ᓄᓇᕗᑦ ᑐᙵᕕᒃᑯᑦ ᑎᒥᖁᑎᖓᑦ ᑲᔪᓯᑎᑦᓯᕗᑦ ᐱᓪᓗᐊᑕᐅᔪᓂᒃ ᐱᕙᓪᓕᐊᑎᑦᑎᓂᕐᒥᒃ ᐅᖃᐅᓯᕐᒧᑦ, ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ, ᓄᓇᓕᓐᓂᓗ ᐃᓅᓯᖃᑦᓯᐊᓂᕐᒧᑦ

ᐊᑦᑑᕝᕙ 19, 2026, ᖁᕐᓗᖅᑐᖅ, ᓄᓇᕗᕐᒥ - ᓄᓇᓄᑦ ᑐᙵᕕᒃᑯᑦ ᑎᒥᖁᑎᖓᑦ (ᑐᙵᕕᒃᑯᑦ) ᑲᑎᒪᔨᖏᑦ ᑲᔪᓯᑎᑦᓯᓯᒪᖕᒪᑕ ᑭᖑᓕᕇᓂᒃ ᑮᓇᐅᔭᓄᑦ ᐊᑐᕐᓂᐊᖅᑐᓂᒃ ᐸᕐᓇᐅᑎᓂᒃ ᐱᓕᕆᐊᖑᕙᓪᓕᐊᔪᒪᔪᓄᑦ ᐊᖏᓪᓕᕙᓪᓕᐊᑎᑦᑎᔪᓂᒃ ᐊᔪᙱᓐᓂᕆᔭᐅᔪᓂᒃ ᐃᓄᐃᑦ ᐅᖃᐅᓯᖓᓂᑦ ᐃᓕᓐᓂᐊᖅᑐᓕᕆᓂᕐᒥᒡᓗ, ᓴᙵᑦᑎᒃᑲᓐᓂᖁᓪᓗᒋᑦ ᐋᓐᓂᐊᖃᕐᓇᖏᑦᑐᓕᕆᓂᖅ ᐃᓅᓯᖃᑦᓯᐊᖅᑐᓕᕆᓂᕐᒧᓪᓗ, ᑲᔪᓯᑎᑕᐅᒋᐊᕐᓗᓂᓗ ᐳᕙᒡᓗᓇᖅᑐᖅ (ᐳᕙᓪᓗᓐᓇᖅ) ᓄᖑᑎᑕᐅᖁᓪᓗᒍ ᓄᓇᕗᓕᒫᒥᑦ.

ᑕᒫᓂ ᐱᓇᓱᐊᕈᓯᕐᒥ ᑲᑎᒪᓂᖃᖅᑎᓪᓗᒍᑦ, ᑐᙵᕕᒃᑯᑦ ᐅᑯᓂᖓ ᐊᖏᕈᑎᖃᓚᐅᖅᑐᑦ:

