ᐳᕆᔾᔨᑦ ᑕᑦᑐᐃᓂ
ᐃᓕᖅᑯᓯᕗᑦ ᐆᒪᑎᒐᓱᐊᕐᓗᒍ ᐱᒻᒪᕆᐅᑎᒋᒻᒪᑦ ᐊᓂᖅᓵᖅᑐᕐᓂᖅᑎᑐᑦ. ᐅᑉᐱᕈᓱᒃᑲᒪ ᐃᓕᑉᐸᓪᓕᐊᓂᕗᑦ ᐃᓱᓕᒍᓐᓇᖏᒻᒪᑦ ᐃᓕᓐᓂᐊᕐᕕᐊᓗᒻᒥ ᐱᔭᕇᕋᐃᒐᑦᑕ. ᔫᓯ ᑯᓱᒐᖅ ᐃᓚᒋᔭᐅᓚᐅᖅᑐᖅ ᐃᓅᓯᕐᒥᓂᒃ ᑐᓂᓯᒪᑦᑎᐊᖅᑐᓂ ᓄᓇᕗᑦ ᓄᓇᑦᑎᐊᕙᐅᓂᖅᓴᐅᖁᓪᓗᒍ. ᐆᑦᑑᑎᑦᑎᐊᕙᐅᓯᒪᕗᖅ ᑭᒃᑯᓕᒫᓄᑦ. ᐅᑉᐱᕈᓱᑉᐳᖓ ᕿᒪᑦᑕᖏᑦ ᑭᖑᕚᕆᓂᐊᖅᑕᑎᓐᓄᑦ ᑐᓂᔭᐅᒋᐊᖃᕐᒪᑕ. ᐊᖏᖅᑕᐅᓯᒪᓕᖅᑐᖓ ᓯᕗᓪᓕᖅᐹᖓᓄᑦ ᐊᕐᕌᒍᒧᑦ ᑎᓴᒪᓄᑦ ᓄᓇᕗᒻᒥ ᐃᓕᓴᐃᔨᐅᓂᕐᒧᑦ ᐃᓕᓐᓂᐊᕋᔅᓴᒧᑦ. ᑕᒪᓐᓇ ᐱᒋᐊᕈᑎᑐᐃᓐᓇᐅᒻᒪᑦ ᐃᑲᔪᕐᓂᕐᒧᑦ ᐃᓄᓐᓂᒃ. ᐅᑉᐱᕈᓱᑉᐳᖓ ᐱᔭᕇᕐᓂᐊᕆᐊᔅᓴᖅ ᐃᓕᓐᓂᐊᕋᔅᓴᒥᒃ. ᓯᓚᑦᑐᓴᕐᕕᔾᔪᐊᕐᒥᑦ ᐱᔭᕇᕋᓱᓐᓂᐊᖅᐳᖓ ᐃᓕᑕᕆᔭᐅᔾᔪᑎᑖᓚᐅᕐᓗᖓ ᐃᓕᓐᓂᐊᖅᑐᓕᕆᓂᕐᒧᑦ. ᐃᓄᐃᑦ ᖃᐅᔨᒪᔭᑐᖃᖏᑦ ᐊᖏᔪᐊᓗᒻᒥᒃ ᐊᑦᑐᐃᓂᖃᕐᒪᑕ ᐃᓄᓐᓄᑦ ᐊᒻᒪᓗ ᐱᒻᒪᕆᐅᒻᒪᑦ ᐃᓄᓐᓄᑦ ᖃᐅᔨᒪᔭᐅᓗᓂ ᐊᒻᒪᓗ ᑐᑭᓯᔭᐅᓗᓂ, ᓴᓇᔭᐅᓯᒪᒻᒪᑦ ᖃᐅᔨᒪᓂᖏᑎᒍᑦ ᓇᓪᓕᒋᔭᑦᑕ ᐃᓐᓇᑐᖃᐃᑦ. ᐊᑑᑎᖃᓪᓚᕆᒻᒪᑕ ᖃᐅᑕᒫᑦ ᐃᓅᓯᑦᑎᓐᓂ. ᐃᓄᐃᑦ ᖃᐅᔨᒪᓂᖏᑦ ᐅᖃᐅᓯᕆᓪᓗᒋᑦ, ᐅᑉᐱᕈᓱᑦᑎᐊᖅᑐᖓ ᐊᒃᓱᕈᕐᓂᕆᓚᐅᖅᑕᖓ ᔫᓯ ᐳᐃᒍᖅᑕᐅᔭᕆᐊᖃᖏᑦᑐᖅ. ᑭᒃᑯᓕᒫᑦ ᖃᐅᔨᒪᑉᐸᑕ ᑭᓇᐅᓂᕐᒥᓂᒃ, ᓇᑭᙶᖅᓯᒪᓂᕐᒥᓂᒃ, ᑭᓇᐅᓂᕐᒥᓂᒃ ᐊᒻᒪᓗ ᑭᓱᒥᒃ ᐱᔾᔪᑎᖃᕐᒪᖔᕐᒥᒃ ᐃᓅᓯᕐᒥᒃ, ᓄᓇᕐᔪᐊᖅ ᐱᐅᓂᖅᓴᐅᒐᔭᖅᑐᖅ. ᐃᓄᐃᑦ ᐅᐱᒋᔭᐅᓂᖅᓴᐅᒐᔭᖅᐳᑦ ᐊᒻᒪᓗ ᖁᔭᒋᔭᐅᓂᖅᓴᐅᓗᑎᒃ. ᐃᓄᐃᑦ ᔫᓯᑎᑐᑦ ᐊᒃᓱᕈᓚᐅᖅᓯᒪᓐᖏᑉᐸᑕ ᓯᕗᓂᔅᓴᑎᓐᓄᑦ, ᑕᒫᓃᒃᑲᔭᓐᖏᓇᑦᑕ ᐅᓪᓗᒥ. ᑕᑯᔪᓐᓇᕋᑦᑕ, ᐊᒃᓱᐊᓗᒃ ᖁᕕᐊᓱᒃᐳᒍᑦ ᑕᒪᐅᖓ ᑎᑭᐅᑎᔪᓐᓇᕋᑦᑕ ᐃᓅᓪᓗᑕ, ᓄᓇᕘᓗ. ᓄᓇᕗᑦ ᓱᓕ ᐱᔭᒃᓴᖃᕐᒪᑦ, ᑭᓯᐊᓂ ᐅᐱᒋᔭᕆᐊᖃᖅᑕᕗᑦ ᖃᓄᑎᒋ ᑎᑭᐅᑎᓯᒪᖕᒪᖔᑦ. ᐱᓕᕆᖃᑎᒌᖕᓂᖅ ᐱᒻᒪᕆᐅᖃᑕᐅᕗᖅ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ. ᐱᑕᖃᓐᖏᑉᐸᑦ, ᓇᒧᙵᐅᕙᓪᓕᐊᔾᔮᙱᑦᑐᒍᑦ. ᑕᒫᓃᓐᓂᓐᓂ, ᐊᒃᓱᕉᑎᖃᕐᓂᐊᖅᐳᖓ ᐅᖃᐅᓯᕗᑦ ᐊᒻᒪᓗ ᐊᔾᔨᐅᖏᓐᓂᕗᑦ ᐃᓕᖅᑯᓯᕗᑦ ᐆᒪᐃᓐᓇᖁᓪᓗᒍ. ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᖃᑎᒌᒍᑎ ᐊᖏᖃᑎᒌᒍᑕᐅᓯᒪᔪᖅ ᐃᓄᓐᓄᑦ ᐊᒻᒪᓗ ᑯᐃᓐ ᑭᒡᒐᖅᑐᖅᑎᖓᓄᑦ ᑲᓇᑕᒥ. ᐅᒃᐱᕈᓱᒃᑐᖓ ᑖᓐᓇ ᐊᖏᖃᑎᒌᒍᑕᐅᓯᒪᔪᖅ ᐃᑲᔪᖅᓯᒪᒻᒪᑦ ᐊᒥᓱᓂᒃ ᐃᓄᓐᓂᒃ. 42-ᓂᒃ ᑎᑎᕋᖅᓯᒪᔪᖃᖅᑐᖅ. ᓄᓇᕗᑦ ᑐᙵᕕᒃᑯᑦ ᑎᒥᖓᑦ ᑕᒪᒃᑯᐊ ᐊᖏᕈᑕᐅᓯᒪᔪᑦ ᑲᔪᓯᑎᑕᐅᒐᓗᐊᕐᒪᖔᑕ. ᐅᖃᐅᓯᕗᑦ ᐃᓚᒋᒻᒪᒍ ᑭᓇᐅᓂᑦᑎᓐᓄᑦ. ᐊᒥᓲᒻᒪᑕ ᐃᓅᓱᒃᑐᑦ, ᐊᓪᓛᑦ ᐃᓚᖏᑦ ᐃᓐᓇᐃᑦ, ᖃᓪᓗᓇᐅᔭᕈᓐᓇᓕᖅᑐᑦ, ᐊᒻᒪᓗ ᐊᐃᑦᑖᖑᒐᓗᐊᖅ ᑕᒪᓐᓇ ᑕᑯᓪᓗᒍ. ᐃᓚᖏᑦ ᐃᓄᐃᑦ ᐃᓄᒃᑎᑐᑦ ᑐᑭᓯᐊᔪᓐᓃᖅᑐᑦ. ᖃᓄᖅ ᑕᒪᓐᓇ ᑕᐃᒪᐃᓕᓚᐅᖅᐸ? ᐱᓕᕆᖃᑎᒌᒋᐊᖃᕋᑦᑕ ᓴᙱᒃᑎᒋᐊᕐᓗᒍ ᐅᖃᐅᓯᕗᑦ ᐊᓯᐅᕙᓪᓕᐊᓂᐊᕐᒪᑦ ᖃᓄᐃᓕᔭᐅᙱᒃᑯᓂ. ᓯᕗᓕᖅᑎ ᐄᕙ ᐋᕆᐊᒃ ᐅᖃᓚᐅᕐᒪᑦ ᓄᓇᕗᑦ 300-ᖏᓐᓃᑦᑐᓂᒃ ᐃᓄᒃᑎᑐᑦ ᐃᓕᓴᐃᔨᖃᕆᐊᖃᕐᒪᑦ ᐃᓕᓐᓂᐊᖅᑐᓕᕆᓂᕐᒧᑦ ᒪᓕᒐᐅᑉ ᐃᓗᐊᓃᓐᓂᐊᕈᓂ. ᓱᓕ ᐱᔭᒃᓴᓕᒻᒪᕆᐊᓘᒐᑦᑕ, ᑭᓯᐊᓂ ᐃᓕᓴᐃᔨᖃᕆᐊᖃᖅᑐᒍᑦ ᐊᑕᐅᓯᐅᓈᖅᑎᕐᓗᒋᑦ. ᐃᓄᒃ ᐊᑕᐅᓯᖅ ᐊᓯᔾᔩᔪᓐᓇᕐᒪᑦ. ᐃᓐᓇᖁᑎᕗᑦ ᐃᓅᔪᓐᓃᖅᐸᓪᓕᐊᖏᓐᓇᕐᒪᑕ ᐊᕐᕌᒍᑕᒫᑦ. ᓯᕗᓕᖅᑎᖃᕆᐊᖃᕋᑦᑕ ᑭᖑᕝᕕᐅᑎᓂᐊᖅᑐᓂᒃ ᐆᑦᑑᑎᑦᑎᐊᕙᐅᓂᐊᖅᑐᓂᒃ ᒪᒃᑯᖕᓂᖅᓴᓄᑦ. ᖃᓄᐃᓕᐅᕐᓂᐊᓕᕌᖓᑦᑕ, ᐃᓱᒪᒋᓲᕆᒐᑦᑎᒍᑦ, ᖃᓄᐃᓕᐅᕆᐊᖃᖅᖢᑕᓗ ᑕᒪᓐᓇ ᑲᔪᓯᑎᑦᑐᒪᓪᓗᒍ. ᖃᓄᐃᓕᐅᙱᒃᑯᑦᑕ ᐱᐅᓯᕚᓪᓕᖅᑎᑦᑎᔾᔮᙱᓚᖅ, ᕿᒪᐃᓐᓇᕋᓱᒡᓗᒍᓘᓐᓃᑦ. ᓲᕐᓗ ᐳᐃᔾᔪᕋᕈᓐᓇᖅᑐᑎᑐᑦ, ᑭᓯᐊᓂ ᐃᐱᓗᑎᑦ. ᐅᖃᐅᓯᕗᑦ ᓴᙱᒃᑎᒋᐊᕐᓂᐊᖅᑐᒃᓴᐅᕗᖅ ᐅᓪᓗᒥ ᖃᐅᒃᐸᓪᓗ. ᔫᓯ ᐊᒪᐅᔭᖅ ᑯᓱᒐᖅ ᐊᖏᔪᐊᓗᒻᒥᒃ ᑐᓐᓂᖅᑯᑎᖃᖅᓯᒪᒻᒪᑦ ᐃᓄᓐᓄᑦ. ᐃᓕᓐᓂᐊᖅᑎᑐᐊᕈᑦᑎᒍ ᐃᓄᐃᑦ, ᑖᓐᓇ ᐊᒻᒪᓗ ᕿᒪᑦᑕᖏᑦ ᐃᖅᑲᐅᒪᔭᐅᖏᓐᓇᕐᓂᐊᖅᑐᑦ. ᐃᑲᔪᖅᑐᓪᓚᕆᑉᐸᕋ ᐊᒻᒪᓗ ᖁᔭᓐᓇᒦᕈᒪᓪᓗᒍ ᖃᓄᓕᒫᖅ ᐱᓕᕆᓯᒪᓂᖓᓄᑦ. ᖃᐅᔨᒪᒋᐊᕐᓂᐊᖅᐳᖓ ᐱᓕᕆᐊᕆᔭᕆᐊᖃᖅᑕᓐᓂᒃ ᑲᔪᓯᑎᒐᓱᐊᕐᓗᒍ ᐃᓕᖅᑯᓯᕗᑦ ᐆᒪᑎᒐᓱᐊᕐᓗᒍ. ᐅᐱᒋᑦᑎᐊᖅᑕᕋ. ᒎᑎᐅᑉ ᓴᐃᒻᒪᖅᑎᓚᐅᕐᓚᕗᑦ ᐃᓚᖏᑦ.