ᐊᓂᔮᕐᓂᖅ ᖃᓄᖅᑑᖅᓯᒪᔪᓂᒃ
ᐊᓂᔮᕐᓂᖅ ᐃᓄᐃᑦ ᐃᓕᖅᑯᓯᕆᔭᖓᑦ ᓯᓚᒧᐊᖅᖢᑎᒃ ᐅᓪᓘᑉ ᐱᒋᐊᕐᓂᖓᓂ ᑕᑯᓇᒃᖢᒋᑦ ᓄᓇᕐᔪᐊᕐᒦᑦᑐᑦ ᐊᕙᑎᑦᑎᓐᓂ: ᓯᓚᐃᑦ, ᐊᓄᕇᑦ, ᐊᐳᑏᑦ, ᕿᓚᒃ, ᐅᓪᓗᕆᐊᑦ ᓄᓇᐃᓪᓗ ᖃᓄᐃᓕᖓᓂᖏᑦ ᖃᓄᖅᑑᖏᓐᓂᑦᑎᓐᓂ ᓯᕗᒧᐊᕆᐊᕆᐊᒃᓴᖅ. ᑭᖑᕚᕇᓄᑦ, ᐃᓄᐃᑦ ᐊᑐᖅᓯᒪᔪᑦ ᑕᑯᓇᑦᑎᐊᕐᓂᕐᓂᒃ, ᖃᐅᔨᒪᓂᕐᓂᒃ ᐊᑐᖅᓯᒪᔭᕐᒥᓂᒡᓗ ᐸᕐᓇᐅᑎᒋᓪᓗᒋᑦ, ᐋᖅᑭᒋᐊᕈᑎᒋᓪᓗᒋᑦ ᐃᖏᕐᕋᓗᑎᒡᓗ ᑲᑉᐱᐊᓇᖏᑦᑐᒃᑯᑦ.
ᐊᓂᔮᕐᓂᖅ ᖃᓄᖅᑑᖅᓯᒪᔪᑦ ᓯᕗᒧᐊᖅᑎᑦᑎᕗᑦ ᑕᐃᒪᓐᓇ ᓯᕗᒧᑦ ᐃᓱᒪᓂᕐᒥᒃ. ᓯᓚᐃᑦ ᐊᓯᔾᔨᕐᓂᖏᑕ ᐊᓯᔾᔨᖅᑕᖏᑦ ᖃᓄᐃᓕᖓᔪᑦ ᐊᕙᑎᑦᑎᓐᓂ, ᑭᓯᐊᓂ ᖃᐅᔨᒪᓃᑦ, ᐅᒃᐱᕆᔭᑦ, ᐃᓅᖃᑎᒌᖕᓃᓪᓗ ᓄᓇᒥᒃ ᑐᕌᖅᑎᔅᓯᒪᕗᑦ ᐃᓄᖕᓄᑦ ᑭᖑᕚᕇᖕᓄᑦ ᑕᕝᕙᐅᖏᓐᓇᖅᐳᑦ ᕿᑎᐊᓂ ᖃᓄᐃᒋᐊᕐᓂᑦᑕ. ᐊᓂᔮᕐᓂᖅ ᖃᓄᖅᑑᖅᓯᒪᔪᑦ ᐃᓄᖕᓅᖓᔪᑦ ᐃᓄᖕᓂᓪᓗ ᓴᓇᔭᐅᓪᓗᑎᒃ, ᑐᙵᔪᑦ ᐃᓄᐃᑦ ᖃᐅᔨᒪᔭᑐᖃᖏᓐᓄᑦ, ᐃᓄᐃᑦ ᐱᔪᓐᓇᐅᑎᖏᓐᓄᑦ ᐊᒃᓱᕉᑎᖏᓐᓄᓪᓗ ᐃᓄᐃᑦ ᓄᓇᕘᒥ.
ᑐᕌᖓᔪᖅ ᑕᑯᓗᓂ ᐅᓪᓗᒥᐅᑉ ᐅᖓᑖᓄᑦ ᐸᕐᓇᒡᓗᓂᓗ ᓯᕗᒧᐊᕐᓂᒧᑦ ᓯᕗᓂᕐᒦᑦᑐᒧᑦ, ᐊᑑᑎᓕᖕᓂᒃ ᐱᒋᐊᖅᐸᓪᓕᐊᑎᓪᓗᑕ ᒫᓐᓇᐅᔪᖅ. ᐊᒃᑐᐃᓂᖏᑦ ᓯᓚᐃᑦ ᐊᓯᔾᔨᕐᓂᖏᓐᓂᑦ ᐱᕈᖅᐸᓪᓕᐊᑎᓪᓗᒋᑦ ᑕᑯᓇᐃᓐᓇᕐᓂᐊᖅᑐᒍᑦ, ᐃᓕᓪᓗᑕ, ᓱᖏᐅᑎᓗᑕ ᓯᕗᒧᐊᖃᑎᒌᒡᓗᑕᓗ. ᐊᓂᔮᕐᓂᖅ ᖃᓄᖅᑑᖅᓯᒪᔪᑦ ᓴᓇᕗᑦ ᐊᑯᓂᒧᑦ ᐊᖅᑯᑎᒥᒃ ᐃᓄᐃᑦ ᖃᐅᔨᒪᔭᖏᑦ, ᐱᔪᓐᓇᐅᑎᖏᑦ, ᓯᕗᓕᖅᑎᐅᓂᖏᑦ ᐃᒻᒥᓄᓪᓗ ᖃᓄᖅᑑᕈᓐᓇᕐᓂᖏᑦ ᑐᕌᕈᑎᒋᓗᒋᑦ ᖃᓄᖅᑑᕐᓂᑦᑎᓐᓄᑦ ᐊᐅᓚᑦᑎᓗᑕᓗ ᐊᑑᑎᓕᖕᓂᒃ ᐃᓄᖕᓄᑦ ᐊᐅᓚᑕᓂᒃ ᓯᓚᓄᑦ ᖃᓄᐃᒋᐊᕐᓂᕐᓂᒃ, ᓯᕗᓂᒃᓴᑦ ᐱᑖᓛᕐᒪᑕ ᓴᙱᔪᓂᒃ ᓄᓇᓕᖕᓂᒃ, ᐃᓕᖅᑯᓯᑐᖃᖃᑦᑎᐊᖅᑐᓂᒃ ᐅᖃᐅᓯᓂᒡᓗ, ᐱᔪᓐᓇᕐᓂᕐᓂᒡᓗ ᐋᖅᑭᒋᐊᖏᓐᓇᕐᓗᒋᑦ ᓇᖕᒥᓂᖅ ᓯᕗᓂᒃᓴᓂ.
ᑎᑎᕋᖅᓯᒪᔭᕗᑦ ᐊᐱᖅᑯᑕᐅᒐᔪᑦᑐᑦ (FAQ)
ᐊᓂᔮᕐᓂᖅ ᖃᓄᖅᑑᖅᓯᒪᔪᑦ ᐃᓄᖕᓂᑦ ᐊᐅᓚᑕᐅᓪᓗᓂ ᐱᓕᕆᔾᔪᓯᖅ ᓵᔾᔪᑕᐅᓪᓗᓂ ᓯᓚᐃᑦ ᐊᓯᔾᔨᕐᓂᖏᓐᓂᒃ ᓄᓇᕘᒥ. ᓴᓇᔭᐅᓚᐅᖅᑐᑦ ᓄᓇᕗᑦ ᑐᙵᕕᒃ ᐃᓚᓕᐅᑎᓯᒪᔪᓄᑦ (ᓐᑎ), ᐃᓚᐅᓪᓗᑎᒃ ᐱᖓᓱᓂᑦ ᐊᕕᒃᓯᒪᔪᓄᑦ ᐃᓄᐃᑦ ᑎᒦᑦ, ᑐᕌᖅᑎᑦᑎᓪᓗᑎᒃ ᐃᑲᔪᖅᖢᑎᒡᓗ ᐃᓄᖕᓄᑦ ᐊᐅᓚᑕᐅᔪᒧᑦ ᓯᓚᓄᑦ ᖃᓄᐃᒋᐊᕐᓂᕐᒧᑦ ᓄᓇᕘᒥ.
ᖃᓄᖅᑑᖅᓯᒪᔪᑦ ᐋᕿᒃᓱᖅᑕᐅᓚᐅᖅᑐᑦ ᐃᓄᖕᓂᑦ ᓄᓇᕘᒥᑦ. ᓄᓇᓕᖕᒥᐅᑦ, ᐃᓐᓇᑦ, ᒪᒃᑯᒃᑐᑦ, ᐊᖑᓇᓱᒃᑏᑦ, ᐸᖅᓴᐃᔩᑦ, ᖃᐅᔨᒪᔩᑦ, ᓄᓇᓕᖕᓂ ᓯᕗᓕᖅᑏᑦ ᓄᓇᕗᑦ ᑐᙵᕕᒃᑯᑦ ᐱᖓᓱᓪᓗ ᐊᕕᒃᓱᒪᔪᓄᑦ ᐃᓄᐃᑦ ᑲᑐᔾᔨᖃᑎᒌᖏᑦ ᐃᑲᔪᓚᐅᖅᑐᑦ ᖃᐅᔨᒪᔭᒥᒍᑦ, ᐊᑐᖅᓯᒪᔭᒥᒍᑦ ᐊᒃᓱᕉᑎᒋᔭᒥᓄᓪᓗ.
