ᖁᑦᓯᑦᑐᒧᑦ ᓄᑦᑎᖅᑕᐅᓯᒪᔪᓄᑦ ᓇᑉᐸᐃᓂᑦᓴᒧᑦ ᐊᐅᓚᓂᐅᔪᖅ
ᐊᐅᔭᐅᑎᓪᓗᒍ 1950-ᖏᓐᓂ, ᐊᒥᓱᑲᓪᓚᐃᑦ ᐃᓄᐃᑦ ᐃᓚᒌᑦ ᓄᑦᑎᖅᑕᐅᓚᐅᖅᓯᒪᔪᑦ ᖁᑦᑎᑦᑐᒧᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ. ᐃᓚᒌᑦ ᒥᑦᑎᒪᑕᓕᒻᒥᐅᑦ ᐊᒻᒪᓗ ᐃᓄᒃᔪᐊᕐᒥᐅᑦ, ᖃᐅᔨᒪᔭᐅᔪᑦ ᐳᐊᑦ ᕼᐃᐅᕆᓴᓐ ᑕᐃᑦᓱᒪᓂ, ᑕᓯᐅᔭᕐᔪᐊᑉ ᓯᒡᔭᖓᓂ ᑯᐸᐃᒃ ᑕᕐᕋᖓᓂ, ᓄᑦᑎᖅᑕᐅᓚᐅᖅᓯᒪᔪᑦ ᐊᒻᒪᓗ ᓄᓇᓕᙳᖅᑎᑕᐅᓪᓗᑎᒃ ᖃᐅᓱᐃᑦᑐᒥᒃ ᐊᒻᒪᓗ ᐊᐅᓱᐃᑦᑐᒥᒃ.
ᑲᓇᑕᐅᑉ ᒐᕙᒪᒃᑯᖏᑦ ᐱᓂᐊᕐᓂᕋᖅᓯᒪᔭᖏᑦ ᓄᑖᒧᑦ ᓄᓇᒧᑦ ᐊᒥᓱᐊᓘᓚᐅᖅᐳᑦ: ᐆᒪᔪᐃᑦ, ᐱᓕᕆᔾᔪᑎᒃᓴᑦ, ᐊᒻᒪ ᓄᑖᑦ ᐱᖁᑎᑦ, ᑕᒪᕐᒥᑦᑎᐊᖅ ᐅᑕᖅᑭᔪᑦ ᐃᓚᒌᓄᑦ ᑎᑭᒻᒪᑕ. ᐃᓚᒌᑦ ᐅᖃᐅᔾᔭᐅᓚᐅᕆᕗᑦ ᖁᕕᐊᓱᙱᒃᑯᑎᒃ, ᐊᖏᕐᕋᐅᔪᓐᓇᕐᓂᕋᖅᑕᐅᓪᓗᑎᒃ ᐊᕐᕌᒎᒃ ᒪᕐᕉᒃ ᐊᓂᒍᖅᐸᑕ.
ᓯᕗᓪᓕᖅᐹᑦ ᐊᕐᕌᒍᐃᑦ ᖁᑦᑎᑦᑐᒥ ᐊᒃᓱᕈᕐᓇᖅᑐᒻᒪᕆᐅᓚᐅᖅᐳᑦ ᐃᓚᒌᓄᑦ. ᒐᕙᒪᒃᑯᑦ ᐱᓂᐊᕐᓂᕋᖅᓯᒪᒐᓗᐊᖅᑎᓪᓗᒋᑦ, ᐃᑲᔫᑎᒃᓴᑦ ᐊᒥᒐᓚᐅᖅᐳᑦ, ᐊᒻᒪ ᐃᓄᐃᑦ ᑳᓕᕋᓗᐊᖅᑎᓪᓗᒋᑦ, ᐃᓚᒌᑦ ᐊᖏᕐᕋᐅᔪᓐᓇᖅᑎᑕᐅᓚᐅᙱᓚᑦ.
ᐃᓕᓴᕆᓪᓗᒍ ᑕᒪᓐᓇ ᐊᒃᓱᕉᑕᐅᓚᐅᖅᑐᖅ ᐊᒻᒪᓗ ᐃᖅᑲᐅᒪᔪᒪᓪᓗᒍ, ᓄᓇᕗᑦ ᑐᙵᕕᒃᑯᑦ ᑎᓕᓯᓚᐅᖅᑐᑦ ᒪᕐᕉᓐᓂᒃ ᓇᓗᓇᐃᒃᑯᑕᐅᔫᓐᓂᒃ ᐄᐳᕈᓪ 2008-ᖑᑎᓪᓗᒍ. ᐊᕐᕌᒎᒃ ᒪᕐᕉᒃ ᓇᑉᐸᕐᓗ ᐊᓂᒍᖅᑎᓪᓗᒋᑦ, ᐸᕐᓇᒃᑕᐅᓯᒪᒻᒪᕆᓚᐅᖅᑎᓪᓗᒍ, ᑖᒃᑯᐊ ᓇᓗᓇᐃᒃᑯᑕᐃᑦ ᒪᑐᐃᖅᑕᐅᓚᐅᖅᑐᑦ ᓯᑎᐱᕆ 8 ᐊᒻᒪᓗ 10, 2010-ᒥ.
ᓄᓇᕗᑦ ᑐᙵᕕᒃᑯᑦ ᑎᓕᓯᓚᐅᖅᑐᑦ ᒪᕐᕉᓐᓂᒃ ᓄᓇᕗᒻᒥ ᓴᓇᙳᐊᖅᑎᒻᒪᕆᐅᔫᓐᓂᒃ ᓴᓇᙳᐊᖅᑎᐅᔫᓐᓂᒃ, ᓯᒥᐅᓂ ᐊᒪᕈᐊᓕᒃ ᖃᐅᓱᐃᑦᑐᕐᒥᐅᑕᖅ, ᐊᒻᒪᓗ ᓘᑎ ᐱᔨᒪᓂ ᐊᐅᓱᐃᑦᑐᒥᐅᖅ. ᐊᑐᖅᑐᑎᒃ ᓄᓇᓕᓐᓂ ᐅᔭᖅᑲᓂᒃ, ᐊᒪᕈᐊᓕᒃ ᓴᓇᙳᐊᒐᓕᐅᓚᐅᖅᑐᖅ ᐊᖑᑎᓐᖑᐊᒥᒃ ᖃᐅᓱᐃᑦᑐᒥ. ᐱᔾᔭᒥᓂ ᓴᓇᙳᐊᒐᓕᐅᓚᐅᖅᑐᖅ ᐊᕐᓇᒥᒃ ᓱᕈᓯᕐᒥᓪᓗ ᐊᐅᓱᐃᑦᑐᒥ. ᓇᓗᓇᐃᒃᑯᑕᐃᑦ ᑕᑯᒃᓴᐅᑎᑦᑎᔪᑦ ᖃᓄᖅ ᐃᓚᒌᑦ ᐊᕕᑎᑕᐅᓚᐅᕐᒪᖔᑕ ᓄᑦᑎᖅᑕᐅᑎᓪᓗᒋᑦ. ᐊᑐᓂ ᓴᓇᙳᐊᖅᑏᑦ ᑲᔪᖏᖅᓴᐃᓚᐅᖅᑐᑦ ᒪᒃᑯᓐᓂᖅᓴᓂᒃ ᓴᓇᙳᐊᖅᑎᓂᒃ ᓴᓇᙳᐊᖅᑎᓪᓗᒋᑦ.
ᑖᒃᑯᐊ ᓇᓗᓇᐃᒃᑯᑕᐃᑦ ᑐᕌᖓᑎᑕᐅᕗᑦ ᐃᓚᒌᓄᑦ ᓄᑦᑎᖅᑕᐅᓚᐅᖅᓯᒪᔪᓄᑦ, ᖁᕕᐊᓲᑕᐅᓪᓗᑎᒃ ᓴᐱᓕᕈᓐᓇᖏᓐᓂᖏᓐᓄᑦ ᐊᒻᒪᓗ ᐱᒻᒪᕆᐅᓂᖏᓐᓄᑦ ᐃᓚᒌᑦ ᐊᒻᒪᓗ ᓄᓇᖅᑲᑎᒌᑦ ᐊᓂᒍᐃᔪᓐᓇᓚᐅᕐᒪᑕ ᐊᒃᓱᕉᓴᒃᑐᐊᓗᖕᓂᒃ ᐃᓚᒌᑦ ᐊᒃᓱᕈᕐᓇᖅᑐᒃᑰᖃᑦᑕᓚᐅᖅᓯᒪᓂᖏᓐᓂᒃ ᖁᑦᑎᒃᑐᒥ ᓅᑕᐅᑎᓪᓗᒋᑦ 1950-ᖏᓐᓂ.
