ᐱᕚᓪᓕᕈᑎᒃᓴᑦ ᐊᑎᓕᐅᖅᑕᐅᓂᕐᒧᑦ

ᐊᑐᐊᒐᓕᕆᔨᒃᑯᑦ ᐊᒻᒪ ᐸᕐᓇᐃᔨᑦ ᓄᓇᕗᑦ ᑐᙵᕕᒃᑯᑦ ᐸᐸᑦᑎᓲᖑᕗᑦ ᑎᑎᕋᖅᓯᒪᔪᓂᒃ ᐃᓄᐃᑦ ᓇᖕᒥᓂᖁᑎᖏᓐᓂᒃ, ᑕᐃᒪᐃᑦᑕᕆᐊᖃᖅᑎᑕᐅᑎᓪᓗᒍ ᑎᑎᕋᖅᓯᒪᓂᓕᒃ 24−ᒥ ᓄᓇᕗᒻᒥ ᐊᖏᕈᑎᒥ.

ᑎᑎᕋᖅᓯᒪᓂᓕᒃ 24 ᐱᔭᕆᐊᖃᖅᑎᑦᑎᕗᖅ ᒐᕙᒪᑐᖃᒃᑯᓐᓂᒃ ᓄᓇᕗᒻᒥᓗ ᒐᕙᒪᒋᔭᐅᔪᓂᒃ ᐱᐅᓯᒋᐊᖅᑎᑦᑎᓗᑎᒃ ᐃᓚᐅᕙᖕᓂᖏᓐᓂᒃ ᐃᓄᐃᑦ ᓇᖕᒥᓂᖁᑎᖏᑦ ᑮᓇᐅᔭᓕᐅᕋᓱᖕᓂᕐᒧᑦ ᓄᓇᕗᒻᒥ, ᐱᐅᓯᒋᐊᖅᑎᑦᑎᓗᑎᒃ ᐊᔪᙱᓐᓂᕆᔭᐅᔪᓂᒃ ᐃᓄᐃᑦ ᓇᖕᒥᓂᖁᑎᖏᓐᓄᑦ ᐱᓇᔪᖃᑕᐅᔪᓐᓇᕐᓗᑎᒃ ᒐᕙᒪᒃᑯᑦ ᑳᓐᑐᓛᒋᔭᖏᓐᓄᑦ, ᓴᐳᒻᒦᓗᑎᒡᓗ ᐃᖅᑲᓇᐃᔭᖅᑎᑦᑎᓂᕐᒥᒃ ᐃᓄᖕᓂᒃ ᑭᒡᒐᖅᑐᐃᓂᖃᑦᑎᐊᕐᓗᑎᒃ ᓄᓇᕗᒻᒥ ᐃᖅᑲᓇᐃᔭᖅᑎᒋᔭᐅᔪᓂ.

