ᐱᓕᕆᐊᖑᓯᒪᔪᑦ
1920 ᐊᕐᕌᒍᐃᑦ ᐱᒋᐊᓕᓵᖅᑎᓪᓗᒋᑦ, ᑲᓇᑕ ᐸᓖᓯᖃᕐᕕᓕᐅᓚᐅᖅᓯᒪᕗᖅ Craig Harbour-ᒥ, 55 ᑭᓛᒥᑕᓂᒃ ᐅᖓᓯᒃᑎᒋᔪᒥ ᐊᐅᓱᐃᑦᑑᑉ ᐱᖓᖕᓇᖓᓂ. 1950 ᑎᑭᖦᖢᒍ, ᐃᓱᒫᓘᑎᖃᖅᖢᑎᒃ ᐅᑭᐅᖅᑕᖅᑐᖅ ᓇᖕᒥᓂᕆᔭᐅᓂᐊᕐᓂᖓᓂᒃ ᐅᓇᑕᕕᒡᔪᐊᕐᓇᐅᑎᓪᓗᒍ, ᑲᓇᑕᒥᐅᑦ ᐱᓕᕆᔨᖏᑦ ᓇᓂᓯᔪᒪᓕᓚᐅᖅᓯᒪᕗᑦ ᖃᓄᖅ ᓄᓇᖃᐃᓐᓇᓕᕈᓐᓇᕐᒪᖔᑕ ᑲᓇᖕᓇᖅᐸᓯᐊᓂ ᐅᑭᐅᖅᑕᖅᑑᑉ ᕿᑭᖅᑕᖏᓐᓂ. ᖃᐅᔨᒪᓪᓗᑎᒃ ᐃᓄᐃᑦ ᐅᖓᕙᐅᑉ ᓄᕗᐊᓂ ᑯᐸᐃᒃ ᐅᐊᖕᓇᖅᐸᓯᐊᓂ ᐊᔪᕐᓇᖅᑐᖅᓯᐅᖅᐸᓪᓕᐊᑐᐃᓐᓇᓕᕐᓂᖏᓐᓂᒃ ᐊᓐᓇᐅᒪᓇᓱᒋᐊᒃᓴᖅ ᐊᖑᓇᓱᒃᑎᐅᓪᓗᑎᒃ, ᑲᓇᑕᐅᑉ ᒐᕙᒪᖓᑕ ᐋᖅᑭᒍᑎᒃᓴᖓ ᐊᔪᕐᓇᙱᑦᑐᑯᓘᓚᐅᖅᐳᖅ: ᐲᖅᓯᓪᓗᑎᒃ ᐱᖓᓱᓂᒃ ᐃᓚᒌᓂᒃ ᐃᓄᒃᔪᐊᑉ ᓯᓚᑎᑦᑎᐊᖓᓂ ᐊᐅᓱᐃᑦᑑᑉ ᕿᑭᖅᑖᓗᐊᓄᐊᖅᑕᐅᓪᓗᑎᒃ, ᓄᓇ ᐊᑕᐅᓯᖅ ᐃᑦᑕᕐᓂᓴᓕᕆᔨᐅᑉ ᑕᐃᔭᖓ "ᐊᒃᓱᕈᕐᓇᕐᓂᖅᐹᖑᓪᓗᓂ ᓄᓇ ᐃᓄᖕᓄᑦ ᓇᔪᖅᑕᐅᖏᓐᓇᓚᐅᖅᓯᒪᔪᓂ".[1] ᒐᕙᒪᒃᑯᑦ ᓱᓕᓂᕋᓚᐅᖅᓯᒪᕗᑦ ᓄᓇᖓ ᐆᒪᔪᖃᑦᑎᐊᕐᓂᖓᓂᒃ ᐊᒻᒪ ᖃᖓᑦᑕᐅᑎᑖᖅᑎᑦᑎᓪᓗᑎᒃ ᐊᕐᕌᒍ ᐊᑕᐅᓯᖅ ᐊᓂᒍᖅᐸᑦ ᐃᓄᐃᑦ ᖁᕕᐊᓱᙱᒃᑯᑎᒃ. ᐊᑕᐅᓯᖅ ᑎᑎᕋᖅᑎ ᑎᑎᕋᓚᐅᖅᐳᖅ: ᐃᓄᐃᑦ ᖃᐅᔨᓵᓕᓚᐅᖅᐳᑦ ᐃᒪᕐᒥᐅᑕᐃᑦ ᐱᑕᖃᑦᑎᐊᙱᓐᓂᖏᓐᓂᒃ, ᑐᒃᑐᐃᑦ, ᑎᕆᒐᓂᐊᑦ ᐊᒻᒪ ᐃᒪᑦᑎᐊᕙᐃᑦ. ᐊᓐᓄᕌᖏᑦ ᐅᖅᑰᙱᓗᐊᓚᐅᖅᐳᑦ, ᖃᒧᑎᖏᓪᓗ ᐊᓄᕌᖏᓪᓗ ᐱᐅᙱᖦᖢᑎᒃ ᐅᔭᖅᑲᓄᑦ ᓄᓇᒧᑦ. ᒪᓪᓕᓗᐊᕐᓂᖓᓄᑦ ᖃᔭᒃᑯᑦ ᐊᖑᓇᓱᒋᐊᒃᓴᖅ ᐊᔪᕐᓇᕈᑕᐅᓚᐅᖅᐳᖅ ᐊᒻᒪ ᐸᓂᖅᑐᒧᑦ ᐊᓄᕆᒧᑦ ᕿᒻᒥᖏᑕ ᐳᕙᖏᑦ ᐊᐅᓈᓕᖅᐸᒃᖢᑎᒃ. ᐊᐳᑎᖃᑦᑎᐊᖅᖢᓂ ᐃᒡᓗᕕᒐᕐᓄᑦ ᑎᑭᓐᓇᓵᓚᐅᖅᐳᖅ, ᑎᑭᑉᐸᓪᓕᐊᔪᑦ ᑐᐱᖅᓯᒪᑦᑎᐊᙱᖦᖢᑎᒃ ᐅᑭᐅᖑᕋᓱᖕᓂᖓᓂ. ᐅᖅᓱᖃᑦᑎᐊᓚᐅᙱᓚᖅ ᐃᑯᐊᓪᓚᒃᑐᓄᑦ. ᐊᓂᖅᓵᖅᑐᒐᖅ 30 degrees-ᑲᓴᑦᑎᐊᒥᒃ ᓂᒡᓚᓱᖕᓂᖅᓴᐅᓚᐅᖅᐳᖅ ᐊᖏᕐᕋᕆᔭᑦᑎᓐᓂ, ᐊᓄᕆᒐᔪᖕᓂᖓᓄᓪᓗ 50 degrees-ᓂᒃ ᐱᐅᙱᓐᓂᖅᓴᐅᖅᑰᔨᓕᖅᖢᓂ... ᐊᐅᓱᐃᑦᑑᑉ ᕿᑭᖅᑖᓗᐊ ᐅᒥᖕᒪᖕᓂᒃ ᐅᓄᙱᑦᑐᑯᓗᖕᓂᒃ ᐃᑲᔪᖅᑐᐃᕙᓚᐅᖅᐳᑦ, ᑭᓯᐊᓂ ᐸᓖᓯᒃᑯᑦ, 40 ᒪᐃᓕᓂᒃ ᐅᖓᓯᒃᑎᒋᔪᒥ ᐃᓄᐃᑦ ᑕᖕᒫᕐᕕᒋᔭᖏᓐᓂᒃ, ᑐᖁᑕᐅᔭᕆᐊᖃᓚᐅᙱᓚᑦ. ᐱᕐᓕᕋᖅᑐᑦ ᐃᓄᐃᑦ ᓂᕆᖃᑦᑕᓚᐅᖅᑐᑦ ᑎᖕᒥᐊᑉ ᓱᓗᖏᓐᓂᒃ, ᖃᔪᓕᐅᖅᖢᑎᒃ ᑲᒥᐊᓗᖕᓂᒃ.[2] ᒐᕙᒪᒃᑯᑦ ᐅᑎᓚᐅᙱᑦᑐᑦ ᐊᐃᒃᖠᕆᐊᖅᑐᖅᖢᑎᒃ ᑖᒃᑯᓂᖓ ᐃᓚᒌᓂᒃ ᐊᕐᕌᒍ ᐊᑕᐅᓯᖅ ᐊᓂᒍᖅᑎᓪᓗᒍ ᑭᓯᐊᓂᓗ, ᐃᓚᖏᑦ ᐅᖃᖅᐸᒃᖢᑎᒃ ᑲᒪᓇᖅᑐᒥᒃ, ᐊᓐᓇᐅᒪᓚᐅᖅᐳᑦ. ᑖᓐᓇ ᓄᒃᑎᖅᑕᐅᓂᖓ ᓱᓕ ᐊᑲᐅᙱᓕᐅᕈᑕᐅᓂᖅᐹᖑᖃᑕᐅᕗᖅ. ᕈᐃᔪᓪ ᑲᒥᓴᓐᑯᑦ ᓄᓇᖃᖅᑳᖅᑐᒥᓂᕐᓄᑦ ᑕᐃᓯᓚᐅᖅᑐᑦ ᓄᒃᑎᖅᑕᐅᓂᖓ "ᐱᐅᙱᓛᖑᖃᑕᐅᔪᖅ ᐃᓄᐃᑦ ᐱᔪᓐᓇᐅᑎᖏᓐᓂᒃ ᓱᕋᐃᓂᕐᒥᒃ ᑕᐃᒪᙵᓂ ᑲᓇᑕᒥ." ᓯᕗᓕᐅᖅᑏᑦ ᑮᓇᐅᔭᓂᒃ ᐅᑎᖅᑎᑦᑎᓚᐅᕋᓗᐊᖅᑎᓪᓗᒋᑦ 10 ᒥᓕᐊᓂᒃ ᑲᓇᑕᐅᑉ ᑮᓇᐅᔭᖏᓐᓂᒃ ᕿᒪᒃᑕᐅᓚᐅᖅᑐᓄᑦ ᐃᓚᖏᓐᓄᓪᓗ, ᓱᓕ ᒪᒥᐊᕝᕕᐅᔭᕆᐊᖃᖅᐳᑦ. ᓄᓇᕗᑦ ᑐᙵᕕᒃᑯᑦ ᑎᓕᓯᔪᒪᕗᑦ ᓇᑉᐸᐃᔪᒪᓪᓗᑎᒡᓗ ᒪᕐᕉᖕᓂᒃ ᓇᓗᓇᐃᒃᑯᑕᐅᔫᖕᓂᒃ - ᐊᐅᓱᐃᑦᑐᒥ ᐊᐃᑉᐸᖓᓗ ᖃᐅᓱᐃᑦᑐᒥ - ᐃᖅᑲᐅᒪᔾᔪᑕᐅᓂᐊᖅᑐᒥᒃ ᐃᓄᐃᑦ ᑐᓐᓂᖅᑯᑎᒋᓚᐅᖅᓯᒪᔭᖏᓐᓂᒃ ᑖᒃᑯᓄᖓ ᓄᓇᓕᖕᓄᑦ ᓄᒃᑎᖅᑕᐅᓚᐅᖅᓯᒪᔪᓄᑦ. 2010 ᐊᐅᔭᖓᑕ ᓄᙳᐊᓂ ᓴᖅᑭᑦᑎᓛᕈᒪᔪᒍᑦ ᓂᕆᐅᒃᐳᒍᑦ ᑲᓇᑕᓕᒫᒥ ᓄᓇᕐᔪᐊᕐᒥᓗ ᖃᐅᔨᒪᔭᐅᓕᕐᓂᐊᕐᓂᖓᓂᒃ ᐃᓄᐃᑦ ᐱᐅᓯᕆᕙᓚᐅᖅᑕᖏᓐᓂᒃ. ᒫᓐᓇᐅᑎᓪᓗᒍ "ᑲᓇᑕᒥᐅᑦ ᓇᖕᒥᓂᕆᔭᐅᓂᖓ" ᐃᓱᒪᒋᔭᐅᑎᓪᓗᒍ ᒐᕙᒪᓕᕆᔨᓄᑦ, ᐱᕙᓪᓕᐊᔪᓕᕆᔨᓄᑦ, ᐊᒻᒪ ᐱᕕᒃᓴᐅᔪᓐᓇᖅᑐᓄᑦ ᓇᖕᒥᓂᕆᔭᐅᔪᓄᑦ ᓂᕆᐅᒃᑐᓄᑦ ᓯᑯᖃᙱᑦᑐᒥᒃ ᓱᓪᓗᐊᓗᒃ ᐅᐊᓕᓂᕐᒥᑦ ᕿᑭᖅᑖᓗᖕᒧᑦ ᑕᕆᐅᒃᑯᑦ ᐊᖅᑯᑎᖓᒍᑦ, ᐊᑲᐅᓈᕐᓂᖅᓴᖅᑕᖃᙱᓚᖅ ᐃᖅᑲᐃᑎᑦᑎᒋᐊᒃᓴᖅ: ᑖᓐᓇ ᓄᓇ ᐱᒋᔭᐅᕗᖅ ᑲᓇᑕᒧᑦ ᓄᓇᙳᐊᑎᒍᑦ ᑎᑎᖅᑐᒐᖅᓯᒪᙱᖦᖢᑎᒃ, ᑭᓯᐊᓂ ᐃᓄᐃᑦ ᑭᓱᓕᒫᑦᑎᐊᓂᒃ ᑐᓐᓂᖅᑯᑎᖃᓚᐅᕐᓂᖏᓐᓄᑦ ᑕᒫᓂᒥᐅᑕᐅᔪᒪᓪᓗᑎᒃ. [1] McGrath, Melanie, The Long Exile: A True Story of Deception and Survival among the Inuit of the Canadian Arctic, London: Fourth Estate, ᒪᒃᐱᒐᖅ 302. [2] ᕈᐃᑦ, ᐃᓕᓴᐱ, "Trail of Tears", New York Times Book Review; ᐄᐳᕈ 8; ᖃᐅᔨᓴᕐᓂᕐᒧᑦ ᐅᖃᓕᒫᒐᖃᕐᕕᒃ, ᒪᒃᐱᖅᑐᒐᖅ 10.