ᐅᓂᒃᑳᖅᑐᐊᖅ ᐱᐅᕆ ᑰᑉ ᒥᒃᓵᓄᑦ

This program has ended. This page is kept for reference, and some links and documents may no longer be available.

ᑖᓐ ᐊᒻᒪ ᐋᓂ ᒪᒐᒃᓇᖅ ᒪᒃᑯᒃᑑᒃ ᐊᐃᑉᐸᕇᒃ, ᓱᓕ 20-ᓂᒃ ᐅᑭᐅᖃᙱᖦᖢᑎᒃ, ᐅᐱᕐᙶᖑᑎᓪᓗᒍ 1967-ᒥ. "ᒥᑭᑦᑐᑯᓗᖕᒥᒃ ᕿᑐᕐᙵᖃᓚᐅᖅᓯᒪᒐᓐᓄᒃ ᐊᒻᒪᓗ ᐊᓯᐊᓂᒃ ᕿᑐᕐᙵᖅᑖᕐᓂᐊᓕᓚᐅᖅᐳᖓ," ᐃᖅᑲᐅᒪᔪᖅ ᐋᓂ. ᑕᒪᕐᒥᒃ ᐃᓚᒌᑦ ᓄᓇᖃᓚᐅᖅᓯᒪᔫᒃ ᐱᐅᕆ ᕆᕗᒥ ᑯᐃᓐ ᒫᑦ ᓯᒡᔭᖅᐸᓯᖓᓂ ᐅᑭᐅᖅᑕᖅᑑᑉ ᑕᕆᐅᖓᓂ, ᓂᐅᕕᖅᑎᒃᑯᑦ ᓂᐅᕕᖅᑎᒃᑯᑦ ᑕᐅᖅᓰᕝᕕᓕᐅᓚᐅᖅᓯᒪᓪᓗᑎᒃ ᐊᕐᕌᒍᒐᓴᐃᑦ ᓯᕗᓂᐊᒍᑦ 1926-ᒥ. ᐃᓄᐃᑦ ᑕᐅᕙᓂᕐᒥᐅᑕᐃᑦ – 75-ᐸᓗᐃᑦ, 1950-ᖏᓐᓂ – ᓇᒧᙵᐅᕈᓘᔭᖃᑦᑕᓚᐅᖅᓯᒪᔪᑦ, ᓄᓇᖅᐸᓯᖕᒧᑦ ᐅᒃᑯᓯᒃᓴᓕᖕᒧᑦ ᑐᒃᑐᓯᐅᖅᖢᑎᒃ ᐊᒻᒪ ᓯᑯᒧᑦ ᓇᑦᑎᖅᓯᐅᖅᖢᑎᒃ. ᐊᓯᖏᑎᑐᑦ ᑕᐃᔅᓱᒪᓂ, ᓱᖏᐅᙵᓕᓚᐅᖅᓯᒪᔫᒃ ᓂᐅᕕᖅᑎᒃᑯᓐᓂᙶᖅᑐᓂᒃ ᓂᐅᕕᖅᑎᒃᑯᓐᓂ, ᐱᑎᑕᐅᕙᒃᖢᑎᒃ ᖃᑯᖅᑕᓂᒃ ᑎᕆᒐᓂᐊᑦ ᐊᒥᖏᓐᓂᒃ. ᑖᓐ ᐊᑖᑕᖓ, ᐅᓪᓕᑲᑦᑕᖅ, ᖃᐅᔨᒪᔭᐅᓂᖃᓚᐅᖅᐳᖅ ᑭᕙᓪᓕᕐᒥ ᐊᖑᓇᓱᒃᑎᑦᑎᐊᕙᐅᓂᖓᓂᒃ ᐊᒻᒪ ᓄᒃᑕᖅᑎᑦᑎᐊᕙᐅᓂᖓᓂᒃ. "ᐊᕐᕌᒍᑕᒫᑦ, ᕿᒧᒃᓯᒃᑯᑦ ᐅᖅᓱᖅᑑᓕᐊᖅᐸᓚᐅᖅᐳᖅ," ᐃᖅᑲᐅᒪᕗᖅ ᒪᒐᒃᓇᒃ. ᐃᖏᕐᕋᓂᕆᓚᐅᖅᑕᖓ ᑕᓪᓕᒪᓂᒃ ᓯᓂᒋᐊᖃᖅᐸᓚᐅᖅᐳᖅ ᐅᑎᒧᑦ. ᑕᐃᒪᐃᓪᓚᕆᓚᐅᖅᐳᖅ ᒪᐃ, 1967-ᒥ, ᐃᕐᓂᖓ ᓇᑦᑎᕋᓱᒋᐊᖅᓯᒪᑎᓪᓗᒍ ᓄᓕᐊᕐᒥᓂᒃ ᓄᑲᖅᖠᕐᒥᓂᒃ. "ᐋᓂᓗ ᑲᑎᙵᓕᓵᕋᓐᓄᒃ, ᓇᑦᑎᕋᓱᒃᐸᓚᐅᖅᓯᒪᒐᓐᓄᒃ ᕿᑭᖅᑕᕐᔪᐊᑉ ᖃᓂᒋᔮᓂ," ᐃᖅᑲᐅᒪᔪᖅ ᑖᓐ. ᐊᓯᖏᑦ ᐃᓚᒌᑦ, ᐲᑕ ᐊᐱᐊᓇ ᓄᓕᐊᖓᓗ ᓲᓯ, ᑕᖕᒫᖅᓯᒪᓚᐅᖅᓯᒪᔫᒃ Ellice River-ᒥ, ᑭᖑᓪᓕᖅ ᐊᖏᓛᖑᔪᖅ ᑰᒃ ᐱᖓᖕᓇᖓᓂ Perry River ᐃᓂᖃᕐᕕᕕᓂᐊᓂ. ᐊᓯᖏᓐᓂᒡᓗ, Ellice River ᖃᐅᔨᒪᔭᐅᓚᐅᖅᐳᖅ ᐃᖃᓗᖃᑦᑎᐊᕐᓂᖓᓄᑦ. ᒪᐃ 1967-ᒥ, ᐅᑕᖅᑭᓚᐅᖅᐳᑦ ᐸᓂᖕᒥᓂᒃ ᐅᑎᕐᓂᐊᕐᓂᖓᓂᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓂᒃ ᐃᓅᕕᖕᒥ. ᐃᓕᓐᓂᐊᖅᑏᑦ ᖃᖓᑕᓲᒃᑯᑦ ᐅᑎᖅᑎᑕᐅᓪᓗᑎᒃ Perry River-ᒧᑦ ᑕᐅᖅᓰᕕᖕᒧᑦ, ᑕᐃᑲᓂᓗ ᐃᓚᒌᑦ ᑲᑎᕝᕕᒋᓂᐊᖅᖢᓂᔾᔪᒃ. ᐊᐱᐊᓇ ᐃᓱᒪᓕᓚᐅᖅᐳᖅ, ᐊᐅᓪᓚᕆᐊᖃᓕᖅᖢᓂ ᐱᐅᕆ ᕆᕗᒧᑦ ᖃᖓᑕᓲᒥᒃ ᐊᐴᑎᔭᖅᑐᕐᓗᓂ. ᐊᓯᐊᑦᑕᐅᖅ ᐃᓕᓐᓂᐊᖅᑎ ᖃᖓᑕᓲᒧᑦ ᐃᑭᕙᓪᓕᐊᔪᖅ, ᐋᓚᓯ ᕼᐊᓗᒃᑕᓕᒃ, ᓂᕕᐊᖅᓵᑯᓗᒃ 12-ᓂᒃ ᐅᑭᐅᓕᒃ, ᐅᑎᖅᐸᓪᓕᐊᓕᓚᐅᖅᐳᖅ ᑕᓪᓕᒪᒋᓕᖅᑕᖓᓂ ᐊᕐᕌᒍᖓᓂ ᐃᓅᕕᖕᒥ, ᓄᑲᖓᓗ, ᑕᒪᕐᒥᒃ ᓯᕗᓪᓕᖅᐹᖑᖃᑕᐅᓪᓗᑎᒃ ᐃᓅᓪᓗᑎᒃ ᐃᓕᓐᓂᐊᖃᑕᐅᓪᓗᑎᒃ. ᐊᖓᔪᖅᑳᖏᒃ, ᑖᒥ ᐊᒻᒪ ᐄᒪᓕ ᕼᐊᓗᒃᑕᓕᒃ, ᓇᓗᓇᙱᑦᑐᖅ ᑕᑯᒃᑲᓐᓂᓛᕈᒪᓕᓚᐅᖅᑑᒃ ᐸᓂᖕᒥᓂᒃ ᐊᑯᓂᐊᓗᒃ ᐋᓐᓂᕐᓇᖅᑐᒥᒡᓗ ᐊᐅᓪᓚᖅᓯᒪᓚᐅᖅᑎᓪᓗᒋᑦ. ᖃᐅᔨᒪᓚᐅᙱᓚᓪᓕ, ᑕᒪᓐᓇ ᑭᖑᓪᓕᖅᐹᕆᓂᐊᕐᒪᒍ ᐊᕐᕌᒍ ᐸᓂᖏᑦ ᐃᓕᓐᓂᐊᕆᐊᕐᓂᐊᕐᓂᖏᓐᓂᒃ. ᑕᐃᕕᑦ ᓯᒃᓯᒃ, ᒪᒃᑯᒃᑐᖅ ᐊᖑᑎ 25-ᓂᒃ ᐅᑭᐅᖃᖅᖢᓂ 1967-ᒥ, ᑭᖑᓂᐊᒍᑦ ᑲᑎᑎᑕᐅᓚᐅᖅᓯᒪᓪᓗᓂ ᐋᓚᓯ ᕼᐊᓗᒃᑕᓕᒃ, ᓄᓇᖃᓚᐅᖅᓯᒪᕗᖅ ᐊᒃᑲᖓᓗᖕᒥ, ᑯᑉᓗᒃ, ᐊᑖᑕᖓ ᐃᓅᔪᓐᓃᓚᐅᖅᑎᓪᓗᒍ. ᒪᐃᖑᓚᐅᖅᑐᒥ, ᐊᐅᓪᓚᖅᓯᒪᓚᐅᖅᑑᒃ ᓇᑦᑎᕋᓱᒋᐊᖅᖢᑎᒃ ᐳᑐᓕᖕᒥ (ᕼᐊᑦ ᕿᑭᖅᑕᖓᓂ), 170 ᑭᓛᒥᑕᓂᒃ ᐅᖓᓯᖕᓂᓕᖕᒥ ᐅᐊᖕᓇᖅᐸᓯᐊᓂ. ᐅᓪᓗᐃᑦ ᐊᓂᒍᖅᑎᓪᓗᒋᑦ, ᑕᒪᕐᒥᑦᑎᐊᖅ ᑖᒃᑯᐊ ᐃᓄᐃᑦ ᐱᓚᐅᖅᐳᑦ ᑖᔅᓱᒥᖓᔅᓴᐃᓐᓇᖅ ᑲᒪᓇᖅᑐᒥᒃ ᑐᓴᒐᒃᓴᒥᒃ: ᐃᓅᓯᖅ ᐱᐅᕆ ᕆᕗᒥ ᐊᓯᔾᔨᕐᓂᐊᓕᓚᐅᖅᐳᖅ ᑕᐅᕗᖓᓕᒫᖅ – ᑕᐅᖅᓰᕝᕕᒃ ᐱᐅᕆ ᕆᕗᒥ ᒪᑐᓚᐅᖅᐳᖅ ᐊᒻᒪ ᔭᐃᒥᓯ ᓵᑉᒪᓐ, ᑭᖑᓪᓕᖅᐹᖑᓪᓗᓂ ᐊᐅᓚᑦᑎᔨᐅᔪᖅ, ᐊᓂᓚᐅᖅᐳᖅ. "ᐳᑐᓕᖕᒦᓐᓂᑦᑎᓐᓂ, ᐊᐱᐊᓇ ᐅᕙᑦᑎᓐᓄᙵᐅᓚᐅᖅᐳᖅ ᐱᐅᕆ ᕆᕗᒥᙶᖅᖢᓂ ᐅᖃᖅᖢᓂᓗ ᓂᐅᕕᕐᕕᒃ ᒪᑐᓯᒪᓂᕋᖅᖢᓂᐅᒃ," ᐃᖅᑲᐅᒪᕗᖅ ᓯᒃᓯᒃ. ᐊᐱᐊᓇ ᐃᖅᑲᐅᒪᕗᖅ ᓂᖓᐅᒃᑯᓂ ᑎᑭᓚᐅᕐᓂᖓᓂ ᓄᓇᓕᕋᓛᒧᑦ Ellice River-ᒧᑦ, ᐃᖃᓗᒃᑑᑦᑎᐊᓕᐊᖅᐸᓪᓕᐊᓪᓗᓂ, ᑐᓴᒐᒃᓴᖃᖅᖢᓂ ᑕᐃᓐᓇ ᐃᓂᐅᔪᖅ ᒪᑐᓯᒪᓂᖓᓂᒃ. ᖃᔅᓯᒐᓚᐃᑦ ᐃᓚᒌᑦ ᐃᖃᓗᒃᑑᑦᑎᐊᒨᓚᐅᖅᐳᑦ, ᐊᒥᓱᓪᓗ ᓱᓕ ᑕᐃᑲᓂᕐᒥᐅᑕᐅᓪᓗᑎᒃ ᑭᖑᕚᖏᓪᓗ. ᐊᐱᐊᓇ ᐃᓱᒪᓚᐅᖅᐳᖅ ᑕᒪᑐᒥᖓ ᑭᓯᐊᓂ, ᐃᓱᒪᒥᒍᑦ, "ᒪᓕᒋᐊᖃᓚᐅᖅᐳᖅ" ᓴᑭᒃᑯᒥᓂᒃ. ᓯᐊᔭ ᐅᓕᑲᑦᑕᖅ, ᐃᖅᑲᐅᒪᕗᖅ ᐅᑎᕋᒥ ᐅᖅᓱᖅᑑᒥᑦ ᐅᐃᖓᓗ ᕿᒧᒃᓯᒃᑯᑦ, ᓇᓂᓯᓪᓗᓂ ᐱᐅᕆ ᑰᖕᒥ ᐃᓂᖃᕐᕕᕕᓂᐊ ᕿᒪᒃᑕᐅᓂᖓᓂᒃ. ᐱᓇᓱᐊᕈᓯᓕᒫᖅ ᓇᑦᑎᕋᓱᓚᐅᖅᖢᑎᒃ ᕿᑭᖅᑕᕐᔪᐊᕐᒥ, ᑖᓐ ᐊᒻᒪ ᐋᓂ ᒪᒐᒃᓇᖅ ᐅᑎᓚᐅᖅᑑᒃ ᐱᐅᕆ ᕆᕗᒧᑦ ᓂᕿᑖᕆᐊᖅᑐᖅᖢᑎᒃ, ᑭᓯᐊᓂ ᖃᐅᔨᓕᑕᐃᓐᓇᓚᐅᖅᑑᒃ ᐃᓂᖃᕐᕕᐅᔪᖅ ᒪᑐᓯᒪᓂᖓᓂᒃ. "ᒪᑐᐃᖓᓚᐅᖅᑐᖅ ᐊᐅᓪᓚᕋᑦᑕ. ᖃᐅᔨᒪᓚᐅᙱᓚᒍᑦ ᒪᑐᓯᒪᓂᖓᓂᒃ." ᑐᐱᕐᒥᓂᒃ ᕿᒪᐃᓯᒪᓚᐅᖅᐳᑦ, ᐊᖑᓇᓱᒋᐊᖅᓯᒪᓪᓗᑎᒃ, ᓂᕆᐅᒃᖢᑎᒃ ᐅᑎᓛᕋᓱᒋᓪᓗᑎᒃ ᓄᑖᓂᒃ ᓂᕿᑖᕐᓗᑎᒃ. ᖃᐅᔨᓕᓚᐅᖅᑑᒃ ᐋᓂᐅᑉ ᐊᑖᑕᖓᓂᒃ, ᐹᑦᓯ ᑐᐱᓕᑳᑦᒥᑦ, ᐱᖓᖕᓇᖓᓄᐊᕈᒪᓪᓗᓂ ᕿᖓᐅᒻᒧᑦ. "ᐃᑲᔪᕈᓐᓇᔾᔮᙱᓇᒃᑭᑦ," ᐅᖃᐅᑎᓪᓗᓂᒋᑦ, ᐅᖃᐅᑎᓪᓗᓂᒋᓪᓗ ᒪᓕᖁᓪᓗᓂᒋᑦ ᐅᓪᓕᑲᑦᑕᖅ, ᑖᓐ ᐊᑖᑕᖓ. "ᐊᖏᕐᕋᕋᒪ ᐃᓅᕕᖕᒥᑦ, ᖃᖓᑕᓲᒥᑦ ᓂᐅᓚᐅᖅᑎᓪᓗᖓ, ᐊᖓᔪᖅᑳᓐᓄᑦ ᐊᖏᕐᕋᐅᔾᔭᐅᓚᐅᖅᐳᖓ," ᐃᖅᑲᐅᒪᔪᖅ ᐋᓚᓯ ᕼᐊᓗᒃᑕᓕᒃ. "ᑕᒪᕐᒥᒃ ᐴᖅᑲᖅᓯᒪᓚᐅᖅᑐᑦ ᑐᐱᐅᑉ ᐃᓗᐊᓄᐊᕋᒪ. ᖃᓪᓗᓈᖅᑕᖃᕈᓐᓃᕐᓂᕋᖅᑕᐅᓪᓗᓂ, ᓂᐅᕕᕐᕕᒃ ᒪᑐᔭᐅᓕᓚᐅᖅᐳᖅ." ᖃᓄᐃᓕᖓᓂᐊᕐᓂᖓ ᐋᖅᑭᒃᑕᐅᓚᐅᖅᐳᖅ. ᑕᓪᓕᒪᑦ ᐃᓚᒌᑦ, ᓂᔾᔭᐅᓯᔭᖅᑎᑦ 60 ᖃᓂᒋᔮᓂ, ᒪᓕᒃᖢᑎᒃ ᐊᖓᔪᒃᖠᕐᓂᒃ, ᑯᑉᓗᒃ ᐊᒻᒪ ᐅᓕᑲᑦᑕᖅ, ᓯᕗᓕᖅᑎᒋᔭᐅᓪᓗᑎᒃ, ᐅᖅᓱᖅᑑᒨᕐᓂᐊᓕᓚᐅᖅᐳᑦ ᐃᓅᓯᕐᒥᓂᒃ ᐃᖏᕐᕋᓪᓗᑎᒃ. ᑕᐅᑐᒃᑕᖓᒍᑦ, ᕿᒫᓂᐅᓚᐅᖅᐳᖅ ᐊᓐᓇᐅᒪᓇᓱᐊᕐᓂᕐᒧᑦ. ᐊᐅᓪᓚᓚᐅᖅᑳᕋᓂ (ᐊᓯᐅᕙᓪᓕᐊᓪᓗᓂ, ᐃᓄᐃᑦ ᑕᐅᑐᒃᑕᖓᒍᑦ ᑕᐃᔅᓱᒪᓂ) ᓂᐅᕕᖅᑎᒃᑯᑦ ᐊᖓᔪᖅᑳᖓ ᕿᒪᐃᓚᐅᖅᐳᖅ ᐴᖅᑲᖅᓯᒪᔪᓂᒃ ᐊᑐᖅᑕᐅᒐᔪᒃᑐᓂᒃ ᐃᓚᒌᓄᑦ. "ᖃᔅᓰᓐᓇᑯᓗᖕᓂᒃ ᐃᒻᒧᖃᓚᐅᖅᐳᖅ, ᐃᖅᑲᐅᒪᙱᑦᑐᖓ ᖃᔅᓯᓂᒃ, ᕿᑐᕐᖓᖅᑖᓚᐅᖅᐳᒍᓪᓗ," ᐋᓂ ᒪᒐᖕᓇᖅ ᐃᓱᒪᓕᓚᐅᖅᐳᖅ. "ᑭᓱᑕᖃᓗᐊᓚᐅᙱᓚᖅ," ᐅᖃᓚᐅᖅᐳᖅ ᐅᐃᖓ, ᑖᓐ, ᐃᓱᒪᓪᓗᓂ ᐊᕐᕌᒍᑦ 40 ᐊᓂᒍᖅᓯᒪᓕᖅᑐᓂᒃ. "ᐸᓚᐅᒑᖅᑕᖃᓚᐅᖅᐳᖅ, ᑏᒥᒃ, ᓯᐅᕋᐅᔮᖅᑐᒥᒃ. 