Anijaarniq Parnaqutinga
Anijaarniq Inuit pitquhiat aniiriami ublup aullaqtilihaaqtillugu takuriyaami avatingnit—hila, anuri, aput, qilak, ubluriat, qanurinmangaat nunap—ihumaliuqtinnatit qanuriliurutikharnik. Ingilraanin, Inuit naahurivaktait qun'ngiarniq, ilihimaniq, atuqhimayatiglu upalungaiyariami, hungiutiyaamik, tingmiyaamilu qayangnaittumik.
Una Anijaarniq Parnaqutinga pihimayauyuq una qanuqtun ihumaniq aullaraanginnaqtuq. Hilaup aallannguqtirningani aallannguqtiliqtaa nunaryuami avatiptingni, kihimi qauyihimaniq, ukpiridjutit, atadjutillu nunamun hivulliudjutigivaktait Inuit ingilraanin huli qitqaniittut huli qanuqtun kiudjutiptikni. Una Anijaarniq Parnaqutinga piliuqtauhimayuq Inuinnarnit, Inuinnainut, tunnganiqaqtuq uvani Inuit Qauyimayatuqanginnit, Inuit pilaarutainnit, hivulliutidjumayangillu Inuinnarnin tamaanut Nunavunmi.
Talvuuna ihumayaangat ublumimut upalungaiqhimayaangallu hivunikhaptingnik, taimaa aulahimmaaqtillunik atuqtakharnik hadjamimut. Taimaa ayurnautigivakhimayangit hilaup aallannguqtirinikkut angigliyuumiqhimaaqtilunik, qunngiaqhimaarniaqtugut, ayuiqhaqhimaarlutalu, hungiutihimaarlutalu, hivumuuqpallialutalu atauttikkut. Taamna Anijaarniq Hanaqidjutikhaq aulattittivakhimayuq hivutunirmik apqutikharnik taimaa Inuit ilihimayangit, pidjutikhangit, hivulliqtikharnik, nanminikharnik atuqtakharnik malikhautikharnik atuqtakhaptingnik aulattittiyaangallu Inungnit-hivulliqtikharnik hilaup aallannguqtirinikkut hanaqidjutikharnik, taimaa hivunikhaptingnit kingulivut piqarianganik hakugiktumik nunallaangit, quvianaqtumik pitquhiqaqtunik uqauhirniglu, pidjutikharnik aulattittiyaangat nanminikharnik hivunikharnik.
Frequently Asked Questions
Una Anijaarniq Parnaqutinga Inuinnarnin-hivulliuqtauyuq hivunikhaq havaagutiginikkut hilaup aallannguqtirninganun Nunavunmi. Piliuqtauhimayuq Nunavut Tunngavik Timiqutinga (NTI) ukuallu pingahut Aviktuqhimanirnit Inuit Katimayiinnin, ikayuriami hivulliurutikhanik ikayurnikkullu Inungnit-hivulliuqtauyut hilaup aallannguqtirninganut havaagutinik tamainnit Nunavunmi.
Una Parnaqutinga havaktauhimayuq hapkunannga Inuinnarnit avatainnit Nunavunmit. Nunallaani ilauyut, Inirnikhat, Inulrammiit, Anguniaqtit, Qiniqhiayit uvvalu Annaktuinikkut ilagiit, Ilihimanikkut tigummidjutiqaqtut, Nunamingni hivuliqhuqtut, Nunavut Tunngavik Timiqutinga, uvvalu pingahut Avikturniannit Inuit Katimayiit tamaita uqautigiyait inmi ilihimayatik, atuqhimayatik, hivulliuyukhallu.
Una Parnaqutinga hitamanit inikhaliurutiqaqtut:
Una Nanminiriyaqqut Hilaryuaq – hapummiyaat nunat, imat, hiku, anngutikhait unalu avataita.
Pitquhivut unalu Uqauhivut – hakugikhiyuummirlugu Inuit pitquhingit, Inuktut, Inuit Qauyimayatuqangit unalu hivuliqhinikkut.
Aanniarnaittumik unalu Inuuhurinnaqtumik – uqautigiblugit qanuq hulaqutauyut inuuhirmut, niqinut imarmullu, ihumakkut inuuhiqattiarnirmut, atadjutiptingnullu nunamut
Nunallaat unalu Aimaviit – Hakugikhiyuummirlugu iglukhanik, aulapkaidjutikhanik, auladjutinik, amigaqhuutiqaqqat upalungaiqhimanirnik, nunallaanilu piangaiyarnikkut hakugitqiyauyunik.
Una Parnaqutinga qanuriliurutikhat tamarnik Upalungaiyautiqaqtut Havauhikhaniglu. Upalungaiyautit tautungnaqtut hunat Inuit piyumayut iniqtirlugit, taimaalu Qarmait Atugakhaq tunihiyuq ayurnaittumik Nunavut Tunngavik Timiqutinga uvvalu Avikturniannit Inuit Katimayiit naunaiyarlugit uvvalu hivumuuqtilugit kitut hilap hulidjutikhait qakugu.