ᓄᓇᕗᑦ ᑐᙵᕕᒃᑯᑦ ᑲᑎᒪᔨᖏᑦ ᑮᓇᐅᔭᓂᒃ ᑲᔪᓯᑎᑦᓯᔪᑦ $40.8-ᒥᓕᐊᓐᑖᓚᓂᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐃᓅᓯᖃᑦᓯᐊᓂᕐᒧᑦ ᑮᓇᐅᔭᓂᒃ ᐊᑐᕐᓂᕐᒧᑦ ᐱᕙᒌᔭᐅᑦ ᓄᓇᕗᕐᒥᐅᑦ ᐃᓄᖏᓐᓄᑦ
ᐊᑦᑑᕝᕙ 21, 2026 - ᐃᖃᓗᐃᑦ ᓄᓇᕗᑦ – ᓄᓇᕗᑦ ᑐᙵᕕᒃᑯᑦ ᑎᒥᖁᑎᖓᑦ (ᑐᙵᕕᒃᑯᑦ) ᓈᒻᒪᒃᓴᖅᑐᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ ᐃᓅᓯᖃᑦᓯᐊᓂᕐᒧᓪᓗ ᑮᓇᐅᔭᓂᒃ ᓄᓇᕗᕐᒥᐅᑕᓄᑦ ᑲᑎᓪᓗᒋᑦ ᑮᓇᐅᔭᐃᑦ $40.8-ᒥᓕᐊᓐᑖᓚᓂᑦ ᐅᑭᐅᓄᑦ ᑕᓪᓕᒪᓄᑦ (5) ᐱᒋᐊᕐᓗᒍ ᐄᑉᐳᕈᓪ 1, 2027, ᑎᑭᓪᓗᒍ ᒫᔅᓯ 31, 2032.
ᑖᓐᓇ ᑮᓇᐅᔭᖅ, ᑐᓂᔭᐅᔪᖅ ᑲᓇᑕᐅᑉ ᒐᕙᒪᒃᑯᖏᓐᓄᑦ, ᐃᑲᔪᖅᑐᐃᓂᐊᖅᑐᖅ ᓄᓇᓕᓐᓂᑦ ᑲᑐᔾᔨᖃᑎᒌᖑᔪᓂᓪᓗ ᐱᔨᑦᑎᖅᑐᑦ ᑖᒃᑯᓂᖓ ᐱᕙᓪᓕᐊᑎᑕᐅᖁᓪᓗᒋᑦ ᐃᑲᔪᕐᓗᑎᓪᓗ ᐃᓄᓐᓅᖓᔪᓂᒃ ᐱᓇᓱᐊᕈᑎᐅᔪᓂᒃ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐃᓅᓯᖃᑦᓯᐊᓂᕐᒧᓪᓗ ᐱᓕᕆᐊᖑᔪᓂᒃ ᑐᕌᒐᖃᖅᑐᑦ ᐱᐅᓯᕚᓪᓕᖅᑎᑕᐅᖁᓪᓗᒋᑦ ᐋᓐᓂᐊᖃᕐᓇᖏᑦᑐᓕᕆᓂᕐᒨᖓᔪᑦ ᐱᓇᓱᐊᒐᐅᔪᑦ ᓄᓇᕗᕐᒥᐅᑦ ᐃᓄᖏᓐᓄᑦ.
ᐱᕙᓪᓕᐊᑎᑦᑎᓂᖅ ᐃᑲᔪᖁᓪᓗᒍ ᐊᒥᒐᖅᓯᓂᖃᕈᓐᓃᖁᓪᓗᒋᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᖃᐅᔨᔭᐅᔪᓄᑦ ᐃᓄᓐᓄᑦ ᐊᓯᖏᓐᓄᓪᓗ ᑲᓇᑕᒥᐅᓄᑦ ᐃᑲᔪᖅᑐᐃᓂᒃᑯᑦ ᓯᕗᓪᓕᐅᔾᔭᐅᓪᓗᐊᑕᖅᑐᓄᑦ ᐆᑦᑑᑎᒋᓗᒍ ᐱᖁᑎᓄᑦ ᓄᑕᕋᕐᓄᓪᓗ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ, ᐱᐅᓂᖅᓴᐅᖁᓪᓗᒍ ᐊᑐᕈᓐᓴᕐᓂᕐᒥᒃ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᑲᒪᒋᔭᐅᓂᕐᒥᒃ, ᓴᙵᑦᑎᓯᒪᒃᑲᓐᓂᕐᓗᑎᓪᓗ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᑲᒪᒋᔭᐅᓂᖏᑦ, ᓴᙵᑦᑎᒃᓯᒪᔪᓪᓗ ᐃᓱᒪᓕᕆᓂᕐᒧᑦ ᐃᓅᓯᖃᑦᓯᐊᓂᕐᒧᓪᓗ ᐱᔨᑦᑎᕋᐅᑏᑦ.
ᑮᓇᐅᔭᖃᖅᑎᑕᐅᓂᖅ ᐃᑲᔪᖅᑐᐃᓂᖅᑐᖅ ᐊᕕᒃᑐᖅᓯᒪᔪᓂ ᐋᓂᐊᖃᕐᓇᖏᑦᑐᓕᕆᓂᕐᒧᑦ ᓯᕗᓪᓕᐅᑎᑕᐅᔪᑦ ᒪᓯᓴᕐᓂᕐᒧᓪᓗ ᑲᑎᓂᐅᔪᑦ, ᑮᓇᐅᔭᓕᐅᕋᓱᐊᖅᑎᐅᖏᑦᑐᓄᑦ ᐃᑲᔫᑏᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐃᓅᓯᖃᑦᓯᐊᓂᕐᒧᓪᓗ ᐱᓇᓱᐊᒍᑕᐅᔪᑦ, ᑐᐊᕕᕐᓇᖅᑐᓕᕆᔨᐅᔪᓄᑦ, ᐊᔪᓕᕈᑎᖃᖅᑐᓄᑦ ᖁᐊᖅᓵᕐᓇᖅᑐᒃᑰᖅᓯᒪᔪᓄᓪᓗ ᐃᑲᔪᖅᑕᐅᕕᖕᓄᑦ ᐱᐅᓯᕚᓪᓕᕈᑎᓄᑦ, ᐃᕐᓂᓱᒃᓰᓂᕐᒧᑦ, ᐋᓐᓂᐊᖃᕐᓇᖏᑦᑐᓕᕆᓂᕐᒨᖓᔪᓄᑦ ᐊᐅᓚᑕᐅᔪᑦ.
ᓄᑖᕈᖅᑎᑕᐅᒃᑲᓐᓂᖅᓯᒪᔪᑦ ᑮᓇᐅᔭᓂᒃ ᐊᑐᕐᓂᕐᒧᑦ ᐸᕐᓇᐅᑦ ᑲᔪᖏᖅᓴᐃᔪᖅ ᑲᔪᓯᑎᑕᐅᓂᖓᓂᒃ ᑮᓇᐅᔭᐃᑦ ᓄᓇᕗᑦ ᑐᙵᕕᒃᑯᓐᓄᑦ, ᐊᕕᒃᑐᖅᓯᒪᔪᓄᑦ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓄᑦ (ᐃᓄᐃᑦ ᑲᑐᔾᔨᖃᑎᒌᑦ) ᐱᓕᕆᖃᑕᐅᔪᓪᓗ ᑲᑐᔾᔨᖃᑎᒌᑦ ᑐᓂᓯᔪᑦ ᐱᒻᒪᕆᐅᔪᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᖃᓄᐃᙱᑦᑎᐊᕐᓂᕐᒧᓪᓗ ᐱᓕᕆᐊᖑᕙᒃᑐᑦ ᐃᓄᐃᑦ ᓄᓇᖏᓐᓂᑦ.