ᓄᓇᕗᑦ ᑐᙵᕕᒃᑯᑦ ᐃᓄᐃᑦ ᓇᖕᒥᓂᖁᑎᖏᑦ ᐊᑎᖏᑦ ᐃᑲᔫᑎᐅᕗᑦ ᒪᕐᕉᖕᓄᑦ ᒐᕙᒪᐅᔫᖕᓄᑦ ᑐᕌᒐᕆᔭᐅᔪᓄᑦ ᑎᑭᐅᑎᖁᓪᓗᒋᑦ. ᐆᒃᑑᑎᒋᓗᒍ, ᓄᓇᕗᑦ ᒐᕙᒪᒃᑯᑦ ᓄᓇᕗᒻᒥ ᓇᖕᒥᓂᖃᖅᑐᓂᒃ ᐃᑲᔫᑎ (NNI) ᐊᑐᐊᒐᖓ ᐋᖅᑭᒃᓯᓯᒪᕗᖅ ᐱᔪᒥᒋᔭᐅᓂᖅᓴᐅᔪᓂᒃ ᐊᑭᑦᑐᕋᐅᑎᓂᕐᒧᑦ ᐋᖅᑭᒋᐊᖅᓯᓂᕐᒥᒃ 5%−ᒥᒃ ᐊᑭᑦᑐᕋᐅᑎᓄᑦ ᒐᕙᒪᒃᑯᑦ ᑳᓐᑐᓛᖏᓐᓄᑦ ᐃᓄᖕᓄᑦ ᓇᖕᒥᓂᕆᔭᐅᔪᓄᑦ ᖁᑦᑎᖕᓂᓕᒃ 1 ᐃᓄᖕᓄᑦ ᓇᖕᒥᓂᕆᔭᐅᔪᓄᑦ, 10% ᐃᓄᖕᓄᑦ ᓇᖕᒥᓂᕆᔭᐅᔪᓄᑦ ᖁᑦᑎᖕᓂᓕᒃ 2 ᐃᓄᖕᓄᑦ ᓇᖕᒥᓂᕆᔭᐅᔪᓄᑦ, ᐊᒻᒪ 15% ᐃᓄᖕᓄᑦ ᓇᖕᒥᓂᕆᔭᐅᔪᓄᑦ ᖁᑦᑎᖕᓂᓕᒃ 3 ᐃᓄᖕᓄᑦ ᓇᖕᒥᓂᕆᔭᐅᔪᓄᑦ.

ᑲᓇᑕᐅᑉ ᒐᕙᒪᒃᑯᖏᑦ ᖃᐅᔨᒋᐊᖃᑦᑕᕆᐊᖃᕐᒥᔪᑦ ᑎᑎᕋᖅᓯᒪᔪᓂᒃ ᑳᓐᑐᕌᒃᑖᖅᑎᑦᑎᓂᐊᖅᑎᓪᓗᒋᑦ ᓄᓇᕘᒥᒃ. ᓄᓇᕗᑦ ᑐᙵᕕᒃᑯᑦ ᐊᖏᖃᑎᖃᖅᓯᒪᓂᖏᑦ ᐅᓇᑕᖅᑐᒃᓴᓕᕆᔨᒃᑯᓐᓂᒃ ᓴᓗᒻᒪᓴᖅᑕᐅᓂᖏᓐᓄᑦ ᐅᓇᑕᖅᑐᒃᓴᖃᕐᕕᒥᓃᑦ ᐱᒻᒪᕆᐅᓪᓗᓂ ᐆᒃᑑᑎᑦᑎᐊᕙᐅᕗᖅ ᒐᕙᒪᑐᖃᒃᑯᑦ ᐊᑐᖅᐸᖕᓂᖏᓐᓂᒃ ᐃᓄᐃᑦ ᐱᖁᑎᖏᓐᓂᒃ ᑎᑎᕋᖅᓯᒪᔪᓂᒃ ᑳᓐᑐᕌᒃᓯᓂᕐᒧᑦ ᐊᒻᒪ ᑳᓐᑐᕌᒃᓯᒃᑲᓐᓂᕐᓂᕐᒧᑦ.

ᐊᓯᖏᑦ ᐊᑐᖃᑦᑕᖅᑐᑦ ᐃᓄᐃᑦ ᓇᒻᒥᓂᖁᑎᒋᔭᐅᔪᑦ ᐊᑎᖏᓐᓂᑦ ᐅᑯᐊᖑᕗᑦ:

