ᐄᒪᓕ ᔪᐊᓇᓯ

ᑯᓱᒐᖅ ᖁᕕᐊᒋᔭᖃᐃᓐᓇᐅᔭᓚᐅᖅᐳᖅ. ᐅᖃᓪᓚᖃᑦᑕᓚᐅᖅᑐᖅ ᓄᓇᓕᖕᓂ, ᑲᓇᑕᒥ ᐊᒻᒪ ᓄᓇᕐᔪᐊᕐᒥ ᓈᓚᒃᑎᓂᒃ ᐊᔪᕐᓇᙱᑦᑐᒃᑯᑦ, ᐱᒃᑯᒥᒍᓱᒃᖢᓂ ᐊᒻᒪ ᐆᒻᒪᑎᒃᑯᑦ. ᐊᔪᙱᑦᑎᐊᓚᐅᖅᑐᖅ, ᐅᖃᕈᓐᓇᑦᑎᐊᖅᖢᓂ ᐊᒻᒪ ᓈᓚᒃᑎᓂᒃ ᐃᓚᐅᑎᑦᑎᔪᓐᓇᑦᑎᐊᖅᖢᓂ ᐱᔾᔪᑎᓕᖕᓂᒃ ᐱᔾᔪᑕᐅᔪᓂᒃ ᐊᒻᒪ ᓱᓕᔪᓂᒃ ᐃᓄᖕᓄᑦ ᓵᙵᔭᐅᔪᓂᒃ. ᐅᖃᓪᓚᒃᐸᒃᖢᓂ ᐃᒡᓚᕐᓇᖅᑐᓂᒃ ᐅᓂᒃᑳᖅᑐᐊᓂᒡᓗ, ᐃᓚᒋᔭᐅᕗᖅ ᐅᓄᙱᑦᑐᑯᓗᖕᓄᑦ ᐃᓄᖕᓄᑦ ᓯᕗᓕᖅᑎᓄᑦ ᐊᓕᐊᓇᐃᒋᔭᐅᓪᓗᓂ ᓈᓚᒋᐊᒃᓴᖅ. ᖁᕕᐊᓱᒃᐳᖓ ᑕᑯᔪᓐᓇᓚᐅᕋᒃᑯ ᒥᔅᑕ ᑯᓱᒐᖅ ᐅᖃᓪᓚᒃᑎᓪᓗᒍ ᐊᔾᔨᒌᙱᑦᑐᓂ ᓄᓇᕐᔪᐊᒥ ᐃᓄᖕᓄᑦ ᓯᕗᓕᖅᑎᐅᓪᓗᓂ.

ᐅᖃᓪᓚᖕᓂᕆᓚᐅᖅᑕᖓ ᑐᕆᓐᑦ ᓯᓚᑦᑐᖅᓴᕐᕕᒡᔪᐊᖓᓂ ᐅᐱᕐᙶᖑᑎᓪᓗᒍ 2006-ᒥ ᐱᐅᔪᒥᒃ ᐃᒃᐱᒋᔭᖃᓚᐅᖅᐳᖅ. ᐅᖃᓪᓚᒋᐊᖅᑐᖅᓯᒪᓪᓗᓂ ᓯᕗᓪᓕᖅᐹᖓᓂ ᐊᕐᕌᒍᒥ ᓄᓇᖃᖅᑳᖅᑐᓂᒃ ᖃᐅᔨᓴᕐᓂᕐᒥᒃ 101-ᒥ ᐃᓕᓐᓂᐊᖅᑕᓐᓂᒃ. ᐅᖃᓪᓚᖃᑎᖃᓚᐅᖅᑐᖅ 100-ᐸᓗᖕᓄᑦ ᐃᓕᓐᓂᐊᖅᑎᓄᑦ ᐃᓄᐃᑦ ᐱᕚᓪᓕᕈᑎᒋᓯᒪᔭᖏᓐᓂᒃ ᐊᒻᒪᓗ ᒫᓐᓇ ᖃᓄᐃᓕᖓᓕᕐᓂᖏᓐᓂᒃ ᑲᓇᑕᓕᒫᒥ. ᐃᓱᐊᓂ ᐊᐱᖅᓱᕈᓐᓇᖅᓯᓚᐅᖅᐳᖅ. ᑭᐅᓂᕆᓚᐅᖅᑕᖓ ᑭᖑᓪᓕᖅᐹᒥᒃ ᐊᐱᖅᑯᑎᒥᒃ ᐅᕙᓐᓄᑦ ᐃᒃᐱᒋᓂᖅᐹᕆᓚᐅᖅᐸᕋ ᐊᒻᒪᓗ ᐅᐱᒍᓱᒃᑲᓐᓂᖅᖢᓂ ᐱᐅᓯᑐᖃᕐᓂᒃ. ᐃᓕᓐᓂᐊᖅᑎ ᐊᐱᕆᓚᐅᖅᑐᖅ ᐊᒃᑐᐊᓂᖃᕐᒪᖔᑦ ᓄᓇᕗᑦ ᓴᐃᒻᒪᑎᖓᑕ ᑕᖅᓴᖏᓐᓂᒃ ᐊᑕᐅᑦᑎᒃᑰᖃᑎᖃᖅᑐᓂᒃ ᐊᓪᓚᐃᑦ ᐃᓅᓕᓴᐅᑎᖏᑕ ᑕᖅᓴᖏᓐᓂᒃ; ᐊᐅᐸᖅᑐᑦ, ᖁᖅᓱᖅᑕᑦ, ᕿᕐᓂᖅᑕᑦ, ᐊᒻᒪ ᖃᑯᖅᑕᑦ. ᐅᖃᓪᓚᑦᑎᐊᓚᐅᖅᑐᖅ ᓱᓕᑦᑎᐊᖅᑐᒥᒃ ᐃᓄᒃᑎᑐᑦ ᐅᖃᖅᖢᓂ ᖃᐅᔨᒪᙱᓐᓂᕋᖅᖢᓂ ᐃᓅᓕᓴᐅᑎᓄᑦ ᐊᒃᓴᓗᐊᖅ ᑭᓲᖕᒪᖔᑦ. ᑖᓐᓇ ᑭᐅᔾᔪᑎ ᐱᓯᒪᐃᓐᓇᖅᑕᕋ ᐊᕐᕌᒍᒐᓴᖕᓄᑦ.

ᐃᓱᒪᓚᐅᖅᐳᖓ ᑲᓇᑕᓕᒫᒥ ᓄᓇᖃᖅᑳᖅᑐᓄᑦ ᓯᕗᓕᖅᑎᐅᓪᓗᓂ ᖃᐅᔨᒪᒐᓛᒃᑐᒃᓴᐅᓚᐅᕐᓂᖓᓂᒃ ᐃᓅᓕᓴᐅᑎᓂᒃ ᐊᒃᓴᓗᐊᓕᖕᓂᒃ, ᑕᒪᓐᓇᓗ ᐊᒃᑐᐊᓂᖃᕋᔪᒃᖢᓂ ᓄᓇᖃᖅᑳᖅᑐᓄᑦ ᑲᓇᑕᒥᐅᑕᓄᑦ ᐃᓚᒋᔭᐅᓪᓗᑎᒃ ᐃᓄᐃᑦ. ᑕᐃᒪᓕ ᐃᓱᒪᒐᔪᓚᐅᖅᐳᖓ ᖃᓄᐃᒻᒪᑦ ᑕᐃᒪᓐᓇ ᑭᐅᓚᐅᕐᒪᖔᑦ. ᐊᕐᕌᒍᒐᓴᐅᓕᖅᑐᓂᒃ, ᖃᐅᔨᓯᒪᓕᖅᐳᖓ ᑭᐅᔾᔪᑎᒋᔭᖓ ᓯᓚᑐᔪᒥᒃ ᑐᓴᖅᑎᑦᑎᔪᓐᓇᓚᐅᕐᒪᑦ ᐊᒻᒪᓗ ᐊᔾᔨᐅᙱᑎᑦᑎᓪᓗᓂ ᐃᓄᖕᓂᒃ ᐊᓯᖏᓐᓂ ᑲᓇᑕᒥ ᓄᓇᖃᖅᑳᖅᑐᕕᓂᕐᓂᒃ.

ᑯᓱᒐᖅ ᐊᔭᐅᖅᑐᐃᖏᓐᓇᖃᑦᑕᓚᐅᖅᑐᖅ ᐃᓄᓐᓄᑦ-ᑐᕌᖓᔪᓂᒃ ᐱᓕᕆᔾᔪᓯᕐᓂᒃ. ᑕᐃᒪᐃᖃᑦᑕᓚᐅᖅᑐᖅ ᖃᖓᑐᐃᓐᓇᒃᑯᑦ ᐱᕕᖃᖅᑎᑕᐅᔭᕌᖓᒥ − ᐃᓚᐅᓪᓗᓂ ᑐᕆᓐᑦ ᓯᓚᑦᑐᖅᓴᕐᕕᒡᔪᐊᕐᒥ. ᑭᐅᔾᔪᑎᒋᓚᐅᖅᑕᖓ ᐃᓕᓐᓂᐊᖃᑎᓐᓄᑦ ᐃᑲᔪᓚᐅᖅᑐᖅ ᐅᕙᓐᓂᒃ ᐅᔾᔨᕈᓱᓕᖅᖢᖓ ᐃᖅᑲᐅᒪᔭᕆᐊᖃᕐᓂᓐᓂᒃ ᓇᖕᒥᓂᖅ ᐃᓅᓪᓗᖓ ᑕᐅᑐᖅᑰᖅᑕᓐᓂᒃ, ᑲᙳᓱᙱᓪᓗᖓᓗ ᐊᒥᖅᑳᖃᑎᖃᕆᐊᒃᓴᖅ ᐊᔾᔨᐅᙱᑦᑐᒥᒃ ᐊᔾᔨᒌᙱᓐᓂᐅᔪᒥᒃ.

