NTI-kut Katimayiit Angiqhihimayut $40.8 milian-taalait Aanniaqtuliqiniqmut Inuuhiqattiarniqmullu Niuviqtaghanut Parnaiyautinik Nunavunmiutanut Inungnut
Tattiarnaqhilirvia 21, 2026 - Iqaluit, Nunavut – Nunavut Tunngavikkut Timingat (NTI) angiqhihimayut aanniaqtailiniqmut inuuhiqattiarniqmullu manighautinik Nunavunmiunut naallugit $40.8 milian-taalait atuqtauyughat tallimanik ukiunik talvanngat Qitiqqautiyuq 1, 2027, talvunga Qiqaiyalirvia 31, 2032.
Hapkua manighautit, tuniyauhimayut Kavamatuqanit Kanatami, ikayuutauniaqtuq nunallaarnut timiqutinullu kivgaqtuqpagainik hanayunik aulapkaiyuniklu Inuinnaqnut-kihiinnait havauhiqnik aanniaqtailiniqmut inuuhiqattiarniqmullu ikayuutinik ihuaqhautighat aanniaqtailiniqmut iniqtaghat Nunavunmi Inungnut.
Niuviqtauyut ikayuutauyughat mighivalliayaamik ayuqhautit aanniaqtuliqiyinit Inungnit ahiniklu Kanatamiutanik ikayuqhugit irinigiyalluat taapkuatut angayuqqaat nutaqqallu aanniaqtailiniit, ihuaqhivaalliqlugit atuqtaghait hivulliit aanniaqtuliqiyiit ikayuutainik, hakugighivaalliqtuniklu ihumaqattiarniqmut aanniaqtuliqiyiit inuuhiqattiarniqmullu ikayuutit.
Manighautit ikayuutauniat aviktuqhimayumi aanniaqtailiniqmut irinigiyanut mamihaiyunilu katimaviinut, manighiunngittunut ikayuutighat aanniaqtailiniqmut inuuhiqattiarniqmullu havaaghanut, pilgaqhuqtunut kiuhitiit havaqatigiingnut, ayuqhautinut qukluutinullu mamihautainut ihuaqhautighanut, irniuqtut ikayuqtiit, aanniaqtuliqiyiit havauhiinik ihivriuqhiniqmullu.
Nutaannguqtiqhimayut niuviqnikkut parnaiyautinit aulahimmaaqniaqhimayait manighautit NTI-kunnut, Aviktuqhimayuni Inuit Katimayiinut (RIA-nguyut), ikayuqtigiit timiqutiillu aulapkaiyunik iharianaqtunik aanniaqtailiniqmut inuuhiqattiarniqmullu ikayuutinik Inuit nunallaanginnit.
“Quviahuktunga havaqatigihimagapkit kavamait, Inuit timiqutait nunallaarmiullu katimaqatigiit ikayuriamnik havaaghainik ikayurahuaqhugit ihuaqhainahuat hapiqnaqtut ingattaqpallayuqlu ihumaqattiarniqmut pilgaqhuutit atuqpalliayait Inuit nunallaaptingnit. Inuit tamangnik ikpiguhukpaktut. Havaqatigiiktughauyugut tamapta ihuaqhautighaqlugit nunallaavut, atauhiinnaq timiqutik ihuaqhailaittuq ihumaaluutinik avaliittumik, katittughauyugut atauttimut mihingnaqhitiyaamik nunallaaptingnit” uqaqtuq NTI-kut Angayuqqaangat Gloria Uluqsi
Angiqtauhimangmat hivulliq tallimanik-ukiunik atuqtauyughaq parnaiyautit 2022-mi, manighautit ikayuutauhimayut hivumuuqtittiyunik Nunavunmi aanniaqtailiniqmut inuuhiqattiarniqmullu
Havauhiqnut, ikayuutighaniklu hanayunik aklivaalliqhimayumik aviktuqhimayum-iluani ayuqhautinut qukluutinullu mamihaqviit havauhiinik (ikayuqtiqaqhutik Kavamatkut Nunavunmi taapkualu Nunaqaqqaaqhimayut Ikayuqtiit Kanata), hakugighivaalliqtumik havaqatigiingniq talvuuna Nunavunmi Ikayuqtigiit Ikpataat Aanniaqtuliqiniqmut, ikayuutighainiklu Inuit ilagiiktut ihivriuqhiyunik Qutangnaitjutaittut Aanniaqtuliqiyiit Ikayuutait taamnalu Inuinnait Nutaqqat Hivulliuyut Havaaghanut Ikayuutit.
Niuvigait talvuuna manighiunngittunit timiqutiit tunngaviuvaktut aulapkaiyaamik ikayuutighanik ikayuutiniklu ayuqhautainut tajja havauhiriyaannit. Nutaannguqtiqhimayuq niuviqnikkut parnaiyautit aulahimmaaqtumik ikayuutauniat ilitquhinik tunngavilingnik ikayuutighanik ikayuutiniklu, taapkuatut tuniqhihimayait taapkua Umingmak Havakviat taamnalu Piruqatigiit Pivighautitarviat. Taimaalu, ilihainiqmik ikayuutighanik aulapkaiyaanik Qauyigiartiit Aanniaqtailiniqmut Qauyihaiyit Havakviat, taapkualu Inunnguinniq ikayuutait taapkualu Makimautiksat Inulrammiit Ayuiqhaqviit.
NTI-kut havaqatigihimmaarahuaqtait ikayuqtiit mihingnautauyaamik hailihimayut pivighautit ihivriuqlugillu uuktuqtaghat ihuaqhainahuariamik manigharnikkut ayuqhautit ikpigiyauyut nunallaarnit timiqutinit.
-30-
Tuhaqtittiyiit Titiraqaqviat:
Annie Thomlinson
Aulapkaiyiryuaq, Tuhaqtittiyiit
Nunavut Tunngavikkut Timingat
media@tunngavik.com