ᓕᓐ ᕿᓚᕝᕙᖅ

ᓄᓇᕗᒻᒥ ᐃᓕᓴᐃᔨᙳᕆᐅᖅᓴᓂᕐᒧᑦ ᐃᓕᓐᓂᐊᖃᑕᐅᕗᖓ ᐸᓐᓂᖅᑑᒥ. ᑖᓐᓇ ᐃᓕᓐᓂᐊᖅᓯᒪᓕᖅᑕᕋ ᐊᕐᕌᒍᓄᑦ ᐱᖓᓱᓄᑦ ᓱᓕ ᒪᕐᕉᖕᓂᒃ ᐊᕐᕌᒎᖕᓂᒃ ᐱᐊᓂᒋᐊᖃᖅᖢᖓ. ᐃᓕᓐᓂᐊᖅᐸᓪᓕᐊᓕᓵᖅᑎᓪᓗᑕ, ᐱᒋᐊᓚᐅᖅᓯᒪᕗᒍᑦ ᑐᕌᒐᒃᓴᑦᑎᓐᓂᒃ ᐃᓕᓴᐃᔨᙳᕈᒪᓪᓗᑕ. ᐱᒻᒪᕆᐅᒋᔭᕋ ᐃᓕᓐᓂᐊᖅᑕᕋ ᐱᕚᓪᓕᕈᑎᒋᕙᕋᓗ, ᐱᓗᐊᖅᑐᒥ ᐱᕕᖃᕈᓐᓇᕋᒪ ᑖᔅᓱᒥᖓ ᐃᓕᓐᓂᐊᒐᒃᓴᒥᒃ ᓄᓇᑦᑎᓐᓂ. ᐄ, ᑖᒃᑯᐊ ᐃᓕᓐᓂᐊᕈᑎᔅᓴᐃᑦ ᐊᒥᓲᒻᒪᑕ ᐃᓚᖏᑦ ᐱᔭᕐᓂᖏᑦᑐᕈᓘᒐᓗᐊᑦ ᐃᓚᖏᑦ ᐱᔭᕆᐊᑭᓐᓂᖅᓴᐃᑦ. ᑭᓯᐊᓂ ᖃᐅᔨᒪᔪᖓ ᑕᒪᒃᑯᐊ ᐃᑲᔫᑎᖃᖅᑐᐃᓐᓇᐅᒻᒪᑕ ᐃᓕᓐᓂᐊᖅᑎᑦᑎᓂᕐᒧᑦ ᓱᕈᓯᕐᓂᑦ ᐃᓕᓐᓂᐊᕐᕕᓐᓂᑦ ᐊᒻᒪᓗ ᐃᓅᓯᓕᕆᓂᕐᒥᑦ.

ᐃᓅᓯᓐᓂ, ᐊᔾᔨᒌᙱᑦᑐᓂᒃ ᐱᓕᕆᐊᒃᓴᓂᒃ ᐱᓕᕆᖃᑦᑕᖅᓯᒪᕗᖓ ᓲᕐᓗ ᐊᐱᖅᓱᖅᐸᒃᖢᖓ ᐃᓐᓇᕐᓂᒃ ᐊᒻᒪ ᓄᓇᓕᖕᓂ ᐱᓕᕆᐊᖑᔪᓂᒃ ᐃᓚᐅᕙᒃᖢᖓ. ᐊᕐᕌᒍᑦ ᑎᓴᒪᑦ ᐊᓂᒍᖅᓯᒪᓕᖅᑐᑦ, ᐃᓐᓇᕐᓂᒃ ᖃᐃᖁᔨᖃᑦᑕᓕᓚᐅᖅᓯᒪᕗᖓ ᑲᑎᖅᓱᐃᕙᒃᖢᖓᓗ ᐃᓄᐃᑦ ᐃᙱᐅᓯᑐᖃᖏᓐᓂᒃ ᐊᒻᒪ ᐃᓄᐃᑦ ᐱᙳᐊᕈᓯᑐᖃᖏᓐᓂᒃ. ᐅᖃᓕᒫᒐᕐᓂᒃ ᓴᖅᑭᑦᑎᓚᐅᖅᐳᖓ ᐃᓄᖕᓄᑦ ᑐᕌᖓᔪᓂᒃ. ᖁᕕᐊᒋᓚᐅᖅᑕᕋ ᐱᓕᕆᐊᖅ ᖃᐅᔨᒪᓪᓗᖓ ᐃᑲᔪᖅᓯᒪᒐᒪ ᐃᓄᐃᑦ ᐃᓕᖅᑯᓯᖏᓐᓂᒃ ᐅᖃᐅᓯᖏᓐᓂᒡᓗ. ᑲᑎᖅᓱᐃᓚᐅᕆᕗᖓ ᐅᓂᒃᑳᓂᒃ ᐃᓚᒌᑦ ᑲᑎᙵᓂᖏᓐᓂᒃ ᐅᖃᐅᓯᖃᖅᖢᖓᓗ ᐃᓅᖃᑎᒌᖕᓂᕐᓂᒃ. ᖃᐅᔨᓴᓚᐅᖅᐳᖓ ᖃᓄᖅ ᐃᓅᖃᑎᒌᑦᑎᐊᕐᓂᖅᓴᐅᔪᓐᓇᕐᒪᖔᑦᑕ ᓄᓇᓕᖕᓂ ᐃᓄᐃᑦ ᐃᓅᓯᖏᑦ ᐱᐅᓯᕚᓪᓕᖁᓪᓗᒋᑦ. ᐊᕐᕌᓂ ᐳᔪᐊᓗᒃᓴᒃᑯᓐᓄᑦ ᐃᖅᑲᓇᐃᔭᓚᐅᖅᓯᒪᔪᖓ, ᐃᑦᑕᕐᓂᓴᓕᕆᓂᕐᒧᑦ ᐊᒻᒪ ᐃᓕᖅᑯᓯᓕᕆᓂᕐᒧᑦ ᐱᓕᕆᐊᓂᒃ
ᐊᒻᒪᓗ ᕿᓯᕋᔭᓐᓂᒃ ᑐᐱᕐᓂᒃ. ᐱᕚᓪᓕᕈᑎᖃᖅᓯᒪᒻᒪᕆᓚᐅᖅᑐᖓ ᐱᓕᕆᐊᒥᒃ, ᐱᓗᐊᖅᑐᒥᒃ ᑐᐱᓕᐅᖅᑎᓪᓗᑕ ᐊᒻᒪᓗ ᐅᓂᒃᑳᖅᑐᐊᖃᖅᑐᑕ ᐅᐊᑦᑎᐊᕈᕐᓂᓴᕐᓂᒃ ᐃᓚᒌᓂᒃ.

ᕖᕝᕗᐊᕆᒥ, ᐋᖅᑭᒃᓱᐃᓚᐅᖅᐳᖓ ᐃᓄᓕᒫᓄᑦ ᖃᓄᐃᓕᐅᖅᑎᑦᑎᓂᕐᒥᒃ ᑕᐃᔭᐅᔪᖅ ᓯᕿᓂᖅ ᐅᑎᖅᐸᓪᓕᐊᓂᖓ. ᖃᓄᐃᓕᐅᖅᑎᑦᑎᓚᐅᖅᐳᖓ ᓯᑯᒥ. ᑖᓐᓇ ᖃᓄᐃᓕᐅᕐᓂᐅᓚᐅᖅᑐᖅ ᒪᒃᑯᖕᓂᖅᓴᓄᑦ, ᒪᒃᑯᒃᑐᓄᑦ ᓄᑕᖅᑲᓄᓪᓗ, ᖃᐅᔨᕚᓪᓕᖁᓪᓗᒋᑦ ᐃᓄᐃᑦ ᐃᓕᖅᑯᓯᑐᖃᖏᓐᓂᒃ ᐅᒃᐱᕆᔭᖏᓐᓂᒃ. ᑕᒪᓐᓇ ᖁᕕᐊᓇᖅᑐᒻᒪᕆᐅᓚᐅᖅᐳᖅ ᓄᓇᓕᖕᒥᐅᓪᓗ ᑲᑎᖃᑎᒌᒍᓐᓇᓚᐅᖅᖢᑎᒃ ᖁᕕᐊᓱᖃᑎᒌᒃᖢᑎᒡᓗ ᓂᕆᕕᒡᔪᐊᖅᖢᑎᒃ.

