ᓄᓇᕗᑦ ᑐᙵᕕᒃ ᑎᒥᖓ ᑎᒃᑯᐊᖅᓯᕗᑦ ᓇᕙᕋᓇ ᐸᕗᕆᔾ−ᒥᒃ ᐊᖓᔪᖅᑳᖅ ᐊᐅᓚᑦᓯᔨᒻᒪᕆᐅᓕᖅᑐᓂ
ᐊᒃᑑᕝᕙ 5, 2026 (ᐃᖃᓗᐃᑦ, ᓄᓇᕗᑦ) – ᓄᓇᕗᑦ ᑐᙵᕕᒃ ᑎᒥᖓ ᖁᕕᐊᓱᑦᑐᑦ ᑐᓴᖅᑎᑦᑎᔭᕆᐊᒃᓴᖅ ᑎᒃᑯᐊᖅᑕᐅᓂᖓᓂᒃ ᓇᕙᕋᓇ ᐸᕗᕆᔾ−ᒥᒃ ᓄᑖᖑᓕᖅᑐᓂ ᐊᖓᔪᖅᑳᖅ ᐊᐅᓚᑦᓯᔨᒻᒪᕆᒃ ᐃᖅᑲᓇᐃᔮᒃᓴᖅ ᓴᖅᑭᔮᖅᑎᑕᐅᓚᐅᖅᑎᓪᓗᒍ ᓂᕈᐊᖅᑕᐅᔪᖃᕐᓂᐊᖅᑐᓂ ᐃᓂᖓᓄᑦ ᐃᖅᑲᓇᐃᔮᒃᓴᒧᑦ.
ᐸᕗᕆᔾ ᐊᕙᑎᑦ ᐊᕐᕌᒎᓕᖅᑐᓂᑦ ᐃᖅᑲᓇᐃᔭᕐᓂᑰᓯᒪᔪᖅ ᐃᓄᐃᑦ ᑲᑐᔾᔨᖃᑎᒌᖏᖕᓄᑦ ᓄᓇᕗᒻᒥ, ᐱᖃᓯᐅᑎᓪᓗᒍ ᐊᐅᓚᑦᓯᔨᐅᔪᓄᑦ ᐊᒻᒪᓗ ᐊᖓᔪᖅᑳᖑᖃᑕᐅᓯᒪᓪᓗᓂ ᐊᐅᓚᑦᓯᔨᒃᑯᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᖕᓄᑦ. ᐃᖅᑲᓇᐃᔮᕆᖃᑦᑕᕐᓂᑯᒥᓂᖏᑦ ᐱᖃᓯᐅᔾᔨᔪᑦ ᐃᖅᑲᓇᐃᔭᕐᕕᒻᒥ ᓯᕗᓕᖅᑎᐅᓪᓗᓂ, ᖃᓄᖅᑑᖅᓯᒪᓂᒃᑯᑦ ᐸᕐᓇᐅᓯᐅᖃᑦᑕᕐᓂᑰᓪᓗᓂ, ᐃᓅᖃᑎᒌᑦ ᐊᑐᐊᒐᖃᖅᑎᑕᐅᓂᖏᑦ ᐊᒻᒪᓗ ᐊᑐᕋᒃᓴᓂᑦ ᐋᖅᑮᒍᑎᖃᖅᓯᒪᔪᑦ ᐱᔾᔪᑎᓄᑦ ᐊᑦᑐᐃᓂᓖᑦ ᐃᓄᒻᒪᕆᖕᓄᑦ.
“ᓇᕙᕋᓇ ᑐᑭᓯᐅᒪᕗᖅ ᑲᑐᔾᔨᖃᑎᒌᓐᓂᕐᒥᒃ, ᓄᓇᓕᑦᑎᓐᓂ ᐊᒻᒪᓗ ᐱᔾᔪᑎᓂᒃ ᐊᑑᑎᖃᖅᑐᑦ ᓄᓇᕗᒻᒥᐅᑦ ᐃᓄᒻᒪᕆᖏᖕᓄᑦ,” ᐅᖃᖅᑐᓂ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ ᐊᑦᑕᓄᐊᖅ ᐅᓗᖅᓯ. “ᓴᙱᔪᒥᒃ ᓯᕗᓕᖅᑎᐅᖃᑦᑕᓂᕐᑰᓯᒪᓂᖓᓄᑦ ᑐᙵᕕᒃᑯᓐᓂ ᐊᑐᖃᑦᑕᕈᓐᓇᕐᓂᐊᖅᑕᖏᑦ, ᑭᓯᐊᓂᓗ ᐱᒻᒪᕆᐅᔅᓯᓐᓇᖅᖢᓂ, ᑐᑭᓯᐅᒪᔪᖅ ᐃᖅᑲᓇᐃᔭᕐᓂᕗᑦ ᑐᙵᕕᖃᕆᐊᓕᒃ ᐃᓄᓐᓂᒃ ᐱᔨᑦᑎᖅᐸᑦᑕᑦᑎᓐᓂᒃ. ᖁᕕᐊᓱᑦᑐᒻᒪᕆᐅᕗᖓ ᑐᙵᓱᐊᑎᓪᓗᒍ ᓇᕙᕋᓇ ᓄᓇᕗᑦ ᑐᙵᕕᒃ ᑎᒥᖓᓄᑦ ᐊᒻᒪᓗ ᓂᕆᐅᑦᓯᐊᖅᖢᖓ ᐃᖅᑲᓇᐃᔭᖃᑎᒋᑦᓯᐊᕐᓂᐊᕋᒃᑯ ᓴᙵᑦᑎᓪᓗᒍ ᑲᑐᔾᔨᖃᑎᒌᕗᑦ ᐊᒻᒪᓗ ᓯᕗᒧᐊᑦᑎᓪᓗᒋᑦ ᓯᕗᓪᓕᐅᔾᔭᐅᖁᔭᐅᔪᑦ ᓄᓇᕗᒻᒥᐅᑦ ᐃᓄᒻᒪᕆᖏᖕᓄᑦ.”
