑎᒪᔩᑦ ᐊᑦᑐᐊᔪᓄᑦ ᐃᒪᖓᓄᑦ ᐆᒪᔪᖅᑕᐃᓕᕕᐅᑉ ᐃᓗᐊᓃᑦᑑᑉ ᓄᓇᕗᑦ.

ᐊᑑᑎᕕᖃᕐᕕᖏᑦ

9.6.1 ᐊᐳᖅᓯᒪᓂᖅᑕᖃᓕᕐᓂᖅᐸᑦ ᐅᕙᓂ ᐃᓛᒃᑰᖅᑐᒥ ᐊᒻᒪᓗ ᐃᓛᒃᑯᑦ 5-ᒥ, ᐃᓛᒃᑰᑦ 5 ᓴᓐᖏᓂᖅᓴᐅᓂᐊᖅᑐᖅ.

9.6.2 ᐅᓇ ᐃᓛᒃᑰᖅᑐᖅ ᐊᑑᑎᓂᐊᖅᑐᖅ ᑕᕆᐅᕐᓄᑦ ᐃᓗᐊᓃᑦᑐᓄᑦ ᓴᐳᑎᔭᐅᓯᒪᔪᑦ ᓄᓇᐃᑦ.

9.6.3 ᐃᓄᐃᑦ ᐃᓚᐅᑎᓐᓂᖏᑦ ᐸᕐᓇᑕᐅᓂᖓᓄᑦ ᐊᐅᓚᑕᐅᓂᖓᓄᓪᓗ ᓴᐳᑎᔭᐅᓯᒪᔪᑦ ᓄᓇᐃᑦ ᐋᔩᕋᕈᑕᐅᒍᓐᓇᖅᑐᖅ ᐊᕕᑦᑐᖅᓯᒪᔪᓄᑦ ᐊᒻᒪᓗ ᐃᓂᒋᔭᖏᑦ ᐊᖏᕈᑕᐅᓯᒪᔪᑦ ᓇᓗᓇᐃᖅᑕᐅᓯᒪᔪᓄᑦ ᐃᓄᓐᓄᑦ ᑎᒥᖁᑕᐅᔪᓄᑦ ᒐᕙᒪᒃᑯᓄᓪᓗ ᑎᒍᒥᐊᖅᑐᓄᑦ ᓴᖅᑭᖅᑕᐅᓂᖏᓐᓂᒃ ᑕᐃᒃᑯᐊ ᓴᐳᑎᔭᐅᓯᒪᔪᑦ ᓄᓇᐃᑦ.

ᑕᕝᕙᐅᔪᑦ ᓴᐳᑎᔭᐅᓯᒪᔪᑦ ᓄᓇᐃᑦ

(9.1.1)

ᑐᓛᔪᓄᑦ ᑎᒻᒥᐊᓄᑦ ᑎᒻᒥᐊᖅᑕᐅᑦᑕᐃᓕᕖᑦ ᓴᖅᑭᖅᑕᐅᔪᑦ ᑐᓐᖓᕕᖃᕐᓗᑎᒃ ᑐᓛᔪᓄᑦ ᑎᒥᐊᓄᑦ ᒪᓕᒐᕐᓂᒃ, ᑐᓛᔪᓄᑦ ᑎᒻᒥᐊᓄᑦ ᑎᒻᒥᐊᖅᑕᐅᑦᑕᐃᓕᕖᑦ ᒪᓕᒐᖏᑦ:

