NTI-kut Katimayiit Angiqhihimayut Niuviqtaghanik Uqauhiqnut, Aanniaqtuliqiniqmut, Nunallaarnilu Inuuhiqattiarniqmut
Apitilirvia 19, 2026, Qurluqtuq Nunavut – Nunavut Tunngavikkut Timingat (NTI) Katimayiit angiqhimayut qaffinik niuviqnikkut parnaiyautinik havaaghanut havaktighaliuqtunik Inuit uqauhiinik ilihaqtaghaniklu, hakugighivalliayaamik aanniaqtuliqiyit inuuhiqattiarniqlu, hivumuuqtitpallialugillu puvaklungniqmit (TB) aanniaqtailihuirniqmik Nunavunmi tamaat.
Katimayiit katimavianit havangnaqtillugu, NTI-kut angiqhimayaat hapkua:
- Inuktut Ilihaqtaghanik Havaktighaliurniqlu Inuinnaqnik: $4.3 milian-taalanik aullaqtittiyaamik aulapkaiyaamiklu Hanavalliayut Havaqatigiit ikayuqtighainik Inuktut Ilihaiyut Nunavunmi havaktighaliuriamiklu iharianaqtut aullaqtittiyaamik Inuktut ilihaqviinik. Manighautit NTI-kut nauvalliahimayunit ikayuutighat pihimayut ataagut Nunavunmi Inuit Pivighautinit Manighautit Katiqhugainit tamangnut parnaiyaiyaanut aullaqtitaghainit havaaghanut atauhiqmik amihunikluuniit Inuktut Ilihattiaqvighat Ilihaqviinik.
- Uqausirngaq Havaaghainik Aullaqtittiyut: $5.7 milian-taalait akunngani 2026-2028 talvanngat NTI-kut amikkuanit Uqausirngaq Maniutainit atuqtauyughat Inuktut ilihautainit, Inuktut Uqauhiqnik ilihaiyut, tuhaqtittiniqmut hanauyarniqmullu, uqauhiqnik titiraqtuiniqmut, naunaitkutanut nunallaarnullu ikayuutinut. Pivighautit hapkua manighautinik taapkuanguyut Ilitquhiliqiyiit Kanatami Nunaqaqqaaqhimayut Uqauhiit Havaaghainik
- Titiraqtuiyut Nunaqaqqaaqhimayutut Kavamaliqiyit Timiqutainik ataagut ilanga 12 talvanngat Maligait ihumagittiaqhugit Hivulliit Nunaqaqqaaqhimayut, Inuinnait Aallaillu nutaqqat, inulrammiit ilagiillu: Katimayiit ihumaliuqhimayut taimaa NTI-kut tikkuaqtaunahuat taimaa Nunaqaqqaaqhimayut Ataniqtuqtuiyut Timiqutaatut. Una hivulliuyuq havaaghaq NTI-kunnut munariyaamik aghuurnaqtunik Inuinnait nutaqqat munaqtighainik ihumaaluutainut. Hapkua aghuurnaraluaqhutik ilihimayaghat NTI-kut havaanginnik inmikkut ihumaliurniqmut nutaqqanik munaqtiuyaamik, Kavamatkut Nunavunmi, Havakviat Inuliqiyiit, tamangniklu ahiit hilataanit aviktuqhimayum aviktuqhimayullu nutaqqanik munaqtiuyut timiqutait tamatkiumalutik munaqhilutik tamangnik nutaqqanik munaqtiuyut maligaliqinikkut havaaghainik.
- Puvaklungniqmik Aanniaqtailihuiqniqmik Niuviqnikkut Parnaiyautit: $8.7 milian-taalait Puvaklungniqmik aanniaqtailihuiniqmut manighautit.
Angiqtauhimayuq parnaiyautit ilittuqhitiyuq NTI-kut aularaaqpaktut iniqniaqhimayait munariyaamik Nunavunmiutat Inuit nunallaallu puvaklungniqmit. Parnaiyautit ihumagilluaqtait hakugighainiq aanniaqtailiniqmut havauhirnik ikayuriamiklu ilagiingnik nunallaarniklu, taapkuninngalu hapummihimayagharnik manighautit nunallaarnut amigaitqiyanik puvakluktuqaqtunik, ihuaqhivaalliqlugit niqittiavait niqighaqattiarniqlu ikayuutinut, havaaghanullu TB-mik ihumarluguiriiamik.
Hapkua angiqhimayut ilittuqhitiyut NTI-kut aulahimmaaqtainik iniqniaqhimayait hivumuuqtittiyaamik Inuit irinigiyait, ikayuriamik Inuit-hivuliqtuqtait ihuaqhautit, ihuaqhaiyaamiklu inuuhiqattiarniqmut-manighiurnikkut iniqtaghat Inungnut Nunavunmi tamaat.
“Hapkua angiqtauhimayut ilittuqhitiuyut aghuurnaqtunik havaaghaqnik hivumuuqtittiyut Inuit irinigiyainik uqauhiqnut, ilihainiqmut, aanniaqtuliqiniqmut inuuhiqattiarniqmullu,’ uqaqtuq Gloria Uluqsi, NTI-kut Angayuqqaangat. “Niuviriamik Inuit-hivuliqtuqtainut havaaghaqnik havaktighaliurniqmiklu nunallaaptingnit, aulahimaittumik havaghimmaaqniaqtugut hivumut hakugitqiyamut hivunighamut Inuinnaqnut Nunavunmi tamaat.”
NTI-kut havaqatigihimmaarahuaqtait Inuit timiqutait, kavamait, nunallaat ikayuqtiillu hivumuuqtittiyaamik hapkua irinigiyauyut ikayuqlugillu aullaqtittiyut angiqhimayunik parnaiyautinik.
-30-
Tuhaqtittiyit Titiraqaqviat:
Annie Thomlinson
Aulapkaiyiryuaq, Tuhaqtittiyiit
Nunavut Tunngavikkut Timingat
media@tunngavik.com