ᐃᖅᑲᓇᐃᔮᕆᖃᑦᑕᕐᓂᑯᒥᓂᖏᑎᒍᑦ, ᐸᕗᕆᔾ ᐃᖅᑲᓇᐃᔮᖃᖃᑦᑕᕐᓂᑰᕗᖅ ᐊᔾᔨᒌᙱᑦᑐᓂᒃ ᐱᓕᕆᐊᕐᓂᒃ ᐊᑦᑐᐃᓂᓖᑦ ᐃᓄᒻᒪᕆᖕᓂᒃ. ᐃᖅᑲᓇᐃᔭᕐᓂᑰᓯᒪᕗᖅ ᐅᑯᓂᖓ ᐃᑲᔪᖅᓱᓂ ᐱᕙᓪᓕᐊᔭᐅᓂᖏᓐᓂᒃ ᑲᑎᒪᔩᑦ ᐊᐅᓚᑦᓯᓂᖏᑦ ᐊᔾᔨᐅᙱᑦᑐᓂᒃ ᑐᙵᕕᓖᑦ ᐃᒡᓗᓕᐅᕐᓂᕐᒥᒃ ᐃᓄᒻᒪᕆᖕᓄᑦ, ᐱᓕᕆᐊᕐᓂᒃ ᐊᐅᓚᑦᓯᓪᓗᓂ ᐋᖅᑭᒃᑕᐅᓂᖓᓂᒃ ᖃᐅᔨᓴᕐᕕᒻᒥ ᐱᓕᒻᒪᒃᓴᐃᕝᕕᒻᒥ ᒥᑦᑎᒪᑕᓕᒻᒥ, ᐊᒻᒪᓗ ᐃᓄᐃᑦ ᐋᔩᕋᖅᑎᐅᖃᑕᐅᓪᓗᓂ ᓄᓘᔭᑦ ᐅᔭᕋᓐᓂᐊᕐᕕᒻᒥ ᐃᓄᐃᑦ ᐊᒃᑐᖅᑕᐅᓂᖏᖕᓄᑦ ᐱᕚᓪᓕᕈᑎ ᐊᖏᕈᑎᒥᒃ.
“ᖁᕕᐊᓱᑦᑐᒻᒪᕆᐅᕗᖓ ᐊᖏᖅᓯᔭᕆᐊᒃᓴᖅ ᐱᓕᕆᐊᖃᕈᑎᒋᓂᐊᓕᖅᑕᕋ ᐊᖓᔪᖅᑳᖑᓗᖓ ᐊᐅᓚᑦᓯᔨᐅᓗᖓ ᓄᓇᕗᑦ ᑐᙵᕕᒃ ᑎᒥᖓᓂᒃ,” ᐅᖃᖅᑐᓂ ᐸᕗᕆᔾ. “ᐃᖅᑲᓇᐃᔮᒃᓴᖃᒻᒪᕆᒃᑲᑦᑕ ᓯᕗᓂᑦᑎᓐᓂ ᓴᙵᑦᑎᑕᐅᖁᓪᓗᒋᑦ ᓄᓇᓕᕗᑦ ᐊᒻᒪᓗ ᐱᓕᕆᔪᒪᓕᖅᑎᓪᓗᒋᑦ ᐃᓄᐃᑦ, ᑭᓯᐊᓂᓕ ᐅᑉᐱᕈᓱᑉᐳᖓ ᐱᕙᓪᓕᐊᒍᑎᒋᔭᐅᓛᖑᒐᔭᖅᑐᖅ ᐱᓕᕆᖃᑎᒌᓐᓂᒃᑯᑦ, ᐃᖅᑲᓇᐃᔭᖃᑎᒌᓪᓗᑎᑦ ᑲᑐᔾᔨᖃᑎᒌᑦ ᐊᒻᒪᓗ ᓴᙱᓂᖃᕈᑎᓖᑦ ᐱᕚᓪᓕᑦᑎᐊᕈᓐᓇᕐᓂᓕᒫᑦᑎᓐᓂᒃ ᑎᑭᑦᑎᖁᓪᓗᑕ ᓄᓇᕗᒻᒥ ᐃᓄᒻᒪᕆᖏᖕᓄᑦ. ᓂᕆᐅᑉᐳᖓ ᐃᖅᑲᓇᐃᔭᖃᑎᒋᓛᕐᓂᓐᓂ ᓄᓇᕗᑦ ᑐᙵᕕᒃ ᑎᒥᖓᑕ ᓯᕗᓕᖅᑎᖏᑦ, ᐃᖅᑲᓇᐃᔭᖅᑎᖏᑦ ᐊᒻᒪᓗ ᐱᓕᕆᖃᑎᒋᕙᑦᑕᖏᑦ.”
