ᓄᓇᕗᑦ ᑐᙵᕕᒃ ᑎᒥᖓ ᑐᓴᖅᑎᑦᑎᕗᑦ ᓵᓚᒃᓴᖅᑐᓂᒃ 2026-ᒥ ᐃᓄᒃᑑᖅᑕ! ᑎᑎᕋᕐᓂᑭᓴᐅᑎᓂᕐᒧᑦ ᐱᔾᔪᓯᐊᕐᓂᒃ
(ᓄᕖᕝᕙ 9, 2026 – ᐃᖃᓗᐃᑦ, ᓄᓇᕗᑦ) ᐊᑦᑕᓄᐊᖅ ᐅᓗᖅᓯ, ᐊᖓᔪᖅᑳᖅ ᓄᓇᕗᑦ ᑐᙵᕕᒃ ᑎᒥᖓᓄ ᐊᒻᒪᓗ ᐃᒃᓯᕙᐅᑕᖅ ᓄᓇᕗᑦ ᑐᙵᕕᒃ ᐃᑲᔫᑎᒃᓴᓕᕆᔨᒃᑯᓐᓄᑦ, ᖁᕕᐊᓱᑉᐳᖅ ᑐᓴᖅᑎᑦᑎᔭᕆᐊᒃᓴᖅ ᓵᓚᒃᓴᖅᑐᓂᒃ 2026-ᒥ ᐃᓄᒃᑑᖅᑕ! ᑎᑎᕋᕐᓂᑭᓴᐅᑎᔪᒥᓃᑦ ᓵᓚᖃᐅᓯᐊᖓᓄᑦ.
ᓖᓇ ᐊᐃᐱᓕ ᐱᔾᔪᓯᐊᖅᑖᖅᑎᑕᐅᕗᖅ $80,000−ᓂᒃ ᐊᖏᓛᖓᓂᒃ ᐱᔾᔪᓯᐊᕐᒥᒃ, ᐊᒻᒪᓗ ᐊᑕᐅᓯᕐᒧᑦ ᐊᕐᕌᒍᒧᑦ ᐃᑲᔪᖅᑐᖅᑕᐅᓂᐊᕐᓗᓂ ᐱᔭᕇᖅᓯᖁᓪᓗᒋᑦ ᓇᐃᓈᖅᓯᒪᔪᑦ ᐅᓂᒃᑳᑦ ᑐᓂᔭᖏᑦ ᑎᑎᕋᖅᓯᒪᔪᑦ ᑕᒪᐃᓐᓂ ᐅᖃᓕᒫᒐᓕᐅᓛᕐᒪᒋᑦ.
ᐱᔾᔪᓯᐊᖅᑖᕆᔭᐅᒃᑲᓐᓂᖅᑐᑦ ᓵᓚᒃᓴᖅᑐᒥᓂᐅᓪᓗᑎᑦ ᐅᑯᐊ:
- ᑭᖑᓪᓕᖅ ᐱᔾᔪᓯᐊᖅ ($10,000): ᑎᓚᐃᓚ ᒥᓯᕋᓚᒃ
- ᐱᖓᔪᐊᑦ ᐱᔾᔪᓯᐊᖅ ($5,000): ᒥᐊᕆ ᓚᕆᐅ
- ᑎᓴᒪᖓᑦ ᐱᔾᔪᓯᐊᖅ ($3,000): ᕋᐃᒡᒋᓕ ᐊᒫᖅ
- ᑕᓪᓕᒪᖓᑦ ᐱᔾᔪᓯᐊᖅ ($2,000): ᑎᐊᓇᔅ ᓇᑯᓛᖅ
ᓵᓚᒃᓴᖅᑐᑦ ᑭᒃᑰᒻᒪᖔᑕ ᑐᓴᖅᑎᑕᐅᓚᐅᖅᐳᑦ ᐃᓄᒃᑑᖅᑕ! ᐃᓄᒃᑎᑐᑦ ᑎᑎᕋᑦᑎᐊᕐᓂᑭᓴᐅᑎᔪᑦ ᐱᔾᔪᓯᐊᖅᑖᖅᑎᑕᐅᓪᓗᑎᑦ ᖁᕕᐊᓲᑎᒋᔭᐅᓪᓗᑎᑦ ᓯᕙᑖᕐᕕᒻᒥ, ᓄᕖᕝᕙ 7, ᐊᖅᓴᕐᓃᑦ ᑐᔪᕐᒥᕕᒃ ᐊᒻᒪ ᑲᑎᒪᕕᖓᓂ ᐃᖃᓗᓐᓂ.
“ᓴᙵᑦᑎᖅᖢᒍ ᐃᓄᒃᑐᑦ ᑐᑭᓕᒃ ᐱᕕᖃᖅᑎᑕᐅᒃᑲᓐᓂᒻᒪᕆᒋᐊᖃᕐᒪᑕ ᐃᓄᐃᑦ ᐊᑐᕈᓐᓇᖁᑉᓗᒋᑦ, ᓴᓇᓗᑎᑦ ᐊᒻᒪᓗ ᑲᑐᔾᔨᓗᑎᑦ ᐅᖃᐅᓯᑦᑎᓐᓂ ᑕᒪᐃᓐᓂᑦᑎᐊᖅ ᐃᓅᓯᑦᑎᒻᓂ, ᐱᖃᓯᐅᑎᓗᒋᒃ ᑎᑎᕋᕐᓂᒃᑯᑦ ᐊᒻᒪᓗ ᐅᓂᒃᑳᖅᑐᐊᕐᓂᒃᑯᑦ.” ᐅᓗᖅᓯ ᐅᖃᖅᖢᓂ. “ᓄᓇᕗᑦ ᑐᙵᕕᒃ ᑎᒥᖓ ᐅᐱᒍᓱᑉᐳᑦ ᐃᑲᔪᖅᑐᐃᔪᓐᓇᕐᒪᑕ ᐃᓄᖕᓄᑦ−ᓯᕗᒃᑲᖅᑖᖑᔪᓂᒃ ᐱᓕᕆᐊᕐᓂᒃ ᐃᑲᔪᓲᑦ ᐸᐸᑦᑎᓂᕐᒧᑦ ᐊᒻᒪᓗ ᐊᑐᕐᔫᒥᑎᑕᐅᓂᖓᓄᑦ ᐅᖃᐅᓯᑦᑕ. ᐃᓄᒃᑑᖅᑕ! ᐃᓄᒃᑎᑐᑦ ᑎᑎᕋᑦᑎᐊᕐᓂᑭᓴᐅᑎᔪᑦ ᓵᓚᖃᐅᓯᐊᖅ ᐃᑲᔪᖅᑐᐃᔪᖅ ᐃᓄᒻᒪᕆᖕᓂᒃ ᑎᑎᕋᖅᑎᓂᒃ ᐅᓪᓗᒥ ᖃᐅᔨᒪᑦᑎᐊᖅᑎᑦᑎᓯᓐᓈᑦ ᐃᓄᒃᑐᑦ ᓴᙱᔫᓂᐊᕐᓂᖓᓂᒃ ᑭᖑᕚᒃᓴᐅᓂᐊᖅᑐᓄᑦ.”
ᖁᕕᐊᓲᑎᖃᖅᑎᓪᓗᒋᑦ ᑕᐅᑐᕋᓐᓈᖅᑎᑦᑎᔨᖃᓚᐅᖅᑐᖅ ᓄᓇᕗᒻᒥ ᐃᙱᖅᑎᖏᖕᓂᒃ ᐅᑯᓂᖓ ᐋᓯᕙᒃ, ᑎᐅᕆ ᐅᔭᕋᒃ, ᔫᑎ, ᔭᐃᑯ ᐅᖃᑦᓯᐊᖅ, ᔭᐃᒥᓯ ᐅᖔᓛᖅ, ᐋᓚᓐ ᑲᖑᖅ ᐊᒻᒪᓗ ᑖᓐᓂᐊᓕ ᑕᐅᑭ.
ᑕᒫᓂ ᐊᕐᕌᒍᒥ ᖁᕕᐊᓲᑎᖃᖅᑎᓪᓗᒋᑦ ᑕᒪᐃᓐᓂ ᐃᓄᒻᒪᕇᑦ ᐱᓕᕆᔨᐅᓚᐅᕐᒥᔪᑦ ᑲᒪᒋᔭᖃᖅᖢᑎᑦ ᑕᐅᑐᕋᓐᓈᕐᕕᒃ ᐅᐸᓗᖓᐃᔭᖅᑕᐅᖃᑦᑕᖅᑐᓂ, ᓂᐱᖃᐅᑎᖏᑦ ᐊᒻᒪᓗ ᖃᐅᔨᒪᖏᑦ, ᓱᓇᒃᑯᑖᓕᕆᔨᖃᐅᖅᑐᑎᑦ ᓯᕗᓕᖅᑎᖏᑦ ᑲᓛᖡᑦ ᓄᓈᓃᙶᖅᑐᑦ ᐃᓕᓐᓂᐊᖅᑎᑕᐅᔪᓪᓗ ᓄᓇᕗᒻᒥᐅᑦ. ᐱᓕᕆᐊᖅ ᓱᓇᒃᑯᑖᓕᕆᔪᓐᓇᖅᓯᑎᑦᑎᓇᓱᐊᖅᑐᖅ ᓄᓇᕗᒻᒥ,
ᐃᓄᒻᒪᕇᑦ ᐱᓕᕆᔨᖏᑦ ᐊᔪᙱᓐᓂᖃᓛᕐᒪᑕ ᐋᖅᑭᒃᓱᐃᓗᑎᑦ ᐊᒻᒪᓗ ᐊᐅᓚᑦᑎᓗᑎᑦ ᓯᕗᓂᒃᓴᒥ ᖃᓄᐃᓕᐅᕈᑕᐅᖃᑦᑕᓛᖅᑐᓂᒃ.
ᐃᓄᒃᑑᖅᑕ! ᐃᓄᒃᑎᑐᑦ ᑎᑎᕋᑦᑎᐊᕐᓂᑭᓴᐅᑎᔪᑦ ᐱᔾᔪᓯᐊᖅ ᐃᓕᓴᖅᓯᔪᖅ ᐊᒻᒪᓗ ᐃᑲᔪᖅᑐᐃᓂᓕᒃ ᐃᓄᒻᒪᕇᑦ ᑎᑎᕋᖅᑎᖏᖕᓂᒃ, ᓴᙵᑦᑎᕆᓂᖃᖅᑐᓂ ᐃᓄᒃᑐᑦ ᑎᑎᕋᖅᑎᑦᑎᓂᒃᑯᑦ, ᐅᓂᒃᑳᖅᑐᐊᕐᓂᒃᑯᑦ, ᐊᒻᒪᓗ ᑲᑐᔾᔭᐅᓪᓗᑎᑦ ᐃᓄᐃᑦ ᖃᐅᔨᒪᓂᖏᑦ ᐊᒻᒪᓗ ᐊᑐᖃᑦᑕᕐᓂᑯᒥᓂᖏᑦ.
-30-
ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒃᑲᐃᔪᓐᓇᖅᑐᑦ:
ᐋᓂ ᑖᒻᓕᓐᓴᓐ
ᑐᑭᒧᐊᑦᑎᑦᑎᔨ ᑐᓴᐅᒪᑎᑦᑎᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
media@tunngavik.com