Nunavut Tunngavik Timiqutinga attiqtuiyangit Navarana Beveridge Atan'nguyaupluni
Tattiarnaqtuq 5, 2026 (Iqaluit, Nunavut) – Nunavut Tunngavik Timiqutinga (NTI) quviahuktun ilaqatigiyaangat taimaa Navarana Beveridge attiqtauliqtuq nuutaanguuvluni Angiyuqaanguyuq Tukimuaqti Havaktiuyuq talvuuna akigaqtuihimaarnikkut pukuktauvakhimayunik.
Beveridge 20-ni ukiuni havaqatigivaktait Inuit timiqutingit Nunavunmi, hivuliqtiupluni havaani Qikiqtani Inuit Katimayiinnit (QIA). Havagpakhimayuq hunanigliqaak hivulliqtiunirmik timiqutauyunik, upalungaiyautikhaliurnirmik qanuriliurutikhanik, inuuhiringnaqtumik atugakhanik, imaalu nalvaaqhipluni ihuaqtunik ihuaqhautikhanik ayuqhautauyunut Inuinnarnut.
“Navarana pivaktait timiqutivut, nunallaavut, ayuqhautillu pidjutauyut Nunavunmi Inungnun," uqaqtuq NTI-kkut Angiyuqaanga Gloria Uluqsi. "Hakugiktumik hivuliqhungnirmun atuqhimayaminik, kihimi akhuurnaqtuq, ilihimayuq havaavut atadjutiqaqtukhat inungnun kivgaqtuqtaptingnut. Quviahukpiaqtunga tunngahuktilugu Navarana NTI-kkunnut niriuktungalu havaqatigilugu havagvikput hakugikhiyuumiqtilugu hivumuuqtilugillu hivulliuyukhat Nunavunmi Inungnun.”
Talvuuna havaarivakhimayainik, Beveridge havagpakhimayuq qaffiuyunik havaakharnik taimaa ayurnautiqaqtunik Inuit nunallaanginnit. Ikayuqhimaaqpaktuq aulattittiyaangat kavamaliqidjutikharnik iglukharnik ihuaqhaidjutikharnik talvuuna Inuinnarnik, munarivakhimayurlu auladjutikharnik Qauyihaidjutikharnik Ayuiqhautikharnik Katimaviani Mittimatalingmi, ilauvakhimayurlu Inuit aivadjutiliqiyunik talvani Mary Rivermi Havaakhangit Inuit Ayurnautiqaqtunik Ikayuutikharniglu Angirutikharnik.
"Quviahukpiaqtunga havaarilirlugu Angiyuqaanguyuq Tukimuaqti Havaktiuyuq CEO hapkununga NTI-kkunnut," uqaqtuq Beveridge. "Amigaittut havaakhat ikayuriangani nunallaavut uvvalu hakugikhiyuumiriangani Inuit, kihimi ihumayunga anginiqhaq atugakhaq qainiaqtuq havaqatigiingnikkut tamainnut timiuyuni nakuutqiyatigut qanuriningit Nunavunmiunut Inungnut. Niriuktunga havaqatigilugit NTI-kkut hivuliqhuqtut, havaktiit, havaqatigiyaillu."
Beveridge angiklihimayuq Kalaaliinmi nunaqaqhimaaqhunilu Nunavunmi 30nik ukiunik. Uqayuktuq Kalaallisut, Danish, Qablunaatut, Inuktitullu, hakugiktumik ukiuqtaqtumi ihumagiyaminik havaaminut.
Havagpakhimayuq Jane Glassco Northern Fellow talvani Una Gordon Foundationmi titiraqpakhimayurlu talvuuna Inuit ilihairutikharnik uqauhitigullu. Tadjamimut, ilauliqtuq Katimayiinut talvani Gordon Foundationmi attiqtauvakhimayurlu Nan'ngariyauyuq Consul Nunavunmut talvanga Danish Embassy mit Kanatami 2021.
Beveridge angayuqaanguvakhimayurlu ikayukhimmaaqpaktuq aulattittiyaangat Tumikuluit Saipaaqivik, hivulliuyuq Inuktitut nutaqqiqqivikhaq Iqalungni.
Beveridge havalirniaqtuq Angiyuqaanguyuq Tukimuaqti Havaktiuyiuluni NTI-kkunni Tattiarnaqhilirviani 13, 2026 mi.
-30-
Tuhaqtipkainikkut Uqarvikhaq
Annie Thomlinson
Aulapkaiyi Tuhaqtipkainikkut
Nunavut Tunngavik Timiqutinga
media@tunngavik.com