“ᖁᕕᐊᓱᑦᑐᖓ ᐱᓕᕆᖃᑎᖃᕈᓐᓇᖅᓯᓚᐅᕋᒪ ᒐᕙᒪᐅᔪᓂᒃ, ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᓄᓇᓕᓐᓂᓗ ᐱᓕᕆᖃᑎᒌᖑᔪᓂᒃ ᐃᑲᔪᖅᑐᕐᓗᒋᑦ ᐱᓇᓱᐊᖅᑕᐅᔪᑦ ᐃᑲᔪᖅᑐᐃᔪᑦ ᓴᖅᑭᑕᐅᖁᓪᓗᒋᑦ ᐃᓄᐃᑦ ᓄᓇᓕᑦᑎᓐᓂ ᐊᒃᓱᒻᒪᕆᐊᓗᒃ ᐃᓱᒪᒥᒍᑦ ᐊᑲᐃᓪᓕᐅᕈᑎᖃᕐᒪᑕ ᐊᒃᓱᕉᓴᒃᑐᓂᒃ ᐊᑐᖅᑕᐅᔪᑦ ᐃᓄᓐᓄᑦ ᓄᓇᓕᑦᑎᓐᓂᑦ. ᑭᒃᑯᓕᒫᑦ ᐊᒃᑐᖅᑕᐅᖕᒪᑕ. ᐱᓕᕆᖃᑎᒌᒃᑐᐃᓐᓇᐅᔭᕆᐊᖃᖅᑐᒍᑦ ᐋᖅᑭᒍᑎᒃᓴᓂᒃ ᓇᒃᓴᕐᓗᑕ ᓄᓇᓕᓐᓄᑦ, ᐊᑕᐅᓯᑐᐊᓄᑦ ᑲᑐᔾᔨᖃᑎᒌᓄᑦ ᐋᖅᑭᒃᑕᐅᓐᔪᓐᓇᖏᒻᒪᑕ ᐊᑲᐅᙱᓕᐅᕈᑕᐅᔪᑦ, ᑲᑐᔾᔨᖃᑎᒌᒋᐊᖃᖅᑐᒍᑦ ᑕᒪᒃᑯᐊ ᑐᑭᖃᑦᑎᐊᑐᒃᑯᑦ ᐊᑦᑐᐃᓗᑕ ᓄᓇᓕᑦᑎᓐᓂ” ᐊᖏᔪᖅᑳᖓᑦ ᑐᙵᕕᒃᑯᑦ ᒍᓗᐊᕆᔭ ᐅᓗᖅᓯ ᐅᖃᓚᐅᖅᑐᖅ
ᐊᖏᖅᑕᐅᓚᐅᖅᓯᒪᑎᓪᓗᒍ ᐸᕐᓇᐅᑎ ᐅᑭᐅᓄᑦ ᑕᓪᓕᒪᓄᑦ (5) 2022-ᖑᑎᓪᓗᒍ, ᑮᓇᐅᔭᖃᖅᑎᑕᐅᓂᖅ ᐃᑲᔪᖅᑐᐃᓯᒪᔪᖅ ᓯᕗᒧᑦᑎᑦᓯᑲᓐᓂᖅᑐᓂᑦ ᓄᓇᕗᕐᒥᐅᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐃᓅᓯᖃᑦᓯᐊᓂᕐᒧᓪᓗ ᐱᓕᕆᐊᖓᓄᑦ, ᐱᖃᓯᐅᑎᔪᖅ ᐃᑲᔪᖅᑐᐃᓂᖅ ᐱᕙᓪᓕᐊᑎᑕᐅᖁᓪᓗᒍ ᐊᖏᓪᓕᒋᐊᖅᓯᒪᔪᒥᒃ ᓄᓇᕗᕐᒥ ᐊᔪᓕᕈᑎᖃᖅᑐᓄᑦ ᖁᐊᖅᓵᕐᓇᖅᑐᒃᑰᖅᓯᒪᔪᑦ ᐃᑲᔪᖅᑕᐅᕕᖕᓄᑦ ᐊᑐᖅᑕᐅᔪᑦ (ᐱᓕᕆᖃᑎᒌᑦᑐᑦ ᓄᓇᕗᑦ ᒐᕙᒪᒃᑯᑎᒍᑦ ᓄᓇᖃᖅᑳᖅᓯᒪᔪᓪᓗ ᑲᓇᑕᒥ ᐱᔨᑦᑎᕋᐅᒡᑏᑦ), ᓴᙵᑦᑎᑲᓐᓂᖅᓯᒪᔪᑦ ᑲᑎᒪᖃᑎᒌᑦᑐᑦ ᓄᓇᕗᕐᒥ ᐱᓕᕆᖃᑎᒌᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ, ᐃᑲᔪᖅᑕᐅᑦᓴᐅᑎᒋᔪᑦ ᐃᓄᐃᑦ ᐃᓚᒌᑦ ᐊᑐᖅᑕᐅᓪᓗᓂ ᓇᓪᓕᐅᒃᑯᒫᖃᙱᑦᑐᓄᑦ ᐃᓅᓕᓴᖅᑕᐅᔭᕆᐊᓕᖕᓄᑦ ᐃᑲᔫᓯᐊᑦ ᐊᒻᒪᓗ ᐃᓄᐃᑦ ᓄᑕᖅᑲᐃᑦ ᓯᕗᓪᓕᐅᔾᔭᐅᔪᑦ ᐱᔨᑦᑎᕋᐅᑏᑦ.
