ᒥᐊᓕ−ᐃᓖᔅ ᑰᓕ

*ᑐᑭᓕᐅᖅᑕᐅᓯᒪᔪᖅ ᐃᓄᑦᑎᑐᑦ ᑎᑎᕋᖅᑕᒥᓂᖅ* ᐃᓕᓐᓂᐊᖅᑎᑦᑎᓂᖅ ᐃᑲᔫᑎᖃᑦᑎᐊᖅᑐᖅ. ᐃᖅᑲᐅᒪᒐᒪ ᓂᕕᐊᖅᓯᐊᖑᓪᓗᖓ, ᐃᓕᓴᐃᔨᐅᔪᒪᓚᐅᖅᓯᒪᒐᒪ. ᑕᐅᑐᒃᖢᒋᑦ ᐃᓕᓴᐃᔨᒋᕙᓚᐅᖅᑕᒃᑲ ᐃᖅᑲᓇᐃᔮᒥᓂᒃ ᐱᓕᕆᑎᓪᓗᒋᑦ, ᐱᔪᒪᓕᑦᑎᐊᓚᐅᖅᐳᖓ. ᐊᓕᐊᓇᐃᒋᑦᑎᐊᖅᑕᕋ. ᐃᓱᒪᓕᓚᐅᖅᐳᖓ ᖃᓄᐃᑦᑐᒥᒃ ᐃᖅᑲᓇᐃᔮᖃᕈᒪᓇᔭᕐᒪᖔᕐᒪ, ᐃᓱᓕᑦᑎᔭᕆᐊᖃᓕᖅᖢᖓᓗ ᐃᓕᓴᐃᔨᐅᓂᕐᒧᑦ ᐃᓕᓐᓂᐊᖅᑕᓐᓂᒃ. ᐊᕐᕌᒍᓂᒃ ᐱᖓᓱᓂᒃ ᐱᐊᓂᒃᓯᓯᒪᓕᖅᑐᖓ ᕆᔭᐃᓇᒥ. ᐊᕐᕌᒍᒃᑲᓐᓂᕐᒥᒃ ᓱᓕ ᐱᔭᕇᕋᓱᐊᕐᓂᓐᓂ ᐃᓕᓐᓂᐊᖅᑕᓐᓂᒃ. ᐃᓕᓐᓂᐊᕋᓗᐊᖅᑎᓪᓗᖓ ᑕᒫᓂ ᕆᔭᐃᓇᒥ, ᓂᕆᐅᑦᑎᐊᖅᐳᖓ ᐊᖏᕐᕋᓛᕆᐊᔅᓴᖅ ᐃᓕᓴᐃᔨᐅᔭᖅᑐᕐᓗᖓ. ᐃᖅᑲᐅᒪᕗᖓ ᐅᓪᓗᕐᒥᒃ ᐅᑎᓛᕋᒪ ᓄᓇᓐᓄᑦ ᕆᔭᐃᓇᒥᐅᑕᐅᓚᐅᕐᓗᖓ ᐊᕐᕌᒍᓂᒃ ᐱᖓᓱᓂᒃ.

ᐃᓅᓚᐅᖅᓯᒪᔪᖓ ᐊᒻᒪᓗ ᐱᕈᖅᓴᓪᓗᖓ ᐃᖃᓗᓐᓂ. ᐊᓈᓇᒐ ᐃᓅᓪᓗᓂ ᐊᒻᒪᓗ ᐊᑖᑕᒐ ᔭᐃᒪᐃᑲᓐᒥᐅᑕᐅᓪᓗᓂ. ᐅᖃᐅᔾᔭᐅᖃᑦᑕᖅᓯᒪᒐᒪ ᐊᒥᓱᓄᑦ ᑕᐅᑦᑐᒃᑲ ᐊᔾᔨᖃᓐᖏᒻᒪᑕ ᐃᓅᑉ. ᑭᓯᐊᓂᓕ ᐱᕈᖅᓴᔭᐅᓚᐅᕋᒪ ᐃᓄᐃᑦ ᓄᓇᖓᓂ. ᖃᐅᔨᒪᔪᖓ ᐃᓅᒐᒪ ᐊᒻᒪᓗ ᐅᐱᒍᓱᑦᑎᐊᖅᑐᖓ ᐃᓅᒋᐊᒃᓴᖅ. ᐊᔾᔨᐅᖏᒃᑲᓗᐊᕈᒪ ᐊᒻᒪᓗ ᖃᓪᓗᓈᑎᑐᑦ ᐃᓅᓯᖃᕋᓗᐊᕈᒪ, ᓱᓕ ᐅᐱᒍᓱᒃᐳᖓ ᐃᓅᓂᕋᕐᓗᖓ. ᐊᓈᓇᒪ ᐃᓕᓐᓂᐊᖅᑎᓚᐅᖅᐹᖓ ᐃᓄᑦᑎᑐᑦ ᐊᒻᒪᓗ ᐃᓚᖏᑦ ᐃᓕᓴᐃᔨᒪ ᐃᓕᓐᓂᐊᖅᑎᑕᐅᓯᒪᒋᓪᓗᑎᒃ, ᐊᒻᒪᓗ ᑕᒪᓐᓇ ᐅᐱᒋᔾᔪᑎᒋᕙᕋ.

ᖃᓪᓗᓈᓂᒥᐅᑕᐅᒐᓗᐊᖅᑎᓪᓗᖓ, ᐃᓕᓐᓂᐊᖅᑎᑕᐅᓚᐅᕋᒪ ᐃᓄᐃᑦ ᐃᓕᖅᑯᓯᖓᓐᓂᒃ. ᖃᐅᔨᓯᒪᒻᒥᔪᖓ ᖃᓪᓗᓈᑦ ᐃᓕᖅᑯᓯᖏᓐᓂᒃ. ᐃᓕᓐᓂᐊᖅᑎᑕᐅᓯᒪᓪᓗᖓ ᒪᕐᕉᓐᓂᒃ ᐊᑦᔨᒌᖏᑦᑐᓂᒃ ᐃᓕᖅᑯᓯᐅᔫᓐᓂᒃ ᐃᑲᔪᖅᓯᒪᔪᖅ ᐅᕙᓐᓂᒃ ᓯᕗᒧᒋᐊᕈᑎᒋᓯᒪᔭᕋ ᐃᓕᓴᐃᔨᐅᓂᕐᒧᑦ ᐃᓕᓐᓂᐊᕐᓂᕐᒧᑦ. ᐊᑦᔨᒌᖏᑦᑑᑎᐅᒻᒪᑕ ᐃᓕᖅᑯᓯᐅᔪᑦ. ᐃᓱᒪᓕᕋᒪ ᐱᕚᓪᓕᕈᑎᖃᕈᓐᓇᒻᒪᕆᓐᓂᑎᓐᓂᒃ ᑕᒪᒃᑯᓇᙵᑦ ᐊᑦᔨᒌᖏᑦᑐᓂᒃ ᐃᓕᖅᑯᓯᐅᔪᓂᒃ.

ᐃᓕᑕᒃᑲ ᐃᓚᓐᓂᒃ ᐃᓄᓐᓂᓪᓗ ᐊᑐᑦᑎᐊᕈᒪᔭᒃᑲ ᐃᓕᓴᐃᖃᑦᑕᓕᕈᒪ. ᐃᓚᓕᐅᑎᔪᒪᔭᒃᑲ ᐃᓄᒃᑎᑐᑦ ᐃᓕᓐᓂᐊᖅᑎᑦᑎᖃᑦᑕᕈᒪ ᐃᓕᓴᐃᔨᐅᓂᓐᓂ. ᐃᓕᓐᓂᐊᖅᑎᑦᑎᔪᒪᕗᖓ ᐃᓚᒌᖕᓂᐅᑉ ᒥᒃᓵᓄᑦ, ᓄᑲᖅᖠᕐᓂᒃ, ᐊᖓᔪᒃᖠᕐᓂᒃ, ᐊᓂᖏᓐᓂᒃ, ᐊᒃᑲᖏᓐᓂᒃ, ᐊᑦᑕᖏᓐᓂᒃ. ᑕᒪᒃᑯᐊ ᐃᓄᐃᑦ ᐅᒃᐱᕆᔭᖏᑦ. ᐃᓕᓐᓂᐊᖅᑏᑦ ᐅᓪᓗᒥᐅᔪᖅ ᐱᔪᒪᓂᖃᑦᑎᐊᖅᐳᑦ ᓄᓇᕐᔪᐊᕐᒥ ᐱᔾᔪᑕᐅᔪᓂᒃ. ᐃᓕᓐᓂᐊᖅᑎᑦᑎᔪᓐᓇᖅᑐᒍᑦ ᓄᓇᕐᔪᐊᕐᒥ ᐱᔾᔪᑕᐅᔪᓂᒃ, ᑭᓯᐊᓂ ᓱᓕ ᐃᓕᓐᓂᐊᖅᑎᑦᑎᔪᓐᓇᖅᐳᒍᑦ ᐃᓄᐃᑦ ᐅᒃᐱᕆᔭᖏᓐᓂᒃ.