"ᑲᓇᑕ ᓈᒻᒪᒋᓕᕈᑦᑎᒍᑦ, ᐃᓱᒫᓗᒋᐊᖃᙱᑦᑐᒍᑦ
ᑭᓇᐅᓂᑦᑎᓐᓂᒃ ᐊᓯᐅᔨᓂᕐᒥᒃ ᐅᕝᕙᓘᓐᓃᑦ ᐅᒃᐱᕆᔭᖃᕐᓂᕐᒥᒃ ᐅᕙᑦᑎᓐᓂᒃ< ᖃᓄᑐᐃᓐᓇᑦᑎᐊᖅ
ᒥᑭᓐᓂᖅᓴᐅᓪᓗᑎᒃ. ᐃᓄᐃᑦ ᑲᓇᑕᒥᐅᑕᐅᓂᖅᓴᐅᕗᑦ, ᐃᓄᐃᑦᐊᖑᑦ
ᑲᓇᑕᒥᐅᑦ ᓯᕗᓪᓕᐅᓗᑎᒃ."
−ᔫᓯ ᑯᓱᒐᖅ

ᐅᖃᐅᓯᕆᓚᐅᖅᑕᖓ, 'ᓯᕗᓪᓕᖅ ᑲᓇᑕᒥᐅᑦ, ᑲᓇᑕᒥᐅᑦ ᓯᕗᓪᓕᐅᓗᑎᒃ' ᐊᒥᓱᓄᑦ ᐊᑐᖅᑕᐅᓯᒪᓕᖅᐳᖅ, ᐃᓚᒋᔭᐅᓪᓗᓂ ᒫᓐᓇᓵᖑᓚᐅᖅᑐᖅ ᑲᓇᑕᓕᒫᒥ ᑎᑎᕋᖅᓯᒪᔪᖅ, 'ᓯᕗᓪᓕᖅᐹᑦ ᑲᓇᑕᒥᐅᑕᐃᑦ, ᑲᓇᑕᒥᐅᑦ ᓯᕗᓪᓕᐅᓗᑎᒃ: ᑲᓇᑕᓕᒫᒥ ᖃᓄᐃᓕᐅᖅᑕᐅᕙᓪᓕᐊᔪᒪᔪᖅ ᐃᓄᐃᑦ ᐃᓕᓐᓂᐊᕐᓂᖏᓐᓄᑦ'. ᑖᓐᓇ ᐅᖃᐅᓯᐅᔪᖅ ᐃᑲᔪᖅᑐᐃᖏᓐᓇᕐᓂᐊᖅᐳᖅ ᓴᙱᒃᑎᒋᐊᖅᑎᑦᑎᓗᓂᓗ ᒪᒃᑯᒃᑐᖁᑎᑦᑎᓐᓂᒃ ᓯᕗᓂᒃᓴᒥ ᐃᖅᑲᐅᒪᖁᓪᓗᒋᑦ ᑐᑭᓯᐅᒪᖁᓪᓗᒋᓪᓗ ᐃᓄᐃᑦ ᐱᐅᓯᑐᖃᖏᓐᓂᒃ ᐃᓚᓕᐅᔾᔨᓯᒪᓗᑎᒃ ᑐᙵᓱᒃᑎᑦᑎᓗᑎᒡᓗ ᐃᓄᖕᓂᒃ.

ᑯᓱᒐᖅ ᐊᖓᔪᖅᑳᖑᑎᓪᓗᒍ ᐃᓄᐃᑦ ᑕᐱᕇᒃᓴᒃᑯᓐᓄᑦ ᑲᓇᑕᒥ, ᐱᒋᐊᖅᑎᑦᑎᓚᐅᖅᓯᒪᕗᖅ ᐊᑎᕐᒥᒃ ᐊᓯᔾᔨᖅᓯᓂᕐᒥᒃ ᕿᓚᒥᑯᓗᒃ ᐋᖅᑭᒋᐊᖅᑕᐅᓪᓗᓂ ᐃᓄᐃᑦ ᑕᐱᕇᑦ ᑲᓇᑕᒥ (ITK), ᐊᓯᔾᔨᖅᑕᐅᓪᓗᓂᓗ ᑲᑐᔾᔨᖃᑎᒌᑦ ᑕᖅᓴᖓ. ᓇᓗᓇᐃᒃᑯᑕᖅ ᐃᓚᓕᐅᔾᔨᓯᒪᕗᖅ ᑲᓇᑕᒥ ᓄᓇᙳᐊᙳᐊᒥᒃ, ᐅᓗᒥᒃ ᐊᒻᒪ ᑭᒡᒐᖅᑐᐃᓪᓗᓂ ᑎᓴᒪᓂᒃ ᐃᓄᐃᑦ ᓄᓇᖏᓐᓂᒃ ᑲᓇᑕᒥ. ᑖᒃᑯᐊ ᐊᓯᔾᔨᖅᑕᐅᑎᓪᓗᒋᑦ, ᑲᑐᔾᔨᖃᑎᒌᑦ ᑕᑯᒃᓴᐅᑎᑦᑎᓕᓚᐅᖅᐳᑦ ᒫᓐᓇᓕᓴᕐᓂᒃ ᐃᓄᖕᓂᒃ; ᖁᕕᐊᒋᔭᖃᖅᖢᑎᒃ ᐃᓄᒃᑎᑐᑦ, ᑭᒡᒐᖅᑐᖅᑕᐅᓪᓗᑎᒡᓗ ᑲᑎᙵᓪᓗᑎᒃ ᐃᓄᐃᑦ. ᓯᕗᓕᖅᑎᙳᖅᐸᓪᓕᐊᖏᓐᓇᖅᐳᖅ ᑲᑐᔾᔨᖃᑎᒌᓂᒃ ᐋᖅᑭᒋᐊᖅᓯᒃᑲᓐᓂᖅᖢᓂ ᑭᒡᒐᖅᑐᐃᑦᑎᐊᖁᓪᓗᒍ ᐃᓄᐃᑦ ᓄᓇᑖᕈᑎᖏᓐᓂᒃ ᐊᒻᒪ ᑭᖑᕚᒃᓴᑦᑎᓐᓄᑦ.

ᓂᕆᐅᒃᐳᖓ ᐃᓕᓐᓂᐊᖅᑎᐅᓛᖅᑐᓄᑦ ᓇᓗᓇᐃᖅᑎᖃᑦᑕᕈᒪᓪᓗᒋᑦ ᐅᓄᖅᑐᓂᒃ ᐊᓂᒍᖅᑎᓯᒪᔭᖏᓐᓂᒃ ᔫᓯ ᑯᓱᒐᐅᓚᐅᖅᑐᖅ ᐃᓄᖕᓄᑦ ᓄᓇᕗᒻᒥ ᑲᓇᑕᒥᓗ.

"ᐃᓕᖕᓂᒃ ᖁᕝᕙᓯᖕᓂᖅᓴᒧᐊᖅᑕᐃᓕᒋᑦ, ᐃᒃᐱᒋᔭᐅᑦᑎᐊᓕᕈᕕᑦ, ᐊᓯᖕᓄᑦ ᑕᐃᒪᐃᓕᐅᖅᑕᐅᓂᐊᖅᐳᑎᑦ."

ᒥᑭᓪᓕᑎᖅᓯᒪᐃᓐᓇᐅᔭᖅᑐᓂ, ᔫᓯ ᑯᓱᒐᖅ ᑎᑎᕋᓚᐅᖅᓯᒪᔭᖓ 2004-ᒥ ᐃᓄᑦᑎᑐᑦ ᐅᖃᓕᒫᒐᕐᓂ. ᐃᓅᓯᓕᒫᖓᓂ ᐱᓕᕆᓯᒪᓂᖓᓄᑦ ᐊᒻᒪᓗ ᐃᑲᔪᖅᓯᒪᓂᖓᓄᑦ ᒥᔅᑕ ᑯᓱᒐᖅ ᐃᓄᓐᓄᑦ ᑲᓇᑕᓕᒫᒥ, ᑐᓂᓯᒍᓐᓇᐸᓪᓚᐃᔪᒍᑦ ᔫᓯ ᑯᓱᒐᖅ ᐳᖅᑐᔪᒻᒪᕆᒻᒥᒃ. ᖃᐅᔨᒪᔪᖓ ᑕᐃᒪᐃᓯᒪᒐᒪ.