ᐱᕙᓪᓕᐊᑎᑦᑎᓃᑦ ᑮᓇᐅᔭᓕᐅᕋᓱᐊᖅᑎᐅᖏᑦᑐᑎᒍᑦ ᑲᑐᔾᔨᖃᑎᒌᓄᑦ ᑐᙵᕕᖃᖅᓯᒪᕗᑦ ᐊᑐᐃᓐᓇᐅᒪᑎᑦᑎᓪᓗᑎᒃ ᐱᓕᕆᐊᑦᓴᓂᒃ ᐱᔨᑦᑎᕋᕈᑎᓂᓪᓗ ᐊᒥᒐᖅᓯᓂᐅᔪᓂᒃ ᐅᓪᓗᒥ ᑐᓂᓯᔪᑦ. ᓄᑖᕈᕆᐊᖅᑕᐅᔪᖅ ᑮᓇᐅᔭᓂᒃ ᐊᑐᕐᓂᕐᒧᑦ ᐸᕐᓇᐅᑎ ᑲᔪᓯᓂᐊᖅᑐᖅ ᐃᑲᒧᖅᑐᐃᓗᓂ ᐃᓕᖅᑯᓯᑎᒎᖅᑐᓂ ᐱᓕᕆᐊᒃᓴᓄᑦ ᐱᔨᑦᑎᕋᐅᑎᓄᓪᓗ, ᐆᑦᑑᑎᒋᓗᒍ ᐊᑐᐃᓐᓇᐅᒪᑎᑕᐅᔪᑦ ᐅᒥᖕᒪᒃ ᐃᓪᓗᖁᑎᖓᑦ. ᐊᒻᒪᓗ ᓱᓕ, ᐃᓕᓐᓂᐊᒐᒃᓴᐅᔪᑦ ᖃᐅᔨᒋᐊᖅᑎᑯᓐᓄᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᖃᐅᔨᓴᖅᕕᖓᑦ, ᐱᖃᓯᐅᑎᓪᓗᓂ ᐃᓄᙳᐃᓂᖅ ᐊᒻᒪᓗ ᒪᑭᒪᐅᑎᒃᓴᑦ ᒪᒃᑯᒃᑐᓄᑦ ᑲᑎᕕᐅᔪᑦ.
ᑐᙵᕕᒃᑯᑦ ᑲᔪᓯᓗᑎᒃ ᐱᓕᕆᖃᑎᖃᕐᓂᐊᖅᑐᑦ ᐊᖏᓪᓕᒋᐊᕐᓗᒍ ᐊᑦᑐᐃᓂᐅᔪᑦ ᐊᑐᐃᓐᓇᖃᕐᓂᕐᒥᒃ ᐱᓕᕆᔾᔪᑎᓂᒃ ᕿᒥᕐᕈᓗᑎᒡᓗ ᓂᕈᐊᖅᕕᐅᔭᒃᓴᓂᑦ ᑲᒪᒋᖁᓪᓗᒍ ᑮᓇᐅᔭᑎᒍᑦ ᐱᔭᕆᐊᑐᔪᑦ ᐊᑦᑐᐃᔪᑦ ᓄᓇᓖᑦ ᑲᑐᔾᔨᖃᑎᒌᖏᓐᓂᑦ.
-30-
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ
ᐋᓂ ᑖᒻᓕᓐᓴᓐ
ᑐᑭᒧᐊᑦᑎᓯᔨ, ᑐᓴᐅᒪᔪᓕᕆᓂᕐᒥᒃ
ᓄᓇᕗᑦ ᑐᙵᕕᒃᑯᑦ ᑎᒥᖁᑎᖓᑦ
media@tunngavik.com