ᖁᔭᒋᓪᓚᕆᑉᐸᕋ ᐊᓈᓇᒐ ᐃᓕᓐᓂᐊᖅᑎᓚᐅᕐᒪᖓ ᐃᓄᑦᑎᑐᑦ, ᐅᕙᓐᓄᑦ, ᐊᒻᒪᓗ ᐃᑲᔪᕈᒪᓪᓗᖓ ᐊᓯᓐᓂᒃ. ᐃᓄᑦᑎᑐᑦ ᐅᖃᓪᓚᒍᒪᓕᕋᐃᒐᒪ, ᐊᓯᐊᓂᒃ ᐅᖃᖃᑎᖃᕆᐊᖃᓲᖑᒐᒪ. ᐃᓄᑑᒋᐊᖃᓚᐅᖏᓇᑦᑕ. ᖃᐅᔨᒪᓂᑦᑎᓐᓂᒃ ᐊᒥᖅᑳᕆᐊᖃᕋᑦᑕ.

ᐃᓕᓴᐃᔨᙳᕈᒪ, ᐃᖅᑲᐅᒪᔭᕆᐊᖃᕐᓂᐊᖅᑐᖓ ᐃᓄᐃᑦ ᐱᖅᑯᓯᖏᓐᓂᒃ ᐊᒻᒪᓗ ᐅᒃᐱᕆᔭᖏᓐᓂᒃ ᐊᒻᒪᓗ ᐅᓪᓗᒥᐅᓕᖅᑐᖅ ᐃᓕᖅᑯᓯᖏᓐᓂᒃ. ᐊᒥᓲᒻᒪᑕ ᐃᓕᓐᓂᐊᖅᑏᑦ ᖃᐅᔨᒪᖏᑦᑐᑦ ᑭᓇᐅᒻᒪᖔᕐᒥᒃ. ᐊᑐᖅᐸᒻᒪᑕ ᖃᓪᓗᓈᑦ ᐃᓕᖅᑯᓯᖓᓂᒃ. ᑕᐃᒪᐃᒃᑲᓗᐊᖅᑎᓪᓗᒍ, ᐃᓕᓐᓂᐊᖏᓐᓇᕈᓐᓇᖅᑐᒍᑦ ᐃᓄᐃᑦ ᐃᓕᖅᑯᓯᖓᓂᒃ. ᐃᓄᐃᑦ ᖃᐅᔨᒪᔭᑐᖃᖏᑦ ᐊᑐᐃᓐᓇᐅᕙᓪᓕᐊᑐᐃᓐᓇᕐᒪᑕ ᖃᕋᓴᐅᔭᒃᑯᑦ. ᐊᒥᓱᐊᓗᓐᓂᒃ ᑐᑭᓯᒋᐊᕈᑎᔅᓴᓂᒃ ᐱᔭᐅᔪᓐᓇᕐᒥᔪᑦ ᓄᐊᑕᐅᓯᒪᔪᓂᒃ. ᐃᓕᓴᐃᔨᐅᓪᓗᖓ, ᐊᑐᕈᒪᒐᒪ ᐃᓕᓐᓂᐊᕈᑎᔅᓴᓂᒃ ᐃᓄᐃᑦ ᖃᐅᔨᒪᓂᖏᓐᓂᒃ. ᐃᓄᐃᑦ ᐅᑉᐱᕆᔭᖏᑦ ᑐᓴᕈᒥᓇᖅᑐᒻᒪᕆᐅᒻᒪᑕ. ᐅᓪᓗᒥ, ᐃᓄᐃᑦ ᓱᓕ ᓯᕗᒧᐊᑉᐸᓪᓕᐊᒻᒪᑕ ᐊᒻᒪᓗ ᑕᒪᓐᓇ ᐅᐱᓐᓇᖅᓯᕚᓪᓕᑎᑦᑎᕙᑦᑐᖅ. ᐃᓕᓐᓂᐊᖅᑎᖁᑎᒃᑲ ᐅᐱᒍᓱᖁᕙᒃᑲ ᑭᓇᐅᓂᕐᒥᓂᒃ ᐊᒻᒪᓗ ᓇᑭᙶᖅᓯᒪᓂᕐᒥᓂᒃ. ᐊᔾᔨᒌᖏᑐᐃᓐᓇᐅᒐᑦᑕ ᐊᒻᒪᓗ ᐃᓕᑉᐸᓪᓕᐊᓂᖅ ᐃᓅᓯᓕᒫᒧᑦ ᑐᕌᖓᒻᒪᑦ. ᓯᕗᒧᒍᓐᓇᖅᑐᒍᑦ ᐊᑐᕐᓗᒋᑦ ᐊᑦᔨᒌᖏᓐᓂᕗᑦ. ᖁᔭᓕᑦᑎᐊᖅᐳᖓ ᐃᓕᓴᐃᔨᐅᓛᕋᒪ ᐃᓕᓐᓂᐊᕇᕈᒪ ᑕᕝᕙᙵᑦ.

