Nunuavut Tunngavik Timiqutinga Tuhaqtittiyut tallimanik Ukiunganut tamaat Inuktuuqta! Titirarnikkut Taktakhaq

(Tattiarnaqtuq 7, 2026, Iqaluit, Nunavut) - Gloria Uluqsi, Angiyuqqaanga ukunanngat Nunavut Tunngavik Timiqutinga unalu Ikhivautalik haffumani Nunavut Tunngavik Tunngavinga, tuhaqtittiyumayuq hamna tallimanik Ukiunganut Inuktuuqta! Titirarnikkut Taktakhaq.

Inuktuuqta! tuniniaqtuq atauhirmik Nunavunmi Inuinnarmik taigualiuqtimik anginiqharmik taktakhamik imaatun $80,000,tausit taalamik ikayuqtaulutiglu iniqtiriangani makpiraat Inuktitut Inuinnaqtulluuniit. Kingullirni ukiuni, hitamat taktakhat tuniyauniaqtut. Nunavut Tunngavik Tunngavia (NTF) havaqatiginiaqtait akimayut titiraqtit ikayuriangani iniqtiriangani makpiraaliuqtatik.

Uumani ukiungani pidjutaa itquumangittumik unipkaaliuqhimayuq, naunayjattiaqhimayuq unipkaaq inuup inuuhianik. Amigaitqiyauyuq titiraqhimaittumik ayurnaittunik ukunatut iliharniq, havaat, piqatigiingniq, tuqunirlu. Tautuktitaa inuup atuqhimayainnik hapkunani inuuhirmingni qanuriliurutini.

“Inuktuuqta! Ikayuutauyuq hivuniptingni uqauhiptingnut unipkaaptingnullu. Ingilraarnittavut unipkaaqtauyukhat Inuinnarnit, uqauhiptingni. Haffumunga taktamun, ikayuqtavut Inuit titiraqtit piyaangani inuuhiit, atuqhimayait, uvvalu ilihimayait inuit kitut ihuaqhaiyut ilaptingnut uvvalu nunallaaptingnut, taimaalu hapkua unipkaat tuniyauyaangani kinguliptingnut qaiyunut.” – Gloria Uluqsi, Angiyuqqaanga ukunanngat Nunavut Tunngavik Timiqutinga unalu Ikhivautalik haffumani Nunavut Tunngavik Tunngavinga.

Inuktut titiraqhimayut havaat titiraqhimayait inmi titiraqhimayait makpiraaliuqtauyukhaunngittut hivuani. Tuyuqtauyut ilaulimaittut hunanik titiraqhimayunik aallanit inungnit (ihuiguhuutiqanngittut). Kihimi iniqhimayut havaat makpiraanguqtauyaaqtut atauttimut aallanun timiuyunut uvvaluuniit makpiraaliuqtinut.

Tamaita tuyuqtauyut titiraqtauyukhat Inuktitut uvvaluuniit Inuinnaqtun uvvalu ilauyut:

• Iniqtiqhimayuq uuktuutikhaq titiraq; unalu
• Titirauyaqhimayumik tamaat titiraqtarnik titirarumayarnik, taimaa 8-nit 12-nut makpiraanik, malruiqturlutik makpiraanik.

Tuyurlugu uuktuutikhat qaritauyakkut uumunga Inuktuuqta@tunngavik.com, aggitilugu nipitiqhimayumik puukhamut NTI-kkut Havagvianut Nunavut Tunngavik Timiqutinganut.100-922 Sivumugiaq St, Iqaluit NU X0A 3H0, uvvaluuniit titiraqarvikkut naunaitkutaa Tattiarnaqhilirvia 20, 2026. Naunaiqhittiarumaguvit, uqarvigilugu inuktuuqta@tunngavik.com.

Tuhaqtipkainikkut Uqarvikhaq
Annie Thomlinson
Aulapkaiyi Tuhaqtipkainikkut
Nunavut Tunngavik Timiqutinga
media@tunngavik.com