ᐃᓕᓴᐱ ᒪᒃᓕᓐᑕᒃ
ᐃᓕᓐᓂᐊᕐᓂᖅ ᐱᕙᓪᓕᐊᓂᐅᕗᖅ ᖃᐅᔨᒪᓕᖅᐸᓪᓕᐊᓂᕐᒥᒃ ᐊᒻᒪᓗ ᓄᑖᓂᒃ ᖃᐅᔨᒪᓂᖅᑖᖅᐸᓪᓕᐊᓂᕐᒥᒃ ᓯᕗᒧᐊᒍᓐᓇᖁᓪᓗᑕ. ᔫᓯ ᐊᒪᐅᔭᖅ ᑯᓱᒐᖅ ᐃᓕᓐᓂᐊᖅᑎᑦᑎᔨᑦᑎᐊᕙᐅᕗᖅ ᐸᖅᑭᔨᐅᓪᓗᓂᓗ ᓄᓇᕗᒻᒥ. ᑕᐅᑐᒍᓐᓇᕐᓂᖓ ᑭᓱᑦ ᐱᔭᐅᔭᕆᐊᖃᕐᒪᖔᑕ ᓄᓇᕗᑦ ᐱᕈᖅᐸᓪᓕᐊᖁᓪᓗᒍ ᐊᒻᒪᓗ ᑐᑭᒧᐊᒃᑎᑦᑎᔪᓐᓇᕐᓂᖓ ᐊᓪᓗᕆᐊᕐᓂᑦᑎᓐᓂᒃ ᐱᒻᒪᕆᐊᓘᓚᐅᖅᑐᖅ ᒪᑭᒪᐃᓐᓇᕈᓐᓇᖁᓪᓗᒍ ᐅᖃᐅᓯᕗᑦ ᐊᒻᒪᓗ ᐃᓕᖅᑯᓯᕗᑦ. ᔫᓯ ᐃᓱᒪᒋᓪᓗᒍ ᐃᓱᒪᒋᕙᕋ ᐊᖑᑦ ᓇᒡᓕᒍᓱᑦᑎᐊᖅᑐᖅ ᐊᒻᒪᓗ ᐃᓄᑦᑎᐊᕙᐅᓪᓗᓂ ᑕᑯᔪᒪᓚᐅᙱᑦᑐᖅ ᐃᓅᖃᑎᒥᓂᒃ ᓄᓇᕘᒥ ᐱᕕᒃᓴᖃᑦᑎᐊᖁᙱᖦᖢᓂᒋᑦ. ᐊᒃᓱᕈᕐᓂᕆᓚᐅᖅᑕᖓ ᐊᒻᒪᓗ ᐊᖏᖅᓯᒪᑦᑎᐊᕐᓂᖓ ᐃᓕᓐᓂᐊᖅᑐᓕᕆᓂᕐᒥ ᐊᒻᒪᓗ ᒐᕙᒪᓕᕆᓂᕐᒥᒃ ᑎᑭᐅᑎᔾᔪᑎᒋᓯᒪᕙᕗᑦ ᐅᓪᓗᒥᒧᑦ, ᓴᙱᔫᓪᓗᑕ ᐃᓅᓪᓗᑕ. ᖁᕕᐊᒋᔭᖃᕐᓂᖓ ᓱᓕ ᐃᑉᐱᒋᔭᐅᔪᓐᓇᖅᐳᖅ ᑕᑯᓪᓗᒋᑦ ᐱᕈᖅᐸᓪᓕᐊᓂᖏᑦ ᐊᒻᒪᓗ ᐱᕙᓪᓕᐊᓂᖏᑦ ᑕᑯᕙᑦᑕᕗᑦ ᓄᓇᓕᓐᓂ ᓴᓐᖏᔪᓂᒃ ᐃᓕᓴᐃᔨᖃᖅᑐᓂᒃ ᐊᒻᒪᓗ ᐱᔾᔪᑎᖃᑦᑎᐊᖅᑐᓂᒃ. ᑖᓐᓇ ᔫᓯ ᑐᓂᓚᐅᖅᑕᖓ ᐃᓅᓱᒃᑐᓄᑦ; ᐱᕕᖃᖅᑎᑦᑎᓪᓗᓂ ᑲᒪᒋᔭᕆᐊᖃᖅᑕᑦᑎᓐᓂᒃ ᐱᕈᖅᐸᓪᓕᐊᓂᖓᓄᑦ ᓄᓇᕗᑦ. ᐱᕈᖅᓴᓚᐅᖅᑐᖓ ᐊᕐᕕᐊᓂ, ᐱᖓᔪᒋᔭᐅᓪᓗᓂ ᐊᖏᓂᖅᐹᖑᖃᑕᐅᔪᖅ ᓄᓇᓕᐅᔪᖅ ᓄᓇᕗᒻᒥ, ᐊᒥᓲᓂᖅᓴᐃᑦ ᐃᓄᖏᑦ 15 ᑐᖔᓂ ᐅᑭᐅᖃᖅᑐᑎᒃ. ᐃᓕᑕᖅᓯᓯᒪᕗᖓ ᒪᒃᑯᒃᑑᓪᓗᖓ ᐱᒻᒪᕆᐅᓂᖓᓂᒃ ᐃᓕᓐᓂᐊᕐᓂᖅ ᐊᒻᒪᓗ ᐃᓕᓐᓂᐊᕈᓐᓇᕐᓂᖅ ᐅᖃᐅᓯᑦᑎᓐᓂᒃ ᐊᑐᕐᓗᑎᒃ ᐱᒻᒪᕆᐅᒋᔭᐅᔪᓂᒃ ᐃᓕᖅᑯᓯᑐᖃᑦᑎᓐᓂᒃ. ᐊᔪᕐᓇᕐᒪᑦ ᐅᓪᓗᒥᐅᓕᖅᑐᖅ ᑕᒪᒃᑯᐊ ᓄᑖᙳᖅᐸᓪᓕᐊᔪᑦ ᐱᕈᖅᐸᓪᓕᐊᑎᓪᓗᒋᑦ ᐱᓯᒪᐃᓐᓇᕋᓱᒋᐊᒃᓴᖅ ᐅᒃᐱᕆᔭᐅᔪᓂᒃ ᓲᖃᐃᒻᒪ ᐃᓅᓯᕗᑦ ᐊᓯᔾᔨᖅᐸᓪᓕᐊᑐᐃᓐᓇᕐᒪᑦ. ᓂᕈᐊᕆᔭᖃᕐᓂᖅ ᐃᓕᓐᓂᐊᕈᒪᓂᕐᒥᒃ ᐃᓕᓐᓂᐊᕐᓂᓕᕆᓂᕐᒥᒃ ᒪᒋᐅᓪ ᓯᓚᑦᑐᖅᓴᕐᕕᒡᔪᐊᖓᓂ ᒪᓐᑐᕆᐊᒥ ᐊᒃᓱᕈᕐᓇᓚᐅᙱᓚᖅ. ᐃᓄᐃᑦ ᐱᒻᒪᕆᐅᒋᔭᖓᑦ ᐱᓕᕆᖃᑎᒌᒍᓐᓇᕐᓂᖅ, ᐃᓕᑦᑎᕙᓪᓕᐊᒻᒪᕆᒃᐳᖓ ᐃᓕᓐᓂᐊᖅᖢᖓ ᑯᐸᐃᒃᒥ. ᐱᕕᖃᖅᑎᑕᐅᓪᓗᖓ ᐃᓕᓐᓂᐊᕐᓂᕐᒥᒃ ᐊᕙᑎᒋᔭᐅᔪᒥ ᐃᓕᓐᓂᐊᕐᓂᖅᑕᖃᐅᖅᑐᒥ ᐊᕐᕌᒍᒐᓴᖕᓄᑦ ᖃᐅᔨᕚᓪᓕᕐᓇᖅᐳᖅ ᖃᓄᖅ ᐃᓕᓐᓂᐊᖅᑐᓕᕆᓂᖅ ᐱᕈᖅᐸᓪᓕᐊᔪᓐᓇᕐᒪᖔᑦ ᐊᓯᔾᔨᕈᓐᓇᕐᒪᖔᓪᓗ ᓄᓇᕗᒻᒥ. ᖃᐅᔨᒪᓂᕆᔭᒃᑲ ᐃᓕᑕᒃᑲ ᐃᓕᓐᓂᐊᕐᕕᖕᒦᙱᖦᖢᖓ ᓄᓇᕗᒻᒧᑦ ᓇᒃᓴᕈᒪᕙᒃᑲ. ᐱᕈᖅᐸᓪᓕᐊᓂᕋ ᐃᓅᓪᓗᖓ ᑐᙵᕕᖃᖅᐳᖅ ᐱᕈᖅᐸᓪᓕᐊᓂᖓᓂ ᓄᓇᓕᒐ ᐊᒻᒪ ᓄᓇᒋᔭᒪ ᓄᓇᕘᒥ. ᐆᒻᒪᑎᒐ ᐱᔪᒪᓂᖃᑦᑎᐊᕐᒪᑦ ᐱᐅᓛᒥᒃ ᐱᕈᖅᐸᓪᓕᐊᓂᕐᒥᒃ ᐊᒻᒪ ᐱᕙᓪᓕᐊᑎᑦᑎᓂᕐᒥᒃ ᐃᓄᖕᓂᑦ ᐊᒻᒪ ᐅᒃᐱᕈᓱᒃᑲᒪ ᐃᓄᐃᑦ ᖃᐅᔨᒪᓂᖃᕐᒪᑕ ᐊᒥᖅᑳᕈᑕᐅᔭᕆᐊᖃᖅᑐᓂᒃ ᓄᓇᕐᔪᐊᕐᒥᐅᓕᒫᓄᑦ ᐃᓕᓴᐃᔨᐅᓗᖓ, ᐃᓕᓐᓂᐊᖅᑎᑕᒃᑲ ᖃᐅᔨᑎᑦᑐᒪᕙᒃᑲ ᑕᒪᑐᒥᖓ ᖁᕕᐊᒋᔭᖃᕐᓂᕐᒥᒃ. ᖁᕕᐊᒋᓂᐊᕐᓗᒍ ᐊᕙᑎᒋᔭᐃᑦ, ᑐᑭᓯᐅᒪᔭᕆᐊᖃᖅᐳᑎᑦ ᖃᓄᖅ ᓴᖅᑭᓚᐅᕐᒪᖔᑦ. ᐱᒻᒪᕆᐅᖃᑕᐅᖕᒥᔪᖅ ᐃᓕᓐᓂᐊᖅᑎᑦᑎᓂᖅ ᐃᓕᓐᓂᐊᖅᑎᓂᒃ ᐃᓅᓯᕆᔭᐅᔪᓂᒃ ᐃᓄᖕᓂᒃ ᐃᑲᔪᖅᓯᒪᔪᓂᒃ ᐅᕙᑦᑎᓐᓂᒃ. ᔫᓯ ᐆᒃᑑᑎᑦᑎᐊᕙᐅᕗᖅ ᐃᓅᓯᕐᒥᓂᒃ ᑐᓂᓯᒪᑦᑎᐊᕐᓂᕐᒥᒃ ᐃᓄᖕᓄᑦ. ᐱᔨᑦᑎᕋᕐᓂᕆᔭᖓ ᓄᓇᕗᑦ ᑐᙵᕕᒃᑯᓐᓂ ᓴᖅᑭᑎᑦᑎᓯᒪᕗᖅ ᐊᑐᖅᑕᐅᕙᒃᑐᓂᒃ ᓇᓗᙱᑦᑎᐊᕈᒪᓂᕐᒧᑦ ᐃᓄᐃᑦ ᓴᐳᔾᔭᐅᓯᒪᐃᓐᓇᕋᓗᐊᕐᒪᖔᑕ ᑕᐅᑐᒃᑕᐅᓪᓗᑎᒃ ᒐᕙᒪᒃᑯᓐᓄᑦ, ᑕᒪᒃᑯᐊ ᐃᓄᐃᑦ ᐃᓕᓴᕆᔭᐅᓯᒪᖁᓪᓗᒋᑦ ᓇᖕᒥᓂᖃᓪᓚᕆᖕᓂᖏᓐᓂᒃ ᑕᒪᑐᒥᖓ ᓄᓇᒥᒃ ᓄᓇᕘᖑᓂᕋᖅᑕᑦᑎᓐᓂᒃ. ᐅᒃᐱᕈᓱᒃᐳᖓ ᓯᕗᓂᒃᓴᒥ ᐃᓕᓴᐃᔨᐅᓛᖅᑐᑦ ᑲᒪᒋᔭᒃᓴᖃᕐᒪᑕ ᑲᔪᓯᑎᑦᑎᓂᕐᒥᒃ ᔫᓯ ᐱᒋᐊᖅᑎᓚᐅᖅᓯᒪᔭᖓᓂᒃ ᐅᕙᑦᑎᓐᓄᑦ. ᐊᑐᕈᒪᓂᐊᖅᑕᕋ ᐃᓕᑕᕆᔭᐅᔾᔪᑎᑖᖅᓯᒪᓂᕋ ᐃᓕᓴᐃᔨᐅᓂᕐᒧᑦ ᐃᑲᔪᕈᑎᒋᓂᐊᕐᓗᒍ ᑕᒪᑐᒧᖓ ᐊᒻᒪᓗ ᕿᒥᕐᕈᒃᑲᓐᓂᕐᓗᖓ ᐱᑕᖃᑐᐃᓐᓇᕆᐊᓕᖕᓂᒃ ᖁᑦᑎᖕᓂᖅᐹᒥ ᐃᓕᓐᓂᐊᒐᒃᓴᓂᒃ ᓯᕗᓂᒃᓴᒥ ᐱᓕᕆᐊᖑᔪᒃᓴᓄᑦ. ᖁᔭᓕᔪᒪᕙᒃᑲ ᓄᓇᕗᑦ ᑐᙵᕕᒃᑯᑦ ᐱᕕᖃᖅᑎᑕᐅᓚᐅᕐᓂᖏᓐᓄᑦ ᐱᓇᔪᒍᓐᓇᕐᓂᕐᒥᒃ ᐱᐅᔪᒻᒪᕆᐊᓗᖕᒧᑦ ᐃᓕᓐᓂᐊᒃᑲᓐᓂᕈᑎᒃᓴᒧᑦ ᐃᑲᔫᑎᒧᑦ ᐊᒻᒪᓗ ᑯᓱᒐᒃ/ᖃᕆᑕᖅ ᖃᑕᙳᑎᒌᑦ ᐃᑲᔪᖅᑐᐃᖏᓐᓇᕐᓂᖏᓐᓄᑦ ᐱᐅᔪᒻᒪᕆᐊᓗᖕᒥᒃ ᑲᔪᖏᖅᓴᐃᔪᒥᒡᓗ ᐃᓄᖕᒥᒃ. ᐃᑲᔪᖅᑐᐃᓂᕆᔭᓯ ᐃᓚᒌᖑᓪᓗᑕ ᑕᑯᔭᐅᖃᑦᑕᖅᓯᒪᕗᖅ ᐊᕐᕌᒍᒐᓴᖕᓄᑦ ᑭᓇᑐᐃᓐᓇᕐᓗ ᐃᓄᑑᓗᓂ ᑲᔪᓯᔪᓐᓇᙱᓚᖅ. ᐃᑲᔪᖅᑐᐃᓂᖅᑕᖃᐃᓐᓇᐅᔭᖅᐳᖅ ᑕᒪᒃᑯᓇᓂ ᑲᔪᓯᓂᖃᑦᑎᐊᖅᑐᓂ ᐃᓄᖕᓂ ᖁᔭᓕᔪᒪᕙᔅᓯᓗ.