ᐱᓇᓱᐊᖅᑐᖓ ᐱᔭᕇᕈᒪᓪᓗᒍ ᑖᓐᓇ ᐱᓕᕆᐊᖅ. ᖃᐅᔨᒪᔪᖓ ᐱᑕᖃᕆᐊᖃᕐᓂᖓᓂᒃ ᒪᕐᕉᓐᓂᒃ ᐅᖃᐅᓰᓐᓂᒃ ᐃᓄᒃᑎᑐᑦ-ᖃᓪᓗᓈᑎᑐᑦ ᐃᓕᓴᐃᔨᓂᒃ ᓄᓇᕗᒻᒥ, ᐊᒻᒪᓗ ᐃᓕᓴᐃᔨᖃᕆᐊᖃᕐᓂᖅ ᖃᐅᔨᒪᓂᖃᖅᑐᓂᒃ ᐃᓕᓴᐃᓂᕐᒥᒃ ᓱᕈᓯᕐᓂᒃ. ᐃᓕᑕᕆᔭᐅᔾᔪᑎᑖᓚᐅᖅᑐᖓ 2011-ᒥ ᐃᓕᓐᓂᐊᑦᑎᐊᕐᓂᕐᒧᑦ ᑐᓐᓂᖅᑯᓯᐊᓂᒃ. ᑖᓐᓇ
ᑐᓐᓂᖅᑯᓯᐊᖅ ᐃᓕᓐᓂᐊᕈᑎᓄᑦ ᐊᒻᒪ ᐃᓕᓐᓂᐊᖅᑎᓄᑦ ᐃᑲᔫᑎᓄᑦ. ᑖᓐᓇ ᐱᓕᕆᐊᒃᓴᖅ ᐱᒻᒪᕆᐅᑎᑉᐸᕋ.

ᐸᓐᓂᖅᑑᖅ ᓄᓇᒋᒐᒃᑯ. ᐃᓕᓴᐃᔨᐅᓚᐅᖅᓯᒪᒐᒪ ᐃᓕᓐᓂᐊᕐᕕᒻᒥ, ᐊᒻᒪᓗ ᖃᐅᔨᒪᓪᓗᖓ ᐊᐅᓚᓂᖓᓂᒃ ᐃᓕᓐᓂᐊᕐᕕᐅᑉ. ᐅᐱᒋᔭᕋ ᐃᓕᓐᓂᐊᕐᕕᒻᒥ ᓱᕈᓰᑦ ᐅᖃᓕᒪᔪᑦ, ᑎᑎᕋᖅᑐᑦ ᐊᒻᒪᓗ ᐅᖃᓕᒫᖅᑐᑦ ᐃᓄᑦᑎᑐᑦ. ᖃᐅᔨᒪᔪᖓ ᑕᒪᓐᓇ ᒥᑭᓪᓕᕚᓪᓕᖅᓯᒪᒻᒪᑦ ᐊᓯᖏᓐᓂ ᓄᓇᓕᓐᓂ. ᑕᒪᓐᓇ ᐊᑦᑐᐃᓯᒪᒻᒪᑦ ᐃᓄᐃᑦ ᐃᓕᖅᑯᓯᑐᖃᖏᓐᓂᒃ. ᕿᓚᒥᑯᓗᒃ, ᐃᓄᐃᑦ ᐃᓕᖅᑯᓯᖓ ᐊᓯᔾᔨᖅᑐᒻᒪᕆᐅᓚᐅᖅᐳᖅ. ᑭᖑᒧᑦ ᑕᑯᓪᓗᒍ, ᐊᑦᑐᐃᓂᖓ ᐱᒋᐊᓚᐅᖅᓯᒪᔪᖅ ᖃᓪᓗᓈᑦ ᑎᑭᑉᐸᓪᓕᐊᓕᕋᑖᖅᑎᓪᓗᒋᑦ ᐃᓄᐃᑦ ᓄᓇᖓᓐᓄᑦ. 1960-ᖏᓐᓂ, ᐊᒥᓱᑦ ᐃᓚᒌᑦ ᓄᑦᑎᖅᑕᐅᓚᐅᖅᓯᒪᔪᑦ ᓄᓇᓕᓐᓄᑦ ᒐᕙᒪᑐᖃᒃᑯᓐᓄᑦ, ᐊᖏᕐᕋᖏᓐᓂᑦ ᓄᓇᓕᕋᓛᓂᑦ ᐊᔾᔨᐅᖏᑦᑐᒧᑦ ᓄᓇᓕᒻᒥᓄᑦ ᐃᓅᓯᖃᕐᓂᕐᒧᑦ. ᓱᕈᓰᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ ᐊᒻᒪᓗ ᐃᓚᖏᑦ ᓱᕈᓰᑦ ᐅᖓᓯᑦᑐᐊᓗᒻᒧᑦ ᓄᑦᑎᖅᑕᐅᓪᓗᑎᒃ ᐃᓕᓐᓂᐊᕆᐊᖅᑐᑎᒃ. ᑕᐃᔅᓱᒪᓂ, ᐅᑎᕈᓐᓇᐃᓕᒐᑦᑕ, ᐃᓄᐃᑦ ᐊᓯᐊᒍᑦ ᐃᓱᒪᓕᐅᕆᐊᖃᖅᐸᓚᐅᕐᒪᑕ ᖃᓄᖅ ᐃᓅᓇᓱᐊᕐᓂᐊᕐᒪᖔᑕ. ᐃᓄᐃᑦ ᑲᑎᙵᓪᓗᑎᒃ ᓂᐱᓕᐅᓚᐅᖅᑐᑦ ᐃᓄᓐᓄᑦ. ᐃᑉᐱᒍᓱᒃᓯᒪᕗᖓ ᔫᓯ ᑯᓱᒐᖅ, ᐊᓯᔾᔨᓚᐅᖅᓯᒪᙱᒻᒪᑦ, ᑭᒡᒐᖅᑐᐃᓪᓗᓂ ᑭᒃᑯᓕᒫᓂᒃ ᐊᔾᔨᒌᑦᑐᒥᒃ, ᓂᐱᒋᔭᐅᓪᓗᓂ ᐃᓄᓐᓄᑦ, ᑐᓴᖅᑕᐅᖁᓪᓗᒍ. ᐅᑎᖅᑎᑦᑎᓚᐅᖅᑐᖅ ᐃᓅᓂᑦᑎᓐᓂᒃ, ᐃᓄᐃᑦ ᐱᔪᓐᓇᐅᑎᖏᓐᓂᒃ.

ᑕᑯᓪᓗᒋᑦ ᑭᖑᓂᑦᑎᓐᓂ ᐊᒻᒪᓗ ᐅᓪᓗᒥᐅᔪᖅ, ᐃᓄᐃᑦ ᓴᓐᖏᓂᖅᑖᖅᑎᑕᐅᓂᖏᑦ ᐊᖅᓵᖅᑕᐅᓚᐅᕐᒪᑕ ᐃᓄᓐᓂᒃ ᐊᒻᒪᓗ ᒪᓕᒋᐊᖃᓕᖅᑐᑕ ᖃᓪᓗᓈᑦ ᒪᓕᒐᖏᓐᓂᒃ. ᐅᓪᓗᒥᐅᔪᖅ, ᓄᓇᕘᒥ ᑭᒡᒐᑐᖅᑎᐅᔪᑦ ᐋᔩᖃᑎᖃᕈᓐᓇᖅᐳᑦ ᐊᒻᒪᓗ ᓂᐱᖏᑦ ᑐᓴᖅᑕᐅᔪᓐᓇᕐᓗᑎᒃ ᑕᐃᒫᔅᓴᐃᓐᓇᖅ ᑲᓇᑕᒥᐅᑦ ᓯᕗᓕᖅᑎᖏᑎᑐᑦ. ᔫᓯ ᐊᒃᓱᕈᖅᑐᓂ ᐃᖅᑲᓇᐃᔭᖃᑦᑕᖅᓯᒪᔪᖅ ᐊᒻᒪᓗ ᑭᒡᒐᖅᑐᐃᓯᒪᓪᓗᓂ ᐃᓄᓐᓂᒃ ᐊᑦᔨᒌᖏᑦᑐᑎᒍᑦ ᑲᑐᔾᔨᖃᑎᒌᑎᒍᑦ, ᓯᕗᒧᒋᐊᖅᑎᑦᑎᓯᒪᓪᓗᓂ ᐃᓅᓯᖏᓐᓂᒃ ᐃᓄᐃᑦ ᐊᒻᒪᓗ ᐱᐅᓯᕚᓪᓕᑎᑦᑎᓪᓗᓂ ᑭᖑᕚᕆᓂᐊᖅᑕᑎᓐᓄᑦ ᐃᓄᐃᑦ ᓄᓇᖏᓐᓂ.

ᐅᐱᒍᓱᑦᑎᐊᖅᐳᖓ ᐃᓄᐃᑦ ᐱᖅᑯᓯᖏᑦ ᐅᖃᐅᓯᖏᓪᓗ ᐊᑐᖅᑕᐅᑎᓪᓗᒋᑦ ᐃᓕᓐᓂᐊᕐᕕᓐᓂᑦ. ᓴᖅᑭᔮᖅᑎᑦᑎᔪᖅ ᓇᑭᙶᖅᓯᒪᒻᒪᖔᑕ ᐃᓄᐃᑦ. ᐃᓄᐃᑦ ᑎᑎᕋᐅᓯᖏᑦ ᐱᒋᐊᓚᐅᖅᓯᒪᔪᑦ 1894-ᒥ ᐅᖃᒻᒪᒃ (ᐊᔪᕆᖅᓱᐃᔨ ᐃᐊᑦᒪᓐ ᐲᒃ) ᑎᑭᒋᐊᙵᖅᑎᓪᓗᒍ Blacklead Island-ᒧᑦ ᕿᑭᖅᑕᖏᓐᓄᓪᓗ. ᐊᕐᕙᒐᓱᒃᑏᑦ ᑕᒫᓃᑎᓪᓗᒋᑦ, ᐊᔪᕆᖅᓱᐃᔨᐅᓚᐅᖅᑐᖅ. ᓴᖅᑮᓚᐅᖅᓯᒪᔪᖅ ᐅᑉᐱᕐᓂᕐᒥᒃ ᐊᒻᒪᓗ ᑎᑎᕋᐅᓯᕐᒥᒃ, ᐊᒻᒪᓗ ᐃᓄᐃᑦ ᒪᓕᑦᑐᑎᒃ. ᑭᓯᐊᓂᓕ ᐊᓯᔾᔨᖅᓯᒪᓕᖅᑐᑦ ᐅᓂᒃᑳᖅᑐᐊᖏᑦ ᐃᓄᐃᑦ ᐊᒻᒪᓗ ᔫᓯ. ᔫᓯ ᑕᒪᔅᓱᒥᖓ ᑐᓴᕈᒪᓚᐅᖅᑐᖅ ᐊᒻᒪᓗ ᑲᑎᒪᑎᓪᓗᒋᑦ ᐅᖃᓚᐅᖅᑐᖅ ᑕᑯᒍᒪᓂᕋᖅᑐᓂ ᐊᓯᔾᔨᕐᓂᐅᔪᓂᒃ ᑎᑎᕋᐅᓯᑐᖃᕐᒥᒃ. ᐅᖃᓕᒫᖅᑐᓂ ᔫᓯᒥᒃ, ᐊᒥᓱᓂᒃ ᐊᒃᓱᕈᕐᓇᖅᑐᓂᒃ ᓵᙵᖃᑦᑕᓚᐅᖅᑐᖅ ᑭᒡᒐᖅᑐᐃᓪᓗᓂ ᐃᓄᓐᓂᒃ. ᐊᒥᓱᐊᖅᑎᖅᑐᓂ, ᐊᓯᐊᓅᖃᑦᑕᓚᐅᖅᑐᖅ
ᖃᐅᔨᒋᐊᕐᕕᐅᔪᓐᓇᖅᑐᑦ ᐃᓄᖕᓄᑦ ᐅᖃᓕᒫᕐᓂᕐᒧᑦ ᑎᑎᕋᕐᓂᕐᒧᓪᓗ. ᐃᓄᐃᑦ ᐃᓕᑦᑎᓚᐅᖅᑐᑦ ᐃᓄᐃᑦ ᑎᑎᕋᐅᓯᖏᓐᓂᒃ ᐅᖃᓕᒫᖅᖢᑎᒃ ᐸᐃᑉᐹᖁᑎᓂᒃ. ᓄᑕᐅᙱᑦᑐᖅ ᐃᓄᒃᑎᑐᑦ ᑎᑎᕋᐅᓯᖅ ᐊᐃ-ii-oo-aa-ᖑᓚᐅᖅᐳᖅ, ᑭᓯᐊᓂ ᐃᓄᐃᑦ ᖃᐅᔨᓕᓚᐅᖅᐳᑦ, ᔫᓯᒧᑦ, ᐲᖅᓯᓂᖅ 'ᐊᐃ' ᐱᐅᓂᖅᓴᐅᓇᔭᕐᓂᖓᓂᒃ ᐲᖅᑕᐅᓪᓗᓂᓗ ᐃᓄᒃᑎᑐᑦ ᑎᑎᕋᐅᓯᕐᒥᒃ. ᑕᐃᒪᐃᓐᓂᖓᓄᑦ, ᐱᖓᓱᐃᓐᓇᑯᓗᐃᑦ ᐊᒥᐊᒃᑯᑦ, ii-ooaa. ᖁᔭᓕᑦᑎᐊᖅᐳᖓ ᐱᒃᑯᒍᓱᒃᐳᖓᓗ ᑎᑎᕋᐅᓯᖅ ᐃᓄᖕᓃᙶᖅᓯᒪᖕᒪᑦ, ᐃᓄᖕᓄᑦ ᓇᖕᒥᓂᕆᔭᐅᓪᓗᓂ. ᐅᖃᐅᓯᖅ ᓱᓕᕗᖅ. ᐃᓕᓐᓂᐊᕐᕕᖕᒥ, ᐃᓕᑦᑎᔪᓐᓇᑦᑎᐊᓚᐅᖅᐳᖓ ᐱᖓᓱᓂᒃ ᑎᑎᕋᐅᓯᕐᓂᒃ. ᑕᐃᒪᐃᒻᒪᑦ ᐱᐅᕗᖅ. ᖁᔭᒋᒻᒪᕆᑉᐸᕗᑦ ᐃᓅᒍᓐᓃᓚᐅᖅᑐᖅ ᔫᓯ ᑯᓱᒐᖅ, ᐊᒃᓱᕉᑎᖃᖃᑦᑕᓚᐅᕐᒪᑦ ᐃᓄᓐᓄᑦ. ᐊᒃᓱᕉᑎᒋᓚᐅᖅᑕᖏᑦ ᐃᓄᐃᑦ ᑲᔪᓯᑦᑎᐊᕈᓐᓇᓚᐅᕐᒪᑕ ᐃᓄᐃᑦ ᓄᓇᖏᓐᓂ, ᐊᒻᒪᓗ
ᓄᓇᕐᔪᐊᓕᒫᒥᑦ.

ᐃᓄᐃᑦ ᐱᕚᓪᓕᖅᑎᑕᐅᓂᖏᑦ ᓇᓗᓇᙱᓚᖅ. ᐃᓚᖏᑦ ᓱᒃᑲᐃᓐᓂᖅᓴᐅᕗᑦ ᐊᓯᖏᓐᓂᑦ. ᑭᓯᐊᓂ ᖃᐅᔨᒪᕗᖓ ᓄᓇᕗᑦ ᐃᓐᓇᕈᖅᐸᓪᓕᐊᑎᓪᓗᒍ, ᐊᓯᔾᔨᖅᐸᓪᓕᐊᖏᓐᓇᕐᓂᐊᕐᒪᑦ ᓄᓇᕐᔪᐊᖅ. ᓄᑖᑦ ᐊᑐᖅᑕᐅᕙᑦᑐᑦ ᓴᖅᑭᐸᓪᓕᐊᓕᕐᒪᑕ, ᖃᕋᓴᐅᔭᐃᑦ ᐱᑕᖃᓕᖅᑐᑎᒃ ᐊᑐᖅᐸᑦᑐᑎᒍᓗ ᖃᕋᓴᐅᔭᒃᑯᑦ ᑐᑭᓯᒋᐊᕐᕕᓐᓂᑦ ᐃᖅᑲᓇᐃᔭᕐᕕᓐᓂᑦ, ᐊᖏᕐᕋᑎᓐᓂᑦ ᐃᓕᓐᓂᐊᕐᕕᓐᓂᓪᓗ. ᐃᑉᐱᒍᓱᒃᐳᖓ ᖃᐅᔨᕚᓪᓕᕆᐊᖃᕋᑦᑕ ᐃᓐᓇᑐᖃᑦᑎᓐᓂᑦ ᐊᐱᖅᓱᖃᑦᑕᕐᓗᒋᑦ, ᑐᑭᓯᓗᒋᑦ, ᖃᐅᔨᓴᖃᑦᑕᕐᓗᑕᓗ ᐃᓄᐃᑦ ᐅᖃᐅᓯᖏᓐᓂᑦ ᐃᓕᖅᑯᓯᖏᓐᓂᓪᓗ ᑐᙵᕕᖃᑦᑎᐊᖁᓪᓗᑕ ᓯᕗᓂᔅᓴᑎᓐᓄᑦ. ᖃᐅᔨᒪᓂᐅᔪᑦ ᐊᒥᖅᑳᕈᑎᒋᒋᐊᖃᕋᑦᑎᒍ ᓱᕈᓯᕐᓄᑦ ᒪᒃᑯᑦᑐᓄᓪᓗ ᑐᑭᓯᔭᐅᓂᐊᕐᒥᒻᒪᑕᑦᑕᐅᖅ.

ᐊᑕᒍᔪᒃ ᐃᓕᓐᓂᐊᕐᕕᖕᒥ ᐸᐃᕆᕝᕕᖕᒥ ᐃᓚᒋᔭᐅᓯᒪᓕᖅᑐᖓ ᐊᕐᕌᒍᑦ ᑕᓪᓕᒪᑦ ᐅᖓᑖᓄᑦ. ᐃᒃᓯᕙᐅᑕᐅᑉ ᑐᒡᓕᕆᓕᖅᑕᖓ. ᐃᑲᔪᖅᓱᖅᐸᒃᑲ ᐊᓈᓇᐅᓕᓵᖅᑐᑦ ᐊᑖᑕᒋᔭᐅᔪᓪᓗ ᐃᓕᓐᓂᐊᖅᑕᒥᓂᒃ ᐃᓱᓕᑦᑎᖁᓪᓗᒋᑦ, ᐃᑲᔪᖅᐸᒃᖢᒋᓪᓗ ᓄᑕᕋᓛᖏᑦ ᕿᑐᕐᖓᖏᓪᓗ ᐱᕈᖅᓴᔭᐅᖁᓪᓗᒋᑦ ᖁᕕᐊᓇᖅᑐᒃᑯᑦ. ᐃᓚᒋᔭᐅᖃᑦᑕᖅᓯᒪᕗᖓ ᐊᔾᔨᒌᙱᑦᑐᓄᑦ ᑲᑐᔾᔨᖃᑎᒌᓄᑦ ᐃᓚᐅᓚᐅᖅᖢᖓᓗ ᐱᙳᐊᖅᑐᓕᕆᓂᕐᒧᑦ ᐸᕐᓇᐅᑎᓂᒃ ᐋᖅᑭᒃᓱᐃᕙᓪᓕᐊᔪᓂᒃ. ᖁᕕᐊᒋᔭᕋ ᐃᓄᖕᓂᒃ ᐱᓕᕆᖃᑎᖃᕆᐊᒃᓴᖅ ᐃᓱᒪᒃᓴᖅᓯᐅᖅᐸᒃᖢᖓᓗ ᑕᐅᑐᒃᖢᖓᓗ ᐊᔾᔨᒌᙱᑦᑐᓂᒃ ᖃᓄᐃᓕᖓᓂᕆᔭᐅᔪᓂᒃ.