ᑐᕌᕈᑏᑦ ᑎᓴᒪᐃᓕᖓᓪᓗᐊᑕᖅᑐᑦ ᐅᑯᓄᖓ:
ᓄᓇᕐᔪᐊᕐᒥᐅᑦ – ᓴᐳᑎᓗᒋᑦ ᓄᓇᐃᑦ, ᐃᒦᑦ, ᓯᑯᐃᑦ, ᐆᒪᔪᑦ ᐊᕙᑏᓪᓗ
ᐃᓕᖅᑯᓯᑐᖃᑦ ᐅᖃᐅᓰᓪᓗ – ᓴᙱᒃᑎᑦᑎᔪᑦ ᐃᓄᐃᑦ ᐃᓕᖅᑯᓯᑐᖃᖏᓐᓂᒃ, ᐃᓄᒃᑎᑑᒥᒃ, ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᓯᕗᓕᖅᑎᖏᓐᓂᒡᓗ.
ᖃᓄᐃᖏᓐᓂᖅ ᐃᓅᓯᖃᑦᑎᐊᕐᓂᕐᓗ – ᓵᓪᓗᒋᑦ ᐊᒃᑐᐃᓃᑦ ᖃᓄᐃᖏᓐᓂᕐᓄᑦ, ᓂᕿᓄᑦ ᐃᒥᕐᓄᓪᓗ ᐱᖃᕈᓐᓇᕐᓃᑦ, ᐃᓱᒪᒃᑯᑦ ᖃᓄᐃᖏᓐᓃᑦ ᑲᑎᙵᓃᓪᓗ ᓄᓇᓄᑦ.
ᓄᓇᓖᑦ ᐊᖏᕐᕋᐃᓪᓗ – ᓴᙱᒃᑎᓪᓗᒋᑦ ᐃᒡᓗᖃᕐᓃᑦ, ᐱᖁᑎᕐᔪᐊᑦ, ᓄᑭᓕᐅᕐᓃᑦ, ᑐᐊᕕᕐᓇᖅᑐᓄᑦ ᐸᕐᓇᒃᓯᒪᓃᑦ ᓄᓇᓕᖕᓂᓗ ᑮᓇᐅᔭᓕᐅᕐᓃᑦ.
ᐸᕐᓇᒃᓯᒪᔪᑦ ᐱᖃᓯᐅᔾᔨᕗᑦ ᑕᒪᒃᑮᖕᓂᒃ ᐸᕐᓇᒃᓯᒪᔪᓂᒃ ᐱᓕᕆᔾᔪᓯᕐᒥᒡᓗ. ᐸᕐᓇᐅᑎ ᐋᖅᑭᒃᓯᕗᖅ ᐃᓄᖕᓄᑦ ᐱᓕᕆᔭᐅᔪᒪᔪᓂᒃ, ᖃᕐᒪᐃᑦ ᐋᖅᑭᒃᓯᒪᔪᑦ ᐱᕕᖃᖅᑎᑦᑎᑎᓪᓗᒋᑦ ᐊᓯᔾᔨᕈᓐᓇᖅᑐᓂᒃ ᐱᓕᕆᔾᔪᓯᕐᓂᒃ ᑐᙵᕕᒃᑯᓐᓄᑦ ᐃᓚᐅᔪᓄᓪᓗ ᐊᕕᒃᓯᒪᔪᓄᑦ ᐃᓄᐃᑦ ᑲᑐᔾᔨᖃᑎᒌᓄᑦ ᓇᓗᓇᐃᖅᓯᓗᑎᒃ ᓯᕗᒧᐊᖅᑎᑦᑎᓗᑎᒡᓗ ᓇᓕᐊᓪᓗᐊᓂᒃ ᓯᓚᓄᑦ ᖃᓄᐃᒋᐊᕐᓂᕐᓂᒃ ᖃᖓᒧᑦ.