2016-ᒥ ᐃᓕᓐᓂᐊᕈᑎᒃᓴᖅᑖᖅᑐᑦ
- ᐄᐳᕈᓪ ᐆᓕ ( ᐊᕐᕕᐊᑦ )
- ᕉᔅᒥᐅᕆ ᐋᑯᓗᔾᔪᒃ ( ᐸᓐᓂᖅᑑᖅ )
http://www.tunngavik.com/blog/news/nti-announces-2016-jose-amaujaq-kusugak-scholarship-recipients/
ᕉᔅᒥᐅᕆ ᐋᑯᓗᔾᔪᒃ
ᐊᑎᕋ ᕉᔅᒥᐅᕆ ᐋᑯᓗᔾᔪᒃ ᐃᓕᓴᐃᔨᙳᕆᐅᖅᓴᔪᖅ ᐃᖃᓗᖕᓂ. ᐱᔭᕇᖅᓯᓚᐅᖅᑐᖓ ᓯᕗᓪᓕᖅᐹᖓᓂ ᐊᕐᕌᒍᒥ ᓄᓇᕗᒻᒥ ᐃᓕᓴᐃᔨᒃᓴᓄᑦ ᐃᓕᓐᓂᐊᕈᑎᒥᒃ ᐊᕐᕌᓂ ᓯᑎᐱᕆᒥ ᒫᓐᓇ ᐊᐃᑉᐸᖓᓂ ᐊᕐᕌᒍᒦᓕᖅᑐᖓ ᐃᓕᓐᓂᐊᒐᒃᓴᒥ. ᑖᓐᓇ ᐱᓕᒻᒪᒃᓴᕐᓂᖅ ᐊᕐᕌᒍᓄᑦ ᑎᓴᒪᓄᑦ ᐃᓕᓴᐃᔨᙳᕋᓱᖕᓂᕐᒧᑦ. ᑎᓴᒪᓂᒃ ᐱᔾᔪᑎᑕᖃᖅᐳᖅ ᖃᓄᐃᒻᒪᑦ ᐃᓕᓴᐃᔨᙳᕈᒪᖕᒪᖔᕐᒪ ᐅᑯᐊᖑᓪᓗᑎᒃ:
- ᐊᒥᓲᓂᖅᓴᐃᑦ ᐃᓄᐃᑦ ᐃᓕᓴᐃᔨᙳᕆᐊᓖᑦ ᐅᓪᓗᒥ.
- ᐅᖃᐅᓯᕗᑦ ᐱᒻᒪᕆᐊᓘᒻᒪᑦ ᐃᓄᓕᒫᓄᑦ, ᓇᒻᒥᓂᕆᒐᑦᑎᒍ ᐅᖃᐅᓯᕗᑦ. ᓴᓐᖏᑏᓐᓇᕆᐊᖃᕋᑦᑎᒍ ᐊᑐᖅᑕᐅᓂᐊᕐᒪᑦ ᐊᒻᒪᓗ ᕿᑐᕐᖓᑎᓐᓄᑦ ᐃᓕᑕᐅᖁᓪᓗᒍ ᐱᓯᒪᐃᓐᓇᕐᓗᒍᓗ.
- ᐊᑐᖃᑦᑕᕋᑦᑎᒍ ᐃᓕᓐᓂᐊᖅᑎᑦᑎᔾᔪᑎᒋᓪᓗᑎᒍ ᐃᓄᑦᑎᑐᑦ ᐃᓕᓐᓂᐊᕐᕕᓕᒫᓂ ᐊᒻᒪᓗ ᐅᖃᐅᓯᕆᔭᕆᐊᖃᕐᒥᔭᕗᑦ ᐃᓕᓐᓂᐊᕐᕕᓐᓂ ᐃᓕᓴᐃᔨᐅᓪᓗᑕ. ᑕᒪᓐᓇ ᐱᒻᒪᕆᐊᓘᒻᒪᑦ. ᐱᓕᕆᖃᑎᖃᖃᑦᑕᖅᑐᒍᑦ ᐃᓕᓐᓂᐊᖅᑎᓂᒃ ᖃᐅᑕᒫᑦ ᐃᓕᓐᓂᐊᕐᕕᓐᓂ ᐊᒻᒪᓗ ᐃᓕᓐᓂᐊᖅᑎᖁᑎᑦᑎᓐᓄᑦ ᐊᔪᕆᖅᓲᔾᔨᓯᒪᓪᓗᑕ ᖃᓄᖅ ᐊᑐᖅᑕᐅᒍᓐᓇᕐᒪᖔᖅ.
