ᓄᓇᕗᑦ ᑐᙵᕕᒃ ᑎᒥᖓ ᑐᓴᖅᑎᑦᑎᕗᑦ ᑕᓪᓕᒪᖓᖕᓂ ᐊᕐᕌᒍᒥ ᐊᕐᕌᒍᑕᒫᑦ ᐃᓄᒃᑑᖅᑕ! ᑎᑎᕋᑦᑎᐊᓛᖑᑎᑦᑎᒐᓱᐊᖅᑎᑦᑎᓂᐊᕐᓂᖏᓐᓂᒃ
(ᐊᒃᑑᕝᕙ 7, 2026, ᐃᖃᓗᐃᑦ, ᓄᓇᕗᑦ) - ᐊᑦᑕᓄᐊᖅ ᐅᓗᖅᓯ, ᐊᖓᔪᖅᑳᖅ ᓄᓇᕗᑦ ᑐᙵᕕᒃ ᑎᒥᖓᓄᑦ ᐊᒻᒪᓗ ᐃᒃᓯᕙᐅᑕᐅᓪᓗᓂ ᓄᓇᕗᑦ ᑐᙵᕕᒃ ᐃᑲᔫᑎᒃᓴᓕᕆᔨᒃᑯᓐᓄᑦ, ᑐᓴᖅᑎᑦᑎᔪᒪᕗᖅ ᑕᓪᓕᒪᖓᓐᓂ ᐊᕐᕌᒍᑕᒫᑦ ᐃᓄᒃᑑᖅᑕ! ᑎᑎᕋᑦᑎᐊᓛᖑᑎᑦᑎᒐᓱᐊᖅᑎᑦᑎᓂᖏᓐᓂᒃ ᓵᓚᖃᐅᓯᐊᕋᔭᖅᑐᖃᕋᔭᕐᓗᓂ.
ᐃᓄᒃᑑᖅᑕ! ᐱᔾᔪᓯᐊᖅᑖᕆᔭᐅᒐᔭᖅᑐᖅ ᐊᑕᐅᓯᕐᒧᑦ ᓄᓇᕗᒻᒥᐅᑕᕐᒧᑦ ᐃᓄᒻᒧᑦ ᑎᑎᕋᖅᑎ ᐅᖃᓕᒫᒐᕐᓂᒃ ᓵᓚᒃᓴᕋᔭᖅᑐᖅ ᐊᒥᓱᓂᒃ ᑎᑭᓪᓗᒋᑦ $80,000, ᐊᒻᒪᓗᑦᑕᐅᖅ ᐃᑲᔪᖅᑕᐅᓗᓂ ᐱᔭᕇᖅᓯᓗᓂ ᐅᖃᓕᒫᒐᓕᐊᕆᔭᐅᓯᒪᔪᓕᒫᕐᒥᒃ ᐃᓄᒃᑎᑑᖓᔪᓂᒃ ᐃᓄᐃᓐᓇᖅᑐᓪᓘᓐᓃᑦ. ᐊᕐᕌᒎᓚᐅᖅᓯᒪᔪᑎᑐᑦ, ᑎᓴᒪᒃᑲᓐᓃᖅ ᐱᔾᔪᓯᐊᖅᑖᖅᑎᑕᐅᒐᔭᕐᒥᔪᑦ. ᓄᓇᕗᑦ ᑐᙵᕕᒃ ᐃᑲᔫᑎᒃᓴᓕᕆᔨᒃᑯᑦ ᐃᖅᑲᓇᐃᔭᖃᑎᖃᕋᔭᖅᑐᑦ ᓵᓚᒃᓴᖅᑐᓂᒃ ᑎᑎᕋᖅᑐᒥᓂᕐᓂᒃ ᐃᑲᔪᖅᑕᐅᖁᓪᓗᒋᑦ ᐱᔭᕇᖅᓯᓂᖏᓐᓂᒃ ᓴᖅᑭᖅᑎᑕᐅᓗᑎᓪᓗ ᑎᑎᕋᖅᑕᐅᓗᑎᑦ ᐃᖅᑲᓇᐃᔮᕆᓯᒪᔭᖏᑦ ᑎᑎᕋᖅᑕᒥᓂᖏᑦ.
ᑕᒫᓂ ᐊᕐᕌᒍᒥ ᑐᙵᕕᒋᔭᐅᓂᐊᖅᑐᖅ ᓱᓕᔪᒥᒃ ᐃᓄᑉ ᐃᓅᓯᕆᓯᒪᔭᖓᓂᒃ ᑎᑎᕋᕐᓗᑎᑦ: ᑐᑭᓕᒃ ᓇᓗᓇᐃᔭᑦᑎᐊᖅᓯᒪᔪᑯᓘᓗᑎᑦ ᐅᕝᕙᓘᓐᓃᑦ ᑎᑎᕋᖅᑕᐅᓗᑎᑦ ᖃᓄᐃᑦᑐᒥᓂᐅᒻᒪᖔᑕ ᐃᓄᑉ ᐃᓅᓯᖓᓂᒃ. ᐱᖃᓯᐅᔾᔨᔪᑦ ᓲᕐᓗᒃ ᐅᖓᑖᓄᑦ ᑎᑎᕋᖅᑕᐅᓗᑎᑦ ᐅᑯᐊᑑᙱᑦᑐᖅ ᐃᓕᓐᓂᐊᕐᓂᑯᒥᓂᖏᑦ, ᐃᖅᑲᓇᐃᔮᕆᖃᑦᑕᕐᓂᑯᒥᓂᖏᑦ, ᐃᓅᖃᑎᖃᕐᓂᖏᑦ, ᐊᒻᒪᓗ ᐃᓅᒍᓐᓃᖅᑐᒥᓂᐅᓂᖏᑦ. ᓴᖅᑭᔮᖅᑎᑦᑎᔭᕆᐊᓕᒃ ᐃᓄᑉ ᐊᑐᖃᑦᑕᕐᓂᑯᒥᓂᖏᑦ ᑕᒪᒃᑯᐊ ᐃᓅᓯᖓᑕ ᐊᑐᖅᓯᒪᔭᖏᑦ.
“ᐃᓄᒃᑑᖅᑕ! ᑮᓇᐅᔭᓂᒃ ᐊᑐᕐᕕᐅᕗᖅ ᓯᕗᓂᒃᓴᒥ ᐅᖃᐅᓯᕗᑦ ᐃᑲᔪᖅᑐᐊᕆᔭᐅᔅᓴᐃᓐᓇᓛᕐᓂᖓᓂᒃ ᐊᒻᒪᓗ ᐅᓂᒃᑳᖅᑐᐊᕗᑦ. ᐊᑐᖃᑦᑕᕐᓂᑯᒥᓂᕗᑦ ᐅᖃᐅᓯᕆᔭᐅᔭᕆᐊᖃᕐᒪᑕ ᐃᓄᒻᒪᕆᖕᓄᑦ, ᓇᒻᒥᓂᖅ ᐅᖃᐅᓯᖅᑎᒍᑦ. ᑖᒃᑯᑎᒎᓇᖅ ᐱᔾᔪᓯᐊᖅᑎᒍᑦ, ᐃᑲᔪᖅᑐᐃᕗᒍᑦ ᐃᓄᓐᓂᒃ ᑎᑎᕋᖅᑎᓂᒃ ᑎᑎᕋᖅᑕᐅᖁᓪᓗᒋᑦ ᐃᓅᓯᕆᔭᐅᔪᑦ, ᐊᑐᖅᑕᐅᖃᑦᑕᕐᓂᑯᑦ ᐊᒻᒪᓗ ᖃᐅᔨᒪᓂᖏᑦ ᐃᓄᐃᑦ ᐋᖅᑮᓯᒪᔪᑦ ᐃᓚᑦᑎᓐᓂᒃ ᓄᓇᓕᑦᑎᓐᓂᓗ, ᑖᒃᑯᐊ ᐅᓂᒃᑳᑦ ᓯᕗᒧᐊᒍᑎᒋᔭᐅᓂᐊᕐᒪᑕ ᓯᕗᕚᑦᑎᓐᓄᑦ ᑐᓴᖅᑕᐅᓯᒪᓛᕐᓗᑎᑦ.” − ᐊᑦᑕᓄᐊᖅ ᐅᓗᖅᓯ, ᐊᖓᔪᖅᑳᖅ ᓄᓇᕗᑦ ᑐᙵᕕᒃ ᑎᒥᖓᓄᑦ, ᐊᒻᒪᓗ ᐃᒃᓯᕙᐅᑕᕆᔭᐅᔪᖅ ᓄᓇᕗᑦ ᑐᙵᕕᒃ ᐃᑲᔫᑎᒃᓴᓕᕆᔨᒃᑯᓐᓄᑦ.
ᐃᓄᒃᑐᑦ ᑎᑎᕋᖅᑕᐅᓯᒪᔪᑦ ᑎᑎᕋᖅᑕᐅᔭᕆᐅᖅᑕᐅᔭᕆᐊᖃᕐᒪᑕ ᑎᑎᕋᖅᑎᒧᑦ ᐊᒻᒪᓗ ᑎᑎᕋᖅᑕᐅᓚᐅᖅᓯᒪᙱᓪᓗᑎᑦ ᓯᕗᓂᐊᒍᑦ. ᑐᓂᔭᐅᔪᑦ ᐃᓗᓕᖃᕆᐊᖃᙱᑦᑐᑦ ᑎᑎᕋᖅᑕᒥᓂᕐᓂᒃ ᐊᓯᖏᖕᓄᑦ (ᐊᔪᕆᒋᐊᖃᕋᑎᑦ ᐊᔪᕆᑦᑐᑦ). ᑭᓯᐊᓂᓕ, ᐱᔭᕇᖅᓯᒪᔪᑦ ᑎᑎᕋᖅᑕᒥᓃᑦ ᒪᕐᕉᓐᓄᒃ ᑎᑎᕋᖃᖅᑕᒥᓂᐅᔭᕆᐊᓖᑦ ᓴᖅᑭᖅᑎᑕᐅᓗᑎᑦ ᐊᓯᐊᓄᑦ ᑲᑐᔾᔨᖃᑎᒌᒧᑦ ᐅᕝᕙᓘᓐᓃᑦ ᐅᖃᓕᒫᒐᕐᓂᒃ ᑎᑎᕋᖅᑎᒧᑦ.
ᑕᒪᐃᓐᓂ ᑐᓂᔭᐅᔪᑦ ᑎᑎᕋᖅᓯᒪᔭᕆᐊᓖᑦ ᐃᓄᒃᑎᑐᑦ ᐃᓄᐃᓐᓇᖅᑐᓪᓘᓐᓃᑦ ᐊᒻᒪᓗ ᐱᖃᓯᐅᔾᔨᓗᑎᑦ ᐅᑯᓂᖓ:
- ᐱᔭᕇᑦᑎᐊᖅᓯᒪᔪᖅ ᐱᓇᓱᐊᕐᓂᕐᒧᑦ ᓈᑎᕆᐊᓕᒃ; ᐊᒻᒪᓗ
- ᓇᓗᓇᐃᔭᖅᓯᒪᓂᖏᑦ ᑐᒃᓯᕋᐅᑎᐅᔪᑉ ᑕᒪᐃᓐᓂ ᑎᑎᕋᖅᓯᒪᔭᓂ, ᓂᕆᐅᒋᔭᐅᓪᓗᑎᑦ ᑕᑭᓂᖃᕋᔭᕐᒪᑕ 8−ᓂᒃ ᐊᒻᒪᓗ 12-ᓄᑦ ᒪᑉᐱᒐᑦ ᑎᑎᕋᖅᑕᐅᔪᑦ ᐊᓪᓕᕐᒧᐊᖓᓂᖏᑦ ᐃᓂᖓ ᒪᕐᕈᐃᓕᖅᑲᖓᓗᒍ ᐃᓂᖃᕐᓂᖓ.
ᑐᓂᓗᒍ ᐱᓇᓱᐊᕈᑏᑦ ᖃᕋᓴᐅᔭᒃᑯᑦ Inuktuuqta@tunngavik.com, ᐋᓪᓗᒍᓗ ᑎᑎᖅᑲᑉ ᐴᖓ ᓂᐱᑎᖅᓯᒪᓗᒍ ᓄᓇᕗᑦ ᑐᙵᕕᒃ ᑎᒥᖓᑕ ᐊᓪᓚᕝᕕᖓᓄᑦ ᓄᓇᕗᑦ ᑐᙵᕕᒃ ᑎᒥᖓ 100-922 ᓯᕗᒧᒋᐊᖅ ᐊᖅᑯᑎ, ᐃᖃᓗᐃᑦ NU X0A 3H0, ᐅᕝᕙᓘᓐᓃᑦ ᑎᑎᖅᑲᓂᐊᕐᕕᒃᑯᑎᒍᑦ ᐊᐅᓪᓚᖅᑎᓪᓗᒍ ᐅᓪᓗᖓ ᑎᑎᕐᓗᒍ ᐊᒃᑑᕝᕙ 20, 2026. ᑐᑭᓯᒋᐊᒃᑲᓐᓂᕈᒪᒍᕕᑦ, ᖃᐅᔨᒃᑲᕐᓗᑎᒍᑦ ᖃᕋᓴᐅᔭᒃᑯᑦ ᑎᑎᕋᕐᓗᑎᑦ ᐅᕗᖓ inuktuuqta@tunngavik.com.
-30-
ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒋᐊᕈᓐᓇᖅᑐᑦ
ᐋᓂ ᑕᒻᓕᓐᓴᓐ
ᑐᑭᒧᐊᑦᑎᑦᑎᔨ, ᑐᓴᐅᒪᑎᑦᑎᓂᕐᒧᑦ
ᓄᓇᕗᑦ ᑐᙵᕕᒃ ᑎᒥᖓ
media@tunngavik.com