ᖁᕕᐊᓱᒃᐳᖓ ᐊᔾᔨᒌᙱᓐᓂᖏᓐᓂᒃ ᐃᓕᓴᐃᔨᑦ ᐃᓕᓴᐃᔾᔪᓯᖏᓐᓂᒃ. ᐊᔾᔨᒌᙱᑦᑑᑎᓂᒃ ᐃᓕᓐᓂᐊᖅᑎᑦ ᐃᓕᑦᑎᕙᓪᓕᐊᓲᖑᖕᒪᑕ, ᐅᕙᖓᓗ ᐃᓕᑦᑎᔭᕆᐊᖃᖅᖢᖓ ᐊᔾᔨᒌᙱᑦᑐᓂᒃ ᐃᓕᓴᐃᔾᔪᓯᕐᓂᒃ ᐊᓯᓐᓂᒃ ᐃᑲᔪᕈᓐᓇᕐᓂᐊᕋᒪ.

ᐃᓄᐃᑦ ᐃᓕᖅᑯᓯᖓ ᐊᒃᓱᕈᕐᓇᕆᒐᒃᑯ, ᑭᓯᐊᓂ ᓄᖅᑲᕈᑎᒋᔾᔮᙱᑕᕋ ᐊᑐᕐᓗᒍ, ᐱᓇᓱᐊᕐᓗᖓ ᐊᔾᔨᒌᖏᑦᑐᓂᒃ ᐃᓕᓐᓂᐊᒐᒃᓴᓂᒃ ᐃᓕᓐᓂᐊᕈᒪᔭᓐᓂᒃ. ᓂᕆᐅᒃᐳᖓ ᓱᓕ ᐊᑐᐃᓐᓇᐅᔪᖃᒃᑲᓐᓂᓛᕐᓂᖓᓂᒃ ᖃᖓᙳᖅᐸᓪᓕᐊᑎᓪᓗᒍ. ᐊᔾᔨᒌᙱᑦᑐᓂᒃ ᐊᔪᙱᓐᓂᖃᖅᐳᒍᑦ ᐱᐅᔪᓂᒃ ᓴᖅᑭᑦᑐᖃᕐᓂᐊᖅᖢᓂ. ᐊᑐᕈᒪᒐᑦᑎᒍᑦ ᐊᔾᔨᐅᙱᑦᑐᑦ ᐊᔪᙱᑕᕗᑦ ᐱᐅᔪᒃᑯᑦ. ᓱᓕ ᐃᓕᑦᑎᕙᓪᓕᐊᕗᖓ.

ᐃᓄᐃᑦ ᐊᔾᔨᒌᙱᑦᑐᓂᒃ ᐃᓕᓴᐃᔾᔪᓯᖃᓲᖑᖕᒪᑕ. ᐃᓕᓴᐃᔨᐅᓂᕐᒧᑦ ᐃᓕᓐᓂᐊᖅᑐᖓ ᖃᓪᓗᓈᑎᑐᑦ. ᐃᓄᐃᑦ ᐃᓕᖅᑯᓯᖏᓐᓂᒃ ᐊᑐᕈᒪᑦᑎᐊᖅᑐᖓ. ᖃᓪᓗᓇᐅᔭᕈᓯᕐᒥᒃ ᒪᓕᑦᑎᐊᖅᑐᖓ, ᑭᓯᐊᓂ ᓱᓕ ᐅᒃᐱᕈᓱᒃᐳᖓ ᐃᓅᓂᕋ ᓴᙱᔪᐊᓘᓂᖓᓂᒃ. ᐃᓕᓴᕆᕙᕋ ᑭᓇᐅᓂᕋ ᐃᑲᔪᕐᓂᐊᕐᒪᑦ ᐃᓕᓴᐃᔨᐅᓗᖓ. ᐅᓪᓗᒥ, ᑕᑯᖃᑦᑕᕋᒪ ᐅᓄᖅᑐᓂᒃ ᐃᓄᖕᓂᒃ ᐅᖃᕈᓐᓇᑦᑎᐊᖅᑐᓂᒃ ᐃᓄᒃᑎᑐᑦ ᖃᓪᓗᓈᑎᑐᓪᓗ. ᑕᒪᒃᑮᖕᓂᒃ ᐅᖃᐅᓯᕐᓂᒃ ᖃᐅᔨᒪᓪᓗᖓ ᖃᓄᑐᐃᓐᓇᕐᓗ ᐃᑲᔪᕐᓂᐊᖅᐳᖓ ᖃᐅᔨᒪᓂᕆᔭᓐᓄᑦ. ᖃᐃᖁᔨᓂᐊᖅᐳᖓ ᑐᙵᓱᒃᑎᑦᑎᓗᖓᓗ ᐃᓕᓐᓂᐊᖅᑎᓂᒃ, ᐊᖓᔪᖅᑳᓂᒃ, ᐃᖅᑲᓇᐃᔭᖅᑎᓂᒃ, ᐃᓐᓇᕐᓂᒃ ᐃᓕᓴᐃᔭᖅᑐᖁᓪᓗᒋᑦ ᐃᓕᓐᓂᐊᕐᕕᖕᒥ. ᑖᓐᓇ ᐅᕙᖓ
ᐸᕐᓇᐅᑎ.

ᐃᓕᓴᐃᔨᐅᓂᕋ ᐊᑑᑎᖃᖅᑎᑦᑐᒪᒐᒃᑯ. ᐅᐱᒋᑦᑎᐊᖅᐸᒃᑲ ᓄᓇᕗᑦ ᐃᓄᐃᓪᓗ. ᐊᔾᔨᒌᙱᑦᑐᓂᒃ ᐱᔪᓐᓇᕐᓂᖅᑖᖅᑎᑕᐅᓯᒪᒐᑦᑕ ᐊᒃᓱᕈᕐᓇᖅᑐᒃᑰᖅᑎᓪᓗᑕ ᑲᔪᓯᑦᑎᐊᖅᓯᒪᓪᓗᑕᓗ. ᑕᒪᓐᓇ ᐅᐱᒋᔭᕆᐊᖃᖅᑕᕗᑦ. ᖁᔭᓕᕗᖓ ᐃᓕᓐᓂᐊᖅᑏᑦ ᐃᑲᔪᖅᓱᖅᑕᐅᕙᒻᒪᑕ. ᓄᓇᕗᑦ ᑕᑯᒃᓴᐅᑎᑦᑎᕗᖅ ᐱᒻᒪᕆᐅᓂᖓᓂᒃ ᐃᓕᓐᓂᐊᕐᓂᕐᒥᒃ. ᑕᒪᑐᒧᙵ ᖁᔭᓕᕗᖓ ᐅᐱᒍᓱᒃᐳᖓᓗ.