• ᓄᓇᕗᑦ ᑐᙵᕕᒃᑯᑦ ᑎᒥᖓᑦ, ᐊᑐᖅᑎᑦᑎᓗᑎᒃ ᐃᓄᐃᑦ ᐊᑭᑦᑐᕋᐅᑎᔾᔪᑎᖏᓐᓂᒃ ᐱᔪᒥᒋᔭᐅᓂᖅᓴᐅᔪᓂᒃ ᑎᑭᓪᓗᒍ 10% ᑳᓐᑐᓛᒃᑕᐅᓯᒪᔪᓄᑦ;
• ᐊᑐᖅᑐᐊᕐᕕᒃ ᖃᐅᔨᒪᓕᕈᒪᓂᕐᒧᑦ ᐊᔪᖅᑎᑕᐅᙱᒻᒪᖔᑦ ᐊᑐᖅᑐᐊᕐᓂᕐᒧᑦ ᓇᖕᒥᓂᖁᑎᖃᖅᑎᐅᑉ ᓇᖕᒥᓂᖅᑖᕆᓂᐊᓕᖅᑕᖓᓄᓪᓗ ᑮᓇᐅᔭᖃᖅᑎᑕᐅᓂᕐᒥᒃ;
• ᑭᕙᓪᓕᕐᒥ ᑲᑐᔾᔨᖃᑎᒌᑦ ᐱᕙᓪᓕᐊᑎᑦᑎᓂᕐᒧᑦ, ᑲᑭᕙᒃᑯᑦ ᑲᑐᔾᔨᖃᑎᒌᒃᑯᖏᑦ ᐊᒻᒪ ᕿᑎᕐᒥᐅᑦ ᐱᕙᓪᓕᐊᔪᓕᕆᓂᕐᒧᑦ ᑲᑎᒪᔨᖏᑦ ᓇᓗᓇᐃᖅᓯᖁᓪᓗᒋᑦ ᐱᔪᓐᓇᖅᑎᑕᐅᔪᓂᒃ ᑐᓂᕐᕈᓯᐊᓂᒃ ᐊᒻᒪ ᐊᑐᖅᑐᐊᒐᒃᓴᓂᒃ;
• ᓄᓇᕗᑦ ᑐᙵᕕᒃᑯᑦ ᑎᒥᖓᑦ ᐊᒻᒪ ᐊᕕᒃᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᑦ ᐊᖏᒡᓕᒋᐊᖅᑎᑦᑎᔪᒪᓪᓗᑎᒃ ᐃᓄᖕᓂᒃ ᐃᖅᑲᓇᐃᔭᖅᑎᑦᑎᓂᕐᒥᒃ, ᐱᓕᒻᒪᒃᓴᕐᓂᕐᒥᒃ ᐊᒻᒪ ᓇᖕᒥᓂᖃᕐᓂᕐᒧᑦ ᐱᕕᒃᓴᓂᒃ ᓄᓇᒥᒃ ᐊᑐᕐᓂᕐᒧᑦ ᓚᐃᓴᓐᓯᓂᒃ, ᐊᑐᖅᑐᐊᕐᓂᕐᒥᒃ, ᓄᓇᒥ ᕿᓂᕐᓂᕐᒧᑦ ᐊᖏᖃᑎᒌᒍᑎᓂᒃ ᐊᒻᒪ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓄᑦ ᐃᑲᔫᖅᑕᐅᔾᔪᑎᒃᓴᖏᓄᓪᓗ ᐊᖏᕈᑦ.

ᐃᓄᐃᑦ ᓇᖕᒥᓂᖁᑎᖏᑦ ᐊᑎᖏᑦ ᐱᕕᒃᓴᖃᖅᑎᑦᑎᕗᑦ ᐃᓄᐃᑦ ᓇᖕᒥᓂᖁᑎᖏᓐᓂᒃ. ᑭᒡᒐᖅᑐᐃᒍᕕᑦ ᐃᓄᖕᓄᑦ ᓇᖕᒥᓂᕆᔭᐅᔪᓂᒃ, ᐱᒻᒪᕆᐅᑐᐃᓐᓇᕆᐊᖃᖅᐳᖅ ᐊᑎᓕᐅᖅᑕᐅᖃᑕᐅᓗᑎᑦ ᐃᓄᖕᓄᑦ ᓇᖕᒥᓂᕆᔭᐅᔪᓄᑦ ᑎᑎᕋᖅᓯᒪᔪᓄᑦ.