10 ᒑᓚᓂᒃ ᐊᐅᓚᐅᑎᓕᖕᓂᒃ ᒑᓯᑕᖃᓚᐅᖅᐳᖅ. ᒑᓯᑕᖃᒐᓛᓚᐅᖅᑐᖅ ᓱᐴᔫᒧᑦ. ᓴᒃᑯᑕᖃᕋᓂ, ᒪᑦᑎᑦᑕᐅᑎᑕᖃᕋᓂ, ᐊᖑᓇᓱᒍᑎᒃᓴᖅᑕᖃᕋᓂ." ᑕᕝᕙᙵᑦᑕᐃᓐᓇᖅ, ᖃᐅᔨᒃᑲᖅᑕᐅᒐᓂᓗ, ᑖᒃᑯᐊ ᐃᓄᐃᑦ ᐃᓚᒌᑦ ᑐᕚᖃᓪᓚᕆᓕᓚᐅᖅᑐᑦ – ᐃᑦᑐᒃᑯᖏᑦ ᑕᐃᒪᐃᖃᑦᑕᓚᐅᖅᓯᒪᖕᒪᑕ – ᓇᖕᒥᓂᖅ ᐱᖁᑎᒥᓄᑦ, ᓇᖕᒥᓂᖅ ᐊᓐᓇᐅᒪᔪᓐᓇᕐᓂᕐᒥᓂᒃ ᓄᓇᒥ. ᐅᐱᕐᖓᒃᓵᖑᓕᓚᐅᖅᐳᖅ, ᑭᖑᕙᓗᐊᙱᖦᖢᓂ ᕿᒧᒃᓯᕆᐊᒃᓴᖅ, ᐅᖁᒪᐃᑦᑐᓂᒃ ᐅᓯᔭᕆᐊᒃᓴᖅ ᐊᔪᕐᓇᓚᐅᖅᑑᒐᓗᐊᖅ ᐊᐳᑎᐅᑉ ᐊᕿᑦᑐᒥ. ᑎᕆᒐᓂᐊᓄᑦ ᒥᑭᒋᐊᑦ, ᐊᒻᒪ ᐅᖁᒪᐃᑦᑐᑦ ᓄᓇᓯᐅᑎᑦ, ᕿᒪᒃᑕᐅᓚᐅᖅᐳᑦ. ᕿᒻᒦᑦ ᖃᒧᑎᓂᒃ ᐅᓯᓕᖅᓱᐃᓪᓗᑎᒃ ᐅᒥᐊᓂᒃ ᐊᖑᑎᑦ ᖃᐅᔨᒪᓚᐅᖅᑕᖏᑦ ᐊᑐᖅᑕᐅᔭᕆᐊᖃᕐᓂᐊᕐᓂᖏᓐᓂᒃ ᓯᑯ ᐊᐅᒃᐸᑦ. ᐅᒥᐊᑦ ᐳᖅᑐᔪᐊᓘᓪᓗᑎᒃ ᑐᐱᕐᓂᒃ, ᑐᒃᑐᐃᑦ ᕿᓯᖏᓐᓂᒃ, ᐊᖑᓇᓱᒍᑎᓂᒃ, ᓂᐅᕕᖅᑎᒃᑯᑦ ᐱᖁᑎᖏᓐᓂᒃ ᐴᖅᓯᒪᔪᓂᒃ, ᐊᒻᒪ ᓄᑕᖅᑲᓂᒃ. ᑕᐅᑦᑐᖃᖅᑰᔨᓪᓗᑎᒃ ᐃᓄᑐᖄᓗᖕᓂᒃ ᐃᓚᒌᓂᒃ, ᐃᖏᕐᕋᓪᓗᑎᒃ ᐱᖁᑎᓕᒫᖏᓐᓂᒃ, ᓄᒃᑕᖅᑐᑦ ᓱᒃᑲᐃᑦᑐᒥᒃ ᓯᑯᒃᑯᑦ ᑯᐃᓐ ᒫᑦ ᓯᒡᔭᖓᒍᑦ, ᑲᓇᖕᓇᒧᑦ ᐃᖏᕐᕋᓪᓗᑎᒃ ᓇᓗᓇᖅᑐᒧᑦ. ᖃᓪᓗᓈᑦ ᓄᓇᖓᓐᓂ ᐸᕐᓇᒃᐸᓪᓕᐊᑎᓪᓗᒋᑦ 1000-ᓂᒃ ᖁᕕᐊᓲᑎᖃᕐᓂᕐᒧᑦ ᐊᒻᒪ Expo 67-ᒧᑦ, ᑖᒃᑯᐊ ᐃᓄᐃᑦ ᐊᒃᓱᕉᑎᖃᓚᐅᖅᐳᑦ ᐃᓅᓯᖏᓐᓂ. ᐊᒥᓱᑲᓪᓚᐅᓚᐅᖅᑑᒃ ᓱᕈᓰᑦ. ᒪᕐᕉᒃ ᐊᕐᓇᐅᔫᒃ ᓯᖓᐃᔫᒃ. ᓯᓚ ᓯᕗᕙᓯᒃᑐᐊᓘᓕᓚᐅᖅᐳᖅ ᐊᐅᓪᓚᕐᓂᕐᓗ ᐊᔪᕐᓇᖅᓯᕙᓪᓕᐊᓕᖅᖢᓂ. ᐃᒃᐱᖕᓂᐊᓂᒃᑯᑦᑕᐅᖅ, ᐆᒻᒪᑎᒃᑯᑦ ᐋᓐᓂᕐᓇᓚᐅᖅᐳᖅ ᐃᓚᖏᓐᓄᑦ ᕿᒪᐃᓚᐅᖅᑐᓄᑦ ᐃᓚᒥᖕᓂᒃ. ᐋᓂ ᒪᒐᒃᓇᖅ ᐃᖅᑲᐅᒪᑦᑎᐊᖅᐳᖅ ᐃᒃᐱᒋᔭᒥᓂᒃ: "ᐱᒋᐊᓚᐅᖅᓯᒪᕗᖓ ᐱᐅᕆ ᕆᕗᒥᑦ 19-ᓂᒃ ᐅᑭᐅᖃᖅᖢᖓ. ᓯᖓᐃᔪᖓ. ᒪᒃᑯᒃᑑᓚᐅᖅᐳᖓ. ᐊᖓᔪᖅᑳᒃᑲ ᕿᒪᓕᓚᐅᖅᐸᒃᑲ. ᑕᐃᒪᐃᓐᓂᖓᓄᑦ ᕿᐊᖃᑦᑕᓚᐅᖅᑐᖓ ᐊᐅᓪᓚᖅᓯᒪᑎᓪᓗᖓ." ᐊᒃᓱᕈᕐᓇᕋᓗᐊᖅᑎᓪᓗᒍ, ᐃᖏᕐᕋᑦᑎᐊᖏᓐᓇᓚᐅᖅᐳᑦ. ᑭᓯᐊᓂ ᑐᓪᒍᑎᑦᓯᕕᖕᒧᑦ ᑎᑭᑉᐸᓪᓕᐊᓕᕋᒥᒃ, ᓵᑦᑑᑉ ᑰᖓᑕ ᐹᖓᑕ ᖃᓂᒋᔮᓂ, 80 ᑭᓛᒥᑕᓂᒃ ᐅᖓᓯᖕᓂᖃᓚᐅᖅᖢᑎᒃ, ᓯᑯ ᓱᕋᒃᐸᓪᓕᐊᓕᓚᐅᖅᐳᖅ ᑯᑉᓗᒃ ᐊᒻᒪ ᐅᓪᓕᑲᑦᑕᖅ ᐊᑦᑕᕐᓇᕋᓱᒋᓕᖅᖢᑎᒃ ᑲᔪᓯᔭᕆᐊᒃᓴᖅ. ᑲᑎᙵᔪᑦ ᑕᖕᒫᖅᓯᒪᓚᐅᖅᐳᑦ ᐅᑕᖅᑭᓪᓗᑎᒃ ᐃᒪᕕᖕᒧᑦ, ᐃᖏᕐᕋᓂᕆᔭᖏᑦ ᑲᔪᓯᔪᓐᓇᕐᓂᐊᕐᒪᑕ ᐅᒥᐊᒃᑯᑦ. ᑕᒪᓐᓇᑦᑕᐅᖅ ᐊᑦᑕᕐᓇᓚᐅᖅᐳᖅ, ᐊᖅᑯᑎᖏᑦ ᓯᑯᒧᑦ ᓄᖅᑲᖓᑎᑕᐅᓪᓗᑎᒃ ᐊᐅᔭᒃᑯᑦ, ᐊᒻᒪ ᐊᒥᓱᐊᓗᖕᓂ ᐊᑲᐅᙱᓕᐅᕈᑎᖃᖅᖢᑎᒃ ᐅᒥᐊᓄᑦ, ᐅᑐᐱᕆᐅᓕᖅᑎᓪᓗᒍ ᑎᑭᑕᐃᓐᓇᓚᐅᖅᐳᑦ ᐅᓇᑕᖅᑐᒃᓴᖃᕐᕕᖕᒧᑦ ᐅᖅᓱᖅᑑᑉ ᕿᑭᖅᑕᖓᓂ. ᖃᔅᓯᑲᓪᓚᐃᑦ ᐃᓄᐃᑦ ᑕᖅᑭᓂᒃ ᑕᓪᓕᒪᓂᒃ ᐃᖏᕐᕋᓚᐅᖅᑐᑦ ᐃᓅᔪᓐᓃᖅᓯᒪᓕᖅᑐᑦ. ᑕᐃᒃᑯᐊ ᐊᓐᓇᐅᒪᓚᐅᖅᑐᑦ ᐅᓂᒃᑳᕆᐊᖅᑐᖅᖢᑎᒃ ᐅᖅᓱᖅᑑᒥ, ᑕᒪᕐᒥᑲᓴᒃ, ᐃᖅᑲᐅᒪᕗᑦ ᐊᒃᓱᕈᕈᑎᒋᓚᐅᖅᓯᒪᔭᖏᓐᓂᒃ ᐃᓱᒪᑦᑎᐊᖅᖢᑎᒃ. ᑕᐃᔅᓱᒪᓂ, ᐋᓂ ᒪᒐᒃᓇᒃ ᐅᖃᓚᐅᖅᐳᖅ, "ᐃᓱᒪᒋᓚᐅᙱᑕᕗᑦ." ᓂᕿᓪᓚᑦᑖᓂᒃ ᓂᕆᔪᓐᓇᑦᑎᐊᓚᐅᖅᐳᑦ, ᐊᒻᒪ ᐊᔪᕐᓇᖅᑐᖅᓯᐅᖅᐸᒃᖢᑎᒃ ᐃᖏᕐᕋᔭᕆᐊᒃᓴᖅ. ᐃᓱᒪᓇᖅᑐᖅ ᐃᒃᐱᖕᓂᐊᓂᕆᓚᐅᖅᑕᖓ, ᓄᓇᒋᙱᑕᒥᓃᖦᖢᑎᒃ, ᐃᓚᒥᖕᓂᒃ ᐱᖃᓐᓇᕆᔭᒥᓂᒡᓗ ᕿᒪᐃᓯᒪᓪᓗᑎᒃ, ᐊᒃᓱᕈᕐᓇᕐᓂᖅᐹᖑᓚᐅᖅᐳᖅ. "ᐃᓱᒪᖃᑦᑕᓕᖅᐳᖓ ᖃᓄᐃᓕᐅᓚᐅᕐᓂᑦᑎᓐᓂᒃ ᐃᓛᓐᓂᒃᑯᑦ," ᐋᓂ ᐅᖃᕆᓪᓗᓂ, ᖁᕝᕕᐅᓕᖅᖢᓂ ᐃᔨᒥᒍᑦ. "ᐊᒃᓱᕈᕐᓇᖅᑐᒻᒪᕆᐅᓚᐅᖅᐳᖅ ᐱᐅᕆ ᕆᕗᒦᙶᖅᖢᓂ, ᐃᓱᒪᒋᓪᓗᒍ ᑕᒪᓐᓇ." ᑕᐃᒪᐃᒃᑲᓗᐊᖅᑎᓪᓗᒍ, ᒫᓐᓇ ᖁᕕᐊᓱᓕᖅᐳᑦ ᖃᐅᔨᒪᓕᕋᒥᒃ ᐅᓂᒃᑳᖅᑐᐊᓂᒃ ᕿᒫᓂᕆᓚᐅᖅᑕᖏᓐᓂᒃ ᐊᓐᓇᐅᒪᓇᓱᒃᖢᑎᒃ ᓂᐱᓕᐅᖅᑕᐅᓯᒪᓂᖏᓐᓂᒃ ᑭᖑᕚᑦᑎᓐᓄᑦ.

Past Programs & Services