• ᐃᓄᒃᑐᑦ ᐃᓕᓐᓂᐊᕐᓂᖅ ᐃᓄᐃᑦ ᐱᔪᓐᓇᕐᓂᖅᑖᖅᐸᓪᓕᐊᓂᖏᑦ: $4.3-ᒥᓕᐊᓐᑖᓚ ᒪᑭᑎᑦᑎᖁᔨᓪᓗᑎᒃ ᑲᔪᓯᑎᑕᐅᓗᓂᓗ ᐱᕙᓪᓕᐊᑎᑦᑎᓂᕐᒧᑦ ᐱᓕᕆᖃᑎᒌᖑᔪᑦ ᐃᑲᔪᖅᑐᐃᓂᐊᖅᑐᒥᒃ ᐃᓄᒃᑐᑦ ᐃᓕᓐᓂᐊᖅᑐᓕᕆᓂᕐᒥᒃ ᓄᓇᕗᕐᒥ ᐱᕙᓪᓕᐊᑎᑕᐅᖁᓪᓗᒍᓗ ᐃᓄᐃᑦ ᐱᔪᓐᓇᕐᓂᕆᔭᖏᑦ ᐱᔭᕆᐊᖃᖅᑐᑦ ᓴᖅᑭᑦᑎᖁᓪᓗᒋᑦ ᐃᓄᒃᑐᑦ ᐃᓕᓐᓂᐊᕐᕕᐅᔪᓂᒃ. ᑮᓇᐅᔭᖃᖅᑎᑕᐅᓂᖅ ᓄᓇᕗᑦ ᑐᙵᕕᒃᑯᓐᓂᑦ ᓄᐊᑉᐸᓪᓕᐊᔪᓂᑦ ᑐᓂᐅᖅᑲᖅᑕᐅᔪᓂᑦ ᓄᓇᕗᒥ ᐃᓄᐃᑦ ᐊᑐᖅᑐᒃᓴᖏᓐᓄᑦ ᑮᓇᐅᔭᖅᑖᕆᔭᐅᕙᓪᓕᐊᔪᓄᑦ ᐸᐸᑦᑎᔨᒃᑯᑦ ᐊᑐᐃᓐᓇᕈᖅᓴᐃᓂᐅᔪᓂᒃ ᐊᑐᓕᖅᑎᑕᐅᓂᖏᓐᓄᑦ ᐱᓕᕆᐊᖏᑦ ᐊᑕᐅᓯᕐᒧᑦ ᐊᒥᓲᓂᖅᓴᓄᓪᓘᓐᓃᑦ ᐃᓄᒃᑐᑦ ᐃᓕᓐᓂᐊᕐᕕᐅᔪᓄᑦ.
• ᐅᖃᐅᓯᕐᖓᖅ ᐱᓕᕆᔾᔪᑎ ᐊᑐᓕᖅᑎᑕᐅᓂᖓᑦ: $5.7-ᒥᓕᐊᓐᑖᓚ ᐊᑯᓐᓂᖓᓂ 2026-2028 ᑕᒡᕙᙵᑦ ᑐᙵᕕᒃᑯᑦ ᐊᒥᐊᒃᑯᖏᓐᓂᑦ ᐅᖃᐅᓯᕐᖓᑦ ᑮᓇᐅᔭᖏᓐᓂᑦ ᐃᓄᒃᑐᑦ ᐃᓕᓐᓂᐊᖅᑐᓕᕆᓂᕐᒨᕐᓂᐊᖅᑐᓂᒃ, ᐃᓄᒃᑐᑦ ᐅᖃᐅᓯᓕᕆᓂᕐᒧᑦ ᐱᓕᒻᒪᒃᓴᕐᓂᖅ, ᑐᓴᐅᒪᔪᓕᕆᓂᖅ ᓴᓇᙳᐊᓂᕐᓗ, ᐅᖃᐅᓯᓕᕆᓂᕐᒥᒃ ᑎᑎᕋᖅᐸᓪᓕᐊᓂᖅ, ᖃᐅᔨᓴᖅᑕᐅᔪᑦ ᓄᓇᓕᓐᓂᓗ ᐱᓕᕆᐊᒃᓴᐃᑦ. ᑮᓇᐅᔭᖃᖅᑎᑕᐅᓂᖓᑦ ᐅᕙᙵᑦ ᐃᑦᑕᕐᓂᓴᓕᕆᔨᒃᑯᑦ ᑲᓇᑕᒥ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ ᐃᓗᓕᖏᑦ
• ᐊᑎᓕᐅᖅᑕᐅᓯᒪᓗᑎᒃ ᓄᓇᖃᖅᑳᖅᓯᒪᔪᑦ ᐊᐅᓚᑦᑎᔨᒃ ᑎᒥᙳᖅᑎᑕᐅᓗᑎᒃ ᑎᑎᕋᖅᓯᒪᓂᓕᒃ 12 ᒪᓕᓪᓗᒍ ᐱᖁᔭᕐᒥᒃ ᐃᑉᐱᒋᑦᑎᐊᕐᓗᒋᑦ ᓄᓇᖃᖅᑳᖅᓯᒪᔪᑦ, ᐃᓄᐃᑦ ᐊᓪᓚᖓᔪᐃᑦ ᓄᑕᖅᑲᑦ, ᒪᒃᑯᒃᑐᑦ ᐊᒻᒪᓗ ᖃᑕᙳᑎᒌᑦ: ᑲᑎᒪᔨᖏᑦ ᐃᓱᒪᓕᐅᖅᑐᑦ ᑐᙵᕕᒃᑯᑦ ᑎᒃᑯᐊᖅᑕᐅᓯᒪᓂᐊᖅᑐᑦ ᓄᓇᖃᖅᑳᖅᓯᒪᑦ ᐊᐅᓚᑦᑎᔨᖏᓐᓄᑦ ᑎᒥᐅᔪᓄᑦ. ᑕᒪᓐᓇ ᓯᕗᓪᓕᖅᐹᖑᓗᓂ ᐊᓪᓗᕆᐊᕈᑕᐅᓂᐊᖅᑐᖅ ᑐᙵᕕᒃᑯᑦ ᐱᒻᒪᕆᐅᔪᒥᒃ ᑲᒪᒋᔭᖃᕐᓗᑎᒃ ᐃᓄᐃᑦ ᓄᑕᖅᑲᐃᑦ ᑲᒪᒋᔭᐅᑦᓯᐊᕆᐊᖃᕐᓂᖏᑦ ᐱᔾᔪᑎᒋᓪᓗᒋᑦ. ᑕᒪᓐᓇ ᐱᒻᒪᕆᐊᓘᒐᓗᐊᖅᑎᓪᓗᒍ ᓇᓗᓇᐃᒃᑯᑕᐅᓗᓂ ᑐᙵᕕᒃᑯᑦ ᐱᓕᕆᐊᖓᓂ ᓇᖕᒥᓂᖅᓱᕈᒪᑎᓪᓗᒋᑦ ᓄᑕᕋᐃᑦ ᑲᒪᒋᔭᐅᑦᓯᐊᕐᓂᖏᓐᓄᑦ, ᓄᓇᕗᑦ ᒐᕙᒪᒃᑯᑦ, ᐃᓄᓕᕆᔨᒃᑯᑦ, ᐊᓯᖏᓪᓗ ᓄᓇᕗᒥ ᐊᕕᒃᑐᖅᓯᒪᔪᓂᓪᓗ ᑲᓇᑕᒥ ᓄᑕᖅᑲᐃᑦ ᑲᒪᒋᔭᐅᑦᓯᐊᕐᓂᖏᓐᓄᑦ ᐱᓕᕆᕕᐅᔪᑦ ᓱᓕ ᑕᒪᐃᓐᓂᒃ ᑲᒪᒋᔭᒃᓴᖃᖅᑐᑦ ᓄᑕᖅᑲᐃᑦ ᑲᒪᒋᔭᐅᑦᓯᐊᕐᓂᖏᓐᓄᑦ ᒪᓕᒐᑎᒍᑦ ᐱᔭᒃᓴᖏᑦ.
• ᐳᕙᒡᓗᓇᖅᑐᖅ ᓄᖑᑎᑕᐅᖁᓪᓗᒍ ᑮᓇᐅᔭᓂᒃ ᐊᑐᕐᓂᖅ: $8.7-ᒥᓕᐊᓐᑖᓚᓂᒃ ᐳᕙᓪᓗᓇᖅᑐᖅ ᓄᖑᑎᑕᐅᓇᓱᐊᕐᓂᕐᒧᑦ ᑮᓇᐅᔭᑦ. ᐊᖏᖅᑕᐅᓯᒪᔪᑦ ᐸᕐᓇᐅᑎᖏᑦ ᑕᑯᒃᓴᐅᑎᑦᓯᔪᑦ ᑐᙵᕕᒃᑯᑦ ᐊᑯᓂ ᑐᓂᕐᕈᑎᒋᓯᒪᔭᖓᑦ ᓄᓇᕗᕐᒥᐅᑕᐃᑦ ᐃᓄᖏᑦ ᓄᓇᓕᖏᓪᓗ ᓴᐳᔾᔭᐅᖁᓪᓗᒋᑦ ᐳᕙᒡᓗᖕᓇᖅᑐᑖᖁᓇᒋᑦ. ᐸᕐᓇᐅᑎ ᐃᔨᒋᔭᖃᖅᑐᖅ ᓴᙵᑦᑎᑉᐹᓪᓕᖁᔨᓂᕐᒥᒃ ᐋᓐᓂᐊᖃᕐᓇᖏᑦᑐᓕᕆᓂᐅᑉ ᐊᐅᓚᓂᖓᑦ ᐃᑲᔪᖅᑐᖅᑕᐅᓗᑎᓪᓗ ᐃᓚᒌᑦ ᓄᓇᓕᖏᓪᓗ, ᐱᖃᓯᐅᑎᔪᑦ ᓴᓂᖅᕙᖅᓯᒪᔪᑦ ᑮᓇᐅᔭᑦ ᓄᓇᓕᓐᓄᑦ ᐳᕙᒡᓗᖕᓇᖅᑐᓕᖕᓄᑦ ᐊᒥᓲᓂᖏᑦ, ᐱᐅᓯᕚᓪᓕᖅᓯᒪᓂᖅ ᓂᕿᑦᑎᐊᕙᓕᕆᓂᕐᒥᒃ ᓂᕆᔭᒃᓴᖃᑦᓯᐊᓂᕐᒨᖓᔪᓄᓪᓗ ᐱᓕᕆᐊᒃᓴᐃᑦ, ᓄᖅᑲᖅᑎᑦᑎᓇᓱᐊᖅᑐᓪᓗ ᐳᕙᒡᓗᖕᓇᖅᑐᖃᕐᓂᕐᒧᑦ ᑲᙳᓇᕐᓂᖓ.

ᑕᒪᒃᑯᐊ ᐊᖏᕈᑕᐅᔪᑦ ᓴᖅᑭᑎᑦᓯᔪᑦ ᑐᙵᕕᒃᑯᑦ ᑐᓂᕐᕈᑎᖃᖅᓯᒪᓂᖏᓐᓂᒃ ᓯᕗᓪᓕᐅᔾᔭᐅᔭᕆᐊᖃᕐᓂᖏᓐᓂᒃ ᐃᓄᐃᑦ, ᐃᑲᔪᖅᑐᕐᓗᒋᑦ ᐃᓄᖕᓄᑦ ᓯᕗᓕᖅᑕᐅᔪᑦ ᐋᖅᑭᒍᑎᒃᓴᐃᑦ, ᐱᐅᓯᕚᓪᓕᕐᓗᒍᓗ ᐃᓅᖃᑎᒌᓄᑦ-ᑮᓇᐅᔭᓕᐅᕋᓱᐊᕈᑕᐅᔪᑦ ᐃᓄᓐᓄᑦ ᓄᓇᕗᓕᒫᒥ.

“ᑕᒪᒃᑯᐊ ᐊᖏᕈᑕᐅᔪᑦ ᑭᒡᒐᖅᑐᐃᖕᒪᑕ ᐱᒻᒪᕆᐅᔪᓂᒃ ᓯᕗᓪᓕᐅᑎᖁᓪᓗᒋᑦ ᐃᓄᐃᑦ ᓯᕗᓪᓕᐅᑎᔭᖏᑦ ᐅᖃᐅᓯᓕᕆᓂᕐᒥᒃ, ᐋᓐᓂᐊᖃᕐᓇᖏᑦᑐᓕᕆᓂᕐᒥᒃ ᐃᓅᓯᖃᑦᓯᐊᓂᕐᒥᒡᓗ,” ᐅᖃᖅᑐᖅ ᒍᓗᐊᕆᔭ ᐅᓗᖅᓯ, ᓄᓇᕗᑦ ᑐᙵᕕᒃᑯᓐᓄᑦ ᐊᖏᔪᖅᑳᖅ. “ᐱᕈᖅᓴᐃᑎᓪᓗᑕ ᐃᓄᓐᓄᑦ ᓯᕗᓕᖅᑕᐅᔪᓄᑦ ᖃᓄᐃᓕᐅᕈᑕᐅᔪᓄᑦ ᐱᔪᓐᓇᕐᓂᖅᑖᖅᑎᑦᑎᕙᓪᓕᐊᓂᖅ ᓄᓇᓕᑦᑎᓐᓂᑦ, ᑲᔪᓯᔪᓐᓇᖅᑐᒍᑦ ᐱᓕᕆᓗᑕ ᓯᕗᒧᑦ ᓴᙱᓂᖅᓴᒧᑦ ᓯᕗᓂᒃᓴᒧᑦ ᐃᓄᓐᓄᑦ ᓄᓇᕗᓕᒧᑦ.”

ᑐᙵᑯᒃᑯᑦ ᑲᔪᓯᓂᐊᖅᑐᑦ ᐱᓕᕆᖃᑎᖃᕐᓗᑎᒃ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓂᒃ, ᒐᕙᒪᐅᔪᓂᑦ, ᓄᓇᓕᓐᓂᑦ ᐱᓕᕆᖃᑕᐅᔪᓂᓪᓗ ᓯᕗᓪᓕᐅᑎᔪᒪᓪᓗᒋᑦ ᑕᒪᒃᑯᐊ ᓯᕗᓪᓕᐅᑎᔭᕆᐊᓖᑦ ᐃᑲᔪᖅᑐᕐᓗᒋᓪᓗ ᐊᑐᓕᖅᑎᑕᐅᓂᖏᑦ ᐊᖏᕈᑕᐅᓯᒪᔪᑦ ᐸᕐᓇᐅᑏᑦ.

-30-

ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ

ᐋᓂ ᑖᒻᓕᓐᓴᓐ

ᑐᑭᒧᐊᑦᑎᑦᓯᔨ, ᑐᓴᐅᒪᔪᓕᕆᓂᖅ

ᓄᓇᕗᑦ ᑐᙵᕕᒃᑯᑦ ᑎᒥᖁᑎᖓᑦ
media@tunngavik.com