- ᐃᓕᓐᓂᐊᖅᑎᒋᐊᖃᕋᑦᑎᒍ ᐃᓕᓐᓂᐊᖅᑏᑦ 'ᐃᓕᓴᐃᔨᕈᕈᒪᓗᑎᒃ ᓯᕗᓂᔅᓴᖅᑎᓐᓂᑦ ᐊᒻᒪ ᐃᓕᓐᓂᐊᖅᑎᑦᑎᖁᓪᓗᒋᑦ ᐅᖃᐅᓯᑦᑎᓐᓂᑦ ᑕᐃᒪᐃᓚᐅᕋᑦᑕ' ᐊᑕᐅᑦᑎᒃᑯᑦ ᐅᖃᕈᓐᓇᕐᓗᑎᒃ ᑕᒪᒃᑮᓐᓂᒃ ᐅᖃᐅᓯᕐᓂᑦ ᖃᓪᓗᓈᑎᑐᑦ ᐊᒻᒪ ᐃᓄᒃᑎᑐᑦ.
ᑕᒪᓐᓇ ᐱᒻᒪᕆᐅᒻᒪᑦ ᐅᕙᓐᓄᑦ ᐊᒻᒪᓗ ᓴᓐᖏᔪᒻᒪᕆᒻᒥᒃ ᐊᑐᕋᔅᓴᐅᓪᓗᓂ ᐃᓕᓴᐃᓂᕐᒧᑦ, ᐅᐱᒍᓱᑦᑎᐊᖅᐳᖓ ᐅᖃᕈᓐᓇᕋᒪ ᐊᒻᒪᓗ ᑎᑎᕋᕈᓐᓇᑦᑎᐊᕋᒪ ᐃᓄᑦᑎᑐᑦ. ᐃᓅᓪᓗᑕ ᓄᓇᖃᖅᑳᖅᓯᒪᓪᓗᑕ ᑲᑉᐱᐊᓱᒻᒪᑕ, ᑐᓱᒋᔭᐅᔭᕆᐊᖃᕋᑦᑕ ᓯᓚᕐᔪᐊᕐᒥᐅᓕᒫᓄᑦ, ᓯᕗᓂᒃᓴᕗᑦ ᖃᐅᒪᑦᑎᐊᕐᒪᑦ ᐊᒻᒪᓗ ᑭᖑᕚᒃᓴᕗᑦ ᑐᑭᓯᔭᕆᐊᖃᕐᒪᑕ ᐅᖃᐅᓯᑦᑎᓐᓂᒃ, ᐃᓕᖅᑯᓯᑦᑎᓐᓂᒃ ᐊᒻᒪᓗ ᐱᖅᑯᓯᑦᑎᓐᓂᒃ, ᐅᕙᒍᑦ ᐃᓕᓴᐃᔨᐅᔪᒍᑦ\ᐊᖓᔪᖅᑳᕆᔭᕗᑦ ᐊᒃᓱᕈᕆᐊᖃᒻᒪᕆᒻᒪᑕ ᐃᓕᓐᓂᐊᖅᑎᑦᑎᓇᓱᐊᕐᓗᑎᒃ ᐃᓕᓐᓂᐊᖅᑎᑦᑎᔪᓐᓇᕐᓂᐊᕐᒪᑕ ᑭᖑᕚᕆᓂᐊᖅᑕᒥᓐᓂᒃ ᐅᕙᑦᑎᑐᑦ. ᐅᕙᒍᑦ ᐊᖓᔪᒃᖠᐅᔪᒍᑦ ᐃᓕᓐᓂᐊᖅᑎᒋᐊᖃᓕᖅᑕᕗᑦ ᒫᓐᓇ. ᐃᓄᑦᑕᖃᕐᒪᑦ ᐃᓕᓴᐃᔨᐅᔪᓂᒃ ᐃᓕᓐᓂᐊᕐᕕᓐᓂ ᒫᓐᓇᐅᔪᖅ ᑭᓯᐊᓂᓕ ᑕᒫᓃᖏᓐᓇᔾᔮᖏᑦᑐᑦ ᐃᓕᓴᐃᔨᐅᖏᓐᓇᕐᓗᑎᒃ ᑭᖑᕝᕕᖅᑕᐅᔭᕆᐊᖃᓛᖅᑐᑦ. ᑕᒪᓐᓇ ᐱᓯᒪᐃᓐᓇᖅᑕᕋ ᔫᓯ ᑯᓱᒐᖅ ᐅᖃᓚᐅᕐᒪᑦ ᐊᑕᐅᓯᐊᖅᑐᓂ ᐃᓄᐃᑦ ᐱᒻᒪᕆᐊᓘᒻᒪᑕ ᐊᒻᒪᓗ ᐊᒃᓱᕈᑦᑎᐊᖅᑐᓂ ᐱᓕᕆᖃᑦᑕᓚᐅᕐᒪᑦ ᐅᖃᐅᓯᑦᑎᓐᓂᒃ ᐃᓄᒃᑎᑐᑦ ᐊᒻᒪᓗ ᔭᒐᐃᓚᐅᖅᓯᒪᖁᓇᒍ. ᑐᙵᕕᒋᔭᕗᑦ ᐱᓯᒪᐃᓐᓇᕈᒪᓪᓗᒍ ᐅᖃᐅᓯᕗᑦ ᑭᖑᕚᕗᑦ ᐊᑐᕈᓐᓇᕐᓂᐊᕐᒪᒍ ᓄᓇᕘᒥ. ᓂᕕᐊᖅᓯᐊᖑᓪᓗᖓ ᓄᓇᓕᓐᓅᖃᑦᑕᓚᐅᖅᓯᒪᔪᖅ ᐃᓄᐃᑦ ᑐᑭᓯᓂᐊᕐᒪᑕ ᓄᓇᕗᑦ ᐊᖏᕈᑎᖓᓂᒃ. ᐃᓱᒪᖃᑦᑕᓚᐅᖅᓯᒪᒐᒪ ᐊᔪᙱᑦᑐᐊᓘᒋᐊᖓ ᐊᒻᒪᓗ ᓯᓚᑐᔫᓪᓗᓂ ᔫᓯ. ᑐᓱᒋᕙᓚᐅᖅᑕᕋ ᐊᒻᒪᓗ ᐅᖃᖅᐸᓚᐅᖅᓯᒪᓪᓗᖓ ᐱᔪᓐᓇᖅᓯᑐᐊᕈᒪ ᑕᐃᒫᔅᓴᐃᓐᓇᖅ ᑭᒡᒐᖅᑐᐃᓂᐊᕋᒪ ᐃᓄᓐᓂᒃ ᑕᑯᓐᓇᕋᔭᕋᒃᑭᑦ ᐊᑕᐅᓯᐅᓗᑎᒃ. ᐊᑕᐅᓯᐊᖅᑐᓂ ᐅᖃᓚᐅᖅᓯᒪᕗᖅ ᐅᕙᑦᑎᓐᓄᑦ ᐃᓕᓐᓂᐊᖅᑎᖁᑎᑦᑎᓐᓄᑦ ᐃᓕᓐᓂᐊᕐᕕᒻᒥ, "ᓯᕗᓂᑦᓴᕆᒐᑦᓯᐅᒃ ᑭᖑᕚᕆᒐᑦᓯᐅᒃ ᐊᒻᒪᓗ ᑕᐃᒫᑦᓴᐃᓐᓇᖅ ᐱᓕᕆᐊᖃᕐᓂᐊᖅᑐᓯ ᑲᔪᓯᓗᓯᓗ ᐱᓕᕆᐊᑦᑎᓐᓂᒃ. ᐱᓕᕆᐊᖃᕈᓐᓇᕐᓂᐊᖅᑐᓯ ᓱᓇᑐᐃᓐᓇᒃᑯᑦ ᑲᔪᓯᓗᓯᓗ ᐱᓕᕆᐊᑦᑎᓐᓂᒃ ᐊᑐᕐᓗᓯ ᐃᓕᖅᑯᓯᑦᑎᓐᓂᒃ ᐊᒻᒪᓗ ᐅᖃᐅᓯᑦᑎᓐᓂᒃ ᑐᑭᓯᒐᑦᓯ ᐊᒻᒪᓗ ᐊᑐᕐᓗᒍ. ᓯᕗᓕᖅᑎᕈᕐᓂᐊᖅᑐᓯ, ᒪᓕᒐᓕᐅᖅᑎᐅᓗᓯ, ᓘᑦᑖᖑᓗᓯ, ᐋᓐᓂᐊᓯᐅᖅᑎᐅᓗᓯ ᐊᒻᒪᓗ ᐃᓕᓴᐃᔨᐅᓗᓯ ᐊᓯᖏᓪᓗ. ᐅᕙᒍᑦ ᐃᓅᓪᓗᑕ ᑕᐃᒪᐃᒍᓐᓇᖅᑐᒍᑦ ᐊᒻᒪᓗ ᐅᖃᐅᓯᖏᑦ ᐳᐃᒍᖅᑕᐅᑦᓴᐅᑎᒋᒍᓐᓇᖏᑦᑐᑦ ᐊᒻᒪᓗ ᐊᑐᖅᓱᑕ ᐅᖃᐅᓯᕆᓚᐅᖅᑕᖏᓐᓂᒃ ᐊᒥᓱᑎᒍᑦ ᐃᖅᑲᓇᐃᔮᑎᒍᑦ ᐊᒻᒪᓗ ᐱᓕᕆᐊᑎᒍᑦ. ᐋᖅᑭᑦᓯᒪᑦᓯᐊᖅᑐᑦ ᐊᒻᒪᓗ ᐊᑐᖅᑕᐅᓕᖅᓱᑎᒃ ᐃᓄᓐᓄᑦ. ᐃᓚᒋᔭᐅᒍᒪᔪᖓ. ᑕᒪᒃᑯᐊ ᔫᓯ ᑯᓱᒐᖅ ᑕᑯᒍᒪᔭᖏᑦ ᐊᑐᓕᖅᑎᑕᐅᑎᓪᓗᒋᑦ ᐊᒻᒪᓗ ᐃᖅᑲᐅᒪᓗᒍ ᐊᒻᒪᓗ ᐅᕙᓐᓄᑦ ᑕᑯᓗᒋᑦ ᐊᒻᒪᓗ ᐊᑐᕐᓗᒋᑦ ᐊᑐᖅᐸᑦᑕᕗᑦ ᐊᑐᖅᑕᐅᑎᓪᓗᒋᑦ ᐊᒥᓱᑎᒍᑦ ᐊᑐᕐᓗᑎᒃ ᐅᖃᐅᓯᑦᑎᓐᓂᒃ ᐊᒻᒪᓗ ᐃᓕᖅᑯᓯᑦᑎᓐᓂᒃ. ᑕᒪᒃᑯᐊ ᐊᑑᑎᖃᒻᒪᕆᓐᓂᐊᖅᑐᑦ ᐅᕙᓐᓄᑦ ᐃᖅᑲᓇᐃᔮᓐᓂ ᓯᕗᓂᑦᑎᓐᓂ. ᐃᓕᓐᓂᐊᖅᑎᐅᓪᓗᓂ ᐃᓛᓐᓂᒃᑯᑦ ᐱᒡᒐᓇᖅᐸᑉᐳᖅ ᕿᑐᕐᖓᖃᖅᑐᓂ ᐱᐃᓐᓇᖅᐸᙱᓇᑦᑕ ᐱᔪᒪᔭᑦᑎᓐᓂᑦ ᐃᓛᓐᓂᒃᑯᑦ. ᐅᓪᓗᒥᐅᓕᖅᑐᖅ ᐊᑐᖅᐸᓕᖅᐳᒍᑦ ᐊᔾᔨᒌᙱᑦᑐᓂᑦ ᐊᑐᖅᑕᐅᕙᑦᑐᓂᑦ ᐊᑐᖅᑐᑕ ᖃᕋᓴᐅᔭᒃᑯᑦ ᑐᔪᐃᔾᔪᑎᓂᑦ, ᖃᕋᓴᐅᔭᕐᓂᑦ ᐊᓯᖏᓐᓂᓪᓗ. ᐊᑐᖃᑦᑕᕐᓂᐊᖅᐳᖓ ᓄᑖᓂᑦ ᐊᑐᖅᑕᐅᕙᓕᖅᑐᓂᑦ ᐃᓕᓐᓂᐊᖅᑎᑦᑎᓗᖓ ᐃᓄᑦᑎᑐᑦ ᓇᕿᑦᑕᐅᑎᓂᑦ ᐃᓕᓐᓂᐊᖅᑎᑦᑎᓂᐊᕐᓗᖓ. ᐅᕙᓐᓄᑑᔾᔮᙱᓚᖅ, ᕿᑐᕐᖓᒃᑲ ᐊᑐᕋᔭᕐᒥᔭᒃᑲ, ᑎᓴᒪᓂᒃ ᕿᑐᕐᖓᖃᕋᒪ ᐃᓕᓐᓂᐊᖅᑎᒍᓐᓇᕐᒥᔭᒃᑲᓗ ᖃᓄᖅ ᐊᑐᕆᐊᔅᓴᖅ. ᐊᑐᕈᓐᓇᓕᖅᐳᒍᑦ ᖃᕋᓴᐅᔭᕐᓂᑦ ᑎᑎᕋᕐᓗᑕ ᐅᖃᐅᓯᑦᑎᓐᓂᑦ ᐃᓄᐃᑦ ᐱᒡᒐᓇᖅᑐᒻᒪᕆᐅᓕᖅᐳᑦ ᐅᓪᓗᒥᐅᓕᖅᑐᖅ ᐊᒻᒪ ᐱᒡᒐᓇᖅᑐᒻᒪᕆᐅᓕᖅᑐᓂ ᐊᒻᒪ ᐱᒡᒐᓇᙱᑦᑎᐊᖅᑐᓂ ᐊᑐᕆᐊᖓ. ᑕᒪᒃᑯᐊ ᐱᐅᔪᒻᒪᕆᐅᕗᑦ ᐃᓕᓐᓂᐊᖅᑎᑦᑎᔾᔪᑕᐅᔪᑦ ᑭᖑᕚᑦᑎᓐᓄᑦ. ᒪᒃᑯᑦᑐᐃᑦ\ᓱᕈᓰᑦ ᐃᖅᑲᐅᒪᔭᐅᒋᐊᖃᖅᐳᑦ ᐃᓕᓐᓂᐊᖅᑎᑕᐅᑦᑎᐊᕐᓗᑎᓪᓗ ᐊᒻᒪ ᓂᓪᓕᐊᓂᖅᓴᐅᖃᑦᑕᕐᓗᑎᑦ ᐃᓕᓐᓂᐊᕆᐊᖃᕐᒪᑕ ᐅᖃᐅᓯᑦᑎᓐᓂᑦ ᐊᒻᒪ ᐃᓕᖅᑯᓯᑐᖃᑦᑎᓐᓂᑦ ᐅᕙᒍᑦ ᐊᖏᔪᖅᑳᕆᔭᐅᔪᑦ, ᐊᓈᓇᐅᔪᑦ, ᐊᑖᑕᒋᔭᐅᔪᑦ, ᐃᓕᓴᐃᔩᑦ, ᐊᒻᒪ ᑭᓇᑐᐃᓐᓇᖅ ᐃᓕᓐᓂᐊᕈᓐᓇᕐᒪᑦ ᑕᐃᒪᐃᒍᓐᓇᖅᑐᓂᓗ. ᐃᓕᓐᓂᐊᕆᐊᖃᕆᕗᑦ ᕿᓯᓕᕆᓂᕐᒥᒃ\ᐊᖑᓇᓱᓐᓂᕐᒥᒃ ᐃᓕᖅᑯᓯᑐᖃᖅᑎᒍᑦ ᐃᓕᖅᑯᓯᑐᖃᖅᑎᒍᑦ ᐃᓕᓐᓂᐊᕋᔅᓴᑎᒍᑦ, ᑕᒪᒃᑯᐊ ᓄᓇᓕᓐᓅᖅᐸᓪᓕᐊᑐᐃᓐᓇᕐᒪᑕ ᐃᓕᓐᓂᐊᖅᑎᑕᐅᔭᖅᑐᖅᑐᑎᒃ ᐃᓕᓐᓂᐊᕐᕕᓐᓂᑦ ᖁᕕᐊᓇᖅᑐᒻᒪᕆᐅᓪᓗᓂᓗ ᑕᒪᒃᑯᓂᖓ ᐃᓕᓐᓂᐊᕆᐊᔅᓴᖅ. ᕿᓯᓕᕆᔪᓐᓇᕋᐃᒐᒪ, ᒥᖅᓱᕈᓐᓇᓕᕋᐃᒐᒪ, ᐃᓕᑉᐹᓪᓕᕈᒪᓲᖑᕗᖓ ᓇᒻᒥᓂᖅ ᐱᓕᕆᐊᕆᓕᕋᐃᒐᒃᑭᑦ. ᑕᒪᒃᑯᐊ ᐃᓕᓚᐅᖅᑕᒃᑲ ᐊᓈᓇᑦᑎᐊᕐᒪ ᐃᓕᓐᓂᐊᖅᑎᓚᐅᕐᒪᖓ. ᐅᓪᓗᒥ ᓱᓕ ᐃᓕᑉᐸᓪᓕᐊᔪᖓ. ᔫᓯ ᑯᓱᒐᖅ, ᕋᐃᒪᓐ ᓂᖏᐅᑦᓯᐊᖅ ᐊᒻᒪᓗ ᔭᐃᒥᓯ ᐃᑦᑐᓗᒃ ᐃᔾᔪᐊᕈᒥᓇᑦᑎᐊᖅᑐᑦ, ᖁᔭᓐᓇᒦᒻᒪᕆᒍᒪᕙᒃᑲ, ᐱᓕᕆᓯᒪᔪᒻᒪᕆᐅᒻᒪᑕ ᓄᓇᕗᒻᒥ ᐃᓄᓐᓄᑦ. ᖁᔭᓐᓇᒦᒻᒪᕆᐊᓗᒃ ᐱᕕᖃᖅᑎᑕᐅᒐᒪ, ᐊᒻᒪᓗ ᐃᑲᔪᖅᑐᐃᓂᑦᑎᓐᓄᑦ ᐃᓕᓐᓂᐊᖅᑎᓄᑦ ᐃᑲᔫᑎᓄᑦ ᐃᓱᒪᒋᔭᐅᖅᑲᐅᒻᒪᑦ ᐃᓕᓐᓂᐊᖅᑎᓄᑦ. ᐅᓪᓗᖃᑦᑎᐊᕆᔅᓯ. ᕉᔅᒥᐅᕆ ᐄᑯᓗᒃ
ᐄᐳᕈᓪ ᐆᓕ ( ᐊᕐᕕᐊᑦ )
ᐃᓱᓕᑦᑎᓯᒪᓕᖅᑐᖓ ᐱᖓᓱᓂᒃ ᐊᕐᕌᒍᓂᒃ ᓄᓇᕗᒻᒥ ᐃᓕᓴᐃᔨᒃᓴᐅᓂᕐᒧᑦ ᐃᓕᓐᓂᐊᕐᓂᕐᒥᒃ. ᑕᒪᑐᒪᓂ ᐊᕐᕌᒍᒥ ᑎᓴᒪᒋᓕᖅᑕᖓ (ᑎᓴᒪᒋᓕᖅᑕᖓ) ᐊᕐᕌᒍᒐ ᐱᔭᕇᓛᖅᖢᖓᓗ ᐅᑭᐊᒃᓵᖅ 2017-ᒥ. ᓄᓇᕗᒻᒥ ᐃᓕᓴᐃᔨᒃᓴᓄᑦ ᐃᓕᓐᓂᐊᕐᓂᖅ ᐱᓕᕆᖃᑎᖃᖅᑐᖅ ᓯᓚᑦᑐᖅᓴᕐᕕᒡᔪᐊᖓᓂ ᕆᔭᐃᓇ ᐊᒻᒪᓗ ᓯᓚᑦᑐᖅᓴᕐᕕᒡᔪᐊᖅ ᐱᓕᕆᐊᒃᓴᖃᖅᑐᖅ ᑕᒪᐃᓐᓂᒃ ᖃᓪᓗᓈᑎᑐᑦ ᐃᓄᒃᑎᑐᓪᓗ ᐃᓕᓐᓂᐊᒐᒃᓴᓂᒃ. ᐱᔭᕇᕈᑎᑖᕐᓂᐊᖅᑐᖓ ᐱᔭᕇᕐᓗᖓᓗ ᐃᓕᓴᐃᔨᐅᓂᕐᒥᒃ ᐃᓕᑕᕆᔭᐅᓯᒪᔪᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖕᒥ ᐱᔭᕇᕐᓗᖓᓗ ᐃᓕᓴᐃᔨᐅᔪᓐᓇᕐᓗᖓ ᓇᓂᑐᐃᓐᓇᖅ. ᐃᓕᓴᐃᔪᓐᓇᓛᖅᑐᖓ ᓄᓇᕗᒻᒥ ᐃᓕᓴᐃᔨᓪᓚᕆᐅᓗᖓ ᓇᓗᓇᐃᒃᑯᑕᖃᕐᓗᖓ. ᐊᕐᕌᒍᒐᓴᖕᓄᑦ ᐃᓕᓴᐃᔨᙳᕈᒪᓚᐅᖅᐳᖓ ᐃᓕᓴᐃᓗᖓᓗ ᓄᑕᖅᑲᓂᒃ ᑕᐃᒪᐃᓕᐅᕐᓗᖓᓗ ᐊᓯᔾᔨᖅᓯᔪᓐᓇᖅᑐᖓ ᐃᓚᖏᓐᓂᒃ ᐃᓅᓯᕆᔭᐅᔪᓂᒃ ᓄᑕᖅᑲᓂᒃ ᐃᒻᒥᓂᒃ ᐱᕚᓪᓕᖁᓪᓗᒋᑦ. ᐅᒃᐱᕈᓱᒃᐳᖓ ᐃᓕᓐᓂᐊᕐᓂᖅ ᐱᓪᓗᐊᑕᐅᓂᖓᓂᒃ ᐅᒃᐱᕈᓱᒃᐳᖓᓗ ᓄᑕᖅᑲᑦ ᐃᓕᑦᑎᔪᓐᓇᕐᓂᖏᓐᓂᒃ ᐱᐅᔪᓂᒃ. ᐊᓈᓇᒋᔭᐅᔪᖓ ᐱᖓᓱᓂᒃ ᐅᑭᐅᓕᖕᓂᒃ 10, 6 ᐊᒻᒪ 3-ᓂᒃ ᐅᑭᐅᖃᖅᖢᖓ. ᕿᑐᕐᖓᒃᑲ ᐅᕙᓐᓂᒃ ᑕᐅᑐᖕᒪᑕ ᐊᓈᓇᑐᐃᓐᓇᐅᙱᖦᖢᖓ ᑭᓯᐊᓂ ᐃᔾᔪᐊᒐᒃᓴᑦᑎᐊᕙᐅᒋᓪᓗᖓ. ᐅᑭᐊᒃᓵᖑᓂᐊᖅᑐᒥ ᐃᓕᓐᓂᐊᕐᕕᖕᒧᐊᓛᕐᒪᑕ ᖁᕕᐊᒋᔭᖃᕐᓂᐊᖅᖢᑎᒡᓗ ᐃᓕᓐᓂᐊᕐᓂᕐᒥᒃ ᐱᒋᐊᓕᓵᖅᑎᓪᓗᒋᑦ ᐃᓕᑦᑎᕙᓪᓕᐊᓗᑎᒡᓗ ᓄᑖᓂᒃ ᖃᐅᑕᒫᑦ. ᓱᕈᓰᑦ ᖃᐅᔨᒪᒻᒪᑕ ᖃᓄᖅ ᐱᒻᒪᕆᐅᑎᒋᒻᒪᖔᖅ ᐃᓕᓐᓂᐊᕐᓂᖅ ᐊᒻᒪᓗ ᐅᖃᐅᑎᕙᑉᐸᒃᑲ ᐃᓕᓐᓂᐊᕆᐊᖃᑦᑕᕐᓂᖅ ᐊᒻᒪᓗ ᐃᓕᓐᓂᐊᕐᓂᖅ ᐱᒻᒪᕆᐅᒻᒪᑦ ᓯᕗᓂᑦᓴᖏᓐᓄᑦ ᐊᒻᒪᓗ ᐃᓕᑉᐸᓪᓕᐊᒋᐊᖃᕐᓂᖅ ᐱᐅᓂᖅᐹᒃᑯᑦ ᖃᐅᔨᒪᓗᑎᒃ ᖃᓄᖅ ᐊᒻᒪᓗ ᐃᑲᔪᖅᑕᐅᔭᕆᐊᖃᕈᑎᒃ ᐊᑐᐃᓐᓇᐅᒻᒪᑕ ᑖᒃᑯᓄᖓ ᐊᒻᒪᓗ ᓯᕗᓂᑦᑎᓐᓂ ᓯᓚᑦᑐᓴᕐᕕᒻᒨᕈᓐᓇᕐᓗᑎᒃ ᐃᓐᓇᕈᖅᐸᓪᓕᐊᒍᑎᒃ. ᐃᓕᓐᓂᐊᕐᓂᖅ ᐱᓪᓗᐊᑕᐅᒻᒪᑦ ᐱᕕᒃᓴᓄᑦ ᐊᒻᒪᓗ ᐃᖅᑲᓇᐃᔮᓄᑦ ᓯᕗᓂᔅᓴᖅᑎᓐᓄᑦ. ᐃᓅᒐᒪ ᐊᒻᒪᓗ ᖃᐅᔨᒪᓪᓗᖓ ᐃᓕᖅᑯᓯᕗᑦ ᐊᒻᒪᓗ ᐱᖅᑯᓯᕗᑦ ᐱᒻᒪᕆᐅᒻᒪᑕ. ᐃᓕᖅᑯᓯᕗᑦ ᐊᒻᒪᓗ ᐱᖅᑯᓯᕗᑦ ᐊᑦᑕᓇᖅᑐᒦᒻᒪᑕ, ᐊᔾᔨᒋᓐᖏᒻᒪᒍ ᐊᓯᖏᓐᓂᑦ ᐃᓕᖅᑯᓯᐅᔪᓂᑦ. ᓱᓕᔪᕆᕙᕋ ᐊᑐᕈᓐᓇᕋᑦᑎᒍ ᐃᓕᑉᐸᓪᓕᐊᓂᑦᑎᓐᓂ ᓲᖃᐃᒻᒪ ᐃᓕᖅᑯᓯᕆᒐᑦᑎᒍᑦ ᓲᖃᐃᒻᒪ ᐱᓕᒻᒪᓴᕆᐊᖃᕋᑦᑎᒍ ᐊᑐᕐᓗᒋᑦ, ᐱᒻᒪᕆᐅᒻᒪᑦ ᐊᑐᕐᓗᒍ ᐊᒻᒪᓗ ᐅᖃᐅᓯᕗᑦ. ᐊᒪᐅᔭᖅ ᐅᖃᕋᑖᕐᒪᑦ "ᓴᐱᓕᖅᑕᐃᓕᒋᑦ" ᐃᓕᓐᓂᐊᕐᓂᕐᒥᑦ ᐊᒻᒪᓗ ᔭᒐᐃᑦᑕᐃᓕᒋᑦ ᐅᖃᐅᓯᑦᑎᓐᓂᑦ. ᐃᑉᐱᒍᓱᓕᖅᑯᖓ ᑕᐃᒪᐃᒋᐊᖃᕋᒪ ᐊᒻᒪᓗ ᐃᓕᓐᓂᐊᑎᒋᐊᖃᖅᑐᒍ ᕿᑐᕐᖓᑎᓐᓄᑦ, ᐃᓕᖅᑯᓯᑦᑎᓐᓄᑦ ᐊᒻᒪᓗ ᐱᖅᑯᓯᑦᑎᓐᓄᑦ. ᐃᓅᒐᒪ, ᐱᓕᒻᒪᑦᓴᕆᐊᖃᕋᑦᑕ ᐊᑐᕐᓗᑕ ᐃᓕᖅᑯᓯᑦᑎᓐᓂᒃ ᐊᒻᒪᓗ ᐱᖅᑯᓯᑦᑎᓐᓂᒃ ᖃᓄᑐᐃᓐᓇᑦᑎᐊᖅ, ᐃᓕᓪᓗᑕ ᑭᓇᐅᒻᒪᖔᑦᑕ ᐊᒻᒪᓗ ᑭᓲᒻᒪᖔᑦᑕ. ᐊᒪᐅᔭᖅ ᐊᒃᓱᕉᑎᖃᓚᐅᖏᒃᑯᓂ ᐅᖃᐅᓯᑦᑎᓐᓂᒃ ᐊᑐᕋᓱᐊᕐᓗᓂ ᐊᒻᒪᓗ ᐊᔭᐅᖅᑐᐃᖏᒃᑯᓂ, ᐃᓄᒃᑎᑐᑦ ᐅᖃᐅᓯᖅ ᐃᓕᓐᓂᐊᕐᕕᒻᒦᒃᑲᔭᙱᒻᒪᑦ ᐅᓪᓗᒥᐅᔪᖅ. ᓄᓇᓕᓐᓃᙶᖅᓯᒪᒐᒪ ᐅᖃᐅᓯᕗᑦ ᐱᒻᒪᕆᐅᒻᒪᑦ ᖃᐅᑕᒫᑦ ᐊᑐᕆᐊᖓ, ᐃᓕᓐᓂᐊᕐᓂᖅ ᐃᓄᑦᑎᑐᑦ ᐱᒻᒪᕆᐅᒻᒪᑦ ᐊᒻᒪᓗ ᐃᓄᑦᑎᑐᑦ ᐃᓕᓐᓂᐊᕈᑎᑦᓴᐃᑦ ᐃᓕᓐᓂᐊᖅᑕᐅᕙᑦᑐᑦ ᒥᑭᔫᑕᐅᓂᖅᓴᓂ ᓄᓇᓕᓐᓂ ᐃᓕᓐᓂᐊᕐᕕᓐᓂ. ᐊᑐᖃᑦᑕᕐᓂᐊᖅᑕᕋ ᐃᓄᑦᑎᑐᑦ ᐅᖃᐅᓯᕋ ᐊᒻᒪᓗ ᐃᓕᖅᑯᓯᕋ ᖃᐅᑕᒫᑦ ᐱᓕᒻᒪᓴᖃᑦᑕᕐᓗᒍ. ᐊᑦᓱᕉᑎᖃᕐᓗᑕ ᐊᑐᕋᓱᐊᕐᓗᒋᑦ ᐃᓄᐃᑦ ᖃᐅᔨᒪᓂᖏᑦ ᐊᒻᒪᓗ ᐊᑐᖅᐸᑦᑕᕗᑦ. ᐅᐱᒋᔭᒻᒪᕆᒋᕙᕗᑦ ᐃᓕᓐᓂᐊᖅᑎᖁᑎᕗᑦ ᐃᓕᓐᓂᐊᕐᒪᑕ ᐃᓄᑦᑎᑐᑦ. ᐱᔭᕇᖅᐸᓪᓕᐊᓕᖅᑎᓪᓗᑕ ᐃᓕᓐᓂᐊᖅᑕᑦᑎᓐᓂᒃ, ᐃᓕᓴᐃᔨᕈᓛᕈᒪᒐᒪ ᐊᒻᒪᓗ ᑕᐅᑐᙳᐊᕐᓗᖓ ᖃᓄᖅ ᐱᓕᕆᐊᕆᓂᐊᕐᒪᖔᕐᒪ ᐊᒻᒪᓗ ᓇᓗᓇᙱᑦᑐᖅ ᐃᓚᖏᑦ ᑲᒪᒋᔭᕆᐊᖃᓛᕋᒃᑭᑦ ᐊᒻᒪᓗ ᐃᓕᓐᓂᐊᖅᑎᑦᑎᔾᔪᑎᒋᔪᒪᔭᒃᑲ ᐊᒻᒪᓗ ᓂᕆᐅᒃᐳᖓ ᐃᓕᓐᓂᐊᖅᑏᑦ ᐃᓕᓐᓂᐊᖅᑎᓐᓂᐊᖅᑕᒃᑲ ᐃᖅᑲᐅᒪᓂᐊᖅᐳᓯ ᐃᓕᓴᐃᔨᒋᓚᐅᖅᓯᒪᒐᒃᑭᑦ ᐊᒻᒪᓗ ᐃᖅᑲᐅᒪᓗᓯ ᖃᓄᖅ ᐃᓕᓐᓂᐊᖅᑎᑦᑎᖃᑦᑕᓚᐅᖅᓯᒪᒻᒪᖔᕐᒪ. ᐊᒪᐅᔭᖅ ᑐᓂᓯᓯᒪᔪᒻᒪᕆᐅᒻᒪᑦ ᐃᓄᓐᓄᑦ ᐃᓚᖓᒍᑦ ᐊᒻᒪᓗ ᐃᓕᓴᐃᔨᕈᕐᓂᖅ ᐃᓚᒋᒻᒪᒍ ᐊᒻᒪᓗ ᐱᔭᕇᓛᖅᑐᖓ. ᐃᖅᑲᓇᐃᔮᕋ ᐃᓕᖅᑯᓯᕗᑦ ᐊᒻᒪᓗ ᐅᖃᐅᓯᕗᑦ ᐆᒪᑏᓐᓇᕐᓗᒍ. ᐊᒪᐅᔭᖅ ᐅᕙᑦᑎᓐᓄᑦ ᑐᓂᓯᓯᒪᒻᒪᑦ ᐱᐅᔪᒻᒪᕆᓐᓂᒃ. ᖁᔭᓐᓇᒦᕈᒪᕙᒋᑦ ᐊᒻᒪᓗ ᐃᕝᕕᑦ ᐊᒪᐅᔭᖅ. ᒎᑎᐅᑉ ᐱᖃᑎᒋᕙᒋᑦ.