ᐃᓕᓐᓂᐊᖅᑐᓕᕆᓂᖅ ᓄᓇᕘᒦᓯᒪᓕᖅᑐᖅ ᐊᑯᓂᐊᓗᒃ. ᖃᐅᔨᒪᔪᒍᑦ ᑭᓱᑦ ᐊᑑᑎᖃᑦᑎᐊᕐᒪᖔᑕ ᐊᑑᑎᖃᑦᑎᐊᕐᒪᖔᑕᓗ ᓇᓕᐊᒡᓗ ᐱᐅᓯᒋᐊᖅᑕᐅᔭᕆᐊᖃᕐᒪᖔᑕ. ᓇᖕᒥᓂᕐᓕ ᐅᒃᐱᕈᓱᒃᑐᖓ ᐅᖃᓕᒫᕐᓂᖅ ᓯᕗᓪᓕᐅᔾᔭᐅᔭᕆᐊᖃᕐᓂᖓᓂᒃ ᐱᐅᓯᒋᐊᖅᑕᐅᔭᕆᐊᖃᕐᓂᖓᓄᑦ. ᐊᒥᓱᐊᓗᐃᑦ ᐃᓄᒃᑎᑐᑦ ᐅᖃᓕᒫᒐᐃᑦ ᓴᓇᔭᐅᓯᒪᔪᑦ,
ᑭᓯᐊᓂ ᐱᑕᖃᓗᐊᙱᓚᖅ ᐊᖓᔪᒃᖠᕐᓄᑦ ᐃᓕᓐᓂᐊᖅᑎᓄᑦ. ᐅᖃᓕᒫᕆᐅᖅᓴᓕᓵᕐᓂᖅ ᓄᑕᖅᑲᓂᒃ ᐱᕚᓪᓕᖅᑎᑦᑎᕙᒃᐳᖅ ᑎᑎᕋᕈᓐᓇᕐᓂᕐᒥᒃ ᐱᕈᖅᐸᓪᓕᐊᑎᓪᓗᒋᑦ. ᐊᑐᖅᑕᐅᔪᓐᓇᖅᑐᑦ ᐃᓄᒃᑎᑐᑦ ᐅᖃᓕᒫᕈᓐᓇᕐᓂᕐᒧᑦ ᑎᑎᕋᕈᓐᓇᕐᓂᕐᒧᓪᓗ ᐃᓱᓕᑦᑕᕐᕕᖃᖅᐸᒃᐳᑦ ᐃᓕᓐᓂᐊᖅᑏᑦ ᖁᕝᕙᓯᖕᓂᖅᓴᒧᐊᕌᖓᑕ. ᐅᔾᔨᕐᓇᖅᓯᑎᑦᑎᔪᒪᕗᖓ ᐃᓕᑦᑎᕙᓪᓕᐊᖏᓐᓇᕐᓂᕐᒥᒃ ᐃᓱᓕᑦᑕᕐᕕᖃᙱᓪᓗᓂ ᐃᓄᒃᑎᑐᑦ ᐃᓕᓐᓂᐊᖅᑏᑦ ᐊᓂᒍᐃᓚᐅᙱᓐᓂᖏᓐᓂ ᖁᑦᑎᖕᓂᖅᓴᒥ ᐃᓕᓐᓂᐊᕐᕕᖕᒥ.

ᖁᔭᓐᓇᒦᒃ ᐱᕕᖃᖅᑎᒃᑲᕕᙵ.