ᒪᒥᐊᓐᓂᖅ ᐃᓄᐃᑦ ᖁᑦᑎᑦᑐᒧᑦ ᓄᑦᑎᖅᑕᐅᓚᐅᖅᓯᒪᓂᖏᓐᓄᑦ
ᐅᖃᐅᓯᒃᓴᐃᑦ ᒥᓂᔅᑕ ᔮᓐ ᑕᓐᑲᓐᒧᑦ, PC, ᒪᓕᒐᓕᐅᖅᑎᕐᔪᐊᖅ, ᒥᓂᔅᑕ ᐃᓄᓕᕆᔨᑐᖃᒃᑯᓐᓄᑦ ᐊᒻᒪᓗ ᒐᕙᒪᑐᖃᒃᑯᓐᓄᑦ ᐅᖃᖅᑎᒋᔭᐅᔪᖅ ᐊᓪᓚᖓᔪᓄᑦ ᐊᒻᒪᓗ ᐊᓪᓚᓄᑦ ᐃᓕᑕᕆᔭᐅᓯᒪᓐᖏᑦᑐᓄᑦ ᒪᒥᐊᓐᓂᐅᓚᐅᖅᑐᖅ ᐃᓄᐃᑦ ᖁᑦᑎᑦᑐᒧᑦ ᓄᑦᑎᖅᑕᐅᓚᐅᖅᓯᒪᓂᖏᓐᓄᑦ>< ᐋᒡᒌᓯ 18, 2010 ᐃᓄᒃᔪᐊᖅ, ᓄᓇᕕᒻᒥ ᐃᓐᓇᐃᑦ, ᐃᓄᐃᑦ ᓯᕗᓕᖅᑎᖏᑦ, ᐊᕐᓇᐃᑦ ᐊᖑᑏᓪᓗ, ᐊᒻᒪᓗ ᐱᓗᐊᖅᑐᒥᒃ ᑕᐃᒃᑯᐊ ᐊᑦᑐᖅᑕᐅᓂᖃᓚᐅᖅᑐᑦ ᓄᑦᑎᖅᑕᐅᓚᐅᖅᑐᓄᑦ; ᖁᔭᓐᓇᒦᒃ ᐅᕙᓃᒍᓐᓇᕋᔅᓯ. ᓯᕗᓪᓕᖅᐹᑦᑎᐊᒥᒃ ᐅᑭᐅᖅᑕᖅᑐᒨᕆᐅᕋᒪ ᒥᓂᔅᑕᐅᓪᓗᖓ ᐃᓄᓕᕆᔨᑐᖃᒃᑯᓐᓄᑦ, ᐊᒻᒪᓗ ᐅᐱᒍᓱᑦᑎᐊᖅᐳᖓ ᑕᕝᕙᓃᖃᑕᐅᔪᓐᓇᕋᒪ ᑕᒪᑐᒧᖓ ᐃᖅᑲᐅᒪᓇᕐᓂᐊᖅᑐᒧᑦ. ᐃᖅᑲᐅᒪᔪᒃᓴᐅᕗᓯ ᑕᐃᓐᓇ ᐃᓇᖏᓚᐅᖅᓯᒪᔭᕋ ᒥᓂᔅᑕ ᓯᑐᕌᓪ ᓯᕗᓪᓕᖅᐹᑦᑎᐊᒥ ᓄᓇᕕᒻᒨᕆᐅᓚᐅᖅᓯᒪᒻᒥᒻᒪᑦ ᑲᑎᒪᔩᑦ ᑲᑎᒪᑎᓪᓗᒋᑦ ᑰᔾᔪᐊᕐᒥ ᐊᕐᕌᒍᐃᑦ ᐱᖓᓱᑦ ᐊᓂᒍᖅᓯᒪᓕᖅᑐᑦ. ᖃᐅᔨᒪᔭᕋ ᐅᑭᐅᖅᑕᖅᑐᖅ ᐊᒻᒪᓗ ᓂᕆᐅᑦᑎᐊᖅᐳᖓ ᐅᑭᐅᖅᑕᖅᑐᒨᖃᑦᑕᓛᕆᐊᔅᓴᖅ ᐊᑯᓚᐃᑦᑐᒃᑯᑦ, ᐊᒻᒪᓗ ᐱᓕᕆᖃᑎᖃᑦᑎᐊᓛᕆᐊᔅᓴᖅ ᐃᓄᐃᑦ ᓄᓇᓕᖏᓐᓂᒃ ᐊᒻᒪᓗ ᑲᑐᔾᔨᖃᑎᒌᖏᓐᓂᒃ ᓂᕈᐊᖅᑕᐅᓯᒪᓂᓐᓂ. ᐊᕐᕌᒍᑦ 