ᐸᕗᕆᔾ ᐱᕈᖅᓴᔭᐅᓂᑯ ᑲᓛᖡᑦ ᓄᓈᓐᓂ ᐊᒻᒪᓗ ᓄᓇᕗᒻᒦᒃᓯᒪᓕᖅᑐᓂ 30 ᐊᕐᕌᒎᓕᖅᑐᓂᑦ. ᐅᖃᓪᓚᓲᖅ ᑲᓛᖠᓱᑦ, ᑕᐃᓂᔅ, ᖃᓪᓗᓈᑎᑐᑦ ᐊᒻᒪᓗ ᐃᓄᒃᑎᑐᑦ ᐊᒻᒪᓗ ᓄᓇᕐᔪᐊᑉ ᐅᑭᐅᖅᑕᖅᑐᖓᓂᒃ ᑕᐅᑐᓐᓂᖃᖅᓯᒪᓂᑯᒻᒪᕆᐅᓪᓗᓂ ᐃᖅᑲᓇᐃᔮᕐᒥᓄᑦ ᐊᑐᕈᓐᓇᖃᑦᑕᕐᓂᐊᖅᑐᓂᒋᑦ.
ᔭᐃᓐ ᒐᓛᔅᑯ ᐅᑭᐅᖅᑕᖅᑐᒥ ᐃᓕᓐᓂᐊᖅᑎᐅᓯᒪᕗᖅ ᒍᐊᑕᓐ ᑐᙵᕕᖓᓂᒃ ᐊᒻᒪᓗ ᐃᓕᓐᓂᐊᖅᑐᓂ ᖃᐅᔨᓯᒪᓂᑯᒥᓂᖏᑦ ᓴᖅᑭᖅᑎᑕᐅᓯᒪᕗᑦ ᐃᓄᐃᑦ ᐃᓕᓐᓂᐊᕐᓂᓕᕆᔭᐅᓂᖏᖕᓂᒃ ᐊᒻᒪᓗ ᐅᖃᐅᓯᖓᓂᒃ. ᐅᓪᓗᒥ ᑲᑎᒪᔨᐅᖃᑕᐅᕗᖅ ᒍᐊᑕᓐ ᑐᙵᕕᖓᓂᒃ ᐊᒻᒪᓗ ᑎᒃᑯᐊᖅᑕᐅᓯᒪᓂᑰᓪᓗᓂ ᓄᓇᕗᒻᒧᑦ ᑭᒡᒐᖅᑐᐃᔨᐅᑎᑕᐅᓪᓗᓂ ᑎᐊᓐᒫᒃ ᒐᕙᒪᖓᓂ ᑭᒡᒐᖅᑐᐃᔨᐅᓯᒪᓪᓗᓂ ᑲᓇᑕᒥ 2021-ᖑᑎᓪᓗᒍ.
ᐸᕗᕆᔾ ᐃᓚᒋᔭᐅᒋᕗᖅ ᐊᖓᔪᖅᑳᕆᔭᐅᔪᑦ ᕿᑐᕐᖓᓖᑦ ᐋᖅᑮᓚᐅᖅᓯᒪᔪᑦ ᑐᒥᑯᓗᐃᑦ ᓴᐃᐹᕿᕕᒻᒥ, ᓯᕗᓪᓕᖅᐹᖅ ᐃᓄᒃᑎᑐᑦ ᐸᐃᕆᕕᒃ ᐃᖃᓗᓐᓂ.
ᐸᕗᕆᔾ ᐱᓕᕆᐊᒃᓴᒥᓂᒃ ᐊᖓᔪᖅᑳᖅ ᐊᐅᓚᑦᓯᔨᒻᒪᕆᐅᓗᓂ ᓄᓇᕗᑦ ᑐᙵᕕᒃ ᑎᒥᖓᓂ ᐱᒋᐊᓛᖅᑐᖅ ᐊᒃᑑᕝᕙ 13, 2026−ᖑᓕᖅᐸᑦ.
-30-
ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒃᑲᐃᔪᓐᓇᖅᑐᑦ
ᐋᓂ ᑕᒻᓕᓐᓴᓐ
ᑐᑭᒧᐊᑦᑎᑦᑎᔨ ᑐᓴᐅᒪᑎᑦᑎᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
media@tunngavik.com