2014-ᒥ ᐃᓕᓐᓂᐊᕈᑎᒃᓴᖅᑖᖅᑐᑦ
- ᐃᓕᓴᐱ ᒪᒃᓕᓐᑕᒃ
- ᐊᑉᐴᓖᓇ ᒪᒃᑭᒐᖅ
ᐃᓕᓴᐱ ᒪᒃᓕᓐᑕᒃ
ᐃᓕᓐᓂᐊᕐᓂᖅ ᐱᕙᓪᓕᐊᓂᐅᕗᖅ ᖃᐅᔨᒪᓕᖅᐸᓪᓕᐊᓂᕐᒥᒃ ᐊᒻᒪᓗ ᓄᑖᓂᒃ ᖃᐅᔨᒪᓂᖅᑖᖅᐸᓪᓕᐊᓂᕐᒥᒃ ᓯᕗᒧᐊᒍᓐᓇᖁᓪᓗᑕ. ᔫᓯ ᐊᒪᐅᔭᖅ ᑯᓱᒐᖅ ᐃᓕᓐᓂᐊᖅᑎᑦᑎᔨᑦᑎᐊᕙᐅᕗᖅ ᐸᖅᑭᔨᐅᓪᓗᓂᓗ ᓄᓇᕗᒻᒥ. ᑕᐅᑐᒍᓐᓇᕐᓂᖓ ᑭᓱᑦ ᐱᔭᐅᔭᕆᐊᖃᕐᒪᖔᑕ ᓄᓇᕗᑦ ᐱᕈᖅᐸᓪᓕᐊᖁᓪᓗᒍ ᐊᒻᒪᓗ ᑐᑭᒧᐊᒃᑎᑦᑎᔪᓐᓇᕐᓂᖓ ᐊᓪᓗᕆᐊᕐᓂᑦᑎᓐᓂᒃ ᐱᒻᒪᕆᐊᓘᓚᐅᖅᑐᖅ ᒪᑭᒪᐃᓐᓇᕈᓐᓇᖁᓪᓗᒍ ᐅᖃᐅᓯᕗᑦ ᐊᒻᒪᓗ ᐃᓕᖅᑯᓯᕗᑦ. ᔫᓯ ᐃᓱᒪᒋᓪᓗᒍ ᐃᓱᒪᒋᕙᕋ ᐊᖑᑦ ᓇᒡᓕᒍᓱᑦᑎᐊᖅᑐᖅ ᐊᒻᒪᓗ ᐃᓄᑦᑎᐊᕙᐅᓪᓗᓂ ᑕᑯᔪᒪᓚᐅᙱᑦᑐᖅ ᐃᓅᖃᑎᒥᓂᒃ ᓄᓇᕘᒥ ᐱᕕᒃᓴᖃᑦᑎᐊᖁᙱᖦᖢᓂᒋᑦ. ᐊᒃᓱᕈᕐᓂᕆᓚᐅᖅᑕᖓ ᐊᒻᒪᓗ ᐊᖏᖅᓯᒪᑦᑎᐊᕐᓂᖓ ᐃᓕᓐᓂᐊᖅᑐᓕᕆᓂᕐᒥ ᐊᒻᒪᓗ ᒐᕙᒪᓕᕆᓂᕐᒥᒃ ᑎᑭᐅᑎᔾᔪᑎᒋᓯᒪᕙᕗᑦ ᐅᓪᓗᒥᒧᑦ, ᓴᙱᔫᓪᓗᑕ ᐃᓅᓪᓗᑕ. ᖁᕕᐊᒋᔭᖃᕐᓂᖓ ᓱᓕ ᐃᑉᐱᒋᔭᐅᔪᓐᓇᖅᐳᖅ ᑕᑯᓪᓗᒋᑦ ᐱᕈᖅᐸᓪᓕᐊᓂᖏᑦ ᐊᒻᒪᓗ ᐱᕙᓪᓕᐊᓂᖏᑦ ᑕᑯᕙᑦᑕᕗᑦ ᓄᓇᓕᓐᓂ ᓴᓐᖏᔪᓂᒃ ᐃᓕᓴᐃᔨᖃᖅᑐᓂᒃ ᐊᒻᒪᓗ ᐱᔾᔪᑎᖃᑦᑎᐊᖅᑐᓂᒃ. ᑖᓐᓇ ᔫᓯ ᑐᓂᓚᐅᖅᑕᖓ ᐃᓅᓱᒃᑐᓄᑦ; ᐱᕕᖃᖅᑎᑦᑎᓪᓗᓂ ᑲᒪᒋᔭᕆᐊᖃᖅᑕᑦᑎᓐᓂᒃ ᐱᕈᖅᐸᓪᓕᐊᓂᖓᓄᑦ ᓄᓇᕗᑦ. ᐱᕈᖅᓴᓚᐅᖅᑐᖓ ᐊᕐᕕᐊᓂ, ᐱᖓᔪᒋᔭᐅᓪᓗᓂ ᐊᖏᓂᖅᐹᖑᖃᑕᐅᔪᖅ ᓄᓇᓕᐅᔪᖅ ᓄᓇᕗᒻᒥ, ᐊᒥᓲᓂᖅᓴᐃᑦ ᐃᓄᖏᑦ 15 ᑐᖔᓂ ᐅᑭᐅᖃᖅᑐᑎᒃ. ᐃᓕᑕᖅᓯᓯᒪᕗᖓ ᒪᒃᑯᒃᑑᓪᓗᖓ ᐱᒻᒪᕆᐅᓂᖓᓂᒃ ᐃᓕᓐᓂᐊᕐᓂᖅ ᐊᒻᒪᓗ ᐃᓕᓐᓂᐊᕈᓐᓇᕐᓂᖅ ᐅᖃᐅᓯᑦᑎᓐᓂᒃ ᐊᑐᕐᓗᑎᒃ ᐱᒻᒪᕆᐅᒋᔭᐅᔪᓂᒃ ᐃᓕᖅᑯᓯᑐᖃᑦᑎᓐᓂᒃ. ᐊᔪᕐᓇᕐᒪᑦ ᐅᓪᓗᒥᐅᓕᖅᑐᖅ ᑕᒪᒃᑯᐊ ᓄᑖᙳᖅᐸᓪᓕᐊᔪᑦ ᐱᕈᖅᐸᓪᓕᐊᑎᓪᓗᒋᑦ ᐱᓯᒪᐃᓐᓇᕋᓱᒋᐊᒃᓴᖅ ᐅᒃᐱᕆᔭᐅᔪᓂᒃ ᓲᖃᐃᒻᒪ ᐃᓅᓯᕗᑦ ᐊᓯᔾᔨᖅᐸᓪᓕᐊᑐᐃᓐᓇᕐᒪᑦ. ᓂᕈᐊᕆᔭᖃᕐᓂᖅ ᐃᓕᓐᓂᐊᕈᒪᓂᕐᒥᒃ ᐃᓕᓐᓂᐊᕐᓂᓕᕆᓂᕐᒥᒃ ᒪᒋᐅᓪ ᓯᓚᑦᑐᖅᓴᕐᕕᒡᔪᐊᖓᓂ ᒪᓐᑐᕆᐊᒥ ᐊᒃᓱᕈᕐᓇᓚᐅᙱᓚᖅ. ᐃᓄᐃᑦ ᐱᒻᒪᕆᐅᒋᔭᖓᑦ ᐱᓕᕆᖃᑎᒌᒍᓐᓇᕐᓂᖅ, ᐃᓕᑦᑎᕙᓪᓕᐊᒻᒪᕆᒃᐳᖓ ᐃᓕᓐᓂᐊᖅᖢᖓ ᑯᐸᐃᒃᒥ. ᐱᕕᖃᖅᑎᑕᐅᓪᓗᖓ ᐃᓕᓐᓂᐊᕐᓂᕐᒥᒃ ᐊᕙᑎᒋᔭᐅᔪᒥ ᐃᓕᓐᓂᐊᕐᓂᖅᑕᖃᐅᖅᑐᒥ ᐊᕐᕌᒍᒐᓴᖕᓄᑦ ᖃᐅᔨᕚᓪᓕᕐᓇᖅᐳᖅ ᖃᓄᖅ ᐃᓕᓐᓂᐊᖅᑐᓕᕆᓂᖅ ᐱᕈᖅᐸᓪᓕᐊᔪᓐᓇᕐᒪᖔᑦ ᐊᓯᔾᔨᕈᓐᓇᕐᒪᖔᓪᓗ ᓄᓇᕗᒻᒥ. ᖃᐅᔨᒪᓂᕆᔭᒃᑲ ᐃᓕᑕᒃᑲ ᐃᓕᓐᓂᐊᕐᕕᖕᒦᙱᖦᖢᖓ ᓄᓇᕗᒻᒧᑦ ᓇᒃᓴᕈᒪᕙᒃᑲ. ᐱᕈᖅᐸᓪᓕᐊᓂᕋ ᐃᓅᓪᓗᖓ ᑐᙵᕕᖃᖅᐳᖅ ᐱᕈᖅᐸᓪᓕᐊᓂᖓᓂ ᓄᓇᓕᒐ ᐊᒻᒪ ᓄᓇᒋᔭᒪ ᓄᓇᕘᒥ. ᐆᒻᒪᑎᒐ ᐱᔪᒪᓂᖃᑦᑎᐊᕐᒪᑦ ᐱᐅᓛᒥᒃ ᐱᕈᖅᐸᓪᓕᐊᓂᕐᒥᒃ ᐊᒻᒪ ᐱᕙᓪᓕᐊᑎᑦᑎᓂᕐᒥᒃ ᐃᓄᖕᓂᑦ ᐊᒻᒪ ᐅᒃᐱᕈᓱᒃᑲᒪ ᐃᓄᐃᑦ ᖃᐅᔨᒪᓂᖃᕐᒪᑕ ᐊᒥᖅᑳᕈᑕᐅᔭᕆᐊᖃᖅᑐᓂᒃ ᓄᓇᕐᔪᐊᕐᒥᐅᓕᒫᓄᑦ ᐃᓕᓴᐃᔨᐅᓗᖓ, ᐃᓕᓐᓂᐊᖅᑎᑕᒃᑲ ᖃᐅᔨᑎᑦᑐᒪᕙᒃᑲ ᑕᒪᑐᒥᖓ ᖁᕕᐊᒋᔭᖃᕐᓂᕐᒥᒃ. ᖁᕕᐊᒋᓂᐊᕐᓗᒍ ᐊᕙᑎᒋᔭᐃᑦ, ᑐᑭᓯᐅᒪᔭᕆᐊᖃᖅᐳᑎᑦ ᖃᓄᖅ ᓴᖅᑭᓚᐅᕐᒪᖔᑦ. ᐱᒻᒪᕆᐅᖃᑕᐅᖕᒥᔪᖅ ᐃᓕᓐᓂᐊᖅᑎᑦᑎᓂᖅ ᐃᓕᓐᓂᐊᖅᑎᓂᒃ ᐃᓅᓯᕆᔭᐅᔪᓂᒃ ᐃᓄᖕᓂᒃ ᐃᑲᔪᖅᓯᒪᔪᓂᒃ ᐅᕙᑦᑎᓐᓂᒃ. ᔫᓯ ᐆᒃᑑᑎᑦᑎᐊᕙᐅᕗᖅ ᐃᓅᓯᕐᒥᓂᒃ ᑐᓂᓯᒪᑦᑎᐊᕐᓂᕐᒥᒃ ᐃᓄᖕᓄᑦ. ᐱᔨᑦᑎᕋᕐᓂᕆᔭᖓ ᓄᓇᕗᑦ ᑐᙵᕕᒃᑯᓐᓂ ᓴᖅᑭᑎᑦᑎᓯᒪᕗᖅ ᐊᑐᖅᑕᐅᕙᒃᑐᓂᒃ ᓇᓗᙱᑦᑎᐊᕈᒪᓂᕐᒧᑦ ᐃᓄᐃᑦ ᓴᐳᔾᔭᐅᓯᒪᐃᓐᓇᕋᓗᐊᕐᒪᖔᑕ ᑕᐅᑐᒃᑕᐅᓪᓗᑎᒃ ᒐᕙᒪᒃᑯᓐᓄᑦ, ᑕᒪᒃᑯᐊ ᐃᓄᐃᑦ ᐃᓕᓴᕆᔭᐅᓯᒪᖁᓪᓗᒋᑦ ᓇᖕᒥᓂᖃᓪᓚᕆᖕᓂᖏᓐᓂᒃ ᑕᒪᑐᒥᖓ ᓄᓇᒥᒃ ᓄᓇᕘᖑᓂᕋᖅᑕᑦᑎᓐᓂᒃ. ᐅᒃᐱᕈᓱᒃᐳᖓ ᓯᕗᓂᒃᓴᒥ ᐃᓕᓴᐃᔨᐅᓛᖅᑐᑦ ᑲᒪᒋᔭᒃᓴᖃᕐᒪᑕ ᑲᔪᓯᑎᑦᑎᓂᕐᒥᒃ ᔫᓯ ᐱᒋᐊᖅᑎᓚᐅᖅᓯᒪᔭᖓᓂᒃ ᐅᕙᑦᑎᓐᓄᑦ. ᐊᑐᕈᒪᓂᐊᖅᑕᕋ ᐃᓕᑕᕆᔭᐅᔾᔪᑎᑖᖅᓯᒪᓂᕋ ᐃᓕᓴᐃᔨᐅᓂᕐᒧᑦ ᐃᑲᔪᕈᑎᒋᓂᐊᕐᓗᒍ ᑕᒪᑐᒧᖓ ᐊᒻᒪᓗ ᕿᒥᕐᕈᒃᑲᓐᓂᕐᓗᖓ ᐱᑕᖃᑐᐃᓐᓇᕆᐊᓕᖕᓂᒃ ᖁᑦᑎᖕᓂᖅᐹᒥ ᐃᓕᓐᓂᐊᒐᒃᓴᓂᒃ ᓯᕗᓂᒃᓴᒥ ᐱᓕᕆᐊᖑᔪᒃᓴᓄᑦ. ᖁᔭᓕᔪᒪᕙᒃᑲ ᓄᓇᕗᑦ ᑐᙵᕕᒃᑯᑦ ᐱᕕᖃᖅᑎᑕᐅᓚᐅᕐᓂᖏᓐᓄᑦ ᐱᓇᔪᒍᓐᓇᕐᓂᕐᒥᒃ ᐱᐅᔪᒻᒪᕆᐊᓗᖕᒧᑦ ᐃᓕᓐᓂᐊᒃᑲᓐᓂᕈᑎᒃᓴᒧᑦ ᐃᑲᔫᑎᒧᑦ ᐊᒻᒪᓗ ᑯᓱᒐᒃ/ᖃᕆᑕᖅ ᖃᑕᙳᑎᒌᑦ ᐃᑲᔪᖅᑐᐃᖏᓐᓇᕐᓂᖏᓐᓄᑦ ᐱᐅᔪᒻᒪᕆᐊᓗᖕᒥᒃ ᑲᔪᖏᖅᓴᐃᔪᒥᒡᓗ ᐃᓄᖕᒥᒃ. ᐃᑲᔪᖅᑐᐃᓂᕆᔭᓯ ᐃᓚᒌᖑᓪᓗᑕ ᑕᑯᔭᐅᖃᑦᑕᖅᓯᒪᕗᖅ ᐊᕐᕌᒍᒐᓴᖕᓄᑦ ᑭᓇᑐᐃᓐᓇᕐᓗ ᐃᓄᑑᓗᓂ ᑲᔪᓯᔪᓐᓇᙱᓚᖅ. ᐃᑲᔪᖅᑐᐃᓂᖅᑕᖃᐃᓐᓇᐅᔭᖅᐳᖅ ᑕᒪᒃᑯᓇᓂ ᑲᔪᓯᓂᖃᑦᑎᐊᖅᑐᓂ ᐃᓄᖕᓂ ᖁᔭᓕᔪᒪᕙᔅᓯᓗ.
ᐊᑉᐴᓖᓇ ᒪᒃᑭᒐᖅ
ᐊᒥᓱᓂᒃ ᐊᒃᓱᕈᕐᓇᖅᑐᓂᒃ ᓵᙵᔭᖃᖅᐳᒍᑦ ᓇᐃᑦᑐᑯᓗᖕᒥ ᐃᓅᓯᑦᑎᓐᓂ. ᐃᓄᐃᑦ ᐊᒃᓱᕉᑎᖃᖃᑦᑕᖅᑎᓪᓗᒋᑦ ᓯᓚ ᓂᒡᓚᓱᒃᑐᐊᓗᖕᒥ ᐊᖏᕐᕋᕆᔭᐅᖏᓐᓇᙱᑦᑐᓂ, ᓂᕿᒃᓴᖃᖅᐸᒃᖢᑎᒃ ᐊᖑᓇᓱᒃᑎᓄᑦ, ᐃᓄᐃᑦ ᓱᓕ ᐊᒃᓱᕈᕈᑎᖃᖅᐳᑦ ᐅᓪᓗᒥᒧᑦ. ᑕᒪᒃᑯᐊ ᐊᒃᓱᕉᑎᒋᔭᐅᕙᓚᐅᙱᒃᑲᓗᐊᖅᑎᓪᓗᒋᑦ ᓯᕗᓕᕆᓚᐅᖅᑕᑎᓐᓄᑦ, ᓱᓕ ᓯᕗᓂᒃᓴᑦᑎᓐᓂ ᖃᐅᔨᔾᔪᑕᐅᔪᓐᓇᖅᐳᑦ. ᐅᖓᓯᒃᑐᒧᑦ ᑎᑭᐅᑎᓂᐊᖅᐱᑖ ᐃᓅᓂᑦᑎᓐᓂᒃ? ᑭᒡᒍᓯᖅ ᐱᔾᔪᑎᖃᖅᐳᖅ ᖃᓄᐃᓕᐅᕐᓂᕆᔭᑦᑎᓐᓂ. ᐃᓄᐃᑦ ᓱᓕ ᐊᒃᑐᐊᓂᖃᑦᑎᐊᓚᐅᖅᐳᑦ ᓄᓇᒧᑦ, ᐃᓄᖕᓄᑦ ᐊᒻᒪ ᐱᔪᒪᔭᑦᑎᓐᓄᑦ. ᑕᐃᒪᙵᑎᑐᑦ, ᐊᖑᓇᓱᒃᐸᒃᐳᒍᑦ ᐊᖑᓇᓱᖕᓇᐅᑎᓪᓗᒍ. ᐃᖅᑲᓇᐃᔭᖅᑏᑦ ᐅᓪᓗᒥᐅᔪᖅ ᐊᖑᓇᓱᒍᓐᓇᖅᑎᑕᐅᕙᓕᖅᐳᑦ ᐊᑕᐅᑦᑎᒃᑯᑦ ᐃᓄᐃᑦ ᖃᐅᔨᒪᔭᑐᖃᖏᑦ ᐅᒃᐱᕆᔭᖏᑦ. ᑕᐃᒪᐃᓚᐅᙱᓚᖅ ᓄᓇᕘᖃᖅᑎᓐᓇᑕ. ᓯᕗᓕᖅᑎᖃᕈᒪᑦᑎᐊᕐᓂᖏᓐᓄᑦ ᔫᓯ ᑯᓱᒐᖅᑎᑐᑦ, ᐱᕕᒃᓴᖃᖅᐳᒍᑦ ᐃᓱᒪᒋᔪᓐᓇᓚᐅᙱᑕᑦᑎᓐᓂᒃ. ᐃᓄᐃᑦ ᐊᔾᔨᐅᙱᒻᒪᑕ. ᑐᙵᓇᖅᐳᒍᑦ ᐊᔾᔨᒌᒥᒡᓗ ᑐᕌᒐᖃᖅᖢᑕ. ᐅᒃᐱᕈᓱᒃᐳᖓ ᐅᖃᕈᓐᓇᕆᐊᒃᓴᖅ ᐃᓄᓕᒫᑦ ᐱᔪᓐᓇᐅᑎᒥᓂᒃ ᐱᔪᒪᖕᒪᑕ ᐱᔭᕆᐊᖃᖅᖢᑎᒡᓗ ᐊᖑᓇᓱᒍᓐᓇᕐᓂᕐᒥᒃ ᑕᒫᓂ ᓄᓇᒥᖕᓂ. ᐱᒃᑯᒋᔪᒪᕙᕗᑦ ᐃᓐᓇᖁᑎᕗᑦ ᐃᓱᒪᒋᔭᖏᓪᓗ ᐃᓱᒪᓕᐅᕈᑕᐅᔪᓄᑦ ᒐᕙᒪᒃᑯᓐᓂ; ᐊᒻᒪᓗᑦᑕᐅᖅ, ᑲᔪᓯᑦᑎᐊᕈᒪᔪᐃᓐᓇᐅᒐᑦᑕ. ᐱᓕᕆᖃᑎᒌᒃᑯᑦᑕ ᐊᑕᐅᓯᐅᓗᑕ, ᓯᕗᓕᑦᑕ ᐅᖃᐅᓯᖏᑦ ᐊᑐᕐᓗᒋᑦ, ᐅᖃᐅᓯᕗᑦ ᐃᓕᖅᑯᓯᕗᓪᓗ ᐊᓯᐅᔾᔭᐃᖅᓯᒪᔪᓐᓇᖅᑕᕗᑦ ᔫᓯᑎᑐᑦ. ᔫᓯ ᐊᖑᑕᐅᓚᐅᖅᑐᖅ ᐱᔪᓐᓇᕐᓂᓕᒫᒥᒍᑦ ᐃᓅᓇᓱᒋᓪᓗᒍ. ᓄᓇᒧᑦ ᐊᑦᑐᐊᓂᖃᑦᑎᐊᓚᐅᖅᑐᖅ, ᐃᓄᓐᓄᑦ, ᐊᒻᒪᓗ ᐱᔪᒪᔭᖏᓐᓄᑦ ᐃᓄᐃᑦ. ᑲᑎᖃᑎᒋᖃᑦᑕᖅᓯᒪᓪᓗᒍ ᔫᓯ, ᓇᓗᓇᕈᓐᓃᓚᐅᖅᑐᖅ ᐃᑲᔪᖅᑐᐃᓚᐅᕐᒪᑦ ᐃᓕᓐᓂᐊᕐᓂᓕᕆᓂᕐᒥᒃ ᐊᒻᒪᓗ ᐃᓄᐃᑦ ᐱᔪᓐᓇᐅᑎᖏᓐᓂᒃ. ᐃᓄᐃᑦ ᑲᔪᓯᑦᑎᐊᖁᓪᓗᒋᑦ. ᔫᓯ ᑯᓱᒐᖅ ᑐᙵᓇᑦᑎᐊᓚᐅᖅᑐᖅ. ᕿᑐᕐᖓᖏᑦ ᐃᓕᓐᓂᐊᖅᓯᒪᑦᑎᐊᖅᑐᑦ ᓄᓕᐊᖓᓗ. ᐅᕙᖓᑦᑕᐅᖅ, ᑕᐃᒪᐃᑦᑐᒥᒃ ᐃᓕᓐᓂᐊᕈᒪᒻᒥᔪᖓ. ᑭᓯᐊᓂᓕ, ᐃᓛᓐᓂᒃᑯᑦ ᐃᓱᒪᖃᑦᑕᕋᒪ ᐃᓕᓐᓂᐊᖅᑏᑦ ᓯᓚᑦᑐᓴᕐᕕᒻᒨᖅᐸᓪᓕᐊᔪᑦ ᑮᓇᐅᔭᑎᒍᑦ ᐃᑲᔪᖅᑕᐅᑲᓐᓂᕆᐊᖃᓲᖑᒻᒪᑕ. ᐱᕕᖃᖅᑎᑕᐅᓂᖓ ᔫᓯ ᑯᓱᒐᖅ ᓱᓕ ᐅᓪᓗᒥ ᓇᓗᓇᐃᖅᓯᕗᖅ ᓱᓕ ᐆᒻᒪᑎᓐᓃᒻᒪᑦ. ᕿᑐᕐᖓᖃᕐᓂᖅ ᐃᓕᓐᓂᐊᕆᐊᖅᓯᒪᓪᓗᓂ ᐱᒡᒐᓇᕐᓂᖅᓴᐅᕗᖅ ᐃᓱᒪᒋᓚᐅᕋᒃᑯ. ᑕᐃᔅᓱᒪᓂᐅᓕᖅᐸᑦ ᔫᓯ ᐅᖃᕋᔭᖅᑰᖅᑐᖅ, "ᓴᐱᓕᖅᑕᐃᓕᒋ, ᓴᐱᓕᖅᑕᐃᓕᒋᑦ, ᐃᓕᓐᓂᐊᕐᓂᓯ ᐱᒻᒪᕆᐅᒻᒪᑦ ᐃᓕᓐᓄᑦ ᐊᒻᒪᓗ ᓯᕗᓂᒃᓴᖓᓄᑦ ᓄᓇᕗᑦ." ᓯᕗᓂᒃᓴᕗᑦ ᑐᙵᕕᖃᕐᒪᑦ ᑕᐃᒃᑯᓂᖓ ᐃᓄᖕᓂᑦ ᐅᓪᓗᒥᐅᔪᖅ. ᐊᓯᔾᔩᓂᐊᖅᐳᒍᑦ ᓄᓇᕗᒻᒧᑦ ᐊᒻᒪᓗ ᖃᓄᐃᓕᐅᕈᑎᒋᔭᕗᑦ ᐅᓪᓗᒥ ᓴᖅᑭᓛᕐᒪᑕ ᓄᓇᕘᒧᑦ. ᐃᓕᓐᓂᐊᕐᓂᖅ ᐊᑭᖃᙱᓚᖅ ᒫᓐᓇ, ᑭᓯᐊᓂᓕ ᓯᕗᓂᒃᓴᕗᑦ ᖃᓄᐃᓕᖓᕙ? ᐊᑭᖃᐃᓐᓇᔾᔮᙱᓚᖅ ᐃᓄᒋᐊᒃᓯᕙᓪᓕᐊᓂᑦᑎᓐᓄᑦ. ᑕᐃᒪᐃᓐᓂᖓᓄᑦ, ᐃᓱᒪᒋᔭᕆᐊᖃᖅᐸᕗᑦ ᐱᕕᒃᓴᓕᒫᑦ ᒫᓐᓇ ᐊᑐᑦᑎᐊᕐᓗᑎᒍᓗ ᐱᓯᒪᔭᕗᑦ. ᐃᓅᓯᖅ ᐊᒃᓱᕈᕐᓇᕋᓗᐊᖅᑎᓪᓗᒍ ᐃᓕᓐᓂᐊᖅᑎᐅᓪᓗᓂ ᒫᓐᓇ, ᐃᓅᓯᖅ ᐊᔪᕐᓇᙱᓐᓂᖅᓴᐅᓕᕐᓂᐊᖅᐳᖅ ᓇᓗᓇᐃᒃᑯᑕᖅᑖᖅᓯᒪᓕᕈᑦᑕ. ᐃᓱᒪᕗᖓ ᓂᐱᖃᙱᑦᑐᑦ ᓯᓐᓇᒃᑑᒪᒋᔭᕗᑦ ᒫᓐᓇ ᐱᓪᓚᑦᑖᖑᓕᕐᓂᐊᕐᓂᖏᓐᓂᒃ. ᐊᑐᓂ ᐃᓄᐃᑦ ᓇᖕᒥᓂᖅ ᐊᒃᓱᕉᑎᖃᖅᐸᒃᐳᑦ ᖃᐅᑕᒫᑦ. ᑕᐃᒃᑯᐊᖑᓚᐅᖏᒃᑯᑎᒃ ᐅᕙᑦᑎᓐᓂᒃ ᐊᒃᓱᕈᕈᑎᖃᖅᓯᒪᕗᑦ, ᐱᕚᓪᓕᕋᔭᙱᓚᒍᑦ ᐅᓪᓗᒥᑎᑐᑦ. ᐊᒃᓱᕈᕈᑎᖃᕐᓂᖅ ᑮᓇᐅᔭᑎᒍᑦ ᐊᒻᒪ ᖃᐅᑕᒫᑦ ᐃᓅᓇᓱᐊᕐᓂᕐᒧᑦ ᐊᒃᓱᕈᕈᑕᐅᖏᓐᓇᕈᓐᓇᖅᐳᖅ; ᑕᐃᒪᐃᒃᑲᓗᐊᖅᑎᓪᓗᒍ, ᑲᑕᒍᑕᐅᔪᓐᓇᕐᒪᑦ. ᑕᐃᒪᐃᒻᒪᑦ, ᐅᕙᒍᑦ ᓯᕗᒻᒧᐊᖏᓐᓇᕆᐊᖃᖅᐳᒍᑦ, ᐅᕙᑦᑎᓐᓄᑐᐃᓐᓇᐅᖏᑦᑐᖅ, ᑭᓯᐊᓂ ᐃᓅᓯᖏᑦ ᐱᐅᓯᕚᓪᓕᖁᓪᓗᒋᑦ ᓄᓇᕘᒥᐅᑕᐅᔪᑦ. ᑲᔪᓯᔭᕆᐊᖃᖅᐳᒍᑦ ᓄᓇᕗᑦ ᓄᓇᒋᓕᕐᓗᒍ. ᑎᒍᒥᐊᕐᓗᒋᑦ ᐱᔪᒪᔭᖏᑦ, ᐃᓄᐃᑦ ᐊᒻᒪᓗ ᓯᕗᓂᒃᓴᖏᑦ ᑕᐃᒃᑯᐊ ᐅᓇᑕᕇᖅᓯᒪᔪᑦ, ᑕᐃᒃᑯᐊ ᐅᓇᑕᖅᑐᑦ, ᐊᒻᒪᓗ ᑕᐃᒃᑯᐊ ᐅᓇᑕᕐᓂᐊᖅᑐᑦ ᐅᓪᓗᒥᐅᔪᖅ, ᖃᐅᑉᐸᓪᓗ. ᐊᑕᐅᓯᐅᓗᑕ ᓇᖏᕆᐊᖃᖅᐳᒍᑦ ᐃᓗᐃᑦᑑᓗᑕ ᑲᔪᓯᑦᑎᐊᕈᓐᓇᖁᓪᓗᑕ.