ᒫᓂᑲ ᑭᒍᑦᑕᖅ
ᐊᑎᕋ ᒫᓂᑲ ᑭᒍᑦᑕᖅ ᐊᐅᓱᐃᑦᑐᕐᒥᙶᖅᑐᖅ, ᓄᓇᕗᑦ. ᐃᓕᓐᓂᐊᖃᑕᐅᕗᖓ ᓄᓇᕗᒻᒥ ᐃᓕᓴᐃᔨᐅᓂᕐᒧᑦ ᐃᓕᓐᓂᐊᒐᒃᓴᒥ ᐃᖃᓗᒃᑑᑦᑎᐊᒥ, ᓄᓇᕗᒻᒥ, ᓄᓇᕗᒻᒥ ᓯᓚᑦᑐᖅᓴᕐᕕᖕᒥ. ᒫᓐᓇ ᑎᓴᒪᒋᓕᖅᑕᖓᓂ ᐊᕐᕌᒍᖃᓕᖅᑐᖓ, ᐱᔭᕇᑲᓴᑦᑎᐊᖅᖢᖓ ᐃᓕᓐᓂᐊᖅᑕᓐᓂᒃ. ᐃᖅᑲᓇᐃᔮᖃᕐᓂᐊᖅᐳᖓ ᐅᒡᒍᐊᓚᐅᖅᓯᒪᔾᔮᙱᑦᑐᖓ. ᖁᕕᐊᒋᑦᑎᐊᖅᑕᕋ ᐃᓕᓴᐃᔭᕆᐊᒃᓴᖅ ᓄᑕᖅᑲᓂᒃ ᓄᑲᖅᖡᑦ ᐃᓕᓐᓂᐊᕐᕕᖏᓐᓂ ᐊᒻᒪᓗᑦᑕᐅᖅ ᐸᓂᒐ ᐱᖓᓱᓂᒃ ᐅᑭᐅᓕᒃ. ᐊᒃᓱᕈᖅᖢᖓ ᐱᓕᕆᓯᒪᕗᖓ ᑕᒪᐅᖓ ᑎᑭᑦᑐᒪᓪᓗᖓ ᐅᐱᒋᔪᒪᓪᓗᒍᓗ ᔫᓯ ᐊᒪᐅᔭᖅ ᑯᓱᒐᖅ. ᑕᒪᓐᓇ ᒪᑐᐃᙶᖅᑎᑦᑎᓂᐊᖅᐳᖅ ᐃᓕᓐᓂᐊᖅᑎᓄᑦ ᐃᖅᑲᓇᐃᔮᖃᕈᒪᔪᓄᑦ ᑐᑭᓯᐅᒪᓂᖅᓴᐅᓗᑎᒡᓗ ᔫᓯᐅᑉ ᐊᓂᒍᖅᑎᓯᒪᔭᖏᓐᓂᒃ.
ᓇᒻᒥᓂᕐᓕ ᐃᓚᖃᕋᒪ ᐃᖃᓗᑦᑑᑦᑎᐊᕐᒦᑦᑐᓂᒃ ᐅᕙᓐᓂᒃ ᐃᑲᔪᖅᑐᐃᔪᓂᒃ ᐃᓕᓐᓂᐊᖅᑕᓐᓂᒃ ᐱᔭᕇᕋᓱᐊᖅᑎᓪᓗᖓ. ᐊᕐᕌᒍᐃᑦ ᐱᖓᓱᑦ ᐊᓂᒍᖅᓯᒪᓕᖅᑐᑦ ᑕᒫᓃᓕᕋᒪ ᐊᒻᒪᓗ ᑕᑯᓯᒪᓪᓗᖓ ᐊᒥᓱᐊᓗᓐᓂᒃ ᓱᕈᓯᕐᓂᒃ ᐊᒻᒪᓗ ᐃᓅᓱᒃᑐᓂᒃ ᔭᒐᐃᔪᓂᒃ ᐃᓕᖅᑯᓯᕐᒥᓂᒃ ᐊᒻᒪᓗ ᐅᖃᐅᓯᕐᒥᓂᒃ. ᐅᕙᖓᓕ ᐊᖏᕐᕋᓐᓂ ᐅᖃᐅᓯᕗᑦ ᐊᒻᒪᓗ ᐃᓕᖅᑯᓯᕗᑦ ᐆᒪᑏᓐᓇᕋᓱᐊᖃᑦᑕᕋᒃᑭᑦ ᐃᓂᒋᔭᑦᑎᓐᓂ. ᐃᓕᓐᓂᐊᕐᕕᓐᓅᕋᐃᒐᒪ ᐱᓕᒻᒪᓴᕆᐊᖅᑐᖅᑐᖓ, ᖁᕕᐊᒋᔭᕋ ᐃᓕᓴᐃᒋᐊᔅᓴᖅ ᐱᓗᐊᖅᑐᒥ ᖁᕝᕙᓯᓐᓂᓕᓐᓄᑦ 1 ᐃᓕᓐᓂᐊᕈᒪᓂᖅᓴᐅᒻᒪᑕ ᑭᓱᑐᐃᓐᓇᕐᓂᒃ ᐊᒻᒪᓗ ᐃᓕᓐᓂᐊᕈᑎᓕᒫᓂᒃ. ᑕᑯᓐᓇᒐᑦᑎᐊᕙᐅᓇᓱᖃᑦᑕᖅᑐᖓ ᐱᒻᒪᕆᐅᒻᒪᑦ ᐅᕙᓐᓄᑦ ᐊᒻᒪᓗ ᐊᓯᓐᓄᑦ ᐃᓕᖅᑯᓯᕗᑦ ᐆᒪᑎᑦᑐᒪᓪᓗᒍ.