ᓴᓐᓂᕈᑎᐅᑉ ᕿᑭᖅᑖᓗᐊ ᑎᒻᒥᐊᕐᕕᐅᑦᑕᐃᓕᔪᖅ

Dewer Soper ᑎᒻᒥᐊᕐᕕᐅᑦᑕᐃᓕᔪᖅ

ᖃᖅᓴᐅᖅᑑᖅ ᑎᒻᒥᐊᕐᕕᐅᑦᑕᐃᓕᔪᖅ

ᐃᒃᑲᖅᑐᐊᖅ ᑎᒻᒥᐊᕐᕕᐅᑦᑕᐃᓕᔪᖅ

McConnell River ᑎᒻᒥᐊᕐᕕᐅᑦᑕᐃᓕᔪᖅ

Queen Maud Gulf ᑎᒻᒥᐊᕐᕕᐅᑦᑕᐃᓕᔪᖅ

ᑭᓐᖓᕐᓂ ᑎᒻᒥᐊᕐᕕᐅᑦᑕᐃᓕᔪᖅ

Seymour ᕿᑭᖅᑕᖓᓂ ᑎᒻᒥᐊᕐᕕᐅᑦᑕᐃᓕᔪᖅ

ᑲᓇᑕᒥ ᐆᒪᔪᖃᕐᕖᑦ ᓄᓇᐃᑦ ᓴᖅᑭᖅᑕᐅᔪᑦ ᑐᓐᖓᕕᒋᑦᓱᒍ ᑲᓇᑕᒥ ᐆᒪᔪᕐᓄᑦ ᒪᓕᒐᕐᔪᐊᖅ, ᐆᒪᔪᖃᕐᕕᓐᓄᑦ ᒪᓕᒐᐃᑦ:

ᓇᓄᕐᓄᑦ ᐊᖅᑯᑎ ᑲᓇᑕᒥ ᐆᒪᔪᖃᕐᕕᒃ

ᐊᕕᑦᑐᖅᓯᒪᔪᓂ ᐆᒪᔪᖅᑕᐃᓕᕕᒃ ᓴᖅᑭᖅᑕᐅᔪᖅ ᑐᓐᖓᕕᒋᑦᓱᒋᑦ ᐊᕕᑦᑐᖅᓯᒪᔪᓂ ᐆᒪᔪᕐᓄᑦ ᒪᓕᒐᕐᔪᐊᖅ:

Bowman Bay ᐆᒪᔪᖅᑕᐃᓕᕕᒃ

ᑲᓇᑕᒥ ᑰᑐᖃᐃᑦ, ᓇᓗᓇᐃᖅᑕᐅᓯᒪᔪᑦ ᒥᓂᔅᑕᖓᓐᓄᑦ ᐊᕙᑎᓕᕆᔨᒃᑯᑦ – ᑲᓇᑕᒥ, ᒥᓂᔅᑕᖓᑦ ᐃᓄᓕᕆᔨᑐᖃᒃᑯᑦ – ᑲᓇᑕ ᐊᒻᒪᓗ ᒥᓂᔅᑕᖓᑦ ᐱᕙᓪᓕᐊᔪᓕᕆᓂᕐᒧᑦ, ᒐᕙᒪᒃᑯᖏᓐᓂ ᓄᓇᑦᓯᐊᑉ:

ᖃᕝᕙᖅᑑᖅ (ᐊᑉᐸᓯᓐᓂᖏᑦ ᑭᓯᐊᓂ)

ᐱᑕᖅᑕᐃᓕᕝᕕᒃ (ᐊᑉᐸᓯᓐᓂᖏᑦ ᑭᓯᐊᓂ)

ᐃᓄᐃᑦ ᓄᓇᖁᑎᖏᑦ ᐃᓗᐊᓐᓂ ᓴᐳᑎᔭᐅᓯᒪᔪᑦ ᓄᓇᐃᑦ

(9.3.3)

ᓄᓇ

PI-29/38B

PI-28/38B

CD-01/36H

H-13/450,P,46A,b

CH-06/45N

AR-04/55D

AR-05/55D

AR-06/55D

GH-20/66O

GH-21/66O,P,67A

CB-01/66M

CB-02/66M

CB-03/66M

CB-04/66M,67B,76P

CB-05/66M,67B,76P,77A

CB-06/77A

CB-07/77A

CB-08/77A

CB-10/77A

CB-11/77A

CB-17/77A

BB-19/76I,P

ᐃᓄᐃᑦ ᓄᓇᖁᑎᖏᑦ ᐃᓗᐊᓃᑐᐃᓐᓇᕆᐊᓖᑦ ᓴᐳᔾᔭᐅᓯᒪᔪᑦ ᓄᓇᐃᑦ ᓯᕗᓂᑦᑎᓐᓂ

(9.3.4)

ᓄᓇ

AB-16/48C

CR-18/27F,G

PI-07/37H

PI-08/37H

RB-31/68E

BI-01/16L,K BI-02/16K

BI-16/16M

CH-02/45I,J

SB-04/57B

SB-05/57B

SB-06/57B

IQ-10/25H