50 ᐅᖓᑖᓃᓕᖅᑐᑦ ᐃᓄᐃᑦ ᓄᑦᑎᖅᑕᐅᓚᐅᖅᑎᓪᓗᒋᑦ ᑕᕝᕙᙵᑦ ᓄᓇᓕᒻᒥᑦ ᖁᑦᑎᑦᑐᒧᑦ. ᑕᕝᕙᓃᑉᐳᖓ ᑭᒡᒐᖅᑐᖅᖢᒍ ᑲᓇᑕᐅᑉ ᐊᖓᔪᖅᑳᕐᔪᐊᖓ, ᑲᓇᑕᐅᑉ ᒐᕙᒪᒃᑯᖏᑦ, ᑲᓇᑕᒥᐅᓕᒫᓪᓗ ᒪᒥᐊᒍᒪᓪᓗᖓ ᑕᒪᒃᑯᓄᖓ ᖃᓄᐃᓐᓂᐅᓚᐅᖅᑐᓄᑦ. ᐅᓪᓗᒥ ᓇᓪᓕᐅᓂᖅᓯᐅᕐᓂᐅᔪᖅ ᐱᒻᒪᕆᐅᕗᖅ ᒪᒥᓴᕐᓂᕐᒧᑦ ᓴᐃᒻᒪᖃᑎᒌᓐᓂᕐᒧᓪᓗ. ᒪᒥᐊᓐᓂᕆᓂᐊᖅᑕᕋ ᐊᖏᕐᓂᐊᖅᐸᓯᐅᒃ ᑲᓇᑕᒥᐅᓕᒫᑦ ᑭᒡᒐᖅᑐᕐᓗᒋᑦ. ᓂᕆᐅᒃᐳᖓ ᑕᒪᓐᓇ ᑐᙵᕕᒋᔭᐅᓂᐊᕐᒪᑦ ᓴᙱᒃᑎᒋᐊᕈᑕᐅᓗᓂ ᐱᓕᕆᖃᑎᒌᓐᓂᕐᒧᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ. ᑲᓇᑕᐅᑉ ᒐᕙᒪᒃᑯᖏᑦ ᑲᓇᑕᒥᐅᓪᓗ ᑭᒡᒐᖅᑐᕐᓗᒋᑦ, ᒪᒥᐊᓪᓚᕆᒍᒪᕗᒍᑦ ᐃᓄᖕᓄᑦ ᐃᓚᒌᑦ ᓄᒃᑎᖅᑕᐅᓚᐅᕐᓂᖏᓐᓄᑦ ᐃᓄᒃᔪᐊᕐᒥᑦ ᒥᑦᑎᒪᑕᓕᖕᒥᓪᓗ ᐊᐅᓱᐃᑦᑐᒧᑦ ᖃᐅᓱᐃᑦᑐᒧᓪᓗ 1950-ᖏᓐᓂ. ᓇᓗᓇᐃᖅᓯᔪᒪᕗᒍᑦ ᕿᒃᓵᖕᓂᕆᔭᑦᑎᓐᓂᒃ ᐊᒃᓱᕉᓴᖕᓂᕆᓚᐅᖅᑕᑦᑎᓐᓄᑦ ᓄᒃᑎᖅᑕᐅᓚᐅᕐᓂᖏᓐᓄᑦ. ᐃᓚᒌᑦ ᐊᕕᒃᑎᑕᐅᓚᐅᖅᐳᑦ ᓄᓇᒥᖕᓂᑦ ᐃᓚᒥᖕᓂᓪᓗ 1,000 ᑭᓛᒥᑐᔅ ᐅᖓᑖᓄᑦ. ᐃᒡᓗᖃᖅᑎᑕᐅᑦᑎᐊᓚᐅᙱᓚᑦ ᐱᖁᑎᖃᖅᑎᑕᐅᙱᖦᖢᑎᒡᓗ. ᑐᓴᐅᒪᑎᑕᐅᑦᑎᐊᓚᐅᙱᑦᑐᑦ ᖃᓄᑎᒋ ᐅᖓᓯᒃᑎᒋᓂᐊᕐᒪᖔᑦ ᐊᒻᒪ ᖃᓄᖅ ᐊᔾᔨᒋᙱᑎᒋᓇᔭᕐᒪᖔᒍ ᐃᓄᒃᔪᐊᒥᑦ ᐊᖏᕐᕋᖅᑖᕆᓂᐊᓕᖅᑕᖏᑦ, ᖃᐅᔨᒪᓚᐅᙱᖦᖢᑎᒡᓗ ᒪᕐᕉᖕᓄᑦ ᓄᓇᓕᙳᖅᑎᑕᐅᓂᐊᕐᓂᖏᓐᓂ ᖁᑦᑎᒃᑐᒧᐊᕈᑎᒃ. ᓱᓕᒃᑲᓐᓂᖅ, ᒐᕙᒪᒃᑯᑦ ᑲᔪᓯᑎᑦᑎᓚᐅᙱᓚᑦ ᐱᓂᐊᕐᓂᕋᓚᐅᖅᑕᒥᓂᒃ ᐅᑎᖅᑎᑦᑎᓂᐊᕐᓂᕋᖅᖢᑎᒃ ᑭᓇᑐᐃᓐᓇᕐᒥᒃ ᖁᑦᑎᒃᑐᒦᒍᒪᓚᐅᙱᑦᑐᒥᒃ ᐊᖏᕐᕋᑐᖃᕐᒥᓄᑦ. ᑲᓇᑕᐅᑉ ᒐᕙᒪᒃᑯᖏᑦ ᐅᒡᒍᐊᕈᑎᖃᒻᒪᕆᒃᐳᑦ ᑕᒻᒪᕐᓂᕆᓚᐅᖅᑕᖏᓐᓂᒃ ᐊᒻᒪᓗ ᓱᕋᐃᓯᒪᓂᕆᓚᐅᖅᑕᖏᓐᓂᒃ ᑖᖅᑐᐊᓗᖕᒥ ᑭᖑᓂᑦᑎᓐᓂ ᐊᒻᒪᓗ ᒪᒥᐊᑉᐳᖓ ᖁᑦᑎᑦᑐᒧᑦ ᓄᒃᑎᖅᑕᐅᓚᐅᕐᓂᖏᓐᓄᑦ. ᖁᔭᓕᔪᒪᕙᕗᑦ ᓄᒃᑎᖅᑕᐅᓚᐅᖅᑐᑦ ᓴᐱᓕᕈᓐᓇᓚᐅᕐᓂᖏᓐᓄᑦ ᐊᒻᒪᓗ ᑲᑉᐱᐊᓱᙱᓐᓂᖏᓐᓄᑦ. ᐊᒃᓱᕈᕋᓗᐊᖅᑎᓪᓗᒋᑦ ᐊᒃᓱᕈᕐᓇᕋᓗᐊᖅᑎᓪᓗᒋᑦ, ᓄᒃᑎᖅᑕᐅᓚᐅᖅᑐᑦ ᑭᖑᕚᖏᓪᓗ ᑲᔪᓯᓂᖃᑦᑎᐊᓚᐅᖅᑐᑦ ᐱᕈᖅᓴᐃᓪᓗᑎᒃ ᐆᒻᒪᕆᒃᑐᓂᒃ ᓄᓇᓕᖕᓂ ᐊᐅᓱᐃᑦᑐᒥ ᖃᐅᓱᐃᑦᑐᒥᓗ. ᑲᓇᑕᐅᑉ ᒐᕙᒪᒃᑯᖏᑦ ᐃᓕᓴᖅᓯᕗᑦ ᑖᒃᑯᐊ ᓄᓇᓖᑦ ᐃᑲᔪᖅᓯᒪᓂᖏᓐᓂᒃ ᓴᙱᔪᒥᒃ ᑲᓇᑕᒥᐅᑕᓂᒃ ᓴᖅᑭᔮᓕᖅᑎᑦᑎᓪᓗᑎᒃ ᖁᑦᑎᒃᑐᒥ. ᓄᒃᑎᖅᑕᐅᓂᖏᑦ ᐃᓄᐃᑦ ᖃᑕᙳᑎᒌᑦ ᖁᑦᑎᒃᑐᒧᑦ ᖁᕕᐊᓇᙱᑦᑐᒻᒪᕆᐅᕗᖅ ᑲᓇᑕᐅᑉ ᐱᐅᓯᕆᓯᒪᔭᖏᓐᓂᒃ ᐳᐃᒍᕆᐊᖃᙱᑕᕗᑦ, ᑭᓯᐊᓂ ᐃᓕᓴᕆᔭᕆᐊᖃᖅᑕᕗᑦ, ᐃᓕᕝᕕᒋᔭᕆᐊᖃᖅᑕᕗᑦ ᐃᓕᓐᓂᐊᖅᑎᓪᓗᒋᓪᓗ ᕿᑐᕐᖓᕗᑦ. ᐃᓕᓴᖅᓯᓂᖅ ᑲᑐᔾᔨᓪᓗᑕ ᖃᓄᐃᓕᐅᖃᑦᑕᖅᓯᒪᓂᑦᑎᓐᓂᒃ ᓯᕗᒻᒧᐊᒍᓐᓇᕈᑎᒋᕙᕗᑦ ᑲᑐᔾᔨᖃᑎᒌᒡᓗᑕ ᓴᐃᒻᒪᖃᑎᒌᖕᓂᒃᑯᓪᓗ. ᑲᓇᑕᐅᑉ ᒐᕙᒪᒃᑯᖏᑦ ᐃᓄᐃᓪᓗ ᐊᒥᓱᓂᒃ ᐱᕚᓪᓕᕈᑎᖃᖅᓯᒪᕗᑦ ᐊᑕᐅᑦᑎᒃᑯᑦ, ᑲᓇᑕᒥᐅᓕᒫᓪᓗ ᐃᑲᔪᖅᑕᐅᓯᒪᓪᓗᑎᒃ ᐃᑲᔪᕐᓂᖏᓐᓄᑦ ᐃᓄᐃᑦ ᐃᓕᖅᑯᓯᑦᑎᓐᓄᑦ ᐱᐅᓯᑐᖃᑦᑎᓐᓄᓪᓗ. ᑲᔪᓰᓐᓇᕆᐊᖃᖅᐳᒍᑦ ᓴᙱᒃᑎᒋᐊᕐᓗᒍ ᐊᒃᑐᐊᓂᕆᔭᕗᑦ ᑐᑭᓯᐅᒪᑦᑎᐊᓕᕐᓗᑕᓗ ᐃᒃᐱᒍᓱᑦᑎᐊᕐᓗᑕᓗ. ᑲᑐᔾᔨᓗᑕ ᓴᓇᔭᕆᐊᖃᖅᐳᒍᑦ ᓴᙱᓂᖅᓴᒥᒃ, ᖃᓄᐃᙱᑦᑎᐊᕐᓂᖅᓴᒥᒃ ᐆᒻᒪᕆᖕᓂᖅᓴᒥᒡᓗ ᐃᓄᐃᑦ ᓄᓇᖓᓂᒃ ᐊᒻᒪᓗ, ᑭᖑᓂᐊᒍᑦ, ᓴᙱᓂᖅᓴᒥᒃ, ᖃᓄᐃᙱᑦᑎᐊᕐᓂᖅᓴᒥᒃ ᐆᒻᒪᕆᖕᓂᖅᓴᒥᒡᓗ ᑲᓇᑕᒥ. ᑲᓇᑕᐅᑉ ᒐᕙᒪᒃᑯᖏᑦ ᓂᕆᐅᒃᐳᑦ ᑖᓐᓇ ᒪᒥᐊᓐᓂᐅᔪᖅ ᐃᑲᔪᕐᓂᐊᕐᓂᖓᓂᒃ ᒪᒥᑎᑦᑎᓂᕐᒥᒃ ᐋᓐᓂᕈᑕᐅᓚᐅᖅᑐᓂᒃ ᐱᒋᐊᓚᐅᖅᓯᒪᔪᓄᑦ 60 ᐊᕐᕌᒍᐃᑦ ᐊᓂᒍᖅᓯᒪᓕᖅᑐᑦ ᐊᒻᒪᓗ ᒪᒃᐱᖅᓯᓗᓂ ᑕᒪᑐᒥᖓ ᖁᕕᐊᓇᙱᑦᑐᒥᒃ ᐊᑐᖅᑕᐅᓚᐅᖅᑐᒥᒃ ᑲᓇᑕᐅᑉ ᐊᑐᖅᓯᒪᔭᖏᓐᓂᒃ. ᓴᙱᒃᑎᒋᐊᖅᑎᑦᑎᓂᐊᖅᐳᖅ ᑐᙵᕕᒋᔭᐅᔪᒥᒃ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐃᓄᐃᓪᓗ ᓴᓇᔪᓐᓇᖅᑕᖓᓂᒃ ᐃᑲᔪᕐᓗᓂᓗ ᐅᑭᐅᖅᑕᖅᑐᖅ ᓴᙱᔫᑎᓪᓗᒍ ᐃᓱᒪᖅᓱᕐᓗᓂᓗ.