ᐅᑉᐱᕆᓪᓚᕆᒃᑲᒃᑯ ᐃᓕᓐᓂᐊᖅᑐᓕᕆᓂᖅ ᐱᓪᓗᐊᑕᐅᒻᒪᑦ ᐃᓕᖅᑯᓯᑦᑎᓐᓄᑦ ᐊᒻᒪᓗ ᐃᓕᔭᐅᓗᓂ ᓄᓇᕗᒻᒥ ᐃᓕᓐᓂᐊᕐᕕᓐᓄᑦ ᐊᒻᒪᓗ ᑕᒪᓐᓇ ᐊᔾᔨᒋᙱᑐᐃᓐᓇᕆᐊᖃᖅᑕᖓ ᐃᓕᖅᑯᓯᕗᑦ ᐃᓕᓐᓂᐊᖅᑎᑦᑎᔾᔪᑕᐅᕙᓚᐅᖅᑑᑉ ᐅᐊᑦᑎᐊᕈ ᑭᓯᐊᓂ ᓱᓕ ᐃᓕᖅᑯᓯᑦᑎᓐᓂᒃ ᐆᒪᑎᑦᑎᔪᖅ. ᐱᔭᕇᕈᓯᐊᖅᑖᕈᒪ ᐊᒻᒪᓗ ᐃᓅᓕᕐᓗᖓ ᐃᓕᓴᐃᔨᕈᕈᒪ ᖁᕕᐊᓱᒻᒪᕆᒃᑲᔭᖅᑐᖓ ᐃᓕᓴᐃᒋᐊᒃᓴᖅ ᐅᖃᓕᒫᕆᐅᖅᓴᓂᕐᒥᒃ, ᑎᑎᕋᕆᐅᖅᓴᓂᕐᒥᒃ, ᐊᒻᒪᓗ ᐅᖃᕆᐅᖅᓴᓂᕐᒥᒃ ᐅᖃᐅᓯᑦᑎᓐᓂᒃ ᐊᑐᕐᓗᖓ. ᐱᒡᒐᓇᔾᔮᖏᑦᑐᖅ ᐊᑐᕋᔅᓴᖃᑦᑎᐊᖏᒃᑯᒪ ᐃᓕᖅᑯᓯᑦᑕ ᒥᔅᓵᓄᑦ ᑭᓯᐊᓂ ᓄᐊᑦᑎᔪᒪᑦᑎᐊᖅᑐᖓ, ᓇᒻᒥᓂᖅ ᓴᓇᓗᖓ ᐊᒻᒪᓗ ᐱᔪᓐᓇᕐᓂᓕᒫᒃᑲ ᒪᓕᓪᓗᒋᑦ ᐃᓕᓐᓂᐊᕋᔅᓴᐃᑦ.
ᓄᖅᑲᐅᓯᕐᓗᖓ, ᖁᔭᓐᓇᒦᕈᒪᔭᕋ ᔫᓯ ᐊᒪᐅᔭᖅ ᑯᓱᒐᖅ ᑎᑭᐅᑎᓯᒪᔭᖏᓐᓄᑦ ᑐᕌᒐᖏᓐᓄᑦ ᐊᒻᒪᓗ ᐊᒃᓱᕉᑎᖃᖅᓯᒪᓂᖓᓄᑦ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐃᓕᓐᓂᐊᖅᑐᓕᕆᓂᕐᒥ. ᐅᕙᖓᓕ ᐊᒃᓱᕈᕐᓗᖓ ᐱᓕᕆᓂᐊᖅᐳᖓ ᐊᓈᓇᐅᓗᖓ, ᓇᔭᒋᔭᐅᓗᖓ, ᐸᓂᒋᔭᐅᓗᖓ, ᐊᑦᑕᒋᔭᐅᓗᖓ, ᐊᒻᒪᓗ ᐱᓗᐊᖅᑐᒥ ᐃᓕᓴᐃᔨᐅᓗᖓ ᑕᒪᒃᑯᐊ ᖃᐅᔨᒪᔭᓕᒫᒃᑲ ᐃᓄᐃᑦ ᐃᓕᖅᑯᓯᖏᓐᓂᒃ ᐅᖃᐅᓯᖏᓐᓂᒡᓗ. ᒪᓕᒍᒪᑦᑎᐊᖅᐳᖓ ᔫᓯᐅᑉ ᑐᒥᖏᓐᓂᒃ ᐃᓕᓴᐃᔨᐅᓗᖓ ᐊᒻᒪᓗ ᐃᔾᔪᐊᒐᒃᓴᑦᑎᐊᕙᐅᓗᖓ. ᓂᕆᐅᒃᐳᖓ ᐊᓯᖏᑦ ᒪᒃᑯᒃᑐᑦ ᖃᐅᔨᓂᐊᕐᓂᖏᓐᓂᒃ ᐊᒻᒪᓗ ᑐᑭᓯᓗᑎᒃ ᔫᓯ ᖃᓄᐃᓕᐅᖅᓯᒪᓂᖓᓂᒃ ᐃᓄᐃᑦ ᐱᔪᓐᓇᐅᑎᖏᓐᓄᑦ ᐊᒻᒪᓗ ᓴᙱᔫᓗᑎᒃ ᑕᒪᓐᓇ ᑲᔪᓯᑎᑦᑐᒪᓪᓗᒍ. ᐃᓚᒋᔭᐅᓂᐊᖅᐳᖓ ᒪᓕᒃᑎᐅᖃᑕᐅᓗᖓ ᔫᓯᒧᑦ ᐊᒻᒪᓗ ᓯᕗᓕᖅᑎᐅᓗᖓ ᒪᒃᑯᒃᑐᓄᑦ.
ᓇᑯᕐᒥᓕᒃ
ᒫᓂᑲ ᑭᒍᑦᑕᖅ