2015-ᒥ ᐃᓕᓐᓂᐊᕈᑎᒃᓴᖅᑖᖅᑐᑦ
- ᑳᓚᐃ ᐊᐃᐱᓕ−ᕿᐊᑦᓱᒃ
- ᒪᐃᕕᔅ ᐃᐊᓪ
ᓄᓇᕗᑦ ᑐᙵᕕᒃᑯᑦ ᑎᒥᖓᑦ ᐱᕙᓪᓕᐊᔪᑦ ᓴᖅᑭᑕᑦ: ᓄᓇᕗᑦ ᑐᙵᕕᒃᑯᑦ ᑐᓴᖅᑎᑦᑎᕗᑦ 2015-ᒥ ᔫᓯ ᐊᒪᐅᔭᖅ ᑯᓱᒐᖅ ᐃᓕᓐᓂᐊᕈᑎᒃᓴᖅᑖᕐᓂᐊᖅᑐᓂᒃ
ᑳᓚᐃ ᐊᐃᐱᓕ−ᕿᐊᑦᓱᒃ
ᔫᓯ ᑯᓱᒐᖅ ᑲᔪᖏᖅᓴᐃᑦᑎᐊᓚᐅᖅᑐᖅ ᓯᕗᓕᖅᑎᐅᓪᓗᓂ
ᔫᓯ ᑯᓱᒐᖅ ᓯᕗᓕᖅᑎᑦᑎᐊᕙᐅᓚᐅᖅᑐᖅ. ᐊᔭᐅᖅᑐᐃᓚᐅᖅᑐᖅ ᐃᓄᐃᑦ ᐱᔪᓐᓇᐅᑎᖏᓐᓂᒃ, ᐅᖃᐅᓯᖏᓐᓂᒃ ᐃᓕᖅᑯᓯᖏᓐᓂᒡᓗ ᐊᒃᓱᕉᑎᖃᑦᑎᐊᖅᖢᓂ. ᐊᒃᓱᕉᑎᖃᓚᐅᖅᑐᖅ ᐅᖃᐅᓯᖏᑎᒍᑦ ᐱᓂᐊᕐᓂᒥᒍᓪᓗ ᓱᓕ ᑕᒪᓐᓇ ᑐᓵᔪᓐᓇᖅᑕᕗᑦ ᐃᒃᐱᒋᓪᓗᑎᒍᓪᓗ ᐅᓪᓗᒥ. ᔫᓯ ᐃᓅᓯᕐᒥᓂᒃ ᑐᓂᓯᒪᑦᑎᐊᓚᐅᕐᒪᑦ ᒐᕙᒪᓕᕆᓂᕐᒧᑦ ᐃᓕᓐᓂᐊᕐᓂᓕᕆᓂᕐᒧᓪᓗ, ᐅᓪᓗᒥ ᑕᒫᓃᑉᐳᒍᑦ: ᐱᒃᑯᒍᓱᒃᐳᒍᑦ, ᓴᙱᔫᓪᓗᑕ, ᐱᔪᒪᓂᖃᑦᑎᐊᖅᖢᑕᓗ ᓄᓇᕗᒻᒥᐅᑦ. ᐊᒃᓱᕉᑎᒋᖃᑦᑕᓚᐅᖅᑕᖏᑦ ᐃᓄᖕᓄᑦ ᑕᐃᒪᙵᓕᒫᖅ ᓇᓗᓇᐃᒃᑯᑦᑎᖅᑕᐅᓯᒪᕗᑦ ᐱᒻᒪᕆᐅᒋᔭᐅᓪᓗᑎᒡᓗ ᐆᒻᒪᑎᑦᑎᓐᓂ, ᐊᖏᕐᕋᑦᑎᓐᓂ, ᓄᓇᓕᑦᑎᓐᓂᓗ. ᔫᓯ ᑯᓱᒐᖅ ᐃᔾᔪᐊᒐᒃᓴᑦᑎᐊᕙᐅᓚᐅᖅᑐᖅ ᓯᕗᓕᖅᑎᑦᑎᐊᕙᐅᓪᓗᓂᓗ. ᒫᓐᓇ ᓄᓇᕗᒻᒥ ᐃᓕᓴᐃᔨᒃᓴᐅᓂᕐᒧᑦ ᐃᓕᓐᓂᐊᖃᑕᐅᕗᖓ ᐃᖃᓗᖕᓂ. ᑎᓴᒪᒋᓕᖅᑕᖓᓄᑦ ᐊᕐᕌᒍᒧᐊᕐᓂᐊᓕᖅᑐᖓ ᐅᑭᐊᒃᓵᖅ. ᐃᓕᓴᐃᔨᙳᕈᒪᐃᓐᓇᐅᔭᓚᐅᖅᐳᖓ. ᐱᕈᖅᓴᓚᐅᕋᒪ ᐱᐅᔪᐊᓗᖕᓂᒃ, ᑲᔪᖏᖅᓴᐃᑦᑎᐊᖅᑐᓂᒃ ᐃᓕᓴᐃᔨᖃᖅᖢᖓ ᐃᓅᓯᓕᒫᓐᓂ ᐊᒻᒪ ᐊᔭᐅᕆᓯᒪᓪᓗᑎᒃ ᐱᔪᒪᓂᕆᔭᓐᓂᒃ ᐃᖅᑲᓇᐃᔮᖃᕈᒪᓂᕐᒥᒃ ᐃᓕᓐᓂᐊᖅᑐᓕᕆᓂᕐᒥ ᒪᓕᒃᖢᖓᓗ ᑕᐅᑐᙳᐊᕈᒪᔭᓐᓂᒃ. ᐃᓕᓐᓂᐊᒐᒃᓴᕋ ᖃᔅᓯᑲᓪᓚᖕᓂᒃ ᐃᓕᓐᓂᐊᒐᒃᓴᖃᖅᐳᖅ ᓇᓕᒧᒌᒃᑎᑦᑎᔪᓂᒃ ᑕᒪᐃᓐᓂᒃ ᖃᓪᓗᓈᑐᑦ ᐃᓄᒃᑎᑐᓪᓗ ᐅᖃᐅᓯᕐᓂᒃ. ᑕᒪᓐᓇ ᐃᑲᔫᑎᖃᑦᑎᐊᖅᑐᖅ ᑕᐅᕗᖓᓕᒫᖅ. ᐅᐸᓗᖓᐃᔭᐃᔪᖅ ᐅᕙᑦᑎᓐᓂᑦ ᒫᓐᓇᓕᓴᕐᓄᑦ ᑭᖑᕚᕆᓂᐊᖅᑕᑎᓐᓄᓪᓗ ᓱᕈᓯᕐᓂᑦ ᐊᒻᒪ ᐃᓕᓐᓂᐊᖅᑎᑦᑎᔾᔪᑎᒋᔪᓐᓇᖅᑐᑎᒍ ᐃᓕᓴᐃᔨᐅᓪᓗᑕ ᐊᔾᔨᒌᙱᑦᑑᑎᓂᑦ ᐃᓅᓯᕆᔭᑦᑎᓐᓂᑦ. ᖃᐅᔨᒪᓕᖅᑕᓐᓄᑦ, ᐊᔪᕈᓐᓃᖅᓯᒪᔭᓐᓄᑦ, ᐱᕈᖅᐸᓪᓕᐊᓂᓐᓄᑦ ᐊᒻᒪ ᖁᓱᙱᑦᑎᐊᕐᓂᕐᒧᑦ ᐃᓕᓐᓂᐊᕐᓂᒃᑯᑦ, ᑕᒪᓐᓇ ᐊᒥᖅᑳᕈᑎᒋᔪᒪᕙᕋ ᐃᓕᓐᓂᐊᖅᑎᐅᓛᖅᑐᓄᑦ, ᐃᖅᑲᓇᐃᔭᖃᑎᓐᓄᑦ, ᐊᖓᔪᖅᑳᓄᑦ ᐊᒻᒪ ᓄᓇᖅᑲᑎᓐᓄᑦ. ᐅᖃᐅᓯᕋ ᐃᓕᖅᑯᓯᕋᓗ ᐊᑐᕐᓂᐊᖅᐸᕋ ᐃᓚᓕᐅᔾᔨᓂᒃᑯᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᑦ ᐊᒻᒪ ᐱᒻᒪᕆᐅᒋᔭᑦᑎᓐᓂᑦ ᐃᓗᐊᓂ ᓯᓚᑖᓂᓗ ᐃᓕᓐᓂᐊᕐᕕᐅᑉ ᐃᓕᓐᓂᐊᖅᑎᓄᑦ. ᔫᓯ ᐆᑦᑑᑎᑦᑎᐊᕙᐅᓯᒪᕗᖅ; ᐊᔅᓱᕈᖅᑐᓂ ᐃᖅᑲᓇᐃᔭᖃᑦᑕᓚᐅᖅᑐᖅ ᐊᒻᒪ ᓂᐱᖅᑯᖅᑐᓪᓗᓂ ᐊᒻᒪ ᑐᑭᓯᓇᑦᑎᐊᖅᑐᓂ, ᐅᐱᒍᓱᑦᑐᓂ ᑭᒡᒐᖅᑐᐃᓪᓗᓂ ᐃᓄᓐᓂᑦ ᐊᒻᒪ ᐱᒻᒪᕆᐅᓂᖓᓂᑦ ᐱᓯᒪᑦᑎᓂᕐᒥᑦ ᐃᓅᓂᑦᑎᓐᓂᑦ. ᐃᓕᑕᕆᔭᐅᔾᔪᑎᑖᓚᐅᖅᑎᓪᓗᖓ ᐃᓕᓴᐃᔨᐅᓂᕐᒧᑦ, ᑐᕌᒐᕆᔭᕋ ᐃᖅᑲᓇᐃᔮᖅᑖᕈᒪᓪᓗᖓ ᐃᓕᓐᓂᐊᖅᑎᑦᑎᓂᕐᒥᑦ ᐃᓕᓐᓂᐊᖅᑎᓂᑦ, ᐅᖃᐅᓯᑦᑎᓐᓂᑦ ᐊᒥᖅᑳᖃᑎᖃᕐᓂᕐᒥᑦ ᐊᒻᒪ ᐱᐅᔪᒥᑦ ᐊᑦᑐᐃᓂᖃᕐᓂᕐᒥᑦ ᐃᓅᓯᖏᓐᓂᑦ ᓱᕈᓰᑦ ᐊᑐᕐᓗᒋᑦ ᐅᖃᐅᓯᕗᑦ ᐊᒻᒪ ᐃᓕᖅᑯᓯᕗᑦ ᐱᖅᑯᓯᑐᖃᖅᑎᒍᑦ ᖃᓄᐃᓕᐅᕐᓂᐅᔪᓂᑦ, ᐱᒻᒪᕆᐅᑎᑦᑎᓂᕐᒥᑦ ᐊᒻᒪ ᐃᓚᓕᐅᔾᔨᓂᕐᒥᑦ ᐃᓐᓇᑐᖃᕐᓂᑦ ᐊᔪᕐᓇᙱᓐᓂᓕᒫᖓᓂ. ᓄᓇᕗᑦ ᐱᕈᖅᐸᓪᓕᐊᒻᒪᑦ ᓄᓇᕗᑦ ᐊᒻᒪ ᐃᓚᖓᑦ ᐱᓇᓱᐊᕈᒪᔭᕋ ᐃᓚᒋᔭᐅᓗᖓ ᓴᖅᑮᓂᕐᒥᑦ ᐃᓄᑦᑎᑐᑦ ᐃᑲᔫᑎᔅᓴᓂᑦ ᐃᓕᖅᑯᓯᕐᒨᖓᔪᓂᑦ, ᓲᕐᓗ ᒪᕐᕉᓐᓂᒃ ᐅᖃᐅᓰᓐᓂᒃ ᐅᖃᓕᒫᒐᕐᓂᑦ, ᐊᔾᔨᙳᐊᓂᑦ ᐊᓯᖏᓐᓂᓪᓗ. ᓄᓇᕗᒻᒥ ᐃᓕᓐᓂᐊᕐᕕᓐᓂᑦ. ᑕᒪᓐᓇ ᐅᕙᓐᓄᑦ ᐱᒻᒪᕆᐅᕗᖅ, ᐅᒃᐱᕈᓱᒃᐳᖓᓗ ᐃᑲᔫᑎᖃᑦᑎᐊᕋᔭᕐᓂᖓᓂᒃ ᐃᓕᓐᓂᐊᖅᑎᓄᑦ ᐃᓕᓐᓂᐊᕐᓂᖏᓐᓄᓪᓗ. ᑕᑯᓪᓗᒋᑦ ᕿᒪᒃᑕᐅᓯᒪᔪᑦ ᐊᖅᑯᑎᒋᓚᐅᖅᑕᖏᓪᓗ ᔫᓯᐅᑉ, ᐱᔪᒃᓯᓕᖅᓯᒪᕗᖓ. ᖃᓄᑐᐃᓐᓇᑦᑎᐊᖅ ᐅᖓᓯᒃᑐᒧᑦ ᑎᑭᐅᑎᓇᓱᓚᐅᖅᑐᖅ ᑐᕌᒐᕆᔭᒥᓄᑦ ᑕᐅᑐᙳᐊᖅᑕᒥᓄᓪᓗ, ᐱᓂᐊᕐᓂᕆᓚᐅᖅᑕᒥᓄᓪᓗ ᓴᐱᓕᖅᑕᐃᓕᓂᖏᓐᓄᓪᓗ ᓵᓚᖃᓚᐅᖅᐳᖅ. ᐃᓄᐃᑦ ᓴᙱᒃᑎᑉᐸᓪᓕᐊᑐᐃᓐᓇᖅᐳᑦ, ᐃᓕᓐᓂᐊᖅᐸᓪᓕᐊᑐᐃᓐᓇᖅᖢᑎᒃ ᓴᙱᓂᖅᑖᖅᐸᓪᓕᐊᓪᓗᑎᒡᓗ ᓄᓇᒋᔭᒥᓄᑦ, ᐅᖃᐅᓯᕐᒥᓄᑦ ᐱᔪᓐᓇᐅᑎᒋᔭᒥᓄᑦ ᐃᓕᖅᑯᓯᕐᒥᓄᓪᓗ. ᓯᕗᓂᒃᓴᑦᑎᓐᓂ, ᑕᑯᔪᒪᕙᒃᑲ ᓄᓇᕗᒻᒥᐅᑦ, ᓄᑕᖅᑲᑦ, ᐃᓐᓇᐃᑦ ᐃᓐᓇᐃᓪᓗ, ᐃᓄᒃᑎᑐᑦ ᐅᖃᓪᓚᒍᓐᓇᑦᑎᐊᕐᓗᑎᒃ, ᑲᔪᖏᖅᓴᐃᖃᑦᑕᐅᑎᓗᑎᒃ ᐊᓯᐅᑎᑦᑎᑦᑕᐃᓕᒪᓗᑎᒃ ᑭᓇᐅᓂᑦᑎᓐᓂᒃ. ᐅᖃᐅᓯᖅ ᐱᒻᒪᕆᐊᓘᕗᖅ ᐃᓕᖅᑯᓯᑦᑎᓐᓄᑦ ᐃᓕᓴᕐᓇᐅᑎᑦᑎᓐᓄᑦ ᐊᒻᒪ ᐱᓕᕆᖃᑎᒌᑦᑎᐊᕐᓂᒃᑯᑦ ᐃᓕᓴᐃᓂᒃᑯᑦ ᐃᓕᑦᑎᕙᓪᓕᐊᓂᒃᑯᓪᓗ ᓈᒻᒪᒃᑐᒥᒃ ᐃᓕᖅᑯᓯᖃᕐᓗᑕ ᓂᕆᐅᖕᓂᖃᖅᑐᐃᓐᓇᐅᕗᒍᑦ. ᔫᓯ ᑲᑉᐱᐊᓱᙱᖦᖢᓂ ᐅᖃᓪᓚᓚᐅᖅᐳᖅ ᐃᓄᖕᓄᑦ. ᐅᖃᓚᐅᖅᐳᖅ ᓄᓇᕐᔪᐊᕐᒥᐅᓄᑦ ᐱᐅᓛᒥᒃ ᐱᔪᒪᓂᕋᖅᖢᓂ ᐃᓄᖕᓄᑦ, ᐊᒃᓱᕉᑎᖃᓚᐅᖅᖢᓂᓗ ᐱᔭᕆᐊᖃᖅᑕᑦᑎᓐᓂᒃ. ᐱᓕᕆᕐᔪᐊᕐᓂᕆᓚᐅᖅᑕᖓ ᐊᖏᔪᒻᒪᕆᖕᒥᒃ ᐊᒃᑐᖅᓯᓂᖃᓚᐅᖅᐳᖅ ᓄᓇᑦᑎᓐᓂᒃ ᐃᓄᐃᓪᓗ ᖃᓪᓗᓈᓪᓗ. ᐃᖅᑲᐅᒪᕗᖓ ᔫᓯ ᑕᐅᑐᒃᖢᒍ ᑕᓚᕖᓴᒃᑯᑦ ᖃᖓᑲᓪᓚᐅᓕᖅᑐᖅ. ᐊᐅᓚᓂᖓ ᐊᒻᒪ ᐅᖃᓪᓚᒍᓐᓇᕐᓂᖓ ᐃᓄᐃᑦ ᒥᒃᓵᓄᑦ ᐃᓄᒋᐊᒃᑐᓄᑦ ᐱᓕᕆᔨᒻᒪᕆᐅᓚᐅᖅᐳᖅ. ᐱᔪᒪᓂᖃᑦᑎᐊᓚᐅᖅᑐᖅ ᐊᒻᒪᓗ ᐅᔾᔨᕐᓇᑦᑎᐊᓚᐅᖅᑐᖅ. ᐊᓯᔾᔩᔪᒪᓚᐅᖅᑐᖅ. ᖃᓄᐃᓕᐅᕈᒪᓚᐅᖅᑐᖅ, ᐊᒻᒪᓗ ᐊᓯᔾᔩᔪᒪᓪᓗᓂ. ᐊᒻᒪᓗ ᑕᐃᒪᐃᓚᐅᖅᐳᖅ. ᑕᖅᑲᐅᖓ ᐊᒻᒪᓗ ᑕᐃᒪᐃᑦᑎᐊᓚᐅᖅᑐᖅ. ᐊᒃᓱᕈᓚᐅᖅᑐᖅ ᐊᒻᒪᓗ ᐊᒃᓱᕈᖅᑐᓂ ᐱᓕᕆᓚᐅᖅᑐᖅ ᑎᑭᓐᓇᓱᐊᖅᑐᓂᒋᑦ ᑐᕌᒐᕆᔭᖏᑦ. ᐱᔪᒪᓂᖃᑦᑎᐊᖅᑐᖓ ᐊᒻᒪᓗ ᐱᔪᒪᓂᖃᑦᑎᐊᖅᖢᖓ ᐱᔭᕇᕈᒪᓪᓗᒍ ᐃᓕᓐᓂᐊᕐᓂᕋ ᐊᒻᒪᓗ ᐱᒋᐊᕐᓗᖓ ᐊᓯᐅᑎᑦᑎᑦᑕᐃᓕᒪᓂᕐᒧᑦ, ᓴᐳᔾᔨᓯᒪᓂᕐᒧᑦ, ᐃᓕᓐᓂᐊᖅᑎᑦᑎᓂᕐᒧᑦ ᓄᓇᕗᒻᒥᐅᓂᒃ ᐊᒻᒪᓗ ᓄᓇᕗᒻᒥᐅᑕᐅᖏᑦᑐᓂᒃ ᐃᓕᖅᑯᓯᑦᑎᓐᓂᒃ. ᐃᓕᓐᓂᐊᖅᑎᑦᑎᔪᒪᕗᖓ ᐅᖃᐅᓯᑦᑎᓐᓂᒃ ᐊᒻᒪᓗ ᐱᔪᓐᓇᐅᑎᑦᑎᓐᓂᒃ ᐃᓅᓪᓗᑕ. ᓯᕗᓂᒃᓴᒥ ᐃᓕᓴᐃᔨᐅᓗᖓ, ᖃᐅᔨᒪᕗᖓ ᑲᒪᒋᔭᒃᓴᖃᕐᓂᕐᒥᒃ ᑲᔪᓯᑎᑦᑎᓂᕐᒥᒃ ᐊᑐᖅᑕᐅᓂᑯᓂᒃ ᔫᓯ ᑯᓱᒐᕐᒧᑦ ᐅᐱᒍᓱᒡᓗᖓ. ᐅᕙᖓᑦᑕᐅᖅ, ᐅᒃᐱᕈᓱᒃᑐᖓ ᐱᒻᒪᕆᐅᓂᖓᓂᒃ ᓴᙱᒃᑎᒋᐊᖅᑎᑦᑎᓂᕐᒥᒃ ᐊᒻᒪᓗ ᐸᐸᑦᑎᓂᕐᒥᒃ ᐅᖃᐅᓯᑦᑎᓐᓂᒃ ᒫᓐᓇᒧᑦ ᑭᖑᕚᒃᓴᑦᑎᓐᓄᓪᓗ. "ᓴᐱᓕᖅᑕᐃᓕᑕ", ᓴᐱᓕᖅᑕᐃᓕᑕ ᐃᓕᓐᓂᐊᕐᓂᓕᕆᓂᕐᒥᒃ, ᐊᒻᒪᓗ ᐅᖃᐅᓯᑦᑎᓐᓂᒃ." ᔫᓯ ᑯᓱᒐᖅ.
ᒪᐃᕕᔅ ᐃᐊᓪ
ᔫᓯ ᐊᒪᐅᔭᖅ ᑯᓱᒐᖅ
ᐃᓕᖅᑯᓯᕗᑦ ᐅᖃᐅᓯᕗᓪᓗ ᐱᕈᖅᐸᓪᓕᐊᖏᓐᓇᖅᐳᖅ ᐊᒃᓱᕉᑕᐅᓚᐅᖅᖢᓂᓗ ᐃᓄᖕᒧᑦ ᓯᕗᓕᖅᑎᒧᑦ, ᔫᓯ ᑯᓱᒐᖅ. ᔫᓯ ᐱᔾᔪᑕᐅᕗᖅ ᓄᓇᑦᑎᐊᕚᓗᒃᐳᑦ ᓴᖅᑭᑕᐅᓚᐅᕐᓂᖓᓄᑦ. ᐃᓱᒪᒋᔭᒥᓂᒃ ᓯᐊᒻᒪᒃᑎᕆᓚᐅᖅᐳᖅ ᖃᓄᐃᒻᒪᑦ ᑲᓇᑕ ᓄᓇᕘᑖᕆᐊᖃᓚᐅᕐᒪᖔᑦ: ᐱᔾᔪᑎᒋᓪᓗᒍ ᐃᓕᖅᑯᓯᕗᑦ ᐅᖃᐅᓯᕗᓪᓗ. ᔫᓯ ᐱᔾᔪᑕᐅᕗᖅ ᐃᓄᐃᑦ ᐃᓕᖅᑯᓯᖓ ᐃᓄᒃᑎᑐᓪᓗ ᓴᙱᔫᖏᓐᓇᖅᐳᖅ, ᑕᒪᓐᓇᓗ ᖁᔭᒋᕙᕋ. ᐊᒃᓱᕉᑎᖃᓚᐅᖅᐳᖅ ᐅᒃᐱᕆᔭᒥᓄᑦ ᐊᒻᒪ ᐃᓄᖕᓂᑦ ᑭᓇᐅᓂᕐᒥᓂᒃ ᑐᓂᓯᓪᓗᓂ. ᔫᓯ ᐃᔾᔪᐊᒐᒃᓴᑦᑎᐊᕙᐅᕗᖅ ᓄᓇᕗᒻᒥ ᓲᖃᐃᒻᒪ ᐊᒃᓱᕉᑎᖃᓚᐅᕐᒪᑦ ᐅᒃᐱᕆᔭᒥᓄᑦ, ᑐᙵᓇᐃᓐᓇᐅᔭᖅᐸᒃᖢᓂᓗ ᐊᒻᒪ ᐃᒡᓚᕐᓇᖅᑐᓂᒃ ᑐᓴᖅᑎᑦᑎᕙᒃᖢᓂ ᑭᒃᑯᓕᒫᓄᑦ. ᐃᖅᑲᐅᒪᓂᐊᖅᐸᕋ ᑭᓇᐅᖕᒪᖔᕐᒪ ᐅᖃᐅᓯᕆᓕᕈᒃᑯ ᐱᒻᒪᕆᐅᒋᔭᕋᓗ. ᔫᓯ ᓇᖕᒥᓂᖅ ᖃᐅᔨᒪᓚᐅᙱᑕᕋ, ᑭᓯᐊᓂ ᐅᖃᓕᒫᖅᓯᒪᔭᕋ ᑐᓴᖅᓯᒪᓪᓗᒍᓗ, ᖃᐅᔨᒪᓚᐅᖅᖢᒍᓗ ᓯᕗᓕᖅᑎᑦᑎᐊᕙᐅᓂᖓᓂᒃ ᐅᕙᑦᑎᓐᓄᑦ ᐱᓇᔪᒍᓐᓇᕐᓗᓂ. ᒫᓐᓇ ᐃᓕᑕᕆᔭᐅᔾᔪᑎᑖᕋᓱᒃᑐᖓ ᐋᓐᓂᐊᓯᐅᖅᑎᐅᓂᕐᒧᑦ ᐃᖃᓗᖕᓂ ᐃᓱᓕᑦᑎᓕᑕᐃᓐᓇᖅᖢᖓᓗ ᓯᕗᓪᓕᖅᐹᒥ ᐊᕐᕌᒍᒥᒃ. ᐱᑕᖃᕋᔪᙱᒻᒪᑦ ᐃᓄᖕᒥᒃ ᐋᓐᓂᐊᓯᐅᖅᑎᒥᒃ ᓄᓇᕗᒻᒥ ᐃᓄᒃᑎᑐᑦ ᐅᖃᓪᓚᒍᓐᓇᑦᑎᐊᖅᑐᒥᒃ. ᑕᐃᒪᐃᓐᓂᖓᓄᑦ, ᐱᕕᖃᕐᓂᓐᓂ ᐊᑐᕐᓂᐊᖅᐳᖓ ᐅᖃᐅᓯᕐᓂᒃ ᐊᑐᕐᓗᖓ ᓯᕗᓂᒃᓴᒥ ᐃᖅᑲᓇᐃᔮᕆᓛᕈᒪᔭᓐᓂᒃ ᐊᒻᒪᓗ ᐃᓄᐃᑦ ᐃᓕᖅᑯᓯᖓ ᓯᐊᒻᒪᒃᑎᕐᓗᒍ ᓄᓇᕗᒻᒥᐅᓄᑦ ᐊᒻᒪᓗ ᑕᑯᒃᓴᐅᑎᑦᑎᓗᖓ ᖃᓄᖅ ᐃᓄᐃᑦ ᐊᔾᔨᐅᙱᓐᓂᖏᓐᓂᒃ. ᑐᕌᒐᕆᔭᕋ ᐅᖃᐅᓯᕗᑦ ᐃᓕᖅᑯᓯᕗᓪᓗ ᓴᙱᔫᖁᓪᓗᒍ ᓄᓇᕗᒻᒥ, ᐊᒻᒪᓗ ᑎᑭᐅᑎᓂᐊᕈᒃᑯ, ᐃᓄᒃᑎᑐᑦ ᐅᖃᓪᓚᐃᓐᓇᕐᓂᐊᖅᐳᖓ ᐃᓕᓐᓂᐊᕐᓂᓕᒫᓐᓂ ᐊᒻᒪᓗ ᑎᓕᐅᕐᓗᒋᑦ ᓄᓇᕗᒻᒥᐅᑦ ᓴᙱᔫᖏᓐᓇᖁᓪᓗᒋᑦ. ᒪᓕᒐᓕᐅᖅᑎᐅᖃᑎᒃᑲ ᐃᓕᓐᓂᐊᖅᑎᑉᐸᒃᑲ ᐃᓄᒃᑎᑐᑦ ᐅᖃᐅᓯᕐᓂᒃ ᐊᒻᒪᓗ ᐅᖃᐅᓯᕐᓂᒃ ᖃᐅᔨᒪᔪᒪᔭᖏᓐᓂᒃ, ᐊᒻᒪᓗ ᐃᑲᔪᕈᒪᓪᓗᒋᑦ ᐃᓕᑦᑎᖁᓪᓗᒋᑦ ᐃᓄᒃᑎᑐᑦ. ᐊᒥᖅᑳᕈᑎᒋᒐᔪᒃᑕᒃᑲ ᐃᓄᐃᑦ ᐃᓕᖅᑯᓯᖏᑕ ᒥᒃᓵᓄᑦ ᐊᒻᒪᓗ ᐅᖃᐅᓯᕆᕙᒃᖢᒍ ᐅᐱᒋᓪᓗᒍ. ᔫᓯ ᐊᒃᓱᕉᑎᖃᓚᐅᖅᑐᖅ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐊᒻᒪᓗ ᑕᑯᒃᓴᐅᑎᑦᑎᓂᐊᖅᑐᖓ ᖁᔭᓕᓂᕐᓂᒃ ᓴᖅᑭᔮᖅᑎᑦᑎᓂᒃᑯᑦ ᐃᓄᒃᑎᑐᑦ ᐊᒻᒪᓗ ᐃᓄᐃᑦ ᐃᓕᖅᑯᓯᖓᓂᒃ ᐊᕐᕌᒍᒐᓴᖕᓄᑦ ᐋᓐᓂᐊᓯᐅᖅᑎᐅᑎᓪᓗᖓ. ᖃᐅᔨᕋᑖᑦᑎᐊᓚᐅᖅᑐᖓ ᔫᓯ ᓴᖅᑭᑦᑎᓚᐅᕐᒪᑦ ᐊᔾᔨᒌᓕᖅᑎᑕᐅᓯᒪᔪᒥᒃ ᐃᓄᒃᑎᑐᑦ ᐅᖃᐅᓯᕐᒥᒃ ᐊᒻᒪᓗ ᑎᑎᕋᐅᓯᕐᒥᒃ. ᐅᔾᔨᕆᑲᐅᑎᒋᓚᐅᖅᑕᕋ ᓲᖃᐃᒻᒪ ᑎᑎᕋᕈᒪᑦᑎᐊᕋᒪ ᖃᓕᐅᔮᖅᐸᐃᑎᑐᑦ ᐊᒻᒪᓗ ᐊᑐᕈᒪᓂᖅᓴᕆᒐᒃᑯ. ᐅᖃᓕᒫᕈᓐᓇᕐᒥᔪᖓ ᑎᑎᕋᕈᓐᓇᖅᖢᖓᓗ ᐃᓄᒃᑎᑐᑦ ᑎᑎᕋᐅᓯᕐᓂᒃ, ᐅᐱᒋᑦᑎᐊᖅᖢᒍ ᓲᖃᐃᒻᒪ ᓇᓗᓇᐃᖅᓯᖕᒪᑦ ᐅᕙᓐᓂᒃ ᓄᓇᕐᔪᐊᕐᒥᐅᓄᑦ ᐃᓅᓂᓐᓂᒃ. ᑎᑎᕋᐅᓯᖅ ᐃᓄᒃᑎᑐᑦ ᐱᐅᔪᒻᒪᕆᐅᕗᖅ ᓇᓗᓇᐃᖅᓯᔾᔪᑕᐅᓪᓗᓂ ᐃᓄᖕᓂᒃ. ᐃᓕᓐᓂᐊᕐᓂᕋ ᐱᒻᒪᕆᐅᑎᑉᐸᕋ, ᑎᓕᐅᖅᐸᒃᑲᓗ ᑭᒃᑯᓕᒫᑦ ᐃᓕᓐᓂᐊᕈᒪᔭᒥᓂᒃ ᑲᔪᓯᑎᑦᑎᖁᓪᓗᒋᑦ ᐃᑲᔫᑎᒋᓂᐊᕐᒪᔾᔪᒃ ᖃᐅᔨᕚᓪᓕᖁᓪᓗᒋᑦ ᑭᓱᑦ ᐱᒻᒪᕆᐅᖕᒪᖔᑕ. ᔫᓯ ᐅᖃᖅᑲᐅᒻᒪᑦ, ᐃᓕᓐᓂᐊᕐᓂᖅ ᐱᓪᓗᐊᑕᐅᒻᒪᑦ ᐃᓄᐃᑦ ᐃᓕᖅᑯᓯᖏᓐᓄᑦ ᐊᓐᓇᐅᒪᓂᕐᒧᑦ. ᑕᐅᑐᙳᐊᖅᑕᕋ ᐊᑐᕈᒪᓪᓗᒍ ᐃᓕᓐᓂᐊᖅᓯᒪᔭᕋ ᐃᓄᐃᑦ ᒥᒃᓵᓄᑦ ᐊᒻᒪᓗ ᖃᐅᔨᒪᓕᖅᑕᓐᓂᒃ ᐋᓐᓂᐊᓯᐅᖅᑎᐅᓂᕐᒧᑦ ᐊᐅᓪᓚᖃᑦᑕᕐᓗᖓ ᑲᓇᑕᓕᒫᒧᑦ ᐊᒻᒪᓗ ᓯᐊᒻᒪᒃᑎᕆᓗᖓ ᐃᓱᒪᒋᔭᓐᓂᒃ ᐊᒻᒪᓗ ᐃᓱᒪᒋᔭᓐᓂᒃ ᐃᓄᐃᑦ ᒥᒃᓵᓄᑦ ᐊᒻᒪᓗ ᓄᓇᕘᒥ ᓲᕐᓗ ᔫᓯᑎᑐᑦ. ᐊᒥᖅᑳᖃᑎᖃᕈᒪᕗᖓ ᐅᖃᐅᓯᕐᓂᒃ, ᐃᓕᖅᑯᓯᓐᓂᒃ ᐊᒻᒪᓗ ᖃᓄᖅ ᐱᒻᒪᕆᐅᑎᒋᓂᖏᓐᓂᒃ ᐃᓄᐃᑦ ᐱᔪᓐᓇᐅᑎᖏᑦ. ᔫᓯ ᓴᙱᔫᓚᐅᖅᑐᖅ ᐊᒃᓱᕉᑎᖃᖅᑎᓪᓗᒍ ᓄᓇᕘᒥᒃ ᐊᒻᒪᓗ ᑕᒪᓐᓇ ᐊᑐᖅᖢᒍ ᑲᔪᖏᖅᓴᐃᔾᔪᑎᒋᓪᓗᒍ ᐃᓄᐃᑦ ᐃᓕᖅᑯᓯᖓ ᐊᒻᒪᓗ ᐅᖃᐅᓯᖓ ᐆᒪᑎᑦᑐᒪᓪᓗᒍ.