ᓴᖅᑭᑕᐅᓂᖏᑦ ᓇᓗᓇᐃᒃᑯᑕᐃᑦ ᐱᒻᒪᕆᐅᓚᐅᖅᐳᖅ ᐃᑲᔪᕐᓂᕐᒧᑦ ᐃᓄᖕᓂᑦ ᒪᒥᓴᕐᓂᕐᒧᑦ ᑕᒪᒃᑯᓇᙵᑦ ᐱᐅᙱᑦᑐᐊᓗᖕᓂᑦ ᖃᓄᐃᓐᓂᐅᓚᐅᖅᑐᓂᑦ. ᑕᖅᑭᖅ ᓄᓇᕗᑦ ᑐᙵᕕᒃᑯᑦ ᓴᖅᑭᑕᐅᓚᐅᖅᑳᖅᑎᓐᓇᒍ, ᐃᓄᓕᕆᔨᑐᖃᒃᑯᑦ ᒥᓂᔅᑕᖓᑦ ᔮᓐ ᑕᓐᑲᓐ ᒪᒥᐊᓪᓚᕆᓚᐅᖅᐳᖅ ᑭᒡᒐᖅᑐᐃᓪᓗᓂ ᒐᕙᒪᑐᖃᒃᑯᓐᓂᑦ ᐃᓄᖕᓂᑦ ᓅᑎᑦᑎᓚᐅᕐᓂᖏᓐᓄᑦ. ᑲᓇᑕᐅᑉ ᐊᖓᔪᖅᑳᕐᔪᐊᖓ ᓯᑏᕙᓐ ᕼᐋᐸ ᒪᒥᐊᓚᐅᕆᕗᖅ ᐃᓅᓚᐅᖅᑐᓄᑦ ᓅᑕᐅᓚᐅᖅᑐᓄᑦ ᖃᐅᓱᐃᑦᑐᒧᑦ ᓂᐅᕐᕈᓯᒪᑎᓪᓗᒍ.
ᐅᓄᖅᑐᑦ ᐊᖓᔪᖅᑲᐅᑎᑦ ᐃᓚᐅᓚᐅᖅᐳᑦ ᓄᓇᕗᑦ ᑐᙵᕕᒃᑯᑦ ᑎᒥᖓᓐᓄᑦ ᐊᒻᒪ ᖃᐅᓱᐃᑦᑐᕐᒥᐅᓄᑦ ᐊᒻᒪ ᐊᐅᓱᐃᑦᑐᕐᒥᐅᓄᑦ ᓄᓇᖅᑲᑎᒌᓄᑦ ᐱᓕᕆᑎᓪᓗᒋᑦ, ᐃᓚᒋᔭᐅᓪᓗᓂ ᒥᓂᔅᑕ ᑕᓐᑲᓐ ᒪᒥᐊᒃᑲᓐᓂᓚᐅᖅᑐᖅ ᐊᑐᓂ ᓄᓇᓕᖕᓂ ᑭᒡᒐᖅᑐᖅᖢᓂᒋᑦ ᑲᓇᑕᐅᑉ ᒐᕙᒪᒃᑯᖏᑦ ᐃᓚᒌᑦ ᓄᒃᑎᖅᑕᐅᓚᐅᕐᓂᖏᓐᓄᑦ. ᒪᒥᓴᕐᓂᖅᑕᖃᓚᐅᖅᐳᖅ ᑕᒪᐃᓐᓂᒃ ᓄᓇᓖᖕᓂᒃ ᓴᖅᑭᑕᐅᓚᐅᖅᑎᓪᓗᒍ.
ᐋᓐᓂᕈᑎᖏᑦ ᐃᑎᔪᐊᓘᕗᑦ ᐊᒻᒪ ᐊᕐᕌᒍᒐᓴᖕᓄᑦ ᓄᑕᐅᙱᑎᒋᓪᓗᑎᒃ, ᑭᓯᐊᓂ ᓴᖅᑭᑕᐅᓂᖏᑦ ᓇᓗᓇᐃᒃᑯᑕᑦ, ᒪᒥᐊᓐᓂᕐᓗ ᑲᓇᑕᐅᑉ ᒐᕙᒪᒃᑯᖏᓐᓂᑦ, ᐱᕕᖃᖅᑎᑦᑎᓂᐊᖅᐳᖅ ᐃᓄᖕᓂᑦ ᐃᖅᑲᐅᒪᔪᓐᓇᕐᓂᕐᒥᒃ, ᕿᒃᓵᖕᓂᕐᒥᒃ ᒪᒥᓴᕐᓂᕐᒥᒡᓗ.