ᐅᒥᖕᒪᒃᑑᖅ

1998-ᖑᑎᓪᓗᒍ, ᐃᓄᐃᑦ ᐅᖅᓱᖅᑑᒥ ᑎᑎᕋᓚᐅᕐᒪᑕ ᓄᓇᕗᑦ ᑐᙵᕕᒃᑯᓐᓄᑦ ᐊᖓᔪᖅᑳᑉ ᑐᖏᓕᐊᓄᑦ ᔭᐃᒥᓯ ᐃᑦᑐᓗᒃ, "ᐱᔾᔪᑎᒋᓪᓗᒍ ᕼᐊᑦᓴᓐ ᐸᐃ ᑕᐅᖅᓰᕕᕕᓂᖅ ᓴᖅᑭᑕᐅᓚᐅᖅᓯᒪᔪᖅ ᐃᓂᒋᔭᖓᓂ ᖃᐅᔨᒪᔭᐅᔪᒥ ᐱᐅᕆ ᕆᕗᒥ." ᑎᑎᖅᑲᖅ ᐊᑎᓕᐅᖅᑕᐅᓚᐅᖅᑐᖅ ᐱᖓᓲᔪᖅᑐᓄᑦ ᐃᓄᓐᓄᑦ, ᑭᒡᒐᖅᑐᐃᓪᓗᑎᒃ ᐊᖏᓂᖅᓴᓂᒃ ᑲᑎᙵᔪᓂᒃ, 1967-ᒥ, ᓅᓚᐅᖅᑐᑦ ᐱᐅᕆ ᕆᕗᒥᑦ ᐅᖅᓱᖅᑑᒧᑦ. ᐅᖃᓚᐅᖅᑐᑦ, "ᑕᒪᓐᓇ ᐊᒃᓱᕈᕐᓇᖅᑐᒻᒪᕆᐅᓚᐅᖅᑐᖅ ᐃᓄᖏᓐᓄᑦ ᐱᐅᕆ ᕆᕗᒥ. ᓂᙵᐅᒪᖏᑦᑐᒍᑦ ᖃᓄᑐᐃᓐᓇᕐᓘᓐᓃᑦ, ᖃᐅᔨᒪᖁᑐᐃᓐᓇᖅᑕᕗᑦ ᐃᓄᐃᑦ ᐅᓂᒃᑳᑦᑎᓐᓂᒃ, ᐊᒻᒪᓗ ᖃᓄᖅ ᐱᒡᒐᓇᖅᑎᒋᓚᐅᕐᒪᖔᖅ."

2003-ᒥ, ᓄᓇᕗᑦ ᑐᙵᕕᒃᑯᑦ ᐃᖅᑲᓇᐃᔭᖅᑎᑦᑎᓕᓚᐅᖅᐳᑦ ᐅᓂᒃᑳᖅᑐᐊᓕᕆᔨᒥᒃ ᑕᐃᕕᑦ ᐱᐊᓕᒥᒃ ᐊᐱᖅᓱᑦᑎᐊᖁᓪᓗᒍ ᐅᖅᓱᖅᑑᒥ. ᑕᒪᓐᓇ ᐱᓕᕆᐊᖑᓚᐅᖅᐳᖅ ᐊᕐᕌᒎᖕᓄᑦ ᒪᕐᕉᖕᓄᑦ ᐊᒻᒪ ᖃᔅᓰᖅᓱᑲᓪᓚᒃᖢᑎᒃ ᐳᓛᕆᐊᖅᑕᐅᕙᒃᖢᑎᒃ, ᓯᕗᓪᓕᕐᒥ ᑲᑎᖃᑎᖃᖅᖢᑎᒃ ᕿᒪᒃᑕᐅᓯᒪᔪᓂᒃ, ᐸᕐᓇᐅᑎᓕᐅᖃᑎᒋᓪᓗᒋᑦ, ᑭᖑᓂᐊᒍᓪᓗ ᐊᐱᖅᓱᑲᑕᒃᖢᑎᒃ ᐊᒻᒪ ᖃᐅᔨᒋᐊᒃᑲᓐᓂᖅᐸᒃᖢᑎᒃ, ᐊᒻᒪ ᑭᖑᓪᓕᖅᐹᒥᒃ ᓇᓗᓇᐃᖅᓯᓇᓱᒃᖢᑎᒃ ᑎᑎᕋᖅᑕᐅᓯᒪᔪᑦ ᑕᒻᒪᖅᓯᒪᙱᒃᑲᓗᐊᕐᒪᖔᑕ. ᑭᖑᓪᓕᖅᐹᖅᓯᐅᑎ ᐅᖃᓕᒫᒐᖅ 200-ᓂᒃ ᒪᒃᐱᒐᖃᖅᖢᓂ ᐊᐱᖅᓱᖅᑕᐅᔪᕕᓂᕐᓂᒃ 6-ᓂᒃ ᑐᓴᖅᑎᑦᑎᔪᓂᒃ ᐱᖓᓱᓂᒃ ᐅᖃᐅᓯᕐᓂᒃ: ᖃᓪᓗᓈᑎᑐᑦ, ᐃᓄᒃᑎᑐᑦ ᐊᒻᒪ ᐃᓄᐃᓐᓇᖅᑐᓐ. ᐅᓂᒃᑳᖏᑦ, ᑕᐃᒪᐃᖁᔨᓪᓗᑎᒃ, ᓂᐱᓕᐅᖅᑕᐅᓯᒪᑦᑎᐊᖅᐳᑦ. ᐃᓚᖓᓐᓂ ᑲᑎᙵᔪᑦ ᑲᑎᒪᑎᓪᓗᒋᑦ, ᑕᒪᓐᓇ ᐱᓕᕆᐊᖑᓂᖓ ᐃᓱᓕᑉᐸᓪᓕᐊᓕᖅᑎᓪᓗᒍ, ᕿᐊᔪᖃᓚᐅᖅᐳᖅ ᐃᕿᑦᑎᔪᖃᖅᐸᒃᖢᓂᓗ, ᑭᓯᐊᓂ ᐱᓗᐊᖅᑐᒥ ᖁᕕᐊᓱᓕᓚᐅᖅᐳᑦ ᐃᓅᓯᕆᓚᐅᖅᑕᖏᑦ ᐃᖅᑲᐅᒪᔭᐅᓂᐊᕐᓂᖏᓐᓂᒃ ᐊᓯᒥᓄᑦ ᐊᕐᕌᒍᒐᓴᖕᓄᑦ ᐊᒡᒋᖅᑐᓄᑦ.

ᑕᐃᕕᑦ ᐱᐊᓕ